و سألتني اذا بدي مساعدة او لا .
مراد : والله منيح فيهن خير هالجيران .
وفاء : ان شاء الله هيك يكون ، يلا اليوم منتعرف عليهن اكتر .
مراد : كيف ؟؟
وفاء : بدهن يجو اليوم المسا يزوروني .
مراد : من عقلك وفاء لسا عنا الف شغلة و بدي ركب البرادي ، ليش ما اعتذرتي منهن ؟
وفاء : حبيبي والله بستحي اعتذر منهن ، رح اعمل شاي مشان نشربها جنب الفطاير و بعدين بتركب البرادي .
مراد : الله يصبرني .
وفاء : صوت هاني عم يبكي ، حبيبي قوم سكتو لبين ما اعمل الشاي و اعملو ببرونة .
مراد : ماشي .
___________________________________
#بقلم_فتاة_من_ورق_بسمه_السباعي

حلا : كيف شكلها اديش بتتوقعي عمرها ؟؟
ميس : يعني عمرها بالتلاتين .
حلا : ايوا
ميس : و كمان حلفت عليي المسا ننزل لعندها نزورها .
فادية : معقول ! لسا ما تركنت لحتى تعزمنا لعندها .
ميس : وانا هيك قلت لحالي بس شكلها بتحب الصداقات و بتحب تتعرف عالعالم .
فادية : ليش لا .. حقها ، معناها قومي ميس بدلي تيابك خلينا ننزل انا و انتي عالسوق نشتريلها هدية للجارة ما حلوة نزورها اول مرة ايدنا فاضية .
ميس : معك حق امي .
حلا : خديني معك امي .
فادية : لا حبيبتي انتي رتبي البيت و امسحي الغبرة بنكون رجعنا .
حلا : حاضر .

*طلعو امي و اختي وانا بلشت ترتيب و تنضيف .. حسيت يومي رح يكون ممل من أولو .. خلصت تنضيف و رحت على غرفتي صرت اتأمل المكتبة من الشباك ....

حلا : يا الله كيف شكلها من جوا ؟ يا ريتني فتت تفرجت عليها بسرعة قبل ما ارجع عالبيت .
*سرحت بخيالي و صرت فكر بالكتب .. بعد لحظات وعيت على صوت اختي ...

ميس : هيييي حلا حلاااا
حلا : لك اي شبك ، ايمتا رجعتو ؟
ميس : هلأ رجعنا ، قوليلي بشو شاردة ؟
حلا : بالمكتبة .
ميس : عنجد بالمكتبة ولا عم تتفرجي على حدا ؟
حلا : استحي شو هالحكي .
ميس : هههه آسفة عم امزح .
حلا : تضربي انتي و هيك مزح .
ميس : خلص ولو ما تزعلي .
حلا : شو جبتولها للجارة ؟
ميس : طقم صواني بيطير العقل ، لو تشوفي اديش في موديلات و شغلات حلوة مو متل الضيعة مافيها شي .
حلا : بتصدقي والله اشتقت للضيعة .
ميس : بتصدقي والله ما اشتقتلها ولا عم تخطر ببالي .
حلا : صحيح ولي حطي عينك بعيني .
ميس : حطيت .
حلا : شو قصة زيارة الجارة ؟ انا متأكدة في إن بالموضوع لأنو ما معقول المخلوقة اليوم لحتى سكنت بالبيت تعزمنا لعندها .
ميس : بصراحة انا عزمت حالنا لعندها لانو هي قالتلي تفضلي قلتلها المسا منتفضل .
حلا : يخربيتك شو قليلة ذوق .
ميس : قولي عني شو ما بدك المهم اني انخطب .
حلا : يلي بيسمعك بيقول عمرك شي خمسين سنة ، استحي ولا عاد تحكي هيك .
ميس : بتعرفي شو احسن شي قوم جهز حالي لانو انتي ما بيجي منك غير البهادل .
حلا : يا مجنونة من هلأ بدك تجهزي حالك ؟؟
ميس : اي

**بعد ساعات اجتمعنا حوالي سفرة الغدا ...

طلال : حبيبتي بكرا لا تستنيني عالغدا .
فادية : ليش ؟؟
طلال : عندي شغل اضافي بالشركة و يمكن ما ارجع لآخر الليل .
فادية : يعني انتقلنا كرمال نصير قراب شغلك وما ترجع متأخر ومع هيك رح ترجع متأخر .
طلال : شو بدي أعمل مجبور اشتغل كتير مشان اجمع مصاري و حطهن فوق حق البيت مشان نشتري هي الشقة ما معقول نضل طول العمر مستأجرينها .
فادية : معك حق يا عمري الله يقويك .
طلال : اي ست ميس شو سر هالاناقة ؟؟
ميس : هههه لا اناقة ولا شي بابا كل الموضوع انو عنا زيارة لبيت جيراننا .
طلال : ايا جيران ؟
فادية : في ناس سكنو بالطابق التالت والمخلوقة طلبت نزورها مشان نتعرف على بعض .
طلال : اي حلو ، تعرفي عالكل و كل يوم اطلعي مشان تتعرفي عالمدينة اكتر .
حلا : بابا .
طلال : عيونو .
حلا : انتبهت انو في مكتبة قبال بنايتنا بتسمحلي كل يوم انزل ساعة اقرأ من كتبها و ارجع ؟؟
طلال : اكيد بسمحلك حبيبتي .
حلا : الله يخليلي ياك .
طلال : انا شبعت الحمدلله .
فادية : صحة ومية هنا ، قومو يا بنات شيلو الاكل و اجلو الجليات مشان ننزل لعند الجارة .
حلا : حاضر ماما .
ميس : انا رايحة زبط شعراتي .
حلا : تعالي لهون ساعديني الك تلت ساعات قبال المراية .
ميس : حلا بس شوي و برجعلك .
حلا : ولا ثانية ممنوع منخلص شغل سوا و منروح منجهز حالنا ما بيكفي اليوم طلع الشغل كلو عليي مشان حضرتك تنزلي عالسوق مع امك .
ميس : طيب أمري ل الله ، بس ضلي متذكرة طول عمرك هاليوم إني ساعدتك مشان ما تقولي ميس ما بتساعدني .
حلا : اي يكتر خيرك .

#بقلم_فتاة_من_ورق_بسمه_السباعي

*بعد مرور ساعة .. اجت اللحظة المنتظرة بالنسبة لأختي ميس وهي لحظة التعرف على الجارة الجديدة ...

ميس : بعدو انا بدق الباب لانو المرة صارت تعرفني ما بتعرفكن .
حلا : ميس عيب لازم امك توقف اول شي .
فادية : بس انتي وياها ما تفضحونا ، انا بدق الباب .

*بعد لحظات فتحت الجارة الباب .. ابتسمت اول ما شفتها وجهها بشوش و مريح و بتخلي الانسان يحس بالراحة من مجرد ما يتطلع فيها ...

وفاء : اهلا و سهلا تفضلو .
فادية : اهلين فيكي ، الله يزيد