📚قصص||روايات||منوعة📚

وامه ساعة تتطلع فيي وساعة بام حسين انا ما كنت عارفة هي بتشكرها لانها دلتهم علي ولا بتلوم فيها
شوي ولا عمتو بتنادي علي
- شو اسمك انتي يا بنتي
- هند اسمي هند
- تعالي يا بنتي اقعدي جنبي
Telegram:@rwayate
قعدت جنبها ( اي اي اي شعري خالتي وجعتني ليش بتمزعي بشعري
- بدنا نشوف طبيعي ولا باروكيه لانه بنات هالايام ما خلو ايشي طبيعي خلص روحي تاكدت
- وغمزت امه للعريس حسيت حالي باختبار لذوي الاحتياجات الخاصة
- وبعد غمز ولمز وهمس وحكي نطقت امه هالجوهرة
- ( بدنا نجيب الشي يشوفها)
الليلة بعد صلاة المغرب بنكون عندكم احنا والشب
ردت عليها امي خلص بتشرفونا خلينا نحكي لابوها يكون موجود
روحو وانا الفرحة مش واسعتني واخيرا بدي اتزوج يا ترى شو شكله طويل ولا قصير ابيض ولا اسمر
وبدنا نتزوج عالعيد وبدنا نلبس توب جديد
طبعا امي خبرت ابوي انه في جماعة جايين يتقدمولي الليلة وابوي ضحك سنه واخيرا بده يخلص مني وبهالمسوية ولا هو الباب بدق
طبعا كانت ام حسين ووراها الجماعة ام حسين ما بتقدر ما تيجي بتخاف يروح عليها ايشي بتموت اذا ما عرفت كل شي
عملت هالقهوة ودخلت عند العريس كان جاي هو وامه واخته وابوه
العريس ما طلع حسب طموحاتي ولا حتى قريب منها وكله حكيت عنه مش مشكلة بس انه جاي بشحاطة يخطبني ما قدرت ابلعها بس يلا المهم زلمة والزلمة بجوهره مو بمظهره
رجع الغمز واللمز يعم اجواء المكان
( يمسيك بالخير يا اخوي يا ابو حسام انا ابو سامي وهاد ابني سامي والناس دلونا عليكم واحنا طالبين القرب منكم شو قلت )
( شرفتنا يا اخوي يا ابو سامي والله احنا بنشتري رجال والبنت بنتكم وانت سميها )
( شوف انا بدي اعتبر بنتك بسعر وحدة من بناتي 1000 ذهب و500 لبس وان شاء الله ما اكون ظلمتها )
( بحبحهم شوي انت عارف الذهب غالي غرام الذهب ب 15 ليرة شو بدها تشتري هالحزينة )
( اكثر من هيك بدفعش )
طلعت من الغرفة ولحقتني ام حسين وامي
( يما مش هسا زوجك كان يحكي احنا بنشتري زلام هسا صار بده مصاري)
( يعدمني اياكي ابوكي ادرى بمصلحتك بعدين الي ما بطلع مع العروس ما بلحقها افهمي
وسمعنا صوت من جوا ( على بركة الله تعالي يابا يا هند بدنا نقرا الفاتحة )
يتبع الحلقة القادمة.......

بين_الطنة_والرنة_ضعت_بين_الحماية_والكنة
Telegram:@rwayate
الحلقة التانية بعنوان ( واخيرا تزوجت)
وقرينا الفاتحة واتفقنا تاني يوم ننزل ونكتب الكتاب
وبالفعل نزلنا وكل امورنا تمام وانا منزلة عيوني بالارض يعني خجلانة وهيك
وكتبنا الكتاب ووالله وخطبتي يا هند وصرتي مخطوبة
وبلشت المناقرات قال بدهمش حفلة خطبة ما هو العرس بعد شهرين وحسب وجهة نظر حماتي ما في داعي للمصاريف الزايدة
وانا كنت موافقة عكل شي حج مطاوع يعني ما صدقت وانا الاقي هالعريس
وبلشنا نحضر لجهازي نصحى انا وامي الساعة سبعة الصبح وبوجهنا عالسوق وطبعا لازم ام حسين تروح معنا
( يما شوفي هاد المحل عنده شغلات حلوة شو رأيك نفوت عليه )
( لا يما هاد غالي هسا خالتك ام حسين بتدلنا عبسطات ارخص واحلى )
( يما بدك تلبسيني هشك بشك من البسطات )
(اه وماله يعني اسكتي انتي شو بفهمك )
وبلشنا من بسطة لبسطة
وام حسين تفاصل بهالبياعين ( دخلك بكم هدول رواب الحمام )
( بعشر ليرات يا حجة )
Telegram:@rwayate
( ول عشو قبل شوي كنت عند بياع وحسبلي اياهم ب سبعة بس وانا حبيت اربحك يلا لفيلي اياهم واحكيلي مبروك )
( يا حجة ما هو ما بزبط )
( بزبط بزبط يا خالتي حرام البنت بدها تتزوج ومهرها كله متين ليرة بدنا نفرحها شوي )
وانا صرت اضوي واطفي الله لا يوفقك يا ام حسين فضحتنا بين هالبياعين
اخدنا كومة هالاكياس وكلهم كياس سود اشتهيت كيس واحد بس يكون عليه اسم محل لا كلهم متل كياس الخضرة واعتلي يا هند
المهم وصلنا عالبيت
( هند روحي حضريلنا ايشي نتغدى ابوكي هسا بوصل )
( شو احضر يما )
( شوفي في عنا جاج بالتلاجة )
( لا ما انتي طبختيها الجاجة قبل يومين )
( طيب طولي شوية عدس وحطيهم بالطنجرة )
ومسكت امي هالتلفون بدها ترن عالجارات وقبل ما تحكي رن تلفون البيت
( الو اهلين يا سامي يا عمتي كيفك ،،، اه والله اشترينا شوية اواعي ،،،، لا شو عالذهب اكيد بدنا نوخد الوالدة هو احنا بنقدر ما نوخدها بس احنا قلنا هدول شوية اواعي مش محرزة نوخد امك معنا مع انها هند طول اليوم وهي تحكيلي يا ريت اجت حماتي معنا ،،،، لا يا عمتي كله ولا زعلك توكل على الله )
هند تعالي هاي حماتك حردانة قال ما اخدناها معنا واحنا نجهز
( هو ليش لازم اخدها معي )
( والله ما خفيت علي مبينة حماتك قوية وكاسرة )
( وليكون بدي اخدها معي تنقي الذهب )
Telegram:@rwayate
( اه بدنا نوخدها بلاش تعملك قصة قبل العرس مش ناقصينها نسيت شو كان بدي اه صحيح بدي ارن على ام تيسير وام زهير وام حسان يجو يشوفو الجهاز )
( يما محسستني انه جهاز عليه العين )
( شو بفهمك انتي هاتي ارن عليهم ولا احكيلك ليش ادفع حق مكالمة عالارضي هسا بنادي عليهم من الشباك
بعدين لازم العالم تشوف شو جهزنلك ولا بتتذكريش لما زهور بنت ام تيسير تزوجت وجهزت شو عملت امها ما خلت حدا الا وفرجته عالجهاز )
( بس يما زهور كان جهازها بحكي )
( لا بحكي ولا عباله بخزي كان كم شرموحة بعدين انا ما حكيتلك )
( لا ما حكيتلي شو )
( والله العليم والله العليم ام حسين ترا بتحكي انه اهلها اكلو نص المهر ونقطوها منه ضحكو عل دار حماها )
يا لطيف هالام حسين شو ذمتها وسيعة
واجو الجارات وعرضت امي هالجهاز قدامهم تقول نوفتيه
وصارت تحكي للنسوان عن عملة حماتي وكيف انها بتحرض ابنها علي
قرب العرس وبدي انزل اشتري ذهب نزلت انا وامي وسامي واخدنا حماتي معنا
انا يعجبني ايشي وهي يعجبها عكسه
( سامي شوف هالاسوارة شو حلوة )
( لا يما لا توخدها شوف قديش رقيقة بعدين هاي عيار 18 بكرة ان اجت تبيعها ما بتجيب ايشي
( طيب سامي شوف هالخاتم )
( لا يما هاد في لون ابيض بكرة من الجلي والمي بروح
لونه بصير مش حلو)
وطلعنا من المحل وانا مشترية ذهب عزوق حماتي وسامي كل ما انغزه يحكيلي هاي امي بتفهم بكل شي الله يخليها
عديتها حكيت يلا يا بنت مرقيها رحنا نشوف بدلة وصالون والله كان في بدلات بتجنن بس حماتي ما قبلت كل شوي تحكيلي هاي غالية وهاي ما معنا ندفع حقها
( اسمعي يا هند سامي لسا باول عمره ولسا ببني بحاله ما معه تختاري اشياء غالية )
دمعو عيوني وانا ساكتلها بس لانه سامي موجود امي شافتني هيك حكت خلص انا بدفع الفرقية خليها توخد البدلة الي بنفسها جبرت بخاطري
Telegram:@rwayate
وطبعا حماتي ما طلعت من الصالون قبل ما اتفقت مع الكوفيرة انها رح تكون هي مرافقة معي
وببلاش كمان
