📚قصص||روايات||منوعة📚

الاستعداد لرمضان (1) 🌙

لازم نأصل حاجة كدة إن الاستعداد لرمضان مش بإني أروق الشقة ، ولا إني أصبّع كُفتة واعمل صلصة! .. كل دي حاجات شغلنا نفسنا بيها قبل رمضان وبتبدأ من نص شعبان ولا حاجة .. والصح إن رمضان شهر صيام مش شهر أكل ، شهر عبادة مش شهر مسلسلات وفوانيس ..
📌والاستعداد لرمضان من شهر رجب مش بدري ولا حاجة بالعكس المفروض السنة كلها تبقي استعداد لرمضان أصلا .. طيب اما استعد لرمضان قبلها بشهرين هستفاد ايه؟
1)النفس بتحتاج 21 يوم تقريبا عشان تتعود علي عادة جديدة ، محتاج 21 يوم من المجاهدة عشان تبطل الذنب الفلاني او تعمل طاعة معينة ، لما حضرتك تبدأ تعمل كدة من يوم 1 رمضان هتبدأ تتعود ع الطاعة ف العشرة الاواخر! ، هيحصل حاجة م الاتنين .. يا إما مش هتقدر تجاهد ف تستسلم للامر الواقع هنصوم وهنصلي بس هعمل الذنب بتاعي كذا ف تلاقي ناس بتسأل ما حكم الذنب كذا في رمضان ، يا إما فعلا تنتظم ال30 يوم بالعافية وتيجي ليلة العيد تخربها تماما وترجع لكل حاجة تاني ودة منتشر برضه
لكن لو بدأت من دلوقتي هتاخد وقتك ، هتعرف تقع وتتوب وتكسل ع عبادة وترجع تاني ..

2) رمضان لازم يكون شهر الحصاد ، انا مش هبدأ اصلي ف رمضان لا انا هبدأ من دلوقتي الصلاة بحيث الحق اتعود عليها وتبقي حاجة اساسية ف يومي وابدا اعرف ازاي اخشع ف الصلاة واحاول بحيث ف رمضان مع الجو والروحانيات ابدا اخشع وقلبي يرق .. لكن لما استغل كل الروحانيات دي والرحمات عشان بس انتظم ع الصلاة هخشع امتي؟!

3) من اهم وأول اسباب الثبات بعد رمضان ، الشخص الي مقيد عبادته فقط بشهر رمضان طاقته للعبادة ما بتكملش حتي ليوم العيد! ، لكن لما واحد يعود جوارحه ع الطاعة 90 يوم بيبقي صعب ينفك عنها

منقول
وَالَّذِينَ جَاهَدُوا فِينَا 💜🏃

​

الاستعداد لرمضان (2) 🌙

عشان نستعد لرمضان محتاجين نمشي بمبدأ «التخلية قبل التحلية» يعني ايه؟ .. يعني القلب دة عامل زي كوباية المياة الي مليانة بيبسي وانا عايزة املاها مياة مش هعرف املاها غير اما افضي الي جواها الأول ، إحنا قلوبنا مليانة ذنوب سر وعلانية ومعاصي وفتن غرقانين فيها ، ماينفعش اقول يلا استعداد لرمضان ف يلا قيام وصيام وقرآن وانا لسة عندي ذنوبي واخدة جزء من حياتي ومن يومي ومن قلبي ، ف من اكبر الابواب الي توقعني ف رمضان او بعده هو اني عايز الـ24 ساعة الي حيلتي اتعبد فيهم واعيط واخشع وابقي صايم واصلي قيام واكل واتفرج ع مسلسلات واسمعلي كام اغنية واتكلم ع دى ودة واهتم بالبنت الي مرتبط بيها ، وارجع اقول انا ليه مش ثابت او مش حاسس بالخشوع مانت محمل قلبك فوق طاقته عايز تسبح قدام الفيلم!

ورقة وقلم واكتب انت مش هتدخل معاك رمضان ذنب ايه ، ومش بس رمضان لا خلاص كفاية ع الذنب دة كدة ، بداية من بكرة الذنوب دي تتمحي من حياتي عشان رمضان يجي اقدر يبقي عندي وقت ورصيد إيمان وقدرة اني اتعود ع الطاعة
وافتكري ان انتي عندك قلب واحد قد قبضة اليد و 24 ساعة ف يومك وكام سنة ف عمرك يا هتمليهم طاعة يا هتمليهم معصية ،ف قرري

📌منقول
وَالَّذِينَ جَاهَدُوا فِينَا 💜🏃

الاستعداد لرمضان (3) 🌙💜
اتفقنا قبل كدة إننا عايزين نفضي قلوبنا م الذنوب عشان تبقي جاهزة ومُهيأة للتعود ع الطاعات ..
قبل ما نذكر الذنوب الي عايزين نبطلها عايزة أأصل حاجة مهمة جدا
📌ماتتقنش الذنوب ، ما تخصصلهاش وقت ، ماتحطش الاغاني ف playlist ما تستنيش لما اهلك ينزلوا وتدبري لدة عشان تكلميه ، او عشان تفتح موقع معين .. ما تعمليش خطة ازاي توقعيه ف حبك وتخليه يكلمك ، ما تشتريش لبس مش شرعي وتنزلي وتلفي عشانه ، ما تحملش المسلسل ع اللابتوب بتاعك ولا تعمل اشتراك شهري لموقع بيعرض افلام ومسلسلات .. ما تحنيش لأيام البناطيل وايام ماكنتي بشعرك
اعملوا الذنوب بطريقة مبهدلة ، حاولوا ع قد ما تقدروا تعكروا صفو لذتها بتذكر عقوبتها حتي وانتوا بتعملوها .. خلوها حاجة بتكرهوها وما بتحصلش غير ف لحظة ضعف او نفسك وشيطانك غلبك لكن إنت ما تخططش لدة .. دايما علي جواك ذكر إن دة ذنب وأنه حاجة ربنا ما بيحبهاش وانك ان شاء الله هتبطلها ف اسرع وقت ما تحشرش نفسك ف جدالات ع تحريمها وتتبع الرأي الضعيف عشان هو الي ع هواك ، اعترف إن دة غلط وماتجادلش كتير وانت هتبطل .. وادعي ربنا ما تتكسفش وما تستكبرش حتي وانت مصر ع الذنب ادعيه ينتشلك منه بقدرته ..
ودة عشان احنا ما بنتقنش الطاعات قد ما بنتقن الذنوب! يعني ما تلاقيش شخص بيفضي مواعيده ومشاويره عشان صيام الاثنين والخميس ، مع انه ممكن يفضي نفسه عشان الماتش عادي .. ماتلاقيش بنت -الا من رحم ربي- مستنية امتي الثلث الاخير يجي عشان تصلي قيام الليل وأهلها نايمين ، مع ان ممكن نفس البنت تستناهم يناموا عشان تكلم حبيبها مثلا!
احنا اصلا طاعتنا مبهدلة -غفر الله لنا- صيام 3/4 منه نوم ، وصلاة مش مركزين فيها ، قرآن ومش مديينه حقه ، يعني لو سألت «إيه الطاعة الي إنت متقنها حاليا بقالك مدة طويلة مصر عليها؟» مننا هيلاقي السؤال غريب فعلا رغم إننا بنسمع قصص «يا شيخ بكلم بنت بقالي 5 سنين ، بقالي 20 سنة ما بصليش» !!
📌ودة علاقته بالاستعداد لرمضان إننا عندنا ذنوب معظمينها ومصرين عليها عشان نشيلها الامر هيبقي صعب محتاجين نتهاون فيها ونبطلها وحتي لو رجعنالها نرجعلها واحنا متضايقين مش "خلونا نفرح وننبسط"

📌 منقول
وَالَّذِينَ جَاهَدُوا فِينَا 💜🏃

الاستعداد لرمضان (4) 🌙💙
عايزين نتوب من ذنوب بنعملها ، طيب المفروض نعمل ايه؟ ..
كام خطوة كدة
1-الإقلاع عن المعصية ، هيقف تماما .. الطائرة لما "بتُقلِع" بتاخد مجهود ف الاول بعدين تعلي عن الارض لحد ما تبقي الارض مش ظاهرة أساسا .. افضل بطّل ف الذنب ووقفه وابعد عن كل مسبباته لحد ما يبقي «غريب» بالنسبالك .. "انا اسمع اغاني! ، لا مقدرش أسلم ع راجل ، ما ينفعش البس البنطلون دة ضيق اوي!"

