حُـب خلـف أسـوار بلجيكـا 💙
👌🏻👇🏻 😍
📚 @rewayatyamania 🇾🇪
في الصاله حق العرس حق النسوان
فوق طاولة اهل جمانه
خلود وهي بتحاول تتذكر شكل البنت الذي صدمت بها: لو تبسرين والله ان انا صدمت بواحده نسخه من جمانه
عاليه بسخريه: وما عيجي بها لاهنا هي ذلحين عند زوجها بيمسيها بضرب ويصبحها بضرب على الطريقه الذي تزوجها بها ولقيها في شقة دعاره عادهو عيخليها تجي تتعرس
خلود: ياربي والله ان هي تشبها
عاليه: يخلق من الشبه اربعين مالش وانتي
خلود وهي مش مصدقه: تمام تمام
.
.
الليل روحوا عبير من الصاله بموكب كبير لابيت نزار ودخلوها غرفة قيذار الذي جهزنها لها وزيننها بالورد
دخلت عبير وهي متوتره وخايفه وبكيت والبنات وسميحه بيهدئنها شويه ودخل قيذار
شويه ودخل قيذار وعيونه ما بتبسر الا جمانه اليوم وهي بالفستان دخل وهو مبتسم وبيتخيل جمانه قدامه مش عبير طرح يده على جبهتها وقرأ سورة الفاتحه ودعاء وفتش لها الطرحه وحبها على راسها وبهمس في اذنها ومن غير شعور منه وخيال جمانه قدامه: مبروك علينا ياقلبي
عبير جلست ترجف قيذار استوعب وبعد شويه
شهد قربت لهم التورته والعصير فوق الطاوله ومكنتهم السكينه يقطعوها مكنت عبير السكينه وقيذار طرح يده فوق يدها وقطعوا التور
ه قالت شهد لقيذار ياكلها وهي تاكله ويشربها العصير وهي تشربه...بعد هذه الطقوس خرجوا كلهم من الغرفه وبقي هو وعبير
قيذار: اسمعي يا بنت عمي انتي غاليه وواجب عليش انش تحترمي امي وابي وتقدريهم وما ترفضي لهم طلب وما تغلطي عليهم لو يوقع ما وقع وانش تحترمي خواتي وتعتبريهن ساع خواتش شهد والباقيات كلهن خواتي وغاليات على قلبي
عبير هزت راسها
قيذار كمل كلامه: وواجب عليش تحترميني وتطيعيني وما كان في الغرفه يجلس فيها ما يخرجش خارجها ابدا وانا انتي في عيوني وزوجتي ولش الذي يرضيش
عبير هزت راسها
.
.
صباح يوم جديد
يحمل الالم والحزن للبعض ويحمل السعاده والفرح وحياة جديدة للبعض
قام قيذار الصبح على صوت بكاء جنبه استغرب صوت من التفت وابسرها مغطيه وجهها ومن حركة اكتافها وصوتها الواهي باين ان هي بتبكي بعد اللحاف من وجهها
قيذار: مالش يا بنت عمي
عبير......لارد..
قيذار فهم: انتي مغصوبه عليا
عبير هزت راسها
قيذار: طيب عادي مالش قولي لي وانا شتصرف
عبير: ياقيذار انا تزوجتك علشان ابي ضغطوا عليا وكانت عترجع لهم الجلطه
قيذار انصدم: يوووه كيف لوما
عبير : اسمع شاحكي لك
...ورجعت بذاكرتها لاقبل شهرين
كانت هي وامها وابوها بيتغدوا وبيضحكوا
ابوها: عيوصلني الله لما ازفش لاعند قيذار ياعبير
عبير انصدمت واقتلب وجهها: هههه قيذار اخي يا اباه مالكم
ابوها: ماشي ياعبير قيذار ابن عمش مشو اخوش ولا عيكون اخوش قيذار عيكون زوجش
عبير بهدوء: بس انا يا اباه مشتيش
ابوها: لو اوقع بي شي والا شي انا وامش من لش بعدنا هاه
عبير ودموعها بينزلين: لي الله يا اباه لي الله
ابوها بحنان وبيمسح على شعرها: لكن ابن عمش قيذار رجال ومحترم وعيصونش
عبير: بس انا مشتيش قيذار يا اباه
ابوها بدأ يوجعه قلبه وانفعل: قلت مامعش الا قيذار..اح قل.ب.يي
عبير افتجعت وبكيت: خلاص خلاص اهدأ والله ما يوقع الا الذييرضيك
ابوها وهو طارح يده على قلبه: العرس بعد شهرين
عبير ببكاء: تمام
رجعت للواقع ودموعها بينزلين اكثر
قيذار: خلاص يا بنت عمي انتي مغصوبه عليا وانا ابي اصر ان انا اتزوجش
عبير: يعني كيف
قيذار: عادي جدا نرجع بلجيكا وانتي اشتغلي في الشركه عااادي وانتي ساع اختي
عبير ارتاحت: الله يحفظك يا قيذار
قيذار: الان قومي تجهزي علشان عنتغدى الان ونسافر
عبير: تمام...وقامت
دخلت عبير الحمام وهو خرج تلفونه يتصل لجمانه
عند جمانه
كانت على حالتها حق امس راقده في الارض قامت على صوت التلفون ابسرت وان هو قيذار جاوبت
قيذار بصوت واهي: ها جمانه
جمانه بقهر مكبوت: صباح الخير يا عريس
قيذار: صباح النور قد انتي جاهزه والا عادش
جمانه: عادنا قمت شاتغسل الان
قيذار: اقطبي واطلبي لش اكل من المطعم حق الفندق
جمانه: تمام
قيذار: بعد ساعه وانا عندش
جمانه: تمام...وغلقت
قامت ومرت من جنب المرايه وابسرت شكلها بالفستان وشعرها مخرب والمكياج كله نازل على وجهها بكيت من جديد ودخلت الحمام تتغسل وخرجت جففت شعرها ولبست بنطلون جينز مريح للسفر وبلوزه كت ولبست العبايه وبزت الاستشوار تنشف شعرها لما يوصل قيذار كملت تنشف شعرها جمعت باقي ملابسها بعدما طلعهن قيذار من فوق سيارته قبل العرس وابسرت وجهها شاحب بزت المسكارا ومرطب الشفايف وعملت لها ورجعتهن للشنطه وبدات تخرج الشنيط حقها لاجنب الباب حق الجناح وخرجت من الجناح ولقيت العامل وقالت له ينزل لها الشنيط و قفلت الجناح ونزلت لاكفتيريا المطعم اشترت لها قهوه وجلست تشربها
📚 @rewayatyamania 🇾🇪