الإستعداد لرمضان (5) 🌙🌸
توبنا امبارح م الذنوب ، هاه باب الجنة منين؟!
التعامل مع الذنب بعد التوبة منه لا يقل اهمية عن التوبة نفسها ، لإن أغلبنا ماعندوش مشكلة ف إنه عايز يتوب ، لا احنا بنتوب وبنرجع ، ودة لاننا بنواجه حبة مشاكل مش هذكرها ، يكفي انكم تتفرجوا ع الفيديو دة بجد مهم اوي اوي ممكن تعملوله تسريع ولو الوقت يعني ضيق اوي تسمعه تلخيصه ف اخر عشر دقايق تقريبا ، بس مهم تسمعوا الفيديو نفسه
https://youtu.be/2_pLwUYsU-0
📌هنذكر بقي خطوات نتبعها عشان ما نرجعش لأي ذنب توبنا منه
1) خليك صبور .. يعني مش اول ما تتوب م الذنب هتمسك المصحف وتعيط وايدك تترعش ، مش مجرد ما تبطل الذنب دة اول ما يتعرض عليك لاول مرة هتبعد عنه تماما وتستغفر وتسافر لبلد تانية ، الموضوع محتاج وقت وخصوصا لو ذنب «طال زمانه» يعني بقاله سنين معاك ف كونك تبطله وتقول لنفسك "لأ" ع حاجة إنت بتقولها عايها "آه" ألف مرة قبل كدة ف طبيعي هيبقي صعب اوي اوي يطلعلك جناحات فور الإقلاع وما تتفتنش فيه تاني ابدا!
2) مافيش ذنب معاه تدريج ، ما اسمهاش اسمع اغنية بدل 10 اسمها راضية بذنب بدل 10 ، الصح إنك ما ترضاش تقف تتحاسب قدام ربنا ع ذنب واحد حتي! .. الطريقة دي فاشلة جدا ولو نجحت فهي غير صحيحة لإننا ما نضمنش هنموت امتي! .. ف الذنوب لازم معاها الوقف تماما
3) احترم ضعفك ، يعني ما تخليش الاغاني عندك ع الفون وتقول مش هسمع ، ما تقعدش ف وسط الحرم الجامعي وتقول مش هبص علي بنت .. «وخُلِق الإنسان ضعيفًا» .. ما تكابرش امسح كل السبل المؤدية للذنب دة ، اتعامل مع الذنب التعامل دة «وانظر إِلَىٰٓ إِلَٰهِكَ ٱلَّذِى ظَلْتَ عَلَيْهِ عَاكِفًا ۖ لَّنُحَرِّقَنَّهُۥ ثُمَّ لَنَنسِفَنَّهُۥ فِى ٱلْيَمِّ نَسْفًا»
(طه - 97) .. الإله الي اتعبد منغير ربنا كان صنم .. سيدنا موسى عليه السلام مش نهي فقط عن عبادته ، ولا رماه ولا كسره .. دة حرقه ورماه ف اليم ، يعني قطع لكل السبل المؤدية للذنب مش بس هبطل اغاني ، دنا همسحها كلها واخرج من كل الجروبات الي بتتنشر فيها ومسح لكل البرامج الي بتعرضها ..
4) اتكلم مع نفسك خمس ثواني قبل الذنب ، وخليك ف صفك .. يعني ما تكونش ف صف نفسك الأمارة بالسوء عشان لما تيجي هي تقولك مبرر للذنب ما تخضعش ليها لا انت لازم تحضرلها رد .. لو الشخص الي ف مناظرة داخل وعارف إن الخِصم بتاعه عنده حق مش هيعرف يقنعه بوجهة نظره .. فإنت مش بس تقنع نفسك انت اصلا مش هتسمحلها تتكلم ولا تعرفك وجهة نظرها ..
وف النهاية .. الجنة سلعة ثمنها غالي أوي ، والنار مش حاجة نستهون بيها .. واستعينوا بالله وربنا مش هيحمل حد فوق طاقته أبدا .. وماتخليش حبك لذنب يفوق حبك لربنا 💙
📌 منقول
وَالَّذِينَ جَاهَدُوا فِينَا 💜🏃
الاستعداد لرمضان (6) 🌙💛
ماخلصش الكلام عن التوبة لسة لا😌
📌لو بعد ما توبت رجعت للذنب تاني ، اعمل ايه؟!
=عندك اختيارين ، يا تتوب وترجع لربنا يا إما بقي ترجع لربنا وتتوب ..
اصل حضرتك وراك ايه؟ .. هي الدنيا كدة ذنوب نبعد عنها ونرجع ونتوب ونرجع تاني ونتوب عاشر
-طب انا كدة مش منافقة؟
لا مش نفاق ، دة ضعف قدام الذنب يلزم حاجات تقويك ، جيش إنت لازم تعمله إعداد عشان تصد اي حاجة ترجعك للذنب دة .. يعني ما يبقاش عندك فراغ ، ما تفتحش لنفسك سكك للذنوب ، ما تسمعش كلام نفسك دايما وخلي رأيك هو الي يمشي
-ما تيجي نِ...
=بس يماما
📌عافر عشان الجنة ، عشان ما تندمش ع ضعفك قدام ذنب/شهوة .. وما تيأسش
ربنا سبحانه وتعالي قال «قابل التوب» ومش «التوبة» ودة جمع ، يعني انت مش هتتوب مرة لا .. دة تكرار للتوبة مرة واتنين وعشرة ، وتاني.. وراك حاجة؟
الإستعداد لرمضان (7) 🌙💙
أول أيام شهر رجب ، الي مالوش صيام ف طلعته ولا ف ربعه الأخير ، الصيام المذكور فيه نفس الي مذكور في ذي القعدة وربيع الأول وهم صيام الأيام القمرية «ثلاثة أيام من كل شهر» وصيام الاثنين والخميس ، لكن إنت لو حابب تصوم اي ايام فيه كإستعداد لصيام رمضان دة عادي لكن ما نخصصش أيام معينة غير الي النبي صلى الله عليه وسلم خصصها ونقول ان لها فضل معين دة غلط
📌رجب شهر حُرم والأشهر الحرم الأربعة هم «ذي القعدة وذي الحجة ومحرم ورجب» ، يفرقوا ايه عن باقي الشهور ؟ ،، دول الحرام فيهم كبير
من حكمة ربنا سبحانه وتعالي قبل موسم طاعة كبير زي رمضان يبقي في شهر حرم عشان نتعود ع ترك الذنوب بحيث بفضي شوية من ثقل القلب م الذنوب ونقدر نعمل طاعات جديدة
استعداد 60 يوم عشان 30 يوم إنت مش هتقدم السبت عشان تلاقي الاحد ، إنت هتقدم السبت والأحد والاثنين وكل الايام عشان تلاقي رمضان ودة فرصة مل تتعوضش محتاج تضيع فيها مش بس 60 يوم طاعة وجهد لا ، إنت محتاج عمرك كله .. اتعاملي مع رمضان علي انه مشروع عمرك وطلعي أحسن ما عندك💛
📌 منقول
وَالَّذِينَ جَاهَدُوا فِينَا 💜🏃
الاستعداد لرمضان (8) 🌙🌸
لو في ذنب مغلبك اوي اوي وحاسس إنك هتيأس منه مش عارف تعمل معاه ايه ، استثمره ..
بمعني ، إن كل مرة هتعمل فيها الذنب دة هتعاقب نفسك ، ومش هتعاقب نفسك ف تعمل 10 ضغط ولا تعمل دايت .. لا إنت هتعمل طاعة ، والطاعة قابلة للزيادة والمضاعفة مع تكرار الذنب
ف نضرب مثال إنك عايز تبطل أغاني ، ف مثلا سمعت أغنية تقوم تصلي ركعتين ، اغنية كمان تصلي ركعتين وتقرا حزب م المصحف ، اغنية كمان تصلي ركعتين وتقرا حزب م المصحف وتنزل تزور مريض او تكلم حد من قرايبك وهكذا
📌وقلل الذنب وكتر عقوبته يعني ما تقولش لما اسمع الـ playlist كلها هتعاقب ، لا دة انت كمان عاقب نفسك لو سمعت كوبليه واحد بإنصات وعجبك! .. وكتر العقاب حوار إني بعد ما اخربها ذنوب استغفر 3 مرات دة مش عقاب إنت محتاج رادِع ليك
وقول لنفسك وشيطانك: مش قد العقوبة؟ خلاص ما تذنبش ما توشناش!!
ترك المعاصي مش بس محتاجة إيمان عالي ، محتاجة شخصية قوية قيادية ، وإنتي قدها ورمضان يستحق نستعدله بشخصية قوية 💙
الاستعداد لرمضان (9) 🌙🌸
هنبدأ نتكلم عن أول ذنب ، أخيراا هنسرد الذنوب 😌
📌ذنب أنا شخصيا عمري ما اتكلمت عنه وماكانش متوقع مني اني ابدا بيه اصلا بس هو الرزق
«قــطـيـعـة الأرحــام» .. هي من أكبر الذنوب لقول النبي ﷺ: «لا يدخل الجنة قاطع رحم» يعني الموضوع مش هزار ومش مكروه او ذنب صغير
قطع الرحم = مفسدة ف الارض .. لا مش من نتايجه الفساد ف الارض بس ، دة ربنا ذكره مع الفساد ف الارض ف القرآن ومش بس مع الفساد ف الارض ، دة مع اللعن!
📌 منقول
وَالَّذِينَ جَاهَدُوا فِينَا 💜🏃
الاستعداد لرمضان (9) 🌙🌸
هنبدأ نتكلم عن أول ذنب ، أخيراا هنسرد الذنوب 😌
📌ذنب أنا شخصيا عمري ما اتكلمت عنه وماكانش متوقع مني اني ابدا بيه اصلا بس هو الرزق
«قــطـيـعـة الأرحــام» .. هي من أكبر الذنوب لقول النبي ﷺ: «لا يدخل الجنة قاطع رحم» يعني الموضوع مش هزار ومش مكروه او ذنب صغير
قطع الرحم = مفسدة ف الارض .. لا مش من نتايجه الفساد ف الارض بس ، دة ربنا ذكره مع الفساد ف الارض ف القرآن ومش بس مع الفساد ف الارض ، دة مع اللعن!
قال على بن الحسين لولده : يا بني لا تصحبن قاطع رحم فإني وجدته ملعوناً في كتاب الله في ثلاثة مواطن . «بينصحه ما تصاحبش قاطع رحم مش بس ما يقطعش»
واثنتان من هذه المواطن الثلاث هي قوله تعالى:
{فَهَلْ عَسَيْتُمْ إِنْ تَوَلَّيْتُمْ أَنْ تُفْسِدُوا فِي الْأَرْضِ وَتُقَطِّعُوا أَرْحَامَكُمْ . أُولَئِكَ الَّذِينَ لَعَنَهُمُ اللَّهُ فَأَصَمَّهُمْ وَأَعْمَى أَبْصَارَهُمْ} (سورة محمد:32-33).
{وَالَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ وَيَقْطَعُونَ مَا أَمَرَ اللَّهُ بِهِ أَنْ يُوصَلَ وَيُفْسِدُونَ فِي الْأَرْضِ أُولَئِكَ لَهُمُ اللَّعْنَةُ وَلَهُمْ سُوءُ الدَّارِ} (الرعد:25).
أما الموطن الثالث فلم نقف عليه صريحا ولعله يقصد قوله تعالى:
{الَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ وَيَقْطَعُونَ مَا أَمَرَ اللَّهُ بِهِ أَنْ يُوصَلَ وَيُفْسِدُونَ فِي الْأَرْضِ أُولَئِكَ هُمُ الْخَاسِرُونَ} (البقرة:27) .
📌الرحم هم أقاربك من ناحية الأب والأم ، وقطع الرحم يشمل الهجر وتفضيل غير الاقارب ع الاقارب في العطية ، وعدم الزيارة بالشكل المسموح وغيرهم
=إنتي ما تعرفيش هم عملوا فيا إيه!!
