📚قصص||روايات||منوعة📚

بين_الطنة_والرنة_ضعت_بين_الحماية_والكنة
Telegram:@rwayate
الحلقة التانية بعنوان ( واخيرا تزوجت)
وقرينا الفاتحة واتفقنا تاني يوم ننزل ونكتب الكتاب
وبالفعل نزلنا وكل امورنا تمام وانا منزلة عيوني بالارض يعني خجلانة وهيك
وكتبنا الكتاب ووالله وخطبتي يا هند وصرتي مخطوبة
وبلشت المناقرات قال بدهمش حفلة خطبة ما هو العرس بعد شهرين وحسب وجهة نظر حماتي ما في داعي للمصاريف الزايدة
وانا كنت موافقة عكل شي حج مطاوع يعني ما صدقت وانا الاقي هالعريس
وبلشنا نحضر لجهازي نصحى انا وامي الساعة سبعة الصبح وبوجهنا عالسوق وطبعا لازم ام حسين تروح معنا
( يما شوفي هاد المحل عنده شغلات حلوة شو رأيك نفوت عليه )
( لا يما هاد غالي هسا خالتك ام حسين بتدلنا عبسطات ارخص واحلى )
( يما بدك تلبسيني هشك بشك من البسطات )
(اه وماله يعني اسكتي انتي شو بفهمك )
وبلشنا من بسطة لبسطة
وام حسين تفاصل بهالبياعين ( دخلك بكم هدول رواب الحمام )
( بعشر ليرات يا حجة )
Telegram:@rwayate
( ول عشو قبل شوي كنت عند بياع وحسبلي اياهم ب سبعة بس وانا حبيت اربحك يلا لفيلي اياهم واحكيلي مبروك )
( يا حجة ما هو ما بزبط )
( بزبط بزبط يا خالتي حرام البنت بدها تتزوج ومهرها كله متين ليرة بدنا نفرحها شوي )
وانا صرت اضوي واطفي الله لا يوفقك يا ام حسين فضحتنا بين هالبياعين
اخدنا كومة هالاكياس وكلهم كياس سود اشتهيت كيس واحد بس يكون عليه اسم محل لا كلهم متل كياس الخضرة واعتلي يا هند
المهم وصلنا عالبيت
( هند روحي حضريلنا ايشي نتغدى ابوكي هسا بوصل )
( شو احضر يما )
( شوفي في عنا جاج بالتلاجة )
( لا ما انتي طبختيها الجاجة قبل يومين )
( طيب طولي شوية عدس وحطيهم بالطنجرة )
ومسكت امي هالتلفون بدها ترن عالجارات وقبل ما تحكي رن تلفون البيت
( الو اهلين يا سامي يا عمتي كيفك ،،، اه والله اشترينا شوية اواعي ،،،، لا شو عالذهب اكيد بدنا نوخد الوالدة هو احنا بنقدر ما نوخدها بس احنا قلنا هدول شوية اواعي مش محرزة نوخد امك معنا مع انها هند طول اليوم وهي تحكيلي يا ريت اجت حماتي معنا ،،،، لا يا عمتي كله ولا زعلك توكل على الله )
هند تعالي هاي حماتك حردانة قال ما اخدناها معنا واحنا نجهز
( هو ليش لازم اخدها معي )
( والله ما خفيت علي مبينة حماتك قوية وكاسرة )
( وليكون بدي اخدها معي تنقي الذهب )
Telegram:@rwayate
( اه بدنا نوخدها بلاش تعملك قصة قبل العرس مش ناقصينها نسيت شو كان بدي اه صحيح بدي ارن على ام تيسير وام زهير وام حسان يجو يشوفو الجهاز )
( يما محسستني انه جهاز عليه العين )
( شو بفهمك انتي هاتي ارن عليهم ولا احكيلك ليش ادفع حق مكالمة عالارضي هسا بنادي عليهم من الشباك
بعدين لازم العالم تشوف شو جهزنلك ولا بتتذكريش لما زهور بنت ام تيسير تزوجت وجهزت شو عملت امها ما خلت حدا الا وفرجته عالجهاز )
( بس يما زهور كان جهازها بحكي )
( لا بحكي ولا عباله بخزي كان كم شرموحة بعدين انا ما حكيتلك )
( لا ما حكيتلي شو )
( والله العليم والله العليم ام حسين ترا بتحكي انه اهلها اكلو نص المهر ونقطوها منه ضحكو عل دار حماها )
يا لطيف هالام حسين شو ذمتها وسيعة
واجو الجارات وعرضت امي هالجهاز قدامهم تقول نوفتيه
وصارت تحكي للنسوان عن عملة حماتي وكيف انها بتحرض ابنها علي
قرب العرس وبدي انزل اشتري ذهب نزلت انا وامي وسامي واخدنا حماتي معنا
انا يعجبني ايشي وهي يعجبها عكسه
( سامي شوف هالاسوارة شو حلوة )
( لا يما لا توخدها شوف قديش رقيقة بعدين هاي عيار 18 بكرة ان اجت تبيعها ما بتجيب ايشي
( طيب سامي شوف هالخاتم )
( لا يما هاد في لون ابيض بكرة من الجلي والمي بروح
لونه بصير مش حلو)
وطلعنا من المحل وانا مشترية ذهب عزوق حماتي وسامي كل ما انغزه يحكيلي هاي امي بتفهم بكل شي الله يخليها
عديتها حكيت يلا يا بنت مرقيها رحنا نشوف بدلة وصالون والله كان في بدلات بتجنن بس حماتي ما قبلت كل شوي تحكيلي هاي غالية وهاي ما معنا ندفع حقها
( اسمعي يا هند سامي لسا باول عمره ولسا ببني بحاله ما معه تختاري اشياء غالية )
دمعو عيوني وانا ساكتلها بس لانه سامي موجود امي شافتني هيك حكت خلص انا بدفع الفرقية خليها توخد البدلة الي بنفسها جبرت بخاطري
Telegram:@rwayate
وطبعا حماتي ما طلعت من الصالون قبل ما اتفقت مع الكوفيرة انها رح تكون هي مرافقة معي
وببلاش كمان
طبعا امي اذا مجرد اواعي فرجت الحارة عليهم كيف ذهب ما ظل حدا صغير ولا كبير الا وشاف الذهبات وبنات الحارة يتهامسو علي شوفي يا حرام كيف ذهبها من سنة سيدي ههههههه
( اسمعي وليه يا ميرفت وانتي يا سوسن لا تفكروني مش سامعتكم ول كل هاد كيد لاني تزوجت وانتو لسا)
نطت ام تيسر ( عيب يا هند هالحكي هم فرحاناتلك متل اختهم وزيادة )

ومن هاليوم ليوم العرس وامي تشغل اغاني وتنوح بدكم الصراحة حتى انا حزنت مع اني كنت مستزوجة بس حزنت اني بدي اطلع من بيت ابوي حزنت اني مش كل يوم رح اشوف امي واحكي معها حزنت انه مش رح التم مع نسوان الحارة حتى ام حسين الا ما كنت اطيقها عزت علي
بس لا كل يوم بدي اجي اطل عليها
( شو بتعملي يما )
Telegram:@rwayate
جاوبتني ام حسين ( تعالي يا هند ساعدينا مش شايفتينا بنعمل صرر حلو وحنا لعرسك )
( طيب يما زوديهم شوي )
( بكفي هيك حبة ناشد وحبة ملبس علوز ونعمة )
نسوان الحارة كلهم بالبيت بنظفو مع امي وانا رحت عالصالون وهناك عينكم ما تشوف الا النور
اذا الكوفيرة رفعتلي شعري حماتي تحكيلها لا خليه نازل لانه كنتي وجها ضعيف مو حلو عليها الرفع
اذا الكوفيرة تقلت مكياج حماتي بتحكيلها خففي كنتي عيونها صغار هسا بختفو عيونها
اذا الكوفيرة خففت مكياج حماتي تحكيلها لا تقليه شوي عروس هاي خليها تبهج
مش عارفة كيف تحملتنا الكوفيرة وما صدقت وخلصت لقيت ابوي جايب بكب جارنا ابوحمزة يوخدني فيه عالبيت
رحت عالبيت ولقيت الجارات حاطات هاللوج بصدر البيت وبغنو وامي تبكي وتمسح بهالدموع وام حسين جابت سدر هالحنة الي مزينته بهالورد وصارت ترقص فيه
بعد شوي سمعنا صوت الزفة وصلت سامي كان مستأجر سيارة كيا سيفيا من صاحبه ومزبطها وحاطت عليها بوكيه ورد
فات ابوي وعمامي طلعوني مش عارفة بهاللحظة ليش دموعي بلشو ينزلو قربت علي ام حسين وقالتلي ( امسحي دموعك تخربيش المكياج ما صدقنا وانتي تتزوجي )
ورجعت راحت لامي وحكتلها اسكتي يا حرمة تنكديش عالبنت
طلعنا من البيت وامي بطلت تبكي صارت تتخانق مع حماتي مين فيهم بدها تركب معي بسيارة العرس
( والله احنا من عادتنا يا ام سامي ام العروس هي الي تركب مع بنتها )
( لا والله ما حزرتي كل العالم بتعرف انه ام العريس هي الي بتركب بالسيارة )
بالاخر سامي قدر يقنعهم انه التنتين يركبو بس امه قدام وامي ورا وركبت حماتي جنب سامي قدام وامي ورا جنبي وطول الطريق حماتي تعطي سامي فستق مش عارفة هي فاردة ولا رحلة وعند كل اشارة يوقف سامي السيارة ينزل من السيارة يرقص هو واخوانه ويرجع عالسيارة ونسوان الحارة يزغرتو بقلب الباصات والله كان نفسي اركب معهم
وصلنا الصالة ودخلنا انا كنت متفقة مع الصالة يحطو اغاني ايهاب توفيق ونجوى كرم لانهم برقصو اتاري حماتي من وراي متفقة معهم يخلوها اغاني دحية
ما صحلي ارقص على ايشي
وخلصت الحفلة وروحنا عالبيت انا كنت رح اسكن بغرفتين ومنافعهم فوق بيت حماي اول ما وصلنا دقت حماتي علينا الباب جايبتلنا العشا جايبة لسامي صحن مشاوي والي جايبة جاج واجت حكتلي ( انتي كلي من الجاج عشان يشوف انوثتك مش توكلي لحمة ) وانا اقتنعت بكلامها ويا ريتني ما اقتنعت
( اااااخ يا بطني )
Telegram:@rwayate
( ولك هند مالك رايحة جاي عالحمام حولتيني هاي المرة العشرين الي بتفوتي فيها عالحمام)
( مش قادرة يا سامي مش قادرة )
( طيب اروح اجبلك دوا )
( لا منشان الله لا تتركني لحالي يمكن اموت وانت مش هون )
وظليت على هالحالة لوجه الفجر بعدها غفيت شوي وبس صحيت لقيت سامي بحكيلي يلا قومي البسي بدنا ننزل عند اهلي نفطر
لبست ونزلت انا واياه تحت
( فوتي يا هند عخزانة امي جيبي دوا لوجع البطن بلكي روقتي شوي
وانا فايتة سمعت امه بتحكيله ( ها طمني ان شاء الله الوضع تمام )
( يما اي تمام قضتها رايحة جاي عالحمام)
( عاملة حالها دلوعة وبتخاف تردش عليها يما )
الله يصبرني عليكي تركتها ودخلت اجيب الدوا ولقيت باكيت دوا للاسهال فهمت وقتها انا ليش قضيت الليلة بالحمام اتاريكي انتي الي حطتلي الدوا بالاكل
ما بكون اسمي هند اذا ما بخليكي تلفي حولين حالك انا هند تعملي هيك فيي بسيطة يا ام سامي يا حماتي يلي جابت حياتي
...... يتبع في الحلقة القادمة