طبعا امي اذا مجرد اواعي فرجت الحارة عليهم كيف ذهب ما ظل حدا صغير ولا كبير الا وشاف الذهبات وبنات الحارة يتهامسو علي شوفي يا حرام كيف ذهبها من سنة سيدي ههههههه
( اسمعي وليه يا ميرفت وانتي يا سوسن لا تفكروني مش سامعتكم ول كل هاد كيد لاني تزوجت وانتو لسا)
نطت ام تيسر ( عيب يا هند هالحكي هم فرحاناتلك متل اختهم وزيادة )

ومن هاليوم ليوم العرس وامي تشغل اغاني وتنوح بدكم الصراحة حتى انا حزنت مع اني كنت مستزوجة بس حزنت اني بدي اطلع من بيت ابوي حزنت اني مش كل يوم رح اشوف امي واحكي معها حزنت انه مش رح التم مع نسوان الحارة حتى ام حسين الا ما كنت اطيقها عزت علي
بس لا كل يوم بدي اجي اطل عليها
( شو بتعملي يما )
Telegram:@rwayate
جاوبتني ام حسين ( تعالي يا هند ساعدينا مش شايفتينا بنعمل صرر حلو وحنا لعرسك )
( طيب يما زوديهم شوي )
( بكفي هيك حبة ناشد وحبة ملبس علوز ونعمة )
نسوان الحارة كلهم بالبيت بنظفو مع امي وانا رحت عالصالون وهناك عينكم ما تشوف الا النور
اذا الكوفيرة رفعتلي شعري حماتي تحكيلها لا خليه نازل لانه كنتي وجها ضعيف مو حلو عليها الرفع
اذا الكوفيرة تقلت مكياج حماتي بتحكيلها خففي كنتي عيونها صغار هسا بختفو عيونها
اذا الكوفيرة خففت مكياج حماتي تحكيلها لا تقليه شوي عروس هاي خليها تبهج
مش عارفة كيف تحملتنا الكوفيرة وما صدقت وخلصت لقيت ابوي جايب بكب جارنا ابوحمزة يوخدني فيه عالبيت
رحت عالبيت ولقيت الجارات حاطات هاللوج بصدر البيت وبغنو وامي تبكي وتمسح بهالدموع وام حسين جابت سدر هالحنة الي مزينته بهالورد وصارت ترقص فيه
بعد شوي سمعنا صوت الزفة وصلت سامي كان مستأجر سيارة كيا سيفيا من صاحبه ومزبطها وحاطت عليها بوكيه ورد
فات ابوي وعمامي طلعوني مش عارفة بهاللحظة ليش دموعي بلشو ينزلو قربت علي ام حسين وقالتلي ( امسحي دموعك تخربيش المكياج ما صدقنا وانتي تتزوجي )
ورجعت راحت لامي وحكتلها اسكتي يا حرمة تنكديش عالبنت
طلعنا من البيت وامي بطلت تبكي صارت تتخانق مع حماتي مين فيهم بدها تركب معي بسيارة العرس
( والله احنا من عادتنا يا ام سامي ام العروس هي الي تركب مع بنتها )
( لا والله ما حزرتي كل العالم بتعرف انه ام العريس هي الي بتركب بالسيارة )
بالاخر سامي قدر يقنعهم انه التنتين يركبو بس امه قدام وامي ورا وركبت حماتي جنب سامي قدام وامي ورا جنبي وطول الطريق حماتي تعطي سامي فستق مش عارفة هي فاردة ولا رحلة وعند كل اشارة يوقف سامي السيارة ينزل من السيارة يرقص هو واخوانه ويرجع عالسيارة ونسوان الحارة يزغرتو بقلب الباصات والله كان نفسي اركب معهم
وصلنا الصالة ودخلنا انا كنت متفقة مع الصالة يحطو اغاني ايهاب توفيق ونجوى كرم لانهم برقصو اتاري حماتي من وراي متفقة معهم يخلوها اغاني دحية
ما صحلي ارقص على ايشي
وخلصت الحفلة وروحنا عالبيت انا كنت رح اسكن بغرفتين ومنافعهم فوق بيت حماي اول ما وصلنا دقت حماتي علينا الباب جايبتلنا العشا جايبة لسامي صحن مشاوي والي جايبة جاج واجت حكتلي ( انتي كلي من الجاج عشان يشوف انوثتك مش توكلي لحمة ) وانا اقتنعت بكلامها ويا ريتني ما اقتنعت
( اااااخ يا بطني )
Telegram:@rwayate
( ولك هند مالك رايحة جاي عالحمام حولتيني هاي المرة العشرين الي بتفوتي فيها عالحمام)
( مش قادرة يا سامي مش قادرة )
( طيب اروح اجبلك دوا )
( لا منشان الله لا تتركني لحالي يمكن اموت وانت مش هون )
وظليت على هالحالة لوجه الفجر بعدها غفيت شوي وبس صحيت لقيت سامي بحكيلي يلا قومي البسي بدنا ننزل عند اهلي نفطر
لبست ونزلت انا واياه تحت
( فوتي يا هند عخزانة امي جيبي دوا لوجع البطن بلكي روقتي شوي
وانا فايتة سمعت امه بتحكيله ( ها طمني ان شاء الله الوضع تمام )
( يما اي تمام قضتها رايحة جاي عالحمام)
( عاملة حالها دلوعة وبتخاف تردش عليها يما )
الله يصبرني عليكي تركتها ودخلت اجيب الدوا ولقيت باكيت دوا للاسهال فهمت وقتها انا ليش قضيت الليلة بالحمام اتاريكي انتي الي حطتلي الدوا بالاكل
ما بكون اسمي هند اذا ما بخليكي تلفي حولين حالك انا هند تعملي هيك فيي بسيطة يا ام سامي يا حماتي يلي جابت حياتي
...... يتبع في الحلقة القادمة

بين_الطنة_والرنة_ضعت_بين_الحماية_والكنة
Telegram:@rwayate
الحلقة التالتة بعنوان ( يا انا يا حماتي)بقلم حنين طه
هند يا هند تعالي هي اهلك جايين يباركولك بصباحيتك
ارتميت بحضن امي وصرت ابكي
( ليش قاعدة بتبكي هسا مش انتي الي قتلتي حالك تتزوجي )
( يما هسا بتسمعك حماتي ،،،، )
كانو اهلي جايبنلي معهم حرامين وسدر كنافة وخمس جاجات قعدو شوي اطمنو عوضعنا انا حكيت لحالي هسا حماتي بتقوم بتغديهم بتعمللهم ايشي ابدا ظلت قاعدة طول الوقت
( شو يا ام حسام ما حكيتلنا قديش طلع نقوط هند )
( والله احنا يا ام سامي من عادتنا نوخد نقوط البنت ونجبلها فيه هدية لبيتها بعدين )
( شوف هالحكي طول عمرنا بنعرف نقوط الوحدة لزوجها وهي واياه بتساعدو )
( انتي يما احكيلي بيتك شو ناقصه وما الك الا تكوني راضية بكرة بجبلك اياه )
حماتي مفكرة نقوطي محرز وطلع ايشي وشويات لانها شافت ولاد عمامي وولاد خوالي كلهم نقطوني وما شاء الله عزوة حزينة ما بتعرف انه كل واحد كان يحط بايدي خمس ليرات يعني عليم الله لو جمعتهم كلهم عبعض ما بطلعو خمسين ليرة
Telegram:@rwayate
المهم روحت امي وصارت حماتي بدها توخد واحد من الحرامات الي جابتهم امي واختارت الاحمر الي عليه ورود قال هاد طاقين وبدفي بشتوية وانا اعطتني التاني الي لونه اصفر وعليه رسمة نمر وبطاق واحد
وسامي كل شوي يحكي ولو يما خدي الي بدك اياه انا ومرتي عحسابك ولا يهمك
حطيت حبة ملبس بتمي وسكتت بديش يحكو من اولها عينها ديقة مع انه طلعت روحي عالحرام لاني بعرف امي هدول الحرامات من زمان مخبيتهم عندها لجهازي من ايام ما كانت تنزل عند دار سيدي عالضفة بس يلا عديها هالمرة يا هند
المسا اجو خواته لسامي وكل وحدة جايبتلي معها عر وسامي جاب معه مخلوطة قال خلي خواتي يتسلو هم خواتك لحقو يوكلو ايشي ما هم ولادهم ما خلو لا حبة كاجو ولا حبة فستق الا ونتشوها
ما صدقت متى روحو وركاض عالبيت ومرقت هالليلة عخير
وسامي من الخمسة الفجر صحي ونزل على امه معنجر عقاله صحيت ما لقيته بسرعة رتبت البيت ولبست عحالي يانس الصلاة ونزلت عليهم بديش تستفرد فيه
بس ما لحقته كان طالع عشغله وحماتي قاعدة هي وجارتها سلمت عليهم وبدي استئذن اطلع عالبيت بس وين هو دخول الحمام متل طلوعه
( هندخليكي هون زوجك جاي عباله ملوخية وبدك تساعديني هسا ابو حمدي الخضرجي بصير يدور بهالبيكب بين الحارات بدي اشتري منه كم كيلو ونعملهم بدي اشوف عدالتك يا كنتي وهسا فوتي اعملينا فطور الي ولام رفعت )