-مهما عملوا عليكي وصلهم ولو بأي شكل ، يقول النبي ﷺ: «ليس الواصل بالمكافي ولكن الواصل الذي إذا قطعت رحمه وصلها» ،، يعني الانسان ف العادي بيوصل حاجة مقطوعة مش بيوصل حاجة اصلا موصولة ، يعني وصل الارحام ف عمك وخالك الي ما بيسألش عليكي أولي ف عمك وخالك الي معاكم علطول
وعن أبي هريرة رضي الله عنه قال : قال رسول الله صلى الله عليه وسلم : " إن الله تعالى خلق الخلق حتى إذا فرغ منهم قامت الرحم فقالت : هذا مقام العائذ بك من القطيعة : قال نعم أما ترضين أن أصل من وصلك وأقطع من قطعك ؟ قالت : بلى ، قال : فذلك لك " . رواه البخاري.
وما أسوأ حال من يقطعه الله .. ومن قطعه الله فمن ذا الذي يصله؟.
رسالة للآباء والأمهات ، أوصلوا اخواتكم وأقاربكم واصطحبوا اولادكم عشان يتعودوا علي دة ويعرفوا اهاليهم عشان ما نلاقيش (انا قابلت عمي ما عرفنيش) او انا ماعرفش ان ليا عم اسمه كذا .. ترضي اولادك يتفرقوا كدة؟ ، والموضوع لا يحتمل الكرامة واصلها اتكت لي ع السين وانا ماشية او شوفتي بصتلي ازاي! حتي لو روحتله لبيته وقفل الباب ف وشك تحاول تتصل بيه وتصفي حسابك معه
رسالة للأبناء ، مهما كان ابويكم بعيدين عن اهاليهم حاولوا انتوا اوصلوا ، عن طريق النت وضيفوهم ع الفيسبوك والي تعرفوا انهم قرايبكم سارعوا بالكلام معهم والتواصل ولو حتي ب «صباح الخير» ع صورة بغبغان الصبح
قطع الرحم من اسرع واكبر مداخل الشيطان للإنسان وهو يحب دة ويسعي لدة ، لإن قطع الرحم سلسال ذنوب ومعاصي منها ، الغيبة والنميمة والكذب والكلام ف الأعراض والخصام والمشاحنة وعقوق للولدين وغيرهم م المصايب مش بس ذنوب ، ف هو يكفي إبليس بذنب واحد زي «قطيعة الرحم» يسيبك تشتغل لوحدك تعمل كل دول ويشوف غيرك ..
📌ملحوظة: لو امي مش راضية اني اتكلم مع قرايبي فلا يجوز ليها دة وعدم سماع كلامها ليس من العقوق ف اتكلمي معاهم ولو سوشيال فقط ، واذكروا اقاربكم ف الدعاء وابدأوا بيهم لإنهم ليهم الأولوية ف الصدقة يعني لو خالك فقير الاولي تديله هو صدقتك اكتر ما تديه لاي فقير تاني
خلو الاولوية لقرايبكم ف بالكم وقلبكم مش الصحاب
📌منقول
وَالَّذِينَ جَاهَدُوا فِينَا 💜🏃
الاستعداد لرمضان (11) 🌙❤
ومعانا آية جديدة بسورة وحياة جديدة 💪
2)قول الله تعالي «وَنَحنُ أَقرَبُ إِلَيهِ مِن حَبلِ الوَريد» .. نجيب الآية من أولها «وَلَقَد خَلَقنَا الإِنسانَ وَنَعلَمُ ما تُوَسوِسُ بِهِ نَفسُهُ وَنَحنُ أَقرَبُ إِلَيهِ مِن حَبلِ الوَريد» ، الآية في سورة ق (آية 16) ، سورة ق من الحزب المفصل الي هو من اول سورة ق او الحجرات لحد سورة الناس .. وهو اكتر جزئية ف القرآن فيه حديث عن الدار الآخرة ، ف هي السورة الي ورد فيها قول الله تعالي «ما يَلفِظُ مِن قَولٍ إِلّا لَدَيهِ رَقيبٌ عَتيد» ولو كملنا هنلاقي قول الله تعالي «وَجاءَت سَكرَةُ المَوتِ بِالحَقِّ ذلِكَ ما كُنتَ مِنهُ تَحيدُوَنُفِخَ فِي الصّورِ ذلِكَ يَومُ الوَعيدِوَجاءَت كُلُّ نَفسٍ مَعَها سائِقٌ وَشَهيدٌلَقَد كُنتَ في غَفلَةٍ مِن هذا فَكَشَفنا عَنكَ غِطاءَكَ فَبَصَرُكَ اليَومَ حَديدٌ» ، ودول آيات بنسمعهم كتير برضه
📌طيب ايه فايدة إني اتعلم سورة عن الدار الآخرة؟
الدار الآخرة ومن أول لحظات الموت كدة مرورا بيوم القيامة من أكتر الحاجات الي تصحصح القلب كدة وتخليكي تبعدي عن الذنوب ويبقي عندك طاقة لعمل الحسنات ، طول مانتي حاطة الدار الآخرة قدام عينك ف مش هيحصلك «الغفلة» وهي من اول أسباب الذنوب ، انت لو متيقن انك هتتحاسب عن الذنب دة ومتذكرة ومتخيل مشهد حسابك عنه مش هتعمله اكيد .. وهي السورة الي مذكور فيها آية ﴿يَومَ نَقولُ لِجَهَنَّمَ هَلِ امتَلَأتِ وَتَقولُ هَل مِن مَزيدٍ﴾
سورة ق مش مكملة 3 صفحات بـ 45 آية .. آياتها صغيرة ويسيرة ع اللسان سهل جدا تحفظها ووارد تكون حافظها كمان وقيام الليل بيها لو قريتها مرتين معاها سورة من السور القصيرة ف انت مبارك قمت الليل ب 100 قال رسول الله صلى الله عليه وسلم «مَن قامَ بعشرِ آياتٍ لم يُكتَبْ منَ الغافلينَ، ومن قامَ بمائةِ آيةٍ كُتِبَ منَ القانتينَ، ومن قرأ بألفِ آيةٍ كُتِبَ منَ المقنطِرينَ» تخيل تبات ليلتك وانت مش مكتوب من الغافلين باقل من 6 صفحات! ..
وآه هي دي السورة الي اغلب المشايخ يقروها ويعيطوا كتير ويعيطوا الناس معاهم ، هي دي الي المساجد بتترجرج بعياط الناس عند تلاوتها ، هي دي السورة الي مذكور فيها لحظة الموت والنفخ ف الصور ومشهد الحساب والجنة والنار ، سورة تقلب كيان التزامك وقلبك ، اسمعها واقرا تفسيرها وشوف فيديوهات لتدبرها واحفظها عشان تقراها ف قيام الليل بقلبك مش لسة هنبص ع المصحف ،هتفرق .. هتفرق اوي اوي
دة فيديو لمعرفة مقاصد السورة وموضوعاتها
https://youtu.be/q7D2v--VizI
دة تدبرها للشيخ حازم شومان «وقفات معها لكن تدبرها كلها ف سلاسل ع اليوتيوب»
https://youtu.be/hScI9RQEA4w
تفسير سورة ق للقرطبي ..
http://quran.ksu.edu.sa/tafseer/qortobi/sura50-aya1.html
📌 منقول
وَالَّذِينَ جَاهَدُوا فِينَا 💜🏃
الاستعداد لرمضان (12) 🌙💙
الصحة النفسية مطلب شرعي.. دة كان عنوان ملزمة معلمة «العقيدة» ف المعهد وانها مقتبساها من كتاب الداء والدواء ، بعدها الاقي معهد أذن خير حاطين من ضمن استمارة الاوراد التعبدية «سلامة الصدر ، ممارسة الرياضة ،تقليل السكر وغيرهم» وقبلها الاقي فيديوهات لدعاة ع المنبر بيتكلموا عن النفسية وتحسينها
فهمت إن الصحة النفسية والمرض النفسي عشان اعالجهم محتاجة دين مش بس واحدة استشارية اسرية واخدة كورس اونلاين ، ولا اني اعرض مشكلتي ف وسط مجتمع علماني يهدملي ثوابت ديني تحت مسمي العلاج النفسي ، ف نلاقي يوجا وموسيقي احتلوا الطاقم الطبي وبقي في طاقة ايجابية وطاقة سلبية ومصطلحات بعيدة عن الإسلام ف مانلاقيش جملة «ان الاستغفار بيريح» ومعاني زي البركة والرجاء والخوف من الله والتوكل وغيرهم بيروحوا من دماغنا ..
ف كان لازم اتكلم عن دة واخرج من اطار كرهي وبعدي عن الطب النفسي والشخصيات
📌ترك نفسيتك مذلة لأي حد واي سبب ، تعرضك لمصدر للسلبيات بمزاجك ، تركيزك مع الناس الي مضيع نشاطك وطاقتك لا يجوز شرعا لإنه بيأثر علي عباداتك تجاه ربك وتجاه البشر
وع الجانب الآخر: نشرك للسلبيات حتي لو كانت معبرة اوي ونشرك لأي إشاعة تشوفها منغير ما تتبين منها لإثارة الجدل لا يجوز لإنك بتضر اخوانك المسلمين
رغم برودة الحروف الا ان الموضوع بجد شاغلني وحاسة الناس مش واخدة بالها منه ، انا كسارة فعلا بحارب السلبية ومستعدة اخسر ناس من حياتي عشان بس كانوا بيأثروا ع نفسيتي وعملت! ..
طيب نظبط الكلام ف نقاط/ عشان ما نتوهش ..
ايه الي ممكن يأثر ع النفسية سلبا؟
1)السوشيا ميديا
2)سوشيال ميديا تاني عشان الموضوع خطير ، إنت مش محتاج تشوف فيديو الست الي بلعت عيالها ولا اكيد انت مهتم بروتين يومي لانسان تاني معاك ع الكوكب ، ولا نفسك تشتاق لرؤية فلان وهو بيعمل مقلب ف فلان ، ولا عادة صحية إنك تعمل Follow لحد مش ايجابي او شخص مالوش نفس قيمك ومبادءك او شخص مش بيفيدك دينيا ، عشان ما تبقاش انهاردة بتتابع الداعية فلان وبكرة تقول ما الداعية فلان بيعمل لاف ع كومنتات البنات تبقي حلال! .. وتدعك ف مشاكل الي انت متابعه ويحط كلام مالوش معني بس بالفضحي وجنبه وردة دبلانة ف انت قلبك يحزن وتعمل شير ، وتلاقيك شايف هو كل ايه انهاردة والـ outfit بتاعها وهي نازلة وحاجات بتاخد من وقتك وقلبك وانت مش حاسس!
3)الفراغ .. شيطانك مش ملتحي ونفسك مش بجناحات ، طبيعي لما تبقي فاضي مش بتعمل حاجة هتجرجرك للمعصية ، وهتجرجرك لما يفسد قلبك ويدخلك ف حزن ، ونلاقي بقي تفكير بعد الساعة اتناشر الي بقي حاجة مشهورة مع ان الي اعرفه ان بعد الساعة اتناشر دة الثلث الأخير م الليل وبنصلي فيه قيام مش بنحن للإكس .. وطبعا لا ننسي الـ over thinking والكثير من «مانت لو كنت مهتم كنت عرفت» ..
4)دور الضحية ، وهي شخصية شايفة نفسها دايما مفعول به والتماس العذر عندها مافيش ف الاغلب ، هي الي شايفة اهلها مش بيحبوها وصحابها مصاحبينها شفقة وماحدش بيحبها وانهم كلهم اجتمعوا علي تبويظ نفسيتها وانهم بيجتمعوا كل جمعة وتلات ع جروب واتساب اسمه «هنزعل فلانة ازاي» ، الشخصية دي مش بتلقي اللوم علي نفسها ف حاجة فحتي ف الذنوب تلاقي دايما يقولك الشيطان غلبني او صحابي هم الي قالولي ..
5) الكسل ، ماليش نفس اذاكر -مع اني لو استهديت بالله كدة وشديت هذاكر عادي- ف مش هذاكر انهاردة واجي اخر اليوم اعيط ع الوقت الي ضيعته وابقي حزين عشان ما بذاكرش وما بذاكرش عشان حزين ..
