یا زینب کبری مدد
رسم عالمدی سالار اوز گولونی خار الینده
خار اگر خوار اولا وئرمز گولون اغیار الینه
خار اگر خار اولا گولشنده گولی خوار اولماز
خوار اولار گول دوشه گر خوار تبهکار الینه
کوفیان خار مغیلاندی نه خار گل سرخ
گل سرخ حرمی وئردیله اشرار الینه
شامیان کرکس ناکسدیله جوریله ویروب
کربلاده حرم آهوسینی منقار الینه
گوش جان شهر دمشقین آلوری ناله سینی
سالوری ناله منی آه شرر بار الینه
ناله جانسوزدی زینب ائلوری داد و نوا
تاپشورور ناله سینی ثابت و سیار الینه
زینبین آلدی سسین کربوبلا سلطانی
پرچمین وئردی اباالفضل علمدار الینه
دئدی قارداش گئدیرم زینبیمی بیرده گورم
تاپشورام زینب دلداده نی دلدار الینه
زینبین بیرده گتیردی ایکی پرپر گولونی
تاپشوروب گوللری اکبر کیمی غمخوار الینه
گتوروب قاسمی عبداللهی قارداشلارینی
اصغری بیرده آلوب شاهد ابرار الینه
جمله معناده گلوب زینبی درک ایله دیلر
در و گوهر یتشوب قلزم زخار الینه
ویردی عباس علمدار علمین شاماته
مایهء غصه و غم یتدی عزادار الینه
یاره آتلار ایاقینده قالان اگلشدی
زینبین آلدی باشین خسرو احرار الینه
آغاران باشینی آهسته آلوب دیزلرینه
یاره لی بیر الینی وئردی او دل زار الینه
قارداشین اشک و تری آخدی باجی صورتینه
سالدی گو زینب کبری در شهوار الینه
منتظر گوزلری بیر باخدی حسینین یوزونه
گوهر وصل دوشوب وصله گرفتار الینه
دئدی قارداش بو گلن یوللارا زینب قرآن
زینبین دوشوب عجب فرصت دیدار الینه
ای طبیب دل بیمار منم بیمارون
چارهء درد دوشوب گور نئجه بیمار الینه
دردیمه چاره بودور بوس ائلییم حلقوندن
گور نولار شانه دوشه طرهء طرار الینه
بیرده قارداش دئنه اکبر منه یاسین اوخویا
بلکه آسوده وئرم جانیمی دلدار الینه
دئدی سلطان بلا آغلاما یاندیرما منی
باجی جان سالما منی آه شرر بار الینه
اوزون آگاهسن ای آگه پیمان ازل
اللریم دوشدی گئجه بجدل خونخوار الینه
گلمیشم رحمت بسیاریله تا اینکه وئرم
کسیلن اللریله اللریوی یار الینه
داهی شبگیر دایان جف قلم لازمدور
وئرمه اسرار خفی شعریده اغیار الینه
دل مخموریوه میخانه ده ساقی زینب
اودی مخمور باخار عشقیله خمار الینه
ماء قدسیدی که تزریق اولوبدور قلمه
اودی کیم طبعون آلوب ساغر سرشار الینه
نوک خامه نده طلسمات مبینی مخفی
زائر اولموش قلمون حیدر کرار الینه
کاروان هنر شعریده مولی سالار
کاروان بسته اولار قافله سالار الینه
علم اعدادیده بسدور عدد یکصد و ده
حرف تطبیقی وئر محرمین اسرار الینه
١٧رجب ١٤١٤ هجری قمری