#قدر_فتاة_احلام_دمرتها_الايام

#الجزء_الاول_

انا رح بلش احكي عن حياتي يلي بعد ماقرآت قصص كتير صرت حابة احكي قصتي ورح بلش فيها من قبل مااولد لانو فيها عبرة لانو الانسان لما بدو يخلق بيخلق غصب عن الكل لانو رب العالمين هيك رايد... رح اختصر القصة مشان ماتكون طويلة
الجزء الآول
امي وابي وعندهن ١١ولد ابي معو مرض ربو ومابيقدر يشتغل كل الآشغال لهيك امي كانت تشتغل لانو نحن عيلة مو وسط اقل من الوسط امي كانت تشتغل آزني بجامعة من جامعات حلب وفي يوم من الآيام كان في رحلة للطلاب على آحد المخيمات والمدرسين طلبو من امي تروح معهن بس قبل ماتروح لازم تعمل تحاليل اذا معاها مرض او حامل ف ممنوع تروح وامي عملت التحاليل وطلعت حامل فيني راحت لعند المديرة وخبرتها انها طلعت حامل واخير شي قررت هي والمديرة انها تنزلني ومعها اسبوع لتعمل هالشي لتحسن تروح معهن عالرحلة وامي كانت حابة تروح لانو في زيادة بالرواتب طول الآسبوع وامي تحاول انها تنزلي شربت كزبرا وشاليت شي تقيل مافي فايده ومرة حطيت كيسين شمينتو على بطنها وما كنت انزل
انبهتوا انو الي عمر وبدي عيش خلص الآسبوع وامي ما قدرت تنزلني طبعا هون فصلوها من الجامعة وانا ما متت 😁لصارت امي بالشهر التاسع ولسه ماولدت دخلت بالشهر العاشر عشرين يوم وماولدت لسه اخر شي اتصلت بالدكتورة واجت الدكتورة وولدتها لآمي واجيت انا😇☺️اجيت انا آخر العنقود وبعد ١١ولد
سموني رزان وكنت بيضا وكربوجة كتير
المهم جننتا لآمي لحتى اجيت على هالدنيا وصرت انا الدلوله طبعا شي اكيد لآني آخر العنقود...
وهلق رح بلش بقصتي لما كبرت وصار عمري ١٤سنة ولما بلشت الثورة بسوريا صار قصف كتير على منطقتنا ونزحنا على تركيا انا وامي واختي بابا رفض يطلع معنا وضل بسوريا وطلعو معنا اخواتي الشباب يلي متزوجين ورحنا عل مخيم كنا مفكرين انو رح نبقى اسبوع او تنين اذا طولنا بس ماصار متل ماكنا مفكرين بعد قعدتنا بالمخيم بمدة شهر اجت عيلة من ريف حلب من ام واب وست شباب قعدو جنمبا مافي كم خيمة بيناتنا واتعرفنا عليهن وصرنا صحبة اكبر شب عندهن كان عمرو ١٩سنه واسمو محمد واول ماشفتو حبيتو متل مابيقولو حب من اول نظرة كنت اول مرة بحب فيها طبعا مع انو كنت صغيرة لسه بس هيك صار وبلشت حبو اكتر وبعد خمس شهور زوجنا اختي لواحد من ضيعتنا وضلينا انا وامي وبعد شهر طلع ابي لعنا
ماكان حدا بيعرف اني بحب محمد غير اختي يلي اتزوجت ضليت حبو ست شهور بدون مايعرف ولا حتى اني بينتلو اني بحبو يعني حب من طرف واحد😔
وفجآة صار شي ماكان لا عالبال ولا عل خاطر💔

