"اذا بوجودك هيك عم تحكي، كيف وقت تروحوا، انا اليوم رح ابعث ورقة طلاقها!"
____________
رجعت مع اهلي.ما ضل كلمة حتى سمعتها،
اتهمنوا بعرضي بالباطل..
وقت نزلت من السيارة ودخلت البيت كانوا اخواتي الاربعة مخذولات بالبيت وجيزان خواتي عم يستنوا..
واضح من نظراتهم كمية الحقد والكره يلي حاملينه الي..
جبتلهم العار..عيلة مروان السالم اتمرمغت بلارض بسبب ليلى المروان!
طلعت على غرفتي وركضت اختي سهى لعندي مع امي واخواتي...
يا كلبة جيت وسألتك كنت حكيتي..كنا رقعنا فضيحتك..
"ما عملت شي!"
صرخت امي فيني وبلشت تضربني ضرب مبرح..كانت متل المجنونة..
لا تقولي ما عملت شي..وحدة حقيرة كلبة..تفي عليك سودتي وجهي شو اعمل وين روح بوجعي..وهدول خواتك نسيتهن وقت رحتي معه الكلب!
هلكت من كتر الضرب..ورجع نفسي ضاق. كنت لازم عالج حالي لوحدي لأنه ما حدا حيهتم بوجعي.
وحكموا علي بلاعدام.
على فراش الصلاة ضليت ابكي وادعي لربي.."اللهم اني مغلوبٌ فانتصر"
_________

رحت وما دخلوني..انت مجنون سيد مراد..
#ليش شو صار؟
ولشي بس يا اخي ما في امل ما رح يسمحوولي التقي فيها..وبعدين انت بعد ما عرفت حقيقتها ليش عم تركض وراها؟؟؟
#طلعت فيها وجنيت..
هلأ انتِ يعني بتشكي بليلى؟
يعني دخيل الله مراد..اخدوها عند دكتورتين وكل البلد انطبلت بقصتها وانت لسة بدك تبريها..اه بشك فيها ليلى ما كانت مزبةطة. يعني هي بس حبتك كثير وهيك صار!

#ليش حاسس انك غيرانة منها؟

اعوذ بالله..من شو بدي اغار، حبيبي انا اشرف منها. بس الدنيا حظوظ..انت لانك بتحبها انعمى على قلبك..
ماشي هبة..الايام بتظهر كلشي!
_______
بس رجعت للبيت ابي كان بالبيت وواضح انه عارف شو عم يصير..
اطلع فيني وضحك..
#شووو ابي؟ هاي طلعت حبيبتك فاشوش!

ابيييي سكر على الموضوع!

#هيك ارتاح ضميري، شايف ابي اكل الحرام شو بعمل؟!
هيو فضيحة بنته بكل البلد.هاد يلي بوكل حقوق العالم..نهبنا بمليونين ونص ولسة حيشوف اكثر!ليلى مروان سالم حديث البلد...
اطلعت ب ابي وكنت ماسك اعصابي..شمتان شماتة والفرحة ظاهرة على وجهو..

ضربت على الطاولة ...
وعلي صوتي .. ابيي٠ي٠ي٠ي خلص.
ناسي انه عندك بنات؟ هاد عرض..بلا ما نخوض بلاعراض..وليلى اطهر بنت لو طلعت مع زلام العالم كله!
#شوووو..يا قيس شايففف عروقك طقت على ليلى.
مدامك حنون بكرا بتروح لعند مروان..وبتطلب ايد بنته يعني حتى تستر على البنت..هههههههه..حنون ابي..شو ضل عندك نفس تركض ورا الخماخم!

تركته ودخلت على البيت..حاولت اتصل على رقم ليلى كان يعطيني مغلق.
________

فهمت انه قصتي صارت على كل لسان.
وفضيحتي خلال ساعات كانت منشورة....اخواتي الاربعة ما عم يحكوا معي..وقت فضي البيت واختلى ابي فيني..
هاجمني هجوم الوحش الكاسر..
ضربت حتى تكسرت عظامي..
ضربت حتى خلصت انفاسي...
#موت بطيء رح تموتي..اخدك وضحك عليك ابن فواز..حقيرة.
بالليل شكيت بحالي فعلا! معقول انا مو بنت؟ معقول انا غلطت مع مراد..بس انا ولا مرة طلغت معه كل احاديثنا كانت على التلفون!
معقول!
حاولت اتذكر ليلتي مع محمود..ما بتذكر كيف اكتشف انه انا مو بنت. نمت وصحيت على ضرب!
شو صار معي..اعطاني اشرب مية لأنه كنت خايفة وبعد هديك اللحظة ما بعرف شو صار!!
ياااا اللله...
ومراد؟!
اكيد سمع بفضيحتي..يا الله..ساعدني..
كذا مرة حاولت قوم عن سريري اتناول التلفون حتى اتواصل مع مراد بس كان التعب والوجع اقوى مني..
_____
ضميري ارهقني..كيف عملت هيك! يا رب اغفرلي! جبروني..ظلمت بنت بريئة..
اساسًا لو كانوا الاهل مدركين كانوا اكتشفوا انه في شي غلط..
حتى لو عرفت انه البنت مو شريفة حتى احميها كان لازم احكي انه شريفة...ما بعرف كيف غاب عن بالهم هالشي!!
كيف في ناس ممكن يوصل فيهم الحقد حتى يغدروا بعض بهالطرق.
اطلعت على سريري شفت ابني نايم وجوزي جنبي!
ممكن يموتوا لو تفوهت بكلمة هيك او هيك..
والعدل بقول انه الحق يقال والله المحاسب!