بين_الطنة_والرنة_ضعت_بين_الحماية_والكنة
Telegram:@rwayate
الحلقة التالتة بعنوان ( يا انا يا حماتي)بقلم حنين طه
هند يا هند تعالي هي اهلك جايين يباركولك بصباحيتك
ارتميت بحضن امي وصرت ابكي
( ليش قاعدة بتبكي هسا مش انتي الي قتلتي حالك تتزوجي )
( يما هسا بتسمعك حماتي ،،،، )
كانو اهلي جايبنلي معهم حرامين وسدر كنافة وخمس جاجات قعدو شوي اطمنو عوضعنا انا حكيت لحالي هسا حماتي بتقوم بتغديهم بتعمللهم ايشي ابدا ظلت قاعدة طول الوقت
( شو يا ام حسام ما حكيتلنا قديش طلع نقوط هند )
( والله احنا يا ام سامي من عادتنا نوخد نقوط البنت ونجبلها فيه هدية لبيتها بعدين )
( شوف هالحكي طول عمرنا بنعرف نقوط الوحدة لزوجها وهي واياه بتساعدو )
( انتي يما احكيلي بيتك شو ناقصه وما الك الا تكوني راضية بكرة بجبلك اياه )
حماتي مفكرة نقوطي محرز وطلع ايشي وشويات لانها شافت ولاد عمامي وولاد خوالي كلهم نقطوني وما شاء الله عزوة حزينة ما بتعرف انه كل واحد كان يحط بايدي خمس ليرات يعني عليم الله لو جمعتهم كلهم عبعض ما بطلعو خمسين ليرة
Telegram:@rwayate
المهم روحت امي وصارت حماتي بدها توخد واحد من الحرامات الي جابتهم امي واختارت الاحمر الي عليه ورود قال هاد طاقين وبدفي بشتوية وانا اعطتني التاني الي لونه اصفر وعليه رسمة نمر وبطاق واحد
وسامي كل شوي يحكي ولو يما خدي الي بدك اياه انا ومرتي عحسابك ولا يهمك
حطيت حبة ملبس بتمي وسكتت بديش يحكو من اولها عينها ديقة مع انه طلعت روحي عالحرام لاني بعرف امي هدول الحرامات من زمان مخبيتهم عندها لجهازي من ايام ما كانت تنزل عند دار سيدي عالضفة بس يلا عديها هالمرة يا هند
المسا اجو خواته لسامي وكل وحدة جايبتلي معها عر وسامي جاب معه مخلوطة قال خلي خواتي يتسلو هم خواتك لحقو يوكلو ايشي ما هم ولادهم ما خلو لا حبة كاجو ولا حبة فستق الا ونتشوها
ما صدقت متى روحو وركاض عالبيت ومرقت هالليلة عخير
وسامي من الخمسة الفجر صحي ونزل على امه معنجر عقاله صحيت ما لقيته بسرعة رتبت البيت ولبست عحالي يانس الصلاة ونزلت عليهم بديش تستفرد فيه
بس ما لحقته كان طالع عشغله وحماتي قاعدة هي وجارتها سلمت عليهم وبدي استئذن اطلع عالبيت بس وين هو دخول الحمام متل طلوعه
( هندخليكي هون زوجك جاي عباله ملوخية وبدك تساعديني هسا ابو حمدي الخضرجي بصير يدور بهالبيكب بين الحارات بدي اشتري منه كم كيلو ونعملهم بدي اشوف عدالتك يا كنتي وهسا فوتي اعملينا فطور الي ولام رفعت )
دخلت عالمطبخ شو هاد انا متعودة عند امي عالترتيب هون الرز عند السكر الطحين مع السميد الكاسات مع الصحون ولا ايشي على حاله عملتلهم قلاية بندورة وصحنين مفركة بطاطا ببيض
وبعد شوي اجا ابو حمدي بنادي عالبيكب عالخضرة الي معه طلعت حماتي جزدانها من عبها وطلعتله عالباب وانا جوا بجلي بجليات الفطور
( هندهاتيلي من خزانتي شرشف افرد عليه هالملوخيات )
( شو كل هاي الملوخية هو احنا عازمين حدا )
( لا مش عازمين حدا بعدين هدول كلهم 80 كيلو و كلها عيدان هسا بس نلقطها ونغسلها ما بصفي منها ايشي )
لقطنا الملوخية وقمت اغسلها وجبت شرشف تاني فردت الملوخية عليها وبعدها اعطتني حماتي الفرامة وحطتلي كومة هالملوخية عسدر وافرمي يا هند اذا انك شاطرة
Telegram:@rwayate
انهد حيلي بالهلملوخية بالاخير اخدتها هي وطبختها وبس اجا حماي وسامي
( تسلم ايدك يما من ايدين ما ننحرمها والله طعم اكلك غير عن الدنيا كلها)
طيب وانا الي لقطت وغسلت وفرمت لا والادهى هي تهز براسها وتحكيلهم والله انهد حيلي فيهم
تاني يوم امي رنت علي عالتلفون الارضي وحكتلي نص ساعة وبنكون انا والجارات عندك بدنا نيجي نباركلك
طيب شو اعمل هسا بتدبقني وبتظل قاعدة طول الوقت عنا وانا بدي اخد راحتي اشوف امي وجاراتها براحتي رنيت على حورية بنت حماي بس حورية ما عندها خط تلفون ارضي ببيتها التلفون موجود ببيت حماها يعني لما بدك تحكي وتطلب حورية لازم تحكي مع كل العيلة حتى توصل لحورية المهم رنيت عليها وردت علي بالاول حماتها بعدين حكت معي سلفتها وبالاخير ولله الحمد وصلت لحورية
( كيفك بنت حماي والله مشتاقلك كتير اليوم لسا خطرتي ببالي وقلت ليش ما تيجي تقضي النهار عنا خلص بديش اعذار بنستناكي اليوم يلا سلام
وهيك بدبس حماتي ببنتها اليوم وبتحل عني اليوم خليني اشوف امي والجارات
وبعد نص ساعة اجت امي والجارات ولسا بحكيلهم اهلا وسهلا ولا هي حماتي بدق الباب
( مرحبا يا عمتي دريت انه امك وجاراتها عندك اليوم حكيت لحالي لازم اجي اسلم عليهم واقوم بواجبهم
مو اتاريها حماتي كاينة فاتحة سماعة التلفون من بيتها ما هو انا واياهم نفس الخط لا وكمان سمعتني لما حكيت مع حورية ورجعت اتصلت على بنتها وحكيتلها يما لا تيجي هسا مرت اخوكي حكتلي انك بدك تيجي عنا يما لا تيجي اليوم طالعين اجليها ليوم تاني
Telegram:@rwayate
وحزينات امي وجاراتها لا عارفات يحكو ولا ينمو ويستغيبو قعدت فوق راسهم