#قدر_فتاة_احلام_دمرتها_الايام

#الجزء_الرابع_
بلشت المشاكل مع بيت عمي طبعا المشاكل من اول ماتزوجت بس كنت مابعرفهن منيح ومابدي اخرب بيتي وضل ساكته بس طفح الكيل يعني مابكفي انو ممنوع روح لعند اخواتي لحالي الا رجل مرت عمي على رجلي اذا اجو لعندي مابصير نقعد بخيمتي الا بخيمه بيت عمي واكلي وشربي بخيمه بيت عمي متل الحبس يعني مابكفي هالشي كلو صار بدهن اياني عبي مي وكب الزباله واطبخ واجلي واخبز وانا ولله الدلوله عند اهلي ولله بعمري ماعجنت ولا خبزت ولا طبخت ومو بس هيك لسه المصاري يلي بيجيبهن جوزي قرش مابيعطيني منهن يعطيهن كلهن لعمي وشو يقلي المعلم ماحاسبهن لك شو احكي لآحكي مرت عمري عملت عمليه دسك بآورفا انا يلي رحت معها وكنت كل دقيقيه جنمبا وعاملا متل امي ضلينا هنيك ست تيام زوجي ماحكا معي غير مرة لما رجعنا عالمخيم صار كلشي علي طبخ جلي عجين خبز .. عندي بنات احمى وحده من جيلي متزوجه وساكنه جنمبنا ووحده عمرا ١٢سنه بس يحرم عليهن اذا وحده بتساعدني ولما صارت المشكله الاخيرة وهي انو عمي صار بدو ياني خدامة وقلي اياها قلي انت من هون وهيك خدامه وبس ولما دق زوجي ليحكي معي قلو تضرب منك لهيك مرة وطلقا وانا بزوجك بدالا اربعه هالحكي قدامي حكاها وقلع اختي من عندي وبهدلني وزلني وانا ساكته والله يشهد علي اني ماغلطت بحقن ابدا في رب بيشهد على كلشي وماخلى زوجي يحكي معي.. تاني يوم اتصل زوجي وحكا معي وحكينا بالمشكله المشكله طويله وصار مشاكل كتير غيرها بس عم اختصر طول ما زوجي عم يحكي معي عمي يبعتلي بنت حماي كل شوي بدو التلفون بدو يدق لرفيقو قال كل خمس دقايق يبعتلي لاخر شي قلتلو لزوجي انا مابحسن ضل اخبز بخدمن بعيوني بس الخبز صعب علي وبعدين في بالسوق بيخبزو بأجرة ولا شو بقلي لأ انتي بدك تخبزي قلتلو طيب وشو كمان قلي يا بتختاري يا انا يااهلك
قلتلو شلون يعني ؟؟؟! قال امك ممنوع بقى تحكي معها ابدا منعا باتا واخواتك البنات ممنوع تشوفيهن اخواتك الشباب بيجو اهلا وسهلا وبس قلتلو طبعا بختارك سبحان الله الله انطقني هيك لانو وقتا زوجي كان عم يفكر لما يجي عالمخيم ياخدلي دهباتي ويذلني ويتزوج علي من ورى نق ابوه وتاني يوم اجى اخي الكبير ليفهم القصة بس هوي اخدني لعندو عالخيمة لآحكي براحتي اكتر ورحت معو ع ساس نحكي بالمشكله ويرجعني رحت معو وحكيت كلشي
اخي الكبير :بدك ترجعي لعندن
اانا:لا انا بدي اتطلق مشان الله ماعاد فيني اتحمل
اخي :طيب متآكده
انا :اي
اخي بدق لعمي وبقلو ماعاد الكن مرة عنا والمسا بدقلو اخي بقلو في مشكله اذا جينا اخدنا غراض اختي كان في الي عندن شهاده التاسع وكرت فيو صور عرسي وشغلات مهمه صور اخي يلي استشهد الله يرحمو شو بقلو عمي ؟؟! اختك مالها شي عنا اصلا اخدت كل غراضها وبيفصل الخط وربي شاهد اني مااخدت معي ولا غرض ما طلعت غير بالعبايه حتى شنتة ماطالعت معي لانو عساس ارجع بس الله هيك رايد هالحكي هاد عام ٢٠١٦قبل العيد الكبير بتلت تيام هون كان يوم الاربعاء. حردت عند اخي يوم الخميس بدي اقطع وانزل لعند اهلي على سوريا طبعا اهلي عندن خبر قبل ماانزل بساعتين حكيت مع زوجي وقلتلو اني رح انزل وقلي مابتنزلي مارديت عليه ونزلت ويوم الجمعة كنت بيبتي بحضن امي وابي وبلشت المعاناة الكبيرة انو زوجي ماكان يقبل يطلقني وصرت بدي اتطلق غيابي والطلاق الغيابي بكون بعد سنه ضليت سنه وبعدين اجيت لروح عالمحكمه صار خلاف بين الفصايل جبهة واحرار واتسكرت المحاكم ضليت اتلت شهور لحتى فتحت محكمة واخيرا ورحت قدمت ع الطلاق الغيابي ضليت شهرين وانا كل يوم رايحه وجايه والقاضي بعتلو لزوجي يطلقني مارد عليه وحظرو وبعدين اتطلقت الحمدلله وخلصت العدة وبلشت قصة جديدة

