📚قصص||روايات||منوعة📚

وهم الغريب ٢

بالوقت الحالي ..

بفندق الغياث ..
بمكتب غياث ..
رنا : بعرف إنك بتحبني ، و بتحبني كتير ، من وقت ما ساعدتني لهلأ و عيونك عم تحكي ، أنا فهمانة عليك ، بس كلو من خطيبتك !
غياث بغضب : لك شو هالتخبيص هاد شو عم يصير معك أنتي ! ما قلتلك ما بقا بدي شوف وجهك ، لك حلي عني بقا لا تجبريني أعمل شي مو منيح بحقي و بحقك !
رنا : لا تعيط عليي هيك ، أنا بعرف إنك عم تحكي هيك لأنك خايف عمشاعر خطيبتك ..
غياث سحب رنا بغضب و اتوجه لباب المكتب : لك افهمي يا مخلوقة ، افهمي بقا ، أنا بحب خطيبتي و عرسي بعد شهر ، اطلعي من راسي ، أنا ما بحبك و ما بدياكي و ما بدي شوفك ..
رنا : بس أنا ..
قاطعها غياث و زتها برا المكتب : اطلعي من الفندق أحسن ما خلي الأمن يزتك برا ، لساتني هم حاول احترم إنك أنثى !
سكر الباب بغضب ، و سحب ربطة العنق و زتها عالمكتب ..
غياث : العمى شو هاللزقة هي !
قعد عمكتبو و كالعادة ، شاف وردة و معها كرت مكتوب عليه صباح الخير حبيبي ، و المرسل رنا ..
شالها بعصبية و رماها بسلة الزبالة ..
رن تلفونو ، مكالمة من بلقيس ..
بلقيس : صبااح الخير يا روحي
غياث : يا صباح الفل ، اي هه ، هلأ بلش صباحي أنا ، كيفك حبيبتي ؟
بلقيس : مشتاقتلك كتيير ، حبيت صبح عليك قبل ما فوت عالمختبر ..
غياث : اي و هاد أحلى صباح !
بلقيس : و كمان بدي زكرك ، بس تخلص شغل مر عليي ، مشان نطلع نشتري كم غرض لسا للبيت ، التوتر عندي صار مليون ، بخاف ما نلحق نجهز البيت قبل العرس !
غياث : له له ، غياث معك و ما تلحقي ، اليوم و بمشوار واحد بيخلص كلشي ..
بسكر مكالتمو مع بلقيس ، و بيتصل بعامر ..
غياث : كيفك دكتور ؟
عامر : شبو صوتك ؟
غياث : أنت ضل عم تمارس صلاحياتك كدكتور نفسي عليي !!
عامر : رنا ما هيك ؟
غياث : رنا ، ما صار معك شي بعلاجها ؟
عامر : لسا ، هالنوع من الأمراض النفسية علاجو صعب ، لأن المريض بكون مقتنع إنو طبيعي و ما فيه شي ، و إنو نحنا عم ندّعي مرضو ، بكل حال موعدها عندي بعد ساعة ..
غياث : لا حول ولا قوة إلا بالله ، لك مقتنعة كامل الاقتناع إني بحبها !
عامر : هي مشكلة هالمرض ، بكون المصاب مقتنع إنو الطرف التاني بحبو رغم إنو كلشي بيثبت العكس ..
غياث : عامر ، ما بدي وصيك ..
عامر : ولا يهمك ، مهتم بحالتها عن دون كل الحالات ..
سكر عامر التلفون ، و فتح ملف رنا ..
عامر : هوس العشق ، أو الهوس الشبقي ،
الله يكون بعونك يا غياث ، و الله يكون بعون رنا ..
قطعت سلسلة أفكارو الممرضة وقت فاتت لعندو ..
الممرضة : دكتور ، رنا جاية قبل موعدها و حابة تشوفك ..
عامر : دخليها بسرعة ..
فاتت و هي عم تبكي ..
و بلشت تشرح لعامر كيف إنو الدنيا كلها متآمرة عليها و عم تبعدها عن حب حياتها ، غياث !!
ضلت تحكي لعامر ، كيف و قديش بتحبو ، و كيف هو بحبها ، و عم يخبي و ينكر مشان خطيبتو و مشاعر خطيبتو ، حكتلو عن ال ١٨ هدية الي بعتتلو إياهن خلال شهر ، و عن ال ٢٠ ل ٢٥ اتصال الي بتتصلهن عليه باليوم ، و عن مئات الرسائل النصية و الواتس و الماسنجر الي بتبعتلو إياهن خلال ٣ أيام ، شرحتلو كيف غياث برد عليها بصورة شخصية عن الحب ، أو بحالة ماسنجر أو منشور بيحكي عن حبو إلها و إنو ما رح يتركها ..
عامر ضل ساكت و عم يستناها تخلص ، و هو فهمان إنها عم تفسر حب غياث لخطيبتو ، على إنو رسائل سرية موجهة إلها !
رنا : بعد كل هاد بتقدر تنكر إنو بحبني ؟ أنا ماني مريضة ، أنا عم بحكيلك وجعي لأني حابة أحكيلك ، عامر ساعدني !

بمكان مقطوع و بعيد كتير عن المدينة مقر
العصابة ..
عصابة مكونة من ١٥ شخص ..
متخصصين بعمليات الخطف و التهريب و التخريب و القتل !..
و قائد هالعصابة علاء ..
أخو الدكتور النفسي عامر ..
بيشتغل بمول من أكبر مولات البلد ، مستلم قسم الألبسة ، و الكل بيعرف إنو بيشتغل بالتجارة و بيشهد بأخلاقو ..
بس للأسف ، ما خفي أعظم ..
بالمقر ..
علاء و أيمن و سفيان قاعدين عم يخططو للعملية الجديدة ..
علاء : ابن قائد اللواء المتقاعد جعفر ..
سفيان : ابن اللواء جعفر ؟؟
أيمن : ليش مستغرب ، ما حلك تتعود لك سفيان ؟
سفيان : لك اي بس هالمرة غير كل مرة !
علاء : اي حاجتك بقا ، كلها عملية خطف صغيرة ، يدفع الفدية و ياخد ابنو ..
سفيان : لازم نكون حذرين جداً ، و نختار الأماكن الصح لهالعملية ..
بيقطع حديثهن صوت صراخ بنت جاي من قدام باب المقر ..
علاء بأشر لسفيان مشان يطلع يشوف شو القصة ، و قبل ما يمشي سفيان ، بفوتو شبين ملتمين حاملين بنت فاقدة لوعيها ..
بيوقفو علاء و أيمن من الصدمة ..
علاء : شو هاد منك إلو ؟
سيف : معلم صارلنا خمس ساعات ناطرينو يطلع من البيت ، اي ما كان يطلع ، و لما طلعت إختو ، جبناها و إجينا ..

وهم الغريب ٣

رجع أيمن لعند سفيان ..
سفيان : شو صار معك ؟
أيمن : حكيتو ، لشوف شو رح يقرر ، بتعرف ، أنا طالع وراه عالبيت ، أنت طالع سيف و مصطفى و خبرهن ما يعملو شي مشان علاء ما يصفيهن عنجد ، رتب أمور الشباب و الحقني ..
سفيان : ماشي ..

بمكان تاني ، و تحديداً بالسوق ..
غياث سايق سيارتو و خطيبتو معو ..
بلقيس : ليك خلص نزلني عند هالمحل ..
غياث طفى السيارة و عم يفك حزام الأمان : عراسي ..
بلقيس وجهها قلب أحمر : وين ؟ لا لا تنزل ، بدي انزل لحالي اشتري كم شغلة !
التفت غياث عالمحل و فهم ليش بلقيس استحت و ما بدياه ينزل ..
غياث ابتسم : حاضر ، لا تطولي ، بدنا نلحق نتغدا سوا مشان أرجع عالفندق ..
نزلت بلقيس ، و ما مر عشر دقايق إلا و انفتح باب السيارة ، سكر غياث تلفونو و التفت ..
غياث : أهلين حبيبتي شو خل....... هاد أنتي !
رنا قعدت و سكرت الباب : أي أنا ، شفتك قاعد لحالك ، ما إجا من قلبي اتركك ..
غياث : بس أنا مو لحالي ، ناطر بلقيس ..
رنا : الله يوفقك ، اتركها ، بوعدك انطرك ، بعرف إنك بتحبني ، بس عم تكابر !
غياث عم يتمالك أعصابو بالغصب : لك افهمي ، أنا بحب بلقيس ، رنا بقتلك إن ما نزلتي !
رنا : مستعد تقتلني ، المهم ما تحكي الي بقلبك !
غياث فتح باب السيارة الي من ناحها بسرعة و دفشها : انزلي أحسن ما ارتكب جريمة ..
نزلت و هي عم تبكي ..
غياث مرر إيدو بشعرو و بالتانية ضغط عالمقود بغضب ..
انحنى و حط راسو عالمقود و عم يفكر ..
وصلت برنا لإنها تراقبو ، و هي مو أول مرة ..
ياما طالعة بوجهو ، و هو لحالو ، و هو مع بلقيس ، و هو بالفندق ، و هو مع رفقاتو ..
بطل يطلع مع حدا بسببها !
قطع تفكيرو فتحة الباب مرة تانية ..
غياث : و بعدين معك ! لك ما رح تفه..... بلقيس !
بلقيس : غياث ، شبك !
غياث : مافي شي حبيبتي ، إجت شحادة و دبقتني ..
بلقيس : اي ليش ما ساعدتها !
غياث مارد ، شغل سيارتو و اتحرك فيها ..

ببيت علاء ..
جهز حالو ليطلع ، و الشباب عندو ..
علاء :أيمن ، اطلع لعند الشباب ، سفيان ، أنت رح تاخد معك ٣ شباب و تطلع تسلم وسام و تاخد المصاري ، دير بالك هي أول مرة رح تكون لحالك ..
سفيان : حاضر ..
علاء : سفيان انتبه ، و خود هي تلفون البنت مشان تتواصل مع أديب ..

بعد ما خلص أيمن شغلو ، طلع مع سفيان و وسام و شبين بشاحنة صغيرة ، ليسلمو وسام لأبوها و يجيبو المصاري ..
بقي علاء و باقي الشباب بالمقر ..
بعد ساعة برن تلفونو ، مكالمة من خلدون ..
علاء بينو و بين حالو : هلا والله ، صار وقت الشغل المزبوط ..
برد ..
علاء : أهلاً أهلاً ..
خلدون : كيفك ؟
علاء : الحمدلله ، اتفضل سيد خلدون ؟
خلدون : بعد ٣ ساعات ، عندي تهريب سيارة من عالحدود ، بدياك تأمنلي الطريق من الحدود لعندي ..
علاء : ايوا ، اي بتؤمر ، بس شو مشان إنو سيارة وحدة ؟
خلدون : اي سيارة وحدة ..
علاء : سيد خلدون ، هالحركات مو عليي ، شوفيها السيارة ؟
خلدون : طمن بالك ، فاضية ما فيها غير السايق ، قديش بتكلفني هالشغلة ؟
علاء : ١٥٠ ألف ..
خلدون : نعم ؟ مو كتير ؟
علاء : رح يستنفرو رجالي كلهن مشان سيارة وحدة ، عدا إنو رح ادفع نص هالمبلغ عالحدود مشان سهللك أمور السيارة ، ما بدك هالمبلغ بلا الشغل كلو ..
كان رح يسكر الخط ، بس سمع صوت خلدون عم يناديه و يقلو موافق ..
ابتسم بمكر و كمل حكيو : ابعتلي باقي التفاصيل .
خلدون : هلأ بيوصلك كلشي ..
بفوتو سفيان و أيمن ..
أيمن : شو معلم ؟ شكلك مبسوط ، عنا شغل ؟
علاء : و شغل محرز كمان ..
اتجهزو الشباب ، و انطلقو عالحدود بين سوريا و لبنان ، علاء اتفق مع الأمن الحدودي ..
و بلشو يراقبو الطريق من بعيد ..
بلش التوتر يزيد بين الشباب و الأمن الي ساعدهن ، لأن رجال الأمن كترو فجأة بالمنطقة ..
و لو حدا من الشباب فكر يفتح تمو بكلمة ، كل الموجودين بينسحبو عبيت خالتهن !!
سفيان : معلم ، الوضع صار بخوف ، لازم ننسحب !
علاء : اي لا تشيل هم ، ضل ربع ساعة ، هلأ بتوصل السيارة ..
و مرت الربع ساعة ، و بعدها نص ساعة ، و ما كانت السيارة تيجي ، و لسا أعداد رجال الأمن عم تزيد ..
علاء : اطلعو كلكن عالمقر ، طالع جيب المصاري من خلدون و راجع ..
أيمن : و إزا مارضي يعطيك بحجة إنو السيارة ما مرقت ؟
علاء : ما بيعملها ..