6) التسويف ودة غني عن التعريف ، ف لما الاقي اصحابي الي انا وديتهم معهد القرآن ختموا وانا قعدت وقولت هبدا لما اخلص دراسة او ثانوية عامة ، والاقي الكورس الي كان مدته سنتين خلص والي فيه خدوا شهادات وانا اجلته لما افضي
📌القصد إن مش كل اسباب الاكتئاب حاجة حقيقية تؤدي لدة ، ومش بتفه من زعل حد لكن احنا ما شوفناش الابتلاءات الي بجد زي الفقر والمرض والفقد ، ماهي الا ابتلاء بسيط او حاجة لا تذكر كبرناها وفكرنا فيها كتير لحد ما تملكت مننا
ودة من مداخل الشيطان ، الناس فاكرة ان الشيطان بس بتاع تضييع الصلاة او نسيان وردك القرآني .. الشيطان بيلعب ع النفسية برضه عادي ، قال الله تعالي ﴿إِنَّما ذلِكُمُ الشَّيطانُ يُخَوِّفُ أَولِياءَهُ فَلا تَخافوهُم وَخافونِ إِن كُنتُم مُؤمِنينَ﴾ [آل عمران: ١٧٥]
وقال تعالي .. ﴿إِنَّمَا النَّجوى مِنَ الشَّيطانِ لِيَحزُنَ الَّذينَ آمَنوا وَلَيسَ بِضارِّهِم شَيئًا إِلّا بِإِذنِ اللَّهِ وَعَلَى اللَّهِ فَليَتَوَكَّلِ المُؤمِنونَ﴾[المجادلة: ١٠]
ف عادي الشيطان بيحزن ويخوف وبيأثر عليك سلبا
منقول
وَالَّذِينَ جَاهَدُوا فِينَا 💜🏃
الاستعداد لرمضان (14) 🌙💛
فاكرين حادثة الإفك ؟ .. نزل الله عز وجل في سورة النور آيات لتبريء السيدة عائشة رضي الله عنها فقال الله عز وجل ﴿إِنَّ الَّذينَ جاءوا بِالإِفكِ عُصبَةٌ مِنكُم لا تَحسَبوهُ شَرًّا لَكُم بَل هُوَ خَيرٌ لَكُم لِكُلِّ امرِئٍ مِنهُم مَا اكتَسَبَ مِنَ الإِثمِ وَالَّذي تَوَلّى كِبرَهُ مِنهُم لَهُ عَذابٌ عَظيمٌ﴾ [النور: ١١]
دعونا نقف عند قول الله تعالي ونقول حبة كلام كدة «لِكُلِّ امرِئٍ مِنهُم مَا اكتَسَبَ مِنَ الإِثمِ وَالَّذي تَوَلّى كِبرَهُ مِنهُم لَهُ عَذابٌ عَظيمٌ» .. الذنب ليه المذنب بتاعه وهيتحاسب عليه ، طب لو كذا حد شارك المذنب ف الذنب؟ هياخد علي قد مشاركته .. ودي حاجة بيغفل عنها الكثير ،إن الأغنية الي جايبة مليار مشاهدة ع اليوتيوب لو انت واحد منهم ف انت مشارك ف الإثم وهتتحاسب ع قد مشاركتك ، صاحبك بيكذب ف انت بدأت تحوّر معاه ف انت مشارك ف الكذب وبتكذب ، عملت لايك لبوست فيه صور لنساء أو فيديو فيه موسيقي ف تفاعلك رفع البوست وناس شافته ف انت مشارك ف الإثم .. القصد إن مش الممثل ولا المغني بس هو الي مذنب ، ما تتذكرش العاصي وتمط شفايفك وتقول «يلا ربنا يهديهم» وانت وارد جدا تكون مشارك ، تعمل شير لفيديو تمثيلي او اغنية ، تكلم صحابك عن رايك الجامد جدا ف الفيلم كذا ، الآية دي نزلت ف حادثة الإفك ورغم إن الي شعلل الفكرة هو المنافق عبد الله بن أبي بن سلول إلا إن كل واحد خاض في عرض السيدة عائشة بشكل او بآخر هيتحاسب من ربنا حتي في صحابة اتجلدوا في الحادثة دي .. ف ما تشاركش ، ابعد تماما عن المعصية ، ماتخليش حتي عندك صفحة تنزل أخبار الفنانين او تعلن عن افلامهم ، ما تتابعش اي حد علي معصية ، ما تفتحش اي فيديو انت عارف انه فيه موسيقي لا تعمل مشاهدة ولا لايك يرفع الفيديو الي فيه اي حاجة حرام ، مش معني إنك مش الطبّال الي كان ف الاغنية إنك مش هتتحاسب معاهم ، «لِكُلِّ امرِئٍ مِنهُم مَا اكتَسَبَ مِنَ الإِثمِ» هتاخد حساب وعقاب -إن لم تتوب- علي قد الي عملته وإن كانت مشاركتك بسيطة جدا ف تقدر تتحمل عقاب عليها؟
ومن الثمار الي هتجنيها م الامر دة إنك هتقلل انتشار الذنب ، ماهو الـ 100 ألف الي شافو الفيديو لو ماحدش فيهم شافه صاحب الفيديو مش هيعمل فيديوهات تاني ، لو المغني عمل حفلة وماحدش حضر مش هيعمل ، وعارفة إنك لو انتي ماشوفتيش غيرك هيشوف بس مين يعلم؟ مش يمكن ربنا يجعلك دعوة لاصحابك ف الموضوع دة اما يلاقوكي بمجرد ما بتيجي سيرة المسلسلات تعرضي تماما وتقولي «دة حرام» مع تكرار دة يا إما مش هيذكروها امامك تاني يا إما هيعرفوا انك صح ويحاولوا يغيروا وف الحالتين إنتي كسبانة ، وخلي بالك عدم التعاون ع الإثم والعدوان فرض مش تدين يقول الله عز وجل ﴿ ..وَتَعاوَنوا عَلَى البِرِّ وَالتَّقوى وَلا تَعاوَنوا عَلَى الإِثمِ وَالعُدوانِ ..﴾ [المائدة: ٢] ف دة مش اوبشن ف الدين ، دة فرض .. واتعود ع إنكار المنكر ، عارفة والله إن لم تستطع فبقلبك لكن دة اضعف الايمان ، هتفضل طول عمرك ف اضعف الايمان دي ، عمر بن الخطاب كان هيقدر يغير حاجة بإنكاره للمنكر بقلبه ، اعرض عن المنكر تماما ، ما تقعدش ف قعدة ربنا بيتعصي فيها حتي لو قاعد مقموص! .
منقول
وَالَّذِينَ جَاهَدُوا فِينَا 💜🏃
الاستعداد لرمضان (19) 🌙🌵
المسلسلات .. ايه الدليل انها حرام؟
*ماعنديش آية او حديث يقول «المسلسلات حرام» .. لكن عندي دلائل حرمانية حاجات جوة المسلسلات حرام ، يعني راجل ماسك شنطة فيها سجلير ومخدرات وشرايط افلام ومسلسلات يبقي الشنطة دي قطعة من الجنة؟!
ايه الحرام فيها؟
1)إطلاق للبصر يقول الله عز وجل «قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ (30) وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ..» [النور : 30 ، 31] ، وماحدش يقولي نيتي مافيهاش حاجة لإن البنات دلوقتي بقوا يحبوا ممثلين اتراك ما يعرفوش انهم عايشين اساسا! ، بنلاقي خلفية موبايلها صوره ، وعايزة تسمي ابنها اسم هندي ع اسم الممثل الفلاني ، وقايمة الرجال الي بتتابعها أبو لهب ما يقبلهاش ع زوجته! .. وحتي لو مافيش الكلام دة مأمورة بحفظ القلب واطلاق البصر يفسده ، عارفة يعني ايه قاعدة ساعة كاملة «ع الاقل» يوميا بتتفرجي ع رجال!! .. دة غير طبعا المشاهد الي لا يجوز النظر لها ..
2)الموسيقي التصويرية ، والموسيقي حرام حتي لو في سياق الدراما 😁 تفسير ابن كثير للآية دي «وَمِنَ النَّاسِ مَن يَشْتَرِي لَهْوَ الْحَدِيثِ لِيُضِلَّ عَن سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا ۚ أُولَٰئِكَ لَهُمْ عَذَابٌ مُّهِينٌ (لقمان 6)»
http://quran.ksu.edu.sa/tafseer/katheer/sura31-aya6.html
الحلقة الواحدة م المسلسل تعادل ساعة سماع اغاني! عشان البطل يبص للبطلة بحب نحط موسيقي ، واما البطلة تنضرب بالقلم ، وما ننساش الاغنية الي بيغنيها البطل لحبيبته وهي واحشاه
3)عدم إنكار للمنكر ، ف بنلاقي مشاهد كبارية ومشاهد سرقة وخيانة واختلاط ديننا رافضه واحنا المفروض رافضينه لأننا بننتمي للدين دة لكن دة ف المسلسل So what!! بصي البطل بص للبطلة ازاي ف الكبارية لما كانت بتخون جوزها واتبرت من عيالها ، شكله بيحبها نظرته فاضحاه !
4)التمثيل مليان كذب ، يعني لما الشخص يعرف نفسه ف المسلسل بأنا فلان الفلاني «شخصية غيره» يبقي كذب وان راجل يتعامل ع انه عايش ف منطقة ومتجوز واحدة وعايش حياة غير حياته يبقي كذب وحتي لو كلنا عارفين ، وتاني وعاشر سياق الدراما مش سكة سفر فيها رخصة لتحليل الحرام.
5) المسلسلات عموما ف كفة ، والمسلسلات ف رمضان ف كفة تانية خالص خالص .. تخيل ربنا باعتلك 30 رحمة كل يوم ، مضعفلك الحسنات ، مسلسلك الشياطين ، رزقك راحة نفسية وروحانيات مابتحسهاش غير ف رمضان ، وانت بتعمل ايه؟ بيدفع اشتراك شهري لموقع يجيبله المسلسلات بدون توقف! .. ربنا بيهيألك الارض والسماء عشان تعبده عشان يديك حسنات عشان يدخلك جنته وانت بتاكل كنافة قدام الحلقة! انت بتعمل ايه يا كابتن بس!! طيب ربنا مش من حقه ينزل عليك عذابه وانت بتقابله بالمعصية كدة! ومع ذلك يمهله وانت تعصيه! .. قوليلي بس عاملة طاعة ايه كبيرة ربنا قبلها مطمناكي اوي لدرجة انك عايزة تتابعي مسلسل ف رمضان ومش مهتمية للرحمات...
6)إنت صرفت ع الممثل ودفعتله مرتبه بشكل او بآخر بمشاهدتك ، انت بتعينه انه يكمل انت بتاخد معاه الذنب ولو جزء صغير .. وزي ما قال د محمد الغليظ: هو باع دينه وخد فلوس ، انت بيعت دينك وخدت ايه؟!
7) قال الله عز وجل ﴿وَاللَّهُ يُريدُ أَن يَتوبَ عَلَيكُم وَيُريدُ الَّذينَ يَتَّبِعونَ الشَّهَواتِ أَن تَميلوا مَيلًا عَظيمًا﴾ [النساء: ٢٧] ، ربنا بيقولك هو اختارلك الطريق دة ومهدهولك وناس تانية عايزاك تميل وبتشتغل ليل نهار عشان انت تميل ، الباشا فين؟ بيدور ع الريموت ..