#قدر_فتاة_احلام_دمرتها_الايام

#الجزء_الخامس_والأخير

بس ماانتهت قصتي هون في قصة صارت معي بهل اوقات يلي مريت فيها ورح احكيها بعد جيتي على سوريا بمدة سبع شهور نزلت التلكرام لانو ماكنت منزلتو وبلشت قصة جديده بعد مانزلتو دخلت على قناة وكان فيها فقرة مشان المشاركة حطيت عالمعروف وشاركت كان صاحب الفقرة شب صرنا نحكي من كلمه لكلمه اخدنا وش على بعض وصرنا كل يوم نحكي طبعا هوي كان يبعتلي الشب هوي من الهيئة الاسلامية مجاهد عمرو ٢٠ سنه ضلينا شي شهرين نحكي عادي هون انا ماكنت متطلقه لسه وانا مابحب اكذب بكلامي حكيتلو قصتي وانو بدي اتطلق وكلشي بالتفصيل وبعد هالشهرين بيتغير كلامو معي وكل يومين بقلي بدي قلك شي بقلو احكي بقلي خلص انسي كل يومين يعمل هيك اخر شي قلتلو اشبك لسه كل يومين هيك شو بدك احكي وخلص... بيتجرآ وبقلي انو هوي صاير عم يتعلق فيني وكذا وبعد يومين بيعترفلي انو بحبني بس انا ماكان عقلي بالحب ولا قلبي كان كل همي اخلص من زوجي صرنا نحكي ونتعرف على بعض اكتر وقلتلو انو مافيني حبو بس هوي ضل مصر انو رح يبقى بحبني ورح يخليني حبو وصار هالشي هاد هوي ساكن بإدلب المدينه وانا بالريف انا ماني بعيده عنو يعني ربع ساعه بكون بضيعتي والله بعتو عليها هوي قائد مجموعه اجاه امر يجيب المجموعه ويجي على ضيعتي وبعد فترا طلب يشوفني من بعيد ووافقت طبعا منقبة شافني من بعيد وعرف وين بكون بيتي وصار كل يوم الصبح يمر من قدام بيتي وشوفو ويشوفني بس هون انا حكيت لآمي كلشي وامي صارت تعرف كلشي بالضبط وكانت معي بكل خطوة وصارت تحكي معو وهوي يحكي معاها وبعدين رجع على ادلب وضلينا نحكي مع بعض وخلاني حبو وهوي بحبني كتير »شافني مرة وحده بدون نقاب هلق من كلامو مبين صادق وانا ماصرلي كم يوم مخلصه عدة اهلو للشب ساكنين بريف حلب وهوي بإدلب وعالعيد الكبير يلي مضى اجت امو زيارة لعندو وعلى آساس يجيبا لتتعرف علي بس ماصرلو مجال يجيبا وامو حكيت معي ومع امي واعتذرت مننا بس لانو ماجاب امو ع العيد امي صارت تكرهو وتحقد عليه وقلتلي لابقى تحكي معو هاد واحد كذاب وبدو يتسلى بس ماتركتو. وضلينا نحكي مع بعض بعد مدة اجى حكا معي وقلي انو ابوه مو موافق ابنو يتزوج وحده مطلقه طبعا نسيت خبركن انو هوي وحيد لآهلو انا خبرتو من الاول انو شو رح يكون رآي اهلو بالموضوع يقلي مادخلهن انا يلي رح اتزوج مو هني وانو هوي مابيتخلا عني ومارح يتركني لو شو ماصار بس عند يلي خبرني انو ابوه هيك قال قلتلو انا قلتلك من الاول وهلق جاي تقلي هالحكي ماعاد احكي معو وصرت اتجاهلو يبعتلي مارد يعتذر مني مارد اهنتو بس مااستسلم وضل يبعتلي ولما شفتو هيك ما قدرت ماارجع احكي معو ولسه مابعرف شو رح يكون جواب ابوه وشو رح يكون جواب امي هوي عم يستنى امو لتجي لعندو زيارة بدو يجيبا تشوفني بل اول بعدين بيخطبني ولهلق عم نحكي مع بعض وصرت بحبو كتير وهوي كمان بحبني مابيتركني زعلانه ابدا ودائما بيعتذر مني واحيانا بكون انا الغلطانه بس هوي بيعتذر وبقلي سامحيني ولما مابفتح بجن وكل يوم بيحكي معي ساعه وتنتين وتلاته وما بمل ابدا باع هاتفو واشترى هاتف جديد واجى ليفعل الرقم نفسو طلع محروق اشترى غيرو ورجع بعتلي من رقمو الجديد لو كان كذاب كان رجع بعتلي من رقمو الجديد كان ضل معي كل هالفترا صرلو ٩تسع شهور عم يحكي معي وامي بتقلي كذاب وهوي هلق عم يستنا لتجي امو زيارة لعندو رح يجيبا تشوفني وبعدين رح يخطبني مابعرف شو اعمل مشان هيك حكيتلكن انصحوني بشي انا اتعلقت فيه كتير وخايفه اخسرو وادعولي آمانة دعوة الغريب مستجابة ادعولي اذا هل ابن حلال فيو خير الله يجعلو من نصيبي واذا كان شر الله يبعدو

#انــــتـــــهـــــت