فتت احللهم باكيت عصير يبلو ريقهم فيه بعرفهم انا ما بقدرو يظلو ساكتات لحقتني امي
( هند يا هند خدي هي عشر ليرات من ابوكي تعالي جاي
ام حسين جابتلك طقم كاسات بالزمنات ام فتحي جابتلها اياهم بحفلة نجاح ابنها مناح بلزموكي بمباركة او بنقوط
وام تيسير جبتلك بيجامة ستان فوشية بتفرفح القلب وام زهير جابتلك دزينة فناجين عليهم نقشة بتجنن فهمتي هيني حكيتلك هدية كل وحدة شو هي لانه كل ايشي قرضة ودين )
( طيب يما بتقدري تجبيلي الهدايا هون عالمطبخ )
( ليش بدي اجيبهن هون)
( خلص بس هيك )
( طيب استني)
طلعت امي جابتلي هالاكياس وفاتت
( وهي يا ستي جبتلك الهدايا شو بدك فيهم )
( بديش هاي الي برا تاخدهم استني )
Telegram:@rwayate
( ولك هس يا ام لسان هسا بتسمعك بلاش تروحي قبلي عبيت ابوكي )
طلعت امي من عندي ومسكت كاسة من طقم كاسات ام حسين وضبيتها وفنجان من هدية ام زهير وكسرته شوي شوي ورجعت اقعد عندهم
( قومي يا هند يا عمتي انزلي لعندي عالبيت في بالنملية وقية بزر ابيض جيبيه ضيفي امك وجاراتها
نزلت لتحت جبت كيس البزر مع كم تفاحة بتضبهم حماتي لوقت الزنقات وطلعت
قدمتلهم اياهم وام سامي الي هي حماتي صارت تضوي وتطفي عالتفاحات
وهم روحو من هون وبلشت تبهدل فيي عالتفاحات
( روحي جيبي اشوف شو جابولك هدايا)
فتت جبت الهدايا وطلعت لعندها
(عمتي شفتي يا عمتي هالام حسين وهالام زهير شو قليلات زوق وحدة جايبتلي الكاسات ناقصات والتانية جايبة الفناجين مكسرات)
مكستني من داني ( وليه هند مفكرتيني ما بعرفلك شو عملتي بالهدايا اه وليه عشان ما اخدهم الله الغاني عنك وعن هداياكم )
وطرقت الباب وظلت نازلة ولما اجا سامي عملت حالي متل البسة ومش صاير ايشي ولبست البيجامة الستان الي جابتلي اياها ام تيسير بدكو الصراحة عحبته كتير لسامي
طول اللوقت يحكيلي الله يجزيها الخير لام تيسير على هالبيجامة
وظل طول الليل يتغزل بهالبيجامة لحتى راح عشغله وانا نزلت عند حماتي
كانت حاطة لجن في اواعي لحماي بدها تغسلهم عايدها وبعدين تحطهم بالنشافة
( صباح الخير عمتي هاتي اساعدك )
Telegram:@rwayate
( لا عمك ما بحب حدا يغسله اواعيه غيري روحي جيبلي صفار المي الي عالغاز بدي اديره على هالاواعي )
رحت اجيب الصفار عن الغاز ( يا ربي وين بتحط الكلور وين ايوا تحت المجلى مسكت كاسة كلور وحطيتها بقلب المي وديتلها اياها وهي مسكت هالصفار من هون ودارته عالاواعي من هون وبلشت تصرخ الله لا يوفقك يا هند الله يورجيني فيكي يوم
مع طلعة عمي من الغرفة ( ولك شو في يا ام سامي شو في)
( ولا ايشي شكلي خربطت وحطيت كلور على اواعيك )
ما هي بتسترجيش تحكيله انه انا لانه ممنوع حدا يمسك اواعيه غيرها
طلعت عبيتي وانا سامعة عمي بصرخ وبحلف طلاقات صحيح كنت خايفة يجي تاني يوم لانها رح تقبرني مكاني بس انشفى غليلي شوي ولوقته بيجي مقته

.....يتبع في الحلقة القادمة

الحلقة الرابعة و الخامسة
Telegram:@rwayate
طنة_والرنة_ضعت_بين_الحماية_والكنة
الحلقة الرابعة
بعنوان فنون حماتي
( افتحي يا هند افتحي يلي ما بتنضبي ببيوت افتحي)
( بفتح ليش ما بفتح شو شفتي علي لحتى ما انضب ببيوت )
( ولك مفكرتيني ما بعرف انه انتي عملتي ايشي بالمي خربت الاواعي )
( عمتي لو سمحتي لا تحطي اغلاطك علي انا شو دخلني )
( ولك انتي حية من تحت تبن بس الحق مو عليكي الحق على ابن بطني الي مو عارف يحطلك حد)
( يا عمتي يا حبيبتي انتي ليش حاطة نقري طب والله غلاتك من غلاة امي )
بصوت واطي ( تحبك حية انتي وامك )
( شو حكيتي عمتي)
( ما حكيت ايشي عم بحكي انزلي لتحت حضري الغدا هسا بجي زوجك)
لحقتها وانا بحكي بقلبي هو انتي لسا شفتي ايشي
بسرعة دخلت عالمطبخ وحضرت الاكل البايت وجهزته مع جية سامي وابوه وعينكم ما تشوف حماي كيف بيطلع بمرته
Telegram:@rwayate
سامي لاحظ الوضع مش طبيعي فحب يطري الجو
( عندي فكرة شو رأيكم نطلع رحلة انا وانت يابا وانتي يما وخواتي وولادهم)
رد عليه حماي وحكاله ( وشو الي بده يشيلنا كلنا )
( تخافش يابا صاحبي عنده باص بريجو وصاحبي التاني عنده بيكب انا بدي اخد الباص وخلي زوج اختي حورية يوخد البيكب وايشي بركب هون وايش هون )
( اذا هيك ما في مشكلة مش غلط خلي هالاولاد يفرحو )
( شو يما ما سمعتك حكيتي ايشي)
( الي بدكم اياه بس انا بركب معك )
( هو انا يما بقدر امشي بدونك انتي مش بس معي انتي بجنبي خلص معناتو بعد بكرة يوم الجمعة بنقول يا الله خبرو حورية ونجاة يحضرو حالهم)
ويوم الخميس كانت التحضيرات
( اه يما يا حورية اخوكي الله يرضى عليه بده يجيب اللحمة والجاج ))
( بس يما مش يجب لحمة متل هديك تبعة الرحلة الماضية كانت نية ومش مستوية والله العليم انها كانت مجمدة مش بلدية)
( شو هالحكي اخوكي بجبش الا بلدي،،، هسا المهم انتي بتجيبي العصاير وشوية شيبس وشوكلاطة للولاد خليهم يحركو تمهم الطريق طويلة وبتجيبي معك حصيرة وفرشتين نقعد عليهم فهمتي ولا ارجع اعيد )
( خلص فهمت على بركة الله )
( يلا خليني احكي مع اختك نجاة )
( ايوا يا حبيبتي يا نجاة اسمعي يما هسا كنت احكي مع اختك وحكتلها شو تجيب معها وانتي عليكي التلج والفحم والكانون وجيبلك شوية بزر بطيخ واعمليلك قالب كيك خلينا نوخده معنا اه شو فهمتي مش تنسي ايشي )
( لا يما اتوكلي عالله )
( هند تعالي لهون)
( نعم عمتي )
Telegram:@rwayate
( روحي طوليلك صفتين دوالي من الفريزر بدك تلفيهم للرحلة لانه الولاد كتار وهسا بهجمو عاللحمة يا دوب تكفي)
( طيب عمتي عادي اخد الدواليات عند امي تساعدني فيهم بنلفهم سوا)
( روحي ولا تطولي)
اخدت هالدواليات وبوجهي على امي وقبل ما افوت عالدار دقيت على ام حسين عالباب وحكتلها تلحقنا عند امي
طبعا ما لحقت اوصل كانت ام حسين جاي اصيلة هالمرة
( شو يا هند مش محوشتيلنا ايشي هيك ولا هيك )
( اطمني خالتي ام حسين لما بكون في ايشي انتي اول وحدة رح تعرفي
اه يما هسا خلينا بموضوعنا بكرة الساعة ستة الصبح بتكوني عندي عباب البيت)
( ولك بلاش عمتك تعمللنا قصة)
( ليش امي وبدي اخدها معي عالرحلة بعدين اللحمة زوجي جابها ما بكفي بده يطعمي بناتها وولادههم وهسا خليني اروح قبل ما تغيب الشمس ) اخدت طنجرة هالدواليات الي ساعدتني فيهم امي وام حسين وام تيسير وام زهير وبناتهم مع اني ما حكيتلهم اني جاي بس خلص هالحارة الاخبار فيها بسرعة بتنتشر
حتى ام تيسير وهي قاعدة صارت تحكيلي الله يسعدك يا هند يا هيك البنات يا بلا مش زي بنتي زهور قديش الها متزوجة بحياتها ما حكتلي تعالي معي يما
المهم وصلت البيت عجية سامي
( يعطيك العافية يا حبيبي والله انك بتتعب الله يعطيك العافية)
( الله يرضى عليكي يا هند والله انك بنت اصل ،،، اه شو محضرتيلنا للسهرة )
( والله ما عندي ايشي)
( ما هي نملية امي مليانة كان اخدتي منها شوية قضامة نتسلى فيهم الليلة بما انه الليلة الخميس)
( خلص وحياتك بعد اليوم رح اصير اخد كل شي بهالنملية )
وسامي الي كان بده يسهر ويوكل قضامة لما صارت الساعة عشرة كان بسابع نومة وانا حطيت راسي ونمت عندي فيقة بكير الصبح
والساعة خمسة ونص الفجر حماتي صبحت تدق علينا صحيت وبلشت احضر بهالاغراض وحطيت طنجرة الدوالي عالغاز حتى تلحق تستوي فش نص ساعة ولا امي جاي
حماتي كان في براسها عقل وطار
( وليه هند امك شو جابها)
( والله حكيت لحالي حرام قاعدة بهالبيت لحالها خليها تيجي تتسلى)
( بس انتي عارفة اللحمة عالقد)
( هي شو كاينة بدها توكل كم سيخ كباب على كم سيخ شقف )
لوت تمها وما عجبها الحكي
صحي سامي ورحب بامي وقام لبس هالشرط وهالبلوزة الصفرا وطاقية خضرا وحكالي هند تنسيش توخديلي معك دشداشتي النص كم عشان بس ياذن لصلاة الجمعة البسها واروح اصلي وخديلي معك الكرة وجيبي الشدة عشان نلعبلنا دق
ركبنا بهالباص واصرت حماتي تركب بحد سامي وحماي راح ركب جنب زوج حورية وانا وامي ركبنا ورا بالباص مع سامي

