#ليلة_سقوط_روما
#بقلمي_Bayan_Sh
#الجزء_ السادس

بعد ساعة
فتحت عيونها شوي شوي ولاقت حالها بحضنو .. رفعت راسها واطلعت عليه ..: الضابط كريم بعرف اني من طرفك .. وبدو مني اشتغل لصالحو ضدك ..
استغرب دون من كلامها ..: يعني انت ..
روما: ولا مرة فكرت اني خونك .. مستعدة موّت حالي قدام عيونك ولا اني خونك .. الضابط طلب مني كمل معو بالتمثيلية اللي كنت بدي اعملها عليه واعطي معلومات عنك
ضحك دون بصوت عالي ..: حلو كتير ..
روما: شو بدك تعمل ؟
دون : متل ما بدو .. رح نلعب شوي
روما: انت وجودك هون خطر .. لازم تطلع من البلد .. مو مستعدة اخسرك
دون: مو دون اللي بهرب
روما: لكن ..
دون: رح اعطيكي معلومات هو بدو ياها بس مو عني .. عن ناس طلعت جديد بوجهي من بعد ما دخلت السجن .. رح نسلمو ياهن واحد واحد وبعدين بفضالو
رفعت حالها من حضنو ..: انا ما بدي اعرف شي عن شغلك هالفترة .. ورح ابقى بعيدة ..
دون: هدا اللي بدي ياه .. بس لا تأمني للضابط
روما: مستحيل
طبع بوسة على جبينها وابتسم ..: وكيف عرفتي المكان
ابتسمت نص ابتسامة ..: اسمحلي يا مـــــودير بس انت مشغل معك حمير
دون: فؤاد ؟
روما : في غيرو يعني !
🥀فـــــــلاش بــــــــاك🥀
طلعت من الفيلا ووجهها بنقط سم اخدت سيارتها وانطلقت
دخلت لاول دخلة صادفتها بالطريق وركنت سيارتها بعيد عن العين .. طفت اضوية السيارة واستنت لحتى يطلع فؤاد من الفيلا ..
بعد ساعات انتظار
طلع فؤاد من البيت عالموعد اللي اتفق عيله مع دون
وقبل ليوصل للنقطة اللي راكنة روما سيارتها فيها
فجأة طلع قدامو تنين ماشيين بالشارع واضح عليهن انن مسطولين
صدح صوت فرامل قوي من سيارة فؤاد كأنها اشارة لروما لحتى تنفذ خطتها
نزلت من السيارة بالخفى وتخبت ورا السور لحتى تراقب الوضع
شافت فؤاد نازل من السيارة لحتى يطمن عالشباب انهن بخير
استغلت الشوشرة اللي صارت وركضت لعند شنطة السيارة فتحتها ودخلت فيها وسكرت كأنو ما صار شي ..
اطمن فؤاد عالشباب انهن ما نأذو وكمل طريقو
🥀بـــــــــاك 🥀
ضحك دون بصوت عالي ..: انت الكنز الوحيد اللي عندي
____
قاعد بغرفة القعدة على الكنبة وحاط اللابتوب على رجليه وعم يكتب شي
دخلت روما لغرفة القعدة ..: شو عم تعمل ؟
اطلع عليها وشافها حاملة صنية وعليها فنجانين قهوة ..: اووو اجى بوقتو
قربت منو واعطتو فنجان ..: تفضل .. ما قلتلي شو بتعمل ؟
اخد منها الفنجان ..: ما شي مهم .. براجع بشوية شغل
قعدت مقابلو ..: شو مشاريعك اليوم
رفع عيونو عن اللابتوب واطلع فيها ..: عندي شغل بالفرع ..
رفعت رجليها لعند صدرها وضمتن..: لي إجيت لكن؟
كريم وعيونو باللابتوب ..: جيت شوفك
روما: وكيف طالعة حلوة باللابتوب ؟
اطلع عيلها ..: شو بدك ؟
روما: ما بدي شي .. بدي نقعد ونحكي متل زمان
كريم : احكي مين ماسكك ..
قامت من مكانها ..: رايحة ادوش .. خلص شغلك انت
توجهت لغرفتها تحت انظار كريم
تسطحت عالتخت وصفنت بسقف الغرفة وحكت بقلبها ..( اففف شو بارد .. وانا لي هيك بتخربط بس شوفو )
حطتت ايدها على قلبها ( لي قلبي هيك بدق بسرعة .. معقول .. )
سكتت وما كملت جملتها ..( لالالالالا .. لا مو معقول .. انا ما عندي قلب ليحب .. انا عندي قلب بس ليضخ الدم .. افففف ياه .. شو دخلك على حياتي .. كلو بسبب الكلب دون .. هو عايش حياتو ومبسوط وانا رماني بالنار هون ..)
قامت بسرعة عن التخت وتوجهت لغرفة التدريب .. لبست القفزات .. توجهت لشوال البوكس اللي معلقة عليه صورة فؤاد وبلشت تضرب فيه.. كانت الطريقة الوحيدة اللي بتنفس فيها عن غضبها
بعد نص ساعة تدريب .. طلعت من الغرفة وشافت كريم لسا قاعد بشتغل عاللابتوب
قربت منو ..: لساتك هون ؟
بدون ما يطلع عليها ..: كلو هدا حمام !!
سكتت وما ردت ..
اطلع عليها من فوق لتحت وشافها عم تلهث والعرق مغرق جسمها ..: شو هدا .. ماخدة دوش بتيابك
شدت القفزات على ايدها ..: شايف !!
انتبه للحركة اللي بتعملها وكأنها دعوة غير مباشرة للقتال ..: شو بدي تتقاتلي معي ؟
روما بمسخرة ..: ما تعودت اتقاتل مع حدا
سكر اللابتوب وعلى وجههو ابتسامة صفرا ..: تعودي بالاول ما تحكمي عللي قبالك بدون ما تجربي مهاراتو
روما بتكبر ..: اللي بفهمو انك عم تتحداني !!
قام من مكانو ورفع اكمام قميصو ..: ممكن
سبقها لغرفة التدريب ووقف بنص الغرفة .. فك اول زرين من قميصو ..: تعالي
اطلعت عليه من فوق لتحت ونغرمت بشكلو .. بس بسرعة نفضت هاي الافكار من راسها وكزت على اسنانها ..: حفرت قبرك بإيدك ..
بسرعة تقدمت منو وباغتتو ببوكس على وجههو
حط ايدو على وجههو مكان اللكمة .. وردها الضربة بس اتخطتها بمهارة