2-الندم علي المعصية .. يعني ما تحنّيش لأيام ما كنتي بتخرجي بشعرك ، ما تقولش «أنا كنت مقطع السمكة وديلها» ، ما تمطش شفايفك كدة وتقول يا سلااام دة الواحد ايام زمان كان بيعمل كذا وكذا .. كذا وكذا دة ذنب يغضب ربنا ، يبقي لما تفتكره تندم عليه مش تشتاقله ، ودي من اهم الحاجات الي ترجعك عن توبتك انك لسة مستحلي الذنب بس لازم ابطله بقي هعمل ايه ، أكره الذنب عشان ما ترجعلوش

3-العزم علي عدم فعلها ، مش اقول «اما اجرب» او «انا عارفة اني هرجع تاني» ، او «هتدرج ف ترك المعصية» .. الفرائض او المحرمات ما ينفعش اتعامل معاها تدريجيا لإن الحرام حرام ولو كان قطمة من ساندويتش!

4-براءة الذمة ودة لو الذنب ف حق البشر ، يعني لو اغتابت مثلا ، يعني لازم يكون الشخص دة مسامحني .. وفي طريقتين لكدة ، إني اكلمه اقوله اني اخطأت ف حقك ف امر ما فسامحني (ودي الأصح) .. او إني لو اتكلمت ع حد قدام ناس اتكلم عنه تاني قدام نفس الناس بس اذكره بالحسن .. وبراءة الذمة تشمل لو سرقت فلوس ف ارجعها لصاحبها وهكذا

📌عدم توافر اي شرط م الشروط دي = التوبة مش صحيحة
هنقف هنا؟ ، يعني خلاص كدة فنش؟ كل ذنب اعمله ابطله اندم عليه انوي ما اعملوش خلاص انا كدة تمام هات يبني الي بعده؟! ..
طبعا لا .. التوبة رفيقك الوحيد لحد الموت ، الكل هيذهب ماعدا هي
وعشان نعرف ازاي نتعامل مع الذنب بعد ما نتوب منه تابعوا الي هينزل بكرة أن شاء الله
📌منقول
وَالَّذِينَ جَاهَدُوا فِينَا 💜🏃

الاستعداد لرمضان (6) 🌙💛

ماخلصش الكلام عن التوبة لسة لا😌
📌لو بعد ما توبت رجعت للذنب تاني ، اعمل ايه؟!
=عندك اختيارين ، يا تتوب وترجع لربنا يا إما بقي ترجع لربنا وتتوب ..
اصل حضرتك وراك ايه؟ .. هي الدنيا كدة ذنوب نبعد عنها ونرجع ونتوب ونرجع تاني ونتوب عاشر
-طب انا كدة مش منافقة؟
لا مش نفاق ، دة ضعف قدام الذنب يلزم حاجات تقويك ، جيش إنت لازم تعمله إعداد عشان تصد اي حاجة ترجعك للذنب دة .. يعني ما يبقاش عندك فراغ ، ما تفتحش لنفسك سكك للذنوب ، ما تسمعش كلام نفسك دايما وخلي رأيك هو الي يمشي
-ما تيجي نِ...
=بس يماما

📌عافر عشان الجنة ، عشان ما تندمش ع ضعفك قدام ذنب/شهوة .. وما تيأسش
ربنا سبحانه وتعالي قال «قابل التوب» ومش «التوبة» ودة جمع ، يعني انت مش هتتوب مرة لا .. دة تكرار للتوبة مرة واتنين وعشرة ، وتاني.. وراك حاجة؟



الإستعداد لرمضان (7) 🌙💙

أول أيام شهر رجب ، الي مالوش صيام ف طلعته ولا ف ربعه الأخير ، الصيام المذكور فيه نفس الي مذكور في ذي القعدة وربيع الأول وهم صيام الأيام القمرية «ثلاثة أيام من كل شهر» وصيام الاثنين والخميس ، لكن إنت لو حابب تصوم اي ايام فيه كإستعداد لصيام رمضان دة عادي لكن ما نخصصش أيام معينة غير الي النبي صلى الله عليه وسلم خصصها ونقول ان لها فضل معين دة غلط

📌رجب شهر حُرم والأشهر الحرم الأربعة هم «ذي القعدة وذي الحجة ومحرم ورجب» ، يفرقوا ايه عن باقي الشهور ؟ ،، دول الحرام فيهم كبير
من حكمة ربنا سبحانه وتعالي قبل موسم طاعة كبير زي رمضان يبقي في شهر حرم عشان نتعود ع ترك الذنوب بحيث بفضي شوية من ثقل القلب م الذنوب ونقدر نعمل طاعات جديدة

استعداد 60 يوم عشان 30 يوم إنت مش هتقدم السبت عشان تلاقي الاحد ، إنت هتقدم السبت والأحد والاثنين وكل الايام عشان تلاقي رمضان ودة فرصة مل تتعوضش محتاج تضيع فيها مش بس 60 يوم طاعة وجهد لا ، إنت محتاج عمرك كله .. اتعاملي مع رمضان علي انه مشروع عمرك وطلعي أحسن ما عندك💛

📌 منقول
وَالَّذِينَ جَاهَدُوا فِينَا 💜🏃

الاستعداد لرمضان (8) 🌙🌸

لو في ذنب مغلبك اوي اوي وحاسس إنك هتيأس منه مش عارف تعمل معاه ايه ، استثمره ..
بمعني ، إن كل مرة هتعمل فيها الذنب دة هتعاقب نفسك ، ومش هتعاقب نفسك ف تعمل 10 ضغط ولا تعمل دايت .. لا إنت هتعمل طاعة ، والطاعة قابلة للزيادة والمضاعفة مع تكرار الذنب
ف نضرب مثال إنك عايز تبطل أغاني ، ف مثلا سمعت أغنية تقوم تصلي ركعتين ، اغنية كمان تصلي ركعتين وتقرا حزب م المصحف ، اغنية كمان تصلي ركعتين وتقرا حزب م المصحف وتنزل تزور مريض او تكلم حد من قرايبك وهكذا
📌وقلل الذنب وكتر عقوبته يعني ما تقولش لما اسمع الـ playlist كلها هتعاقب ، لا دة انت كمان عاقب نفسك لو سمعت كوبليه واحد بإنصات وعجبك! .. وكتر العقاب حوار إني بعد ما اخربها ذنوب استغفر 3 مرات دة مش عقاب إنت محتاج رادِع ليك
وقول لنفسك وشيطانك: مش قد العقوبة؟ خلاص ما تذنبش ما توشناش!!
ترك المعاصي مش بس محتاجة إيمان عالي ، محتاجة شخصية قوية قيادية ، وإنتي قدها ورمضان يستحق نستعدله بشخصية قوية 💙


الاستعداد لرمضان (9) 🌙🌸

هنبدأ نتكلم عن أول ذنب ، أخيراا هنسرد الذنوب 😌
📌ذنب أنا شخصيا عمري ما اتكلمت عنه وماكانش متوقع مني اني ابدا بيه اصلا بس هو الرزق

«قــطـيـعـة الأرحــام» .. هي من أكبر الذنوب لقول النبي ﷺ: «لا يدخل الجنة قاطع رحم» يعني الموضوع مش هزار ومش مكروه او ذنب صغير
قطع الرحم = مفسدة ف الارض .. لا مش من نتايجه الفساد ف الارض بس ، دة ربنا ذكره مع الفساد ف الارض ف القرآن ومش بس مع الفساد ف الارض ، دة مع اللعن!

📌 منقول
وَالَّذِينَ جَاهَدُوا فِينَا 💜🏃

الاستعداد لرمضان (13) 🌙❤
خطوات لتحسين الصحة النفسية

1) الدعاء ،واقصد إدمان الدعاء ، دعاء واحد فعلا المرض النفسي تعبه خلاه مش عارف يعيش ، دعاء واحد زهق من التفكير في كل شيء واتخنق من الصفة دي ، واحد التركيز ف التفاصيل انهكه .. وادعي «اللهم ألهمني رشدي وأعذني من شر نفسي»

2)استعمل دماغك .. بما انك شطور كدة وبتعرف تفكر طب ما تتأمل ف خلق الله ، فكر ف قد ايه ربنا رحيم بيك ، فكر ف الجنة وف يوم القيامة ، فكر ف التزامك وهاتيلنا افكار تبقي مسلم قوي وداعية ماحصلش ، اربطي الاحداث ببعض بس مش عشان تعملي خناقة مع صاحبتك لا عشان تعرف توازن بين دينك ودنياك وتعمل افكار وخطط لحفظ القرآن

3) ماتحتفظش بأي حاجة وحشة علي موبايلك ، يعني الردود الباردة تتمسح تعمل delete للشات دة كله ، لو خبر وحش ماتاخدلوش اسكرين ولا تنشره العالم مش مستني جريدة الأهرام الي جواك .. ما تخليش عندك اي فيديو أو صورة ف الـ Gallery ليها علاقة بالخذلان ولا بالحزن ولا الانتحار ، الكارت الميموري بتاع موبايلك يشبه جدا جدا قلبك ،ف امليه بالحاجات الي نفسك قلبك يتملي بيها