( انا ما بدي اسالك يا هند علي صار بينك وبين امي لكن هم كلمتين علي الطلاق منك اذا ما بتنزلي هسا تبوسي ايدها وتعتذري منها ما بتظليلي ببيت )
( لا شو بتحكي انت هاي متل امي وهسا بنزل بستسمح منها )
كنت بدي هو التاني انفش طرحته بس مش حلوة ارجع مطلقة عبيت اهلي وانا لسا عروس لهيك قلت يلا يا هند عديها وخليها بالقلب تجرح ولا تطلع لبرا وتفضح
Telegram:@rwayate
نزلنا انا وسامي لعندها واول ما شافتني لفت وجهها
( يما انتي الكبيرة وهند غلطت وهي جاي هسا تستسمح منك )
( كيف بدك اياني اسامحها بعد ما قللت ادبها علي قدام ام سميح والجارات)
( خلص يما اعتبريها بنتك وغلطت )
قربت حتى اسلم عليها مدتلي ايدها ابويها مش مشكلة يا ستي الايد الي ما بتقدر عليها بوسها وادعي عليها بالكسر
( ايوا هيك يما هند برضاي عليكي روحي اعمليلنا غلاية قهوة )
دخلت اعمل قهوة لحقني سامي ( الله يسعدك يا هند بعرفك مربية وما بتكسري كلمتي هسا بس تقدمي القهوة اطلعي استنيني بالبيت والبسيلي البيجامة الستان الي جابتلك اياها جارت امك )
حماتي فكرت انها كسبت هاي المعركة بس انا هند وما بتعرف شو رح يجيها ايام سودة مني
سامي ابن امه ما بقدر يخبي على امه ايشي كاني قلتله عن عيد الام عشان يحكي لامه مسكها من عندي وراح حطها بدانها نفظت حالها
(انا بدي عيد ام كمان وانا بدي تعملوه بنفس اليوم هي تروح عند امها قبل يوم او بعد يوم )
( بتموني يما الي بدك اياه بصير )
( واسمع ولى لا تكون طرطور انت مامعك مصاري لهند وامها وهدايهم احكيلها ما معي مصاري مش ضروري والله ام حسام تلبس حفاي وشنتة جديدة )
وطبعا طلع عندي سامي مشحون ما هو حافظ مش فاهم
( هند انا رح اعطيكي تشتري لامك هدية بس اوعي تجيبي سيرة لامي ونبهي على امك اذا بالصدفة شافت امي تروح تحكيلها انك اهديتها ايشي بعيد الام وصحيح بدي اعطيكي عشرين ليرة مش عشرة بتشتري بطريقك هدية لامي حرام خلينا نفرحها )
Telegram:@rwayate
والله انا ما كذبت خبر اخدت هالعشرين ليرة وصرت الف بهالسواق يخرب بيتهم هالبياعين كل شي غليان
الحفاي الي كنت اشتريها بخمسة صايرة بسبعة وقد ما فاصلت اخدت هدية امي وحماتي بسبعطش الليرة والباقي اشتريت فيه عوامة وكرابيج حلب وروحت عالبيت احضر لحفلة حماتي مع انه كان قلبي ناغصني لانه حرمتني اروح اول يوم على امي اما هي اتصلت عبناتها يجو اول يوم ما على اساس حرام عيد الام ولا لو الغيرة ما حبلت الاميرة
عملت كم باكيت جلي وحطيت العوامة وكرابيج حلب وخليت سامي يجيب باكيت غريبة وبرازق وغنينا شوي وقعدنا نوكل
وقدمتلها انا مني الحفاي وسامي الشنتة وحورية كانت جايبة لامها قميص نوم قطن وحورية جايبة يانس صلاة
( ولك حورية زوجك شو خلى ولادك يجيبولك هددية يعيد الام )
( والله يا هند ما خلاهم يجيبو ايشي مقهورة نفسي يجبلي ايشي)
( بدك الصراحة زوجك ما بستاهلك انا مش عارفة على شو قبلانة فيه اعمليها حردة وظلك هون يخرب بيته عالاقل يجبلك ايشي يركبلك قنينة عطر من المكتبة او يجبلك حجاب اميرة بس هيك ايد من قدام وايد من ورا والله ما بصير )
( والله كلامك صحيح يا هند هسا بس يرجع يوخدني انا مش راجعة معه )
( عفارم عليكي اعملي لحالك قيمة )
( نجاة وك نجاة تعالي جاي زوجك شو خلى ولادك يجيبولك هدية )
( بتصدقي يا هند صرلي عنده عمر بحياته ما حملي ايشي)
( وااال عليه عالاقل يجبلك مزهرية بهاليوم يا ستي يجبلك طقم اساور ذهب روسي بس هيك بدك رأيي لا ترجعيله الا لما يتربى هيها حورية حلفت يمين ما ترجع لزوجها الا لما يعرف قيمتها )
( اختي حورية هيك حكت )
( اه والله هلا قبل شوي خبرتني )
Telegram:@rwayate
( هي كاينة احسن مني وانا كمان مش راجعة )
وخلصت الحفلة وكل وحدة قعدت مكانها ولا وحدة رضيت تروح ولكو يهديكم ربي روحو عبيتكم ابداا اصرو يحردو قال لحتى يعلمو ازواجهم الادب
وهيك صرنا واحد بواحد يا ام سامي خليني اقوم انام عشان اصحى بكير واروح احتفل بعيد الام عند امي وجاراتها
........ يتبع في الحلقة القادمة

( وحضرتك ست حورية ليش ما تقومي تنظفيها عشان توكلي انتي وولادك ولا الحنة بايدكي)
( روحي نظفيها ولا تكتري حكي )
( خير ان شاء الله)
روحت انظف البوكسه والله الشوك موتني ايدي ما عاد حسيت فيهم اطلعت من ورا باب المطبخ كانت حماتي وبناتها قاعدات وفاتحات التلفزيون عمسلسل عيلة خمس نجوم وفارطات ضحك
اخدت قشرتين صبر وفتت عغرفة حماتي مسكت قميصها النوم الي بتلبسه كل يوم بعد صلاة المغرب قلبته وفركت كل ظهره بقشر الصبر وطلعت عالمطبخ
( عمتي وهي صحن صبر كلي انتي وبنات حماي والف صحة وهنا )
(حطيهم هون واطلعي عبيتك بدي اقعد انا وبناتي لحالي )
(من عيوني اكيد الوحدة بتشتهي تقعد مع بناتها اذا احتجتي اي ايشي ها اي ايشي ناديني بخاطركم )
طلعت عبيتي وحكيت لحالي خليني انا كمان اعملي كاستين عدس بنتغدى عليهم عترويحة سامي
اجا سامي المغربيات وتغدينا بعد شوي سمعنا صوت حماتي بشقع بالعمارة الله لا يوفقك يا هند يا بنت ابتهاج
( هند احكيلي انتي عاملة ايشي)
Telegram:@rwayate
( انا طبعا لا ليش انا دايما ماليش حظ معكم )
( ولا ليش امي بتردح وصوتها طالع عليكي )
فتحت عيوني وحكيتله ما بعرف
نزلتا انا وسامي عصوتها هي وبنات حماي بصرخو وبتشكونو لعمي
( خير يما شو في )
( اجيتي يا سوسة ولك من يوم ما فتي بيتي ما شفت الخير )
( انتي الي حطيتي لامي الشوك بقميصها النوم صح )
( الله عالظالم من وين لفقتولي اياها هالتهمة )
( ولك بتظلمي بلد بحالها )
( مش يمكن انتي ست حورية او انتي ست نجاة اعملتو هالعملة حتى تحطوها بظهري )
( شوف يا خوي بدك الصراحة مرتك لازمها ترباية )
صرخ فيهم عمي بس ولا صوت ( هند انتي الي عملتي هيك )
( طبعا لا يا عمي انت بتشك فيي بكفيش خلوني اعمل بوكسة الصبر وانا حامل )
قرب علي سامي ( انتي حامل )
( اه من يومين فحصت )
Telegram:@rwayate
( مزبوط يا عمي يعني انتي بدك تجيبلي اول حفيد يحمل اسمي
اسمعو يا بنات من اليوم وطالع هند ما بتصيب ايشي احكيلي يا عمي مشتهية ايشي نفسك بايشي )
( بدك الصراحة يا عمي جاي عبالي كرشات)
( ابشري بكرة بجيبهم من عند اللحام وهي بنات حماكي بكرة بعملولك اياها اصلا احنا من زمان مشتهينها )
طلعت على بيتي وانا بلعب وبضحك صحيح كذبت كذبة كبيرة بس بدبرها اصلا انا هيك هيك بدي اروح على امي ونحكي لام حسين اكيد بتعرف وصفة تخليني احمل
وتاني يوم من الساعة تمنية الصبح كان عمي جايب الكرشات لحماتي وبناتها
للامانة الله يعينهم اذا انا ببيتي ومتت من الريحة بس يلا بستاهلو لعاد انا يخلوني هالمفتريات انظف بوكسة صبر لحالي
اجا سامي ونزلنا نتغدى والله طعمهم غير شكل هالكرشات
( انا بعرف الي بتحمل بتلعي نفسها مش بتنزل دبك باللكرشات)
( والله يا عمتي نفسي لاعية بس كرشاتك انتي ما بتعوضو ولا الفتة ايشي تاني تسلم ايدك حماتي )
خلصنا غدا وعمي حلف الف يمين ما اصيب ايشي
نجاة شالت الاكل وكنست تحته وحورية جلت الجليات
بعدها اجو التنتين على ابوهم بدهم يرجعو عبيوتهم ما استحملو يشتغلو يوم لامهم مع اني كنت حابة يخدموني شوي بس يلا بريحو هم وولادهم وهيك رجعت فضيت ساحة المعركة الي ولحماتي
..... يتبع في الحلقة القادمة