بڤيلا خلدون ..
نزل علاء بثقة من السيارة ، سيجارتو بإيدو و عيونو عم تقدح شرر ..
فات عالڤيلا و سلم عخلدون ..
خلدون : اتفضل علاء ، هي حقك كامل ، ١٥٠ ألف ، بالرغم من إنو السيارة ما وصلت ، بس الشغل شغل ..
علاء ضحك بصوت عالي و قعد و حط رجل عرجل : بدي ٣٠٠ ألف ..
خلدون بصدمة : شو ؟
علاء اختفت ضحكتو و اتطلع بغضب على خلدون : أنا ماني غبي ، و ما بخلي رجالي قبال رجال الأمن الي اشتريناهن !

وزعتهن عطول المنطقة ، و لما اتجمعو الأمن بمكان واحد ، وصلني إنو حضرتك اتعاملت مع الأمن الموجودين عالجهة التانية من المنطقة و قردفتهن كلهن لعندي لأنك ضمنان إنو وجودي رح يهدي كل شي ، و رح لم القصة لو صار شي و انكشفنا ..
خلدون قعد و طلب قهوة ..
علاء كمل : و بعد هيك ، مررت ٤ سيارات من الجهة التانية ..
و السيارات ملانة بضاعة ، و بين أجزاء السيارة حاطط أكياس فيها مخدرات ..
حرك علاء إيدو و طالع من جيبة الجاكيت الداخلية كيس شفاف فيه بودرة بيضا ، و رماه قدام خلدون عالطاولة ..
علاء : هيك شي مثلاً .
خلدون انصدم بالشي الي شافو ..
خلدون : بحب زكاءك بالشغل كتير ، بصراحة اتوقعت إنك تكشف القصة ، بس ما اتوقعت تكون وصلت لكل هالتفاصيل ..
بهنيك ، و بشرفني ضل عم اشتغل معك ، و هي ٥٠٠ ألف بدل ال ٣٠٠ ..
علاء : بدي ٣٠٠ بس ، ما بدي حس حالي بلحظة مدين لحضرتك ..
أخد علاء المصاري و طلع فيهن ..
خلدون ضل عم يراقبو لاختفى عن أنظارو ..
خلدون : يا ريتك ابني ، يا ريت عندي ابن بزكاءك !

بالمختبر ..
بلقيس خلصت شغلها ، و سجلت كل بيانات العينات الي عملتلها تحاليل ، فلو كل العاملين بالمختبر و ضلت هي قاعدة و شاردة بالفراغ ..
عم تفكر بغياث ، و برنا !
عم تتزكر أول مرة شافت رنا مع غياث ، كيف وقتها ما شالت القصة من أرضها ..
كيف اتكررت هالشوفة ، مرة و تنتين و تلاتة ، لحد ما غياث حكالها كل شي بخصوص رنا مشان يطمن بالها ..
و خبرها إنها مريضة و عم تتعالج عند عامر ، و عامر أكدلها إنو رنا مريضة ، بس ما حكا شي أكتر من هيك لأنو هي أسرار مرضاه ..
و لما عامر شخص حالة رنا بمرض ( هَوس العِشق )، راحت رنا بنفسها و حكت لغياث إنو عامر بيحكي حكي مو صحيح ، و تشخيصو كلو غلط بغلط ، و غياث خبّر بلقيس بكل شي من وقتها ..
بلقيس بينها و بين حالها : لازم اتصل احكي معو ، مزاجو و بعرفو ، هلأ بكون لساه معصب من لما رجعنا من السوق ..
رنت عليه ..
بلقيس : كيفو حبيبي أبو مزاج خرنفشائي ؟
غياث : الحمدلله حبيبتي ، هلأ هيك طلع معك !
بلقيس : يي يقبرني هالمزاج ، عازمتك عبوظة ، جهز حالك ، طالعين بسيارتي و أنا رح سوق !
غياث ضحك : تسوقي فيني ؟ يا حبيبي ! و تشوفي شي بنت عم تتطلع فيني و تعملي فينا حادث و نتسهل !
بلقيس : هلأ هيك ! أنا بفرجيك ، والله لاشتري كل أنواع البوظة و خليك تحاسب أنت و هه يلا !
غياث : ههههه لك تكرمي ، كم بلقيس عندي أنا ، بعدين ولي سُكَّرة ، مو ملاحظة أنو هالشهر بطل يخلص !
بلقيس : عأساس نحنا مفارقين بعض !
غياث : اي شي عن شي بيفرق ، يلا بخلص شغلي و بجيكي ، أصلاً اشتقتلك من الصبح لهلأ ..
بلقيس : مو قلتلك أنا رح آخدك و أنا رح سوق !
غياث : ماشي تكرمي يا قلبي ، يلا ناطرك ..
بلقيس بمكر : بدك شي و أنا جاية ؟
غياث : ههههههه لااا هي جملتي بقا ، أنا الي بقولها ، و بس أنا الي بجيب ، لك يلا اتأخرتي ، سكري المختبر و تعي ..
بلقيس : 😂يلا دقايق ..

بمقر العصابة ..
أيمن : شو صار معك ؟
علاء : جبت ٣٠٠
سفيان : ٣٠٠ ؟ مو عأساس ١٥٠ ؟
علاء : هيك الشغل بقا ..
حكا لرجالو كل شي صار ، مو من عادتو يخبي عنهن شي ، و بلشو يخططو سوا للخطوة التانية ! و الي هي خطف ابن اللواء المتقاعد جعفر ..
علاء : اي سفيان ؟ كيف الشغل بالبنك ؟ عطاك المدير أذن للطلعة بكير بكرا ؟
سفيان : منيح ، لا والله يا معلم ما قبل ، قلي اتأخر الصبح و عوض المسا ، بس لا تطلع بكير ..
علاء : ما استفدنا شي ..
سفيان : شو بدي أعمل ، بحاول معو مرة تانية بكرا ..

بفندق الغياث ..
ضل قاعد بمكتبو عم يستنى خطيبتو ، بس اتأخرت كتير ..
اتصل فيها ما كانت ترد ..
فقرر يروح لعندها ..

بالمختبر ..
وصل و ريتو ما وصل ، ريتو ما شاف هاليوم !

بعيادة عامر ..
برن تلفونو ، مكالمة من غياث ..
رد ..
عامر : بعد زمان عن هالصوت ، صرلك يوم و نص ما سمعتني صوتك شريك ، بلقيس مشتغلة شغلها منيح !
غياث بصوت يا دوب طالع : عامر !
بيوقف عامر : شبك غياث ؟ شو صاير معك ؟ وينك أنت ؟
غياث بلش يبكي و في صوت ناس حواليه : أنا بالمختبر ، الحقني !
لغى كل المواعيد ، و طلع بسرعة من العيادة و اتوجه للمختبر ..
وصل ، كان في عجقة ناس ، و سيارة إسعاف و سيارتين شرطة !
دخل بعد ما شرح للشرطة المحاوطين المكان إنو بيقرب لغياث ، و وقفتو صدمتو عند باب المختبر ، لا قدران يفوت ، ولا قدران يطلع !
بلقيس بحضن غياث و دمها معبي الأرض ، الدكاترة عم يحاولو يسحبوها منو و هو مو راضي يتركها ..
دموعو عم تنزل بغزارة ، انتبه إنو عامر حط إيدو عكتفو ..
عامر : غياث ، حرام الي عم تعملو بحالك !
غياث عم يبكي : عامر .. بترجاك .. بدي موت و الحقها .. أو عالأقل .. بدي أفقد وعيي بس .. ما بدي ضل عايش هاللحظات بكل مشاعري .. بترجاك !

ليث انتبه إنو عامر شرد ..
ليث : دكتور لو سمحت ، عنا شغل ، يا ريت تحكي الي عندك ..
بلش عامر يتأرجح بين قَسمو كطبيب ، و قلبو المحروق عحالة رفيقو ، لو حكى للمحقق بشو بفكر ، كان خلصت القصة و تم القبض عرنا ..
عامر غمض عيونو و أخد نفس : بعتزر حضرة المحقق ، هي أسرار مرضى و ما فيني إطلعك عليها ..
ليث : بس هاي الي ماتت خطيبة رفيق عمرك ..
عامر : و هاد الشي الي عم تطلبو بيتنافى مع أخلاقي كدكتور و مع القسم الي أقسمتو لما استلمت الشهادة !! بعتزر كتير ..
ليث ابتسم ، كان فخور إنو في هيك ناس بالبلد ، و بنفس الوقت كان معصب ، لأن عامر قطعو بنص الطريق !
ليث وقف و مد إيدو لعامر: للأسف مافيني أجبرك تحكي ، شكراً إلك ، و بعتزر عطلتك عن شغلك ..
عامر حط إيدو بإيد ليث و اكتفى بهز راسو ..
ليث شد عإيد عامر : ابقى سلملي على علاء ، و قلو ماني ناسيه ..
عامر : إن شا الله ، بس حضرتك من وين بتعرف علاء ؟
ليث بمكر : فيك تقول إننا أصدقاء ، بس صداقتنا غريبة شوي ..
عامر باستغراب : وصل ..

بڤيلا خلدون ..
قاعد و قاعد علاء قبالو ..
خلدون : بدي اتواصل مع الشبح .
علاء : بطل يشتغل .
خلدون : قلو بعطيه من النص مليون للمليون ، المهم بدي اتواصل معو ، الموضوع خطير جداً ..
علاء : بخبرو يحكي معك ، بس ما بوعدك يحكي ، ليش شو القصة ؟
خلدون : بدي صفي واحد ، ماسك عليي كزا شغلة و عم يبتَزّني فيهن ، صار يشكل عليي خطر ، و فوق هيك لمحلي إنو بدو يخطب بنتي ، و إزا ما خلصت منو ، رح اضطر وافق عليه ..
علاء ابتسم : والله شكلو ماسك شغلات خطيرة ...
وقف خلدون و مشى ناح حيط كلو قزاز بطل عالحديقة الخارجية للبيت ..
خلدون : مشان هيك بدفع مليون ، المهم اتخلص منو ..
علاء وقف : من هون للمسا ، يا بتصل فيك أنا و بخبرك إنو رفض ، يا بيتصل فيك الشبح بزاتو و بيطلب منك التفاصيل ..
خلدون : يا ريت تحاول تقنعو ، و بعد هيك إزا بدو يترك الشغل ، يترك ..
بلش علاء يفكر ، كيف ممكن يقنع الشبح يرجع لشغلو ..
الشبح ، قناص محترف ، و قاتل مأجور مجهول الهوية بيشتغل مع علاء ، علاء الوسيط بينو و بين أي حدا عبالو يتخلص من شخص مدايقو ، بغض النظر عن هالحدا أو عن السبب ..
بيقبض مبالغ عالية جداً بس تتم مهتمو ، و علاء بياخد نسبة من هالمبلغ عكل جريمة بتصير ..

المسا بالقهوة ..
عامر قدر يسحب غياث و يطالعو ليغير جو و جمع الشلة كلها لتساهم بهالشي ..
شلة مكونة من ٤ شباب ..
افترقو بعد تخرجهن ، كانو بنفس الجامعة بس كل واحد بكلية ..
ضلو مع بعض متل الإخوات ، و هلأ صار وقت يسندو بعض ..
ياسين : شو غياث ؟ وين صرت ؟ صرلنا زمان ما سمعنا صوتك يا زلمة ..
غياث : اي ليكني معك ..
ياسين : امبلا نعم ، شو رايك فارس ؟
فارس : وين غياث ماني شايفو ؟
غياث : دمك تقيل لدرجة رح تحفر مكان قعدتك !
عامر : يلا شباب ، شربونا شاي بهيل ..
فارس : من أيمتى بتشرب شاي ؟ أنت اختصاصك قهوة ، الشاي من اختصاص غياث ..
ياسين : على شو عم تتناقشو ؟ أنا أصلاً ما بحب الشاي ..
غياث ابتسم ووجه حكيو لياسين : هو طلبو مشاني ، و أنت مو مهم تشرب ..
ياسين : والله لأشرب كاسك ، و مارح خليك تشمو !
و بس وصل الشاي ، ياسين نفذ يمينو ، و شرب كاستين شاي و هن بيغلو غلي و قام يركض بالقهوة لأنو احترق تمو !
فارس يركض وراه : لك بتستاهل يا أبو مخ مطفي !
عامر واقف و مصدوم ، هو صح قلهن جنو شوي مشان غياث يتفاعل معهن ، بس ما قصد هالنوع من الجنان !
الشباب الي بالقهوة كلهن مصدومين ، و في كم واحد مخهن مطفي متل ياسين ، شربو قهوتهن و شايهن دفعة وحدة و قامو يركضو وراه !
و أخيراً ، غياث ضحك !
وقفو ياسين و فارس ، و انتبهو لغياث كيف فارط ضحك ، ابتسمو برضا و شبكو إيديهن ببعض و بلشو يدبكو ، و شوي ، قامو باقي الشباب القاعدين و صار طابور الدبكة عطول القهوة !
عامر شحط غياث و مسكو عالأول !
و حششو بعد شربهن للشاي ..
و بعد ساعة و نص ، شي مرمي عالأرض ، شي مرمي عالكراسي
الشباب هلكو قد ما ضحكو و دبكو و رقصو سوا ، و تمت المهمة بنجاح ، غياث غير جو و انبسط و ضحك و حكا لأول مرة بعد موت بلقيس ..

