رجعت من جديد على حياة التشرد بس هالمرة دورت على شغل لعيش منو حتى قبل واحد يشغلني عندو ،(عماد 39 سنة ،طويل بشرة سمراء و عيون بني غامق )،كان فاتح معرض سيارات و بدو مين يعملو القهوة و ينظفلو المحل و يلمعلو السيارت ،اول ما قرأت لافتة على ازاز الباب ،فتت فورا ،قلعني اول الشي من غير ما يسمعني بس رجعت فتت لعندو و ترجيتو
قمر:انا بعرف اعمل كل هالشي ولله ،جربني و ما رح تندم ،جربني اسبوع ..يومين و اذا ما عجبك قلعني وقتا
عماد:....طيب رح جربك
قمر:بس .بس...
عماد:بس شو ؟
قمر:في مشكلة اذا نمت هون لانو ما عندي محل نام فيه
عماد:كيف بدك تنام هون و انا بقفل المعرض و بنزل الباب الحديد و بروح بنام ببيتي..
قمر:و اذا ...بنام ...قفل علي و روح على بيتك
صفن شوي ،حسيتو خاف من اقتراحي لانو كان بعدو ما واثق فيني
عماد:طيب ،روح اعملي قهوة هلأ
بلشت الشغل عند عماد ،كان يعطيني راتب بنهاية الاسبوع ،كان منيح كتير الي ،اشتري منو فطور سندويشة جبنة من المحل يلي جنبنا و على الغدا اشتري بطاطا من نفس المحل ،كان اول اسبوع اصعب اسبوع لتعلمت الشغل يلي بدو اياه عماد ،و اهم شي اتعلم كيف اعمل قهوة سادة راكزة ،كان الوضع عم يتعقد شوي اني عم اكبر و عم تكبر ملامح جسمي معي و عم حاول قدر الامكان خبي اي شي ظاهر ،البس مشد على صدري و فوقو بلوزة واسعة ،و الاهم من هيك اني بلغت ، وقتا كنت عم اعمل قهوة لعماد و زبون عندو ،بعد ما ضيفتو القهوة ،صار معي وجع بطن ،فتت على الحمام و شفت دم ،خفت كتير للوهلة الاولى بس بعدين تذكرت انو اابلوغ ما في مفر منو لاي بنت طبيعية ،انبسطت و زعلت بنفس الوقت كان في صراع بداخلي بين اني بنت متل اي بنت بالعالم بلغت و ممكن تتزوج و يصير عندا عيلة و بين اني عايشة بهيئة صبي و مرتاحة نوعا ما و مستسهلة حياتي بهالطريقة ،خفت يكون هالشي بين على ملامح وجهي و يكشفني عماد. لهيك توترت هديك الفترة و انتبه علي عماد انا و عم ضيفو القهوة
عماد:محمد ...شو قصتك انت هل اكام يوم
قمر:شو قصتي؟
احمر و سخن وجهي فورا،ضيفتو القهوة و بعدت فورا عنو
عماد:ما بعرف عم حسك كانو عاملك شي عملة سودا و عم تخبي علي
قمر:له يا معلم شو بدي اعمل ،متل ما شايفني كل الوقت قدامك و وقت تطلع بتقفل علي
عماد:ايه ما هالشي هو يلي محيرني
قمر:ولله ما في شي يا معلم
عماد:ايه انشالله
بعد 6 شهور تأقلمت على الوضع الجديد و صرت دير بالي و اخد احتياطاتي اكتر و خاصة اول فترة و اخد حبوب مسكنة للالام قبل بيومين حتى خفف من حدة النكسة يلي كانت تصير معي ،كان هالموضوع مقدور عليه بس كلما كنت عم اكبر صارت ملامحي الانثوية عم تتشكل بالوقت يلي اي شاب بكون فيه عم يخشن صوتو و يبلش يطلع شعر بجسمو و شوارب و دقن بوجهو ، حتى مرة خبطني عماد على رقبتي
عماد:ولا انت ايمت بدك تخشن و تصير شاب ،ولله ما بحسك الا متل البنات ،شدلي حالك شوي
قمر:تكرم معلم
بقيت عم اشتغل سنتين عند عماد ،كبر شغلو كتير خلال السنتين و وثق فيني اكتر و زادلي مرتبي و صار يدخلني على مكتبو لساعدو بالحسابات و حتى علمني اشتغل على الكمبيوتر و كيف اعمل جداول و تواريخ بدفعة السيارات يلي كنا نستوردا و علمني السواقة ،و احيانا كان يخليني اوقف معو هو و عم يقنع الزبون بسيارة او يتفاوض معو على سعرا ،تعلمت عندو شغلات كتير و كنت مرتاحة حتى اجا هداك اليوم ،يلي كنت فيه بالبريود و تعبانة كتير و ما كان عندي قبل ب ليلة ولا حبة مسكن ،لهيك تأخرت بالنومة و انا كنت بالعادة بفيق بجهز حالي قبل ما يفتح عماد المحل ، لهيك استسلمت للنوم و ما فقت الا على صورة وجه عماد عن قرب عم يطلع فيني ،اول ما شفتو نفض جسمي و ارتعبت و لزقت بالحيط انا و عم غطي حالي بالحرام ،مسك الحرام و سحبو ،كتفت ايدي انا وعم حاول خبي حالي
عماد:البسي و الحقيني على المكتب
عرفت انو هاليوم رح يكون اخر يوم شغل الي عندو بعد ما عرف هويتي ،لبست و فتت عملتلو قهوة و لحقتو على المكتب ،ضيفتو انا و عم اتجاهل نظراتو الي ،حملت الصنية و بدي اطلع و ارجع على المطبخ
عماد:تعي و قعدي هون لشوف
قمر:معلم انا ....
عماد:ايه ؟
قمر:ما بعرف شو بدي قول بس انا عندي اسبابي ،انا قصرت معك شي بالشغل ؟
عماد:شو اسمك ؟
قمر:اسمي قمر
عماد:سنتين عم تشتغلي عندي و انا مفكرك صبي و عم ناديلك محمد و بالاخير بتطلعي بنت
قمر:مضطرة ولله مضطرة
عماد:تعي اقعدي هون و احكيلي لشوف اصلك و فصلك و وين اهلك
قعدت على الكرسي و حكتلو كل شي لعماد هو و عم يشرب قهوةو يهز براسو بدون ما يقاطعني بكلمة و بالاخير ختمت كلامي
قمر:انا ما عندي محل روح عليه و انا مرتاحة عندك و حابة ضل هيك
عماد:بدك تبقي طول عمرك هيك ،حاالقة شعرك متل الصبيان و انت بنت ،ما بتقدري لانو الشاب بس يكبر بصير عندو دقن. و شوارب و بيخشن صوتو ،و انت ما رح يصير معك هيك و الكل رح يعرف هويتك حتى لو خبيتي هالشي
قمر:انت عرفت و ما رح تحكي لحدا اكيد
عماد:لا ما رح احكي