ومن الصبح الله يسعدها خالتي ام رفعت اجت لعمتي
( يصبحك بالخير يا ام سامي )
( اهلا يا ام رفعت تفضلي فوتي لسا ما افطرنا )
( دايمة ان شاء الله سبقتكم شو بدي اقول يا ام سامي انا رايحة عالصحية بنت اخته لابو رفعت تعينت فيها شو رأيك اخد هند معي بنتطمن عليها )
( والله زينة العقل وبطريقك بتتأكدلي اذا هالمنكوبة حامل ترا والله ما انا مصدقها )
( وحدي الله يا بنت الحلال لا تخافي هسا بنعرف كل شي)
نادت علي حماتي من الدرجات وانا طبعا كنت لابسة ومحضرة حالي نزلت لعند حماتي وظليت طالعة مع خالتي ام رفعت
مسكينة تعبت معي اكتر من نص ساعة واحنا نستنى بباص لحتى اجا ووصلنا عالسوق وانا حلفت الف يمين عخالتي ام رفعت ما بتدفع وصلنا عالسوق بدنا نلف شوي قبل ما نوصل للصحية
( اشتريلنا يا هند سندويشتين فلافل من هالمطعم )
( مش هسا كنتي تحكي لحماتي انك مفطرة )
( مزبوط افطرت بس ريحة الفلافل شهتني)
( هاد المطعم غالي بياخد عشر قروش حق السندويشة ابو مصطفى الي عنا بالحارة بيوخد شلن حقها بس تكرمي كم ام رفعت عنا
بدك احط فيها كل ايشي )
Telegram:@rwayate
( اه بدي سلطة بطحينية وخليه يكتر فيها ليمون وشطة )
( حاضر )
رحت جبت سندويشتين فلافل الي وحدة والها وحدة بس ام رفعت طلعت ما بتعرف تبلع الا بقنينة بيبسي
وفتي يا هند مصاري
( طيب هي دكانة تعالي خلينا نشتري الك بشتريلك قنينة بيبسي وانا باخد باكيت عصير دمعة بست قروش ونص )
( مرحبا عمي بدي قنينة بيبسي وباكيت عصير دمعة )
( اذا بدك توخدي قنينة بيبسي بدك تدفعي عربون شلن بدل القنينة لحتى ترجعيها )
( يا عمي كلها قنينة مش محرزة )
( يا عمي والله تبعون الشركة بدفعوني حقها )
( طيب امري لالله اعطيني وخلي عندك الشلن عبين ما تخلص هينا احنا قاعدين هون عباب المحل )
اكلنا هالسندويشتين وشربنا البيبسي والعصير ورحت رجعت القنينة
ورحنا على الصحية ويا لطيييييف قديش في دور قبلي بس كونه انا معي واسطة بنت بنت حماها لام رفعت ما طولنا
( هاي يا سهيلة بتكون كنت جارتي صرلها فترة متزوجة ولهسا ما حملت)
هالسهيلة شايفة حالها وما بتتحاكى بس للامانة حبيتها لما حكتلي انتي حامل وبالشهر التاني كمان كيف لهسا مش حاسة
والله كنت بدي ابوسها من بين عيونها وهجمت عخالتي ام رفعت حضتنها وصرت ابكي سلمنا على سهيلة وروحنا عالبيت
( شفتي يا هند كيف ربنا يسرها وما رضي يفضحك خلص اهدي ولا تظلي تعملي مشاكل مع حماتك)
( يا خالتي هي الي بتعملي مشاكل مش انا هسا المهم بدي اميل على محل اواعي هون بالدخلة بدي اشتري بيجامة بحكو عنده اشياء بتجنن وكله بليرة )
اشتريت بيجامة ستان بس لونها ازرق حلوة كتير واحلى كمان من تبعة ام تيسير وروحنا عالبيت كانت حماتي قاعدة وبتستنى فينا
( اه يا ام رفعت خبري مش حامل صح )
( مبروك يا ام سامي حامل وبالشهر التاني )
( يلا مبروك )
( الله يبارك فيكي يا عمتي بتعرفي شو جاي عبالي هسا نفسي بسدر كنافة )
( يااااا كشيلي يا كشيلي)
( عمتي مالك خير )
Telegram:@rwayate
( ولك بتتوحمي عحلو بتعرفي شو يعني الي بتتوحم عحلو بتجيب بنت والي بتتوحم عحوامض بتجيب ولد يا حبيبي يما نازل تدلل فيها وبدها تجبلك بنت )
( لا انا متاكدة انه ولد هيك حاسة)
( شو بفهمك انتي اكبر منك بيوم افهم منك بسنة )
انشفى غليلها مني قعدت عباب الدار تستنى فيه لسامي حتى تخبروه اني حامل ببنت لو انقطع لساني قبل ما احكي بدي كنافة
واول ما وصل سامي وعمي بلشت تنزل بهالدموع
( اااخ يما ببكي عحظك مو مرتك حامل ببنت)
( قولي وغيري يا ام سامي انتي شو عرفك )
( ول يا زلمة هو انا صغيرة )
( معلش يابا معلش الي بتجيب البنت بتجيب الولدولا تزعل حالك )
( وشوف يما يا سامي عشان ما تزعل ولا احنا نزعل هاي البنت بدها تتسمى على اسمي انشراح )
( ابشري يما ولو )
( هيييي هالحية بدها اياني اسمي بنتي انشراح وك انا بحلم باسم علموضة من تبعون هالايام هبه ، دعاء ، اماني
ايشي حلو هيك )
طلع عندي سامي عامل فيها زعلان
Telegram:@rwayate
( معلش يا هند لا تزعلي ابوي هسا حكالي انه مش شرط اذا جبتي بنت رح تظلي تجيبي بنات الي بتجيب البنت بتجيب الاولاد )
( انا مش زعلانة انا تعبانة بتعرف الحمل والتعب عكلن تعال احكيلك اشتريتلك اليوم بيجامة غير شكل لونها ازرق بجنن )
( قبل البيجامة بتعرفي انه امي قررت تسمي البنت على اسمها )
( يييييي وماله هو في احلى من اسم حماتي اذا ما سمينا احنا على اسمها مين بده يسمي )
( الله يرضى عليكي يا هند هسا قومي البسيلنا الازرق )
قال انا اسمي انشراح لو بدي اسمي اسم قديم عالاقل بسمي ابتهاج عاسم امي اسم حلو مش انشراح
حطينا راسنا ونمنا هديك الليلة
( بسم الله بسم الله )
( هند مالك بسم الله عليكي خدي خدي اشربي مي )
( حلم حلم يا سامي )
( حلم شو )
( اضوي هالضو وتعال اقعد جنبي احكيلك )
( اجاني واحد هسا بالحلم لابس ابيض بابيض بدو يوصيني

