روايات يمنية📚🇾🇪

رواية خربشات وجـع للكـاتبـة : نجـلاء يحيـى

rewayatyamania

البـارت 52 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

وصلت لخالد الرساله (رسالة شهد حسستني ان فيها شي وقلبي مقبوض عليها حركت كل مشاعري وكل شي فيني فقدتها... اول مرة من يوم زواجي بشهد ترسل لي مثل هذه الرساله احتاجك وفقدتك وضابحه شاقرح عيشني ولو فوق سيارتك اهم شي اكون قربك ماقدرت امسك نفسي ولو كنت طير لكنت فردت جناحي وطرت لعندها طفلتي وصغيرتي دلوعتي وملكي ومملكتي شهد.. ضغطت اتصال واتصلت لها

خالد: حبيبي امانه لا خبيتي عليا شي مالش

شهد بكيت وماعاد تحملت (جي شلني اذا تحبني جي شلني عندك انا ضابحه أنا فدالك ياخالد

خالد وقلبه قشنن من كلامها (لٱ تبكيش امانه لاتخليش عيونش الحاليات يتخرب جمالهن غدوه وانا عندش وعد مني لاجي اشلش

شهد بتمسح دموعها مثل الاطفال: صدق

خالد: والله لاجي غدوه أن شاء الله جهزي ثيابش ذاحين قلي لي مالش ما مضبح لش

شهد: شارجع اقلك لماابسرك قلي مابتفعل

خالد: مخزن بين اكمل العمل قلي لي مالش هياااااا بحجر الله

شهد بدلع: ولاشي غير فقدتك وقلبي ماعاد قدر يتحمل بتوحشني خيرات وبين احس بفراغ وضبح اجي بيتنا واضبح اسير بيتكم واضبح

خالد وقلبه قدو بيحس انه طاير من الفرح : وانا والله ثم والله ثم قسسسسسسم بالله اني بين افقدش واصل ليكن اول مرة احس أن قلبي يشتي يخرج من بقعته ويجي لعندش كلامش خلاني اطير من الفرح وحسسني انش تحبيني صدق

شهد: ليش او حسستك في يوم اني مااحبك

خالد :ذكر فترة الحمل (ماشي غير اليوم قوي حسيت بهذا الاحساس

شهد: وطول العمر الله لايحرمني منك ولا من وجودك ويديم انفاسك لي عافيه وضحكتك حياه

خالد: مطنن في كلامها وابتسامته ملان وجهه دخل لعنده كمال

كمال: يييييييه غلق لقفك من الشخره قدو فيل عيدخل مش الا ذبان

خالد: قرح ضحكه ههههههههههههههههههههههه

شهد: مالك بتضحك يييييه خالد لٱ تسير تشترغ بالقات

خالد من بين ضحكته : شهد خلاص شاتصل لش بعدا وغلق الخط

خالد رجم كمال بالدفتر اللي جنبه: شلوووووووك الجن عاد الناس يتنحنح يدكم رجله في الباب يقل ييييه وووووو مش على طول مهري ما عاد حتى مسكت بريك ابسرك قبالي

كمال: هو انت الهايم الذي ماعاد حسيت بوجودي ورفع ايديه الثنتين (بشكل انه يدعي) وقال: الله يوصلناااااا

(كلنا نقوووول يارب😜😉)

…………

بعد مرووووور ايام

فتح عليها باب شقتها كانت نايمه في غرفتها وغارقه بنومها ماحست بوجوده ولا بصوته الذي بيداعيها فتح باب غرفتها شافها نايمه أركى جسمه الضخم والممتلئ علـى حافه الباب وجالس بيتأمل ملامحها وبيكلم نفسه
ضعفت شويه وبشرتها صفيت أكثر بس لونها شاحب خدودها باهت لونهن بعد ما كانين موردات مثل حبات الرمان شكلها ذابل بس مازالت أجمل بنت شفتها وقابلتها
داخله شوق لها وفاقد لها قرب شويه منها سمعت بخطوات بتقرب منها قبل ماتفتح عيونها خافت مسكت اللحاف اللي كانت متغطيه فيه بقوة وشدت عليه فتحت عيونها بشويش شافت رجال قدامها ما انتبهت على ملامحه شهقت بقوة وصاااااااحت صووووت لما رجع صداها ملان االشقه

مرتضى: اششششششش دعاااااء قرب منها اكثر وحط يده فوق ظهرها بسم الله عليش بسم الله انا مرتضى لٱ تخافي

دعاء كانت مغمضه عيونها سمعت كلامه فتحت عيونها شافته قدامها أرتخى جسمها وضمته وكأن هي مش مصدقه وانفاسها بتلاحقها وبكيت ما عاد قدرت تعبر خوفها او فرحها

مرتضى: سامحيني فجعتش غصب عني بعدين لٱ تخافي محد يقدر يوصل لشقه ويفتح الباب كل شي بتقنيه حديثه ماكنت متوقع انش جبانه لهذه الدرجه شل في يده خصل من شعرها وبدأ يستنشق رائحتهن

دعاء أرتفعت من حضنه شويه :بسرته قدامها بتتأمل ملامحه سمن وزاداد بياضه أكثر
لحيته خففها ولون الشعر الابيض فيها ملحيها أكثر

رغم كبر سنه الا انه وسيم وشخصيه في كل حالاته وباين علـى ملامحه انه مرتاح ( بعدت منه ورجعت لعرض السرير رفعت شعرها بطريقه عشوائيه زادت من جمالها وقالت (الحمد لله على السلامه)

مرتضى بيتأملها بكل شعور ماهو قادر يفسره:الله يسلمش كيف انتي

دعاء :الحمد لله كيفي مرتك تعافت

مرتضى: الحمد لله وانا قلي لي كيف انا

دعاء :شافته بنظرة عتاب (ماتهمني ويحين عتطلقني

مرتضى بصدمه : اطلقش

دعاء :ايوه حابسني مثل الكلبه عاد الكلبه بتخرج ومعها حريه وحابسني ثلاث اشهر ولا عبرتني حتى باتصال من انا اصلا عشان تتصلي وتطمن عليا ولا حاسس بوجودي ولا ذاكر لي والله لولا خوفي على ام أبراهيم واني شاسبب لها مشاكل اني خرجت وغصب عنك والله لو انا حيوان ماتفعل بي هكذا بدأت دموعها تنزل انخنقت والله اني مخنوقه بسببك تخيل حد يحسبك ثلاث شهور
اعلنت بعدها استسلامها لدموعها وكانت تتكلم من بين شهقاتها وتعاتبه

مرتضى (دموعها هزين كياني انتي بجمالش ماخلقش الله تبكي انتي انخلقتي وجابش القدر لي انا اناني فيش ومريض مشتيش حد يبسرش غيري او انش تهربي عليا ماقدرت والله اتواصل معش انغام...