4)في فيتامينات كتير نقصانها بيسبب حزن واكتئاب لتقليل إفراز هرمون معين ، ع حد علمي وتجربتي هو فيتامين د ، ف اخطف رجلك كدة لمعمل التحاليل وروح ع الدكتور يعرفلك النسبة كويسة ولالا مع حبة فيتامينات بجرعة معينة

5)صغر اهدافك عشان لما تحققها تفرح ، ما يبقاش هدفك مذاكرة 20 صفحة فيزيا لا خلي كل صفحة هدف واعمل جنبها ✔ ، الصح دة حقيقي بيغسل من جوة

6)استعيذ بالله من الشيطان الرجيم ، واعرف عدوك واتاكد إنه ليه يد في دة واستعين بالله عليه

7) تابع ناس إيجابية ، ناس ناجحة ف حياتها ، مش هحطلكوا لينكات لناس لا .. اقرا سيرة الصحابة عملا بمقولة «من كان مستنا فليستن بمن قد مات فإن الحي لا تؤمن عليه الفتنة» .. دي حياة خلصت ، ظاهرلك منها الحلو والانجازات الدينية والدنيوية ، قيم ومبادئ لا يشوبها شيء ، لكن متابعة شخص بعينه عايش لو وقع هتقع معاه لو علي هتعلي معاه ، والتقلب معاه ف كل حاجة ف حياته يشتت قلبك

9) الصحبة .. في كتير جدا من الصحاب بيهدوا الواحد ، الصحاب السلبية الي تتصل بصحابها تعيط بدون سبب ، الصحاب بتوع «ما ذاكرتش وما بذاكرش وماليش نفس اذاكر» .. خليك جدع معاهم عادي لكن كل شيء وله حدود ، ما تروحيش الدورس/الجامعة مع يوميا مع صاحبة سلبية هتأثر عليكي ولابد .. وإنت لو الصاحب دة ف انت لازم تعالج الامر دة ، تعالج الإتكاء علي البشر ، تعالج أهمية وجود Best friend وانه يتحشر معايا ف كل حاجة ، حتي لو هو متقبل دة ما تقبلش علي نفسك دة

10) التعرض علي طبيب نفسي مش حاجة عيب ، عادي جدا تحاول لوحدك وماتعرفش ف تتخده سبب مافيهاش مشكلة ، مهما المجتمع رفض ف المجتمع مالوش حق يرفض علاجك ..

11) عشان نكون متفقين ، مهما طلعت نزلت روحت جيت لا سعادة في معصية الله ، ومافيش طاعة بتسبب حزن .. ناسية فرحة ختم القرآن؟ ، طيب الراحة النفسية بتاعة رمضان بعد ما بنعيط ف التراويح؟ ، طيب فرحة التطوع ف عمل خيري .. ماتسمعيش كلام الشيطان الي بيقولك انك عشان ما بتحسش بالطاعة انت منافق ويحزنك .. ما تبقاش بتتنفس اغاني ومقطع ف الصلاة وبتيجي عند السنن وتقول «أصل دي سنة» ، والطاعات ف النازل وتشتكي إنك حزين ، ماهو ربنا الي صنعك صنعك عشان غاية معينة «ليعبدون» بعدك عن الغاية دي فيه ضرر ليك سواء نفسي أو غيره

12) انشغل بيه .. تخيل راجل عنده بستان ، شغلانته الوحيدة هي سقيا الورد ومراقبة نموه ، وهو من الناس الي بتحب الورد ، النفس الي بيتنفسه هو ريحة الورد وتقع عينه دائما الورد ، احكيلي عن نفسيته؟! .. والله المثل الأعلي .. ربنا جميل وأسماءه جميلة ، وصفاته حسنة ، وعباداته مريحة للقلب وإن اتعبت الجسد ، كلامه «القرآن» جميل ويبعث ف القلب الكثير .. لو انشغلت بربنا وبطاعته وكلامك بقي مختلط بالقرآن ، وخلقك وحايتك وروتينك هو روتين النبي صلى الله عليه وسلم ، ولو انشغلت بالدنيا ف انت مجدد نيتك انك عايز بيها رضا ربنا ، المستقبل بالنسبالك هو الآخرة وتخطيطاتك فيها جنة ، قائمة الـ Goals بتاعتك بقت متلونة بلون الدين ، صايم بالنهار بتكلم ربنا ف قيام الليل ، وربنا يكلمك ف القرآن ، تمر ع الآية مرة تقرأها ومرة تظبط تجويدك فيها ومرة تحفظها ومرة تقرا تفسيرها للشيخ كذا ثم كذا ومرة تدبره ، وعشرين مرة تطبقها .. فكيف للحزن أن يسكن قلبك؟! 💙

📌وف النهاية ، قال الله عز وجل ﴿وَأَنَّهُ هُوَ أَضحَكَ وَأَبكى﴾ [النجم: ٤٣] .. سعادتك وحزنك رزق من الله عز وجل كل دي مجرد اسباب تجري في مشيئة الله عز وجل ، ادعي ربنا إنه يرزقك الرزق دة واسعاله زي ما بتسعي لرزق الفلوس ، واعرف ان فيه مكسب وخسارة عادي ، الكلام دة كان لازم يتذكر في خطوات الاستعداد لرمضان عشان انا مش Motivation speaker احفزك قبل الامتحانات ولا قبل دخولك ثانوية عامة ، انت محتاج تعبد ربنا في رمضان بقلب سعيد ، قلب عنده قابلية للوقوع وانه يقوم ت

الاستعداد لرمضان (14) 🌙💛

فاكرين حادثة الإفك ؟ .. نزل الله عز وجل في سورة النور آيات لتبريء السيدة عائشة رضي الله عنها فقال الله عز وجل ﴿إِنَّ الَّذينَ جاءوا بِالإِفكِ عُصبَةٌ مِنكُم لا تَحسَبوهُ شَرًّا لَكُم بَل هُوَ خَيرٌ لَكُم لِكُلِّ امرِئٍ مِنهُم مَا اكتَسَبَ مِنَ الإِثمِ وَالَّذي تَوَلّى كِبرَهُ مِنهُم لَهُ عَذابٌ عَظيمٌ﴾ [النور: ١١]
دعونا نقف عند قول الله تعالي ونقول حبة كلام كدة «لِكُلِّ امرِئٍ مِنهُم مَا اكتَسَبَ مِنَ الإِثمِ وَالَّذي تَوَلّى كِبرَهُ مِنهُم لَهُ عَذابٌ عَظيمٌ» .. الذنب ليه المذنب بتاعه وهيتحاسب عليه ، طب لو كذا حد شارك المذنب ف الذنب؟ هياخد علي قد مشاركته .. ودي حاجة بيغفل عنها الكثير ،إن الأغنية الي جايبة مليار مشاهدة ع اليوتيوب لو انت واحد منهم ف انت مشارك ف الإثم وهتتحاسب ع قد مشاركتك ، صاحبك بيكذب ف انت بدأت تحوّر معاه ف انت مشارك ف الكذب وبتكذب ، عملت لايك لبوست فيه صور لنساء أو فيديو فيه موسيقي ف تفاعلك رفع البوست وناس شافته ف انت مشارك ف الإثم .. القصد إن مش الممثل ولا المغني بس هو الي مذنب ، ما تتذكرش العاصي وتمط شفايفك وتقول «يلا ربنا يهديهم» وانت وارد جدا تكون مشارك ، تعمل شير لفيديو تمثيلي او اغنية ، تكلم صحابك عن رايك الجامد جدا ف الفيلم كذا ، الآية دي نزلت ف حادثة الإفك ورغم إن الي شعلل الفكرة هو المنافق عبد الله بن أبي بن سلول إلا إن كل واحد خاض في عرض السيدة عائشة بشكل او بآخر هيتحاسب من ربنا حتي في صحابة اتجلدوا في الحادثة دي .. ف ما تشاركش ، ابعد تماما عن المعصية ، ماتخليش حتي عندك صفحة تنزل أخبار الفنانين او تعلن عن افلامهم ، ما تتابعش اي حد علي معصية ، ما تفتحش اي فيديو انت عارف انه فيه موسيقي لا تعمل مشاهدة ولا لايك يرفع الفيديو الي فيه اي حاجة حرام ، مش معني إنك مش الطبّال الي كان ف الاغنية إنك مش هتتحاسب معاهم ، «لِكُلِّ امرِئٍ مِنهُم مَا اكتَسَبَ مِنَ الإِثمِ» هتاخد حساب وعقاب -إن لم تتوب- علي قد الي عملته وإن كانت مشاركتك بسيطة جدا ف تقدر تتحمل عقاب عليها؟