الحلقة الثامنة و التاسعة
بين_الطنة_والرنة_ضعت_بين_الحماية_والكنة
Telegram:@rwayate
الحلقة التامنة بعنوان ( خطبة سلفي)
دق دق دق
( جيت جيت )
(مرحبا خالتو هند بتحكيلك ستي انزلي لتحت بدها اياكي )
( شو بدها مني ستك هسا اعترف ليكون في شغل مكوم تحت وبدها ستك وامك انزل اشتغله روح احكيلهم انا حامل ومش قادرة )
( ما في شغل تحت وما بعرف شو بدهم منك )
( طيب روح هسا بلحقك)
هاد يوسف ابن حورية ما بيجي لعندي الا لما يكون في ايشي خليني انزل اشوف شو محضراتلي الام وبنتها
( مسا الخير يا عمتي طلبتيني في ايشي)
( وووليه هند انتي الي حكيتي لزوجك وحماكي ما بدي اسمي البنت عاسم حماتي )
( انا مستحيل اعملها هو في اغلى من اسمك على قلبي )
( اه وزوجك وحماكي شو خلاهم يغيرو الاسم وفجأة هيك صارو بدهم يسمو الاء )
( علمي علمك انا اجاني سامي وحكالي اسمعي يا بنت انا ابوها للبنت الي بدها تيجي وبدي اسميها الاءوانا ما قدرت افتح تمي بوجهه)
( انتي بدك تحكيلي ابني وبعرفه زلمة وبمون عحاله كثير
تعالي جاي هدول ولاد حورية معهم كتب بدهم تجليد
انتي عارفة حورية بتعرفش تجلد)
( انا بعرفش اجلد )
Telegram:@rwayate
( ما هي كلمة بعرفش بتريح خدي الولاد وجلديلهم )
( طيب بتأمري حماتي )
تعال جاي انت واياه
( كم كتاب معكم بده تجليد )
( خالتو هند انا معي سبع كتب واسامة معه سبعة )
( هييييي الله لا يجبركم ومعكم ورق تجليد ونايلون ومقص ولزيق وقلم حبر وطبيعات )
(اه خالتو جبنا طوبيعات كرندايزر )
يلا خد هي اول كتاب جلدته خد حط عليها طوبيعة واكتب اسمك واسم مدرستك وحط النايلون فوقيها
هس وطو صوتكم شوي كأني سامعة ستك بتحكي مع حدا عالتلفون روح يوسف اسمعلي مع مين بتحكي وركاض تعال احكيلي
راح يوسف شوي تسمع واجاني اصيل هاليوسف مش متل امه
( خالتو هاي ستي بتحكي مع خالي سالم )
( طيب خد كتبك عند امك هي خلصنا بدي اروح اشوف شو بحكو
( اه اه يما لا يا حبيبي ولا يهمك ما بتكون الا راضي بدك اياها بيضة وطويلة خلص انا وخواتك من بكرة بدنا ندورلك على عروس )
حورية ضحك سنها ( شو يما سالم اخيرا وافق يتزوج )
( اه بده يجي على اول رمضاان يخطب ويتزوج بين العيدين قبل ما اطلع عالحج بعدين خلص قرر يستقر هون ما بده يرجع عالسعودية )
( الف الحمد لله زهق غربة يما )
( هسا اسمعيني منيح اخوكي بده وحدة حلوة بدي تشدي حيلك انتي واختك هالمرة بدنا نركز مزبوط بدناش ننبلي زي المرة الاولى فهمتي علي )
هسا انا صرت بلوة بطلت اعجب هسا قال بده يستقر هون زهق من الغرفة بقص ايدي اذا ما هم طيروه بس اااخ اكيد هاد هسا برجع مليان ومحوش كومة مصاري
ظليت عند حماتي وبنتها لحتى اجا سامي حطينا هالعشا كنا عاملين خبيزة مع صحن زيتون اخضر وصحن فجل وشوية بصل اخضر نعمة كريم اكلنا وشبعنا وطلعنا عالبيت
( سامي عرفت اخر الاخبار مش اخوك سالم بده يجي عالاردن وخلص بده يستقر هون )
( اه دريت حكتلي امي )
Telegram:@rwayate
( متى لحقت تدرى ما فارقتك تحت )
( وانتو تجلو امي خبرتني )
( شو بدي احكي اخوك معه مصاري )
( يعني واحد بشتغل بالسعودية صرله كم سنة اكيد بده يكون محوش ما انتي عارفه ابو زيد خاله الي بصحله يسافر عالسعودية )
( اه واللله معك حق )
( قومي يا هند الله يرضى عليكي اطفيلي هالضو تعبان ومكسر )
( هو انت دايما تعبان فش غير تعبان اطفيلي الضو نفسي مرة تجبلنا معك ايشي نتسلى عليه جبلك شوية بيض حمام ولا قباب غوار انت عارف انا حامل وبيجي عبالي )
( خلص ابشري من بكرة بدي اجبلك الي بدك اياه )
( صحيح سامي اليوم ولاد اختك لعبو بالاتاري واجو ولاد الحارة يلعبو كمان بس عمتي هي الي كانت توخد منهم هسا انا ما تبعتلها كم لمت بس اتوقع بحدود خمسة وسبعين قرش لانه فراس وجهاد ولاد ام ايمن لعبو مرتين )
سامي سامي انا كاينة احكي مع حالي لحقت تغفى
مش لو طفيت الضو من اول بكرامتي احسنلي خليني اقوم انام بكرة بدي اروح عند امي من بكير
تاني يوم صحيت ولبست قبل سامي بدي اروح اقضي النهار مع امي وجاراتها
واول ما وصلني سامي هناك حلفت ام حسين الف يمين غير الفطور يكون عندها
والله بدكو الصراحة ما هي مصرة بعتت ابن ابنها الصغير راح اشترى صحن حمص وفول وفلافل وعملت قلاية بندورة وقلت كبدة ونادت على ام تيسير وام زهير وبس خلصنا اكل خلت سوسن وميرفت هم الي يجلو الجليات وانا قعدت
( اااخ يا يما شو تعبانة ومخنوقة حماتي طالعة نازلة تحكيلي يا ام البنات )
Telegram:@rwayate
( وهي شو عرفها انك رح تجيبي بنت )
( عشان توحمت عحلو )
( الله يكسرها هسا هو صحيح الي بتتوحم عحلو بتجيب بنت بس مش بالضرورة )
( والله يما جلطتني هي وبناتها )
نطت ام حسين ( ولك يا هند معك عشر ليرات )
( شو بدك هسا بالعشر ليرات )
( اذا معك باخدك عند دكتور فاتح جديد باخدك عنده في عنده هيك جهاز متل التلفزيون بقدر يعرف اذا بتجيبي ولد ولا بنت )
( بتحكي جد يا خالتي ام حسين )

( ولك جد ولا مزج هاي بنتها لام حافظ الي ساكنة عند السيل اكيد عرفتوها راحت عنده وحكاالها حامل بلنت بعد ما كانت مفكرة حالها حامل بولد ونافشة ريشها )
( ايوووا بس والله كتير عشر ليرات بس عكلن الاسبوع الجاي بكون مجمعة المبلغ وبروح انا واياكي لعنده )
( ول كم هندعندي انا الي بروح
بعدها راحت ام زهير عملت كاستين شاي عندها بالبيت وجابتهم مع صحن كعك بيانسون
( ما حكتلكم انه سلفي المسافر قرر يرجع وبده عروس بيضا وحلوة )
( ام تيسير: ومحرز سلفك )
( عم بحكيلك متغرب عالسعودية يعني هاد اكيد بكون مروح بالفين تلات )
( ام حسين : طيب دليه عرباب )
( مين رباب )
( ولك بنت اخوها لام طلال الخياطة الي ابوها تزوج على امها )
( ايوا بس هاي هبلة يا خالتي)
Telegram:@rwayate
( لا ولك صارت منيحة بعدين بتكسبي فيها اجر )
والله اقنعتني ام حسين فيها لرباب وبوجهي دغري على حماتي
( يمسيكي يالخير يا عمتي شوفتلك عروس لسلفي يا عمتي بس شو بحكو جارات امي بتجنن )
( ارتاحي انتي ست هند بدناش منك ايشي )
(والله يا عمتي اانها منيحة ومحترمة انتي روحي وشوفي مش خسرانة ايشي )
( طيب رح اروح بس اذا يا هند ما بتطلع حسب طلبي شو رح اعمل فيكي )
( يا عمتي سالم هاد متل اخوي اكيد بدي ادله عبنت بتجنن خليني اقوم احكي مع امي خليها توخدلنا موعد من اهلها اليوم وانتي عمتي خبري حورية ونجاة يجهزو
والله حكيت مع امي واخدنا منها موعد والمسا تجهزنا ورحنا عبيت اهلها لرباب
قعدت معنا عمتها وبلشت تحكي عن بنت اخوها
( هي صحيح بنت اخوي امها تطلقت لانها عفنة ورباب لو احنا ما شدينا عليها كان طلعت لامها بس هسا ست المعدلات )
قربت علي حورية وشوشتني ( الله لا يوفقك جايبيتنا عوحدة امها عفنة )
فاتت العروس لابسة جاكياات اخضر عبنطلون بني عصندل اسود وجرابات بيض هسا انا تناسق الالوان فهمته بس الصندل عجرابات بالصيف لهسا ما فهمتهم
المهم دخلت رباب سلمت علي مرتين وعلى حورية تلت مرات وعلى نجاة مرتين وعلى حماتي خمس مرات
اتاريها رباب عندها حول بعيونها ومو شايفيتنا مزبوط ومن لما طلعنا من بيت رباب وانا اتبهدل
وصلنا عالبيت ولقينا خالتي ام رفعت عالباب
( ام سامي منيح الي لقيتك ام سميح بدها اياني ادلكم عبنتها كوثر هي حكتلي انكم نسب برفع الراس وللامانة انا حبيت احكيلك كوثر حلوة وبعدين معها شامل )
( استني استني يا ام رفعت بس امسح الارض فيها لكنتي ولك ماخدتنا عوحدة حولة )
( ومالها الحولة عمتي كلنا خلقة الله )
Telegram:@rwayate
( روحي خديها لواحد من قرايبك مش لابني الي كل البنات بتمنو ظفره )
( يييييي القرد بعين امه غزال بعدين اه باخدها لحدا بقربلي شو فيها الناس مش بالشوفات المهم اخلاقها روحي خديله بنات ام سميح )
( جكر فيكي يا هند بدي اخطبله اياها بيضة وحلوة ومعها شامل طقي وموتي
طرقت الباب بايدي وظليت طالعة عبيتي خليها تروح توخدله هالكاسرة كوثر بلكي طلعت عينها وعين بناتها

