#أين_جوهرة_أورانوس_بقلم_نسمات_الليل
الجزء الخامس:
-علاء: اياد .. شو ح نعمل ...
-اياد: ما ح نعمل شي ... انتو بتفلو وانا بنزل بحكيه ...
-مراد: مستحيل ...
-اياد: هاي مصيبتي وانا اللي بحلها ... انتو خليكن بعاد .....
حكا هالكلمتين ونزل من السيارة .... وقف مقابيل الوكيل .....
-اياد: هاد مانو حل .... الهروب والخطف والقتل كرمال جوهرة مفقودة .... انا بدي احكي السيد نيلسون .... ضروري ....
-الوكيل: طلعت اجرأ مما متخيل .... بس بعد هلأ الخاين اللي متلك ما في يوصل لاتصال معو ....
-اياد: انا ما خنت ... انا انغدرت ....... وكونو بدي السلام ... انا رح اعطيه حق الجوهرة كامل ....
-الوكيل: هه ... ههه ... هههههاي ... نعم !! .. فكرك فيك توفيه حقها !!! ... معروض عليه مشتري يدفع نص مليار وبتقللي اوفيه حقها ... بعدينا هوي بالغنى عن هالملايين مانو بحاجة ... هوي بدو ياها ليعمل منها خاتم لمدامتو ... وهالشي بيدفعو يعمل مجازر .....
-اياد: الجوهرة اخدت اكتر من حجما ... يا دوب ٤ مليون ... وصارت القصة مين يربح عالتاني ... وصلت للنص مليار للناس تشوف حالا مش اكتر .... وحتى لو نص مليار انا بدي احكي السيد نيلسون للتفاوض .... وهاي حركات الخطف بلا طعمة ... تعا واجهني واحكي معي متل البشر ..... واذا بدك حرب فلتكن ....
فتح جاكيتو وبين سلاحو .... سكت الوكيل ثواني ورجع حكا ....
-الوكيل: تمام ... رح احكيه ... وببقا بردلك خبر ......
فل الوكيل من غير اعتراض ... بالنهاية هاد المطلوب .. يا تتلاقى يا يندفع حقها ........ وركب اياد بالسيارة مع اخواتو ومشي ..... وكل الطريق شارد وعم يفكر وبس .... كان عايش بسلام كبير لحد ما دخلت هالجوهرة على حياتو وقلبتها فوقاني تحتاني .....
حمل تلفونو اياد ودق اتصال للمحامي ....
-اياد: جهزتلي الاوراق اللي طلبتا الصبح ؟ ...... تمام لاقيني بالفيلا .....
وصلو عالفيلا ونزلو ... فورا لقتن يارا عالباب وركضت لعند اياد غمرتو .....
-يارا: خفت يصرلك شي ....
وعيت ع حالا بالاثناء اللي اياد كان مخربط .... ورجعت غمرت علاء ومراد ...
-يارا: الحمدلله على سلامتكن ..........
اجا من وراها تيم ....
-تيم: الحمدلله عالسلامة .....
اشرلا اياد ليارا عليها ...
يارا: تمام شلتو ... وكبيتو ... وحتى كبيت التلفون لحتى ما يدقلي ....
-علاء: شو صاير ...
-اياد: جهاز تنصت ..... يلا نفوت تعبان وبدي اقعد احكي معكن جميعا كلمتين واطلع نام ....
هني وفايتين وصل المحامي ..... سلمو ع بعض ودخلو كلهن سوا ..... قعد اياد وجهز حالو ليبدا حكي ..
-اياد: حضرة المحامي اعطي الاوراق للست يارا ......
اخدتن يارا وقبل ما تفتحن وتعرف شو فيهن كمل حكي اياد وانصتتلو .... كان قلبا عم يدق خوفا من المجهول .... حطت ايدا عالطوق اللي رجعت مسبقا لقتلا ياه الخادمة بالفيلا واقع ... حست بالامان شوي ... وانصتت ....
-اياد: بالبداية بدي اشكر يارا كتيير .... لولاها ما كنا وصلنا لهون وانتو معنا ... لعبتها جابت نتيجة رغم انو انا كنت السجان بس ساعدتني ......... هالمهزلة صار لازم تخلص .... يعني اللي صار وعاني ع امور كتير ما كنت شايفا ... نحن ما بعرف ايمتا وكيف وصلنا لهون ... انا وعم حاول رجع السلام لعيلتي وبيتي وشغلي كنت عم بخسر اشيا تانية من قيمي واخلاقي .... لهيك هاي مصيبتي لوحدي وانا اللي راح طالع حالي منا بدون ما يتأذى اي طرف منكن ... حتى لو هلال بدران كان السبب ... بس هاد مانو حل اني عاقبو بولادو ... لو موجود كان تغيرت الاحداث ...... لهيك استاذ تيم وست يارا انا بطالب بالسلام .... اللي للاسف انا اللي اخدتو منكن ... لهيك اول خطوة انا اخدتا هيي هاي الاوراق ....... (سكت ثواني وحكا) .... اوراق الطلاق بايدك يارا ....
الكل كان ساكت .... وما حدا حكا كلمة وحدة .... بس كان في فيضان جوات يارا ومن برا سلام تاام .... ابتسمت لحتى تخفي الاعصار اللي جواتا ..... وتيم حكا ....
-تيم: كلنا مرينا بضغوطات كبيرة واذينا بعض ... ما كنت حابب اكتشف حقيقة ابي بهاي الطريقة وخصوصي بعد مماتو ... ما كنت حابب شوف اوراقو المزيفة والغير قانونية ... كنت بتمنى انو يضل بنظري قدوتي .... بس للاسف بعد كل شي شفتو ما عدت قدرت انفي انو هوي يكون خافي الجوهرة ... وانت استاذ اياد بهالحالة موقفك لا تُحسد عليه ... وصدقني انو بأي شي فينا نساعد ح نساعد ... انت اخدت القرار السليم ... لانو بالنهاية اكتر شخص اتأذي هيي اختي ....
-اياد: انا ما عاد بدي دخلكن بشي ... بس تمضي يارا الاوراق اللي بايدها بتكونو اخدتو الحرية وما بقى مضطرين تتواجدو بحياتي .......
شال من جيبتو قلم واعطاه ليارا ... تلبكت وخدتو منو بهدوء ... وكمل حكي ....
-اياد: اما علاء واياد ... انتو وصية ابي وامي ... لهيك ح ترجعو تسافرو لبرات البلد وتكملو حياتكن بشكل طبيعي ... وانا هون رح حل كل شي ...
-علاء: نعم نعم نعم .......
-مراد: عم تحلم ....