بڤيلا خلدون ..
صوت رنة تلفونو نقزتو ..
مكالمة من رقم خاص ..
خلدون : الو ؟
الشبح : طلبت تحكي معي ؟
خلدون : الشبح ؟؟
الشبح : مين بدك تقتل ، و شو التفاصيل ؟
خلدون : أصيل الأحمد ، نائب مدير شركة الشرق ، كان مريض عندي بالمستشفى ، و ما بعرف كيف وصل لملفات منسية ، و صار يشكل خطر كبير عليي و عالمستشفى ..
الشبح باستهزاء : مدير مستشفى ، و مو عرفان تخبي فضايحك ؟
خلدون وقف بغضب : اعرف حالك مع مين عم تحكي ، و لا تتدخل بشي ما بخصك ..
الشبح : هه ، اي اقعد ، لا تنفعل كتير ..

وهم الغريب ٥

علاء طلع عبيتو ، أو هيك فكرو أهلو ..

بالمقر ..
علاء حكا لأيمن و سفيان عن ليث ..
أيمن : العمى إزا هالحكي صحيح !
سفيان : مين ليث ؟
علاء : محقق داهية ، دابقنا من سنة و نص ، عشوي كان كشفنا ، فجأة التهى عننا ، و هلأ شكلو فضيلنا ..
سفيان : كل هالقد ؟ طيب بنصفيه !
أيمن : محدا بيعرف شكلو ، حاولنا كتير ، ما قدرنا نوصل لحدا بيعرف شكلو أو معو صورو ..
سفيان : طيب بنجيب رسام محترف و بنخليه يرسمو عوصف عامر ..
علاء : كلو إلا عامر ، ما بدياه يشك بشي ، أخي و بعرفو ، بيستخدم دراستو بكل نواحي الحياة ..
سفيان : شو هالليث هاد ..
علاء : ما قلتلك داهية ..
سفيان : خير ، يلا معلم اتأخر الوقت ، أنا طالع عالبيت ..
علاء : بالسلامة ، لا تتأخر بكرا ، بداية عملية خطف ابن اللواء رح تبدا من عندك ..
سفيان : حاضر معلم ..
بعد ما راح سفيان ..
أيمن قاعد و مو عاجبو الوضع ..
علاء : شبك ولا ؟
أيمن : شبني ؟ مو ملاحظ إنك مأمن لسفيان زيادة عن اللزوم ؟
علاء : مو ملاحظ إنك مزودها زيادة عن اللزوم ؟ ما كزب بولا شي ، و من وقت ما اشتغل لهلأ يعني من ٤ شهور و أنت مراقبو و مراقب تلفونو و اتصالاتو ، شو الي صايرلك هلأ ؟
أيمن : طققتني لما قلتلي وقف عن مراقبتو ، خليني مراقبو كمان كم شهر !
علاء : يا الله منك و من تفكيرك ، الشب زكي كتير ، و عم يفيدنا ، و بيعرف إنو رقبتو بإيدنا ، يعني ما بخوف ..
أيمن بغضب : قايم أعمل شاي ..
علاء و هو عم يشعل السيجارة : قهوة ..
أيمن من بعيد : حاضر !
و لما رجع أيمن ، انصدم لما شاف علاء مدخن ١٠ سيجارات بهالعشر دقايق الي غابها ..
أيمن : شو هاد ؟ ليش كل هالقد ؟
علاء : ....
أيمن : عم أحكي معك !
علاء : شو ؟
أيمن : شو ؟ لك شبك أنت ؟ شو عم يصير معك ! ليش مدخن كل هاد !
علاء : هاد الي زاعجك ؟ و هه هي طفيتها ..
أيمن : والله ما بعرف كيف اتعامل معك ..

ببيت غياث ..
متسطح بتختو ، عم يتفرج على صورو هو و خطيبتو ، و مع كل صورة ، تمر ببالو زكرى توجع قلبو ..
هي مشكلة الزكريات الحلوة ، هي حلوة بوقتها ، و مؤلمة كتير بأوقات تانية ..
مسح دموعو لما سمع رنة تلفونو ..
مكالمة من عامر ..
غياث : الوقت اتأخر و هاد بفيق مع الجاج ، شو مصحيه لهلأ ..
رد ..
غياث : اي عامر ؟
عامر : كيفك شريك ؟ كيف صرت ؟
غياث : الحمدلله أحسن ..
عامر : شبو صوتك؟
غياث : عامر ، قلتلك ما بحب تمارس صلاحياتك كطبيب عليي ..
عامر : لك يا أجدب ، أنا عم مارس صلاحياتي كصديق ، ما قلتلي ، شو عم تعمل ؟
غياث : ولا شي .
عامر : بكرا طالع أنا و إياك عالمسبح
غياث : هه ، مو عأساس بتقرف تروح عهيك أماكن !
عامر : بس أنت بتحب تروح عهيك أماكن ..
غياث : ما بحب تشفق عليي هيك ..
عامر : شفقة ؟ هههههههه لك يا أبو مخ مصدي ، أنا بدي اتسلى معك ، ما عندي مواعيد لمرضى بكرا ..
غياث : إن شا الله ، اتصل فيني بس تطلع من العيادة ..
عامر : إن شا الله ..
خلصت المكالمة ، عامر لسا عم يفكر بحالة رفيقو ، خايف عليه ينجر لموجة اكتئاب حادة ، هو أكتر حدا بيفهم عليه ، صح اليوم ضحك و دبك و رقص و حكا ، بس ما كان حاسس لا بنشاط ولا بفرح ولا برغبة بالحكي ، فعلياً ما كان حاس بشي ..

تاني يوم ..
الساعة ٩ الصبح ..
بيوصل خبر لخلدون ، أصيل مات !!
و سبب الوفاة ، رصاصة قناصة دراغونوف ، مستقرة بالراس من الجهة اليُسرى ..
شكلو الشبح سريع بتنفيذ مهامو !!
من ناحية تانية ..
المحقق ليث اتواصل مع الطبيب الشرعي و شرحلو حالة رنا بعد تحقيقاتو ، و الدكتور رجح عدة أمراض ، من ضمنها مرض رنا الحقيقي !
اتحرك ليث عبيت رنا ..
صار وقت الجد ، و بعد التحقيق الجدي معها ، ببين كلشي !
خاصة إنو قدر يجيب تسجيلات كاميرات الدكان القريب من المختبر ، بعدما انتبه إنو رنا ، راحت للمختبر بلبس ، و رجعت من المختبر بلبس تاني ( جاكيت طويل ) !
و هالشي أكد شكوكو ، و افترض إنها لبست الجاكيت الطويل مشان تخبي آثار الدم ..
وصل لبيتها ، و حكتلو إمها إنها من مبارح المسا قافلة عحالها الباب ، و ما عم تقبل تحكي مع حدا ..
حاول ليث يفتح الباب بنفسو و ما لقى استجابة ..
ليث : بعتزر ، لازم نخلع الباب ، الوضع مو طبيعي ..
بفوتتة أبو رنا من الباب : خير يا حضرة المحقق ، مارح نخلص من هالقصة بقا ..
و بسرعة ، اتحرك ليث و خلع باب غرفة رنا ، و هون كانت الصدمة الكبرى !!
رنا ميتة بغرفتها !!
أم رنا : ولي على آمتي ، بنتي !!
وقف ليث عند الباب و منع أي حدا يفوت عالغرفة ..
ليث صرخ بالعناصر الي معو : أمنو مسرح الجريمة بسرعة ..
و فات ليفحصها ..
البنت عنجد ميتة !
ليث صرخ : سرااااج ، اتصل بالطبيب الشرعي و باقي الرجال !!

بالفرع ..
سراج جاب ثائر و احتجزو ..
بس مو عرفان كيف يوصل للمحقق ليث ، لأن ليث و للأسف ناسي تلفونو بالمكتب !!

بالمقهى ..
فات و اختار طاولة بعيدة عن باقي الطاولات ، و عم يتصل بخلدون لأنو اتأخر ، بس خلدون تلفونو مغلق ..
دقايق و بتقرب منو بنت ..
البنت : علاء ؟؟
بيلتفت عليها ، و بيرجع بيلتفت حواليه ..
بتقرب و بتقعد عالطاولة قبالو ..
بنت لابسة طاقية ، و نظارة و رافعة قبة القميص لتخبي أكبر مساحة من وجهها ..
البنت : أنا إجيت بدل خلدون ..
علاء عم يشعل سيجارتو : و من إيمتى بخلي بنات تديرلو شغلو ؟
البنت : أنا بنتو ..
التفت علاء عليها ، كتير ناعمة البنت و ما بتشبه خلدون ..
علاء باستغراب : ممم ، و شو المطلوب هلأ ..
البنت : بابا ما رح يجي ، و ما بيعرف إنو أنت هون ، أنا بعتلك تسجيل صوت لقيتو بوحدة من محادثات الواتس الآب بتلفونو ، و مسحت الرسائل و وقفت الواتس آب و قفلت التلفون بعدها ..
علاء زت السيجارة بصحن قبالو : عم تتسلي فيني يا بنت ؟
البنت بغضب : اسمي أثير ، بعدين لا تحكي معي بهالطريقة المستفزة و كأنك عم تخوفني ، أنا بعرف عنك كل شي ، و كنت راقبك وقت تيجي لعند بابا و اسمع حكيك وقت تتصل فيه !
علاء بهدوء : إزا حضرتك ما اتمالكتي أعصابك رح ننفضح !
أثير : بدياك بشغل ، و أتعابك رح توصلك كاملة ..
علاء : اتفضلي ؟
أثير : بعطيك ٢٠٠ ألف ، مقابل عملية خطف مزيفة !
علاء اتكتف : مزيفة ؟ كيف يعني ؟
أثير : بتخطفني أنا و أخي الصغير من قدام الجامعة ، و بتحكي مع أبي على أساس إنك عضو بعصابة مجهولة ، خطفتنا مشان المصاري ، و بتخلينا عندك فترة ، و بهالأثناء أنا بكون قاعدة بفندق ، شغلة كم يوم ، و بس نخلص كل شي بعطيك المصاري ..
علاء بينو و بين حالو : على أساس أنا ماني عضو بعصابة مجهولة ..
علاء : شو هدفك من هالقصة ؟
أثير : و أنت شو حشرك !
علاء : والله ، إن ما حكيتيلي ما بساعدك ..
أثير : على فكرة أنا ما طلبت مساعدة ، هاد شغلك و أنا رح أدفعلك !
علاء : لا تحكيلي ، بس تصيري عنا ، بعرف كل شي لحالي ..
أثير : مارح صير بضيافتك ، قلتلك رح أقعد بقندق ..
علاء : مانك خايفة خبر أبوكي؟
أثير : مارح تضيع من إيدك ٢٠٠ ألف بدون تعب ..
علاء : و كيف رح نتفق عباقي التفاصيل ؟
رن تلفون علاء ، رقم غريب ..
أثير : هي رقمي صار عندك ، بشوف الوقت المناسب و بخبرك ، صار لازم روح ، بغض النظر عن شغلك السيء ، بس فيك تقدم لحدا مساعدة ..
علاء : بصير خير ..
ركب سيارتو و ضل يفكر ، من بنت خلدون لخلدون لبنتو مرة تانية ، بيوصل المبلغ لنص مليون إزا مو أكتر !

بالمول ..
وصل علاء و هو مبسوط عهالمبلغ الي رح يصير معو من ورا شغلة بسيطة متل هي ..
علاء : يعطيك العافية أيمن
أيمن : الله يعافيك معلم ، شو صار معك بالشغل ؟
علاء : وين سفيان ؟
أيمن : خلص شغلو ، و طلع ..
علاء : طلع ؟
أيمن : اي طلع ، خلص شغلو بسرعة ، صدمني بصراحة ! و طلع ..
علاء : اي تعال لإحكيلك شو صار ..