اتقوا الله .. هم 30 يوم ب 30 فرصة ، ما تضيعهاش زي ما بتضيع وقتك وعمرك .. والله هتتحسر .. دة ما بيبقاش مسلسل دول 30 ساعة موسيقي وانتهاك لحرمات الله معروضة ع قلبك وانت مش معصوم ومش ملاك وقلبك كدة كدة بيبوظ لوحده ، ساعده والله هتتسأل عنه وعن السبل الي سلكتها لاصلاحه وافساده
والمسلسلات ضافتلك ايه؟ ، حاجة جامدة تستاهل تعصي ربنا عشانها يعني؟ قادر تتحاسب عليها يعني؟
المسلسلات ذنب ، وف رمضان ذنب اكبر يلزمه توبة ووقف تماما ، رمضان يجمعنا هناك ف المسجد ف السجود مش ع ام بي سي مصر
وملحوظة: مسلسلات يوسف الشريف زيها ف حرمانيتها زي اي مسلسل تاني ، المغزي الخطير الي فيها مايعديش كتيب م العتبة ب 2 جنية ونص .. ما تضيعش دينك ووقتك ف رمضان عشان تيجي اول يوم العيد تقول شابوه يوسف الشريف
والبرامج كذلك مافرقش كتير لانها ما بنتجش ف الحرم المكي يعني حتي لو فيها فايدة ف يتخللها معاصي كتير
منقول
وَالَّذِينَ جَاهَدُوا فِينَا 💜🏃
الاستعداد لرمضان (20) 🌙🌸
انهاردة هنتكلم عن ذنب ما بيكونش لوحده ، هو ف حد ذاته ما يبانش انه ذنب لكنه بيؤدي لوقوع ف ذنوب كتير وتقصير ف طاعات كتيرة وكلنا بنقع فيه الا من رحم الله
الباب الموارب .. بمعني اننا عايزين نطيع ربنا وندخل الجنة ، بس مشكلتنا اننا عباداتنا ناقصة «ما بتكلمش عن النقص البشري الطبيعي» اقصد ان ممكن الشخص دة يختار طريق ربنا فعلا لإنه عايز يبقي ملتزم بس ف الاخر يقصر .. يعني تلاقي بنت بعد ما جاهدت نفسها ولبست الحجاب الشرعي زي الخمار مثلا عشان عايزة ترضي ربنا عملت عمل جبار وبطلت البنااطيل بعد سنين وبعدين تلاقيها بتضيق الخمار ، تلبس اكسسوارات زينة حاجات جهادها ف تركها ما ياخدش ربع ساعة لكن هي ساكتة عليه ، وبنت تانية لبست النقاب بعد عناء مع نفسها ف جهادها وعناء ف اقناع اهلها ، بعدها تتساهل في الجوانتي ، تبدأ تبين حواجبها .. بعد ما ربنا هداه وبطل سماع اغاني بقي يروح افراح عادي او يقعد قعدة فيها اغاني بس مش بنفس القدر الي كان بيسمعه زمان ف يحس ان كدة عادي .. والفكرة إننا شايفين الذنب بس هو الي بنبقي بنحبه ومش عارفين نبطله لكن لا في ذنوب كتيرة جدا احنا مالناش فيها شهوة ولا جهاد ، يعني واحد معدي بالعربية عصبك ف شتمته ، بنت بصيتيلها واتريقتي ع لبسها واغتابتيها ع الماشي ، مسلسل لقيت اعلانه ع النت ف دخلت شوفتلك كام حلقة كدة بدون شغف .. حاجات انت لو عايز تبطلها هتبطلها ماعندكش معضلة مع نفسك لكن انت مكمل! .. الحاجات دي جهادها فالغالب بيبقي سهل لن انت ف الاصل بدأت الطريق لربنا بس عمال تحود ، يعني البنت المنتقبة الي بتبين حواجبها او متساهلة فيه هي سهل ما تعملش كدة لانها كدة كدة منتقبة بتحس بضيق ف النفس وبتتعامل معاملة خاصة ف الأماكن العامة كدة كدة الطاعة دي انت دخلتها كملها للاخر وصح بقي ،لإن ربنا مش هيعاملك ع المسمي مش هتنجوا بس لما تتكتبي لابسة الخمار من 7 سنين ولا مبطل اغاني .. في تفاصيل كتيرة انت اهملتها وهتتحاسب عليها .
الباب الموارب دة بيبقي زي خرم ف الشنطة الي بتجمع فيها حسنات عملك .. بتدخل حسنة الطاعة من هنا وتخرج. هناك والخرم دة علي حسب انت سايب كام باب موارب ، مقفل عملك صح ولا سايبه
الباب الموارب بيخليك تهد البيت كله ، ما سمعتش عن المنتقبة الي عايزة تقلع النقاب عشان حاسة انها لابساه غلط؟ ما قولتش لنفسك انا حاسس اني منافق عشان بعمل حسنات بس ببوظها بالمعاصي الي فيها
وحط ف دماغك ان دة شيطان ، الشيطان حرامي عايز يسرق منك اعمالك وحسناتك يطلعك بأكبر خسارة يقدر هو يقنعك بيها ، ومفهمك ان دة ما يضرش! يعني فيها ايه لما البس خاتم ولا احط مانيكير مانا كدة كدة مختمرة ، ولا ايه المشكلة لما اسمع كام اغنية ف فرح مش احسن ما اسمعها كل يوم وكتير! .. وتفضل تتسحب تتسحب لحد ما تلاقي نفسك مضيع حسناتك ، مش حاسس بجمال الطاعة الي انت بتعملها ، يحسسك إنك منافق وانت كله الااا النفاق! اسيب الباب موارب اه ، اسيب الطاعة اه ، لكن احس اني منافق! احنا هنكفر ولا ايه!!
والحل بإذن الله هو .. معرفة الله عز وجل ، ما تتعاملش مع الذنب ع انه ذنب واصل في خلاف بين الفقهاء هنا وانا لسة بجاهد وانه مكروه مش حرام وانه حرام مش كبيرة وايه الحكمة من تحريمه ، ما تركزش مع نفسك وشخصيتك ما تقولش انا ما بحبش دة او انا شخصيتي بتقرب وبتبعد من كذا .. ركز مع الي انت بتعبده ، انت بتعمل الطاعة دي لمين؟ مش لربنا؟ طيب انت عارف ربنا؟ عارفه بجد يعني عارف صفاته واسماءه؟ ، طيب التحريم كان ف حديث للنبي صلى الله عليه وسلم عارف النبي؟ ، مش انت عارف ان كل كلام النبي صلى الله عليه وسلم وحي من الله عز وجل؟ .. انت محتاج تعرف ربنا محتاج تسلم قلبك له وتقول لجوارحك دة ربك الي خلقك ويعلم ايه الي ينفعك ما تتحشريش بقي .. ومش بتكلم ع ايمان ولا احسان وجناحات! دة تعريف الاسلام والله هو الاستسلام لأمر الله .. ف خليك مسلم! عايز تعمل حاجة لربنا اعملها صح ، حقق التارجت بتاعها ، طلع كل الي جواك وطلع احسن ما عندك وجاهد وحاول تاني وعاشر وحاول تحسن ف طاعتك ، قال الله عز وجل ﴿بَلى مَن أَسلَمَ وَجهَهُ لِلَّهِ وَهُوَ مُحسِنٌ فَلَهُ أَجرُهُ عِندَ رَبِّهِ وَلا خَوفٌ عَلَيهِم وَلا هُم يَحزَنونَ﴾ [البقرة: ١١٢] ، اعمل الطاعة عشان ربنا فلما تعرف مين ربنا دة هتحسنها لوحدك
حابب تختم أعمال السنادي بإيه؟ ، هتقول لكام طاعة stay with me
هتقطع علاقتك بكام ذنب؟ ..
لو اختارت تقضيها دلع وتضييع وقت ف شعبان كمان فلا تلومن إلا نفسك .. انهاردة 1 شعبان كمان ربع ساعة هنصوم الايام البيض هتدخل تريح شوية تلاقينا ف رمضان
وف خلال الوقت الي بيجري دة في ناس بتحضر لرمضان وبتستعد عادي
ف القرار قرارك
منقول
وَالَّذِينَ جَاهَدُوا فِينَا 💜🏃
الاستعداد لرمضان (21) 🌙💜
-اعمل ايه مع القرآن؟ اعمل كذا ختمة مع الناس الي بتعمل كدة عشان اجمع حسنات بس كدة هبقي بردد وخلاص وربنا هيحاسبني لو قرات القرآن وماعملتش ييه ، طيب ابدا ف التفسير وافهم القران ؟ بس انا هلحق اقرا تفسير 30 جزء ف رمضان ازاي! .. ولا اراجع القرآن حفظ؟ بحيث يبقي سهل عليا ف التلاوة والصلاة ، بس الحفظ برضه بياخد وقت وانا اصلا مش حافظ عشان اراجع وعايز برضه اخلص 30 جزء هعملها ازاي دي! .. بس انا عرفت اعمل ايه انا هخليني ف التدبر اهو دة الي هينفعني ، طبعا انا كنت فاكر لو بحثت مثلا عن فيديو لتدبر القران الاية تاخدلها خمس دقايق ف 6236 آية يعني احفادي هيخلصوا ال30 جزء من بعدي لسة هحزن لقيت ان الآية الواحدة مع الشيوخ ممكن تدخلها ف ساعة! ..
الجواب بإذن الله ، إن كل حاجة م الحاجات دي ليها اهمية ف الدين وعلاقتك بالقران بتقام ع الأعمدة دي وكلهم مهمين .. الفكرة فكرة إدارة وقت وصدق مع النفس وتعرف انت محتاج ايه بالظبط عشان تعمله
1) خلي ليك ورد قراءة عادي تقرأه بسرعة «مع التجويد» بنية جمع الحسنات ودة الي بيتقري ف المواصلات والطوابير وف كل ناحية ف حياتك من باب جمع الحسنات وتدريب مخك ولسانك ع ان دة سيستم حياتنا
2)اعرف تفسير القرآن لكن مش القرآن كله ف شهر رمضان بس ، ومين قال انك هتبدا تعرف التفسير ف رمضان اصلا! ولا هيخلص ف رمضان .. انت تبدا من دلوقتي من اول شعبان كدة تخصصلك ورد يومي من التفسير حتي ولو ربع ، تبدأ بمعاني الكلمات والكلمات الغريبة وبعدين تفسير مسير جدا لمجمل الآيات ودة بيكون بعد ما بتخلص ختمة المعاني اصلا .. والموضوع مش هيقف عند رمضان دة هيكمل معاك سنين وشهور ، لإن ببساطة لو انت خلصت تفسير القرآن «كما تزعم» قبل اخر رمضان هينزلك كتاب جديد يعني؟ ما هو القرآن برضه يبقي ليه الاستعجال؟
3)لو انت ختمت القرآن حفظا ف راجعه ع مدار الشهرين شعبان ورمضان هيفرق فعلا ف التفسير والتدبر انك تبقي عارف خواتيم الايات وترتيبها ،لو انت لسة بتحفظ ف حدد قدر معين تقف عنده ف الحفظ عند اخر شعبان وانشغل ف رمضان بمراجعة القديم فقط الحفظ الجديد بياخد وقت والامر ينطبق ع الي كان حافظ ونسي واه عادي تكمل حفظ بعد رمضان لإن رمضان دة شهر بعده شهور انت لسة فيها مسلم بفضل الله ف هتكمل مع القرآن عادي
4)التدبر بقي ، التدبر مين قال انه بيتاخد ف شهر؟ ولا ف سنة؟ ولا ف عمرك كله؟ .. هاتلي شيخ مسك القرآن حرف حرف وكلمة كلمة تدبرها من اول الفاتحة للناس؟ دة حتي الصحابة كانوا بيكملوا بعض ف الامر دة .. انت ممكن تقضي عمرك كله بتتدبر سورة واحدة من كتاب الله ولا حرج ، ولإن تدبر القرآن باب واسع جدا ليه دراسات وكتب ودبلومات وعالم تاني ، ف عادي لما تمسك سلسلة ع النت لشيخ ما تسمع تدبره هو ونقله لتدبرات السلف للاية دي وتطبقها ع حالك وحياتك انت .. عادي جدا انك ما تخلصش سورة 10 صفحات طول رمضان كله «مش بقول تكاسل لكن ربنا فتح عليك ف سورة معينة وحاسس انك لسة ما شبعتش منها تنط ع غيرها ليه؟»
📌راعي ان رمضان مش شهر بذر ولا سقيا ، مش شهر ابدا فيه علاقتي مع القران ، رمضان شهر حصاد لعلاقتك القديمة الي بتربيها طول السنة ، لو زرعت حاجة ف رمضان بإخلاص هتحصدها بعد رمضان مش فيه ودة مكسب لكن رمضان نفسه هيقع منك ف لازم تزرعله من قبله عشان تحصد فيه وتكمل زراعة فيه عشان ماتجيش بعده تقعد ، رمضان محطة شحن يزداد فيها العبادات مش شهر ببدأ اقول فيه الشهادتين!