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 53 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

انغام معي ولا خلت لي فرصه اكون وحدي يشهد الله ما نسيتش دقيقه كنش مرض وصابني الله فيه
ماقدرت أنساش ( قطع عليه سرحانه وكلامه بينه وبين نفسه وهي بتهزه بيدها علـى صدره

دعاء: انت أخبث رجال بعد اخي كلكم كريهين كلكم نفس الطينه

مرتضى لمها بقوه وقال(سامحيني والله ماقدرت واخر مره خلاص السفريه الثانيه عتكوني معي قلي لي مالش ضعفتي معقوله غيابي فعل بش هكذا

عند انغام: رسل لي العنوان الان

السواق: حاضر الان

انغام :اذا ماقلتي لي مابتفعلي طول مااحنا مسافرين للشقة اللي في الشارع ال… الدور الرابع الشقه رقم 3 لاترجعي من حيث جيتي وبدل العز الذي انتي فيه عترجعي للحضيض

ام ابراهيم بحكمه وعقل: الرزق بيد الله مشو بيد المخلوق ومشيت

انغام بصوت قوي :ام ابراهيم تعالي لهنا

ام ابراهيم: شافلت العمل ولا شتكلم بشي

انغام بصوت: حيوانه كلكم خباث انتي ومرتضى والقدر والجحيم الذي انا فيه ودخلت في نوبة بكاء عميقه

(رأيكم بانغام وغيرتها وهل عتقبل وجود دعاء

عند دعاء: والله اني حامل

مرتضى: رجع فيه الزمان لقبل مدري كم سنه مضت عليه

انغام: احتمال اكون حامل

مرتضى وكنه طير في السماء :ماعنديش احتمالات جي نسير نتاكد

انغام: قد قلت لاسماء قالت العصر فاضيه شاسير واتأكد

مرتضى: يارب تكوني حامل ويطلع احتمالش صح انتي داريه وضم كفوفها بين كفوفه لو يطلع هذا الخبر صح ما شافعل لش

انغام بحب ودلع لفت ايديها حول رقبة مرتضى : ايش عتفعل لي

مرتضى : املاكي وممتلكاتي وفللي وسياراتي وشركاتي ومعارضي وكل شي كل شي املك تحت امرش وامر الذي عتديه يحمل اسمي لو دثرني الزمن

انغام :واذا طلع الخبر مشو صح

مرتضى: اذا طلع الخبر واحتمالش مشو صح سهل عيدي الله مرة ثانيه ويكون كل شي حلالش ولش

دعاء: يييه مرتضى مالك مطنن

مرتضى: قومي البسي

دعاء: وين عنسير

مرتضى: قومي وبس سريع

دعاء :قامت لبست البالطو وهي فاقده للشارع والهواء خرجت من باب شقتها وتنهدت مسكت يد مرتضى الذي سارح في عالم ثاني ولاحس بمسكتها كأنه جثه فارحه في جسد ميت بيفكر لو صدق تطلع دعاء حامل هذا الشي الذي تمناه طول عمره وماعمل حسابه من هي ومن تكون وابنه او بنته الذي عيجي من هو ومن يكنوا اهل امه نسبهم رخيص وما يشرف

انا مرتضى ال…. الذي اسمي يعرفه الكبير والصغير ولي املاكي وثرواتي نص اليمن ودول الخارج وكم شهر وافتتح اكبر جامعه خصوصيه في اليمن يجي لي طفل اصله (مزين) ولو كان مزين باحترام هذا عادو مزين بسمعه فاقسه خرجت منه نهده عميقه شاف دعاء وزعل عليها داخله يارب مايكون الحمل صح يادعاء لاني شاغثيش ومشتيش تغثي مني ولااشتي افلتش قدش الراحه والسعاده حقي المحروم منها عمر

(الطبقات الاجتماعيه عندنا تفعل دور وفرق كبير)

ام ابراهيم بتحاول تتصل لعند مرتضى وتلفونه خارج نطاق التغطيه لفت اشيائها وخرجت من الفله الذي قضت فيها وفنت عمرها فيها من لما كان عمرها في الثلاثينات

عند شهد
روحت بيت زوجها بتمشط شعرها قدام المرايه ذكرت كلام يوسف امانه ياشهودي اذا لي حب في قلبش لٱ تقصي شعرش ابدااا مهما مر عليش الوقت احب الشعر الطويل واحبش انتي ياام العيون العسلي

(كل ما امشط شعري من يومها من يوم رسالتك وصوتك يرجع صداها في اذني واتخيلك بتقولها لي زاد حبي لشعري لانك وصيتني عليه اهتميت فيه اكثر من اي شي ثاني فيني كنت لافقدتك ومالقيتك جنبي امشط شعري وانزل عند العصافير اكلمهن منك بس اليوم الالم الذي سببته لي رغم اني معاك وقد تزوجت رغم اني مافلتك ولاسخيت على قلبي يفلتك حتى والله يا يوسف كل ما كنت اُصلي وادعي واقل يارب قنعني منه يارب قنعني منه كان داخلي صوت يقل لٱ تصدقش يارب رغم حاجتي للقناعه منه الا اني مارضيت لنفسي ولو لساني بيردد هذا الشي بس اليوم وعزة جلال الله اني اشتي اقنع منك قلبي بيذكرك ويوجعني قوي اشتي اردك غريب مثل ماكنت
باقي وجعين منك ويقتنع قلبي يايوسف وجع عرسك💔 ووجع اني جت منك مش مني)

عند مرتضى
وصلوا لعند عيادة الدكتوره اسماء

مرتضى بيكلمها على جنب هذه المره يادكتوره اسماء لو تكذبي وتزوري عليا مثل المره الاوله لتشوفي شي عمره ما شفتيه المره الاوله شفعت لش لان انغام هي اللي جبرتش بس هذه المره شاشوف بعيني

د/أسماء : مكانك حاقد وذاكر يا استاذ مرتضى

مرتضى: مش حاقد بس عمري ما شانساه انكن تعيشيني في فرحه كني في السماء طاير من الفرح بعدا تنكعني للقاع فعلا ان كيدكن لعظيم

دعاء كانت تسمعهم سكته دخلت هي ومرتضى وامتدت فوق السرير رفعت البالطو عن بطنها ورفعت الشميز بعدها قربت اسماء فعلت لـٍهآ الجل وبدات تحرك يد الجهاز فوق بطنها بتشوف بتمعن شلت بعدها فاين وبتنشف بطنها عادت فعلت الجل مرة ثانيه ونفس الحركه بعدت من فوقها وسارت لمكتبها بعد ما اخذت الورقه اللي طلعت من الجهاز

مرتضى: مالش ساكته

اسماء :مرتك حامل

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 54 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

او مدري ما تكون لك واذا مش واثق من كلامي هذا تقرير الحمل سير افحص عند دكتور غيري غريب عشان تثق اكثر

مرتضى وكل عرق فيه دخن : في شهر كم

اسماء :شهرين ونص تنتبه لنفسها كويس وهذه (كتبت في الورقه علاج) بعض الفيتامينات تشربهن للشهر السابع

مرتضى: اخذ الورقه ومشي من عند الدكتوره

دعاء جالسه ساكته (من ساعة مادخلنا لعند الدكتوره وانا بين اشوف عيون مرتضى كانين ماليهن الخوف والحيره الف سؤال داخلي اشتي اسأله انا من انا له ولاي حين عيخليني عنده بس بعد حملي منه خفت اكثر منه ومن قراره الذي عيتخذه خوفه باين من عيونه صح انه محروم من الضنا هذا العمر كله بس متأكده انه عمره ما تمنى يكون ضناه من انسانه مثلي صح اني طاهره وطهري بان وثبت له بس من انا ومن اهلي ونسبي عمره ماعيرضاه لشخص مثله هزني الحنين لهيثم من امس جاء على بالي وذكرته فجاه يمكن انه ذكرني ساعدني كثير وقت مااحتجته اشتي ارد الدين الذي عليا وارد فلوسه لانه جرحني كثير بكلامه الاخير مش عارفه كم مقدار الفلوس الذي اداها لي لاني ماكنت احسب بس اتوقع انها فوق المليون شارسل له الذي معي من مهري الذي مكني مرتضى بغض النظر الذي مكن فاديه اختي مهري ثلاثه مليون نويت مليون اتصدق به وامكن ام ابراهيم لاجل الله يحفظ لي حياتي هذه ولا يخلي مرتضى يفلتني اذا فلتني شارجع الشارع صح اني مش مبسوطه ولافي قمه سعادتي وصح ان هو غامض وكتوم بس حنون صح انه كبير وعميق تفكيره وشخصيته قويه وصح اني خايفه منه اكثر ما بين احس بالطمأنينة معه خوفي انه يفلتني ويمل مني ويرجمني لفاديه مرة ثانيه مرتضى سبيل النجاه والخلاص من فاديه وفسوقها ومليون ارسله لهيثم ويعرف اني رديت فلوسه ومليون اخليه لغدر مرتضى لي