#ليلة_سقوط_روما
#بقلمي_Bayan_Sh
#الجزء_ الرابع

تاني يوم
وقف السيارة قدام بوابة الميتم .. اخد نظرة سريعة من الشباك على المبنى .. افكار وذكريات كتيرة اجتاحت راسو .. اخد نفس عميق وزفرو بقوة
نزل من السيارة ودخل للميتم ..
صادف وحدة من المربيات ..: المديرة نعمة موجودة
المربية: اهلا استاذ .. موجودة ..
كريم: بدي قابلها ضروري
المربية: حالياً هي بجولة تفقدية للصفوف
كريم: رح انطرها بالمكتب
المربية: تفضل معي
دخلتو عالمكتب وطلعت بسرعة
توجهت لعند المديرة ..: انسة نعمة .. انسة نعمة
نعمة: شبك شو في؟
المربية: في واحد ناطرك بالمكتب .. شكلو واحد مهم كتير
نعمة: مين .. شو اسمو
المربية: اسمو ما بعرف .. من هيبتو نسيت اسألو عن اسمو ..
توجهت المديرة ومعها المربية للمكتب .. دخلت وتمسمرت محلها بعد ما شافت كريم قاعد ورا مكتبها
إصفر وجهها ..؛ اتركينا لحالنا ..
كريم ببرود ..: ما بدك تشربيني شي؟
اطلعت على المربية ..: جبيلنا تنين قهوة بسرعة
طلعت المربية بسرعة ورجعت بعد دقايق .. قدمت القهوة وطلعت
كريم: رح تبقي واقفة هيك مكانك .. خلص ما في داعي للخوف ..
نعمة: شو اللي ذكرك فينا
كريم: في غيرها !!
نعمة: قلتلك ملاك انتحرت بعد ما طلعت انت من الميتم باربع سنين .. لقيناها شانقة حالها بالغرفة
قام من ورا المكتب وتوجه لعندها بخطوات بطيئة .. دفشها على الباب وحاوطها بإيده .. وبحركة سريعة قفل الباب بالمفتاح
كريم ببرود ..: وانت متخيلة اني رح صدق متل زمان ؟
رجفو رجليها ودقات قلبها تسارعت من الخوف ومن نظرات عيونو ..: سلمتك كل اوراقها
كريم: واذا بقلك اني لقيتها ! وطلعت عايشة
توسعت عيونها بعد ما سمعت شو حكى…: لقيتها .. مو معقول ..
مسكها من ايدها وجرها لعند الكنبة .. دفشها عالكنبة .. جاب الكرسي وقعد مقابلها ..: بدي اسمع شو اللي صار من لحظة ما طلعت من هون للحظة تزوير اورق موتها ..
تلبكت نعمة وما عرفت شو تحكي
كريم بصراخ ..: إحكـــــي
نعمة بخوف..: هربت ..
صدح صوت ضحكة كريم بكل المكتب ..: ضحكتيني وانا ما اللي نفس اضحك ..
اطلعت عليه لإستغراب ..: شو المضحك؟
كريم : اخترتي اسهل جواب.. هربت .. وانا رح صدق صح !!
نعمة: هاي الحقيقة
رجع ظهرو بالكرسي لورا ..: انت بتعرفي انا شو بشتغل صح..
هزت راسها بخوف
كريم : لا شكلك ما بتعرفي .. بس رح عرفك عن حالي .. الظاهر نسيتي .. انا المقدم كريم الراوي .. بشتغل بفرع مكافحة المخدرات .. يعني بجرة قلم مني بسحبك لورا الشمس .. بلفقلك الف تهمة وكل تهمة بجيبها على مقاسك بالزبط .. مع اني ما بحب هالاساليب بس انت رح تخليني استخدمهن .. لهيك احكي كل شي وبلاها هالفوتة ..
هزت راسها بخوف ..: رح احكي .. رح احكي ..
كريم: ايــــه هـــا هدا الحكي اللي بنسمع
🥀فـــــلاش بـــــــاك 🥀
بيوم كانت ملاك قاعدة بغرفة الاكل شافت واحد من الاولاد وبحاول يوخد من ولد صغير وجبتو غصب عنو
كزت على اسنانها وشدت على قبضة ايدها
بعد ما خلصو اكل طلعوا كل الاولاد عالباحة
بهدوء قربت من الولد وهمست بإدنو ..: جاسم عاوزتك .. لقيت مكانن نهرب منو
ابتسم جاسم ..: روحي وانا وراكي
ملاك: لا تخلي حدا يشتلق عليك .. تعال بهدوء وراي بس تشوفني رحت لعند البوابة الرئيسية
جاسم: ماشي
بعدت عنو وراحت ووقفت بعيد.. عين تراقف بالمساعدات والعين التانية تراقب شباك مكتب المديرة
بس شافت المساعدات فاتو لجوا تسحبت شوي شوي لعند البوابة ولحقها جاسم
تخبت ورا الحيط وبإيدها عصا خشب كبيرة
جاسم: وينك ملاااك
طلعت فجأة من ورا الحيط ضربتو على ركبتو ضربة قوية خلتو يقع عالارض ونزلت في ضرب على وين بوجعك
بالرغم من حجم جاسم الكبير وحجمها الصغير مقارنة بحجمو الا انو ما قدر يتحرك من الضرب
قربت عليه وهمست بإدنو ..: اذا كمان مرة بتحاول تمد ايدك على شي مو الك يا ويلك مني يا جاسم
تفت عليه ومشت خطوتين ورجعتو ..: واذا عرفت انك خبرت المديرة عن اللي عم فيك هيك كمان ما تلوم إلا حالك .. حيوان
تسحبت شوي شوي ورجعت للباحة وكأنو ما في شي
خلصت وقت الاستراحة ورجعو الاولاد يوخدو دروس
___
بغرفة التدريس لاحظت وحدة من المساعدات انو جاسم مو موجود بين الاولاد .. سألت عنو وما كان في جواب
المساعدة : ملاك روحي نادي عالمديرة
راحت ملاك لعند المديرة .. دقت عالباب بعد ما لبست وجه الملاك .. كان في ضيووف عند المديرة
المديرة : خير ملاك شو في؟
ملاك: انسة نعمة طلبت مني الانسة سعاد خبرك انك تيجي عالصف ضروري
نعمة: اكيد عملتي شي ست ملاك
ملاك ببراءة ..: لا انسة ابداً
نعمة : لكن شو في
اطلعت ملاك بالرجال يلي قاعد عالكرسي مقابل المديرة ..: احكي انسة