ومن الثمار الي هتجنيها م الامر دة إنك هتقلل انتشار الذنب ، ماهو الـ 100 ألف الي شافو الفيديو لو ماحدش فيهم شافه صاحب الفيديو مش هيعمل فيديوهات تاني ، لو المغني عمل حفلة وماحدش حضر مش هيعمل ، وعارفة إنك لو انتي ماشوفتيش غيرك هيشوف بس مين يعلم؟ مش يمكن ربنا يجعلك دعوة لاصحابك ف الموضوع دة اما يلاقوكي بمجرد ما بتيجي سيرة المسلسلات تعرضي تماما وتقولي «دة حرام» مع تكرار دة يا إما مش هيذكروها امامك تاني يا إما هيعرفوا انك صح ويحاولوا يغيروا وف الحالتين إنتي كسبانة ، وخلي بالك عدم التعاون ع الإثم والعدوان فرض مش تدين يقول الله عز وجل ﴿ ..وَتَعاوَنوا عَلَى البِرِّ وَالتَّقوى وَلا تَعاوَنوا عَلَى الإِثمِ وَالعُدوانِ ..﴾ [المائدة: ٢] ف دة مش اوبشن ف الدين ، دة فرض .. واتعود ع إنكار المنكر ، عارفة والله إن لم تستطع فبقلبك لكن دة اضعف الايمان ، هتفضل طول عمرك ف اضعف الايمان دي ، عمر بن الخطاب كان هيقدر يغير حاجة بإنكاره للمنكر بقلبه ، اعرض عن المنكر تماما ، ما تقعدش ف قعدة ربنا بيتعصي فيها حتي لو قاعد مقموص! .

منقول
وَالَّذِينَ جَاهَدُوا فِينَا 💜🏃

الاستعداد لرمضان (20) 🌙🌸

انهاردة هنتكلم عن ذنب ما بيكونش لوحده ، هو ف حد ذاته ما يبانش انه ذنب لكنه بيؤدي لوقوع ف ذنوب كتير وتقصير ف طاعات كتيرة وكلنا بنقع فيه الا من رحم الله
الباب الموارب .. بمعني اننا عايزين نطيع ربنا وندخل الجنة ، بس مشكلتنا اننا عباداتنا ناقصة «ما بتكلمش عن النقص البشري الطبيعي» اقصد ان ممكن الشخص دة يختار طريق ربنا فعلا لإنه عايز يبقي ملتزم بس ف الاخر يقصر .. يعني تلاقي بنت بعد ما جاهدت نفسها ولبست الحجاب الشرعي زي الخمار مثلا عشان عايزة ترضي ربنا عملت عمل جبار وبطلت البنااطيل بعد سنين وبعدين تلاقيها بتضيق الخمار ، تلبس اكسسوارات زينة حاجات جهادها ف تركها ما ياخدش ربع ساعة لكن هي ساكتة عليه ، وبنت تانية لبست النقاب بعد عناء مع نفسها ف جهادها وعناء ف اقناع اهلها ، بعدها تتساهل في الجوانتي ، تبدأ تبين حواجبها .. بعد ما ربنا هداه وبطل سماع اغاني بقي يروح افراح عادي او يقعد قعدة فيها اغاني بس مش بنفس القدر الي كان بيسمعه زمان ف يحس ان كدة عادي .. والفكرة إننا شايفين الذنب بس هو الي بنبقي بنحبه ومش عارفين نبطله لكن لا في ذنوب كتيرة جدا احنا مالناش فيها شهوة ولا جهاد ، يعني واحد معدي بالعربية عصبك ف شتمته ، بنت بصيتيلها واتريقتي ع لبسها واغتابتيها ع الماشي ، مسلسل لقيت اعلانه ع النت ف دخلت شوفتلك كام حلقة كدة بدون شغف .. حاجات انت لو عايز تبطلها هتبطلها ماعندكش معضلة مع نفسك لكن انت مكمل! .. الحاجات دي جهادها فالغالب بيبقي سهل لن انت ف الاصل بدأت الطريق لربنا بس عمال تحود ، يعني البنت المنتقبة الي بتبين حواجبها او متساهلة فيه هي سهل ما تعملش كدة لانها كدة كدة منتقبة بتحس بضيق ف النفس وبتتعامل معاملة خاصة ف الأماكن العامة كدة كدة الطاعة دي انت دخلتها كملها للاخر وصح بقي ،لإن ربنا مش هيعاملك ع المسمي مش هتنجوا بس لما تتكتبي لابسة الخمار من 7 سنين ولا مبطل اغاني .. في تفاصيل كتيرة انت اهملتها وهتتحاسب عليها .
الباب الموارب دة بيبقي زي خرم ف الشنطة الي بتجمع فيها حسنات عملك .. بتدخل حسنة الطاعة من هنا وتخرج. هناك والخرم دة علي حسب انت سايب كام باب موارب ، مقفل عملك صح ولا سايبه
الباب الموارب بيخليك تهد البيت كله ، ما سمعتش عن المنتقبة الي عايزة تقلع النقاب عشان حاسة انها لابساه غلط؟ ما قولتش لنفسك انا حاسس اني منافق عشان بعمل حسنات بس ببوظها بالمعاصي الي فيها
وحط ف دماغك ان دة شيطان ، الشيطان حرامي عايز يسرق منك اعمالك وحسناتك يطلعك بأكبر خسارة يقدر هو يقنعك بيها ، ومفهمك ان دة ما يضرش! يعني فيها ايه لما البس خاتم ولا احط مانيكير مانا كدة كدة مختمرة ، ولا ايه المشكلة لما اسمع كام اغنية ف فرح مش احسن ما اسمعها كل يوم وكتير! .. وتفضل تتسحب تتسحب لحد ما تلاقي نفسك مضيع حسناتك ، مش حاسس بجمال الطاعة الي انت بتعملها ، يحسسك إنك منافق وانت كله الااا النفاق! اسيب الباب موارب اه ، اسيب الطاعة اه ، لكن احس اني منافق! احنا هنكفر ولا ايه!!

والحل بإذن الله هو .. معرفة الله عز وجل ، ما تتعاملش مع الذنب ع انه ذنب واصل في خلاف بين الفقهاء هنا وانا لسة بجاهد وانه مكروه مش حرام وانه حرام مش كبيرة وايه الحكمة من تحريمه ، ما تركزش مع نفسك وشخصيتك ما تقولش انا ما بحبش دة او انا شخصيتي بتقرب وبتبعد من كذا .. ركز مع الي انت بتعبده ، انت بتعمل الطاعة دي لمين؟ مش لربنا؟ طيب انت عارف ربنا؟ عارفه بجد يعني عارف صفاته واسماءه؟ ، طيب التحريم كان ف حديث للنبي صلى الله عليه وسلم عارف النبي؟ ، مش انت عارف ان كل كلام النبي صلى الله عليه وسلم وحي من الله عز وجل؟ .. انت محتاج تعرف ربنا محتاج تسلم قلبك له وتقول لجوارحك دة ربك الي خلقك ويعلم ايه الي ينفعك ما تتحشريش بقي .. ومش بتكلم ع ايمان ولا احسان وجناحات! دة تعريف الاسلام والله هو الاستسلام لأمر الله .. ف خليك مسلم! عايز تعمل حاجة لربنا اعملها صح ، حقق التارجت بتاعها ، طلع كل الي جواك وطلع احسن ما عندك وجاهد وحاول تاني وعاشر وحاول تحسن ف طاعتك ، قال الله عز وجل ﴿بَلى مَن أَسلَمَ وَجهَهُ لِلَّهِ وَهُوَ مُحسِنٌ فَلَهُ أَجرُهُ عِندَ رَبِّهِ وَلا خَوفٌ عَلَيهِم وَلا هُم يَحزَنونَ﴾ [البقرة: ١١٢] ، اعمل الطاعة عشان ربنا فلما تعرف مين ربنا دة هتحسنها لوحدك

حابب تختم أعمال السنادي بإيه؟ ، هتقول لكام طاعة stay with me
هتقطع علاقتك بكام ذنب؟ ..
لو اختارت تقضيها دلع وتضييع وقت ف شعبان كمان فلا تلومن إلا نفسك .. انهاردة 1 شعبان كمان ربع ساعة هنصوم الايام البيض هتدخل تريح شوية تلاقينا ف رمضان
وف خلال الوقت الي بيجري دة في ناس بتحضر لرمضان وبتستعد عادي
ف القرار قرارك
منقول
وَالَّذِينَ جَاهَدُوا فِينَا 💜🏃

الاستعداد لرمضان (29) 🌙❤️

لازم تاخد قرار ، يعني كفاية كدة ع الذنب الي بقاله سنين معاك . يعني تبقي بتهزر وش لو ناوي تكمل صحوبية مع صحابك الي افسدوا عليك دينك او نفسيتك ، لازم تبدأ الحاجة الي بقالك سنين مأجلها لأسباب واهية .. الصفة السيئة الي ف اخلاقك ابدا اتعامل معاها بجدية ووقفها ، هنفضل لحد امتي ف غفلة؟ هنفضل لحد امتي مانعملش اي حاجة غلط ف رمضان بس مانعملش حاجة صح برة رمضان؟
رمضان لو ما اخدتوش "ضربة البدء" هتضيع وقت كبير اوي اوي