كانوا طول الطريق الصمت مخيم للمكان شافوا ام ابراهيم بعد ما وصلوا لباب شقتهم جالسه باب الشقه

مرتضى: خاله مالش هنا خير

ام ابراهيم: كم اتصلت لك ياابني ولا بتجاوبني اشتي اقلك

دعاء :ادخلي ياخاله اول ماعتتحاكي في الباب فتحت باب الشقه ودخلوا
ام ابراهيم: انغام

مرتضى:…
بيشوفها بصمت

ام ابراهيم: داريه بدعاء وسألتني من هي الشقه ومن فيها الذي بين اسير انظفها واجلس عندها وهددتني اذا ماتكلمت لترجعني للحضيض

انا ماذكرتك ولا جبت سيرتك شليت نفسي وخرجت من الفله وقلت لها الرزق على الله

دعاء دمعت عيونها وزاد خوفها مسحت دموعها بسرعه ودخلت غرفتها

مرتضى شافها وسكت

ام ابراهيم: ياابني به حد بيراقبك بس لاني شاحفظ اسرار البيت الذي كنت فيه ادرى بنفسك وافتح عيونك وامانه لسخيت على هذه البنت الذي معاك

مرتضى: انغام كذا والا كذا انا قدنا ناوي اقلها بس اللي قاهرني اسلوبها ومراقبتها لي ومن هو هذا الذي تجرأ ووافق يراقبني .

عند شهد
نزلت لعند العصافير بعد ما جهزت ثيابها دخلت لعندهن شلت القفص وخرجت لحوش البيت جلست في اقرب مكان وبتشوفهن بصمت وداخلها (كنت اذا ضاق حالي وماقدرت اكلمك انزل لعند العصافير واشلك بين كفوفي واكلمك بكل شي احس براحه بعدها وكأنك سمعتني الحمدلله ان الله ماكشفني عند خالد وجالس ساتر عليا اليوم نويت بعد ما خطبت وفلتني وسخيت تخطب جارتي وهذا اللي قهرني اكثر واكثر لْـۆ كانت واحده من بعيد ماكنت شاشيل بخاطري هكذا عليك يعني انا ماانا بالنسبه لك دامك قادر تخطب وجيت حتى خطبت من حارتي ريحني وقنع قلبي منك وقلي من انا ماكنت لك يايوسف ما معي غير كلمه واحده كفيله توصف شعوري وحسرتي حسبي الله فيك وعلى كل شعور ذوقتني)

قربت وفتحت باب القفص اخذت العصفور بين كفوفها ماقدرت تعبر بكلمه طيرته للسماء وبتشوفه بيبعد شويه شويه بتتأمله بعيونها العسلي وجمالها الطفولي بيبعد اكثر واكثر تنهدت وحست بغصه داخلها لفت ارجلها وطرحت راسها على ارجلها واعلنت نوبه بكاء كانت العصفوره تسمع بكاها وتطير ملان القفص وكأنها كانت تشتي تطير مع العصفور بس شهد منعتها وقررت تعيش وحدها وتنساه

في مكان اخر في الحوش
كان بيراقبها و اول مرة يشوف شهد وقال جميله وصغيره بس ملامحها حزينه استنكر تصرفها وبعدها بكاها وتصرفها ما يفسر الا شي واحد من صاحب العصافير الذي اهدى شهد وليش خلت واحد يسير لحاله وواحد خلته في القفص

(مختار ماكنت اشتي اشوفها بس هي ما لاحظت وجودي بعد ما خرجت عمتي انيسه ووصتني اجي البيت وانتبه له شفت بنت دخلت البيت كنت ناوي اخرج من فوق سيارتي بس عرفتها ان هي شهد ولما شفت ابوها دخل معاها للحوش وودعها وباسها في راسها وباسته هي كمان شلت اغرضها الذي معاها وتوجهت لباب البيت ودخلت شويه غلقت زجاج السياره عليا وقلت افعل لي نعسه نوم سمعت صوت الباب افتتح مرة ثانيه غصب عني شفتها كانت جميله جدا وعرفت بعدها عشق وجنون خالد لها. بنت جذابه كنت جالس اتاملها بعدها عوذبت من الشيطان وغضيت بصري بسرتها بعدها طرحت قفص العصافير وشفت حركتها الطفوليه وهي بتشوفهن بصمت وبعد وقت مشو قليل شفتها...

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 55 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

وبعد وقت مشو طويل شفتها خرجت واحد من العصافير واطلقت حريته غصب عني راقبت حركه عيونها كانت فاتنه وهي بتشوف للسماء بعيونها.. بعدها سمعت صوت بكاها لعندي دخل الشك داخلي ليش بكيت ومن الذي ادى لها العصافير وليش خلت واحد وبقت واحد الف سؤال داخلي

شهد (امس سافرت الحديده للمره الثالثه مرة وانا صغيره ومره وانا في اجازه اول ثانوي واليوم للمره الثالثه الذي شلني هو مختار وصاه خالد يديني لعنده شعور غريب حسيت فيه لما كلم مختار واحد في تلفون واسمه يوسف كان قلبي يدق وكأنه يقلي هو نفسه يوسف حسيت الساعات ثقيله وطويله وممله لانه كنا طول الطريق صامتين

عمتي (ام خالد) زعلت قوي على قرار خالد اني استقر عنده لما يكمل عمله وبكيت وجعني بكاها قوي وكنت شاتراجع في اللحظات الاخيره بس قناعتها ان هي ما عتفلت بيتها وتجي معي الحديده ودعواتها لنا انا وخالد حسستني براحة ضمير شويه

يوسف(اليوم حسيت ان شهد فعلا قررت تبعد عني اخبارها انقطعت عني فكرتها شايله خاطرها من حكايه الخطبه بس لها اكثر من وقت ماعاد هي شهد الذي عرفتها حاولت ارسل لها واستفزها اشتي اسمع صوتها لان هي ضعفها صوتي واقدر عليها تخرج كل ما في قلبها بس ما رضيت تكلمني قلبي ضايق قوي امي مريضه وهي الان في غيبوبة سكر وهي في مستشفى ال… وضعنا زفت لها ثلاثه ايام اتصلت لمختار اشتي اتسلف منه بس صدمني يوم قال ان هو نازلي الحديدة ومعه مرة خالد عتستقر في الحديده حسيت اطراف اصابعي ثلجت شهد عتبعد عني وانفاسها عتكون في مدينه ثانيه رد صوت داخلي خلي للبنت حالها ماانفاسها سمعها غيرك انت احقر شخص في نظري يايوسف رد يوسف على نفسه انا ماناش حقير انا عشقتها وحبيتها والله شاهد وشعوري ما داري فيه الا الذي خلق هذا الشعور قطع عليا كلامي بيني وبيني نفسي اتصال مختار لي

مختار: ها يوسف شاحول لك الان تسلفت لك من خالد والله كما رجعت صنعاء شاحولها لخالد وانت كما ادى لك الله رديتها

يوسف: تسلم حبيبي الله يحفظك اردها لك في الافراح

مختار: ولو ومن قال يسلم .