#ليلة_سقوط_روما
#بقلمي_Bayan_Sh
#الجزء_ الخامس

وقف سيارتو تحت بيتها
التفت عليها ..: فكري بالموضوع منيح .. ما بدي منك جواب هلق .. رح استنى منك بكرا ادقيلي بهدا الموعد .. ورح اعرف انك وافقتي .. بس اذا ما وافقتي لا عاد تخليني المحك كل حياتي .. لانو اذا بلمحك كمان مرة ما رح اعطيكي متل هاي الفرصة
هزت راسها ونزلت
مشى بسيارتو بدون ما يطلع عليها
توجهت للمكان اللي بتفضلو .. المكان اللي بترمي فيه همومها
وصلت للبحر .. اطلعت عالسما كان لونها رمادي معلن عن بداية فصل الشتاء .. نزلت للبحر ودخلت لجوا .. غططت المي كل جسمها .. دخلت راسها جوا المي على امل المي الباردة تطفي النار اللي شاعلة بصدرها .. بعد عشر دقايق طلعت من المي .. ركبت الماتور وانطلقت للشارع السريع ..
ماشية بسرعة جنونية كأنها بدها تقتل حالها
كل ما تتذكر دون واللي عملو تزيد سرعتها اكتر ..
وصلت اخيراً لقرارها ..
رجعت عالبيت دخلت للحمام اخدت دش دافي ..
طلعت من الحمام ولبست تيابها .. تسطحت عالتخت اخدت تلفونها ودقت لفؤاد
رن كتير وما في رد .. ما يأست ورجعت ودقتلو مرة وتنين وتلات بس ابداً ما في رد
رمت التلفون من ايدها ..: واحد حيوان .. انت اللي جبتو لحالك .. اخرتك على ايدي
رجعت اخدت التلفون ودقت لكريم ..: ما رح انطر لبكرا .. انا موافقة
كريم: ممتاز
روما: عندي شرط
كريم: شو هو
روما: رح تسلمني الكلب اللي بشتغل تحت ايد دون لالي
كريم: مين ؟
روما: فؤاد الكلب
ضحك كريم..: لوقتها فرج .. بكرا رح اجي لعندك ونتفق
روما: شو حضرتك استحليت الجية لعندي .. لا تحلم … بنلتقي بشي مكان
كريم: ماشي .. عالستة رح انطرك تحت البيت
____
تاني يوم
صحيت من عالساعة وحدة بعد الظهر لانو كانت قبل بليلة ماخدة حبة منوم ليساعدها عالنوم
وجع راس رهيب مسيطر عليها من الليلة الماضية
دخلت للحمام غسلت وجهها لحتى تصحصح
مسكت راسها وشدت عليه واطلع عحالها بالمراي ..: لي بصير فيي هيك .. من مستنقع لمستنقع .. كلو من الكلب فؤاد ..
توجهت لغرفتها واخدت حبتين دوا لوجع الراس .. بعدها عملت قهوة وتوجهت للبلكون
__
عالجهة التانية
كان كريم بمكتبو عم براجع شوية اوراق .. رمى الاوراق من ايده بغضب بعد ما اجت براسو صورة ملاك
ضرب بقهر عالطاولة
..: اول مرة بشوفك معصب هيك .. شبك
اطلع كريم لجهة الباب ..: ماجد .. تعال حاسس حالي رح اختنق
قرب منو ماجد ..: شبك .. شو صاير
اخد نفس عميق ..: ما بعرف شو بدي قلك .. بس الكلام اللي رح تسمعو ما بدي حدا يعرف فيه
ماجد: والله شغلتلي بالي
حمل اغراضو ووقف..: ما بنفع هون .. قوم نروح لشي محل بعيد
ماجد بإستغراب ..: لهالدرجة؟
كريم : مشي يلا قبل ما انفجر
طلعوا من الفرع .. ركب كريم وجنبو ماجد وانطلق
بعد نص ساعة مشي بالسيارة
بلش ماجد يضوج ..: وبعدين ..
وقف السيارة جنب الطريق بمكان مقطوع نسبياً ..: انزل
نزلوا من السيارة وبعدو عنها شوي
وقف كريم وعيونو مسلطة بالعدم
ماجد بنفاذ صبر ..: بدك تحكي ولا شو ؟
كريم بغصة ..: مسكت اللي قتل اللواء نزار .. واللواء خالد .. واللي انقتلو قبلن
ماجد بصدمة … :شووووو .. ولسا ساكت .. وينو .. مسكتو مسكتو ولا بس عرفتو
كريم : عرفتو ومسكتو
ماجد: يعني مسكت دون ؟
كريم: لا
ماجد بغضب ..: كريم لا تجنني .. عم تقطر عليي المعلومات .. احكي جملة مفيدة
كريم: البنت اللي خبرت عن صبري ال*** .. متل ما توقعت طلعت من طرف دون .. وهي اللي كانت ورا جرايم الاغتيال اللي صارت ..
توسعت عيون ماجد من الصدمة .. هجم على كريم ومسكو من ياقة القميص ..: ولسا ساكت !!! انت ما عندك دم .. القاتلة حرة طليقة وانت عامل فيها مخنوق .. لك يا بني ادم شو ناطر .. لي ما رميتها بالسجن
نزل كريم ايدين ماجد ببرود ..: هي بتنفذ الاوامر .. انا بدي الراس الكبيرة
ماجد بغضب ..: وانت متخيل انها رح تسلمك دون ببساطة؟
كريم: ايه رح تسلمني ياه
ماجد: لحظة لحظة.. انت حكيت معها يعني .. الله لا يوفقك .. اكيد بتكون هربت
كريم: لا ما هربت
ماجد بغضب..: شو هالبرود اللي انت فيه
كريم: انا حكتلك مشان تكون معي بالعملية ..
مسك ماجد راسو وشد عليه وصار يروح ويجي حول حالو ..: يا ربي .. يا ربي .. ما عم فيي اتخيل وصدق اللي بتحكيه .. لا انت مجنون رسمي .. وحدة قاتلة .. حشرة .. مربية على ايدين دون بدو ياها تتعاون معو .. لك ومقتنع ..
إطلع ماجد عليه وصرخ ..: يا غبي .. اكيد هاي مؤامرة عليك .. لك انت في بعقلك شي
تخلى كريم عن برودو وهدوئو وصرخ فيه ..: بدك تساعدني ولا لا
اطلع ماجد عليه وشاف ملامحو الجدية..: انت بعقلك .. متأكد ما ضربتك هالحشرة على راسك.؟؟