بالفرع ..
سراج : اتأخرت معلم ..
ليث : حققت معهن ؟
سراج : لا ، كنت مستني أوامرك ..
ليث قعد بمكتبو و حط إيدو عكتفو و غمض عيونو : تمام ، هلأ بشوفهن ، ابعتلي قهوة ..
سراج : سيدي صاير معك شي ؟
ليث : لا أبداً ، تعبان من سواقة السيارة ، صرلي قريب ١٥ يوم من الفرع للمستشفى لمواقع الجرائم ..
سراج : الله يقويك ، إزا بتحب أنا بحقق معهن ..
ليث : القصة مو قصة تحقيق ، القصة قصة اعتراف ، و القضية منتهية ..
سراج : عنجد ؟ عرفت مين منهن الي قتلها ؟
ليث : مو قلتلك ابعتلي قهوة ؟ يعني اطلع من المكتب و ابعتها !
سراج : احترامي سيدي ..

المسا بعيادة عامر ..
عامر للممرضة : لسا في مواعيد ؟
الممرضة : لا ..
عامر : بكرا افتحي العيادة بكير ، المريض الي اسمو عبد الله رح يجي بكير ..
الممرضة : إن شا الله ..
طلع عامر و هو عم يفكرو بغياث ، اتصل فيه ما رد ، طلع عالفندق ما لقاه ، طلع عالبيت ما لقاه ، فطلع عالمقبرة ..
و هو عم ينزل من السيارة ، شاف غياث طالع من المقبرة ..
عامر : مسا الخير شريك
غياث : مسا النور شريك
عامر : كيفك ؟
غياث : الحمدلله
عامر حط إيدو بإيد رفيقو بسرعة ، و حط مفاتيح السيارة بجيبو ..
عامر : صرلنا ١٠٠ سنة ما مشينا سوا ، تعال نتمشى و نطلع عشي مطعم نتعشى ..
غياث : ضل حقق أحلامك عندي و أنا ماني متحمل حالي !
عامر ترك غياث : تسابق ؟
غياث مشى و تركو : مو كأنك فاقد السيطرة ؟ صار بدك دكتور نفسي ..
عامر ركض و ترك غياث : ضل ورايي !
غياث ركض بسرعة : بعمري ما كنت وراك يا أبو عقل مطفي !
و ضلو يتسابقو بالشارع و الناس تتفرج عليهن !
لوصلو لمطعم كانو يفوتوه و هن مروحين من الجامعة ، و فاتو اتعشو سوا ..

وهم الغريب ٧

ليث : بعد ما شفت إنو تصميم بيتهن غريب و السقف كتير عالي ، طلبت منك قياسات الحيط و الكرسي و الحبل ، ارتفاع الحيط ٤ متر ، طول البنت ١.٥٠ سم ، طول الثريا ٥٠ سم ، و الكرسي ٦٠ سم و الحبل ٣٥ سم ، لو جمعنا كل الأطول ، من الكرسي لطول البنت للحبل و طرحناهن من طول الحيط ، بضل معنا ١.٥ سم ، وين راحو ؟ كيف قدرت تربط الحبل بالثريا مع هالمسافة بينها و بين الثريا ؟
سراج : ايواا ، ووقت شفت المكيف مطفي طلبت تشريح الجثة !
ليث : بالضبط !
سراج : كيف صارت الجريمة لكن ؟
ليث : عالساعة ٦.٣٠ المسا رنا قتلت بلقيس بالمختبر الي بتشتغل فيه ، و رجعت عالبيت بسرعة ، بالمدة المحصورة من الساعة ٧ للفجر ، أبوها فات لعندها و عرف أنها قتلت بلقيس ، فحاول ، ركز معي ، حاول يقتلها ، خنقتها بإيديه ، مشان هيك ما كان في آثار حبل عرقبتها ..
خبر ثائر إنو قتل رنا ، بس ثائر كان بالشغل و معلمو ما رضي يطالعو لأن دوامو مسائي و بيخلص الساعة ٣ الفجر ..
ع ٣.٣٠ بيوصل ثائر ، و شكلو كان حابكها منيح براسو ليبين إنو رنا انتحرت ، لما فات لقا لسا فيها روح فكمل باقي الجريمة ، مشان هيك عالتقرير الطبي النهائي بين وقت الموت عالساعة ٤ ..
كمل عليها بنفس الطريقة الي استخدمها أبوه ، لوقت ما أبوه جابلو حبل ، فربطو ثائر عرقبتها ..
من ذكائو ، علق الحبل عالثريا و سحبو بسرعة ليرفع إختو و كان غايب عن ذهنو إنو لازم يربطو مو يسحبو ، فانخلع كتفو و وقعت الثريا ..
ربط الحبل بالثريا ، و طفى المكيف ، و علق مفتاح الباب بمحلو تعليق ، و قفلو من برا ، مشان هيك وقت خلعت الباب لقيت المفتاح ورا الباب ، و مو بمكانو ..
سراج : العمى بعيونهن ، كيف قدرو يقتلوها ، ما حطو مرضها بعين الاعتبار !
ليث : لو بدهن يحطوه بعين الاعتبار ، ما كان البنت ارتكبت جريمة من الأساس و كانو قدرو يحتوو الموضوع من أولو ..
سراج : معك حق ، بسبب مرض بنت و إهمال أهلها ، صارت جريمتين ، ما بعرف كيف هالناس بتفكر ..
ليث : ........
سراج التفت على ليث : سي.....
لقاه نايم مرة تانية ..
سراج وقف ليطلع : و أنت نايم و هلكان حليت القضية كلها ، كيف لو كنت صاحي ، بعدين شو هالعادة هي ، صاير تنام عالواقف ، ارحم حالك بقا ..
ليث : سامعك ، اطلع من خلقتي لكفّي نومتي !
تركو بسرعة و طلع ..

الساعة ١٢ الضهر بالمقر ..
برن تلفونو علاء ، مكالمة من رقم غريب ..
برد ..
علاء : ألو ؟
أثير : علاء ، أنا بالجامعة و أخي معي ، ما معي وقت كتير ، لازم تبلش شغلك !
علاء : ماشي ، نص ساعة و بتصيري مخطوفة ..
خلصت المكالمة ، بفوتتة سفيان ..
علاء صرخ : سفيان و أيمن تعو معي ..
بالسيارة فهمهن كل القصة ، رح يخطفوها بطلب منها من قدام الجامعة ، و البنت رح تدفع مبلغ منيح ، ما رح تضل بالمقر و رح تطلع عفندق ، أبوها رح يدفع فدية لترجع ، و هيك بكونو كسبو من الجهتين مبلغ كبير ع نص مهمة !!
و خلال ساعة ، كانت البنت و أخوها مع العصابة ، و الخبر واصل لخلدون ..
بالمقر ..
فاتو ، و مصطفى ماسك أثير و مغطيين عيونها و أخوها نايم ..
أثير : اترك أيدي بقا عم توجعني !
علاء : مصطفى اتركها ..
تركها مصطفى ، و فكت قطعة القماش الي مغطية عيونها و صرخت بعلاء : أوعى تكون مفكر حالك خاطفني عنجد !!
علاء : إزا حضرتك ما اتمالكتي أعصابك رح تنامي جنب أخوكي ، يفضل تسكتي و تقربي لهون مشان نتفق عكمالة الخطة ..
قعدت معهن هو و أيمن و سفيان ..
علاء : أيمن ، اختار فندق بعيد عن هالمنطقة ، و احجز فيه باسمك ..
أيمن : حاضر ، أنا رايح ..
علاء : سفيان ، أنت الي رح تحكي مع خلدون ، لأنو ما بيعرفك ..
سفيان : حاضر ..
علاء : يلا ورجيني إبداعاتك ..
اتصل سفيان بخلدون ..
برن تلفون خلدون ، رقم خاص ..
خلدون : الو ؟
سفيان : يي دخيل هالصوت ، مثل شحط كرسي حديد عبلاط !
خلدون : مين معي ولاك !
سفيان : ولاك ؟ لا هي الكلمة كبيرة عليك
خلدون : رح خليك ت....
قاطعو سفيان بصوت عالي : خلص بقا صرعتني ، ليك ولا ، بنتك و ابنك عننا ، و هن بأمان ، مؤقتاً ، بدي ٣٠٠ ألف ، و بيرجعولك سالمين ، لا تفكر تتحيون و تخبر الشرطة ، لأني بعرف عنك قصص ، بتوديك لورا القمر أنت و هاد الي اسمو علاء ! دير بالك ! ، من هون للمسا بكون فكرت بتفاصيل الاستلام و التسليم ..
بسكر الخط بوجه خلدون ..
علاء مصدوم : كل هاد طلع منك ! والله طلعت مخبى بأواعيك !
سفيان : بعجبك معلم !!
علاء : لكان بدك توديه لورا القمر هو و هاد الي اسمو علاء !
سفيان بتوتر : اي .. اي معلم ، قلت هيك .. مشان ... مشان .. بعدك عن الساحة !
علاء بغضب : اي قوم من وجهي أحسن ما وديك لورا القمر ، تاني مرة ركز شو عم تحكي ! قال هاد الي اسمو علاء ، قوم ولاك ، اختفي من قدامي بسرعة ..

راح سفيان ..
و ضلو علاء و أثير قاعدين ..
أثير : مو كأنو زلمتك اتأخر ؟
علاء حط رجل عرجل و شعل سيجارة و اتطلع فيها بمكر : لكان بدك تسافري عكندا ..
أثير بصدمة : كيف ... عرفت ؟
علاء : قلتيلي إنك بتعرفيني و بتعرفي عني قصص كتيرة ، بس شكلك غلطانة ، علاء ما بحط إيدو بموضوع إلا ليدرسو بشكل كامل ..
أثير بينت عليها آثار الخوف : .....
علاء ابتسم : اي لا تخافي ، بشرفني اشتغل معك ، بتضلي أزكى من أبوكي ..
أثير : أوعك تحكي عن أبي هيك !
علاء : لو ما كشفتي قصصو و تخبيصاتو ، ما كنت فكرتي تعملي هالحوصة كلها ..
أثير : ......
علاء : أبوكي اتجوز أمك و هي كندية ، و تركتكن من ٨ سنين ، و سافرت عكندا ، فحرمها من شوفتكن ، و أنتي اكتشفتي كل سيئاتو ، و قررتي تسافري لعند أمك أنتي و أخوكي ، و لقيتي أسهل شي لتطلعي من البيت هو إني أخطفك و حطك بفندق ، بس عندي فضول أعرف كيف رح تتصرفي بعدين ؟
أثير : هلأ رح جهز أوراقي و جدد جوازي و جواز أخي ، و بس يسلمك بابا المصاري ، بدفعلك نص أتعابك و برجع عالبيت ، بعد كم يوم ، بترجع تخطفني و بتحطني بالمطار ، و بدفعلك باقي أتعابك ..
علاء ضحك بصوت عالي : بس نحنا ما اتفقنا عهيك ..
أثير : اتغير الاتفاق بعد ما اتصلت بأبي ، لأني ما اتوقعت تطلب منو هيك مبلغ ، و أنت بتعرف إني رح أدفعلك !
علاء : مشان تنجح العملية ، قومي صحي أخوكي ، زلمتي وصل ..
أثير : وينو ؟
بفوت أيمن : معلم ، صار ، حجزتلها باسمي بفندق النخيل الي بآخر المدينة ..
علاء و أيمن وصلو أثير و أخوها عالفندق ، و طلعو عالمول ..

بعيادة الدكتور عامر ..
برن تلفونو ، مكالمة من أم مريضة عندو ..
عامر : أهلاً أم سارة
أم سارة : دكتور عامر الحقني ، أنا بالمستشفى ، سارة انتحرت !