…

عند شهد
جالسه بتتفرج البحر كان خالد ومختار مخزنين فوق السياره وهي كانت سارحه بتخربش الرمل وترسم حروف بعدها سمعت صوت باب السياره تغلق شافت مختار بيمشي قامت ونسيت الحرف اللي رسمته

شهد :وين سار

خالد: يحول زلط لصاحبه

شهد: ها

خالد مكنها عودي قات وبيقطل عودي ثاني

شهد بعدت البرقع وشبكت بالتلفون حقها اغنيه صنعانيه شافت يد خالد باب فمها حمرين خدودها وفتحت فمها

شهد: تسلم

بسرها بنظره ورفع حاجبه

كان خالد بيتأمل لشهد وهي سارحه في كلمات الاغنيه

(هذه المره شهد مخبيه عليا شي احس من نظرة عيونها الاسى والالم احس داخلها شي مسكت يدها الذي مسكتني الان بقوه عظيمه وضمتها لي اول ما شافتني حسستني بهذا الشي كلامها الاخير ووجودها جنبي الان ملامحها ذابله و ابتسامتها باهته ريت واعرف مالش ياشهد احسش غامضه وكتومه في الفتره الاخيره قوي تصرفاتش معي تغيرت قربتي مني اكثر وكنش خايفه من شي هلوساتش في الليل وانتي نايمه بكلام مشو مفهوم ااااح ياشهد

شهد (لاارادي دمعت عيوني من كلمات الاغنيه احسها انكتبت لي ولحنتها اصاله الشريجه خصوصا لي وكأنها لمست وعرفت بداخلي مسحت دمعتي بسرعه شافني خالد مسكت يده بقوة جاء مقطع بعد ما مسكت يد خالد كان(ماعاد بقى لي بقلبي غير الالم والمآسي وقت المصالح يجوني من غدرهم ما نسوني .
القهر في القلب حين القاه في يد غيري امام العين وقد حلف لي وقال والله ان الهوى بيننا الاثنين)

(مختار تعمدت ارجع بعد ماحولت الزلط ليوسف لنفس المكان الذي كانت جالسه فيه شهد صوت بكاها لليوم مابتعد من اذني وسرحانها وانا مسافر الحديده بها وكأن هي ضايعه تايهه احس داخلها شي وضروري اعرفه صورتها غصب عني ماابتعدت من خيالي احس نفسي خاين لاخي لاني شفتها صدفه وضروري اكلمه بهذا الشي وصلت لنفس المكان بسرت على الرمل مكتوب غاده وكان في رسمة وجه حزين وزاعل رجع الموج لفوق ارجلي وبعدها مشيت للفندق وانا افكر من هي غاده)

مشي مرتضى امس ولليوم ما رجع للبيت بعد ما شافني خرجت من غرفتي ومكنت ام ابراهيم المليون تتصرف فيه وتفتح لـٍهآ اي مشروع يأكلها هي وعيالها رفضت تاخذه بس انا حلفت قبلها وطلبت من مرتضى يخليها تنظف شقتي وتشتغل في الشقه بدل الفله ليوم ما يطلقني بعد كلمه

دعاء :خلي ام ابراهيم تشتغل عِندي ليوم ما تطلقني بعدها عترجع الفله لان وجودي ماعاد هو موجود في حياتك

مرتضى( للمره الثانيه تذكر دعاء كلمه الطلاق على لسانها وكأنها متوقعه ومنتظره هذا الشي ماقدرت ارد عليها بشي ولا قدرت اوصيها على الذي في بطنها بشي قررت اواجه واقعي قمت واخذت ام ابراهيم معي الذي اقنعتني ان وجود دعاء في حياتي ماهو عبث انه لحكمه وان حملها مني تعويض لي بس هذا التعويض بابتلاء

https://t.me/joinchat/AAAAAEIz_KDfjDgo7Gaxwg

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 56 ♥

خربشـات وجــع 〰

👌🏻👇🏻 😍
📚 @rewayatyamania 🇾🇪

هل شاصبر على الابتلاء وافرح بالتعويض لي او شارفض تعويض الله لي واخسر اجري في الابتلاء وصلت للفله بعدها ونزلت انا وام ابراهيم كانت حاله انغام في شدة عصبيتها كأنها طوفان هايج شافتني بكل احتقار وقالت

انغام بصوت مرتفع:مرتضى علي ال... مالك اكبر ثروة في اليمن وخارج اليمن بشعره الابيض وفي آخر عمره يتزوج من بنت في العشرينات بنت سوق و… بنت شوارع و… بنت مزين و… خرج مع اختها بس ماعجبته عجبته البنت الصغيره لجمالها لهفت بعدها ساع الكلب وتزوجتها برافو عليك يامرتضى ال… نهايتك بنت الشوارع تربط اسمها بااسمك الزوج المثالي الوفي المطيع الهادي المنشغل والمنهمك في عمله البريء الذي مافيش انسان في الدنيا حبني مثله الصابر عليا واللي مسخر كل هذه الخدم والحشم لخدمتي اكبر ممثل في العالم الخاين الغدار الذي صبرت عليه وهو عقيم مايخلف وفنيت حياتي معه الذي وصلني

انغام(خرجت كل مافي قلبي من كلام لانه توقعت مرتضى يخونني ووصلي خبر خيانته بس ماتوقعته يتزوج ومن بنت ياريت عاد هي تسوى.. نظراته وعيونه كانين في الارض ماحبيت الانكسار الذي طاغي على ملامحه بس تلذذت فيه لانه كل شي ضده وماسكه عليه سمعه البنت الذي تزوجها وسمعة اختها المعفنه بس كسرني فوق الكسور والاعاقه الذي انا فيها ساعة مارد عليا

مرتضى:انغااام لهنيه وبس سكت لش خيرات وصبرت عليش فوق اللازم ووعدت نفسي ما اغثيش واكون ظهر بدل ظهرش واكون سندش وقوتش يوم ما طلع التقرير في اليمن وقالوا لي الاعاقه منش مشي مني وسافرت بش المانيا نتعالج وقالوا نفس التقرير ماحبيت اوجعش من شدة حبي لش وخليت كل التقارير ضدي وتقل ان العيب مني كله هذا على شان مااوجعش وقلت لش ان مافيش ولاشي ويوم ما طلبتي الطلاق او اني اسير اتعالج وانا الخلل مني وانا رفضت وحصل الذي حصل صبرت عليش اكثر من 17سنه من الذي عيصبر هذه السنين كلها بدون مرة بدون غريزته من قلي لي رغم اني قادر اتزوج واخونش وتمعشق وقدام عينش بس ماسخي قلبي ويوم ما قررت اخونش على قولتش قررت ارتكب الحرام انا لنفسي انا ولاسخيت اتزوج بس القدر طرح لي دعاء ولا سرحت من حسي شليتها من اختها بعد جهد جهيد ولا خلتني المسها الا بعد ما اعقد عليها ما تشتي الحرام هي عكس اختها سرت لعند صاحبتش اسماء وقالت عاد دعاء بكر تزوجتها وسافرت انا وانتي وعاد هي في ذمتي رجعنا امس وطلعت حامل وحامل مني انا العقيم على قولتش