قصة جديدة: #ليلة_سقوط_روما
............
قراءة ممتعة🦋💙"
#ⴅÂÐЄĦÂ

#ليلة_سقوط_روما
#بقلمي_Bayan_Sh
#الجزء_ الأول

يوم الخميس الساعة ١١:٠٠ قبل منتصف الليل
بقاعة كبيرة باحدى الفنادق متواجد فيها اكبر رجال الاعمال والسياسيين بالبلد
وعلى وحدة من الطاولات كان مجتمع ثلاثة من اكبر السياسيين ومعن العقيد خالد ال***
قربت منن بنت طويلة ببشرة سمرا شعرا كيرلي بني .. حطت قدام العقيد خالد ال*** كاسة عصير برتقال ..
بعد ما شرب كاسة العصير حس بوجع خفيف بمعدتو
خالد : عن اذنكن لحظة
واحد من الرجال الي معو عالطاولة ..: في شي يا باشا !؟
خالد : لا ابداً بالاذن
دخل عالحمام وحاسس سكاكين بتقطع معدتو.. حاول يدخل على التواليت بس كلها مقفولة
وقف قدام المغسلة وغسل وجهو
رفع راسو واطلع بالمراي ، شاف النادلة الي قدمتلتو العصير وعوجهها ابتسامة صفرا
وقبل ما يلتفت عليها قربت منو وحطتت ايدها على رقبتو بحركة سريعة
حس بوجع جنب اذنو بعد ما غرزت ابرة مسمومة برقبتو
حط ايده مكان الوجع وبلش جسمو يتشنج شوي شوي
خالد بألم..: شو عملتي ؟
دفشتو عالارض .. مسكت قميصو بقوة وخلعت الازرار بحركة وحدة قوية .. طلعت من جبيتها قلم روج احمر وكتبت على صدرو بخط كبير حرف ال A .. طلعت من جيبتها خصلة شعر ورمتها على صدرو
همست بكل جحود جنب ادنو..: رحلتك خلصت معنا .. الرجاء ربط الاحزمة .. الوداع
طلعت من الحمام بسرعة ، توجهت لدرج الطوارئ .. شالت الباروكة عن شعرها ونزل شعرها الاسود الطويل على ظهرها .. طلعت منديل رطب من جزدانها ومسحت فيه وجهها لحتى بينت بشرتها البيضا .. نزعت العدسات البنية عن عيونها .. وبينو عيونها المختلفة .. كل عدسة فيها لونين نصها بني ونصها ازرق بلون السما .. لبست بنطلون جينز فوق التنورة ونزلتها بسرعة
نزلت ركض عالدرج وطلعت من الفندق بسرعة
وصلت للمتور يلي كان مركون بعد بشارعين من الفندق .. ركبت وانطلقت بسرعة عالية
رن تلفونها ..: ايوة .. تمت بنجاح .. سلام
__
بمكان تاتي
فتح باب البيت بكل تعب .. فات ورمى جاكيتو على الكنبة وتوجهه لغرفة النوم .. رمى حالو عالتخت بكل تعب وراح بسابع نومة..
نايم طب على وجههو بنفس تياب الليلة الماضية .. ما كان حاسس على شي .. تعب اسبوعين وسهر ليالي تجمعو بجسمو بس رمى حالو عالتخت ..
مرق اربع ساعات .. صحي على صوت التلفون برن بلا توقف
رفع ايده واطلع عالشاشة بنص عين وفتح الخط ..: يعني لو انك مرتي ما بتتصل هالقد .. ماجد اعطيني بس سبب ليخليك ادقلي هالقد ؟
ماجد: اللواء نزار طلب تكون موجود بالفرع خلال عشر دقايق
سكت وما رد
ماجد بصراخ..: كريم وين روحت ؟؟
كريم بنعس..: يلا اقل من نص ساعة بكون عندك
______
بعد ساعتين
وصل للفرع نزل من سيارتو ، شب باخر الثلاثينات ببشرة سمرا وملامح باردة ، طويل
دخل بكل هيبة .. توجه لغرفة اللواء
دق الباب وفات بمعالم باردة ..: احترامي سيدي
اطلع اللواء نزار على ساعتو ..: ما لسا بكير يا استاذ !
حك كريم راسو ..: سيدي والله الرحمة حلوة .. الي اسبوعين ما شفت تختي
نزار بتفهم ..: نحنا بمرحلة خطيرة .. يلا اشرب قهوتك والحقني عنا اجتماع مهم جداً
ضرب كريم التحية وطلع من المكتب
______
كان ماشي بالممر وسمع صوت ضحك معبي الفرع راح لجهة الصوت وكان ماجد واقف مع شرطية وعم يمزح ويضحك
وقف قدامو ووجهو ما ببشر بالخير
وبسرعة زبط ماجد وقفتو
كريم: تقضلي عشغلك .. وانت سيد ماجد شو اللي عم تعملو ؟؟
ماجد: يا رجل رح يطير عقلي.. كل يوم عم يجيبوا للفرع شرطية كل وحدة احلى من اللي قبلها
اخد كريم نفس وحاول يكتم غضبو ..:ماجد اختصر احسن
ماجد: والله تعبت
كريم: انشالله المرة الجاي اللواء نزار بشوفك
ماجد بخوف ..: اللواء نزار .. صحيح يلا نمشي عالاجتماع
مشى كريم مع ماجد وتوجهو لغرفة الاجتماعات
دخلوا وقعدوا مع باقي الضباط حول الطاولة اللي كان اللواء نزار على راسها
اللواء نزار: تم اغتيال العقيد خالد اليوم بعد حفل تكريمو
ضرب كريم عالطاولة ..: كيف هيك وشو شغل كل العساكر اللي كانو بالحفل !
ماجد: كريم اهدا شوي
نزار: نحنا اليوم قدام قاتل خطير .. عمليات الاغتيال يلي عم تصير بالبلد كلها المقصود فيها جهاز امن الدولة
كريم: لسا بكير ، هدا يلي كنت عم قولو
تجاهل اللواء كلامو ..: والتحريات بتقول القاتل هو نفسو يلي مسؤول عن عملية اغتيال اللواء حمزة
ماجد: لازم نتحرك باسرع وقت
نزار: كريم هدا ملف القضية صار معك .. شكل الفريق وباشر بالتحرك
وقف كريم ..: حاضر سيدي
اللواء نزار: بس قبل لازم تتعرف عالرائد اللي رح يشارك معك بالقضية
كريم : مين؟