سايق سيارتو بطريقة جنونية !
و الأفكار عم تضرب براسو ..
كيف ممكن بنت بهالعمر تفكر بالانتحار !
سارة ، طالبة مدرسة بعمر ١٢ سنة ، من الأوائل بمدرستها ، اجتماعية و حركتها كتيرة و مشاكسة بشكل لطيف ، بتحب الحلو كتير ، متفاءلة و دايماً بتضحك ..
من بداية العام الدراسي الحالي ، اتغير حالها ، صارت انطوائية ، و منعزلة و ما بتحب تطلع من البيت ولا تروح عالمدرسة ، مستواها الدراسي اتراجع بشكل ملحوظ ، و انقطعت شهيتها عن الأكل و خاصة الحلو ، بطلت تحكي و تضحك متل قبل ، و دايماً بتعاني من تعب و وهن و اضطرابات بالجهاز الهضمي ..
أمها عرضتها عأكتر من دكتور ، لبالآخر دكتور نصحها تعرضها عدكتور نفسي ، لأنو اتبين إنو جسمها سليم بس مشكلتها نفسية !!..
بعد كم يوم من مراجعتها عند الدكتور عامر ، شخص إصابتها باكتئاب حاد بسبب تنمر رفقاتها بالمدرسة عليها ، لأن عندا عين أكبر من عين ، و كل ما كبرت و كبر جسمها هالفرق عم يبان أكتر ..
لاحظ إنو عندها عصبية مفرطة و أفكار مشوشة بتتضمن أفكار عن الموت و الانتحار !
مع العلاج حالتها اتحسنت ..
بس شو الي صار بعد هيك !!
محدا بيعرف !!
بعشر دقايق وصل للمستشفى ، بس للأسف ، سارة ماتت ..
المحقق ليث كان موجود ..
و بعد ما حقق مع الدكتور عامر عن حالة البنت ، قفل القضية بحادثة انتحار ، البنت حالتها النفسية سيئة ، نطت من برندة شقتهن من الطابق الخامس !
ليث : ما اتوقعت تحكيلي شي ، اتوقعت تقلي هي أسرار مرضى ..
عامر بحزن : عن إزنك ، لازم اطلع ..
ليث بينو و بين حالو : ايوا ، شكلك يا دكتور عامر مو مركز شو كنت عم تحكي أصلاً ، موت الطفلة مأثر عليك ..
عامر بعد ما طلع من المستشفى ، راح العيادة قعد نص ساعة و ما اتحمل يضل فيها ، فطلع عالمول لعند أخوه ..

بالمول ، قبل ما يوصل عامر ..
علاء : سفيان ، جيبلنا قهوة
سفيان اتطلع بعلاء و ما رد ..
علاء بغضب : اكسر عينك سفيان !
قام سفيان ليجيب القهوة ..
أيمن : ليش هيك عم تتطلع فيه ؟
علاء : كأنو تعبان ..
أيمن : تعبان ؟؟
علاء : مانك شايفو كيف مصفرن ..
أيمن : يمكن من الشغل ..
بيقطع حديثهن عامر : مسا الخير ..
علاء ، أيمن : مسا النور ..
علاء لأيمن : اتصل بسفيان يحسب حساب عامر ..
و قبل ما يتصل أيمن ، بيوصل شب حامل ٣ فناجين قهوة ، و بقول لعلاء في شب طلب مني وصللك إياهن و طلع بسرعة من المول ..
علاء : ما قلك وين راح ؟
الشب : لا ، بس كان مبين عليه تعبان و متوتر ..
علاء اتطلع بأيمن
عامر : شوفي ؟!
علاء حكا كلشي لعامر ، و عامر طلب منو يدير بالو عسفيان و عكل الشباب الي بيشتغلو عندو ، لأنهن صارو مسؤوليتو ..
و بعد هيك تركهن و طلع لعند غياث عالبيت ..

بعد نص الليل ..
فات سفيان على بيتو ..
عم يجر حالو جر من تعبو ..
اتطلع بالبيت ، لقى الضو لسا شغال ..
سفيان : والله كأني طفيت الضو ليش لسا ..
علاء : اي كان مطفي و أنا شغلتو ..

وهم الغريب ٨

بڤيلا خلدون ..
وصل علاء ..
خلدون : الحقني يا علاء ، خطفولي أولادي !!
علاء : طيب اهدى شوي و احكيلي ، ما عرفتهن ؟ مانك شاك بحدا ؟
خلدون : لا أبداً ، علاء اسمع ، أنا ما فيني أمن بحدا من رجالي بهيك قصة ، ليك بعطيك المبلغ الي بدك إياه ، بس أنت تصرف ! الخاطفين ما اتصلو فيني من مبارح و أنا اتربطت إيدي و خايف عالأولاد !!
علاء ابتسم بمكر : و أنا لها !
علاء بعت رسالة لسفيان ( اتصل بخلدون بسرعة بما إني موجود ببيتو )
و بعد ربع ساعة ، بيتصل سفيان عخلدون ..
خلدون : رقم خاص ، هي أكيد هنن !
سحب علاء التلفون و رد و فتح مكبر الصوت : الو ؟
سفيان : شو صار معك ؟
علاء : شو صار معك أنت ؟
سفيان : مين أنت !
علاء : ما بهمك ، المهم بدي البنت و أخوها ، سجل رقمي عندك ، و اتواصل معي أنا ، المصاري رح توصلك كاملة ، بس إزا بتنخدش البنت خدش صغير ، والله لجيبك لو كنت ورا القمر ! فاهم !
سفيان : ههههههه ، عجبتني ثقتك بحالك ، رح خليك تندم عليها و تندم عالساعة الي مسكت فيها التلفون !
علاء بغضب : رح خليك تندم عهالحكي !
سفيان بتردد : هات الرقم ..
علاء : سجل الرقم انقبر ! ٠٩********
خلصت المكالمة ، علاء طمن خلدون ، و قلو خلال يومين بالكتير بتكون بنتو عندو ، و طلع و هو معصب ..
بعت رسالة لسفيان : ( بدك تخليني أندم لكن ، إزا كنت بالمقر ، اختفي منو بسرعة ، لأن إزا بشوفك عليي الحلال رح أقتلك )
سفيان انسطل لما شاف الرسالة ، مارد عليها و عمل متل ما قلو علاء ..
علاء اتصل بأثير و خبرها إنو خلال يومين لازم يسلمها لأبوها ، و مشان استلام الجوازات هو بدبر القصة بمعرفتو ..

بالفرع ..
ليث قدم عإجازة لمدة شهر ، و بصعوبة لانقبلت ..
سحب حالو و طلع عالعيادة لعند عامر ..

بالعيادة ..
ليث خبر عامر يوصل سلامو للمرة التانية لعلاء ، و زت كم كلمة قدام عامر ، لمحلو من خلالهن إنو رح يسافر ..

بالمقر ..
الشباب مجتمعين و معهن سفيان بعد ما اتصل فيه علاء ، عم يخططو لصيد فريسة جديدة ..
هايل ، عازف بيانو معروف و غني ..
علاء لسفيان : رح تخليني أندم لكن ، اي اسمع ، رح تروح لحالك و تجيبلي إياه ..
أيمن : معلم ! مارح يمشي الحال لحالو ..
علاء : تعال عود محلي و استلم شغلي !
أيمن : ما قصدت بس ..
سفيان بثقة : حاضر ..
علاء : بكرا عال ٣ بدياه عندي .
سفيان : حاضر ..
علاء : قوم روح على بيتك ، مشان بكرا تكون بكامل قوتك ..
ابتسم سفيان ، و طلع على بيتو ..
و بعدو طلع علاء عبيت أهلو ..

ببيت أهل علاء ..
فات بسرعة : أمي ، وينك ! أنا مهري من الجوع هه
أم علاء : يلا تعال هي سكبنا الأكل ..
علاء : كيفك أبو عمير ؟
عامر : الحمدلله ..
اتعشو سوا ، و من قصة لقصة ، عامر خبر علاء عن سلام ليث للمرة التانية ، و قلو إنو فهم منو إنو رح يسافر فترة ..
علاء بينو و بين حالو : هاد شكلو مو مصلي عالنبي ، كأنو ما وراه غيري ، بس شو مشان سفرو ، معقول عم يوصلي أخبار كزب ليوقعني !

تاني نهار ..
بالمقر ..
الساعة ٣ ..
علاء : شو سفيان ؟ شايفك راجع لحالك ..
سفيان : هايل مانو بلد ، و بدو شي ١٠ أيام ليرجع ..
علاء : نفدت منها يعني ، يلا ليكنا عم نستناه ، المهمة إلك يعني إلك سيد سفيان ، و لو كانت بعد ١٠ سنين ..
سفيان : حاضر ..

بعيادة عامر ..
قاعد مع المريض الي اسمو عبد الله ..
يافع بعمر ١٤ سنة ..
عامر : اي شريك ؟ لساتك كتير حركة ..
عبد الله ابتسم : لسا ، حتى و أنا عم بحفظ قرآن أو بكتب دروسي ، بضل اتحرك ، بلعب بشعري ، كل شوي ببري القلم ، بهز برجلي ، حركتي ما عم توقف ، الموضوع صار يدايقني لأن المعلمين بالمدرسة انتبهو عليي و صارو يقيدو حركتي بشكل يخليني أفقد السيطرة ..
عامر : فكرت رح تقلي بقيدو حركتي بشكل بدايقني لأني ما بدي اتحرك !
عبد الله : لا بالعكس ، بحس في جواتي طاقة مزيفة ..
عامر : كيف يعني ؟؟
عبد الله : عندي طاقة لضل اتحرك و نط و احكي و أحلم و اتخيل ، بس عالفاضي ، حركتي مامنها فايدة ، و حكيي أغلبو تافه ، و ما عم أقدر استخدم طاقتي للتركيز ، تركيزي قليل و بس ركز بشي بحس حالي شخص محبوس بصندوق و هو عندو فوبيا من الأماكن المغلقة ..
عامر : ليش كل هاد ، ما قلتلك اتدرب تقعد كم دقيقة بقلب هالنهار بدون حركة و تمارس التأمل و التفكُّر ؟
عبد الله : بكون عم بتأمل بشي شغلة و هه ببلش فوت بالحالة ، فجأة بتخطر ببالي قصة و بطلع لإحكيلهن إياها ..
عامر : أفهم كمان إنو لساتك بتحكي كتير ؟
عبد الله ما حكا بس أشر بإيدو بما معنى إنو لساتني بحكي كتير !
عامر ضحك : اي واضح والله يا شريك ، ملتزم بدواك ما ؟
عبد الله : ما ..
عامر : كم كتاب قرأت من أول مرة زرتني فيها ؟

وهم الغريب ١١

خلال أسبوع ، عامر خطب سيما ..
بالعادة ممكن العريس هو الي يخطب و يسافر ، بس إنو العروس تنخطب و تسافر ، بقا هي ما بتحصل كتير ..
بعيادة عامر ..
غياث : و ايمتى راجعة ؟
عامر : شغلة ٢٠ يوم ، و بترجع .
غياث : يا حبيبي يا عامر ، كيف راحت و تركتك ..
عامر : تضرب شو غليظ ، لو ما بتعرف إنها راحت مشان عملية إختها شو كنت عملت ..
برن تلفون عامر ، مكالمة من علاء ..
علاء : أنا قبال العيادة ..
عامر : يلا ثواني و طالعين ؟
علاء : ين ؟ يعني أنت مو لحالك ؟ ..
غياث : لا مو لحالي ، غياث معي ..
طلعو لعند السيارة و راح عامر لناح علاء و انحنى لعندو : يلا أخي ، انزل ، أنا بدي سوق ..
علاء : مو كأنك واثق من حالك زيادة ؟
عامر فتح الباب و شحط علاء : مارح آكل السيارة ، انزل خلصني ..
علاء : هاد الي شاطر فيه ، تضل تشحطنا ! بعدين نحنا لوين رايحين؟
عامر بينو و بين حالو : اي شو بعرفني !
عامر : اطلعو اطلعو ، هلأ بتعرف ..
عامر سايق و عم يتطلع بعلاء و غياث كل شوي ..
عامر بينو و بين حالو : يارب ساعدني لساعدهن ، الاتنين مكتأبين و محطمين نفسياً و عاطفياً ، ياارب ..
ضل نص ساعة عم يسوق و الاتنين ساكتين ..
آخر شي قرر يوديهن عالمسبح ..
فاتو ، غياث حتى ما غير لبسو و نط بالمي و ضل تحتها ..
علاء : ليكون رفيقك بدو ينتحر ؟
عامر : لا ، هو هيك بعمل بس يكون متدايق ..
علاء بينو و بين حالو : إزا أنا الي سافرت و بعدت عني رح جن ، كيف هو ..
علاء : و أنت ؟ لساتك بتقرف ؟
عامر ببراءة : اي ..
علاء : رح تجيبولي المرض ، أنت من ناحية و سفيان من ناحية !
عامر : 😂
علاء اتطلع للمكان الي نط فيه غياث و همس : الله يهون عليه ..
عامر اتطلع بأخوه بجدية : و عليك
علاء : لا تطلع فيني هيك ، أنا فهمان عليك ليش هيك عم تعمل ، بس مارح احكي شي لأن مالي حيل أحكي ، و مالي حيل اتطلع فيك لتحسن تقرا عيوني ، اكتشف لحالك ..
عامر : خف على حالك شوي ، ملتهي بشغلك كتير و ما عم تفضى لحالك ، عم تأجل كلشي بعيد عن الشغل ، حتى مشاعرك ، مشان هيك هلأ انتكست ، مشاعرك بدها تطلع يا أخي ..
علاء : بصير ..
عامر : بقا إلا العصبية ! هاي الي إزا ما كانت موجودة حضرتك بتخلقها !!
علاء : .....
عامر : الحياة الفوضوية ، الطرق المتشابكة ، و المستقبل المجهول ، هيك الحياة ، فاتخيل فوق كل هاد ، ترجع أنت تنكش حياتك لتصير فوضوية و تشربك طرقك و تخلي مستقبلك مجهول ..
علاء فتح عيونو و اتطلع بأخوه باستغراب ، فكر أخوه عارف شي عن شغلو : شو بتقصد ؟

عامر فعلياً ما بيعرف شي عن شغل أخوه التاني ، بس كان بيعرف إنو علاء مضيع حالو بشكل أو بآخر ..
عامر : عفكرة ، إزا المسافات طويلة ، المطار بقصرها ..
علاء : .....
عامر : روح لعندها ، حاجتك عم تحترق ..
علاء قطب حواجبو و اتطلع بأخوه :٣ ، ٢ ، ١ ..
و دفشو وقعو بالمي ..
علاء بمكر : طالع رفيقك من تحت المي ، رح يختنق ..
ضلو سوا كم ساعة ..
قدر عامر يشتغل شغلو و يساعدهن الاتنين ..
و بعدها كل واحد راح عشغلو بنفسية جديدة ..