في بيت يوسف
يوسف (اليوم فقدت كياني فقدت الحضن اللي ارتمي عليه بشحمي ولحمي وكأني بين يدها طفل عمره سنتين رغم اني مش اصغر اخوتي بس كان لي حب في قلب أمي غير عن كل اخوتي لدرجه ان مرة اخي خالد سأل امي ليش تحبي يوسف اكثر مننا كلنا قالت احبكم كلكم بس يوسف مسكين غلبان في الدنيا انتوا بتقدروا تمشوا حالكم وكلكم تزوجتوا وخلفتوا وخواتكم تزوجين وزوجين عيالهن والذي قد زوجين بناتهن بس هو غلبان مسكين اهمه قوي منكم كلكم

بكيت بحرقه لان ماعاد معي أم البيت كئيب والصمت مخيم المكان بين اسمع شهقات بكاء خواتي بين الحين والاخر حاولت ارقد لان قد لي يومين بغير يوم وانا في المستشفى عند امي بس ماقدرت اليوم اول ايام العزاء كلهم اتصلوا لي يعزوني في حبيبة عيوني ماغيرها البعيده اصحابي واهلي كلهم جنبنا بس في وقتي هذا ماناش محتاج غيرها فتحت الواتس اغير صورة بروفايلي ونزلت حاله بعدها شفت آخر ظهور لشهد كان قبل اسبوع تنهدت واقتهرت بعدها غلقت تلفوني وشليت الكوت حقي وخرجت)

شهد
اليوم قررت قرار لي فتره افكر فيه بس هذه المره قررت فيه وانا مقتنعه اتصلت لخالد استأذنه اني شاسير شويه عند البحر لبست بعدها البالطو حقي ونزلت كنت كل ماقرب من البحر شويه يزيد اصراري على قراري وحاسه انو القرار الصح ابعد عن مدينة صنعاء اقرب اكثر من خالد واقتنع بحياتي واخر شي ارمي تلفوني البحر واخلي ذكرياتي مع يوسف تغوص فيه وفي اعماقه لانه الوحيد اللي قادر يشيل كل الذكريات من دون ماحد يعرف فيها هو كبير وكبير قوي بكبر وعمق الكلام والمشاعر اللي بيني وبينه خرجت تلفوني الاول اللي قبل الجديد رفعت يدي بقوة عظيمه ورجمته شليت تلفوني الجديد اللي اهداه لي خالد وقررت اقله انه نكع عليا في البحر بدون قصد بس لحظتها قررت اغير صورة البروفايل حقي بصورة خالد واكتب له حاله واغلق الشريحه للابد حتى اني مفكره ما اشتي تلفون هذه الفتره ابدا فتحت الواتس وفعلت صورة لخالد كان لابس شورت اسود واسع لتحت الركبه وفنيله بيضاء مرسوم فيها خربشات وحركات مش مفهومه كان لابس كوفيه شمسيه وكان قدام البحر وابتسامته ماليه وجهه هذه الصوره لها تعبير ولحظات لاتنسى واحلى مافيها اني التقطتها بعفويه ڵـهٍ عجبتني قوي وفعلتها فتحت جهات حالاتي ونزلت صوره فيها اسمي واسم خالد كتبتهن على رمل شط البحر شفت بعدها في حالاتي اسم يوسف وفاعل حالة امي في ذمة الله انا لله وانا اليه راجعون) على طول ومن دون اي تفكير ..

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 57 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

في حالاتي اسم يوسف وفاعل حالة امي في ذمة الله انا لله وانا اليه راجعون) على طول ومن دون اي تفكير ماسمعت الا صوته

يوسف :الو

شهد: يوسف ايش مكتوب في حالتك

يوسف: امي توفت ماتت ياشهد

(كان صوت بكاه للان ما زال عالق في اذني تمنيت وقتها اني اخته او اي شخص يكون ڵـهٍ ومسموح اضمه لصدري وامسح علـّى راسه بحنيه احس هذه الحركه هي اكبر مواساه لشخص حزين وفقد شخص غالي عليه لاني من الاشخاص اللي ما اقدر اسند حد وادعمه بوقت حزنه بكلام ايجابي وارفع من معنوياته بالعكس تتحطم معنوياتي اكثر منه ماقدرت استحمل بكيت من بكاه ورجعت علاقتي معه مثل اول ما تركت نقطة فراغ في ايامه وقفت معه وكنت سند ڵـهٍ هونت عليه ايامه مرات وبعد امه عنه لاني عارفه اني يوسف هو عباره عن شخص مقطوع من شجره رغم كثر اخوانه وخواته بس يعتبر مقطوع من شجره لان كل شخص مندمج في حياته الخاصه ومستقل ومشغول بعمله وعياله حتى شيماء اخته عقدت قبل ما تتوفى امها بعدها اخذها عقيدها بعد الموت بثلاث اشهر بدون عرس بدون شي قررت اقله يتزوج لان غاده هي الشخص الوحيد عتملي حياته من الحزن العميق اللي عايش فيه اقتنع بس ماديا مامعه غير حق المهر حق تجهيز شقته وباقي مستلزمات العرس مامعه ولافلس قررت اساعده وقلت ڵـهٍ يتوكل يطرح المهر ويحدد عرسه كان كل شي بين اسويه وانا مقتنعه ان هذا الحل انسب حل لنا الاثنين رغم التناقض اللي في قلبي وفي الواقع اللي بين اقنعه فيه واقنع نفسي الم عظيم لٱ يوصف
.
.

بعد مرور سبعه اشهر
وانا في الحديده مستقله بحياتي بعد مااستأجر لنا خالد شقه صغيره لنا الاثنين عشت اروع واجمل ايام حياتي معه رغم تواصلي مع يوسف الا ان خالد ڵـهٍ مكانه في قلبي عميقه قووووي والله مااقدر استغنى عنه واني منتظره قناعتي الكامله من يوسف عشان اوفي لخالد واعوضه اكثر ضميري بيأنبني بس هانت يتزوج يوسف وشاقتنع بالمره

اليوم على رجعتنا لصنعاء الروح فاقده لاهلي ولعمتي وكل شي ومن مثلش ياصنعاء كمل خالد عمله بنجاح هو وصاحبه كان المشروع اللي اشتغلوا عليه عباره عن فندق في قمة الروعه والمنتزه اللي حول الفندق كان شي راقي جدا والان نازليين صنعاء ومستقرين فيها بعد ماقرر خالد يفتح مشروع صغير بااسمه من اللي حصله من عمله من هذا المشروع اللي اشتغل عليه)

مختار (كنت بين احاسب حساب الغرفه اللي مستأجر لـٍهآ في الفندق شفت شهد لابسه البالطو والطرحه بدون برقع عرفتها لبست نظارتي بعد ماحاسبت وخرجت بعدها شفتها بتتقدم من البحر قربت منها من مكان بدرجه انها ما تقدر تشوفني شفتها كانت سارحه قوي بعدها شفت يدها بترتفع ورجمت تلفون جلست خمس دقايق بعدها شفت تلفون ثاني في اذنها وبتمشي لما بعدت من المكان اللي كانت فيه وهي بتمشي بعدت النظاره والكوفيه وكل شي يخصني في الشنطه وطرحتهن عند واحد هانك مااعرفه بس وكلت امري لله وغصت اسبح واسبح شفت حاجه بعيده قوي سوداء فوق البحر قربت اكثر وانه تلفون شليته ورجعت سبحت لما خرجت بالسلامه بين اقلبه في يدي ملانه ماء مافتحت بعدت البطاريه ونشفته اخذت ملابسي من عند هذا الشخص وتشكرته ومشيت وانا ادعي الله مايخرب التلفون واقدر افهم تصرفات شهد)