مراد!
مراد ممكن يساعظني..
واضح كثير شو بحبها...
واكيد ما بعرف انه الكلب ابوه ورا هيك شي!!
باب التوبة ما زال مفتوح..
وانا لازم اعمل شي!
اخدت التلفون وقررت اتصل لمراد فواز!

#حنين_ابو_صلاح
#كيف_أنسى❤❤❤
الجزء الخامس.
بلشت اكبس الارقام على شاشة التلفون، كثير ارتجفت وخفت، ممكن اخسر ابني وعيلتي!
مممن اخسر شغلي!
واليمين يلي حلفته!
قبل ما اضغط الرقم الأخير الغيت الفكرة من راسي!
ما فيني ادخل بهيك متاهة. فواز حدا مو سهل ابدًا وما في اي شخص بتورط معه بيطلع من تحت ايديه صاغ سليم..
ريم تراجعي عن شو بتعملي.. رميت التلفون من ايدي. فخار يكسر بعضه.
_______
مضى اسبوع كامل! وانا بوحدة. تعاملوا معي متل كأني بعاني من جذام. شعرت بنظراتهم القاتلة. كانوا يتركوا الأكل على باب غرفتي. ويرجع بلا ما المسه. الحزن والبكي صار رفيق الي..كتير مرات فكرت بلانتحار بس كان هاممني كثير يجي يوم واتبرأ من العار يلي لبسوني.

_احسن اللي؟ انه اتزوج وطلق وارجع تزوج كله خلال اسبوع ست هبة؟
#لأ مو هيك بس القصد انه حتى ترتاحي، بلكي طلع نصيبك منيح هالمرة؟
هبة شو رايك تسكري على الموضوع.
#حبيت انصحك ..اساسًا انت محبوسة هون ومراد بكرا برجع لمرته او بتزوج، والحياة بتمشي وانت الوحيدة يلي بتروح عليك، لا تضلي تشتري اوهام.
#ما عم اشتري شي..انا عندي امل انه الجاي احسن وان شاء الله بكون من نصيب مراد..
اطلعت فيني بنظرة غريبة..
#ليش انت عم تحكي مع مراد..
تذكرت كلام مراد..ديري بالك من هبة يا ليلى..
لك لأ شو هالحكي..انا عم عيش بخيالي...
#اكيد؟
ابتسمتلها وهزيت براسي..
اكيد ونص..
#دخلك التلفون الي مرة اعطيتك من مراد لسة معك؟
انكرت بشكل قطعي..وحكيت انه تخلصت منه بنفس اليوم...
دخل ابي لعنا..وتظاهر انه عم يطمن على صحتي..كانت نظرات ليلى لابي غريبة شوية.. وشكيت بشي مو طبيعي!
_____________

ريم الاحمد بالبونط العريض.
افضل واكذب دكتورة نسائية فيكِ يا بلد..
او منكتب:
الدكتورة النسائية تتواطأ مع عصابة من كبار البلد .
اوخدي هاي احلى:.
المجرمة بحق كل النساء..المرأة عدوة المرأة.ريم الاحمد.