جهزت اموري ولما طلعت عالبيت انصدمت حماتي لابسة نفس طقمي اخوه ابن امه وابوه
مو اتاريها هالداهية خلتني طلعت عالبيت وشافت الطقم وعرفت المحل من اسم الكيس ورايحة جايبة متله والمشكلة ما ظل وقت اغير اللبسة بس خير دواها عندي وحورية لابسة طقم اسود يكسرها ربي عرس اخوها بدال ما تلبس لونها يبهج وهديك نجاة لابسة توب عليه خياطة حمرا
عملت حالي مو شايفة ولا عندي خبر
تجمعو النسوان والرجال عند بيت ابو رفعت عشان حمام سالم وبلشو يلبسوه ويغنوله
جينا نهني ونغني منشان إمو ونرش العطر الغالي على كمو 🎶🎵.. وجينا نهني ونغني منشان أختو ونرش العطر الغالي على تختو 🎶🎵
لبس سالم والفرقة وشباب الحارة كانو بستنوه عشان يزفوه
بالشارع مشي سالم ومسك عمي بايده ومسكوه لرفعت الشمسية من وراه وبلشو يمشو فيه بالشارع وسامي والشباب يرقصو قدامه ونسوان الحارة واقفات عالبلكونات وبرمو علينا ملبس وولاد الحارة بين الاجرين يلقطو بالملبس
بس ام نزيه والله العليم انه الملبس عندها اله زمان لانه كان يابس راح ما يكسر روسنا لما رمته بس يلا كتر خيرها
وهون اجا عدنان ابن ابو عدنان الخضرجي طلع فرد ماخده من صاحبه وبلش يطخ قديش بنبهو ما حدا يطخ بالاعراس بس ما حدا برد
Telegram:@rwayate
وصلنا بيت اهلها لكوثر ما هي خطوتين وعشان ابوها متوفي فات عمها طلعها كانت امها محضرتلها هالعباية حطتها عليها لما طلعت وطلعنا كالعادة قعدت حماتي معهم بالسيارة بس امها مسكينة مش كاسرة متل امي راحت قعدت بالباصات مع النسواين
وقضيناها طول الطريق نغني
على الجزيرة على الجزيرة شدو الرحال اليوم على الجزيرة حلوة واميرة حلوة واميرة عروستك يا سالم حلوة واميرة
وصلنا عالصالة ويخرب بيتها هالكوثر طالعة بتجنن ووالكل صافن فيي وبحماتي ما احنا مطقمين اااخ ضيعت علي بهجتي امي وخالتي ام حسين كانو قاعدات عطاولة من ورا رحت عليهم دمي بغلي
( شفتي يما شفتيها كيف شارية متل طقمي )
( خلص يما تزعليش الطقم بصحابه )
بس خالتي ام حسين لعبت براسي وحكتلي شو رأيك اخربلها اياه هالطقم امي حكتلها اهدي يا ام حسين خلي هالعرس يمرق عخير بس خلص انا مخي ضرب قربت عخالتي ام حسين
( خالتي كيف بدنا نخربلها الطقم )
( اسمعي علي يا هند بتروحي هسا بتقعدي جنبها وانا بكون بايدي كاسة البيبسي وبس اجا امرق عاساس بتعرقيلني وانا بوقع بكاسة البيبسي بحضنها )
( يا عيني عليكي يا خالتي ايوا هيك يلا هيني قايمة اقعد جنبها )
قمت اقعد جنب حماتي وهي بتطول بالتلبيسة وبتحط فيها عصنية الذهب مع مرقت خالتي ام حسين حطتلها اجري بس ما وقعت الا بحضني انا والبيبسي رشق بوجهي وعطقمي كله ( الله يخرب بيتك يا ام حسين انحولت هسا عدوري ) وبنات حماي وحماتي متل الي حدا عم بضحك فيهم
( هههه يلا تعيشي وتوكلي غيرها كنتي )
بس ربنا بحبني انه كانت دخلة الزلام قمت لبست عحالي العباية وقعدت استنى سامي يجي فاتو الزلام وطلعنا سلمنا عالعرسان وسامي نقط اخوه عشرين دينار وهالكوثر اكثر من مية واحد من قرايبها سلمو عليها ابصر قديش تلم بعدها شغلو اغاني للزلام دبكو ورقصو
Telegram:@rwayate
وروحنا عالبيت
دخلت عبيت عمي اخد من عندهم نيلة عشان انقع طقمي فيه
لقيت حماتي بتحط دوا الاسهال تذكرتوه لكوثر مسكت شوي وحطيت منه لحماتي بكاسة المي تبعتها وهيك حماتي اخدت مخدتها وقضت ليلتها بالحمام
وكوثر وسالم عاشو نفس الذكرى تبعة هند وسامي

الحلقة الثالثة عشر والرابعة عشر و الخامسة عشر والاخيرة
Telegram:@rwayate
بين_الطنة_والرنة_ضعت_بين_الحماية_والكنة
بقلم حنين طه
الحلقة التالتة عشر بعنوان ( سفرة حماتي )
هييي هيهم وصلو اهلها لكوثر والله حاملين ومحملين لازم انزل اشوف شو جايبين لبست عحالي دشداشة فضفاضة لانه ما عاد في ايشي اجا علي
نزلت لعند دار عمي ولا هم اهلها جايبنلها معهم عالصبحية جهاز بتركب عالتلفزيون بجيب عشر قنوات وحكو انه عدنان ابن ابو عدنان الخضرجي بده يجيب صحن كبير ويركبه عالسطح عشان يزبط هاد الجهاز ااااخ نيالها هسا بتقضيها من مسلسل لمسلسل وبتشوف حالها ولا ما هي هدية محرزة وجايبن باكيت برمة الي ما حدا بقدر يحلم فيه
امها وخالاتها يطلعو فيها يتغامزو ويتلامازو كنت بدي ابقها هالبحصة واحكيلهم تعالو بكرة بتطمنو الليلة الماضية كوثر كانت مسهولة بس مسكت لساني بالموت
وقبل ما يطلعو حماتي غدتهم كاينة هي وبناتها طابخات وعاملات مسخن
روحو اهلها وانا ظليت استنى بعدنان يجي بركب الصحن بدي اشوف شو بجيب بس عدنان طول وانا نعست حملت حالي وطلعت عبيتي انام وحكيت بكرة بنزل بشوف ويا خبر هسا بفلوس بكرة ببلاش
والله نمت وما دريت عحالي حتى سامي اجا وما حسيت عليه وما صحيت الا عصوت حماتي
شو يا ابو جلال ليش هالقد ايدك ماسكة زويدهم شوي ما انت شايف هالاغراض عشرة عمر )
Telegram:@rwayate
كنت سامعة حماتي وهي عم بتفاصل بابو جلال عالبيكب عشان يشتري منها شوية كراكيب طالتهم لما عزلت السدة
نزلت لعندهم كانو بنقرو بكوسا بدهم يعملو محاشي وقاعدات قبال هالتلفزيون وفاتحات على استغفر الله نسوان بتغني وبترقص هدول لو البس متلهم مش بس رح يلزقلي سامي بالبيت لا احتمال حتى لما يضطر يطلع من البيت يوخدني معه
حماتي كانت راسمة تطلع عالحج بس ما صحلها لهيك قرر سامي يوخدها ويطلع فيها عمرة
راح حجز الهم وبلشنا نجهزلهم عشان السفر
اجت علينا خالتي ام رفعت وصارت تساعدنا عملنا لحماتي قراص بسبانخ وحطتلها بالشنتة ( كيس تفاح وموز وليمون ) وكيس في بزر وفستق وكل شوي تحكيلنا كترو بدنا نطعم الناس الي معنا بالباص
التمو عنا الجارات يودعوها لحماتي وكل وحدة عندها دعوة حكتها لحماتي تدعيلها اياها الي بدها تطلق كنتها والي بدها ربنا يرزقها الف دينار لا وقاعدات بتمنو وهن مبحلقات بالنسوان الي عالتلفزيون وول طيب عالاقل شيلو عشان الله يستحيب
المسا اجت حورية ونجاة وولادهم سهرو وودعو امهم وسامي لانه من الصبح بدهم يتسهلو والطريق طويلة
وسامي طول الوقت يوصي بعمتي يما الحمامات بس عالاستراحات مش كل شوي بدك حمام
اتسهل سامي وعمتي وانا اخدت شنتتي ورحت اقعد عند امي واول ما وصلت طبو علي نسوان الحارة قال لاني جايبة معي شنتتة اواعيي فكروني جاي مطلقة هاي اكيد هديل واسيل ونهيل بنات ام لطفي الي خبرو الحارة لاني وانا جاي لقيتهم بلعبو حجلة بالشارع
ما هي طب الجرة عتمها بتطلع البنت لامها
( ام حسين : ولك يا هند ليكون في ايشي وانتي ما بدك تحكي اذا زوجك مطلقك ولا ايشي احكي )
( ام زهير : اهم ايشي يا هند تكوني جبتي معك ذهبك )
( فال الله ولا فالكم كلها كم يوم وراجعة سامي طلع عالعمرة مع عمتي حكيت لحالي ليش بدي اقعد هناك لحالي على اطبخي يا هند لعمك ما هي هالمنكوبة كوثر بتعرفش تطبخ)
( ام حسين : وبأي شهر صرتي يا هند ترا نافشة كتير ما شاء الله )
( بالتامن يلا هانت ،،،، هسا المهم لا تنسوني شو بدي احكي مش دار اهلها لكوثر جابولها معهم عالصبحية صطلايت )
Telegram:@rwayate
( وشو هاد الصطلايت يا هند )
( هاد يما صحن كبير بتركب عسطح البيت وفي جهاز بينحط عند التلفزيون وبتصيري تقلبي بس بجيب شغلات والعياذ بالله )
( قولي وغيري ولك هند هو من قليل ربنا غضبان عالبشر شوفي صرنا بنص شهر عشرة ولهسا ما مطرت ولا مرة )
روحو الجارات من عنا واجا ابوي المسا جايب صفط هريسة حليت معه باكيت عصير وقعدنا نوكل فيه كنت حابة نطلع نقعد بالحوش بس الدنيا صارت تبرد امي من تاني يوم طلعت هالسجاد وفرشناه وعزلت السدة ونزلت صوبة الكاز من فوق
وكل يوم قبل الشحادة وبنتها خالتي ام حسين وام زهير عنا
( هند ولك هند )
( نعم يما )
كانت امي بتفضي بشوالات البصل وحكتلي اضب الشوالات الفاضية بنفعو ليف للحمام
( هند يما هسا بيجو الجارات يفطرو ام حسين حكتلي انها عاملة مناقيش زعتر عند ابو فهيم الخباز )
( هو لسا عايش ابو فهيم يما )
( ولك ما قلتلك انه ابو فهيم بعد ما ابنه تزوج هاي الاجنبية صار كل يوم يقعدله قال بده اياه يبيع المخبز ويفتحه ايشي شكلها هي بتعبي براسه )
( يما الاجنبيات مش متلنا ما عندهم هاد الحكي )
( هسا المهم قومي حطي بريق الشاي عالنار قبل ما تيجي ام حسين وناوليني بطريقك علبة الخياطة من على ظهر النملية خليني اقطب هاللحافات)
رديت الشاي و جبت لامي عدة الخياطة الي حاطيتهم امي بعلبة البلازا بعد شوي طلت خالتي اام حسين جايبة هالمناقيش و جاي وهالمرة ساخية بالزعترات