دعاء(غاب مرتضى بعد ما مشي هو وام ابراهيم اكثر من تسع ساعات بعدها دخل عليا قبل الفجر بساعه كنت صاحيه لاني عباره عن كومة قلق وهموم.. دخل وهو في قمة غضبه بشرته البيضاء تحولت للون الاحمر وباسلوب اكثر من مااقول عليه تهديد وعنف قال لي يااما انزل الطفل اللي في بطني واعيش معه زوجه معززه مكرمه يوصل لي كل شي واعيش اميره طول حياتي يااما اولد الولد وينتسب ڵـهٍ لَـگِنْ امه عتكون انغام لانه عيقل للناس انه فعلوا عملية اطفال الانابيب وان هي ولدت بعمليه واعيش شغاله في الفله حقه أربي الطفل وارضعه واهتم فيه بس اليوم اللي شافكر اقله ان انا امه عيكون ٱڅڑ يوم في حياتي انا .

صدمه ولحظات تبلد عشتها ماتوقعت الخبث وشراسه الناس بقرراتهم عتكون لهذا الوضع من الوحشيه وانعدام الاحساس في كل الحالات القرار صعب نسبه لي قوي كيف انزل نبض جنين في بطني او كيف اتعب واعاني وبعدها حتى مايعرف اني أمه… صح توقعت تصرف من مرتضى بعدم قبوله للطفل بس ماتوقعت يكون بهذا القدر من القسوه اني اعيش خدامه لطفلي وانه مايعرف اني أمه ومجرد ماافكر اموت علـى طول وكأني بين اقطع تذكره لموتي وانعزالي عن الحياه الدنيا

......

انيسه: منور البيت برجعتكم ماتتخيلوا كم كنت اضبح وحدي وزد ابوك مكنها سفريات وعمل قد فكرت من شدة الضبح ازوج مختار عندي في البيت

شهد وخالد: هههههههههههههه واحنا وين نسير

انيسه :خلاص رجعتوا لي هذك التفكير وانا ضابحه

شهد: انا فدالش ياعمه خلاص ذاحين جالسين ولا عاد عنسير بقعه

انيسه: ايوه اشتي حفيد اتونس به

خالد: الله كريم ان شاء الله

https://t.me/joinchat/AAAAAEIz_KDfjDgo7Gaxwg

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 58 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

شهد(باقي شهر واغلق سنه من بعد ما سقطت التوأم اللي كانوا في بطني ماعاد حملت مدري يمكن الله يشتي يعاقبني لاني كنت في نعمه وفرطتها بس مافرطتها اعتنيت بها قوي وماتخيلت اني مجرد ما مشيت كم سَـآعــهْْ اني شافقدهم ويحصل الذي حصل (شافت خالد بنظرة وبعدت عينها عنه بعدها ) يارب عوضني وعوض خالد وخليني اعوضه عن كل شي وجعته فيه .

عند غاده
ام غاده: يابنتي بغير زنط من عيرضى يفتح لنا بيته بعدا ماعليش من شهد هي مسافره في الحديده مع زوجها

غاده: مش انتي داريه ياامه هذك البنت والغرور الذي فيها وزد ماهي تزوجت لواحد شابع ماهو ماعاد حتى عرفتني ولا باركت لي وعادش تشتي اسير بيتهم ماعاد اشتيش نقش افعلوا لي يوم في الصاله وبس

ام غاده: هو انتين هكذا البنات بينكن مداحسه من زمان وانتي بتتحسسي منها قد كبرتين خلاص اعقلين بعدا وين اشل اهل الحريو ما اقلهم جوا يوم واحد بس في الصاله ماينفعش الا نميزهم في البيت اول مالصاله كم جهدي ابسر هذه وهذه

غاده ساكته وبتفكر (كم كنت اتمنىصحبة شهد وخصوصا ان احنا جيران مغروره طول عمرها كانت تمشي من جنبي الصبح واحنا في نفس المدرسه ماتقل حتى نمشي سوى وهي تمشي قبلي وانا بعدها كنت اقارن نفسي دايما بها وخصوصا ان احنا في نفس السن وما كان مع شهد جديد اشتي مثله لما كبرت وعقلت وفهمت ان حالتنا الماديه تختلف عنهم وان هي يحق لـٍهآ غرورها بنت جذابه وجميله وزد الله زاد غرورها بزوجها مشتيش اشوفها ولااشتي اتعرس في بيتهم رغم ان امها طيبه قوي وابوها اطيب بس مدري داخلي مايشتي عندها لغرورها ماعمرها تواضعت وكلمتني احسها دايم تستنقصني بسبب فقرنا او ڱڵـه مجرد احساس من طرف واحد

اليوم العقد حقي وصلي خبر ان خطيبي كبير في السن بس يارب يكون وسيم وحالي ومرتاح يفهني عن الفقر اللي عايشه انا فيه واكون مثل شهد ويجي يوم اغتر انا فوقها واكسر نخيطها فوقي)

عند شهد كملت تلعب بطه هي وخالد

شهد: ههههههههههههه والله مااقبل مغالط اخطى شلني بيتنا

خالد بيصافدها ويخربش شعرها: اعترفي اعترفي انش خسرانه وذاحين ماشاشلش الا وقد عاقبتش

شهد :امانه وليش يعني تعاقبني

خالد: لانش خسرتي وانا الفايز وانا الملك

شهد: قوم قوم لقيت على من تضحك وسنبت

خالد مسكها من يدها: والله لتتعاقبي يله

شهد: هههههههه ماهو العقاب

خالد: اشر لخدوده بوسه هنيه وبوسه هنيه

شهد: بس

خالد: ليش تشتي تبوسيني خيرات عادي ماعنديش مانع

شهد خزيت منه: كافي قلة ادب

خالد: قلة ادب هاه خلاص يله اقلش شجره وانتي سنبي اقلش نمله وانتي اجلسي انتي شاقي حق صميل

شهد: بدلع عادي يله (وضعت شعرها) وبدات

خالد: شجره 'نمله' شجره نمله 'شجره شجره هههههههههههه غلطتي

شهد: ههههههههه شلوك فيسع يله اسير البس البالطو وهيا

اليوم العقد حقي لي اسبوع منسق كل شي قررت يكون يوم جمعه بس عمي حدد العقد يكون عصر مختار عيكون شاهد على عقد زواجي شهد دعمتني قوي في زواجي اخر مرة رسلت لي سبعميه الف سلف ماقد قدرت اتواصل معها اقلها منين ادت الزلط رسلت لي رساله لا ارسلش لـٍهآ ابدا والزلط اللي رسلتها قالت اسير اشوف غرفه مناسبه وارنج المكان حقي شكر عظيم لـٍهآ كاني فرجت عليا هم كبير كان في قلبي لاني فعلا بعد ماسلمت لهم المهر حيرفت بقوتي ولا عاد بقي معي فلس للغرفه وتجهيزاتها اهم شي الله يجعل في ذلك خير

شهد وهي بتعطر خالد

شهد: ليش عمتي ماتجي معانا تتغدى

خالد: قلتي لـٍهآ

شهدوهي بتوضع الشال حقه(ايوه)