دخلت عالمطبخ شو هاد انا متعودة عند امي عالترتيب هون الرز عند السكر الطحين مع السميد الكاسات مع الصحون ولا ايشي على حاله عملتلهم قلاية بندورة وصحنين مفركة بطاطا ببيض
وبعد شوي اجا ابو حمدي بنادي عالبيكب عالخضرة الي معه طلعت حماتي جزدانها من عبها وطلعتله عالباب وانا جوا بجلي بجليات الفطور
( هندهاتيلي من خزانتي شرشف افرد عليه هالملوخيات )
( شو كل هاي الملوخية هو احنا عازمين حدا )
( لا مش عازمين حدا بعدين هدول كلهم 80 كيلو و كلها عيدان هسا بس نلقطها ونغسلها ما بصفي منها ايشي )
لقطنا الملوخية وقمت اغسلها وجبت شرشف تاني فردت الملوخية عليها وبعدها اعطتني حماتي الفرامة وحطتلي كومة هالملوخية عسدر وافرمي يا هند اذا انك شاطرة
Telegram:@rwayate
انهد حيلي بالهلملوخية بالاخير اخدتها هي وطبختها وبس اجا حماي وسامي
( تسلم ايدك يما من ايدين ما ننحرمها والله طعم اكلك غير عن الدنيا كلها)
طيب وانا الي لقطت وغسلت وفرمت لا والادهى هي تهز براسها وتحكيلهم والله انهد حيلي فيهم
تاني يوم امي رنت علي عالتلفون الارضي وحكتلي نص ساعة وبنكون انا والجارات عندك بدنا نيجي نباركلك
طيب شو اعمل هسا بتدبقني وبتظل قاعدة طول الوقت عنا وانا بدي اخد راحتي اشوف امي وجاراتها براحتي رنيت على حورية بنت حماي بس حورية ما عندها خط تلفون ارضي ببيتها التلفون موجود ببيت حماها يعني لما بدك تحكي وتطلب حورية لازم تحكي مع كل العيلة حتى توصل لحورية المهم رنيت عليها وردت علي بالاول حماتها بعدين حكت معي سلفتها وبالاخير ولله الحمد وصلت لحورية
( كيفك بنت حماي والله مشتاقلك كتير اليوم لسا خطرتي ببالي وقلت ليش ما تيجي تقضي النهار عنا خلص بديش اعذار بنستناكي اليوم يلا سلام
وهيك بدبس حماتي ببنتها اليوم وبتحل عني اليوم خليني اشوف امي والجارات
وبعد نص ساعة اجت امي والجارات ولسا بحكيلهم اهلا وسهلا ولا هي حماتي بدق الباب
( مرحبا يا عمتي دريت انه امك وجاراتها عندك اليوم حكيت لحالي لازم اجي اسلم عليهم واقوم بواجبهم
مو اتاريها حماتي كاينة فاتحة سماعة التلفون من بيتها ما هو انا واياهم نفس الخط لا وكمان سمعتني لما حكيت مع حورية ورجعت اتصلت على بنتها وحكيتلها يما لا تيجي هسا مرت اخوكي حكتلي انك بدك تيجي عنا يما لا تيجي اليوم طالعين اجليها ليوم تاني
Telegram:@rwayate
وحزينات امي وجاراتها لا عارفات يحكو ولا ينمو ويستغيبو قعدت فوق راسهم

فتت احللهم باكيت عصير يبلو ريقهم فيه بعرفهم انا ما بقدرو يظلو ساكتات لحقتني امي
( هند يا هند خدي هي عشر ليرات من ابوكي تعالي جاي
ام حسين جابتلك طقم كاسات بالزمنات ام فتحي جابتلها اياهم بحفلة نجاح ابنها مناح بلزموكي بمباركة او بنقوط
وام تيسير جبتلك بيجامة ستان فوشية بتفرفح القلب وام زهير جابتلك دزينة فناجين عليهم نقشة بتجنن فهمتي هيني حكيتلك هدية كل وحدة شو هي لانه كل ايشي قرضة ودين )
( طيب يما بتقدري تجبيلي الهدايا هون عالمطبخ )
( ليش بدي اجيبهن هون)
( خلص بس هيك )
( طيب استني)
طلعت امي جابتلي هالاكياس وفاتت
( وهي يا ستي جبتلك الهدايا شو بدك فيهم )
( بديش هاي الي برا تاخدهم استني )
Telegram:@rwayate
( ولك هس يا ام لسان هسا بتسمعك بلاش تروحي قبلي عبيت ابوكي )
طلعت امي من عندي ومسكت كاسة من طقم كاسات ام حسين وضبيتها وفنجان من هدية ام زهير وكسرته شوي شوي ورجعت اقعد عندهم
( قومي يا هند يا عمتي انزلي لعندي عالبيت في بالنملية وقية بزر ابيض جيبيه ضيفي امك وجاراتها
نزلت لتحت جبت كيس البزر مع كم تفاحة بتضبهم حماتي لوقت الزنقات وطلعت
قدمتلهم اياهم وام سامي الي هي حماتي صارت تضوي وتطفي عالتفاحات
وهم روحو من هون وبلشت تبهدل فيي عالتفاحات
( روحي جيبي اشوف شو جابولك هدايا)
فتت جبت الهدايا وطلعت لعندها
(عمتي شفتي يا عمتي هالام حسين وهالام زهير شو قليلات زوق وحدة جايبتلي الكاسات ناقصات والتانية جايبة الفناجين مكسرات)
مكستني من داني ( وليه هند مفكرتيني ما بعرفلك شو عملتي بالهدايا اه وليه عشان ما اخدهم الله الغاني عنك وعن هداياكم )
وطرقت الباب وظلت نازلة ولما اجا سامي عملت حالي متل البسة ومش صاير ايشي ولبست البيجامة الستان الي جابتلي اياها ام تيسير بدكو الصراحة عحبته كتير لسامي
طول اللوقت يحكيلي الله يجزيها الخير لام تيسير على هالبيجامة
وظل طول الليل يتغزل بهالبيجامة لحتى راح عشغله وانا نزلت عند حماتي
كانت حاطة لجن في اواعي لحماي بدها تغسلهم عايدها وبعدين تحطهم بالنشافة
( صباح الخير عمتي هاتي اساعدك )
Telegram:@rwayate
( لا عمك ما بحب حدا يغسله اواعيه غيري روحي جيبلي صفار المي الي عالغاز بدي اديره على هالاواعي )
رحت اجيب الصفار عن الغاز ( يا ربي وين بتحط الكلور وين ايوا تحت المجلى مسكت كاسة كلور وحطيتها بقلب المي وديتلها اياها وهي مسكت هالصفار من هون ودارته عالاواعي من هون وبلشت تصرخ الله لا يوفقك يا هند الله يورجيني فيكي يوم
مع طلعة عمي من الغرفة ( ولك شو في يا ام سامي شو في)
( ولا ايشي شكلي خربطت وحطيت كلور على اواعيك )
ما هي بتسترجيش تحكيله انه انا لانه ممنوع حدا يمسك اواعيه غيرها
طلعت عبيتي وانا سامعة عمي بصرخ وبحلف طلاقات صحيح كنت خايفة يجي تاني يوم لانها رح تقبرني مكاني بس انشفى غليلي شوي ولوقته بيجي مقته

.....يتبع في الحلقة القادمة

الحلقة الرابعة و الخامسة
Telegram:@rwayate
طنة_والرنة_ضعت_بين_الحماية_والكنة
الحلقة الرابعة
بعنوان فنون حماتي
( افتحي يا هند افتحي يلي ما بتنضبي ببيوت افتحي)
( بفتح ليش ما بفتح شو شفتي علي لحتى ما انضب ببيوت )
( ولك مفكرتيني ما بعرف انه انتي عملتي ايشي بالمي خربت الاواعي )
( عمتي لو سمحتي لا تحطي اغلاطك علي انا شو دخلني )
( ولك انتي حية من تحت تبن بس الحق مو عليكي الحق على ابن بطني الي مو عارف يحطلك حد)
( يا عمتي يا حبيبتي انتي ليش حاطة نقري طب والله غلاتك من غلاة امي )
بصوت واطي ( تحبك حية انتي وامك )
( شو حكيتي عمتي)
( ما حكيت ايشي عم بحكي انزلي لتحت حضري الغدا هسا بجي زوجك)
لحقتها وانا بحكي بقلبي هو انتي لسا شفتي ايشي
بسرعة دخلت عالمطبخ وحضرت الاكل البايت وجهزته مع جية سامي وابوه وعينكم ما تشوف حماي كيف بيطلع بمرته
Telegram:@rwayate
سامي لاحظ الوضع مش طبيعي فحب يطري الجو
( عندي فكرة شو رأيكم نطلع رحلة انا وانت يابا وانتي يما وخواتي وولادهم)
رد عليه حماي وحكاله ( وشو الي بده يشيلنا كلنا )
( تخافش يابا صاحبي عنده باص بريجو وصاحبي التاني عنده بيكب انا بدي اخد الباص وخلي زوج اختي حورية يوخد البيكب وايشي بركب هون وايش هون )
( اذا هيك ما في مشكلة مش غلط خلي هالاولاد يفرحو )
( شو يما ما سمعتك حكيتي ايشي)
( الي بدكم اياه بس انا بركب معك )