محتاجة تقعدي مع نفسك "ودينك وآخرتك يستحق دة" تشوفي ايه الذنوب الي عايزة تبطليها وايه الطاعات الي عايزة تركزي عليها وهكذا ..
الجنة هدف ، ويستحق

الاستعداد لرمضان (30) 🌙🤍

تفتح فيسبوك، هتلاقي صور مرصوصة جنب بعض بالعرض دي استوريهات لبنات كيوت (كانو الاول بميكب ولبس ضيق حاليا اللهم بارك بقوا منتقبات ومختمرات) حاطين عليها اغاني بموسيقى والكلام بيتكتب علي الصورة بدون اي داعي ولا كأن هم الي ملحنينها ، هتفكك منهم تعمل scroll شوية هتلاقي اخبار لأم بلعت عيالها والاب الي ضرب بنته ومسابقة علي شنط واخبار حزينة كتير وقضايا مجتمعية انت لا قاضي ولا محامي عشان تحلها وتبقي مغير ف الحوار دة انت لسة ع الكنبة عادي ، هتلاقي ف وسطهم شخص او حدث بقي "تريند" ف لما تشوف ايه التريند دة تلاقيه واحدة خلعت الحجاب ولا اتنين اتجوزوا او حدث ما يعني ، انت كـ إنت الامر ما هزكش ف حاجة ، لكن الـ 20 بلوجرز وانفلونسرز الي انت متابعهم ازاي يسكتوا! مش لازم يسمعونا رأيهم الي ما يهمناش ف حدث ما يهمناش برضه ، والي ما يعرفش مين دول ، دول بعض الناس الي كل محتواهم ع السوشيال هو انهم يقولوا رأيهم بلسانهم ع تريندات "لإنهم مثقفين جامد" طب رأيهم ما همناش وما اتفرجناش؟ يبدأوا يعملوا مقالب ف صناع عدم المحتوي الي زيهم ف شاااهد رد خالد ع مقلب ليلو اغم عليها م الخضههه🔥،طب مين دول اصلا؟ ، شاهد وهتعرف ما تنحش ..
زهقت منهم هتدخل ع علامة التليفزيون الي بتبقي ف شريط الحالة دي ما هي إلا فيديوهات مطلقة كدة لناس ما تعرفهم يا فيها رقص يا اغاني يا راي ناس على الرقص والاغاني وهكذا ، هتحس بصداع ف ترجع للـ scroll تاني ، هتلاقي صورة من فيلم بقت فجأة "تمب" وبقت تتعمل ميمز (ودة عشان الشعب المصري دمه خفيف ومفرفش) .. وكل واحد وحالته يعني هتلاقيها مع الطلاب بشكل مظبطينها ع حالتهم ، مع الماميز بشكل وهكذا ،، وانت لسة ع الكنبة .. والصورة دي ممكن يكون فيها عُري ، كلام يدخلنا ف شرك اصلا لكن ما دام ف الميم يبقي سووو واات!
تقفل المستنقع الازرق دة تدخل ع الواتساب مش قادر ترد ع حد! ، حد يبعتلك رسالة ف تقفل بسرعة عشان ما ياخدش باله انك اونلاين .. بطارية الفون فضيت اصلها ما بقتش تستحمل اكتر من 10 ساعات تصفح.. ف تقوم بقي تفتكر انك عندك رجل بتمشي عليها .. ايوة هي دي الي انت فاردها ع الكنبة ، تلاقي اهلك ناس كويسين وولاد حلال ، وممكن كمان تفتكر انك مسلم وانك مثلا عايز تقرا قران او تصلي (الصلاة الي انت مأخرها بسبب الفيسبوك) .. ف تبقي الصلاة تقيلة! ، مش حاسس بالقرآن .. و اسمع عن ربنا وما اتاثرش .. كدة؟ طب انا ربنا مش قابلني ومافيش مني فايدة ومش هصلي تاني الا لما اخشع ، شغل يابني التليفزيون ع ما التليفون يشحن ..

ما اتكلمناش عن مربع "كتابة منشور" عشان ماحدش بيجي جنبه الا لو انت صانع عدم المحتوي زي الناس دي .. حاليا انتشرت ظاهرة الشير ، ان البروفايل بتاعك بقي كله شير وهههههه وكدة ، دي مصيبة! معني ان مافيش حاجة ع صفحتك غير مشاركة الحاجات الي ذكرناها فوق دي يبقي انت مابتعملش حاجة ع الفيسبوك! .. ما عندكش نية لدخوله اصلا وتصفحه ، يعني الكام ساعة الي قضيتهم عليه كانوا بلا هدف نهائي غير الفرجة! طيب وامتحان "وعن عمره فيما أفناه" ؟
زي ما قال د محمد الغليظ ع صناع المحتويات الهابطة هو باع دينه وكسب فلوس انت بعت دينك وكسبت ايه؟
مين بيكتأب منغير سبب؟ مين ماعندوش طاقة؟ مين انطفي؟ كل دة بسبب انهاك قلبك وعقلك مع شوية ناس وتريندات واخبار لا تسر وذنوب ومعاصي ووقت مهول ببضيع ع الفيسبوك .. واستفادت ايه
انا نفسي حد يقولي عادة ايجابية الفيسبوك عملهاله ومالقاهاش غير فيه!..

عارفة ان في ناس كويسة ومحتواهم هادف لكن اولا هم ف وسط عك كبير ف كام مرة كنت داخل تجيب فيديو ديني اتصفحتلك كام ساعة! .. وثانيا الفائدة منه غير ملموسة ، مش بنقعد ع الفيس بورقة وقلم ونطلع الفوائد .. وحتي لو فيه فوايد ف ممكن تلاقيها ع مواقع تانية وسد باب المفسدة مقدم شرعا علي جلب المنفعة

وف النهاية ، التصفح مش نية .. اما اشوف في ايه مش نية ، لو مالكش نية او شغل حقيقي او منفعة مالهاش مكان غيره امسحه تماما اسلم لقلبك وروحك انت مش محتاج ابدا ابدا تعرف كمية الاخبار والاحداث دي الي بيروح السوق يتمشي فيه كام ساعة بيرجع تعبان حتي لو ما اشتراش حاجة ، التعرض الدائم للاخبار واحداث ناس ماتعرفش انهم عايشين اصلا بيفسد عليك قلبك..

الاستعداد لرمضان (31) 🌙🤍

ماهو ياقلب اختك ، هي بقت تراكمات عشان انتي ركنتيها!
لازم تنفسي عن نفسك وتفرغي الطاقة السلبية عشان ماتعيطيش لما ما تلاقيش لبن للنيسكافية وتقولي تراكمات!
الموضوع عامل زي الحلة الي بتسوي الاكل بالبخار لولا الخرم الصغير الي فيها كانت انفجرت م الضغط ، نَفِّسي عن نفسك وما تشيليش ف قلبك مش شنطة كروس هو!
وأنوه إن التنفيس عن النفس مش لازم بالحكاوي للبيست فريند، مش لازم ارفع سماعة التليفون اعيط لحد "ماحدش هيستحملني" ودة الطبيعي ودي مش وحشية من الناس ، مش لازم اعصي الله عشان افك
ممكن نستخدم وسيلة تانية المرادي وف كل المرات؟ ، عايزاكي تعلي معايا لفوق ، سيبك من التراب الي فوق النيش اعلي كماان وفكك م السطوح ، اعلي اكتر واكتر بقلبك وعيشي مع الملأ الأعلي 🤍
يعني تستشعري اوي انك لما تذكري ربنا في نفسك هو يذكرك في نفسه ، يعني لما تذكريه ف ملأ يبقي اسمك بيتذكر ف نفس اللحظة ف الملأ الاعلي مش كدة الذكر بجد هيريح قلبك؟، يبقي انا مش هذكر ربنا وارجع اقول الذكر ما ريحنيش ، انتي الي مش قادرة تستشعري اسمك وهو بيذكر هناك
لو انشغلتي بفكرة ان التوبة دي تفرح ربنا ، يا نهار ابيض! انا هفرح ربنا! يبقي عمر ما هتبقي التوبة صعبة واصلي ضعيفة واصلي بنتكس ، اسمها برضي ربي وبفرحه وسأعرف ف الملأ الاعلي!
هتبقي التوبة صعبة وضغط عليكي؟
يعني لما ابقي ف مجلس علم مش هقدر اهزر مع صاحبتي ، ولا استثقل القعدة ، ولا احس اني مش فاهمة فاكتئب ، هششش ربنا يقول عني "أشهدكم يا ملائكتي أني قد غفرت لهم" هو انا اه مش سامعة بس مستشعرة ، وقلبي اتطمن اوي اوي .. الملايكة عرفتني! ، ربنا غفرلي! .. هتحسي بقي ان حلقات العلم الشرعي مملة!
عندي ضغط إني عايزة احفظ القرآن ، عايزة اظبط التجويد ،ومعلمة التجويد مستقصداني + اني مافيش حد من صحابي معايا بروح لوحدي!
ف لما تستشعري إن الملايكة بتسمع تلاوتك وتقرب منك لما تقري ، وان احد الصحابة كان هيشوف ملك بجد من كتر ما بيقرا القران بصوت عالي، يبقي هيهمني البشر ولا الأرض بالي فيها!
ولا الدراسة ولا الكلية .. الي كلنا عارفين انهم مفعصيننا مش بس ضاغطيننا ، بس انتي مجددة النية لله ، انك عايزة تنفعي المسلمين بالعلم دة ، انك تنصري دينك وما نفضلش ف جهل وغيرهم
-الانسة الي ورا سرحانة ف ايه وانا بشرح؟
لا ي دكتور اصلي تخيلتني وانا بسالني ايه الحاجة الايجابية الي عملتها انهاردة ف لقيت ٧ ساعات كلية بالمواصلات 🤍