بالعيادة ..
عامر بينو و بين حالو : موت طارق ، ضغط الشغل ، القلق ، البنت طلبت مساعدتو لتسافر ، اتعلق فيها ، بتشبهو ، سافرت ، قاعد لحالو ، لسا في شي مخبيه عني يا علاء ..
الله يسامحك يا أبي شو قسيت عليه ، الله يهديك يا علاء شو راسك يابس ..

(( قبل ١٢ سنة ، كان عمر علاء ١٦ ، هجمو عليه ٢ طلاب بمدرستو ، و بلشو يضربوه ، قام هو بالغلط ضرب واحد منهن ضربة قاسية ، الولد كان معو مرض بالقلب ، و ما اتحمل ضربة علاء ، فمات عأثرها ..
أبو علاء دفع الدية ، بس ما قبل يستقبل علاء بالبيت و قلعو منو ..
هال ١٦ سنة ، كيف رح تحمي علاء من الحياة !
عاش لحالو ٥ سنين ، يشتغل و يصرف عحالو ، الحياة قسيت عليه و علمتو يقسى ..
شكل هالعصابة هو و رفقاتو و كانو يشتغلو عالخفيف ، و بس صار عمرو ٢٥ اتعرف عخلدون و ساعدو بعضهن ، و قرر يشتري المقر ، بالمصاري الي معو و مع رفقاتو و بمساعدة من خلدون ، مع شوية وقت ، اشترو سيارات و سلاح ..
قبل سنة و نص من هلأ ، مات أبوه ، و بالرغم من هيك ، ما رضي يرجع عالبيت ، و احترم رغبة أبوه حتى و هو ميت .. ))

بالمقر ..
كل الشباب عم يحوصو إلا سفيان مو موجود ..
و علاء قاعد عم يفكر ، لوقت حسم أمرو و قرر ..
حجز تزكرة عكندا ، و سفرو تاني يوم ..
سفيان فات يركض لعند علاء ..
سفيان : معلم ، أما شو جبتلك رهينة !
علاء : بَشر ؟ عليم الله عفنت من القعود ..
سفيان : نعيم ، ابن المخرج عبد الرحمن ، هو ساكن بحمص ، بس صرلو يومين بالشام !
علاء : اتأكدلنا من حالتو الصحية بالله ، مو ناقصنا هايل تاني ..
سفيان : اتأكدت من كلشي ، بس لازم نتحرك اليوم ، لأن بكرا عندو سفرة عمصر !
علاء : تعو كلكن لهون ، صار لازم نتحرك ..

بساعة ، كانت الخطة جاهزة ، و الشاحنة جاهزة ، و الشباب مجهزين حالهن و لابسين لبس مدني و ملتمين بكمامات ..
وصلو عبيتو ، نزلو ٤ شباب ليفوتو عالبيت و ركضو لعند الباب ليدقوه ..
نزل علاء ، و بمجرد ما حط رجلو عالأرض ، مرقت رصاصة من جنب راسو ، صوت الرصاصة مو غريب عليه ، انتبه للمكان الي طلعت منو !!
علاء صرخ : اطلعو من الناحية اليمين للبيت و بوجهكن عالشارع الرئيسي !! في قناص كاشف هالناحية كلها !!
ركضو الشباب ، و ركضو وراهن سفيان و علاء ..
بس سفيان فجأة مسك علاء و دفعو لقدام بقوة وركض وراه !
علاء صرخ : سفيااااان !!
شكلو كان في قناص تاني كاشف يمين البيت !
و الرصاصة صابت سفيان !
الشباب لما شافوه وقع ، كلهن ركضو لعندو إلا أيمن ركض عالشارع ، غطى وجهو بكوعو و رفع سلاحو بوجه صاحب سيارة ..
أيمن بغضب : انزل !
و بما إنهن متعودين عهيك شغل ، قدرو يسحبو سفيان بدون ما القناصين يشوفوهن ..
علاء اتصل بخلدون ..
خلدون : أهلاً علاء ..
علاء : خلدون ! دبرلي دكتور موثوق منو بسرعة !
خلدون : أنت منيح ؟ رجالك فيهن شي ؟
علاء : واحد من رجالي انصاب !
خلدون : رح اتصل فيه يجي لعندي ، ابعت حدا ياخدو ..
علاء سكر المكالمة ووجه حكيو لأيمن : اتخفى منيح و روح جيب الدكتور ..
الساعة ١٠ ببيت سفيان ..
كل الشباب موجودين ، و الدكتور موجود معو بالغرفة ..
علاء عم يحوص عالبرندة ، و يدخن ..
أيمن : علاء ، ارحم حالك بقا كم باكيت صرت مدخن ! لك شو هالمخ الي شايلو براسك يا زلمة !
علاء : لو سفيان ما انتبه للقناص التاني و دفشني و ركض ورايي ، كنت أنا بمحلو ..
أيمن : والله هالسفيان صدمني ، آخر واحد كنت بتوقع منو يعمل هيك شي معك ، لأنو أكتر واحد داق قتل منك 😂
علاء ابتسم : ما بعرف ليش بشوف فيه أخي عامر ، يمكن لأنو سند للكل ، حتى إلي ، بغيابك ما بلاقي حدا غيرو اعتمد عليه ..
أيمن ارتكى عحفة البرندة و اتطلع بعلاء : هو بيشبه عامر بشي و بيشبه علاء بشي ..
علاء : اي يلا هلأ قلي هو بيشبه عامر لأنو بساعدنا كلنا و بضحكنا ، و بيشبه علاء بعصبيتو البشعة و مخو الأبصر كيف مركب و حيونتو و صوتو العالي !
أيمن : رحم الله امرء عرف قدر نفسه ! أنا ما حكيت شي !
علاء : روح من وجهي ، فوت شوف سفيان إزا صحي ولا لا ..
أيمن بمكر : علاء ، ما تفوت أنت ، ولا حاس بالذنب ؟
علاء بغضب : اختصر مشان ما لقحك جنبو ، بعدين شو ؟ كأنك رافع الكلفة عالآخر ؟
أيمن ضحك : عراسي أحلى معلم عصبي ، مخو مركب بطريقة غريبة و صوتو عالي !
بطل عليهن مصطفى : معلم ، بدي باكيت السجاير ، قلتلي رح تاخد تنتين و ترجعو ..
علاء مد إيدو و عطا لمصطفى الباكيت ، بس للأسف ، كان فاضي !
مصطفى بصدمة : أنا نازل جيب سجاير ..
أيمن : لو بدخن كنت عطيتك ، بس ما بدخن ، بعدين مانها محرزة ، اطلب من حدا من الشباب ، عندك ١٢ واحد جوا ، نصهن متل دفايات الكاز ، مافي إلا بتشم روايح دخان و هن قاعدين ..
مصطفى و هو عم يتطلع بعلاء : المعلم خلص سجايرو و سجاير الشباب كلها ، و شحطناه من قدام غرفة سفيان شحط ، كان بدو يسأل الدكتور إزا بدخن ، يا حسرتي عهالشباب تعال طل عليهن ، قاعدين متل الي ناقصو جرعة مخدرات ..
أيمن : ههههههههه روح روح ، شكلك رح يبكيني ..
علاء : مصطفى جيبلي معك باكيتين ، و لا تضل تنوح ، هي لو نوع دخانك عليه القيمة ما كنت قدرتلك !
مصطفى : معلم بقيمة و بلا قيمة أخدتهن ، كنت عم راقبك ، خفت تاكل الرماد و بقايا السيجارة ..
علاء بغضب : امممم ، ابقى بس ترجع من مشوارك ، جيب باكيت سجاير و تعال لعندي ..
مصطفى فهم على علاء شو بدو يعمل ، فاتطلع بأيمن بصدمة !
أيمن اتكتف و حط إيدو تحت دقنو : والله يا مصطفى اليوم عشاك بقايا سجاير ، صح ، هي البقايا شو المادة الي فيها ؟ قطن ولا اسفنج ؟
علاء اتطلع بأيمن ..
أيمن بمكر : المهم إنها شي غير قابل للهضم !

محدا من الشباب رضي يروح عبيتو قبل ما يتطمن عسفيان ..
طلع الدكتور..
علاء : شو صار معك دكتور ؟
الدكتور : وضعو مستقر ، الحمدلله جسمو قوي و إن شا الله بتمر هالقصة عخير ..
علاء : الحمدلله ..
الدكتور : أنت قلتلي إنو الرصاصة رصاصة قناصة ؟
علاء : اي ، سمعت صوتها مرقت قريب مني ..
الدكتور : الرصاصة الي بكتف رفيقك رصاصة مسدس عادي ..
علاء : شو ؟
الدكتور : الظاهر كان فخ الكن ، بس نفدتو منو ..
الدكتور اتحرك ليمشي ، فمسكو علاء ..
علاء : لوين حضرة الدكتور ؟
الدكتور : بدي غسل ..
علاء تركو : اه بعتزر ، الحمام جنب باب الشقة عاليمين ..
الدكتور ابتسم : خلدون قلي ، علاء مارح يتركك تطلع قبل ما يفيق زلمتو و يتطمن عليه ..
علاء : اي أكيد مارح خليك تطلع ، و مشان المصاري لا تشيل هم ، كلو بحسابو ..

وهم الغريب ١٢

راح عبيتو ، جهز حالو ، و طلع عالمطار ..
شافها جاية من بعيد ، ابتسم ..
لما شافتو ركضت ..
أثير : علاء ! شو عم تعمل هون ؟ لا تقلي بابا كشفنا !
علاء : هلأ هاد الي فهمتيه من جيتي لهون !
أثير بينها و بين حالها : أنا فهمانة ، بس بدي أنت تفهم !!
أثير : لكن ؟ عرف إني مو دافعة شي للجامعة ؟
علاء باستغراب : ليش أنتي مو دافعة للجامعة ؟؟
أثير : لو كنت ادفع ، كيف كنت رح أمن المصاري الي حضرتك ما أخدتهن !
علاء : اممم ، اي الحمدلله عالسلامة ..
أثير : الله يسلمك ، صحيح نسيت قلك ، أكل المطار طلع مو طيب فعلاً !
فهم عليها ، وعزمها عالعشا ، بس طول ما هن عالطريق و هي عم تجاكرو و تستفزو ، لدرجة خلتو يوقف السيارة بطريق مقطوع و يحاول ينزلها منها !