( هو انا يما بقدر امشي بدونك انتي مش بس معي انتي بجنبي خلص معناتو بعد بكرة يوم الجمعة بنقول يا الله خبرو حورية ونجاة يحضرو حالهم)
ويوم الخميس كانت التحضيرات
( اه يما يا حورية اخوكي الله يرضى عليه بده يجيب اللحمة والجاج ))
( بس يما مش يجب لحمة متل هديك تبعة الرحلة الماضية كانت نية ومش مستوية والله العليم انها كانت مجمدة مش بلدية)
( شو هالحكي اخوكي بجبش الا بلدي،،، هسا المهم انتي بتجيبي العصاير وشوية شيبس وشوكلاطة للولاد خليهم يحركو تمهم الطريق طويلة وبتجيبي معك حصيرة وفرشتين نقعد عليهم فهمتي ولا ارجع اعيد )
( خلص فهمت على بركة الله )
( يلا خليني احكي مع اختك نجاة )
( ايوا يا حبيبتي يا نجاة اسمعي يما هسا كنت احكي مع اختك وحكتلها شو تجيب معها وانتي عليكي التلج والفحم والكانون وجيبلك شوية بزر بطيخ واعمليلك قالب كيك خلينا نوخده معنا اه شو فهمتي مش تنسي ايشي )
( لا يما اتوكلي عالله )
( هند تعالي لهون)
( نعم عمتي )
Telegram:@rwayate
( روحي طوليلك صفتين دوالي من الفريزر بدك تلفيهم للرحلة لانه الولاد كتار وهسا بهجمو عاللحمة يا دوب تكفي)
( طيب عمتي عادي اخد الدواليات عند امي تساعدني فيهم بنلفهم سوا)
( روحي ولا تطولي)
اخدت هالدواليات وبوجهي على امي وقبل ما افوت عالدار دقيت على ام حسين عالباب وحكتلها تلحقنا عند امي
طبعا ما لحقت اوصل كانت ام حسين جاي اصيلة هالمرة
( شو يا هند مش محوشتيلنا ايشي هيك ولا هيك )
( اطمني خالتي ام حسين لما بكون في ايشي انتي اول وحدة رح تعرفي
اه يما هسا خلينا بموضوعنا بكرة الساعة ستة الصبح بتكوني عندي عباب البيت)
( ولك بلاش عمتك تعمللنا قصة)
( ليش امي وبدي اخدها معي عالرحلة بعدين اللحمة زوجي جابها ما بكفي بده يطعمي بناتها وولادههم وهسا خليني اروح قبل ما تغيب الشمس ) اخدت طنجرة هالدواليات الي ساعدتني فيهم امي وام حسين وام تيسير وام زهير وبناتهم مع اني ما حكيتلهم اني جاي بس خلص هالحارة الاخبار فيها بسرعة بتنتشر
حتى ام تيسير وهي قاعدة صارت تحكيلي الله يسعدك يا هند يا هيك البنات يا بلا مش زي بنتي زهور قديش الها متزوجة بحياتها ما حكتلي تعالي معي يما
المهم وصلت البيت عجية سامي
( يعطيك العافية يا حبيبي والله انك بتتعب الله يعطيك العافية)
( الله يرضى عليكي يا هند والله انك بنت اصل ،،، اه شو محضرتيلنا للسهرة )
( والله ما عندي ايشي)
( ما هي نملية امي مليانة كان اخدتي منها شوية قضامة نتسلى فيهم الليلة بما انه الليلة الخميس)
( خلص وحياتك بعد اليوم رح اصير اخد كل شي بهالنملية )
وسامي الي كان بده يسهر ويوكل قضامة لما صارت الساعة عشرة كان بسابع نومة وانا حطيت راسي ونمت عندي فيقة بكير الصبح
والساعة خمسة ونص الفجر حماتي صبحت تدق علينا صحيت وبلشت احضر بهالاغراض وحطيت طنجرة الدوالي عالغاز حتى تلحق تستوي فش نص ساعة ولا امي جاي
حماتي كان في براسها عقل وطار
( وليه هند امك شو جابها)
( والله حكيت لحالي حرام قاعدة بهالبيت لحالها خليها تيجي تتسلى)
( بس انتي عارفة اللحمة عالقد)
( هي شو كاينة بدها توكل كم سيخ كباب على كم سيخ شقف )
لوت تمها وما عجبها الحكي
صحي سامي ورحب بامي وقام لبس هالشرط وهالبلوزة الصفرا وطاقية خضرا وحكالي هند تنسيش توخديلي معك دشداشتي النص كم عشان بس ياذن لصلاة الجمعة البسها واروح اصلي وخديلي معك الكرة وجيبي الشدة عشان نلعبلنا دق
ركبنا بهالباص واصرت حماتي تركب بحد سامي وحماي راح ركب جنب زوج حورية وانا وامي ركبنا ورا بالباص مع سامي

( انا ما بدي اسالك يا هند علي صار بينك وبين امي لكن هم كلمتين علي الطلاق منك اذا ما بتنزلي هسا تبوسي ايدها وتعتذري منها ما بتظليلي ببيت )
( لا شو بتحكي انت هاي متل امي وهسا بنزل بستسمح منها )
كنت بدي هو التاني انفش طرحته بس مش حلوة ارجع مطلقة عبيت اهلي وانا لسا عروس لهيك قلت يلا يا هند عديها وخليها بالقلب تجرح ولا تطلع لبرا وتفضح
Telegram:@rwayate
نزلنا انا وسامي لعندها واول ما شافتني لفت وجهها
( يما انتي الكبيرة وهند غلطت وهي جاي هسا تستسمح منك )
( كيف بدك اياني اسامحها بعد ما قللت ادبها علي قدام ام سميح والجارات)
( خلص يما اعتبريها بنتك وغلطت )
قربت حتى اسلم عليها مدتلي ايدها ابويها مش مشكلة يا ستي الايد الي ما بتقدر عليها بوسها وادعي عليها بالكسر
( ايوا هيك يما هند برضاي عليكي روحي اعمليلنا غلاية قهوة )
دخلت اعمل قهوة لحقني سامي ( الله يسعدك يا هند بعرفك مربية وما بتكسري كلمتي هسا بس تقدمي القهوة اطلعي استنيني بالبيت والبسيلي البيجامة الستان الي جابتلك اياها جارت امك )
حماتي فكرت انها كسبت هاي المعركة بس انا هند وما بتعرف شو رح يجيها ايام سودة مني
سامي ابن امه ما بقدر يخبي على امه ايشي كاني قلتله عن عيد الام عشان يحكي لامه مسكها من عندي وراح حطها بدانها نفظت حالها
(انا بدي عيد ام كمان وانا بدي تعملوه بنفس اليوم هي تروح عند امها قبل يوم او بعد يوم )
( بتموني يما الي بدك اياه بصير )
( واسمع ولى لا تكون طرطور انت مامعك مصاري لهند وامها وهدايهم احكيلها ما معي مصاري مش ضروري والله ام حسام تلبس حفاي وشنتة جديدة )
وطبعا طلع عندي سامي مشحون ما هو حافظ مش فاهم
( هند انا رح اعطيكي تشتري لامك هدية بس اوعي تجيبي سيرة لامي ونبهي على امك اذا بالصدفة شافت امي تروح تحكيلها انك اهديتها ايشي بعيد الام وصحيح بدي اعطيكي عشرين ليرة مش عشرة بتشتري بطريقك هدية لامي حرام خلينا نفرحها )
Telegram:@rwayate
والله انا ما كذبت خبر اخدت هالعشرين ليرة وصرت الف بهالسواق يخرب بيتهم هالبياعين كل شي غليان
الحفاي الي كنت اشتريها بخمسة صايرة بسبعة وقد ما فاصلت اخدت هدية امي وحماتي بسبعطش الليرة والباقي اشتريت فيه عوامة وكرابيج حلب وروحت عالبيت احضر لحفلة حماتي مع انه كان قلبي ناغصني لانه حرمتني اروح اول يوم على امي اما هي اتصلت عبناتها يجو اول يوم ما على اساس حرام عيد الام ولا لو الغيرة ما حبلت الاميرة
عملت كم باكيت جلي وحطيت العوامة وكرابيج حلب وخليت سامي يجيب باكيت غريبة وبرازق وغنينا شوي وقعدنا نوكل
وقدمتلها انا مني الحفاي وسامي الشنتة وحورية كانت جايبة لامها قميص نوم قطن وحورية جايبة يانس صلاة
( ولك حورية زوجك شو خلى ولادك يجيبولك هددية يعيد الام )
( والله يا هند ما خلاهم يجيبو ايشي مقهورة نفسي يجبلي ايشي)
( بدك الصراحة زوجك ما بستاهلك انا مش عارفة على شو قبلانة فيه اعمليها حردة وظلك هون يخرب بيته عالاقل يجبلك ايشي يركبلك قنينة عطر من المكتبة او يجبلك حجاب اميرة بس هيك ايد من قدام وايد من ورا والله ما بصير )
( والله كلامك صحيح يا هند هسا بس يرجع يوخدني انا مش راجعة معه )
( عفارم عليكي اعملي لحالك قيمة )