ماهو انا مش هعرف اقرا قران ولا اصلي بعدد الساعات دي ، لكن بنية خالصة لله يبقي ساعات الكلية كلها ف ميزان حسناتك بإذن الله🤍
وآه بالمناسبة ، استشعرتي قبل كدة يعني ايه ف ميزان حسناتك؟❤️
يعني هتقفي فرحانة قدام الميزان الي طالع نازل وتلاقي حسنة تخليه يطب ف تفرحي بيها ، يعني تصرخي م الفرحة وتقولي ( هاؤُمُ اقرَءوا كِتابِيَه) ، يعني الجنة بإذن الله الي مافيهاش لا ضغط نفسي ، ولا تراكمات ولا سلبية
ف حافظي ع نفسيتك ، انتي لا عندك وقت ولا صحة ولا جهد عشان تحزني وتقاومي الحزن الف مرة ..
ولسة هفضل مقتنعة إن زي ما في حمل كاذب في اكتئاب كاذب
في مشاكل انتي اصلا دخلتي نفسك وانتي مالكيش فيها ، في كثرة تفكير قولنا ان علاجه ذكر الله وما اخدتيش بالاسباب ، في حياااة تانية لقلبك مع الملأ الأعلي انتي لسة ماشاركتيش فيها ، وف الاخر تقولي حزينة ومكتئبة! ماتفكي كدة امال الجنة مخلوقة لمين ، مش عشان نشتغلها؟ طب ما يلا
والزمي الدعااااء
واخيرا ، احنا بشر فينا نقص مستححييل نكمل نقصنا بنقص لازم اللجوء لله الي له الكمال اولا ، وكمان احنا جسدنا هنا ف وسط البشر .. عايزة كمان قلبك يتدعك معاهم؟! نبقي قلبا وقالبا مع البشر كدة! ،دة بقي الي بيعمل التراكمات
ف قلل الناس شوية ، لا تركزي ف تفاصيلهم ولا ف علاقتهم بيكي ، كتري أنس بالله ❤️
منقول
وَالَّذِينَ جَاهَدُوا فِينَا 💜🏃

الاستعداد لرمضان (32) 🌙🤍
هنتكلم النهاردة عن حاسة السمع ، الي لو استخدمناها ف المعصية تفتح علينا ابواب لا حصر لها من المعاصي والذنوب ، ولو استخدمناها ف طاعة الله تفتح علينا باب خيرات وحسنات كبير جدا 🤍
تابعوا..
لما حصلت حادثة القطار انا ماكانش ف بالي غير موضوع ان الناس الي ف القطر الي دائما تلاقيهم بيسمعوا اغاني "سواء الصوت كان عالي او من هزة دماغهم" .. وانا وانت والهاند فري عارفين انها حرام، موتة زي دي تشرف؟ .. يعني لما نبقي عارفين ان من مات علي شيء بعث عليه ، عادي نبعث واحنا بنغني ونسمع اغاني!
وتلاقي عادي مبارزة لله بالمعصية ف تلاقي توكتوك مشغل اغاني مسمعة الشارع كله ولا فرح مصحي المنطقة كلها .. مش من العدل ان ربنا ينزل عليك عقوبته؟ ومع ذلك ربنا رحيم ف انت تكمل؟!
الاغاني حرام وسماعها هيفضل حرام حتي لو حللها كل الشيوخ النبي صلى الله عليه وسلم قال "يستحلون" وصدق الكل الا من رحم ربي بيتحايل عشان يحللها ولو كانت حلال هيستحلوها ليه؟
كفاية سماع اغاني ، الأغنية ٤ دقائق مثلا؟ لو تضمني انك هتعيشي لحد ما تكمليها قشطة اسمعيها ونتوب بعدها جامد اوي!
او اقولك؟ ، لما تتاكدي ان ربنا مش شايفك وسامعك وانتي بتسمعيها اسمعي براحتك ..
بما اننا اتكلمنا عن الاغاني كتير قبل كدة ، ف نتكلم عن سماع القرآن .. ازاي يعدي يوم وانت ما سمعتش آية من كلام ربك؟ ، ف وسط حشرة الاغاني الي ف حياتنا دي ازاي مش ماسك سلاح؟ معاك ايه حاميك م الفتن؟ ، وما بتكلمش عن القراءة او الحفظ ، بتكلم عن السماع بوجه خاص .. من انواع هجر القران هجر سماعه برضه ، ف انت محتاج تسمع القرآن
لازم تحشره ف حياتك زي ما انت حاشر الاغاني او هي محشورة غصب عنك ، يعني وانت بتذاكر وبين المحاضرات وانت رايح تنام وانت بتلبس وانتي بتروقي الشقة وهكذا
وتجربتي الشخصية، سور زي الحجر والقمر وق والقيامة واوائل البقرة مافتكرش اني قعدت احفظهم واردد فيهم ، حفظاهم بس من السماع ، حتي ف مراجعتهم يا بشغل السورة يا بقراها فقط مرة واحدة وبفتكر بفضل الله ، ف سماع القرآن مهم جدا جدا لحفظ القران ، لإن ببساطة ما حدش قعد قرا كلمات اغنية وفضل يرددها ويسمّعها غيبا علي مامته! كله سماع بس ، تلاقي ناس حافظة البومات اغاني حرفيا و الأغنية تشتغل من اي حتة يكملها وحافظ الثواني الي بيسكت فيها المغني كمان!
تعاهد سورة ، تكون لسة مش حافظها اوي او مش مراجعها .. تكون قصيرة شوية يعني اخرك ١٠ صفحات او اقل ، واحشرها ف حياتك اسبوع ، اسمعها آناء الليل وأطراف النهار .. وهتلاقي نفسك حفظتها لوحدك ، وبترددها "مش بتدندن اغاني" ، هتلاقي قلبك منشرح كدة ومبسوط -اصلك ما بتسمعش قصة غدر الصحاب ولا جرح الخيانة والفراق- .. هتلاقي كلام القرآن مُرتب ..وبيوصفك اوي اووي تحس ان اسمك هيتذكر الاية الجاية! ..
يلا هتاخدو سورة ايه 😌🤍

رمضان يستحق ، ورب رمضان يستحق انك تسمعي كلامه🤍
منقول
وَالَّذِينَ جَاهَدُوا فِينَا 💜🏃

الاستعداد لرمضان (33) 🌙🤎
المعيد قالنا مرة ان الدكور قالهم انت المفروض ما تاخدش درجة! إنت لو سلمت المشروع بتاعك ف انت عملت الي عليك ف تاخد صفر! اديك درجات زيادة ليه!
ودة طبيعي ف كليتنا انك تلاقي طالب جايب درجات بالسالب او اننا بنعافر عشان ناخد صفر .. بعيدا عن الضحك بس تخيل لو ربنا سبحانه وتعالي كان بيعاملنا كدة! ..
وعلي فكرة دة منتهي العدل ، مش مظلومين ومش فكرة بس تأدي الي عليك دة انت عليك كمية ديون لربنا مهولة ، الشيخ حازم شومان كان بيقول انت محتاج تسبح ربنا 250 مليون مرة عشان بس تحمد نعمة كرات الدم الحمراء! .. تخيل انك مع كل قفلة عين بتحمد عليها ربنا ، مع كل عملية هضم بتصلي ركعتين شكر ، مع كل نفس بتستغفر!
ودة ايه ، دة انت بتشكر النعمة ، لسة ما عملتش العبادات الي هي اصلا مفروضة عليك الي لما تعملها تاخد صفر!!
دي مهلكة! هنهلك جميعا بلا استثناء .. يبقي ما نستغربش لما الملايكة تقول يوم القيامة سبحانك ما عبدناك حق عبادتك! .. دة ملك من قبل سيدنا ادم اصلا وهو ساجد ولا وهو راكع ، ولسة ماقضاش الي عليه
تيجي تبص للي معاك بتاع 60 سنة او اكتر او اقل ، الكام سنة دول منهم 12 سنة قبل البلوغ و قدهم واكتر نوم!
عارف الي هو واحد بقاله ٣ ايام ما كالش ف ايده زيتونة ومطالب انها تشبعه عشان لسة هيقعد قدهم واكتر ما ياكلش!
الموضوع بجد مرعب ، إن ربنا يكون فقط عادل! او يعاملنا بمعاملة البشر!