بالمطعم ..
علاء ما كان يفهم شو صرلها !!
هي أكلت من هون و فرطت ضحك من هون !!
مافي ثواني ، إلا هو كمان فرط ضحك ..
خلص ، شحنو و مشي الحال ..
و الشاطر منهن الي عم يحاول يخبي ضحكتو مشان ما ينفضحو !
قضو الكم ساعة الباقيين سوا ، حكو كتير و ضحكو كتير..
بالسيارة ..
أثير : خدني عفندق النخيل ، مو حابة ارجع عالبيت اليوم ..
علاء بمكر : ليش ؟ خايفة من أبوكي ؟
أثير : لو بدي خاف منو ما كنت إجيت ، بس هالفندق بزكرني بشغلات حلوة ..
بعد ربع ساعة ..
علاء و هو عم يفك حزام الأمان : وصلنا ، يلا انزلي ..
أثير : يلا تعال بسرعة ، مشان تحجزلي باسمك ..
علاء بينو و بين حالو : رجعنا لنفس القصة ، لساتها عم تأمرني أمر ، و كلو كوم و تعال كوم ، شو عم يصير هالفترة مافي إلا الناس عم تشحطني !!!
حطها بالفندق ، و حجز لالو بالغرفة الي جنبها بس ما خبرها ..
اتصل بأيمن و اتطمن على سفيان ، و حط راسو و نام ، بهدوء و سلام ، أول مرة ، من ٣ شهور ..
أكتر من حدا رنلو ، أثير ، عامر ، أيمن ، سيف ..
بس هو ما حس عالتلفون أبداً ..
صحي الساعة ٨ ..
انصدم بكم المكالمات الواردة ..
علاء : أقرب شي لنشوف شبو ، أثير ..
جهز حالو و راح لعندها ..
بس دق الباب فتحتلو فوراً ..
عيونها دبلانين و حمر ..
علاء : صباح الخير ..
قعدت أثير بالأرض و بلشت تبكي !
نزل لعندها بسرعة ..
علاء : شبك ؟ صاير شي ؟ مرضانة شي ؟
أثير بغضب : بعد عني ، مو صاير شي !
وقف و حط إيدو بجيب البنطلون ..
علاء : لسا مبارح كنتي مبسوطة ، شبك اليوم زعلانة ، أما إنتو البنات عليكن قصص !
أثير بغضب : زعلانة لأني مبتلية بواحد ما بحس !!
نزل لعندها : اتطلعي فيني لقلك .. هلأ أنا ما بحس ؟
أثير : اي ما بتحس ، و ما عندك مشاعر ، لك أنت خشبة !
علاء : ههههههههههههههه أنا خشبة !!!
أثير زاد بكاها و هي لسا قاعدة بالأرض ..
مسكها و شحطها و بعدها عن الباب ..
سكرو برجلو و رجع نزل لعندها : طيب و إزا قلتلك اشتقتلك ؟ و إجيت عالمطار مشانك ، و اشتريتلك باقة ورد كمان ، بس صاحب المحل ضل يلعي فوق راسي ، يلعي فوق راسي ، يلعي فوق راسي ، لطعميتو إياها ..
شو ست أثير ؟ ما شا الله دموعك بسرعة نشفت ! شكلي بطلت خشبة !
علاء ما حكا أكتر من اشتقتلك ، و هي بعد هالكلمة ، ما بقا سمعت شي ..

قدام ڤيلا خلدون ..
علاء بمكر : نحنا وين التقينا ؟
أثير بمكر : قدام الڤيلا أكيد !
فاتو سوا ، خلدون كان متل الغرقان الي طالعوه من المي ، ضل يعاتب ببنتو و هو متناسي وجود سلطان و علاء ..
علاء عم يدخن و مسلط كل تركيزو عسلطان ، خاصة لما شافو عم يتطلع بأثير ..
بعد ما وصلها و أمن عليها ..
طلع لعند أمو ، اتطمن عليها و طمنها عحالو و راح لعند عامر عالعيادة ، سلم عليه و خبرو إنو أثير رجعت و اتخانق معو وطلع ..
خلص النهار ..
علاء كان مبسوط كتير ..
كأنو الحياة خبتلو هالسعادات كلها ليوم واحد ..
و هو عم يركب السيارة ، بيجيه اتصال من أيمن ..
علاء : أي أيمن ؟
أيمن : معلم ! سفيان !
علاء بخوف : شبو ؟
أيمن : ما بعرف ، كان صاحي و عم يحكي طبيعي معنا ، فجأة تعب و صفرن و حرارتو وصلت للسقف !
علاء : ثواني و بوصل ..
و صدق علاء حكيو ، ثواني و وصل عبيت سفيان ..
فتح الباب بسرعة و فات ..
البيت عتمة ! شو عم يصير ..
كان عم يدور عالأزرار ، لوقت ما دعس عشي و نقز و كان رح يضرب بالسقف ..
سيف صرخ : ااااااااااااااااااااااه !
علاء نقز : ااااااااااااااا ، سيييييف والله لأبتلي فيك ، شغل الضو ولاك !!
اشتغل الضو ..
كل الشباب واقفين و مبسوطين ، بما فيهن سفيان ..
أيمن : سيف فضحتنا ! ليش كنت ماد رجلك ..
سيف : ما لحقت اسحبها ، فات المعلم قبل ما أسحبها ، خفت اسحبها فيسمع صوت و يشك بالوضع ، و يتحمس و يطالع سلاحو و يقضي علينا كلنا !
علاء : خفت شك فيكن ، هيك أحسن يعني ؟ رجلك كانت رح تنكسر ، بعدين شبكن هيك متل طلاب المدارس ، سفيان ولاك ، شو قومك من فرشتك ؟

سفيان : بدي آكل كيك ..
طلع مصطفى من المطبخ حامل قالب كيك كبير عشكل باكيت دخان ..
علاء : مين أنتو ؟ خوفتوني و أنتو عاقلين و لطيفين هيك ! شبكن !
أيمن : سمعنا إنو مرت أخونا المستقبلية وصلت من كندا ، و حبينا نحتفل ..
علاء ابتسم ..
سفيان بتعب : جرحي رح يفتح من كتر السعادة ، طعموني كيك و رجعوني عتختي !
علاء : بعدو عن سفيان و هاتوه لجنبي ..
سفيان : عراسي معلم ..
علاء : مين صاحب الفكرة ؟
جمال : سفيان ، خبرنا و طلب نجيب الكيك ..
الشباب رغم الشر و السوء الي ببينوه ، بس لسا فيهن جنب أبيض 🤍

مر أسبوع ، ما كان بيحمل هدوء كبير ، بس المهم في لاحة هدوء بالموضوع ..

ببيت سفيان ..
علاء و أيمن لسا عندو ..
برن تلفون علاء ..
بيطلع عالبرندة و برد ..
علاء : أهلاً أثير ؟
أثير عم تبكي : علاء !
علاء بغضب : ليش عم تبكي ؟ خليكي عالخط ، ليكني جاي ..
ركب سيارتو و انطلق عڤيلا خلدون ، ما فكر حتى شو ممكن يكون عذرو لهالزيارة !
لقاها ناطرتو برا ..
علاء : شبك ؟ شو صاير ؟
أثير : بابا بدو يزوجني لسلطان !
علاء : نعم شو هاد ؟؟ ما فشر هالديب ، والله بدفنو لو فكر فيكي ، بس .. ايوا ، أكيد سلطان ناكش شي قصة عأبوكي ..
أثير : علاء ، أنا خايفة على أبي ..
علاء : خلص أنتي لا تضلي تبكي ، لا تخليني فوت ارتكب جريمة جوا هه ! ، لا تخافي ليكني جنبك و جنبك أبوكي ، بس ليش ما اتصل فيني و حكالي ؟
أثير مسحت دموعها : سلطان عندنا بالبيت ، و هن عم يتناقشو ..
علاء : عم يتناقشو ؟ يعني هاد كلو لسا حكي ؟
أثير ببراءة : اي لحد هلأ حكي ، بس بلكي صار حقيقة ! ناطر ليصير حقيقة يعني ؟
علاء مسكها من قبة القميص و سحبها عالڤيلا : لك اتنين سانتيمر و ماني قادرلك ، جبتيني على ملا وجهي من بيت رفيقي ، كنت رح فوت عالڤيلا بالسيارة من الحماس ، طلع هاد كلو حكي و افتراضات !!!
أثير : هيييي اتركني ، ماسكني و ماسك السيجارة بنفس الإيد ، يعني إن ما متت خنق موت حرق ..
مسك السيجارة بإيدو التانية و ضل شاحطها ..
أثير : علاء ..
تركها ووقف قبالها ..
علاء : عيونو ؟
أثير : ........
علاء : خلص مو عيوني
أثير : بالله !!
علاء : لك احكي بسرعة عندي شغل !
أثير : ليش ما بتبطل التدخين ؟
علاء : امممممم ، الموضوع صعب كتير ..
أثير : طيب حاول ، مشاني ، أنت كتير بتدخن ، و الوضع مأساوي !
علاء : ......
أثير مسكتو من إيدو : شو ؟
علاء : يعني عملتي هيك مشان استسلم ، حاضر ، بحاول ..
أثير : لا مو تحاول ، بدك توعدني !
علاء : صرلي ٨ سنين عم دخن ، صعب اتركو فجأة ، مشان هيك رح حاول شوي شوي ..
أثير : بحبك وقت تترك شي مو منيح مشاني !
حكت جملتها و ركضت عالڤيلا ..
علاء : .......
نطرها لفاتت ، و طلع لعند أمو ..
و هو بالبيت ، بتوصلو رسالة من أثير : ( ما قلتلك رح يصير واقع ، سلطان هدد بابا بكتير قصص ، و هددو إنو إزا أنت بالذات عرفت رح يفضح كلشي ، و مشان يسكت ، بدو يتزوجني )
علاء رد برسالة ( هاد شكلو بدو يكسب ، بهدد أبوكي و بيطلب القرب منو ، بكل حال أنتي لا تخافي ، أبوكي قدها و رح يطلع منها ، و أنا بضهرو )
علاء اتصل بأكم حدا ..
و طلع من البيت ..

ببيت سلطان ..
قاعد و مبسوط عخطتو ، علاء ما بيعرف ، يعني الشبح مارح يعرف !
برن تلفونو ، برد بدون ما يشوف مين ..
سلطان : أهلاً أهلاً !
الشبح : أنا حذرتك ، بس أنت شكلك مخك سميك و ما بتفهم ، و للأسف أنا راسي يابس و ما بفهم !
ضرب رصاصتو بلا أدنى تأنيب ضمير ..
ووقع سلطان ميت ، و خلصت خطتو قبل ما تبدأ !!
تاني نهار ، اتصدر خبر مقتل سلطان ، نائب وزير الصحة نشرات الأخبار المحلية !
بطريقة مشابهة لموت زهير ، و أصيل و غيرو و غيرو !!
الشبح ..
الوهم الي بضل مطارد صاحبو قبل ما يطارد الناس ..
الجانب الأسود من رقعة الشطرنج ! و الي شكلها فازت بالمنافسة !

بڤيلا خلدون ..
وصل علاء ..
خلدون : أنت كيف بتؤمر الشبح يقتل سلطان بدون ما ترجعلي !
علاء قعد : أنا ما أمرت حدا ، هو استشارني و أنا ما عارضتو ..
خلدون : ما عارضت ! لك شو هالتخبيص هاد!
علاء : هاد مو تخبيص ، هي عملية إنقاذ ، سلطان كان يحفرلك هو و زهير ، بس لما حس إنو زهير بدو يغدر فيه صفاه ، و بعدين فضيلك ! و الشبح ريحك منو ..
خلدون : مين قلك هالحكي ؟
علاء : ولو ، ما بدك حدا يقلك مين علاء و مين رجال علاء ..
خلدون : ......
علاء : طيب من الآخر سيد خلدون ، هو بصراحة أنا حاب مهد و لمح بس ما عم بقدر ، أنا بحب بنتك و بدي اتزوجها ..
خلدون بصدمة : شو ؟
نزلت أثير بسرعة من عالدرج : بابا أنا موافقة !
خلدون : أنتي شو عم تعملي هون ؟ بعدين من ايمتى واقفة هون ؟
أثير : والله من شوي !!
خلدون عم يفكر : كيف بدي طالعها من بيت رجل عصابة و حطها ببيت رجل عصابة ، الفرق إنو علاء أقوى ، لحد هلأ محدا قدر يعلم عليه أو يحاول مجرد محاولة إنو يلوي دراعو ..

وهم الغريب ١٣

بالمقر الساعة ١٠ ..
كلهن موجودين ..
علاء جمع كل الشباب ..
علاء : شباب ، أنا جمعتكن لخبركن بشغلة ضرورية ، و كالعادة لازم نتعاون على حلها ..
سفيان : اتفضل معلم ..
علاء : قررت بطل تدخين ..
مصطفى همس لسيف : معقول ؟
سيف : مو معقول ، بس المعلم ما بيحكي شي و بيتراجع عنو ..
جمال : الله يقويك معلم !
أيمن بمكر : عنجد ؟ والله منيح ..
علاء : و لهيك ، من هون و رايح التدخين ممنوع ، و ما بدي شوف ولا مخلوق منكن ماسك سيجارة ، فهمانين ؟
مصطفى بصدمة : نعم ؟ بس هيك ما بصير معلم !!
علاء : أنا ما بحب كلمتي تنكسر ، و إزا شفت حدا منكن عم يدخن رح أضطر و بالإجبار أطلب سيجارة ، و هيك رح تنكسر كلمتي ، فمشان هيك التدخين ممنوع قطعياً !
الكل ساكتين و مصدومين و عم يتطلعو ببعض ..
علاء : الي عندو اعتراض عهالموضوع يحكي ؟
سيف : معلم أنا ..
قاطعو علاء : يحكي ولا يخاف ، خلينا نفهم منو و نودعو بطريقتنا الخاصة و نبعتو عبيتو مكرسح ..
سيف : .....