#ليلة_سقوط_روما
#بقلمي_Bayan_Sh
#الجزء_ السابع

بعد يرمين

طلعت من مكتبها وتوجهت للطابق الارضي اللي موجود في زنزانة وحدة وعليها حراسة مشددة بسبب وجود دون
وقفت قدام العسكري المسؤول ..: افتح الزنزانة
العسكري ..: حاضر حضرة الرائد سهر
فتح العسكري الزنزانة
اطلعت عليه سهر ..: اعطينا شوية خصوصية
طلع العسكري وقفل الزنزانة وراه
وقفت سهر قدام دون ..: وين روما
اطلع عليها دون بلامبالاه..: دايما روما عاملتلك عقدة بحياتك .. وانا عارف ما رح يهنالك عيش غير ما تطلعي روحها بإيدك
سهر بغضب ..: عم اسألك .. وين روما ؟
دون: ما بعرف
عصبت سهر من بروده ..: كل عمرك بتفضلها عنا كلنا
اطلع عليها من فوق لتحت ..: مو من صالحك تفوتي معها بمقارنة .. لانو رح تطلعي خسرانة بكل شي
سهر : لا .. كل عمري احسن منها بس انت كنت دايماً مغمي عيونك ومو شايف غيرها
وقف دون وجر السلاسل ومشى لعندها ببطئ وقرب عليها ..: اثبتيلي العكس ..
توترت سهر من قربو ..: كيف ؟
قرب وهمس بإدنها ..: هربيني من هون .. واللك عليي سلمك روما بإيدي بس اطلع من هون
سهر بصدمة ..: انت عارف وين هي ؟
ابتسم دون ابتسامة جانبية ..: انا اللي مربيها على ايديي
اطلعت بعيونو ..: موافقة
تراجع دون وقعد مكانو ..: بهالسهولة .. ما بتخافي تنكشفي ؟
سهر: رح جهز كل شي وخبرك بموعد التنفيذ قبل بساعات ..
دون: لازم كون طالع من هون باقل من اسبوع .. في بضاعة جديدة كان مفروض استلمها
سهر: كيف يعني .. اساساً انت كنت رح تهرب برا البلد
اطلع عليها نظرة قسمتها نصين ..: دون ما بهرب .. كان تمويه بس ..
سهر : لا تخاف .. خلال يومين ورح كون ناهية كل شي
قربت منو وهمست جنب ادنو ..: اذا بتفكر تغدرني رح اقتلك بإيدي
قرب منها شوي شوي وبحركة سريعة رفع ايده ومسكها من رقبتها وشدها عليه …: مو دون اللي بتهدد يا سهر !!!
انرسمت معالم الخوف على وجهها ..: تتت .. تتركني
دفشها لورا ..: انتبهي لكلامك معي مرة تانية
خبطت على باب الزنزانة لحتى العسكري يفتحلها .. طلعت من الزنزانة وتوجهت للحمامات
وقفت قدام المراي واطلعت على رقبتها .. كانت ايدين دون معلمة على رقبتها .. تحسست مكان العلامة بوجع شديد .. حست كأنو لسا ماسك رقبتها .. غسلت وجهها وتوجهت لمكتبها
دخلت المكتب وطرقت الباب بكل قوة .. وقفت بنص الغرفة ما عم تعرف شو تعمل .. الغُل والحقد بياكلو بداخلها .. عيونها بتنقط سم كل ما تتذكر اسمها ..( روما)..
تمتمت باسمها ..: روووما …رح تبقي بطريقي كل العُمر .. ما رح ارتاح منك ابداً .. دايماً رح تبقي بالمقدمة وانا وراكي .. كل شي عملتلو ياه وما عم يشوف غيرك .. بس لا هالمرة انت حفرتي قبرك بإيدك .. ورح ادفنك انت وحبيب قلبك كريم ..
ابتسمت ابتسامة جانبية كلها شرّ ..
فجأة دخل للمكتب ماجد ..
اطلع عليها وشافها بتتبسم لحالها ..: شبك ؟
تفاجئت من وجودو …: انت من ايمتى هون
ماجد: هلق دخلت .. لي نزلتي عند دون .. ؟
سهر بإرتباك ..: حاولت اخد منو معلومات عن روما !!
ماجد بحيرة ..: روما ؟ مين روما !!
تلبكت اكتر وعرفت انها وقعت حالها بمشكلة ..: ملاك .. طلع اسمها الحركي روما
ما اقتنع ماجد بكلامها ..: وكيف عرفيتي
توجهت لورا طاولة مكتبها ..: دون خبرني ..
ماجد: يعني حكى شي ؟
سهر: لا .. معلومات ما الها اهمية
ماجد: انا بمكتبي اذا احتجتي لشي
هزت راسها بدون ما تجاوب وصارت تقلب بالاوراق
طلع من مكتبها وتوجه لمكتبو
قعد عالكرسي ورجع يتذكر كلام كريم من يومين
🥀فـــــــلاش بــــــــــــاك 🥀..
قاعد بمكتبو براجع شوية وراق .. رن تلفونو باسم كريم
ماجد بلهفة ..: كيفك يا صاحبي
كريم: والله مشتقلك .. زمان ما التقينا .. تعال عندي حالاً
ترك ماجد كل شي بإيدو ..: مسافة الطريق .. سلام
طلع من المكتب وتوجه لسيارتو .. ركب وانطلق بطريقو لبيت كريم ..
وصل للبيت وطلع لعندو
ماجد : والله اشتقتلك يا صاحبي
سلمو على بعض بحرارة ..
كريم : ارتاح .. رح اعمل قهوة مشان نحكي عرواق ..
دخل كريم يعمل قهوة .. اخدها وتوجه للبلكون ..قدم القهوة وقعد مقابل ماجد
كريم : شو الوضع بالفرع
ماجد: تمام .. ما رح ترجع ؟
رجع كريم ظهرو لورا..: حالياً لا .. انا انهنت وكل سنوات عملي طارت بسبب وحدة كلبة ..
ماجد : انسى .. اساساً انا ما بعرف هاي سهر كيف نقلوها لفرع مكافحة المخدرات ..
قاطعو كريم ..: لهدا السبب انا طلبت شوفك .. لازم تنتبه منها منيح ..
ماجد بحيرة ..: كيف يعني ؟
كريم : راقبها .. راقب تصرفاتها ..
ماجد بإرتباك ..: لحظة لحظة .. ما عم بفهم عليك .. انت شاكك فيها .. انها ..