بس عشان هو سبحانه إله بحق يكون له كمال الرحمة🤍 ، يديك النعمة ، ويرزقك شكرها فتشكره فيزيدك حسنات ونعم !
يا الله 🤍 ما أعظمك
ف تستشعر اوي اوي اسم الله الرحمن الرحيم، او اسم الله الشكور .. يجزيك بالكثير علي العمل القليل ، إذا نظر لك نظرة رضا فسلام علي الدنيا ومافيها! .. ف تلاقي كلمتان خفيفتان علي اللسان ثقيلتان ف الميزان ، وتلاقي كلمة الحمد لله تملأ الميزان وهكذا
القصد .. ما تعجبش بعملك وبطاعتك ، عملك لو جينا بصيناله مقارنةً هو ف حق مين يبقي انت خسران .. واستشعر نعم ربنا عليك دايما ، النعم لا نحصيها اصلا ف بالتالي مستحيل نشكرها
وابدأ بطاعة الله وربنا هيوفقك للطاعة الي بعدها ومن ثم الجنة بإذن الله ، ف البداية في رمضان مهمة اوي اوي وحط نية بجد نية خالصة لله فقط
وحاجة كمان ، مافيش داعي ابدا ابدا للرياء "يعني اعمل العمل دة عشان يتمدح فيا" ، إنت اصلا لو عبادتك خالصة لله مش مكملة ذرةح قدام نعيم الله ف تخيل بقي الذرة دي كمان فيها نية لغير الله .. الأمر يحتمل كسل ، لا يحتمل مشاكل القلب دي
مش الطاعة دي ف حق *ربنا* ؟ يبقي خلاص اتقنها بقي ❤️
وما بقولش طالما مش هتقن الطاعة يبقي ما اعملهاش ، "اتقوا الله ما استطعتم" يعني م الاخر
هات اخرك عشان ربنا❤️
ما تتردديش ف لبس حجاب/خمار/نقاب عشان ربنا
ما تتردش ف مسح اغاني بتغضب ربنا
ماتكسلش عن الطاعات عموما ، ما تسوفش العبادات ابدا مهما حصل
وِردك اليومي من الطاعات دة سيف علي رقبتك ، ولو مالكش ورد خلي عندك وهكذا
ف احنا عندنا طريقين لجلب الحسنات مافيش تالت ليهم 🤍 ، الاول سهل جدا جدا وهو *طريق العبادات* ودة بقي ربنا سبحانه وتعالي رحيم بينا جدا لأبعد حد يعني الحسنة بعشرة والصلوات تكفر الذنوب الي بين كل فرض والتاني ، والصيام يبعدك عن النار 70 سنة و و و ، ومع ذلك في ناس ما بتمشيش الطريق دة! ليه ؟ لأسباب هنذكرها بعدين 🌸 .. والطريق التاني الي هو *طريق الابتلاءات* يعني ايه الابتلاء يوصلني للجنة مش ربنا لما يبتليني يبقي غضبان عليا؟ ، لالا خالص.. قال رسول الله صلى الله عليه وسلم ((اللَّه عَنْهُمَا عن النَّبيِّ ﷺ قَالَ: مَا يُصِيبُ الْمُسْلِمَ مِنْ نَصَبٍ وَلاَ وَصَبٍ وَلاَ هَمٍّ وَلاَ حَزَن وَلاَ أَذًى وَلاَ غمٍّ، حتَّى الشَّوْكَةُ يُشَاكُها إِلاَّ كفَّر اللَّه بهَا مِنْ خطَايَاه)) متفقٌ عَلَيهِ
يعني اي ابتلاء سواء كان مرض نفسي/عضوي ، فقر ، فقد .. اي حاجة من دي تكفر عنك سيئات وترفعك ف الجنة.. والابتلاءات أجرها مش عادي فعلا لدرجة الناس الي ماكنتش مبتلاه ف الدنيا لما يشوفوا الجزاء ع دة يتمنوا لو كانوا بيتقطعوا حتت كدة عشان ياخدوا الاجر
والحقيقية ان الطريق التاني صعب عشان كدة أجره كبير ، لانه بيحتاج *صبر* ودي حاجة مش سهلة.. هي الطاعة محتاجة صبر وكل حاجة بس مش زي الابتلاء طبعا ..
نختم بحديث النبي صلى الله عليه وسلم الي كان بيقول فيه (والصلاة نور .. والصبر ضياء) واي الفرق بين النور والضياء يعني؟ .. الضياء اتذكر ف القرآن مع الشمس ، الشمس عشان تطلعلنا الضوء دة بتتحرق وبينفجر فيها انفجارات مهولة! بس النتيجة؟ ضيااء 🤍🤍 .. ف انتبذي سواء صبرتي أو لا الابتلاء موجود ف لو صبرتي هتنالي الاجر .. والصبر لازم يكون رفيقك ف الدنيا لأنك محتاجة ضياءة حتي لو كان بيسببلك حرقة 🌸

منقول
وَالَّذِينَ جَاهَدُوا فِينَا 💜🏃

الاستعداد لرمضان (34) 🌙💜

من يأخذ سيف رمضان بحقه؟
مهم جدا ف رمضان إدارة الوقت .. يعني بلاش عشوائية ف التخطيط او العبادة .. ما تحطش نفسك ف موقف انك تصحي م النوم ف رمضان مش عارف هتعمل ايه انهاردة .. خطط من قبلها بيوم بكرة -بمشيئة الله- هيمشي ازاي؟ ، هتك علي أنهي عبادة؟ هركز وانا بقرا ف انهي صلاة ، هحاول اتباكي ف انهي سجدة؟ .. هفطر كام صائم بكرة "إفطار الصائم يشمل اهل البيت والجيران" هعيش مع انهي سورة .. هسمع ايه من الدروس وهكذا
وقبل رمضان بيومين تمسك ورقة الاهداف نفسك تخرج من رمضان معاك اي؟ حابب تعمل فيه ايه تحقق فيه "إنك عبد لله" .. تحط بقي سلامة القلب إنك فعلا ماتشيلش ف قلبك ناحية حد .. ممكن تحط تفسير القرآن هدف "مش تخلصه كله ف رمضان لا تبدأ فيه" ممكن تحط أي عبادة هدف .. حط لنفسك حد أدني من الختمات الي عايز تعملها عشان ما تكسلش ف النص ، حط خطة لاول رمضان ونصه وآخره عشان الفتور الي بيحصل ف النص ..
وننوه علي أمر هام وهو إن العبادة ما بتخلصش ، يعني مش معني اني قرأت الورد او صليت الحد الي حاطاه لنفسي يبقي خلاص نبدأ بقي نتفرج ع المسلسلات او نريح ف نخربها ، خلي رمضانك يتقلب بين طاعات وبعض المباحات لو عملت ذنب تتوب منه ،تخرج من رمضان وإنت متعود ع الطاعة وتبقي سهلة عليك..
حقق التارجت بتاعك وعافر عشان تخرج من رمضان بغير القلب الذي دخلت به ❤️

منقول
وَالَّذِينَ جَاهَدُوا فِينَا 💜🏃

الاستعداد لرمضان (35) 🌙❤️
اخر درس ف السلسلة ، وذلك من فضل الله علينا ، اللهم تقبل وينفع بيكم .. ننزل بكام نقطة نصايح لرمضان؟🌙🤍