( نجاة وك نجاة تعالي جاي زوجك شو خلى ولادك يجيبولك هدية )
( بتصدقي يا هند صرلي عنده عمر بحياته ما حملي ايشي)
( وااال عليه عالاقل يجبلك مزهرية بهاليوم يا ستي يجبلك طقم اساور ذهب روسي بس هيك بدك رأيي لا ترجعيله الا لما يتربى هيها حورية حلفت يمين ما ترجع لزوجها الا لما يعرف قيمتها )
( اختي حورية هيك حكت )
( اه والله هلا قبل شوي خبرتني )
Telegram:@rwayate
( هي كاينة احسن مني وانا كمان مش راجعة )
وخلصت الحفلة وكل وحدة قعدت مكانها ولا وحدة رضيت تروح ولكو يهديكم ربي روحو عبيتكم ابداا اصرو يحردو قال لحتى يعلمو ازواجهم الادب
وهيك صرنا واحد بواحد يا ام سامي خليني اقوم انام عشان اصحى بكير واروح احتفل بعيد الام عند امي وجاراتها
........ يتبع في الحلقة القادمة

( وحضرتك ست حورية ليش ما تقومي تنظفيها عشان توكلي انتي وولادك ولا الحنة بايدكي)
( روحي نظفيها ولا تكتري حكي )
( خير ان شاء الله)
روحت انظف البوكسه والله الشوك موتني ايدي ما عاد حسيت فيهم اطلعت من ورا باب المطبخ كانت حماتي وبناتها قاعدات وفاتحات التلفزيون عمسلسل عيلة خمس نجوم وفارطات ضحك
اخدت قشرتين صبر وفتت عغرفة حماتي مسكت قميصها النوم الي بتلبسه كل يوم بعد صلاة المغرب قلبته وفركت كل ظهره بقشر الصبر وطلعت عالمطبخ
( عمتي وهي صحن صبر كلي انتي وبنات حماي والف صحة وهنا )
(حطيهم هون واطلعي عبيتك بدي اقعد انا وبناتي لحالي )
(من عيوني اكيد الوحدة بتشتهي تقعد مع بناتها اذا احتجتي اي ايشي ها اي ايشي ناديني بخاطركم )
طلعت عبيتي وحكيت لحالي خليني انا كمان اعملي كاستين عدس بنتغدى عليهم عترويحة سامي
اجا سامي المغربيات وتغدينا بعد شوي سمعنا صوت حماتي بشقع بالعمارة الله لا يوفقك يا هند يا بنت ابتهاج
( هند احكيلي انتي عاملة ايشي)
Telegram:@rwayate
( انا طبعا لا ليش انا دايما ماليش حظ معكم )
( ولا ليش امي بتردح وصوتها طالع عليكي )
فتحت عيوني وحكيتله ما بعرف
نزلتا انا وسامي عصوتها هي وبنات حماي بصرخو وبتشكونو لعمي
( خير يما شو في )
( اجيتي يا سوسة ولك من يوم ما فتي بيتي ما شفت الخير )
( انتي الي حطيتي لامي الشوك بقميصها النوم صح )
( الله عالظالم من وين لفقتولي اياها هالتهمة )
( ولك بتظلمي بلد بحالها )
( مش يمكن انتي ست حورية او انتي ست نجاة اعملتو هالعملة حتى تحطوها بظهري )
( شوف يا خوي بدك الصراحة مرتك لازمها ترباية )
صرخ فيهم عمي بس ولا صوت ( هند انتي الي عملتي هيك )
( طبعا لا يا عمي انت بتشك فيي بكفيش خلوني اعمل بوكسة الصبر وانا حامل )
قرب علي سامي ( انتي حامل )
( اه من يومين فحصت )
Telegram:@rwayate
( مزبوط يا عمي يعني انتي بدك تجيبلي اول حفيد يحمل اسمي
اسمعو يا بنات من اليوم وطالع هند ما بتصيب ايشي احكيلي يا عمي مشتهية ايشي نفسك بايشي )
( بدك الصراحة يا عمي جاي عبالي كرشات)
( ابشري بكرة بجيبهم من عند اللحام وهي بنات حماكي بكرة بعملولك اياها اصلا احنا من زمان مشتهينها )
طلعت على بيتي وانا بلعب وبضحك صحيح كذبت كذبة كبيرة بس بدبرها اصلا انا هيك هيك بدي اروح على امي ونحكي لام حسين اكيد بتعرف وصفة تخليني احمل
وتاني يوم من الساعة تمنية الصبح كان عمي جايب الكرشات لحماتي وبناتها
للامانة الله يعينهم اذا انا ببيتي ومتت من الريحة بس يلا بستاهلو لعاد انا يخلوني هالمفتريات انظف بوكسة صبر لحالي
اجا سامي ونزلنا نتغدى والله طعمهم غير شكل هالكرشات
( انا بعرف الي بتحمل بتلعي نفسها مش بتنزل دبك باللكرشات)
( والله يا عمتي نفسي لاعية بس كرشاتك انتي ما بتعوضو ولا الفتة ايشي تاني تسلم ايدك حماتي )
خلصنا غدا وعمي حلف الف يمين ما اصيب ايشي
نجاة شالت الاكل وكنست تحته وحورية جلت الجليات
بعدها اجو التنتين على ابوهم بدهم يرجعو عبيوتهم ما استحملو يشتغلو يوم لامهم مع اني كنت حابة يخدموني شوي بس يلا بريحو هم وولادهم وهيك رجعت فضيت ساحة المعركة الي ولحماتي
..... يتبع في الحلقة القادمة

ومن الصبح الله يسعدها خالتي ام رفعت اجت لعمتي
( يصبحك بالخير يا ام سامي )
( اهلا يا ام رفعت تفضلي فوتي لسا ما افطرنا )
( دايمة ان شاء الله سبقتكم شو بدي اقول يا ام سامي انا رايحة عالصحية بنت اخته لابو رفعت تعينت فيها شو رأيك اخد هند معي بنتطمن عليها )
( والله زينة العقل وبطريقك بتتأكدلي اذا هالمنكوبة حامل ترا والله ما انا مصدقها )
( وحدي الله يا بنت الحلال لا تخافي هسا بنعرف كل شي)
نادت علي حماتي من الدرجات وانا طبعا كنت لابسة ومحضرة حالي نزلت لعند حماتي وظليت طالعة مع خالتي ام رفعت
مسكينة تعبت معي اكتر من نص ساعة واحنا نستنى بباص لحتى اجا ووصلنا عالسوق وانا حلفت الف يمين عخالتي ام رفعت ما بتدفع وصلنا عالسوق بدنا نلف شوي قبل ما نوصل للصحية
( اشتريلنا يا هند سندويشتين فلافل من هالمطعم )
( مش هسا كنتي تحكي لحماتي انك مفطرة )
( مزبوط افطرت بس ريحة الفلافل شهتني)
( هاد المطعم غالي بياخد عشر قروش حق السندويشة ابو مصطفى الي عنا بالحارة بيوخد شلن حقها بس تكرمي كم ام رفعت عنا
بدك احط فيها كل ايشي )
Telegram:@rwayate
( اه بدي سلطة بطحينية وخليه يكتر فيها ليمون وشطة )
( حاضر )
رحت جبت سندويشتين فلافل الي وحدة والها وحدة بس ام رفعت طلعت ما بتعرف تبلع الا بقنينة بيبسي
وفتي يا هند مصاري
( طيب هي دكانة تعالي خلينا نشتري الك بشتريلك قنينة بيبسي وانا باخد باكيت عصير دمعة بست قروش ونص )
( مرحبا عمي بدي قنينة بيبسي وباكيت عصير دمعة )
( اذا بدك توخدي قنينة بيبسي بدك تدفعي عربون شلن بدل القنينة لحتى ترجعيها )
( يا عمي كلها قنينة مش محرزة )
( يا عمي والله تبعون الشركة بدفعوني حقها )
( طيب امري لالله اعطيني وخلي عندك الشلن عبين ما تخلص هينا احنا قاعدين هون عباب المحل )
اكلنا هالسندويشتين وشربنا البيبسي والعصير ورحت رجعت القنينة
ورحنا على الصحية ويا لطيييييف قديش في دور قبلي بس كونه انا معي واسطة بنت بنت حماها لام رفعت ما طولنا
( هاي يا سهيلة بتكون كنت جارتي صرلها فترة متزوجة ولهسا ما حملت)
هالسهيلة شايفة حالها وما بتتحاكى بس للامانة حبيتها لما حكتلي انتي حامل وبالشهر التاني كمان كيف لهسا مش حاسة
والله كنت بدي ابوسها من بين عيونها وهجمت عخالتي ام رفعت حضتنها وصرت ابكي سلمنا على سهيلة وروحنا عالبيت
( شفتي يا هند كيف ربنا يسرها وما رضي يفضحك خلص اهدي ولا تظلي تعملي مشاكل مع حماتك)
( يا خالتي هي الي بتعملي مشاكل مش انا هسا المهم بدي اميل على محل اواعي هون بالدخلة بدي اشتري بيجامة بحكو عنده اشياء بتجنن وكله بليرة )
اشتريت بيجامة ستان بس لونها ازرق حلوة كتير واحلى كمان من تبعة ام تيسير وروحنا عالبيت كانت حماتي قاعدة وبتستنى فينا
