ام مراد :هادا ليش جايبو معك
مراد :هادا بدو يصير عندو اخ ،مرتي حامل
ام مراد:حاااامل !لحقت بهالسرعة !ولا بدا تثبت رجليا
مراد :هههههه يحرق حريشك من وين بتجيبي هيك حكي ،بدا تعمل تنظيم قاعدة بقلبي كمان ههههههه يعني ما انبسطتي انو رح يصير عندك حفيد
ام مراد :لاااا
مراد :طيب وينو ابي ؟ ما حدا رح ينبسط قد ابي
ام مراد :جوا
فتت خبرتو لابي و باركلي و انبسط كتير و تاني يوم فات لبيتي اول مرة بعد ما تزوجت لانو ما كان يفوت كرمال خاطر امي ،كان جايبلنا هدايا للولد الجديد ،انبسطت مايا فيه و رحبت فيه كتير و بس وصلا خبر لاختي مرام دقتلنا و باركتلنا ،الا امي ما كانت تعترف بحفيدا الجاي على الطريق حتى ولدت مرتي و ما راحت عندا عالمشفى و لا حتى اجت عالبيت ،بعد يومين من ولادتا لمايا لبنتي شام يلي اجت بتشبه امي،دقتلي اختي مرام و باركتلي و فتحتلي موضوع امي
مراد:لك كل ما باخدلا سكبة من اكل مرتي ، بتقلي شيل هالتخابيص من وجهي
مرام:ههههههه و الي بتقلي مقصوفة الرقبة اكلها طيب بس معلش اخي خدلا اياها للبنت تشوفا ،قلبا ناطف عليها
مراد : هي هيك قلتلك ؟خايف اخدا و روح تكبني انا و اياها من البرندا هههههه
مرام:لا هي قلتلي بس ما بتحب تكسر حالا و طالبا ،خليا تطلع منك ،يلا هات احكي مع مرتك
بعد ما سكرنا الخط مع مرام
مراد:لفيلي شام منيح اخدا لامي
مايا :ههههههه فظيعة امك ،خليا للاسبوع الجاي بكون قويت شوي و بروح انا و انت و البنت
مراد:لااااااا دخيلك ،خليكي انت و باخدلا البنت بالاول
لفتلي اياها مايا و اخدتا لعند امي ،فتحلي الباب ابي ،اخدا مني و بلش يلعبا و يدلعها باسم امي مرفت
ابو مراد:مررفت تعي شوفي اديش بتشبهك
ام مراد:ما بدي اشوفا
مراد:طيب انا رايح جيب اكام غرض للبيت ،خلوا عنكن لبين ما ارجع
طلعت من بيت اهلي بس ما طبقت الباب ،رديتو عالاخير و وقفت اتسمع
ام مراد:هات لشوف
ابو مراد:حرام عليكي تكسريلو خاطرو للولد هاي اول ولد الو ،فرحان فيا كتير
ام مراد:كغغغ اكغغغغغغ يييي ما احلاها البسبوسة ،دخيلو يلي بيشبه ستو
بلعت ضحكتي و نزلت و رحت عند مايا و خبرتا بيلي شفتو،صارت تضحك على امي ،رجعت لاخد شام من عندن انا و كرم ،كانت امي تطلع على كرم كأنو ولد جاي من كوكب تاني ،فتت لعندن و شفتا مقعدة شام بحضنا ،اول ما شافتني تلبكت
ام مراد:تعا خدا ،ابوك تركا و راح
مراد :هاتي ....كرم شو اسما اختك
كرم :اثما ثام
مراد:شام مو ثام ،امشي يلا بتكون جاعت ...
اطلعت انا و ماسك شام و عم احكي مع كرم و رجعت على بيتي ،بعد يومين ،رجعت دقتلي مرام و قلتلي خود البنت لامك اشتاقتلا ،رجعت لفيتا و اخدتا ،لبعد شهرين كنت بشغلي وقت رجعت على بيتي و ما شفت لا مايا و لا الاولاد انشغل بالي كتير ،دقتلا فورا بس ما ردت ،رحت عند اهلي ،دقيت الباب فتحلي كرم ، شفتن الاتنين واقفين فوق راسا لشام و عم يشتغلو فيا
ام مراد:الولد هيك لازم يتزنر و ينلف و ادخلي ايديه جوا اللفة و الا بياخدو برد
مايا :يسلم ايديكي مرة عمي انا ما كنت اعرف و هون الطقس بارد كتير ،و عم تنمغص ،شو لازم اعملا انا ؟
ام مراد:شربيا زهورات و بابونج،ربيت مرام و مراد و كانا امي الله يرحما تقلي عليكي بالزهورات للولد الرضيع بيهديه و بنيمو
مايا:ايوا على طول بقلي مراد امي بتعرف كل شي اتصلي و اسأليا اي شي بدك اياه
انتبهت علي مايا انو واقف ورا عم اتفرج علين،كنت مبسوط كتير و متفاجأ بمرتي و جرأتا بأنو تجي لعند امي و بتعرف انو امي ما بتحبا و ما خافت ابدا تقلعا او تجرحا بالحكي
مايا:اهلين مراد ،ولله حقك علي ما قلتلك انو جاي لعند امك بس صارت الشغلة فجأة..
مراد:اي بسيطة ،امي شو طابخة اليوم ؟شكلا مرتي ما لحقت تعمل شي
مايا :ما عملت شي
ام مراد:عاملة فاصوليا
مراد:طيبة بهالبرد
مايا :يلا انا رح فوت سخن ،خدي مرة عمي شام
اعطت مايا شام لامي و فاتت هي و عم تغمزني ،تغدينا عند اهلي و رجعنا عالبيت
مراد :شو خطرلك تروحي لعندا ؟
مايا :لك كنت قاعدة بالبيت ،قام حسيت شام كأنو مصفرة شوي ،قمت بعتلا لامك عالواتس صورتا و سألتا ، توقعت ما ترد علي متل كل مرة و طنشني ، قام قالتلي جيبيا لشوفا ،رجعت قرأت حكيا مرتين و تلاتة حتى تأكدت انو قالتلي جيبيا لشوفا ،قمت فورا اخدتا و بقيت عندا
مراد:حكتك شي ؟
مايا :لا ابدا بس دقتلا خالتك و سألتا مين عندك قالتلا ما عندي حدا ،حسيتا ما بدا تقلا انو انا عندا ،بجوز امك بعدا بتخجل فيني
مراد:لااا ما هيك بس بكون قصدك انو انت ما حدا غريب يعني
مايا :ههههه خلصتك بقا ،انا صرت بعرفا لامك بعدا ما اعترفت فيني