طبخ انا و مبسوطة من اخبار الوليد , قلي انو قدر يوصل لعنوان لسوزي بكندا و انو هي قاعدة بمنطقة ما بتبعد كتير عنو و رايح لعندا بكرا , فتت لعند جعفر
جعفر:شو بدو منك؟
سيلينا : وليد انسان رائع و متواضع بالوقت يلي اشتغلت فيه عند اهلو اخدنا وجه على بعض و هلا عم يتصل يطمن علي
جعفر: كل هالمكالمة عم يطمن عليكي بس
سيلينا:و قلي انو تذكرتك كتير بكندا و هيك يعني
جعفر:كذابة شوفي بينك و بينو؟
سيلينا:ما في شي ,مافي ما في
جعفر: بتعرفي لو بكون في و لو شوية صغيرة رح تكوني قضيتي على حالك, ببالك انو ما بقدر اعرف, لك المكالمة كلها بقدر جيبا
سيلينا : ما فهمت وين المشكلة حتى لو في مع انو ما في شي , انا بنت وبحقلي يكون عندي مشاعر اتجاه ...
جعفر:ما بحقلك يكون عندك شي و لا حتى ادنى طموح بانك تطلعي من هون لهيك ما نيالك يكون في ما نيالك
سيلينا:سيد جعفر انا ما عندي بقا لاخسرو غير هالروح اما انت عندك كتير لتخسرو منصبك وشعبيتك و مرتك يلي اذا سمعت بكل شي ما بظن رح يبقى كل شي متل ما هو
جعفر: ببالك ممكن خاف على هيك شي,انا وقت الجد بحرق كل شي و لا انو حدا يتلاعب فيني
سيلينا : طيب ماشي عن اذنك هلا
نزلت انا و عم اتافف من اسلوب جعفر ,مرت القصة اسبوع ما صار أي شي و لا حتى سمعت أي شي عن وليد , لليوم يلي كنت عم ضب تياب مغسولين بالخزانة بغرفة جعفر و جعفر عم يلبس تيابو على المراية و يراقب تحركاتي من المراية, طلعت ورد من الحمام بالبرنس
ورد: جعفر لوين رايح
جعفر: عندي عشا عمل
ورد: بدنا نروح عند اهلي؟
جعفر: شو المناسبة ؟
ورد:بدنا نسلم على وليد
جعفر: وليد ؟وليد هون ؟ ايمت اجا ؟
برم ضهرو و هو عم يطلع على ملامح وجهي و انا ما حاولت اظهر على حالي اني متفاجئة
ورد: اليوم الضهر وصل
جعفر:ليش اجا ؟ما الو شي رايح
ورد:ما بعرف بلكي الله هداه و بدو يخطب و يتزوج
جعفر: ايون , الله يسمعنا الاخبار الطيبة , طيب روحي لحالك انت هلا و انا بس خلص بمر بقعد شوي و باخدك
ورد:طيب
نزلت من الغرفة على المطبخ ,انا و متوترة من رجعة وليد , خفت تكون سوزي حكتلو كل شي,و جاي يفضحو لجعفر و وقتا انا بكون نهيت على حالي , بعد ما نزل جعفر و ورد من الفيلا بنص ساعة , دخلت ميرا على المطبخ
ميرا : اجا اخوا لمدام ورد و هو قاعد برا, قلتلو انو مدام ورد ما هون , قلي بنطرا
سعاد: تعي اعمليلو قهوة سيلينا
سيلينا : يلا
طلعت لعندو سلمت عليه
سيلينا : لحمدلله على سلامتك
وليد : الله يسلمك , انا بعرف انو ورد عنا بالبيت ,انا جاي كرمالك , سوزي حكتلي كل شي و انت لازم تطلعي من هون قبل أي شي تاني
سيلينا : شو حكتلك ؟
وليد: خبرتني انو هي اختو و شو عمل فيكي و فيا
سيلينا : ياللله الله يخليك ما تخبر حدا بيلي عرفتو , الا انا..
وليد: ما رح احكي قبل ما امن طلعتك من هون , سوزي ما بتقدر ترجع على البلد حامل و..
سيلينا : حامل؟
وليد: ايه و بتخاف ترجع على البلد كرمال ما يرجع ياذيا جعفر لهيك انا رح ساعدك
سيلينا : كيف؟
وليد: رح رتبلك امورك لتطلعي من هون و تلحقيا لسوزي
سيلينا: كيف و انا ما معي أي ورقة تثبت هويتي , كلو راح بالزبالة و فوق منا انا محبوسة هون و ممنوع اطلع
وليد: رح طلعك بطرق ملتوية ما تخافي و رح استخدم نفوذ ابي بهالموضوع
سيلينا : يعني اهلك رح يعرفو
وليد: لا ما حدا رح يعرف بشي , جيت لقلك تجهزي حالك بعد بكرا المسا الساعة 11 بالليل رح تكون ورد و جعفر معزومين عنا على العشا , رح تنطرك سيارة برا وهي رح تاخدك
سيلينا:و الحرس ؟ كيف بدي اطلع من هون؟
وليد : هاي اتركيا علي رح اشتري واحد منن و هو بزبطلك طلعتك , بس على الساعة 11 كون جاهزة و اطلعي انطريه برا , هو رح يعرفك و يجي لعندك و يطلعك
سيلينا: خايفة
وليد: ما تخافي , ما تتوتري كل شي رح يكون تمام انا مضطر امشي حتى ما الفت نظر
سيلينا: شكرا كتير خايفة كون عم ورطك معي
وليد: ولايهمك
راح وليد و رجعت على غرفتي انا و مهمومة اكتر من قبل , خفت و تندمت انو سلكت هالطريق , رجعو جعفر و ورد من سهرتن الساعة 1 بالليل , سمعت صوت سيارتن برا , تاني اليوم الصبح و نحن عم نحط فطور على الطاولة
ميرا: ست ورد مبارح اجا اخوكي و نطرك شوي هون بعدين راح
جعفر:وليد؟ورد ليش ما رحتي لتستقبليه ؟
ورد: رحت بس ما شفتو اول الشي
جعفر: كيف بيجي لهون ما بيعرف انك انت يلي رايحة تستقبليه؟
ورد: لا قال كان حاابب يعملي اياها مفاجاة , ما كان بيعرف انو الماما خبرتني بجيتو
جعفر: ميرا اديش قعد هون ؟
ميرا : نص ساعة , لو بعرف انو الست ورد عند اهلا كنت خبرتو
جعفر:ورد , ما دقلك ليعرف محلك
ورد: لا , شبك جعفر , الموضوع ما بدو كل هالتدقيق
جعفر: اممم ماشي
بعدما خلصو فطور , فات جعفر على المطبخ , كنت عم اجلي , تفاجات سعاد بوجودو
جعفر: مين قام بضيافة وليد مبارح ؟
سعاد: سيلينا
بلعت ريقي
...................
#ⴅმძ3Һค