( اه يا ام رفعت خبري مش حامل صح )
( مبروك يا ام سامي حامل وبالشهر التاني )
( يلا مبروك )
( الله يبارك فيكي يا عمتي بتعرفي شو جاي عبالي هسا نفسي بسدر كنافة )
( يااااا كشيلي يا كشيلي)
( عمتي مالك خير )
Telegram:@rwayate
( ولك بتتوحمي عحلو بتعرفي شو يعني الي بتتوحم عحلو بتجيب بنت والي بتتوحم عحوامض بتجيب ولد يا حبيبي يما نازل تدلل فيها وبدها تجبلك بنت )
( لا انا متاكدة انه ولد هيك حاسة)
( شو بفهمك انتي اكبر منك بيوم افهم منك بسنة )
انشفى غليلها مني قعدت عباب الدار تستنى فيه لسامي حتى تخبروه اني حامل ببنت لو انقطع لساني قبل ما احكي بدي كنافة
واول ما وصل سامي وعمي بلشت تنزل بهالدموع
( اااخ يما ببكي عحظك مو مرتك حامل ببنت)
( قولي وغيري يا ام سامي انتي شو عرفك )
( ول يا زلمة هو انا صغيرة )
( معلش يابا معلش الي بتجيب البنت بتجيب الولدولا تزعل حالك )
( وشوف يما يا سامي عشان ما تزعل ولا احنا نزعل هاي البنت بدها تتسمى على اسمي انشراح )
( ابشري يما ولو )
( هيييي هالحية بدها اياني اسمي بنتي انشراح وك انا بحلم باسم علموضة من تبعون هالايام هبه ، دعاء ، اماني
ايشي حلو هيك )
طلع عندي سامي عامل فيها زعلان
Telegram:@rwayate
( معلش يا هند لا تزعلي ابوي هسا حكالي انه مش شرط اذا جبتي بنت رح تظلي تجيبي بنات الي بتجيب البنت بتجيب الاولاد )
( انا مش زعلانة انا تعبانة بتعرف الحمل والتعب عكلن تعال احكيلك اشتريتلك اليوم بيجامة غير شكل لونها ازرق بجنن )
( قبل البيجامة بتعرفي انه امي قررت تسمي البنت على اسمها )
( يييييي وماله هو في احلى من اسم حماتي اذا ما سمينا احنا على اسمها مين بده يسمي )
( الله يرضى عليكي يا هند هسا قومي البسيلنا الازرق )
قال انا اسمي انشراح لو بدي اسمي اسم قديم عالاقل بسمي ابتهاج عاسم امي اسم حلو مش انشراح
حطينا راسنا ونمنا هديك الليلة
( بسم الله بسم الله )
( هند مالك بسم الله عليكي خدي خدي اشربي مي )
( حلم حلم يا سامي )
( حلم شو )
( اضوي هالضو وتعال اقعد جنبي احكيلك )
( اجاني واحد هسا بالحلم لابس ابيض بابيض بدو يوصيني

الحلقة الثامنة و التاسعة
بين_الطنة_والرنة_ضعت_بين_الحماية_والكنة
Telegram:@rwayate
الحلقة التامنة بعنوان ( خطبة سلفي)
دق دق دق
( جيت جيت )
(مرحبا خالتو هند بتحكيلك ستي انزلي لتحت بدها اياكي )
( شو بدها مني ستك هسا اعترف ليكون في شغل مكوم تحت وبدها ستك وامك انزل اشتغله روح احكيلهم انا حامل ومش قادرة )
( ما في شغل تحت وما بعرف شو بدهم منك )
( طيب روح هسا بلحقك)
هاد يوسف ابن حورية ما بيجي لعندي الا لما يكون في ايشي خليني انزل اشوف شو محضراتلي الام وبنتها
( مسا الخير يا عمتي طلبتيني في ايشي)
( وووليه هند انتي الي حكيتي لزوجك وحماكي ما بدي اسمي البنت عاسم حماتي )
( انا مستحيل اعملها هو في اغلى من اسمك على قلبي )
( اه وزوجك وحماكي شو خلاهم يغيرو الاسم وفجأة هيك صارو بدهم يسمو الاء )
( علمي علمك انا اجاني سامي وحكالي اسمعي يا بنت انا ابوها للبنت الي بدها تيجي وبدي اسميها الاءوانا ما قدرت افتح تمي بوجهه)
( انتي بدك تحكيلي ابني وبعرفه زلمة وبمون عحاله كثير
تعالي جاي هدول ولاد حورية معهم كتب بدهم تجليد
انتي عارفة حورية بتعرفش تجلد)
( انا بعرفش اجلد )
Telegram:@rwayate
( ما هي كلمة بعرفش بتريح خدي الولاد وجلديلهم )
( طيب بتأمري حماتي )
تعال جاي انت واياه
( كم كتاب معكم بده تجليد )
( خالتو هند انا معي سبع كتب واسامة معه سبعة )
( هييييي الله لا يجبركم ومعكم ورق تجليد ونايلون ومقص ولزيق وقلم حبر وطبيعات )
(اه خالتو جبنا طوبيعات كرندايزر )
يلا خد هي اول كتاب جلدته خد حط عليها طوبيعة واكتب اسمك واسم مدرستك وحط النايلون فوقيها
هس وطو صوتكم شوي كأني سامعة ستك بتحكي مع حدا عالتلفون روح يوسف اسمعلي مع مين بتحكي وركاض تعال احكيلي
راح يوسف شوي تسمع واجاني اصيل هاليوسف مش متل امه
( خالتو هاي ستي بتحكي مع خالي سالم )
( طيب خد كتبك عند امك هي خلصنا بدي اروح اشوف شو بحكو
( اه اه يما لا يا حبيبي ولا يهمك ما بتكون الا راضي بدك اياها بيضة وطويلة خلص انا وخواتك من بكرة بدنا ندورلك على عروس )
حورية ضحك سنها ( شو يما سالم اخيرا وافق يتزوج )
( اه بده يجي على اول رمضاان يخطب ويتزوج بين العيدين قبل ما اطلع عالحج بعدين خلص قرر يستقر هون ما بده يرجع عالسعودية )
( الف الحمد لله زهق غربة يما )
( هسا اسمعيني منيح اخوكي بده وحدة حلوة بدي تشدي حيلك انتي واختك هالمرة بدنا نركز مزبوط بدناش ننبلي زي المرة الاولى فهمتي علي )
هسا انا صرت بلوة بطلت اعجب هسا قال بده يستقر هون زهق من الغرفة بقص ايدي اذا ما هم طيروه بس اااخ اكيد هاد هسا برجع مليان ومحوش كومة مصاري
ظليت عند حماتي وبنتها لحتى اجا سامي حطينا هالعشا كنا عاملين خبيزة مع صحن زيتون اخضر وصحن فجل وشوية بصل اخضر نعمة كريم اكلنا وشبعنا وطلعنا عالبيت
( سامي عرفت اخر الاخبار مش اخوك سالم بده يجي عالاردن وخلص بده يستقر هون )
( اه دريت حكتلي امي )
Telegram:@rwayate
( متى لحقت تدرى ما فارقتك تحت )
( وانتو تجلو امي خبرتني )
( شو بدي احكي اخوك معه مصاري )
( يعني واحد بشتغل بالسعودية صرله كم سنة اكيد بده يكون محوش ما انتي عارفه ابو زيد خاله الي بصحله يسافر عالسعودية )
( اه واللله معك حق )
( قومي يا هند الله يرضى عليكي اطفيلي هالضو تعبان ومكسر )
( هو انت دايما تعبان فش غير تعبان اطفيلي الضو نفسي مرة تجبلنا معك ايشي نتسلى عليه جبلك شوية بيض حمام ولا قباب غوار انت عارف انا حامل وبيجي عبالي )
( خلص ابشري من بكرة بدي اجبلك الي بدك اياه )
( صحيح سامي اليوم ولاد اختك لعبو بالاتاري واجو ولاد الحارة يلعبو كمان بس عمتي هي الي كانت توخد منهم هسا انا ما تبعتلها كم لمت بس اتوقع بحدود خمسة وسبعين قرش لانه فراس وجهاد ولاد ام ايمن لعبو مرتين )
سامي سامي انا كاينة احكي مع حالي لحقت تغفى
مش لو طفيت الضو من اول بكرامتي احسنلي خليني اقوم انام بكرة بدي اروح عند امي من بكير
تاني يوم صحيت ولبست قبل سامي بدي اروح اقضي النهار مع امي وجاراتها
واول ما وصلني سامي هناك حلفت ام حسين الف يمين غير الفطور يكون عندها
والله بدكو الصراحة ما هي مصرة بعتت ابن ابنها الصغير راح اشترى صحن حمص وفول وفلافل وعملت قلاية بندورة وقلت كبدة ونادت على ام تيسير وام زهير وبس خلصنا اكل خلت سوسن وميرفت هم الي يجلو الجليات وانا قعدت
( اااخ يا يما شو تعبانة ومخنوقة حماتي طالعة نازلة تحكيلي يا ام البنات )
Telegram:@rwayate
( وهي شو عرفها انك رح تجيبي بنت )
( عشان توحمت عحلو )