خالد: خلاص عنشلها غصب

شهد: ههههه ايوه ساع المجرمين وشافته بنظرة حب (انا فدالك ياخالد الله لايحرمني مـڼـڱ

خالد: ولامنش

شهد: شارقد في بيتنا

خالد: ابدا مابش رقده فيسع يله شانزل ادفي السياره

شهد: قدلي منهم خيرات خليني يومين ثلاث عندهم

خالد: مستحيل اشلش يوميه عندهم من الصبح للعشي غير رقده ماترقدي الا عندي

شهد بدون اي نقاش لبست برقعها وخلت الثياب الذي قد جهزتهن لـٍهآ ونزلت ذكرت العصفوره

شهد (نسيت العصفوره بعد ما طيرت العصفور جت علـى بالي فجأة ونكزت لما ذكرتها سرت للمجلس اشوفها لي منها خيرات كنت اتصل لعمتي واقلها تطرح لها اكل وماء بس دخلت الغرفه وشفتها مرميه على القفص سرت لعندها كان شمها مقرف عرفت اني ماتت ولها مدة دمعين عيوني بلحظتهن وتاكدت بعدها اني شي داخلي عيموت مثلها شليت القفص وانا داخلي بتتعاد كل الذكريات اللي تكلمت عليها انا ويوسف عشان العصافير ولما اتفقنا نسميهن يوسف وشهد ولما وعدته اعتني بهن واذا احتجته ومالقيته اكلمهن اشياء خيرات ما اقدر اكتبهن ومفردات ماعمري عتنساها كنت سارحه وانا بين امشي وملامح الحزن باينة على وجهي وصلت لعند السياره شفت مختار بيكلم خالد نكزت بعدها ورديت البرقع )

خالد: مالش مطننه ومال العصفوره وينو العصفور

شهد: ...

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 59 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

شهد: العصفور رح ڵـهٍ والعصفوره ماتت هاه( ومكنته القفص) اطرحه في الخانه حق السياره شاقبرها في بيتنا

خالد بمزح(مارايش ازيد افتح دريس في الجامع ومالش غاثيه حسستيني اني امش اللي ماتت هو الا عصفور وعصفوره شادي لش بدلهن

شهد بينها وبين نفسها انا الذي مت ياخالد انا مش العصفوره

(طلعت فوق السياره وخالد حرك السياره

خالد: شهد امي سارت مع مختار جاء لـٍهآ قالت عتسير تبسر جدتي مريضه وعتجلس عندهم

شهد عادي ركزت عدم وجود عمتها وذكرت مختار وشهقت

خالد: مالش

شهد: مختار بسرني

خالد: هههههههه عادش ذكرتي بعدا مشي اول مرة يبسرش

شهد :كيفه مشي اول مره

خالد: قلي قد بسرش مرة بالصدفه وهو كان في السياره ومغلق علـى نفسه وانتي دخلتي بالصدفه للبيت وكنتي في بيت عمي وفتشتي البرقع وهو كان فوق سيارته بينتبه للبيت بسرش بغير عاني

شهد :يوه والخزا

خالد: واليوم ورور لعنده وانتي مطننه على العصفره هذه

شهد: مشتت الله يرحمها

خالد: بعدا سهل مختار هذا هو اخي وسندي الذي ما رضيش الله يكون من امي قع لي من خالي يعني لْـۆ يوم جاء والا شافش بالصدفه عادي سلمي عليه وافتشي ڵـهٍ

شهد (كنت اسمع خالد وانا داخلي مكسور واشتي حد يجبر هذا الكسر مافيني دموع بس داخلي ڱڵـه بيدمع انا مت ويوسف طار من يدي وطيرته انا بيدي هو سار لعند غاده وانا مت بذكرياتي ماقدرت تستحمل العصفوره بعدك يايوسف وماتت غير انا تحملته وما مت وعشت من بعدك وشاعيش بعد عرسك وادعي الله يقنعني مـڼـڱ ويسعدني مع خالد ويسعدك مع… ..اااااح ياوجع قلبي ماقدرت اتمنى ڵـڱ السعاده معها واصل اقارن نفسي بها من الاجمل وفي النهايه اطلع انا وكأني بين اراضي نفسي بجمالي اني اجمل منها وان الجمال الذي فيها ماعيخليك تعشقها قوي بنت ملامحها عاديه في نظري مدري في نظرك كيف عتشوفها وصلنا بيتنا كنت فاقده ڵـهٍ بقوه خالد سار الجامع يصلي مع ابي وانا بعد ماسلمت علـى امي واختي واتصلت لبثينه تجي عِندي نزلت الحوش وحفرت حفرة عميقة شويه اخذت السلس من رقبتي اللي اهداني يوسف وفيه حرفي دفنته في الحفرة بتراب

دخل خالد بعدها وخليته يفتح خانة السيارة وشليت القفص وخرجت العصفورة ودفنتها وغطيتها بتراب وقريت على نفسي الفاتحه.

بعدها شليت القفص ورميته من فوق الجدر للشارع وابتسمت ابتسامه صغيره لخالد اللي كان بيشوفني بصمت مسكت يده وشديت عليها وكأني بين اضمد جراحي بهذه المسكة

تغدينا وكان الغداء حالي وفقدت اكل امي قوي

بعدها سار خالد يشل ڵـهٍ قات وخلى تلفونه عنديِ بيشتحن لاول مره افتش تلفونه دخلت كل الملفات والصدمه اني لما دخلت ملف الكاميرا وانا بين اقلب صوره لقيت صوره لخالد ومختار وشخص وقف كل عرق في جسمي لما شفت صورته وبين زوجي ومختار وهو في الكرسي بعدهم وزد فوق سيارة خالد حسيت كل جسمي ارتخى عوذبت من الشيطان وقلت يمكن اني تخيلت رجعت الصوره اللي قبلها ورديتها من جديد وان هي نفس التعابير والتقاطيع نفس العيون نفس الشكل نفسه والله انو نفسه هذا يوسف بشحمه ولحمه ياالله قلبي بيدق بقوة قلبت الصور بعدها لقيت صورتين ثانيات بنفس الوضعيه خرجت وضربت رقمه ماطلع رقمه مسجل عند خالد فتشت محادثات خالد ومختار مالقيت اسمه بين محادثاتهم عوذبت من الشيطان وريعت لما يجي خالد اسأله منو هذا لعلي كنت اتوهم لعل عيوني شافته وشبهت عليه .