📌صغر ورد التفسير والتدبر ودور علي قلبك ماتدورش ع نهاية السورة ف دة كمان
وطالما ذكرنا القرآن نذكر د أحمد عبد المنعم قناته فيها تفاسير وتدبر لسور كتيرة جدا وبيعرفك ازاي تبني علاقة صحيحة مع القرآن
الاستعداد لرمضان (22) 🌙💙
مهم جدا إنك تعمل خطة وجدول لشعبان ، وتعيش فيه بنفسية رمضان .. مش انت ف رمضان هتقرا قرآن كل يوم؟ طب ما تبدأ من شعبان تختم اعمالك بيها + تتدرب عشان رمضان تبدأ تفتش ع قلبك مش لسة هنجاهد
مش لسة هنتوب ف رمضان ، ما تبدأش قيام ليل من رمضان ، ما تتعرفش ع الصيام أول مرة لرمضان
ربنا قدّرلك إن قبل رمضان شهر زي شعبان فيه:
1)هنصوم كتير ، كتير اوي ، لحديث عائشة رضي الله عنها في الصحيحين قال: "ما رأيت رسول الله صلى الله عليه وسلم استكمل صيام شهر قط إلا رمضان، وما رأيته في شهر أكثر صياماً منه في شعبان" زاد البخاري في رواية: "كان يصوم شعبان كله" ولمسلم في رواية: "كان يصوم شعبان إلا قليلاً" وفي رواية للنسائي: "كان أحب الشهور إليه أن يصومه شعبان كان يصله برمضان".
ادي اول عبادة «مفروضة» في رمضان ربنا مهدهالنا
2) فضل ليلة النصف من شعبان ، وعن أبي موسى رضي الله عنه قال: قال رسول الله صلى الله عليه وسلم: إن الله ليطلع في ليلة النصف من شعبان فيغفر لجميع خلقه، إلا لمشرك أو مشاحن" رواه ابن ماجه، وابن حبان عن معاذ بن جبل رضي الله عنه.
هذا، وقد قال عطاء بن يسار: ما من ليلة بعد ليلة القدر أفضل من ليلة النصف من شعبان، يتنزل الله تبارك وتعالى إلى السماء الدنيا، فيغفر لعباده كلهم، إلا لمشرك أو مشاجر أو قاطع رحم.
الكثير بدأ يستعد لها ويشوف هيختم اعماله السنادي بإيه ، يراجع نفسه ويحاسبها ويبدأ في عمل الخيرات
3)يغفل عنه الناس ، وقد ثبت عن أسامة رضي الله عنه أنه قال لرسول الله صلى الله عليه وسلم: لم أرك تصوم من شهر من الشهور ما تصوم من شعبان، قال: ذاك شهر يغفل الناس عنه بين رجب ورمضان، وهو شهر ترفع فيه الأعمال إلى رب العالمين، فأحب أن يرفع عملي وأنا صائم. رواه النسائي وأحمد، وصححه الأرناؤوط والألباني. .. ف انت بتعمل الطاعة ف وسط ما كتير جدا بيغفل عن فضل الشهر دة اجره اعلا بإذن الله
4)تسمية شهر شعبان باسم «شهر القراء» فهي مقولة لأحد السلف .. رغم ان قراءة القرآن ف شعبان مالهاش فضل معين زي رمضان الا ان فعلا شعبان مهم جدا تبني فيه علاقتك مع القرآن ، حفظ وتلاوة وتفسير وتدبر وكله ، عشان مش لسة ف رمضان هجاهد وامسح المصحف م التراب!
القصد ان شعبان مش شهر اصلص فيه الطاطم ، ولا شهر اخلص فيه المسلسلات الي بتابعها عشان ابدا ف رمضان ع نضاف ، شعبان شهر قنص للفرص ، تختم اعمالك فيه بحاجة عظمة ، ف تخش ع رمضان تعمل عظمة اكبر عشان تبدأ بيها اعمالك ، لو حاطط خطة لرمضان ابداها دلوقتي شوف هتنفع ولالا ، هتقع ولا هتكمل ايه الي محتاج يتعدل ، الحسنة تقول اختي اختي والسيئة تقول اختي اختي الي هتزرعه ف شعبان والله والله ما هتلاقي غيره نحصده ف رمضان ، وخلي بالك الشيطان هيسيبك الشهر دة ف عايز يفنش عمله ع نضافة ، ما تديلوش فرصته اوعي
📌 منقول
وَالَّذِينَ جَاهَدُوا فِينَا 💜🏃
الاستعداد لرمضان (23) 🌙🌵
لا تيأس من إصلاح نفسك، مافيش مشكلة لو هتعمل طاعة واحدة بإخلاص «مع الفرائض» طول رمضان دة .. ماعنديش مانع تقطع ذنوبك كلها واحد يصيب والباقيين تقع فيهم وترجع تعيد توبتك تاني
هو إنت رايح فين؟ مش لربنا؟ مش نيتك رضا ربنا يعني؟ وأي خطوة هتعملها هتبقي بمثابة سِلّمة ف الطريق؟ ، ليه عايزة تجري ليه عايز تبقي بجناجات فجأة!
لو سيبت كل الذنوب وعملت كل الطاعات فعلا وثبت علي دة ف رمضان وبعده هتبقي مغرور ، هتشوفنا ناس عصاه ، مش هتعرف تنكسر بين يدي الله ، مافيش ذنب كاسر عينك مافيش طاعة انت مقصر فيها .. ربنا سبحانه وتعالي قال ﴿قُل يا عِبادِيَ الَّذينَ أَسرَفوا عَلى أَنفُسِهِم لا تَقنَطوا مِن رَحمَةِ اللَّهِ إِنَّ اللَّهَ يَغفِرُ الذُّنوبَ جَميعًا إِنَّهُ هُوَ الغَفورُ الرَّحيمُ﴾ [الزمر: ٥٣] أسرفوا علي أنفسهم بالذنوب وعملوا حاجات حرام كتيير ولازالوا «عبادي»!!! .. ربنا لسة معتبرك عبده ، إنت بقي يائس من ايه؟ .. وبيقولك ما تيأسش من رحمتي وإنه هيغفرلك الذنوب كلها
عارفين .. اليأس الشديد دة من النفس عمره ماهيبقي حاجة حلوة إنك مكسوف من ربنا ف مش عارف تعبده عشان محرج ،، دة شيطان وزي ما قولنا الشيطان عايز يفنش معاك الشهر دة عشان هيسيبك ف اسرع طريق ليه عشان يتطمن ع عدم وجوده معاك هو اللعب ع حالتك انفسية ، يدمرك ، يحسسك إنك وحش اوي اوي وربنا مش هيقبلك
اه ابداي البسي واسع من قبل رمضان وفي رمضان وخلي عندك نية اني هحاول اكمل (يعني ما تجيبيش لبس العيد ضيق) ودي خطوة
اه امسح الاغاني من دلوقتي عشان رمضان واحلف علي نفسك انك مش هتنزلها ع الفون تاني واهي خطوة
واه خش كلمها قولها مش هكلمك ف رمضان عشان حرام وفجأة قولها ايه دة !! ما الحرام ف رمضان حرام برة رمضان وما تتكلموش تاني
ابدأ من دلوقتي وما يهمكش بعد كدة ربنا الي وفقك للطاعة إذا رأي الصدق منك هيحرمك منها ليه؟
بس خد خطوة ، وري ربنا منك خير ، ما تبطليش بناطيل فرمضان بس هيتغسلوا ويتشالوا لليلة العيد ، ما تشيلش الباقي م السجاير ف الدولاب عشان ترجعلها تاني ف العيد ،، ما تبقاش شايف يوم 29 رمضان دة Deadline عشان تتحرر منه ، الحرام ف رمضان حرام براه ، ابدا من رمضان بس ما تنويش انك هترجع ، رجعت؟ توب ف شوال وذي القعدة طلع يجوز علي فكرة 😄
منقول
وَالَّذِينَ جَاهَدُوا فِينَا 💜🏃
الاستعداد لرمضان (24) 🌙🌸
حابة افكرك ف وسط زحمة الحياة والدراسة والشغل الي اقتحموا قعدتنا ف البيت فجأة 😂 ، إن نصرتك لدينك برة بيتك مهمة جدا جدا .. وما بقولش تقولي خطبة للناس أنا بتكلم ع *دينك* يعني التزامك انتي وعلاقتك انتي بربنا ودة مهم جدا لرمضان ، ما تبنيش طول قعدتك ف البيت وتهد الي بنيته بمجرد نزولك ، ومافيش وقت احنا ف شعبان! 🤍
ودة يتم ع كذا خطوة ..
1) حجابك .. عارفة اننا ف زمن وحش وان بيتبص للمنتقبة وان المشاكل بتكتر ، بس حجابك بيحجبك عن الشرور بدرجة اكبر من الي مش محجبة حجاب شرعي .. وكمان احنا بنبقي برة بال8 ساعات برة البيت بحجابنا ،، لو حجابك شرعي هتاخدي الوقت دة كله حسنات! والعكس صحيح ، واتفقنا ان الي بنعمله ف شعبان هو نية لرمضان ف منك وناوية تبدأي تلبسي واسع ف رمضان ابدأي من دلوقتي كنية وعشان كمان رفع الاعمال ، اختميها صح
2) تعظيمك لشعائر الله وللسنة كمان ، يعني اي؟ يعني مافيش صلاة تفوتك برة البيت ودة مافيش فيه نقاش ، يعني الاذان يأذن تردديه.. يعني اذكار الصباح والمساء وذكر الله ع لسانك ، يعني قبل ما انزل من بيتنا اكون قرأت ورد القرآن بتاعي ، يعني هحفظ مع زميلتي قرآن يعني مش هخالط اجنبي عني بدون ضرورة .. وماحدش يقولي ماعندناش وقت الي بتقول كدو بتحضر الشنطة قبلها بيوم وبتصحي بدري عشان تختار درجة الروچ الي لايقة ع الطقم !
3) قلل ناس كتَّر خلوة بالله 💜 .. يعني ايه؟ ، يعني مش لازم طريقي رايح جاي يبقي مع صحابي طب هتقولي اذكارك امتي ، بلاش المواصلات تبقي كلها مع زمايلك ف الغالب دة بيبقي ميعاد ورد القرآن بتاعك ، بلاش بين المحاضرات والدروس نلف مع صحابنا ممكن نقعد ف مكان نذاكر او نصلي نحفظ قران اي حاجة ..
الصحاب جمال وكل حاجة بس قلبك بيحتاج يختلي بربنا سبحانه وتعالي ، انتي محتاجة ف الطريق تكلمي ربنا وتقولي خططك اليومية وتدعيه يوفقك فيها ، محتاجة ف نص اليوم تفصلي خمساية كدة تصلي فيها ع النبي ، محتاجة تتكلمي مع ربنا لحد ما تروحي ف النوم .. صحابك خليهم يوم ويوم تاني تخليه مع نفسك ووالله هتلاقي فرق رهيب في حياتك وانتاجيتك .. ما ينفعش يبقي يومي مليان رغي وضحك صحاب وشرح مدرس ولا دكتور وكلام طول اليوم ع دي وع دي وتيجي اخر التيرم ولا ف الاجازة تقولي لقيت نفسي (فجأة) مش عارفة اصلي! ،، ماهو من نسيانك لقلبك طول الدراسة !