( الله يكسرها هسا هو صحيح الي بتتوحم عحلو بتجيب بنت بس مش بالضرورة )
( والله يما جلطتني هي وبناتها )
نطت ام حسين ( ولك يا هند معك عشر ليرات )
( شو بدك هسا بالعشر ليرات )
( اذا معك باخدك عند دكتور فاتح جديد باخدك عنده في عنده هيك جهاز متل التلفزيون بقدر يعرف اذا بتجيبي ولد ولا بنت )
( بتحكي جد يا خالتي ام حسين )

( ولك جد ولا مزج هاي بنتها لام حافظ الي ساكنة عند السيل اكيد عرفتوها راحت عنده وحكاالها حامل بلنت بعد ما كانت مفكرة حالها حامل بولد ونافشة ريشها )
( ايوووا بس والله كتير عشر ليرات بس عكلن الاسبوع الجاي بكون مجمعة المبلغ وبروح انا واياكي لعنده )
( ول كم هندعندي انا الي بروح
بعدها راحت ام زهير عملت كاستين شاي عندها بالبيت وجابتهم مع صحن كعك بيانسون
( ما حكتلكم انه سلفي المسافر قرر يرجع وبده عروس بيضا وحلوة )
( ام تيسير: ومحرز سلفك )
( عم بحكيلك متغرب عالسعودية يعني هاد اكيد بكون مروح بالفين تلات )
( ام حسين : طيب دليه عرباب )
( مين رباب )
( ولك بنت اخوها لام طلال الخياطة الي ابوها تزوج على امها )
( ايوا بس هاي هبلة يا خالتي)
Telegram:@rwayate
( لا ولك صارت منيحة بعدين بتكسبي فيها اجر )
والله اقنعتني ام حسين فيها لرباب وبوجهي دغري على حماتي
( يمسيكي يالخير يا عمتي شوفتلك عروس لسلفي يا عمتي بس شو بحكو جارات امي بتجنن )
( ارتاحي انتي ست هند بدناش منك ايشي )
(والله يا عمتي اانها منيحة ومحترمة انتي روحي وشوفي مش خسرانة ايشي )
( طيب رح اروح بس اذا يا هند ما بتطلع حسب طلبي شو رح اعمل فيكي )
( يا عمتي سالم هاد متل اخوي اكيد بدي ادله عبنت بتجنن خليني اقوم احكي مع امي خليها توخدلنا موعد من اهلها اليوم وانتي عمتي خبري حورية ونجاة يجهزو
والله حكيت مع امي واخدنا منها موعد والمسا تجهزنا ورحنا عبيت اهلها لرباب
قعدت معنا عمتها وبلشت تحكي عن بنت اخوها
( هي صحيح بنت اخوي امها تطلقت لانها عفنة ورباب لو احنا ما شدينا عليها كان طلعت لامها بس هسا ست المعدلات )
قربت علي حورية وشوشتني ( الله لا يوفقك جايبيتنا عوحدة امها عفنة )
فاتت العروس لابسة جاكياات اخضر عبنطلون بني عصندل اسود وجرابات بيض هسا انا تناسق الالوان فهمته بس الصندل عجرابات بالصيف لهسا ما فهمتهم
المهم دخلت رباب سلمت علي مرتين وعلى حورية تلت مرات وعلى نجاة مرتين وعلى حماتي خمس مرات
اتاريها رباب عندها حول بعيونها ومو شايفيتنا مزبوط ومن لما طلعنا من بيت رباب وانا اتبهدل
وصلنا عالبيت ولقينا خالتي ام رفعت عالباب
( ام سامي منيح الي لقيتك ام سميح بدها اياني ادلكم عبنتها كوثر هي حكتلي انكم نسب برفع الراس وللامانة انا حبيت احكيلك كوثر حلوة وبعدين معها شامل )
( استني استني يا ام رفعت بس امسح الارض فيها لكنتي ولك ماخدتنا عوحدة حولة )
( ومالها الحولة عمتي كلنا خلقة الله )
Telegram:@rwayate
( روحي خديها لواحد من قرايبك مش لابني الي كل البنات بتمنو ظفره )
( يييييي القرد بعين امه غزال بعدين اه باخدها لحدا بقربلي شو فيها الناس مش بالشوفات المهم اخلاقها روحي خديله بنات ام سميح )
( جكر فيكي يا هند بدي اخطبله اياها بيضة وحلوة ومعها شامل طقي وموتي
طرقت الباب بايدي وظليت طالعة عبيتي خليها تروح توخدله هالكاسرة كوثر بلكي طلعت عينها وعين بناتها

وخلصت هالسهرة وكل واحد فينا راح ينام وهو يحلم يا ترى سالم شو جايبلنا معه هدية
ومن الساعة خمسة الفجر فزينا لبسنا وطلعنا بهالباص
( يما يا سامي اشتريلنا سندويشتين فلافل طلعنا بدون فطور )
( يما اصبرو شوي هسا بالعبدلي في عربيات بيبعو خبز عليه سمسم وزعتر بجنن )
( طيب يما شغللنا اغنية )
وشغل سامي اغنية السود عيونه لمصطفى قمر واحنا نزقف
( بسم الله الرحمن الرحيم )
( خير يابا مالك شو ليش وقف الباص )
( مش عارف ماله بطل يشتغل لازم حدا ينزل يدفشه شوي )
( ومين بده ينزل انت عارف هاد باص بده قوة )
طبعا انا حامل ما بنزل لهيك نزلت عمتي وعمي وحورية ونجاة وبلشو يدفشو
وسامي يدعس بنزين وانا بشجع بسامي ( ايوا يا سامي سوق سوق )
استغليت هالوقت انهم تحت وفتحت شنتة نجاة طولت منها قلم الحمرة شلت عنه الغطاة وفتحته ورجعت سكرت الشنتة
بسرعة قبل ما الباص يمشي وهم يرجعو يركبو
وصلنا عالعبدلي
اول ايشي عملناه اشترينا كعك من العرباية مع شوية زعتر واكلناه كل كعكة طلع حقها قرشين ونص
بدكو الصراحة هالعبدلي بجنن فيه بسطات بتوخد العقل
لفلفنا شوي نشتري وهون صرختلك نجاة صوت
( الله يوخدك يا هند )
Telegram:@rwayate
( خير يا ست نجاة ليش بتدعي علي )
( ولك انتي فش حدا قادرلك شوفو كيف شنتتي متلغمطة بالحمرة انا متأكدة فش حدا بعملها غيرها )
ولاول مرة سامي بتزحزح ( يختي انتو كل ايشي بتحطوه بظهر هند خافو الله )
( عمي:خلص اسكتو نجاة اسكتي بديش اسمع صوتك والشنتة بتنغسل هسا جاي اخوكي بديش انكد عليه
قعدنا عالكراسي نستنى وعمتي وبناتها بطلعو فيي عليم الله لو عمي وسامي مش موجودين لخلعولي شعري
( هي وصل الباص اجا سالم )
وقفنا كلنا نستناه لنزل من الباص هجم على عمي وباس ايده وراسه وراح باس ايد حماتي وحضن خواته بعدين لف وجهه علي وحكالي كيفك يختي
( الحمد لله عسلامتك )
والله سالم حامل ومحمل ما هو مقصر مش مخلي شناتي
حطهم سامي بالباص وركب سالم معنا وظلينا طالعين عالدار
وطول الطريق يحكيلنا سالم قديش اشتاق لامه وابوه وكيف كان عايش وحداني لهيك قرر يرجع يخطب ويتزوج
ولما وصلنا هجمو عليه ولاد خواته وولاد الجيران كلهم بدهم يسلمو
اول ما فتنا سألناه اذا مفطر وحكالنا انه اكل عالطريق وبلش يفتح بهالهدايا
كان جايب لعمتي عباية مقصبة بتجنن والي ولحورية ونجاة شنتات كل وحدة موديل هي شنتتي حلوة بس شنتتة حورية عجبتني اكتر
وجايب لعمي دشداشة وحفاية ولسامي قميصين وحط بايد كل وحدة من خواته عشر ليرات بس عمتي اعطاها عشرين
وقمنا نجهز للغدا وعملناله مقلوبة زهرة وببيتنجان
والمسوية قعدت حماتي تحكيله عن بنتها لام سميح بس هو حكالها اجلي يما هالموضوع كم يوم خاصة انه رمضان عالباب وكنا كلنا فاتحين عالتلفزيون بنستنى نشوف اذا رح يعلنو رمضان تاني يوم
واكدوها انه تاني يوم رمضان قمنا وسلمنا على بعض حتى انا سلمت على نجاة ورحت حكيت تلفون مع امي عيدت عليها
( وصل سلفك اه احكيلي شو جابلك هدية و شو في اخبار وشو جاب لامه هدايا )
( بالهمس يما بعدين بحكيلك كلهم هسا جنبي )
حورية ونجاة روحو عبيوتهم لانه اول يوم رمضان لازم يكونو هناك واحنا تركنا سالم يرتاح شوي ويشبع من امه وابوه واتفقنا انه نلتقي عالسحور
طلعت عالبيت نقعت قمر دين بمي عشان نشربه عالسحور وحطينا راسنا ونمنا لحتى نفيق عالسحور مصحصحين ونجهز لاول يوم رمضان
يتبع الحلقة القادمة......