#ليلة_سقوط_روما
#بقلمي_Bayan_Sh
#الجزء_ الثامن_والاخير

وقف سيارتو بمنطقة مقطوعة بالجبل بتطل على المدينة كلها
نزل من السيارة وعيونو مسلطة على اضواء المدينة
بقي على حالو دقايق لحد ما سمع الصوت اللي بستناه
التفت لجهة الصوت وشافها على ماتور لابسة خوذة
شالت الخوذة وانسدل كل شعرها الاسود الناعم على ظهرها بكل انسيابية
قربت منو بهدوء ووقفت جنبو ..: بتعرف شو اصعب شعور؟
اطلع عليها بإستغراب ..: شو؟
ابتسمت نص ابتسامة ..: تشوف حالك عم تندفن للمرة التانية
ابتسملها بحب ..: بتعرفي احلى شي بالدنيا ؟
اطلعت عليه..: شو ؟
لف وجهو عنها ..: انو كل شي خلص
التفتت عليه ..: شو رح نعمل هلق .. رح نسافر سوا
كريم وعيونو مسلطة لبعيد..: لا ..
روما : شو لا .. ما فهمت .. لكن شو رح نعمل
التفت عليها …: انا رح كفي حياتي .. وانت كمان كفي حياتك
روما بإبتسامة ..: ونحنا مع بعض طبعاً
كريم : ما في نحنا .. انا صار لازم روح ..
تركها ما عم تستوعب شو قال .. ركب سيارتو وانطلق بسرعة عالية
لحقتو بسرعة بالماتور ومشت بسرعة عالية
صارت جنبو .. رفعت الغطا عن وجهها ..: اذا ما وقفت هلق رح نتدم
اطلع عليها ..: شو رح تعملي يعني ؟
روما : لا تختبر جنوني ؟
كريم بإستفزاز..: لا حابب شوف جنانك
روما : انت طلبتها
نزلت الغطا على وجهها وزادت سرعتها .. تجاوزتو وما عاد شافها
فجأة شحط فرام قوي بعد ما شافها واقفة بالماتور بنص الشارع
ضرب وجههو بالمقود بسبب الفرام القوي ..: بربي مجنونة
نزل من السيارة وعلامات الغضب على وجههو …: حابة تموتي يعني
شالت الخوذة عن راسها ..: بتحبني ؟
اطلع بعيونها وما حكى
انغاظت منو ..: عم اسألك .. بتحبني ؟
كريم بإستفزاز ..: لا .. ما بحبك
استغربت كلامو …: لي قلتلي انك بتحبني لما جيب عاليونان .. واللي صار بينا ؟
قرب منها وعيونو بعيونها …: مشان استغلك .. لحتى نمسك دون متلبس .. بس انت نهيتي كل شي من عندك وغيرتي الخطة اللي المفروض ننفذها
شغلت الماتور وانطلقت فيه .. وقفت بعيد عن كريم وسيارتو ووجهها لعندو ..
ضغطت بقوة على مقبض البنزين وهي واقفة مكانها وعملت وراها غبرة قوية
صرخت بكل صوتها ..: بتحبني
استغرب تصرفها وما رد عليها
روما : انت طلبتها ..
تركت مقبض الفرامل وداست على مقبض البنزين وانطلقت بإتجاهو بسرعة عالية
ثواني واستوعب كريم اللي بتعملو وفهم على شو ناوية
وقبل ما توصل للسيارة وتصتدم فيها .. صرخ بكل صوتو …: لك بحبك يا مجنونة
شحطت فرام بسرعة ووقفت الماتور قريب
نزلت عن الماتور وراحت لعندو
حط ايده بشعرها وقربها منو وهمس ..: شو عم تحاولي تعملي ؟
روما بحب ..: بحاول خليك تفهم اني بحبك
كريم: ايمتى بدك تبطلي هاي التصرفات الطايشة .. ايمتى بدك تفهمي انو مو كل مرة بتسلم الجرة .. لايمتى بدك اضلي انانية بتصرفاتك وما تعملي حساب لشي
روما بعدم فهم …: لشو هالمحاضرة هلق .. هو سؤال وجواب .. بتحبني ايه او لا .. لشو طولة السيرة ؟
اطلع بعيونها ..: لازم تفهمي انني ما عاد فيي اتحمل كل تصرفاتك الطايشة.. تعبت بكل مرة كنت تتعمدي تأذي حالك لحتى تبيني للعالم انك ما بتخافي ..
روما: بس انا فعلاً ما بخاف
صرخ بوجهها ..: بس انا بخاف ..
روما : من شو بتخاف؟
شد ايده على رقبتها وعيونو بعيونها ..: بخاف اخسرك ..
روما : يعني بتحبني !
كريم: انت الماضي بنسبة اللي .. الماضي اللي ما ممكن انساه ابداً .. الماضي اللي بنيت عليه حاضري وكنت ناوي ابني عليه مستقبلي
روما: مستقبلك .. كنت ناوي!!.. ما بدك كون موجدة بمستقبلك؟
غمض عيونو بقهر .. بس كان مجبور ينهي الموضوع هيك ..: روحي ملاك ..
روما: ما رح كون موجودة بمستقبلك .. جاوبني
كريم بغصة ..: ما ممكن تكوني بمستقبلي .. روحي من هون .. ما عاد بدي شوفك
مسكتو من ياقة قميصو ..: لك ليش .. ليش عم تعمل هيك ..
كريم : انا ما فيي اتخطى كل شي عملتي .. انت بالنسبة للدولة ميتة .. بس بالنسبة لالي لسا عايشة .. ما فيي انسى شي من اللي عملتيه ..
شدت على رقبتو ..: رح تخلف وعدك للمرة التانية ..
كريم: ما كان وعد
روما بقهر ..: شو كان ؟
لف وجهو للجهة التانية : فيكي تقولي صفقة ..
توسعت عيونها ..: صفقة!
مسكت وجهو بقوة .. حطت عينها بعينو …: قلي انها صفقة وعيونك بعيوني ..
كريم :…
روما بصراخ .. قـــــــول !!
اطلع بعيونها ..: صفقة .. وبس صفقة .. وانا ما بحبك .. ولا بدي تكوني بمستقبلي .. وانا عندي حياة بدي عيشها .. بس انت مو فيها .. بدي تطلعي من حياتي نهائياً .. ما بدي شوفك لحتى موت ..
ارتخت ايديها عن وجههو بعد كلامو اللي صابها متل اسهم بصدرها ..: لي كل هدا ..

