#الجزء_الثالث_عشر (13) :

#اللـيـلة_الحمـراء

طلعت من باب السجن ضايعة وماعرفانة شو تعمل … بقيت بلا شغل واكيد رح تصير بلا بيت
لقت اجريها لحالن بيمشو باتجاه المشفى بدها تشوفها قبل ما يجي حدا من اهلها البعاد ويدفنها
الاجراءات اخدت اكتر من ساعة لوصلت لبراد الموتى وشافتها قدام عيونها وهي جثة هامدة
قربت ولمست ايدها ويالطيييف شو كانت باااردة

رجف جسمها وشهقت وهي بتبكي قلها الممرض: اهدي كلنا على هالطريق

التفتت لعندو وهي بتقول: بس ماقتل

الممرض: الله يرحمها والقاتل اخد جزاتو

قربت منها وحطت راسها عند صدرها وهي بتقلها: ليش رحتي في كتير حكي بدك تحكيلي اياه … ليش رحتي في كتير ايام بدنا نعيشها سوا … ياما قلتلك تعالي عيشي معي بس انت ما كنتي تقبلي … هلق كيف هيك تركتيني لحالي بنص الطريق لاعارفة امشي ولا ارجع … مين بدو يضمني … مين بدو يواسيني هلق حتى مراد تركني ماعاد الي حدا بهالحياة … لااا ياربي لاااااا
عند اخر جملة وقعت بالأرض وهي منهارة … مسكها الممرض واجا واحد تاني لساعدوها تطلع لبر الغرفة وهي بتفقد وعيها بعد يوم طويل كان متل الكابوس أكيد نهايتو هيك رح تكون

صحيت وهي بتشوف حالا ممدة على سرير التخت
وبايدها سيروم تغذية

حاولت تشيلو وتقوم لتطلع برا المشفى وراحت لبيتها لتاخد جرعة طاقة وقوة كبيرة لتكمل اجراءات الدفن تاني يوم لان بتعرف انو زهور ما الها ولاد يديرو بالن عليها حتى بوقت موتها رح تكون هي البنت المصون يلي رح تبر امها بعد موتها متل ما هالام دارت بالها عليها بعززز ضعفها

رجعت للبيت وبقيت قاعدة وهي بتشوف الاخبار يلي عم تداولها الصحافة وصفحات التواصل الاجتماعي عن الحادثة يلي صارت بهالليلة المشؤومة

#اربعين_يوم مرو هيك وهي بالبيت وحيدة بلا حياة
دقت الباب سارة وهي بتقول: افتحي يانرجس

بقلة حيلة فتحتلها الباب ودخلت

كعادتها دخلت سارة وهي حاملة أكل حطتو عند الطاولة وهي بتقول: اف منك ليش هيك البيت

بس نرجس ما اهتمت قعدت بإهمال من دون ما ترد

فتحت الشباك لتدخل الشمس وتهوي البيت قالتلها نرجس: سااارة بكفي سكريييه

سارة: قومي ولييي خلصيني بكفي حزن

نرجس: سارة ما مليتي مني كل كام يوم بتجي بتعملي نفس القصة

قربت وضربتها على كتفها وبخصرها دفشتها على كتفها وهي بتقول: مارح حللل عنك اليوم جبتلك اكل بس المرة الجاي قال ماما بدك تروحي لعنا اشتاقتلك

ابتسمت بحزن وهي بتقول: بفرحتك

ضحكت وهي بتقول: بفرحتي مارح كون فاضيتلك بدي روح مع زوووجي

هلق خلتها تضحك من قلبها قالتلها: أي هاااا من زمان اضحكي هيييك

قعدت بقربها وهي بتفتح الاكل وحطت قدامها صحن كبسة مزين بالجاج والمكسرات
حملت معلقتها سارة وهي بتقول: اووو ما بتتفوت تعالي دوقي

اكلت معها ببرود وهي بتقول: اتصلو اليوم من الشركة شفتي ناجي باعها قبل ما يهرب وقالولي روح جيب اغراضي ورح يعطوني تعويض

سارة: أي منيح

نرجس: بس انا مابدي اطلع معلش تروحي أنت

لفت اجر على اجر وهي بتقول: لا مافاضي

نرجس: ساااارة الله يوفقك

اكلت وهي بتكمل: يوه قلتلك ماني فاضي عندي عرس بنت خالي

نرجس: أي العرس بالليل

سارة: بس انا مشغولة طول النهار

نفخت وهي بتقول: اففف يعني هلق مجبورة اطلع

سارة: اي اي طلعي

بطرف عينها راقبتها ولاول مرة نرجس ما بتكشف كذبتها كانت ببساطة بتقدر تروح بدالها ببس ما بدها كرمال صاحبتها تطلع من هالسواد يلي عم تدفن حالا فيه

#تاني_ يوم طلعت نرجس وهي لابسة بنطلون جنز أسود وفوقو كنزة سودة رفعت شعرها كعكة ونزلت غرتها وحطت نظارات سود كبار على عيونها وجزدان صغير على خصرها

مشيت باتجاه الشركة اول ما دخلت شافت سكرتيرة جديدة قاعدة بدالها
دخلت وهي بتقول: مرحبا أنا السكرتيرة القديمة

وقفت وهي بتستقبلها: اهلين انسة اتفضلي
طالعتلا كرتونة فيها اغراضها وهي بتقول هاي اغراضك ضبيتلك اياهن

اخدتن منها وفتحت الكرتونة وشافت كل اغراضها سكرتها وضمتها لصدرها واستاذنت لتطلع بس السكرتيرة قالت: المدير الجديد قال بدو يشوفك لو سمحتي استني

خلال دقيقة كانت قاعدة قدام المكتب شافتو كيف بيتطلع عليها من فوق لتحت
اتنحنت وهي بتقول: شو بتريد مني

المدير: انا بصراحة سمعت عن شغلك والتزامك وحابك تشتغلي عندي

من نظراتو ما ارتاحت حملت كرتونة اغراضها وهي بتقول: شكرا الك استاذ بس انا مابدي اشتغل عن اذنك

ارتاحت لما طلعت من الشركة وحست شقد كانت كابسة على نفسها وخلتها تتذكر الماضي كلو
اتنفست براحة ومشيت برا المكان كلو
لما طلعت من الباب اتصلت فيها سارة فتحت الجوال وسارة بتقلها: وينك انت خلصتي

نرجس: اي هلق طلعت

سارة: انا ووليد قاعدين بالكفتيريا تبعنا يلي ع البحر تعالي بتغيري جو

نرجس: بلاها بدي روح ع البيت

سارة: نرررجس خلصينييي عم استناكي

اتنهدت وهي بتطلع بتاكسي لتوصل للمكان يلي كانو يلتقو فيه سوا
لما وصلت وقف وليد وهو بسلم عليها: كيفك نرجس

سلمت عليه وقعدت وهي بتحط اغراضها على الطاولة وبتقول: الحمد لله منيحة انت كيفك