اطلعت فيني بغضب..
انت ما بدك تحل عني؟
_ما بحل عنك حتى اعرف الحقيقة!
حقيقة شوووو؟
_ليش عملتي هيك مع ليلى؟
ما عملت شي..
وقف فوق راسي وحمل المسدس..
_انا لطيف بس اذا حدا بستغبني بكون الحكي غير وبتحول لوحش..
_احكي شو صار بالضبط، ابي ومحمود تواصلوا معك قبل زواج ليلى؟
_نزلت دمعتها وصرخت..
وبعدييييين مع هالقصة يلي ما رح تخلص!!!!
اسمع مراد منشان الله ارحموني انا عندي عيلة..انا مهددة..روح لمحمود .
واضمنلي انه انا حكون بأمان بحكي كل شي اقسم بالله.
نزلت المسدس وطلعت فيها..
يعني في شي؟
_هزت راسا وبكت...في شي..
شو هالشي؟
ابوك ورا هالشي..اجبروني اعمل هيك..ما كان عندي وسيلة تانية..انا من يوم هالقصة تدمرت حياتي..ما عارفة عيش..منشان الله..اعمل شو بدك بس لا تحكي لاي شخص انه اعترفت..ليلى شريفة مية بالمية..ما بعرف شو عملوا معا حتى ما اكشتفت انه كانت بنت..
بس البنت كان واضح انه ما نلمست قبل هديك الليلة..كان جرحها لسة جديد..
جنيت. انصدمت.
هاي حكيت الحقيقة ابعد عني واعمل شو بدك!

من صدمتي ما حكيت او اعترضت...
تركتا وطلعت..دمروني..ودمروكِ يا ليلى!

كيف بدي واجهك انه هالشي بسبب ابي؟
كيف رح تكوني غير الي!
شو اعمل يا رب!
روح اضرب محمود؟
اضرب ابي؟
كل هاد هلأ ما بفيد لأنه رح افتح بوابة جهنم على حالي ووارد جدًا اخسرك، مهدود وخائر القوى أنا!
أين السبيل!
أيعقل أن يكون الخلاص الابتعاد!
ايعقل أن اتخلى بعد أن اثملني حبكِ..
كيف لي أن انسى..
كيف انسى..
اخبروني؟!
ببداية القصة حكيت حطوا حالكم مطرحي وهلأ بطلب منكم مساعدة..
محتاااار شو اعمل!
اذا انكشفت هالقصة رح يوصل الدم لركب..يا الله يا ابي لوين وصلتني...
_____
مضى اسبوعين كاملات..ما قدرت اتواصل مع مراد لأنه غصبوني اترك باب غرفتي مفتوح كل النهار..ما كان في مجال ابدًا..
هاد الاسبوع كان هادي نوعًا ما..ما جابوا سيرة العريس المنتظر. شعرت براحة بلا ضرب واهانات...بس ما كنت بعرف انه كل هالشي حتى ما يكون اثار على جسمي تمهيد للعريس الجديد.
الصدمة كانت من امي..
ما بتجووووزه...لك انتِ شووو ..مو حرام عليكم..
اكبر مني ب ١٥ سنة..وببلاد الغربة..انا شو عملت حتى نال هالعقاب..
_امي هيك اريح الك والنا..مع الوقت بتتعودي..
لك انت ام انتييي...شوووو عم تحكي بدل ما توقفي معي عم تعذبني اكثر......
مستحيل..هالشي مستحيل..
اقتلوني طخوني..
بس ما تدمروني.. لسة ما لحقت اطلق..شووووو عم تحكوا يا الله..انا بنتكْ.
#ابوكِ اخذ قراره..بكرا العصر بدنا نسافر...
سافروا انتوا..انا رح ضل هون!
طلعت وتركتني لوحدي..
سكتوا اسبوع كامل..بعد ما شعرت بالراحة حطموني ..ما عادوا فتحوا على الموضوع حتى ما اقدر اعمل شي!

__________
كنت كل الوقت بانتظار تلفون منا. وما كان في امل.
اعصابي مشدودة وسيرة العريس والسفر صارت معروفة..هبة اكدتلي وامي كمان سمعتني كم كلمة بخصوص هالموضوع.
واضح انه ام ليلى رجعت لندواتها وبلشت تتفاخر كعادتها.
كل النسوان عم يحكوا كيف رح تتزوج هالبنت قبل ما تخلص عدتها!
ايه؟ وشو بتجاوب ام ليلى؟

هاد يا سيدي صارت مفتية وبتحكي انه ليلى ما صار شي بينا وبين وجوزها ونفت كل الاشاعات.
عالم ما بحكمها شرع ولا دين..
ضحكت ضحكة صفرة!
على اساس انه ابي وانتِ يلي حاكمكم الشرع والدين..
كل يلي عم عيشه انا وليلى بسبب اطماعكم وركضكم ورا الدنيا الفانية.
____

من كثر الخنقة والضيق يلي شعرت فيه فتحت القران وبلشت اقرأ بسورة النساء ..استوقفتني هالاية.
إِنَّ الَّذِينَ تَوَفَّاهُمُ الْمَلَائِكَةُ ظَالِمِي أَنفُسِهِمْ قَالُوا فِيمَ كُنتُمْ ۖ قَالُوا كُنَّا مُسْتَضْعَفِينَ فِي الْأَرْضِ ۚ قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا (97)