4) زي ما بتقولي لو صاحبتي ماراحتش الجامعة مش هروح ، او عشان لبس المدرسة مش نضيف مش هنزل المدرسة من حقك جدا انك تقولي لو نفسي هزرت مع ولاد مش نازلة ، لو ما ظبطش لبسي مش هنزل ، لو مش هبقي حريصة ع الصلاة مش رايحة ودي اسمها *مُشارطة النفس* ، والله يا نفسي لو ما مش هتستقيمي انهاردة مانتيش نازلة ،، ولما ترجعي يجي دور *محاسبة النفس* هاه اي الاخبار؟ اتظبطي ؟ لو اه تبقي صاحبي وحبيبي وكفاءة 😂 ، لو لا يبقي هتقعدي ع المصحف نص ساعة ، او هتصلي قيام الليلادي او هتسمعي درس علم .. امال انتي فاكرة تأديب النفس بيبقي أزاي؟ اكيد بالطاعة
5) الصيام .. ودة غير اننا ف اكتر شهر كان بيصوم فيه النبي صلى الله عليه وسلم بعد رمضان ، الصيام بيربي ، بيخليك تتكسف تبص علي حرام .. بتتكسفي تلقائي انك تلبسي ضيق وانتي صايمة ، بتلاقي نفسك بتدور ع المصحف عشان تقرا فيه .. الصيام دِرع تحتمي فيه م المعاصي الي بتواجهها يوميا ، لو بتقدر ع الصيام برة البيت صوم لو ما بتقدرش يبقي اليوم الي ما تخرجش فيه تقعد تربي نفسك بالصيام عشان تواجه بقية الاسبوع
حاجات بسيطة تحشريها تحافظي بيها ع دينك برة بيتك .. وخديها هدف: *تيرم بدون تنازلات* 🤍
الاستعداد لرمضان (26) 🌙💜
قبل رمضان وزينته وتماثيله ، فلا يجوز يكون عندك ف البيت تماثيل فخار «زي بتاعة السبوع» لاي كارتون فيه ذوات ارواح العلماء شددوا جدا في تحريمها لانها تشبه جدا الأصنام
نفس الكلام ف الزينة المتعلقة والتابلوهات تدخل تحت بند عدم دخول الملايكة
لكن لو كان مفرش ع الارض او حاجة قماش مهانة ف تجوز ولكن الاولي تركها ، وتاني.. مش معني ان الحاجة لرمضان يبقي حرامها حلال
📌منقول
وَالَّذِينَ جَاهَدُوا فِينَا 💜🏃
الاستعداد لرمضان (29) 🌙❤️
لازم تاخد قرار ، يعني كفاية كدة ع الذنب الي بقاله سنين معاك . يعني تبقي بتهزر وش لو ناوي تكمل صحوبية مع صحابك الي افسدوا عليك دينك او نفسيتك ، لازم تبدأ الحاجة الي بقالك سنين مأجلها لأسباب واهية .. الصفة السيئة الي ف اخلاقك ابدا اتعامل معاها بجدية ووقفها ، هنفضل لحد امتي ف غفلة؟ هنفضل لحد امتي مانعملش اي حاجة غلط ف رمضان بس مانعملش حاجة صح برة رمضان؟
رمضان لو ما اخدتوش "ضربة البدء" هتضيع وقت كبير اوي اوي
محتاجة تقعدي مع نفسك "ودينك وآخرتك يستحق دة" تشوفي ايه الذنوب الي عايزة تبطليها وايه الطاعات الي عايزة تركزي عليها وهكذا ..
الجنة هدف ، ويستحق
الاستعداد لرمضان (30) 🌙🤍
تفتح فيسبوك، هتلاقي صور مرصوصة جنب بعض بالعرض دي استوريهات لبنات كيوت (كانو الاول بميكب ولبس ضيق حاليا اللهم بارك بقوا منتقبات ومختمرات) حاطين عليها اغاني بموسيقى والكلام بيتكتب علي الصورة بدون اي داعي ولا كأن هم الي ملحنينها ، هتفكك منهم تعمل scroll شوية هتلاقي اخبار لأم بلعت عيالها والاب الي ضرب بنته ومسابقة علي شنط واخبار حزينة كتير وقضايا مجتمعية انت لا قاضي ولا محامي عشان تحلها وتبقي مغير ف الحوار دة انت لسة ع الكنبة عادي ، هتلاقي ف وسطهم شخص او حدث بقي "تريند" ف لما تشوف ايه التريند دة تلاقيه واحدة خلعت الحجاب ولا اتنين اتجوزوا او حدث ما يعني ، انت كـ إنت الامر ما هزكش ف حاجة ، لكن الـ 20 بلوجرز وانفلونسرز الي انت متابعهم ازاي يسكتوا! مش لازم يسمعونا رأيهم الي ما يهمناش ف حدث ما يهمناش برضه ، والي ما يعرفش مين دول ، دول بعض الناس الي كل محتواهم ع السوشيال هو انهم يقولوا رأيهم بلسانهم ع تريندات "لإنهم مثقفين جامد" طب رأيهم ما همناش وما اتفرجناش؟ يبدأوا يعملوا مقالب ف صناع عدم المحتوي الي زيهم ف شاااهد رد خالد ع مقلب ليلو اغم عليها م الخضههه🔥،طب مين دول اصلا؟ ، شاهد وهتعرف ما تنحش ..
زهقت منهم هتدخل ع علامة التليفزيون الي بتبقي ف شريط الحالة دي ما هي إلا فيديوهات مطلقة كدة لناس ما تعرفهم يا فيها رقص يا اغاني يا راي ناس على الرقص والاغاني وهكذا ، هتحس بصداع ف ترجع للـ scroll تاني ، هتلاقي صورة من فيلم بقت فجأة "تمب" وبقت تتعمل ميمز (ودة عشان الشعب المصري دمه خفيف ومفرفش) .. وكل واحد وحالته يعني هتلاقيها مع الطلاب بشكل مظبطينها ع حالتهم ، مع الماميز بشكل وهكذا ،، وانت لسة ع الكنبة .. والصورة دي ممكن يكون فيها عُري ، كلام يدخلنا ف شرك اصلا لكن ما دام ف الميم يبقي سووو واات!
تقفل المستنقع الازرق دة تدخل ع الواتساب مش قادر ترد ع حد! ، حد يبعتلك رسالة ف تقفل بسرعة عشان ما ياخدش باله انك اونلاين .. بطارية الفون فضيت اصلها ما بقتش تستحمل اكتر من 10 ساعات تصفح.. ف تقوم بقي تفتكر انك عندك رجل بتمشي عليها .. ايوة هي دي الي انت فاردها ع الكنبة ، تلاقي اهلك ناس كويسين وولاد حلال ، وممكن كمان تفتكر انك مسلم وانك مثلا عايز تقرا قران او تصلي (الصلاة الي انت مأخرها بسبب الفيسبوك) .. ف تبقي الصلاة تقيلة! ، مش حاسس بالقرآن .. و اسمع عن ربنا وما اتاثرش .. كدة؟ طب انا ربنا مش قابلني ومافيش مني فايدة ومش هصلي تاني الا لما اخشع ، شغل يابني التليفزيون ع ما التليفون يشحن ..
ما اتكلمناش عن مربع "كتابة منشور" عشان ماحدش بيجي جنبه الا لو انت صانع عدم المحتوي زي الناس دي .. حاليا انتشرت ظاهرة الشير ، ان البروفايل بتاعك بقي كله شير وهههههه وكدة ، دي مصيبة! معني ان مافيش حاجة ع صفحتك غير مشاركة الحاجات الي ذكرناها فوق دي يبقي انت مابتعملش حاجة ع الفيسبوك! .. ما عندكش نية لدخوله اصلا وتصفحه ، يعني الكام ساعة الي قضيتهم عليه كانوا بلا هدف نهائي غير الفرجة! طيب وامتحان "وعن عمره فيما أفناه" ؟
زي ما قال د محمد الغليظ ع صناع المحتويات الهابطة هو باع دينه وكسب فلوس انت بعت دينك وكسبت ايه؟
مين بيكتأب منغير سبب؟ مين ماعندوش طاقة؟ مين انطفي؟ كل دة بسبب انهاك قلبك وعقلك مع شوية ناس وتريندات واخبار لا تسر وذنوب ومعاصي ووقت مهول ببضيع ع الفيسبوك .. واستفادت ايه
انا نفسي حد يقولي عادة ايجابية الفيسبوك عملهاله ومالقاهاش غير فيه!..
عارفة ان في ناس كويسة ومحتواهم هادف لكن اولا هم ف وسط عك كبير ف كام مرة كنت داخل تجيب فيديو ديني اتصفحتلك كام ساعة! .. وثانيا الفائدة منه غير ملموسة ، مش بنقعد ع الفيس بورقة وقلم ونطلع الفوائد .. وحتي لو فيه فوايد ف ممكن تلاقيها ع مواقع تانية وسد باب المفسدة مقدم شرعا علي جلب المنفعة
وف النهاية ، التصفح مش نية .. اما اشوف في ايه مش نية ، لو مالكش نية او شغل حقيقي او منفعة مالهاش مكان غيره امسحه تماما اسلم لقلبك وروحك انت مش محتاج ابدا ابدا تعرف كمية الاخبار والاحداث دي الي بيروح السوق يتمشي فيه كام ساعة بيرجع تعبان حتي لو ما اشتراش حاجة ، التعرض الدائم للاخبار واحداث ناس ماتعرفش انهم عايشين اصلا بيفسد عليك قلبك..
الاستعداد لرمضان (31) 🌙🤍
ماهو ياقلب اختك ، هي بقت تراكمات عشان انتي ركنتيها!
لازم تنفسي عن نفسك وتفرغي الطاقة السلبية عشان ماتعيطيش لما ما تلاقيش لبن للنيسكافية وتقولي تراكمات!
الموضوع عامل زي الحلة الي بتسوي الاكل بالبخار لولا الخرم الصغير الي فيها كانت انفجرت م الضغط ، نَفِّسي عن نفسك وما تشيليش ف قلبك مش شنطة كروس هو!
وأنوه إن التنفيس عن النفس مش لازم بالحكاوي للبيست فريند، مش لازم ارفع سماعة التليفون اعيط لحد "ماحدش هيستحملني" ودة الطبيعي ودي مش وحشية من الناس ، مش لازم اعصي الله عشان افك
ممكن نستخدم وسيلة تانية المرادي وف كل المرات؟ ، عايزاكي تعلي معايا لفوق ، سيبك من التراب الي فوق النيش اعلي كماان وفكك م السطوح ، اعلي اكتر واكتر بقلبك وعيشي مع الملأ الأعلي 🤍
يعني تستشعري اوي انك لما تذكري ربنا في نفسك هو يذكرك في نفسه ، يعني لما تذكريه ف ملأ يبقي اسمك بيتذكر ف نفس اللحظة ف الملأ الاعلي مش كدة الذكر بجد هيريح قلبك؟، يبقي انا مش هذكر ربنا وارجع اقول الذكر ما ريحنيش ، انتي الي مش قادرة تستشعري اسمك وهو بيذكر هناك
لو انشغلتي بفكرة ان التوبة دي تفرح ربنا ، يا نهار ابيض! انا هفرح ربنا! يبقي عمر ما هتبقي التوبة صعبة واصلي ضعيفة واصلي بنتكس ، اسمها برضي ربي وبفرحه وسأعرف ف الملأ الاعلي!
هتبقي التوبة صعبة وضغط عليكي؟
يعني لما ابقي ف مجلس علم مش هقدر اهزر مع صاحبتي ، ولا استثقل القعدة ، ولا احس اني مش فاهمة فاكتئب ، هششش ربنا يقول عني "أشهدكم يا ملائكتي أني قد غفرت لهم" هو انا اه مش سامعة بس مستشعرة ، وقلبي اتطمن اوي اوي .. الملايكة عرفتني! ، ربنا غفرلي! .. هتحسي بقي ان حلقات العلم الشرعي مملة!
عندي ضغط إني عايزة احفظ القرآن ، عايزة اظبط التجويد ،ومعلمة التجويد مستقصداني + اني مافيش حد من صحابي معايا بروح لوحدي!
ف لما تستشعري إن الملايكة بتسمع تلاوتك وتقرب منك لما تقري ، وان احد الصحابة كان هيشوف ملك بجد من كتر ما بيقرا القران بصوت عالي، يبقي هيهمني البشر ولا الأرض بالي فيها!