#ليلة_سقوط_روما
#بقلمي_Bayan_Sh
#الجزء_ الثاني

وصلت السيارة الموجود فيها دون لمنطقة بعيدة عن المدينة
نزل منها دون ورجالو وقامو بعملية تفتيش دقيقة لدون لحتى ما يكون اي جاهز تتبع وشلح كل تيابو ولبس تياب جديدة
وصلت سيارة تانية
ركب فيها دون واعطى اشارة لرجالو بتفجير السيارة وانطلق
_____
وصل للفيلا
نزل بكل ثقة وكان بإستقبالو فؤاد وتنين من رجالو
فتح فؤاد ايده وحضن دون ..: والله طولت الغيبة يا دون
دون : يلا اجمعلي كل الرجال بسرعة
فؤاد : بإنتظار وصولك
نزل دون لغرفة الاجتماعات وكان الفريق كامل بإنتظارو
حرك حجر عينو وكأنو بفتش على حدا
قرب فؤاد منو ..: بعدها ما وصلت
دون : وينها ؟؟
فؤاد : على وصول
وقف دون عراس الطاولة اخد نفس عميق ..: احلى ما فالحياة هي الحياة .. والحياة يعني حرية .. والحرية يعني دون .. وبما انو دون طلع معناه رجعت الحرية ورجعت الحياة.. يا رجال رح نبلش شغل عالثقيل وما رح نرحم حدا .. واول واحد رح نفتتح فيه المسيرة هو المقدم كريم الراوي ..
فؤاد: هدا حصتي
دون : لااا هدا من نصيبي انا .. انا وبس
فؤاد: حلال عليك
..: نورت يا مـــــــــوير
التفت دون للصوت كانت روما واقفة وراكية حالها عالباب
دون: فؤاد خد الشباب وانصرفو
صرخ فؤاد..: يلا شباب انصراااااف
قرب فؤاد على دون وهمسلو ..: من شاف حبابو نسي اصحابو
طلع فؤاد والشباب من المكان
دون: اميرتي الصغيرة
ركضت بكل سرعتها ونطت لحضنو وتعلقت برقبتو
بادلها دون الحضن بكل اشتياق ..:اشتقتلك
ضلت متعلقة برقبتو وبتشم بعطرو ..: يااااه قدي كان نفسي بهالحضن
دون: وانا كمان
فلتت رقبتو ووقفت قدامو
حط ايده على وجهها وركز بعيونها ..: روما.. ما غلطتت لما سميتك روما .. عيونك فيهن سحر روما وجمال روما
🥀فــــــــلاش بــــــاك🥀

قدام ميتم كبير بالبلد وقفت سيارة سودة فخمة .. نزل منها السائق وتوجه للباب الخلفي من السيارة
فتح الباب ..: تفضل آسر بيك ..
دخل اسر من باب الميتم بكل هيبة .. توجه لمكتب المديرة
قامت نعمة من مكانها ..: اهلا اهلا آسر بيك
آسر: وين ملاك ؟
نعمة: يلا جاهزة رح ناديها
طلعت نعمة لعند ملاك ..: يلا حبيبتي وصل آسر بيك .. متل ما وصيتك ، اذا حسيتي بالخطر بتهربي فوراً
ملاك : لا تخافي عليي
نزلت لعندو بقلب جامد
ملاك: انا جاهزة
قرب منها بهدوء..: بتعجبني البنت الفهمانة
ملاك ببرود ..: لا تفكر انك ماسكني من ايدي اللي بتوجعني .. وقت الجد ما بهمني حدا .. بس انا تعودت ما احكم عشي قبل ما افهم
آسر: يلا نمشي
حمل الشنطة وطلع من المكتب .. وطلعت ورا بالخفى متل ما وصاها
طلب من السائق يروح لانو رح يرحع لحالو
ركبو السيارة وانطلقو
كان الصمت سيد الموقف
بس كسر هالصمت سؤال آسر ..: شو بتتوقعي بدي منك
ملاك بكل هدوء ..: واضح انو شغلك مو نظيف
آسر: اعجابي بزيد فيكي اكثر
ملاك: بس بحب اعرف شو نوع شغلك بالزبط
آسر: بدنا ساعتين لنوصل .. بس نوصل بفهمك
وصلو لمكان مهجور ما في اي حدا
نزلت ملاك من السيارة واخدت نظرة سريعة
التفتت لآسر ..: ما لقيت مكان انظف من هيك
سحبها من ايدها ودخل لجوا مبنى قديم ومهتري .. كان في بس كرسيين
قعدها على كرسي وقعد مقابلها
زبط قعدتو وصرخ بكل صوتو ..: فؤااااد
طلع شب من جوا المبنى ..: امرك معلم
آسر: هاي البنت يلي خبرتك عنها .. بدي خلال شهر تكون متدربة منيح ..
فؤاد: عُلم وينفذ
آسر : انا رح روح موعدنا بعد شهر
طلع آسر من المبنى
قرب فؤاد عليها وحط ايده على وجهها ..: ناعمة وطرية
بحركة سريعة كانت ملاك ماسكة ايده ولاففتها ورا ظهرو
همست جنب ادنو ..: شكلك مستغني عن عمرك
فؤاد : يخرب بيتك ما عملت شي
ملاك: ولا تفكر تعمل شي بحياتك كلها .. يلا دربني اشوف
فؤاد: تركيني
دفشتو لقدام خلتو يوقع عالارض
فؤاد: الله يسامحك يا آسر على هالاستفقادة
ملاك : بتقول شي ، ما سمعتك منيح
فؤاد: لا ما قلت تفضلي يا ستي
فاتو لجوا المبنى وكان مكان للتدريب
بلش فؤاد معها بالتدريبات البدنية وبعدها بالتدريب على القواص
خلال شهر كانت تقريباً جاهزة .. وبخلال هدا الشهر خلصو فؤاد من ايدها اكتر من عشر مرات وكل مرة كانت تصل لموتو بس يخلصو من بين ايديها على اخر لحظة..
وبيوم من وجه الصبح دخل عليها فؤاد وهي بتتدرب عكيس البوكس
فؤاد : انت ما بتتعبي ؟
ملاك: نفسي اعلقك مكانو للكيس
فؤاد: الله يريحني منك على اهون سبب .. يلا تفضلي معي آسر ناطرك
ملاك: يلا امشي
طلعوا بالسيارة وانطلقوا لمكان ببعد عن المبنى شي ساعة
كان مستودع بنص الغابة
نزل فؤاد وملاك من السيارة