الساعة ٢.٣٤ بعد نص الليل ..
عامر لسا ما رجع عالبيت ، و ما الو بالعادة يتأخر ..
علاء : إزا مو بالعيادة ولا عند غياث ، وين راح !
أم علاء : اتصلت برفقاتو لك أمي ؟
علاء : اتصلت ، ياسين قال إنو ما شافو ، و فارس ما رد ..
رن جرس البيت ..
علاء : أهلين شباب ؟
غياث : صار معكن شي ؟
علاء : لا لسا ..
فارس : وين بدو يكون راح ، مرقت أنا و ياسين عالعيادة ما لقيناه ، و اتصلنا بكل رفقاتنا ، ما راح لعند حدا اليوم ..
غياث : سيما قالت إنو من العصر تلفونو مغلق ..
ياسين : إن شا الله خبرتها ؟
غياث : أكيد ما خبرتها ، بس هي حكت معي الساعة ٧ و قالتلي اتطمن عليه ، فقلتلها عيادتو مليانة ..
علاء صارت أفكار أشكال ألوان تمر براسو ، اتزكر كل حدا اشتغل معو بيوم ..
يمكن ما الو أعداء بمجال شغلو إلا رجال الأمن ، بس من ناحية تانية ما فيه يقول عن حدا صديق ..
اعتزر من الموجودين و فات لغرفتو ..
اتصل بأيمن ..
علاء : أيمن ، عامر مختفي من العصر ، و تلفونو مغلق ، جهز كل الشباب و استنفرو بالمنطقة ، ما بدك مين يعلمك شغلك ..
أيمن : حاضر معلم ، أنت شاك بحدا يعني ؟
علاء : لسا ، بس شكلنا رح نعمل فتلة قريبة للكل ..
أيمن : معلم بقلك سفيان بتحب نسأل عنو بالمراكز الأمنية ؟
علاء : لا ، أجل هالقصة لبكرا ..
أيمن بهمس : خود احكي أنت سفيان و ريحني و ريح حالك !
سفيان : لك قلو !
علاء : ضلو اتناقرو متل الضراير ! شبك أنت وياه ولاك !
أيمن : بقلك سفيان ابعتلنا رقم نمرة سيارتو ..
علاء : ....
أيمن : معلم ؟
علاء : خلص ، لا تعملو شي ، خليكن مكانكن ..
طلع علاء يركض و طلعو الشباب وراه ، فتح باب البيت ..
علاء بغضب : وين كنت ؟
عامر فات عالبيت و اتجاهل الكل : كنت عم بتمشى ..
غياث مسكو : كيف يعني تتمشى لهالوقت ؟ بعدين ليش تلفونك مسكر ؟
عامر باستغراب : ليش قديش الساعة ؟
فارس : عامر شبك ، الساعة رح تصير ٣ ..
علاء لف عامر لناحو : شبو جبينك ؟ ليش هيك ورمان ؟ شو صاير معك ، قلي وين كنت ؟
عامر اتطلع بأخوه و ما حكا ..
علاء اتزكر تطليعة سفيان ، عامر عم يتطلع نفس التطليعة ..
علاء بتوتر : كأني عم بحكي معك ..
عامر : اي أخي ؟
أم علاء : أمي حبيبي شو صاير معك ؟
عامر اتطلع بغياث ، ففهم عليه ..
غياث : شباب ، يلا نمشي ، هي اتطمنا عليه ، الوقت متأخر ..
ياسين : اي بدنا نعرف وين كان ..
غياث سحب ياسين : بكرا بتعرف ، خليه يرتاح هلأ ، تعال يلا ..
ياسين : عامر بكرا بنلتقي هه ..
غياث لسا ساحب ياسين : سلام يا جماعة ..
راحو الشباب ..
علاء مسك عامر و صاح فيه : لك انطق ، شو صاير معك ، جيبلك دكتور ؟ ..
عامر : لا مو بحاجة ، كان دايق خلقي شوي ، و رحت لفيت بالسيارة و ما انتبهت للوقت ..
أم علاء : أكلت أمي ؟
عامر : أكلت ..
فات عامر عغرفتو و سكر الباب عحالو ، و سحبتو أفكارو ، و علاء طلع عبيتو ..
مرقت الساعات ، و طلع الضو ، و الساعة صارت ٩ ..
لسا الاتنين صاحيين ، علاء و عامر ، كل واحد عم يفكر بشغلة ..
بييت عامر ..
راح علاء لعندو يتطمن عليه ..
علاء : كيف صرت ؟
عامر : الحمدلله ..
علاء حط إيدو عجبين أخوه : ليش لونك شاحب هيك ؟ شبك ؟ في شي عم يوجعك ؟ اتصل بالدكتور ؟
عامر : اي من هدول ، طالع الشخص الرقيق الي جواك ، ما في غير بشوفك عاقد حواجبك و عم تطلع بالناس كأنك عم تفكر تحرقهن ، و ما بعرف ... بجوز عم تحرقهن عنجد ..
علاء : مانك ناوي تروح عالعيادة يعني ؟
عامر : لا ، راسي عم يوجعني ..
علاء : و هي قعدة ، اليوم بدي ضل قاعدلك ..
عامر قام عغرفتو ، أخد مسكن ، و لما لف بدو يطلع ، لقا علاء مرتكي عالباب ..
علاء : شو قصتك ؟
عامر : أنت شو قصتك علاء ! عم قلك مافي شي و راسي عم يوجعني ..

حط الزلمة المسدس براس خلدون ..
و خلاه يتصل بعلاء ..
علاء : اي خلدون ..
خلدون : علاء ، رح ابعتلك مليونين للشبح ، صفولي راتب مدير مستشفى النجاح ..
علاء : الشبح ما بقا اشتغل ..
خلدون : علاء ! الوضع مو متحمل ، عشوي بنوقع كلنا !
علاء : كيف يعني ؟
خلدون : أخدت أثير و طلعت من الڤيلا ، راتب رح يفضح كلشي ، سلطان كان مخبرو بكل شي ، اتصرف بقا يا علاء ، بعد هيك لو الشبح بدو ينتحر يصطفل ، بس مو يقطعنا بنص الطريق ..
علاء : شو ؟ وينكن هلأ ؟
خلدون : ببعتلك الموقع برسالة ، راتب بيطلع من المستشفى الساعة ٤ ، خلصو عليه بسرعة ، لأنو إن قدر يوصل للأمن الجنائي ، بننتهي كلنا !
علاء : ماشي ماشي ، لا تشيل هم ..
علاء بينو و بين حالو : لازم الشبح يقتل راتب ، و أنا لازم أمن عأثير و أبوها و سفرهن عكندا ، خلدون صار خطر أكتر ما يكون سند ، و لازم غير مكان المقر كمان ، العمى من وين طلعلي راتب هاد هلأ ..
اتصل بالشباب ، و قلن يجهزو كلشي و يستعدو ..
و هو راح ليقابل الشبح ..

عسطح بناية عالية كتير ، ناصب قناصتو ، و قاعد عم يدخن و يستنى ..
طلع راتب من المستشفى ، جهز حالو و استعد ..
عم يركز ..
راتب ؟
لا هاد ابنو
ضل مركز و ناطر ..
لوقت طلع ..
الشبح : و هي آخر ضحية ! ، ٣ ، ٢ ......
ليث : ١ !!!!
و ضرب الشبح عراسو قبل ما يلتفت !
ليث : يا حيلا بالشبح ، هي صدنا أول واحد ..
برن تلفونو ، مكالمة من سراج ..
سراج : سيدي ، خلدون بعد ما اتصل بعلاء اعترف بكلشي ، و ليكنا طالعين عالمقر نلم باقي العصابة ..
ليث : كتير منيح ، خليهن بالمقر ، لسا في حساب بدي صفيه معهن قبل ما طالعهن عالفرع ..
سراج : حاضر ، هي وصلني خبر إنو الكل صارو بالمقر بعد ما اتصل فيهن علاء ، بس علاء لسا ما وصل ..
ليث بمكر : دقايق و بيوصل !

------------
وهم الغريب ١٤

بدقايق ، الأمن حاوط المكان ..
مسك الكل ، بدون ما تطلع طلقة وحدة من مكانها !!
علاء كان منبّه على عصابتو ( ما بتطلع طلقة من مكانها إزا كان الأمن هو الطرف التاني ، و لو اضطريتو تقوصو ، قوصو عالأطراف بحيث محدا يموت !)
الأمن ربطهن كلهن ، و قعدو ينطرو ليث و سفيان و علاء و الشبح !
وصل ليث و اتصل بسراج يجي يستلم الشبح و يزتو جوا مع رفقاتو ..
ليث : سراج ، لا تشيل الكمامة و النظارة من عوجهو ، بدي شيلها بنفسي ..
سراج : حاضر ..
ليث : ربطلي اياه بالواجهة ، و بس يصحى ناديني ..
مرت نص ساعة ..
الشباب جوا عأعصابهن ، و الأمن منتشر بالمنطقة ..
ليث لسا واقف عند سيارتو عم يدخن ..
سراج صرخ من جوا : سيدي ، الشبح صحي ..
مشى بخطوات ثقيلة ، تعبان ..
تعبان تعب جسدي ..
و تعبان تعب نفسي ..
بدو يتحرك ، و ما بدو يتحرك ..
ليث بينو و بين حالو : يا ريتكن هربتو كلكن ، و ما وصلنا لهون ..
فات بلباس الأمن ، مسدسو عخصرو ، و لابس نظارة ، مافي إلا صوت صدى خطواتو ..
ضو الشمس فايت من الباب بقوة ، ملامح وجهو مو ظاهرة منيح ..
الكل عم يتطلع فيه بصدمة ..
رغم التوتر ، عندهن فضول يشوفو هالليث الي وقعهن ..
وضحت ملامحو أكتر ..
الكل انصدم باللي شافو ..
الشبح فتح عيونو عوسعها من صدمتو !!
ليث بمكر : التمت العصابة كلها ، بما فيكن أنا ، بس ضل يوصل المعلم ، ولا شو يا شبح ؟
أيمن : سفيان !!!
ليث : هو بزاتو !!
أيمن : عملتها فينا يا....
ليث بقوة : إزا بسمع نفس واحد ، قاتل صاحبو ، و معي كل الصلاحيات ، بظن إنكن صرتو بتعرفو عقلي كتير منيح !
رمى سيجارتو قريب من الشبح ..
ليث : الحمدلله عالسلامة ..
الشبح : ......
ليث سحب كرسي و قعد قدام الشبح ..
عم يتطلع بالشبح ، بنظرتو المعتادة ، النظرة الي كانت تستفز علاء !
ليث للشبح : شو ؟ ما رح تقلي اكسر عينك ؟؟
ليث حط عرجل عرجل و شعل سيجارة : كل هالحوصة و اللوصة مشانك أنت ، بصراحة كنت زكي كتير ، آخر شي كنت بتوقعو ، يكون الشبح و علاء وجهين لعملة وحدة ! ..
قرب ليث من علاء و شال الكمامة و النظارة عن وجهو ..
ليث باستهزاء : والله يا معلم صدمتني ..
علاء بغضب : رح ادفنك ! رح خليك تدفع ثمن هالنظرة غالي يا سفيان !! رح دفعك حياتك ثمن ضحكك عليي !!
ليث : اي لسا بكير عهالحكي ، بكرا بنشوف مين رح يدفع الثمن ..
اي ؟
من وين بتحب نبلش ؟ من أول يوم مسكتني فيه ؟ عراسي ..
(( ماشي هو و سراج ، راحو عالقبر ليراقبوه ، و لما ما لقو حدا ، قربو من القبر أكتر ..
سراج : معقول ما عرفو إنو دفناه هون ؟
ليث : أكيد عرفو ، بجوز مراقبين المكان ، خلينا نطلع ..
سراج انحنى لعند شاهدة القبر : في آثار خطوات !
ليث لمح عصابة علاء عم تركض نحوهن بسرعة ، و للأسف باب المقبرة من الجهة الي عم يركضو منها ، رح ينمسكو بكل الأحوال ، و إزا عرفو إنهن رجال أمن ، رح ينقتلو !