ولا الدراسة ولا الكلية .. الي كلنا عارفين انهم مفعصيننا مش بس ضاغطيننا ، بس انتي مجددة النية لله ، انك عايزة تنفعي المسلمين بالعلم دة ، انك تنصري دينك وما نفضلش ف جهل وغيرهم
-الانسة الي ورا سرحانة ف ايه وانا بشرح؟
لا ي دكتور اصلي تخيلتني وانا بسالني ايه الحاجة الايجابية الي عملتها انهاردة ف لقيت ٧ ساعات كلية بالمواصلات 🤍
ماهو انا مش هعرف اقرا قران ولا اصلي بعدد الساعات دي ، لكن بنية خالصة لله يبقي ساعات الكلية كلها ف ميزان حسناتك بإذن الله🤍
وآه بالمناسبة ، استشعرتي قبل كدة يعني ايه ف ميزان حسناتك؟❤️
يعني هتقفي فرحانة قدام الميزان الي طالع نازل وتلاقي حسنة تخليه يطب ف تفرحي بيها ، يعني تصرخي م الفرحة وتقولي ( هاؤُمُ اقرَءوا كِتابِيَه) ، يعني الجنة بإذن الله الي مافيهاش لا ضغط نفسي ، ولا تراكمات ولا سلبية
ف حافظي ع نفسيتك ، انتي لا عندك وقت ولا صحة ولا جهد عشان تحزني وتقاومي الحزن الف مرة ..
ولسة هفضل مقتنعة إن زي ما في حمل كاذب في اكتئاب كاذب
في مشاكل انتي اصلا دخلتي نفسك وانتي مالكيش فيها ، في كثرة تفكير قولنا ان علاجه ذكر الله وما اخدتيش بالاسباب ، في حياااة تانية لقلبك مع الملأ الأعلي انتي لسة ماشاركتيش فيها ، وف الاخر تقولي حزينة ومكتئبة! ماتفكي كدة امال الجنة مخلوقة لمين ، مش عشان نشتغلها؟ طب ما يلا
والزمي الدعااااء
واخيرا ، احنا بشر فينا نقص مستححييل نكمل نقصنا بنقص لازم اللجوء لله الي له الكمال اولا ، وكمان احنا جسدنا هنا ف وسط البشر .. عايزة كمان قلبك يتدعك معاهم؟! نبقي قلبا وقالبا مع البشر كدة! ،دة بقي الي بيعمل التراكمات
ف قلل الناس شوية ، لا تركزي ف تفاصيلهم ولا ف علاقتهم بيكي ، كتري أنس بالله ❤️
منقول
وَالَّذِينَ جَاهَدُوا فِينَا 💜🏃
الاستعداد لرمضان (32) 🌙🤍
هنتكلم النهاردة عن حاسة السمع ، الي لو استخدمناها ف المعصية تفتح علينا ابواب لا حصر لها من المعاصي والذنوب ، ولو استخدمناها ف طاعة الله تفتح علينا باب خيرات وحسنات كبير جدا 🤍
تابعوا..
لما حصلت حادثة القطار انا ماكانش ف بالي غير موضوع ان الناس الي ف القطر الي دائما تلاقيهم بيسمعوا اغاني "سواء الصوت كان عالي او من هزة دماغهم" .. وانا وانت والهاند فري عارفين انها حرام، موتة زي دي تشرف؟ .. يعني لما نبقي عارفين ان من مات علي شيء بعث عليه ، عادي نبعث واحنا بنغني ونسمع اغاني!
وتلاقي عادي مبارزة لله بالمعصية ف تلاقي توكتوك مشغل اغاني مسمعة الشارع كله ولا فرح مصحي المنطقة كلها .. مش من العدل ان ربنا ينزل عليك عقوبته؟ ومع ذلك ربنا رحيم ف انت تكمل؟!
الاغاني حرام وسماعها هيفضل حرام حتي لو حللها كل الشيوخ النبي صلى الله عليه وسلم قال "يستحلون" وصدق الكل الا من رحم ربي بيتحايل عشان يحللها ولو كانت حلال هيستحلوها ليه؟
كفاية سماع اغاني ، الأغنية ٤ دقائق مثلا؟ لو تضمني انك هتعيشي لحد ما تكمليها قشطة اسمعيها ونتوب بعدها جامد اوي!
او اقولك؟ ، لما تتاكدي ان ربنا مش شايفك وسامعك وانتي بتسمعيها اسمعي براحتك ..
بما اننا اتكلمنا عن الاغاني كتير قبل كدة ، ف نتكلم عن سماع القرآن .. ازاي يعدي يوم وانت ما سمعتش آية من كلام ربك؟ ، ف وسط حشرة الاغاني الي ف حياتنا دي ازاي مش ماسك سلاح؟ معاك ايه حاميك م الفتن؟ ، وما بتكلمش عن القراءة او الحفظ ، بتكلم عن السماع بوجه خاص .. من انواع هجر القران هجر سماعه برضه ، ف انت محتاج تسمع القرآن
لازم تحشره ف حياتك زي ما انت حاشر الاغاني او هي محشورة غصب عنك ، يعني وانت بتذاكر وبين المحاضرات وانت رايح تنام وانت بتلبس وانتي بتروقي الشقة وهكذا
وتجربتي الشخصية، سور زي الحجر والقمر وق والقيامة واوائل البقرة مافتكرش اني قعدت احفظهم واردد فيهم ، حفظاهم بس من السماع ، حتي ف مراجعتهم يا بشغل السورة يا بقراها فقط مرة واحدة وبفتكر بفضل الله ، ف سماع القرآن مهم جدا جدا لحفظ القران ، لإن ببساطة ما حدش قعد قرا كلمات اغنية وفضل يرددها ويسمّعها غيبا علي مامته! كله سماع بس ، تلاقي ناس حافظة البومات اغاني حرفيا و الأغنية تشتغل من اي حتة يكملها وحافظ الثواني الي بيسكت فيها المغني كمان!
تعاهد سورة ، تكون لسة مش حافظها اوي او مش مراجعها .. تكون قصيرة شوية يعني اخرك ١٠ صفحات او اقل ، واحشرها ف حياتك اسبوع ، اسمعها آناء الليل وأطراف النهار .. وهتلاقي نفسك حفظتها لوحدك ، وبترددها "مش بتدندن اغاني" ، هتلاقي قلبك منشرح كدة ومبسوط -اصلك ما بتسمعش قصة غدر الصحاب ولا جرح الخيانة والفراق- .. هتلاقي كلام القرآن مُرتب ..وبيوصفك اوي اووي تحس ان اسمك هيتذكر الاية الجاية! ..
يلا هتاخدو سورة ايه 😌🤍
رمضان يستحق ، ورب رمضان يستحق انك تسمعي كلامه🤍
منقول
وَالَّذِينَ جَاهَدُوا فِينَا 💜🏃
الاستعداد لرمضان (33) 🌙🤎
المعيد قالنا مرة ان الدكور قالهم انت المفروض ما تاخدش درجة! إنت لو سلمت المشروع بتاعك ف انت عملت الي عليك ف تاخد صفر! اديك درجات زيادة ليه!
ودة طبيعي ف كليتنا انك تلاقي طالب جايب درجات بالسالب او اننا بنعافر عشان ناخد صفر .. بعيدا عن الضحك بس تخيل لو ربنا سبحانه وتعالي كان بيعاملنا كدة! ..
وعلي فكرة دة منتهي العدل ، مش مظلومين ومش فكرة بس تأدي الي عليك دة انت عليك كمية ديون لربنا مهولة ، الشيخ حازم شومان كان بيقول انت محتاج تسبح ربنا 250 مليون مرة عشان بس تحمد نعمة كرات الدم الحمراء! .. تخيل انك مع كل قفلة عين بتحمد عليها ربنا ، مع كل عملية هضم بتصلي ركعتين شكر ، مع كل نفس بتستغفر!
ودة ايه ، دة انت بتشكر النعمة ، لسة ما عملتش العبادات الي هي اصلا مفروضة عليك الي لما تعملها تاخد صفر!!
دي مهلكة! هنهلك جميعا بلا استثناء .. يبقي ما نستغربش لما الملايكة تقول يوم القيامة سبحانك ما عبدناك حق عبادتك! .. دة ملك من قبل سيدنا ادم اصلا وهو ساجد ولا وهو راكع ، ولسة ماقضاش الي عليه
تيجي تبص للي معاك بتاع 60 سنة او اكتر او اقل ، الكام سنة دول منهم 12 سنة قبل البلوغ و قدهم واكتر نوم!
عارف الي هو واحد بقاله ٣ ايام ما كالش ف ايده زيتونة ومطالب انها تشبعه عشان لسة هيقعد قدهم واكتر ما ياكلش!
الموضوع بجد مرعب ، إن ربنا يكون فقط عادل! او يعاملنا بمعاملة البشر!
بس عشان هو سبحانه إله بحق يكون له كمال الرحمة🤍 ، يديك النعمة ، ويرزقك شكرها فتشكره فيزيدك حسنات ونعم !
يا الله 🤍 ما أعظمك
ف تستشعر اوي اوي اسم الله الرحمن الرحيم، او اسم الله الشكور .. يجزيك بالكثير علي العمل القليل ، إذا نظر لك نظرة رضا فسلام علي الدنيا ومافيها! .. ف تلاقي كلمتان خفيفتان علي اللسان ثقيلتان ف الميزان ، وتلاقي كلمة الحمد لله تملأ الميزان وهكذا
القصد .. ما تعجبش بعملك وبطاعتك ، عملك لو جينا بصيناله مقارنةً هو ف حق مين يبقي انت خسران .. واستشعر نعم ربنا عليك دايما ، النعم لا نحصيها اصلا ف بالتالي مستحيل نشكرها
وابدأ بطاعة الله وربنا هيوفقك للطاعة الي بعدها ومن ثم الجنة بإذن الله ، ف البداية في رمضان مهمة اوي اوي وحط نية بجد نية خالصة لله فقط
وحاجة كمان ، مافيش داعي ابدا ابدا للرياء "يعني اعمل العمل دة عشان يتمدح فيا" ، إنت اصلا لو عبادتك خالصة لله مش مكملة ذرةح قدام نعيم الله ف تخيل بقي الذرة دي كمان فيها نية لغير الله .. الأمر يحتمل كسل ، لا يحتمل مشاكل القلب دي
مش الطاعة دي ف حق *ربنا* ؟ يبقي خلاص اتقنها بقي ❤️
وما بقولش طالما مش هتقن الطاعة يبقي ما اعملهاش ، "اتقوا الله ما استطعتم" يعني م الاخر
هات اخرك عشان ربنا❤️
ما تتردديش ف لبس حجاب/خمار/نقاب عشان ربنا
ما تتردش ف مسح اغاني بتغضب ربنا
ماتكسلش عن الطاعات عموما ، ما تسوفش العبادات ابدا مهما حصل
وِردك اليومي من الطاعات دة سيف علي رقبتك ، ولو مالكش ورد خلي عندك وهكذا
ف احنا عندنا طريقين لجلب الحسنات مافيش تالت ليهم 🤍 ، الاول سهل جدا جدا وهو *طريق العبادات* ودة بقي ربنا سبحانه وتعالي رحيم بينا جدا لأبعد حد يعني الحسنة بعشرة والصلوات تكفر الذنوب الي بين كل فرض والتاني ، والصيام يبعدك عن النار 70 سنة و و و ، ومع ذلك في ناس ما بتمشيش الطريق دة! ليه ؟ لأسباب هنذكرها بعدين 🌸 .. والطريق التاني الي هو *طريق الابتلاءات* يعني ايه الابتلاء يوصلني للجنة مش ربنا لما يبتليني يبقي غضبان عليا؟ ، لالا خالص.. قال رسول الله صلى الله عليه وسلم ((اللَّه عَنْهُمَا عن النَّبيِّ ﷺ قَالَ: مَا يُصِيبُ الْمُسْلِمَ مِنْ نَصَبٍ وَلاَ وَصَبٍ وَلاَ هَمٍّ وَلاَ حَزَن وَلاَ أَذًى وَلاَ غمٍّ، حتَّى الشَّوْكَةُ يُشَاكُها إِلاَّ كفَّر اللَّه بهَا مِنْ خطَايَاه)) متفقٌ عَلَيهِ
يعني اي ابتلاء سواء كان مرض نفسي/عضوي ، فقر ، فقد .. اي حاجة من دي تكفر عنك سيئات وترفعك ف الجنة.. والابتلاءات أجرها مش عادي فعلا لدرجة الناس الي ماكنتش مبتلاه ف الدنيا لما يشوفوا الجزاء ع دة يتمنوا لو كانوا بيتقطعوا حتت كدة عشان ياخدوا الاجر
والحقيقية ان الطريق التاني صعب عشان كدة أجره كبير ، لانه بيحتاج *صبر* ودي حاجة مش سهلة.. هي الطاعة محتاجة صبر وكل حاجة بس مش زي الابتلاء طبعا ..