( يا عمتي انا ما خصني مش انا الي قطعت المي بجوز ولاد الجيران )
( هند تراني مش طايقك وبرجع بحكيها الحق مش عليكي الحق على الي حاويكي
نزلت من عندي وانا ضبيت اغراض ولادي ورحت اقضي النهار عند امي لقيت خالتي ام حسين هناك
( ولك جيتي والله جابك يا هند لسا هسا كنا بدنا نرن عليك ي بس ابوكي الله يسامحه مش دافع الفاتورة ومقطوع الخط هاتي البشارة )
Telegram:@rwayate
( امي: اسكتي يا ام حسين ما انتي عارفة لسان هند اطول منها )
(بشارة شو خالتي )
( اليوم رحت عند وحدة خياطة بالسوق دلتني عليها ام محمد الي زوجها نصب على جماعة وشكو عليه عرفتيها )
( يا خالتي هسا المهم شو بدي بام محمد )
( اه المهم سمعت النسوان هناك بحكو انه ابو سامي الي عندهم محلات ادوات منزلية بالسوق رايح يخطب بنت عمرها عشرين سنة بتكون بنت جارتهم واتاكدت انه المقصود هو حماكي والله هاد عمك بعد الكبرة جبة حمرة شكله نفسه خضرة ومع جية هاد السطلايت عندكم عالبيت قرريتزوج
ولك هند وين سرحتي)
عزا بده يفضحنا بالحارة
هسا صحيح انا حماتي بعدني مش ناسيلها دوا الاسهال ولا ناسية الهدايا الي اخدتهم مني وصحيح كنت ادعي عليها تموت بسس بتظل امه لسامي ويتزوج عليها عمي لا والف لا وانا هند بنت ابتهاج
..... يتبع في الحلقة الاخيرة

بدكو الصراحة العروس مش بحاجة لا لبيجامة متل بيجامات زهور بنت ام تيسير ولا محتاجة تجيب اواعي متل الي عند كوثر مفعولها قوي بحلاتها
( ولك هند يا هند تعالي جنبي )
( ايوا يا عمتي )
Telegram:@rwayate
( حطيتي من الدوا وكترتي )
( تخافيش يا عمتي الليلة رح ينامو بالحمام )
تاني يوم كاين عمي يشكي لسامي انه هو وهيام ظلو رايحين جايين عالحمام حتى سامي مسكين مستغرب وحكى لعمي انه انا وكوثر ليلة العروس قضيناها بالحمام كمان
نزلت تحت عالبيت وحلفت الف يمين عهيام ما تصيب شغلة من شغل البيت
وكوثر طلعت تساعدني
انا فتت عغرفتها انظفها ورشتلها كل اواعيها ببخاخ اعطتني اياه سوسن بنت جيرانا قال هاي بتخلي الواحد يظل يحك
رتبنا البيت شوي وطلعنا ومسكينة هي لا عارفة تنام ولا تقعد وهي تحكحك متل الي صايبه جرب
وصارت شاكة فيي انا وكوثر انه سبب الي بصير فيها
لهيك رنيت على حورية وخبرتها تحكي لزوجها انه بدها تيجي تنام عنا كم يوم
اجت حورية هي وولادها وقعدو لهيام عقلبها وعمي انجن ما هو بده يصفاله الجو بس حورية حكت لابوها انه زوجها غار منه وطردها من البيت
( اسمع ولا يوسف علي شايف الحبل هاد بتربطه على اجر الكرسي وبتربط اجر هيام معه عشان لما تقوم تظل قالبة عوجهها
خلاها يوسف قاعدة وربط الكرسي باجر هيام وهي ولا حاسة وهسا بتقوم وكمان شوي بتقوم ولا مبسوطة قاعدة بتتسلى مع عمي حاطين جاط هالفواكه قدامهم ومش سائلين
بعد شوي وقفت بدها تروح عغرفتها ولسا مشت اول خطوة ولا هي قالبة ووجها بنص جاط الفواكه صارت هيام بالتفاح
عمي صار يصرخ عرلاد حورية بس انا فهمت حورية شو ما عمي بهدلك وشو ما حكالك لا تزعلي ولا توخدي عبالك تمسحي وظلك قاعدة عقلبهم
هيام شاكية لعمي منا وقال شو بدها تطلع عبيت لحالها ووعمي بلش يفكر بالموضوع شكله خطرله يطلعنا من البيت ويحطها مكانا
(عمتي : والله يا هند ما انتي قليلة )
( ولو يا عمتي هسا اجا دور اسامة ابن حورية اخد علبة الدبابيس وشكهم كلهم بتخت عمي ومرته ليلتهم انس يا عمتي )
اسامة فات عالغرفة وانا بلهي بهيام ورفع غطا الفرشة وشك كل الدبابيس بالفرشة
وطلع لعنا
Telegram:@rwayate
المسا فات العرسان ينامو
( ابو سامي مش حاسس في ايشي بغز )
( اه والله حاسس ايشي بقرص فيي )
رفعو الشرشف وشافو الدابيس وبلش عمي يصرخ
الله ريتك تموتي يا حورية انتي وامك وهند بيوم واحد
وطلع لعنا معه حورية وولادها
( اسمع علي يا سامي هاي اختك وولادها خليهم يحردو عندك ومرتك ممنوع تنزل تحت وصدقت امك لما كانت تحكي الله لا يوفقك يا هند بنت ابتهاج )
طرق الباب ونزل وما ظللنا حدا بالبيت غير كوثر صارت تحطلهم ملح بالشاي او تحطلهم سكر بالطبيخ حتى عمي مسك كوثر وسالم وطردهم لعنا )
وصارو كل العيلة عندي بالبيت طلعت كوثر السطلايت فوق وشبكناه
الرجال بدهم يحضرو برنامج ( جار القمر ) ما هو كله نسوان
والولاد بدهم يحضرو ماوكلي وعدنان ولينا
واحنا النسوان بدنا نتفرج عالكواسر
بس زلامنا من ورا عاميلنا السودة خافو منا وتركونا نتفرج على الي بدنا اياه بس قد ما في برامج حلوة وقد ما هالسطلايت بجيب شغلات ما بنتخلى عن فكر واربح وعن رافع شاهين تقعد عليه مع كاسة سحلب بالشتوية
تاني يوم طلعت هيام لعنا قال بدها اياني انزل لتحت بدها تحكي معي بموضوع
والله انا الفار لعب بعبي وخفت تعملي ايشي بس الفضول بقتلني لازم اعرف شو بدها
نزلت لعندها وقعدت انا واياها وعملتلي كاسة شاي مع شوية برازق وبلشت تبكي
( يا بنت الحلال مالك ليش بتبكي اذا عشان الي عملناه فيكي انتي الي جبتيه لحالك ولا شو بخلي وحدة حلوة متلك باول عمرها تتزوج واحد قد ابوها )
( مفكرة اني مبسوطة يا هند انا ما بدي اياه لابو سامي انا بدي اتزوج ابن جيرانا بس ابوي مش قابل قال لانه اخته مطلقة )
Telegram:@rwayate
( تزعليش مني تزعليش مني ابوكي غبي هو في حدا حاطط عراسه خيمة وشو يعني مطلقة )
( هسا انا مش عارفة شو اعمل )
( اطلقي من عمي ابو سامي وهيك بتصيري انتي مطلقة وابوكي بزوجك لابن جيرانكم )
( وكيف بده يطلقني )
( نكدي عليه عيشته وظلك اجتمعي فينا بخاف عروحه وبطلقك )
والله هالهيام عملت متل ما قلتلها بالزبط صارت يروح عمي يلاقي شعرها منكوش وطول الوقت منكدة ولما صار يشوف طلباتها الكثيرة ومكياجات واشياء بحياته ما سمع عنها ومصاريف طالعة نازلة صفته عالحديدة خاصة انها صارت كل شوي تحكيله انها ما بدها اياه طلقها ودفعلها نص المهر
صفي البيت على عمي لحاله وصار يحاول كل شوي يجي لعنا عشان يشوف حماتي بس حماتي بتدلل
سامي وسالم حاولو يقنعو عمتي بكل الطرق حتى قبلت بس شرطت على عمي شرط انه نطلع كلنا برحلة عالعقبة وعحسابه ولا بس معه يروح يتزوج
حجزلنا سامي بالباصات وكالعادة جهزنا عدة الرحلة
حورية عملت كيك ونجاة عملت قراص
وانا وكوثر نزلنا عالدكانة اشترينا كوكو عاشور وتوتو وكم باكيت شيبس ساندي على كم باكيت رينغو
وحلينا عصير بقناني واخدناهم وعملنا براد قهوة سادة