١-نظم وقتك ، خطط لبكرة من النهاردة
٢-ما تصحاش ف يوم مش عارف هتعمل ايه انهاردة
٣-خصص يوم او اتنين ف الاسبوع مذاكرة بس مع عبادات بسيطة وباقي الاسبوع دوس ف العبادات
٤-عادي ف رمضان تقع ف ذنب وتتوب منه إنت لسة بشر
٥-انزل كليتك/دروسك بنية لله عز وجل واحتسب الأجر
٦-حط حد أدني لعدد ختمات ناوي تعملها لرمضان "تلاوة فقط"
٧-جنب التلاوة امسك سلسلة لتفسير سورة معينة وتدبرها سواء فيديوهات أو كتب تقراها الي متاح ليك بس رمضان ما تركزش ع القراءة بس ولا ع التدبر بس
٨-راجع بس ع حفظ القرآن ما تحفظش جديد
٩-اقفل النت تماما، خلي بس السوشيال الي عليه دراستك برقم غير رقمك او رقم ماحدش يعرفه اوي
١٠-ما تتابعش مسلسلات، هي حرام في رمضان وغيره ومافيش اي استعداد لتضييع الوقت في الشهر دة
١١-نظم وقتك تاني
١٢-حط نية ف رمضان وهدف ، عايز تخرج من رمضان ايه الزيادة فحياتك؟ ، هتواظب ع ايه
١٣- ارجوكي ما تشتريش لبس العيد لبس يغضب ربنا ، ابدأي السنادي باللبس الواسع
١٤-ما ينفعش انزل استوري فيها اللهم اني نويت الصيام .. النية محلها القلب
١٥-نظم وقتك تالت
١٦-ما تبقاش عَبد لنفسيتك ، ع الاقل الشهر دة .. مش هنقضي رمضان عياط بدون سبب ، رمضان لا يحتمل الصياح
١٧-استغل ان البيئة الي حواليك بتتحسن وافتح المصحف ف المواصلات والبسي واسع وانزلي منغير ميكب ، حافظ علي صلواتك وخاتم التسبيح ما يتقلعش من ايدك .. لعل قلوبنا تهتدي
١٨-انت مش هتضحك علي ربنا ، ما تعملش الصالحات وانت ناوي تخربها بعد رؤية هلال العيد ،الشرع هو هو طول الـ ٣٦٥ يوم ورب الكعبة
١٩-الحرام ف رمضان حرام ف بعده ، الزق الجملة دي ف حياتك كلها
٢٠-مش عيب ابدأ ف رمضان ، العيب اني ارجع بعده
٢١- ماتضيعش وقتك ، ضياع الوقت مهلكة دنيا وآخرة
٢٢-حاول تخشع ، اعمل نفسك بتعيط ف الصلاة
٢٣-ادعي ربنا ، ادعيه بكل حاجة ، ادعيه ف كل وقت
٢٤-اتق الله في صومك ولا تبطله وافتكر إن كل عمل ابن آدم له إلا الصيام ف إنه لله ، ف قدم لربنا حاجة حلوة
٢٥-ما تنساش تشكر ربنا وتحمده علي إنه رزقك رمضان، غيرك ومن سنك تحت التراب الان
٢٦-تشكر ربنا باللسان وبعمل الطاعات
٢٧-نشن علي ليلة القدر ، اعمل ايه؟ قوم كل ليلة -العشر الاواخر وكل ليالي رمضان- بإخلاص وكأنها ليلة القدر وبما إن ليلة القدر بلا شك في رمضان وإنت قمت رمضان كله ف مبروك إنت قمت ليلة القدر
٢٨-ساهم في افطار أهل بيتك ، يعني العصير عليك او المياة بتتملي يوميا منك إنت ،ولو إنتي الي بتطبخي فعلا يبقي جددي نيتك إنتي في عبادة
٢٩-الازواج واهالي البيت ، زوجتك/والدتك مسلمة والله العظيم ونفسها تقيم الليل وتتعبد لله وتصلح قلبها، ف مش لازم يوميا تعزم عائلات وكنافة وقطايف إنت ف شهر رمضان مش شهر العسل ..
٣٠-اتعامل إن رمضان دة اخر رمضان ليك ف حياتك يعني تخيل إنك هتموت بعد رمضان دة علي طول، تحب تفنش عملك بإيه؟
٣١-اخلص نيتك لله .. اعمل العمل صح ،طلع اخرك فيه .. هو دة مشروع تخرجك ،هو دة التارجت بتاعك، وتاني وعاشر ومليون: مش إنت هتعمل العمل دة لربنا؟ خلاص اعمله حلو بقي
٣٢-حافظ علي وقتك عاشر
٣٣-ادعولي بالخير فضلا
٣٤-اقرأوا السلسلة كاملة عشان تراجعوها
٣٥-نتقابل بعد العيد بإذن الله ❤️

منقول
وَالَّذِينَ جَاهَدُوا فِينَا 💜🏃

- *"مسلسلات رمضان."*
بنوته بتسألني هتتفرجي علي اي في رمضان.
قولتلها هقطع فيشه التلفزيون 🤍.
ببساطه جداً ليه. 👀
شهر رمضان شهر واحد بس في السنه.
مبيتكررش تاني غير السنه اللي بعدها.
هتفرج علي مسلسلات واضيعوا من إيدي ليه.
غير كده الشهر ده بيكون مبارك ، وبيعدي بسرعه جداً يعني الواحد مش بيلحق يحس بيه حقيقي ، غير كده هيكون ورانا دروس ومذاكره وكليات يعني وقتنا أصلاً تقريباً كتير منه ضايع ف ليه نضيع الباقي .
رمضان شهر واحد ي نستغله ونكون فيه من الفائزين ي نضيعوا من أيدينا وكده مش هنكون استفدنا حاجه خالص .
طيب هتقوليلي هتفرج بعد الفطار عادي.
هقولك اللي حرام قبل الفطار حرام بعده باردوه. 👀
مستغربه ليه ايوا حراام .
طيب هتقوليلي انا هتفرج علي اتنين او ٣ مسلسلات يعني ٣ ساعات مش هيحصل حاجه 😌.
هقولك الساعات بتجر بعضها والوقت مش هتحسي بيه والاعلانات بتقعد كتيير جدا يعني ممكن المسلسل يعدي ساعتين.
بدل ما تضيعي وقتك علي مسلسلات مش هتستفادي منها اي حاجه استغليه في العباده.
صلي التراويح والقيام.
اقرأي قرآن.
سبحي ربنا .
استغفري 🤍
مش يمكن تتطلعي من الشهر من الفائزين. 🤍
وبعدين متنسيش يجميلتي إننا مأمورين بغض البصر ها .
يعني طول م انتِ بتتفرجي وتقولي الممثل ده مش عارفه اي وده اي بتاخدي ذنوب ها نركز ف النقطه دي 🤍.
سيبك من المسلسلات اللي مش هتفيدك في حاجه.
هي عباره عن ناس خدوا فلوس علشان يشغلوكي ويضيعوا وقتك ف انتِ تعطي ليهم قيمه؟
ركزي علي رمضان الشهر العظيم ده 🥺🤎.
أوعي تضيعه من ايدك!
الوقت اللي بيعدي مننا عمرنا م هنقدر نرجعه تاني!
تخيلي أن ده أخر رمضان ليكي ممكن تضيعه!
بلااش مسلسلات.
قللوا سوشيال ميديا بتضيع الوقت .
وربنا يجعلنا في الشهر ده من الفائزين جميعاً. 🤎
Telegram: @rwayate 💚📚

الإرتباط".🤸‍♀️🐣

"طبعاً كلنا عارفين أن الإرتباط الغير شرعي حرام ،💜
ربنا بيقول ف القرآن" وآتوا البيوت من أبوابها ، واتقوا الله لعلكم تفلحون".
"ولا تواعدهن سرآ".💜
طب ليه يـ جميلة تعلقي قلبك بـ شئ حرام ، ليه مش تصوني نفسك ، انتي غاليه ، ربنا مكرمك فـ القرآن ،ليه انتي تعصي ربك ، وتخوني ثقة أهلك ، ليه تباني انك خاينه ، ليه مش تكوني عفيفه، وده كله علشان مين علشان واحد مش يستاهل ، هو لو بيحبك وبيخاف عليكي ، مش هيرضي إنك تاخدي ذنوب، وإنك تخوني ثقة أهلك ، اللي مش يستاهلوا منك ده ، ابوكي الراجل الطيب اللي طول النهار شغال علشان تعيشي مرتاحه، وامك اللي ع طول تدعيلك وعايزة سعادتك ، ده يبقا مش يستاهل حبك ومشاعرك ، ارتبطي ف الحلال لـ الراجل اللي هيصونك ، ويقدرك ، ويغليكي ، ويرفع راسك قدام اهلك ، أنه داخلك من الباب ، اللي فكر ف رضا ربه ، علشان تأمني مع نفسك معاه ،طب الناس اللي بيقولوا لا الارتباط حلال طالما بنحب بعض ، لا يـ حبيبتي بتحبيه ، احفظي حبه ف قلبك ،اوعي تعصي ربنا ، ادعي ربنا أنه يكون ليكي بالحلال ، دايما الحرام ف الاول طريقه سهل بس فـ اخره وجع قلب ،
ليه كل ده ، ما تستني الحلال ، الحلال ليه مذاق خاص ، كفاية أن ربنا يباركلك ف الارتباط ده , ارجعي الي ربنا وتوبي إليه ، ربنا بيقبل التوبه ، وان شاء الله ربنا هيعوضك كل خير 💜 "