نختم بحديث النبي صلى الله عليه وسلم الي كان بيقول فيه (والصلاة نور .. والصبر ضياء) واي الفرق بين النور والضياء يعني؟ .. الضياء اتذكر ف القرآن مع الشمس ، الشمس عشان تطلعلنا الضوء دة بتتحرق وبينفجر فيها انفجارات مهولة! بس النتيجة؟ ضيااء 🤍🤍 .. ف انتبذي سواء صبرتي أو لا الابتلاء موجود ف لو صبرتي هتنالي الاجر .. والصبر لازم يكون رفيقك ف الدنيا لأنك محتاجة ضياءة حتي لو كان بيسببلك حرقة 🌸
منقول
وَالَّذِينَ جَاهَدُوا فِينَا 💜🏃
الاستعداد لرمضان (34) 🌙💜
من يأخذ سيف رمضان بحقه؟
مهم جدا ف رمضان إدارة الوقت .. يعني بلاش عشوائية ف التخطيط او العبادة .. ما تحطش نفسك ف موقف انك تصحي م النوم ف رمضان مش عارف هتعمل ايه انهاردة .. خطط من قبلها بيوم بكرة -بمشيئة الله- هيمشي ازاي؟ ، هتك علي أنهي عبادة؟ هركز وانا بقرا ف انهي صلاة ، هحاول اتباكي ف انهي سجدة؟ .. هفطر كام صائم بكرة "إفطار الصائم يشمل اهل البيت والجيران" هعيش مع انهي سورة .. هسمع ايه من الدروس وهكذا
وقبل رمضان بيومين تمسك ورقة الاهداف نفسك تخرج من رمضان معاك اي؟ حابب تعمل فيه ايه تحقق فيه "إنك عبد لله" .. تحط بقي سلامة القلب إنك فعلا ماتشيلش ف قلبك ناحية حد .. ممكن تحط تفسير القرآن هدف "مش تخلصه كله ف رمضان لا تبدأ فيه" ممكن تحط أي عبادة هدف .. حط لنفسك حد أدني من الختمات الي عايز تعملها عشان ما تكسلش ف النص ، حط خطة لاول رمضان ونصه وآخره عشان الفتور الي بيحصل ف النص ..
وننوه علي أمر هام وهو إن العبادة ما بتخلصش ، يعني مش معني اني قرأت الورد او صليت الحد الي حاطاه لنفسي يبقي خلاص نبدأ بقي نتفرج ع المسلسلات او نريح ف نخربها ، خلي رمضانك يتقلب بين طاعات وبعض المباحات لو عملت ذنب تتوب منه ،تخرج من رمضان وإنت متعود ع الطاعة وتبقي سهلة عليك..
حقق التارجت بتاعك وعافر عشان تخرج من رمضان بغير القلب الذي دخلت به ❤️
منقول
وَالَّذِينَ جَاهَدُوا فِينَا 💜🏃
الاستعداد لرمضان (35) 🌙❤️
اخر درس ف السلسلة ، وذلك من فضل الله علينا ، اللهم تقبل وينفع بيكم .. ننزل بكام نقطة نصايح لرمضان؟🌙🤍
١-نظم وقتك ، خطط لبكرة من النهاردة
٢-ما تصحاش ف يوم مش عارف هتعمل ايه انهاردة
٣-خصص يوم او اتنين ف الاسبوع مذاكرة بس مع عبادات بسيطة وباقي الاسبوع دوس ف العبادات
٤-عادي ف رمضان تقع ف ذنب وتتوب منه إنت لسة بشر
٥-انزل كليتك/دروسك بنية لله عز وجل واحتسب الأجر
٦-حط حد أدني لعدد ختمات ناوي تعملها لرمضان "تلاوة فقط"
٧-جنب التلاوة امسك سلسلة لتفسير سورة معينة وتدبرها سواء فيديوهات أو كتب تقراها الي متاح ليك بس رمضان ما تركزش ع القراءة بس ولا ع التدبر بس
٨-راجع بس ع حفظ القرآن ما تحفظش جديد
٩-اقفل النت تماما، خلي بس السوشيال الي عليه دراستك برقم غير رقمك او رقم ماحدش يعرفه اوي
١٠-ما تتابعش مسلسلات، هي حرام في رمضان وغيره ومافيش اي استعداد لتضييع الوقت في الشهر دة
١١-نظم وقتك تاني
١٢-حط نية ف رمضان وهدف ، عايز تخرج من رمضان ايه الزيادة فحياتك؟ ، هتواظب ع ايه
١٣- ارجوكي ما تشتريش لبس العيد لبس يغضب ربنا ، ابدأي السنادي باللبس الواسع
١٤-ما ينفعش انزل استوري فيها اللهم اني نويت الصيام .. النية محلها القلب
١٥-نظم وقتك تالت
١٦-ما تبقاش عَبد لنفسيتك ، ع الاقل الشهر دة .. مش هنقضي رمضان عياط بدون سبب ، رمضان لا يحتمل الصياح
١٧-استغل ان البيئة الي حواليك بتتحسن وافتح المصحف ف المواصلات والبسي واسع وانزلي منغير ميكب ، حافظ علي صلواتك وخاتم التسبيح ما يتقلعش من ايدك .. لعل قلوبنا تهتدي
١٨-انت مش هتضحك علي ربنا ، ما تعملش الصالحات وانت ناوي تخربها بعد رؤية هلال العيد ،الشرع هو هو طول الـ ٣٦٥ يوم ورب الكعبة
١٩-الحرام ف رمضان حرام ف بعده ، الزق الجملة دي ف حياتك كلها
٢٠-مش عيب ابدأ ف رمضان ، العيب اني ارجع بعده
٢١- ماتضيعش وقتك ، ضياع الوقت مهلكة دنيا وآخرة
٢٢-حاول تخشع ، اعمل نفسك بتعيط ف الصلاة
٢٣-ادعي ربنا ، ادعيه بكل حاجة ، ادعيه ف كل وقت
٢٤-اتق الله في صومك ولا تبطله وافتكر إن كل عمل ابن آدم له إلا الصيام ف إنه لله ، ف قدم لربنا حاجة حلوة
٢٥-ما تنساش تشكر ربنا وتحمده علي إنه رزقك رمضان، غيرك ومن سنك تحت التراب الان
٢٦-تشكر ربنا باللسان وبعمل الطاعات
٢٧-نشن علي ليلة القدر ، اعمل ايه؟ قوم كل ليلة -العشر الاواخر وكل ليالي رمضان- بإخلاص وكأنها ليلة القدر وبما إن ليلة القدر بلا شك في رمضان وإنت قمت رمضان كله ف مبروك إنت قمت ليلة القدر
٢٨-ساهم في افطار أهل بيتك ، يعني العصير عليك او المياة بتتملي يوميا منك إنت ،ولو إنتي الي بتطبخي فعلا يبقي جددي نيتك إنتي في عبادة
٢٩-الازواج واهالي البيت ، زوجتك/والدتك مسلمة والله العظيم ونفسها تقيم الليل وتتعبد لله وتصلح قلبها، ف مش لازم يوميا تعزم عائلات وكنافة وقطايف إنت ف شهر رمضان مش شهر العسل ..
٣٠-اتعامل إن رمضان دة اخر رمضان ليك ف حياتك يعني تخيل إنك هتموت بعد رمضان دة علي طول، تحب تفنش عملك بإيه؟
٣١-اخلص نيتك لله .. اعمل العمل صح ،طلع اخرك فيه .. هو دة مشروع تخرجك ،هو دة التارجت بتاعك، وتاني وعاشر ومليون: مش إنت هتعمل العمل دة لربنا؟ خلاص اعمله حلو بقي
٣٢-حافظ علي وقتك عاشر
٣٣-ادعولي بالخير فضلا
٣٤-اقرأوا السلسلة كاملة عشان تراجعوها
٣٥-نتقابل بعد العيد بإذن الله ❤️
منقول
وَالَّذِينَ جَاهَدُوا فِينَا 💜🏃
- *"مسلسلات رمضان."*
بنوته بتسألني هتتفرجي علي اي في رمضان.
قولتلها هقطع فيشه التلفزيون 🤍.
ببساطه جداً ليه. 👀
شهر رمضان شهر واحد بس في السنه.
مبيتكررش تاني غير السنه اللي بعدها.
هتفرج علي مسلسلات واضيعوا من إيدي ليه.
غير كده الشهر ده بيكون مبارك ، وبيعدي بسرعه جداً يعني الواحد مش بيلحق يحس بيه حقيقي ، غير كده هيكون ورانا دروس ومذاكره وكليات يعني وقتنا أصلاً تقريباً كتير منه ضايع ف ليه نضيع الباقي .
رمضان شهر واحد ي نستغله ونكون فيه من الفائزين ي نضيعوا من أيدينا وكده مش هنكون استفدنا حاجه خالص .
طيب هتقوليلي هتفرج بعد الفطار عادي.
هقولك اللي حرام قبل الفطار حرام بعده باردوه. 👀
مستغربه ليه ايوا حراام .
طيب هتقوليلي انا هتفرج علي اتنين او ٣ مسلسلات يعني ٣ ساعات مش هيحصل حاجه 😌.
هقولك الساعات بتجر بعضها والوقت مش هتحسي بيه والاعلانات بتقعد كتيير جدا يعني ممكن المسلسل يعدي ساعتين.
بدل ما تضيعي وقتك علي مسلسلات مش هتستفادي منها اي حاجه استغليه في العباده.
صلي التراويح والقيام.
اقرأي قرآن.
سبحي ربنا .
استغفري 🤍
مش يمكن تتطلعي من الشهر من الفائزين. 🤍
وبعدين متنسيش يجميلتي إننا مأمورين بغض البصر ها .
يعني طول م انتِ بتتفرجي وتقولي الممثل ده مش عارفه اي وده اي بتاخدي ذنوب ها نركز ف النقطه دي 🤍.
سيبك من المسلسلات اللي مش هتفيدك في حاجه.
هي عباره عن ناس خدوا فلوس علشان يشغلوكي ويضيعوا وقتك ف انتِ تعطي ليهم قيمه؟
ركزي علي رمضان الشهر العظيم ده 🥺🤎.
أوعي تضيعه من ايدك!
الوقت اللي بيعدي مننا عمرنا م هنقدر نرجعه تاني!
تخيلي أن ده أخر رمضان ليكي ممكن تضيعه!
بلااش مسلسلات.
قللوا سوشيال ميديا بتضيع الوقت .
وربنا يجعلنا في الشهر ده من الفائزين جميعاً. 🤎
Telegram: @rwayate 💚📚
الكتب والمواضيع والآراء فيها لا تعبر عن رأي الموقع
تنبيه: جميع المحتويات والكتب في هذا الموقع جمعت من القنوات والمجموعات بواسطة بوتات في تطبيق تلغرام (برنامج Telegram) تلقائيا، فإذا شاهدت مادة مخالفة للعرف أو لقوانين النشر وحقوق المؤلفين فالرجاء إرسال المادة عبر هذا الإيميل حتى يحذف فورا:
alkhazanah.com@gmail.com
All contents and books on this website are collected from Telegram channels and groups by bots automatically. if you detect a post that is culturally inappropriate or violates publishing law or copyright, please send the permanent link of the post to the email below so the message will be deleted immediately:
alkhazanah.com@gmail.com