يوسف(اتصلت عليا شهد فوق العشر مرات ماقدرت ارد عليها كانين خواتي عندي واخوتي خارج مريعين لي نمشي لبيت عمي عشان العقد صمت تلفوني ونسيت وقتها اني صمته ومشيت معاهم وكملنا العقد خرجت انا واخوتي ومختار وقفني وجود خالد بارك لي وتكلم هو ومختار بعدها دخل بيت شهد عرفت وقتها اني شهد في بيتهم وان هي بتتصل لي عشان هي في بيتهم لمحت وانا فوق سيارة مختار قفص مرجوم لعرض الجدر يشبه لالا هو بذاته القفص اللي اديته لشهد وفيه العصافير وقفت مختار وقدو عيحرك السياره ونزلت شليت القفص وداخلي الف اح ليش رجمته شهد هل عرفت ان اليوم عقدي وطيرت العصافير ورجمت القفص عشان اشوفه وتقلي لهنيه وانتهينا او في شي ثاني انا ماناش داري به قطع عليا كلامي بيني وبين نفسي

مختار: ماتفعل وانت بالقفص اخرتك تلفلف القماقم

يوسف: هههههه ايوه شكله عادو جديد وانا بين ابيع عصافير خليني استفيد منه

مختار: ...

https://t.me/joinchat/AAAAAEIz_KDfjDgo7Gaxwg

📚 @rewayatyamania 🇾🇪

رواية خربشات وجـع للكـاتبـة : نجـلاء يحيـى

روايات يمنية📚🇾🇪

rewayatyamania

البـارت 60 ♥

خـربشــات وجــع 〰

👌🏻👇🏻 😍
📚 @rewayatyamania 🇾🇪

يوسف: هههههه ايوه شكله عادو جديد وانا بين ابيع عصافير خليني استفيد منه

مختار: ههههههههههههههههههههههه هذا قفص مَـرة خالد اليوم ماتت العصفوره حقها واكيد رجمته هو والعصفوره ماعاد تشتي به بعد ماطيرت العصفور طبعا هم جيران بيت عمك اهل مَـرة خالد اخي

مختار(تعمدت اقرب القفص من جهة يوسف اشتي اتاكد من ظنوني اللي كلها قدام عيني ربطت الاحداث كلها وشبكتها مع بعضها انصدمت في البدايه وجلست مصدوم ايام بعدها استوعبت كل شي وقلت يمكن الله خلاني اعرف عشان اكون طريق لبر الامان لشهد

كلام يوسف على حبيبته اللي تزوجت وكلامه كان في الوقت اللي تزوج خالد بشهد وصدمته والعرق اللي كان ينزل من جبينه لما شاف العصافير في القفص وسؤاله عن لقب بيت عمتي بعد ما كان تلفونه بيده وكانه بيراسل حد.. والبنات اللي شفتهن في المستشفى لما سرت اشوف يوسف لما بقي ڵـهٍ الحادث وحالة البنت التاعبه اللي كانت صاحبتها نفس البنت اللي دخلت لعند شهد قبل ما امشي بالسياره ونفس البنت اللي طلعت مع شهد يوم مااسعفتها لما سقطت..تلفون شهد صدمني اكثر ماكان فيه رمز للشاشه بس كانت الشاشه حارقه لاني شربت ماء وقت ما رجمته للبحر وغيرت لـٍه شاشه غيرها رحمت قلبها المسكين. اللي وقع فخ في يد شخص ماقدره ورحمت قلب اخي المسكين اللي يحب شهد بكل جوارحه ورحمت حربها مع نفسها اني تشتي تنسى يوسف بس يوسف ماخلا لـٍهآ فرصه ما قدرت اخبي مشاعري وكرهي ليوسف واشتي اقوم اقتله الان بس عادنا اشتي منه حاجات خيرات وتسجيلات عشان اقنع شهد منه واخليها تعيش حياتها بهدوء مع خالد قريت كل مذاكرتها المخزونه في التلفون وشفت كل صورها هذه البنت مجنونه كيف ترجم تلفونها وفيه صورها وثقت في البحر وما عرفت ان البحر موج البحر غدار ماعمري حتى لحظه فكرت استحقر شهد او فكرت اقل عليها كلام مش ټمـٱمـ بيني وبين نفسي بالعكس تمنيت لْـۆ كانت الفرصه تسمح لي اكلمها وافهمها كل شي واقلها لٱ تخسر اخي عشان واحد قال لها مليون مَرة مستحيل اتزوج بنت عرفتها من النت ماضمني اني ماتعرفني الا انا ولو انا داري اني بنت ناس ومحترمه بسسسسسسس انا شكاك ومرض داخلي يعني ياشهد انتي نزوه وسد فراغ ليوسف لاغير لانه لْـۆ حب قلبش من صدق انش ڵـهٍ وحلاله

....

شهد
(وصل خالد وكان كل مايطلع من الدرج احس دقات قلبي بتزيد ايديي احسهن مثلجات واحس تعابير الخوف واضحه علـى وجهي حاولت اقوي نفسي اكثر واجمع قوتي كلها تنهدت وصليت على النبي

خالد: هيا مرة فيسع وينو تلفوني وهاه (رجم لـٍهآ علاقيه قات) هذا القات الذي طلبتي كيفي وافتهني انتي وخبيرتش وكما قد الساعه عشر شاجي لش

شهد بلعت ريقها: وين عتسير

خالد: اخزن مع مختار وصاحبه لقيتهم خارجين من بيت جيرانكم صاحب مختار عقد اليوم سبحان الله والصدف يله تشتي شي

شهد حاولت تكون طبيعيه واشرت لعند خالد(منو هذا الذي معاكم قد فتشت تلفونك

خالد: شل تلفونه هذا الذي عقد صاحب مختار شاسير اخزن عندهم خاطرش ها

شهد ( ايش قال خالد صاحب مختار اللي عقد يعني يوسف عقد اليوم ضربت خدودي بقوة خالد عيخزن مع يوسف ورجعت ضربتهن اكثر يوسف يعرف خالد مختار صاحب يوسف دخلت في حاله اني كنت اضرب نفسي وماحس بالوجع جسمي ڱڵـه بينتفض دخلت بثينه لعندي .

(بثينه….

دخلت لعند شهد اول ماشفتها انصدمت خدودها اللي كساهن اللون الاحمر وتعابير وجهها اللي شافتني بهن ماخلت عرق في جسمي ما انتفض اشرت لي علـى الباب بمعنى غلقي الباب غلقت الباب وقلبت بالداير وسرت لعندها بصوت خفيف شويه

بثينه :شهد مالش مال ايديش بينتفضين مالش تحاكي

شهد بصوت متقطع ورجفه فيه: يوسف

بثينه: ماله مالش لاتبكيش صًلي ع النبي اهدي اهدي ها اشربي ماء

شهد بعدت الماء وضربت نفسها مرة ثانيه: يوسف كذب علياااااااا يوسف يعرف خالد ومختار يوسف صورته عند خالد

بثينه: اشششششش وطي صوتش لحد يسمعش

شهد :شكله عيسمع بي العالم مش الا عند اهلي لْـۆ يبسر خالد المحادثه لْـۆ يدرى مختار واصل بين اتصله عادنا بعت بدلتي الذهب (وكانت تضرب صدرها) ڵـهٍ رديت الزلط ڵـهٍ لانه مهموم مابش معه توفيه زلط لعرسه

بثينه
(ضميت شهد بقوه لصدري كانت تصيح واحاول اكتم صوتها بحضني خفت امها تسمعنا كانت تقلي انا استاهل يابثينه ماصدقتش وبعدت عنه خطيت بعد قلبي يابثينه ريتني يابثينه ماعاد كلمته ريتني ماعرفته ريتك ياالله موتني ولاشفت اللي شفته كنت اقل يارب قنعني منه بس لَـگِنْ مش بهذه الطريقه مش تقتلني ياالله بعدتها من حضني

بثينه: يييييه شهد اصصصصصص اصصصصصصصه اسمعني اهدي حاكيني مابسرتي مافهمتش شي اهدي ماعيقع شي سعليش

شهد: يقع اللي يقع انا استاهل اصلا ليكن ليش ليش. مخبي عليا ليش ماغرضه مايشتي

بثينه: حاكيني ماحصل ومال بدلتش الذهب

شهد...

https://t.me/rewayatyamania/36533

📚 @rewayatyamania 🇾🇪

روايات يمنية📚🇾🇪

rewayatyamania