بين_الطنة_والرنة_ضعت_بين_الحماية_والكنة
بقلم حنين طه
Telegram:@rwayate
الحلقة العاشرة و الحادي عشر و الثاني عشر
العاشرة بعنوان( سلفتي المكيودة )
(ولك اصحي يا هند اصحي مش ظايل الا ساعة لاذان الفجر بدنا نلحق نتسحر )
( صباح الخير عمتي بتعرفي اني مسطلة لساعة حداش لحتى نمت الليلة ما عرفت انام قلقت )
( والله ما حدا حكالك تسهري جيبي قمر الدين الي نقعتيه والحقيني )
صحيت سامي ونزلت وهو لحقني سلم على عمي وعلى اخوه وقعدوه هم بحوش الدار وانا وعمتي فتنا قلينا بيض وعملنا قلاية بندورة وعملنا صحن سلطة مع بصل ونعنع واكيد مع كاسة شاي
خلصنا السحور وبلشنا شرب مي حتى اذن الفجر صلينا ورحنا نامنا ساعتين زمن ما هو النهار طويل وما بنقدر نصحى بكير
المهم صارت الساعة تمنية وصحينا كلنا عمي وسامي وسلفي اتيسرو عشغلهم وانا وعمتي قعدنا نفكر شو نطبخ
( شو رأيك يا عمتي نعمل اليوم مفتول حرام سالم بكون مشتهي هاي الطبخات )
( والله جبتيها يا هند بس هسا متى بدنا نلحق نفتل ونخلص )
( هي انا واياكي وبنادي على ام رفعت تساعدنا هالمرة محترمة وما بتقصر )
( خلص معناتو روحي نادي عليها بتلاقوني محضرة كل شي وبنبلش نفتل )
لبست ورحت ناديت على خالتي ام رفعت حكتلي اسبقيني يا هند عشر دقايق وبلحقك
بلشنا نفتل ونفتل راسي قد ما فتلنا والعصر روح عمي جايبلنا معه قطايف وعصير ليمون وتمر هندي من عند ابو احمد بالزرقا
وعملنا كمان شوربة عدس مع الاكل حتى الواحد يعرف يبلع وحطينا هالاكل بالحوش وهسا باذن وكمان بأذن والله تخيت من كتر الجوع لحتى اذن
Telegram:@rwayate
وبلشنا بهالشوربات وبالعصاير لحتى ما حدا فينا قدر بعد هيك يوكل
جلينا الجليات وبوجهي عبيتي هسا وقت راحتي بدي اتفرج عالتلفزيون اشوف شو منزلين مسلسلات حلوة
لقيتهم جايبين مسلسل ابو الهنا فتحته وقعدت اضحك عليه
ولا بعد شوي جاييني سامي
( هند بدلتي جاهزة)
( ليش لوين بدك تروح )
( امي ماخدة موعد من ام سميح وبدنا نروح نطلبها من عمامها )
( ايوا طيب هسا بجهزلك اياه )
هييييي من الصبح وجهي بوجهها ما حكتلي بدهم يروحو يخطبوها اليوم لكوثر
( مالك قالبة بوزك )
( مش قالبة بوزي بس وقت الطبيخ والنفيخ انزلي يا هند ووقت الروحة والجية ما حدا بسأل فيي )
( كيف انا هسا سألت امي وهي حكتلي انك انتي ما بدك تروحي )
( ييييي والله ما حكتلي معقول انا جاهة يلفي ما اروح عليها )
( معناتو البسي وجهزي حالك وانا نازلة اخبرهم اني رح اخدك معي )
لبست وتجهزت ونزلت عصوت حماتي شكله ما عجبها انه سامي بده يوخدني بس والله طلع زلمة هالسامي واصر اني اروح معه
Telegram:@rwayate
طبعا بيت ابو سميح بعيد خطوتين عنا الباب بالباب يعني دخلنا ولو تشوفو هالام سميح ما اقواها قد ما حكت حكي حلو لسالم خلص بدها تلبسه اياها لكوثر وعمامها يرحبو ويسهلو اكيد حكو لحالهم هاد كان بالخليج واكيد جيبته مليانة
بعد شوي فاتت كوثر لعنا بدكو الصراحة حلوة بتشبه كساندار نفس الطول والبياض بس كساندرا عيونها اوسع شوي
لابسة هالجاكيت الاخضر وهالشالة البنية يا عمي مرتبة مش متل رباب دخلت عاملة قوس قزح
يييييي ما اقواها قاعدة وبتحكي وبتوخد وبتعطي انا وقت جاهتي استحيت اطلع فيه لسامي
( يمسيكي بالخير يا اخوي يا ابو رجب ( هاد بكون عمها لكوثر عنده ولد خلص توجيهي وطلع يدرس بروسيا وصرله عشر سنين ولهسا بعده بدرس )
المهم ما علينا انا بديش انم ولا اجيب سيرة حدا
( احنا طالبين القرب منكم وانت عارف ما بتنطلب الا بنت الاصل شو قلت يا اخوي بعدين احنا جيران فش داعي نسأل عبعض )
(وهي اجتك يا اخوي يا ابو سامي واكيد احنا عشرة عمرة ما بدها الشغلة سؤال
بالنسبة لمهر البنت احنا حابين انها تكون ليرة ذهب )
عاملين حالهم ما بدهم يطلبو وهم بطلبو ليرة ذهب عشان بعد هيك يسطلوه طلبات
اتفقنا انه ينزلو تاني يوم يكتبو الكتاب وبعد رمضان حفلة العرس وما بدهم يعملو خطبة وحلف عليهم عمي يمين انه تاني يوم فطورهم عنا
روحت عالبيت بغلي ول ما لحقتش تصير كنتكم صرتو بدكم تعزموها وتعزمو اهلها وانا قديش الي متزوجة ما حدا فكر يعزم اهلي خلص انا لازم اعمل لحالي قيمة بديش انزل لا اساعدهم بكرة ولا احضر الفطور بقعد ببيتي باكل خبزة وبصلة
بس انا اذا ما عرفت كل شي رح يصير تحت بموت خلص بنزل وبشوف الوضع
نزلت عبيت عمي بعد ما نام سامي قطعت الخط من تحت لاني بدي احكي مع امي بديش اياهم يفتحو خط علي وانا بحكي معها
Telegram:@rwayate
ورن رن على امي ما ردت ما هي امي بتنام قبل سامي
روحت رنيت عخالتي ام حسين
( ها يا هندطمنيني ولك ليكون صاير معك ايشي وما بدك تحكيلي )
( بصراحة اه سلفي خطب اليوم وهاي خطبيته شكلها داهية )
( اوعي يا هند تخليها تكون الكل بالكل ديري بالك انتي مرت الكبير )
( خلص يا خالتي ولا يهمك هاليومين انا بمر عند امي وعشان اروح انا واياكي عند هاد الدكتور الي عنده تلفزيون وبشوف انا حامل بولد ولا ببنت ،،، تصبحي على خير )