#ليلة_سقوط_روما
#بقلمي_Bayan_Sh
#الجزء_ الثالث

بصالة كبيرة بواحد من الفنادق اللي بالبلد .. كل حدا بيجي لهون لغاية معينة .. شي جاي يصرف مصاري على لعب البوكر .. شي جاي مشان رغباتو الشهوانية .. شي جاي يعوض خسارة.. وشي جاي مشان ينسى همومو ويغرق حالو بمتاهات جديدة
عوحدة من الطالولات كانت قاعدة روما بكل ثقة عم تلعب بقلب قوي وما هامها شي ..
فجأة حست بإيد انحطت على كتفها .. رفعت عيونها لفوق وشافت واحد غريب واقف جنبها وايده على كتفها بكل وقاحة
مسكت ايده ونزلتها بكل هدوء .. بس رجع حطها على كتفها
نزلت عيونها واخدت نفس وتمتمت ..: انا ما عم احسِن عيش ليلة هادية بدون ما كسر راس حدا
قرب وجهو منها ..: حكيتي شي
بحركة سريعة رجعت راسها لورا وضربت وجهو بمأخرة راسها ..
من قوة الضربة اختل توازنو ورجع لورا والدم على انفو
هجم عليها وحاوط بإيده رقبتها
روما من بين اسنانها ..: انت طلبتها
رفعت رجلها وضربتو ضربة قوية تحت الحزام
ترك رقبتها ووقع عالارض موجوع
اطلعت عليه بإحتقار ..: لما بدك تدخل على عش الدبابير بدك تعمل حساب لسعهن
حملت حالها وطلعت من الصالة
قبل ما تطلع من الصالة كزت على اسنانها ورجعت لعند الرجال وعيونها بنقطو غضب .. مسكت قنينة مشروب وكسرتها براسو
اخدت نفس ..: لسا ما نشفى غليلي .. انا بعرف كيف ربيك
حاولو حراس الصالة يهدوها ويمسكوها بس ما عم يقدرو
انتبه واحد من الحراس على الرجال اللي ضربتو مرمي عالارض وفي دم نازل من راسو
صرخ فيها ..: لك انت شو عملتي .. اطلبو الاسعاف
صرخت روما ..؛ اسعاف شو .. خليه يموت لحتى يعرف كيف يتحرش فيني تاني مرة
الحارس: امسكها لا تخلوها تروح
مسكوها تنين من الحراس والثالث طلب الاسعاف وواحد طلب الشرطة
روما بتهكم ..: ولااااو كل هالشي مشان واحد ما بسوى قشرة بصلة .. متحرش حيوان
الحارس : هدا صاحب المكان اللي حضرتك فيه
روما بإستهزاء ..: OMG. ياه ما عاد فيني وقف على رجلي من الخوف .. اسندني .. وشو اعملو . غلط وتربى .. نقطة واقلب صفحة
لفت حالها مشان تمشي .. بس الحارس كان اسرع منها ومسكها من ايدها
الحارس؛ على وين يا حلوة ..
لفت ايده وحطتها ورا ظهرو ..: بتحب لقحك جنبو !!
بنفس الوقت وصل الاسعاف للفندق وبعدها وصلت الشرطة
حملو الاسعاف صاحب الصالة والشرطة اخدت روما للمخفر
__
بالمخفر
خبط الشرطي المناوب على الطاولة بعصبية ..: عم احكي معك .. وقفي متل الناس بلا ما حطك بالحجز
روما: لي جايبيني لهون وانا اللي مُعندى عليي
الشرطي : فتحتي راس واحد وبتقوليلي مُعتدى عليه !!
روما: تحرش فيي اسكتلو!
الشرطي: لا افتحي راسو
روما: وهدا اللي عملتو .. تحرش فيي ودافعت عن حالي .. بسمو بالقانون الدفاع عن التفس
زادت عصبية الشرطي اكتر من برودها وصرخ ..: يا عسكري
دخل العسكري
الشرطي: خدها وحطها بالحجز ليبان لالها صاحب
قرب العسكري منها
بعدت عنو وقربت لمكتب الشرطي ..: انت لو تخليني اقابل واحد رتبتو اعلى منك رح تكون مبسوط
صرخ الشرطي:يا عسكري ..
روما: انت عارف انو فرع مكافحة المخدرات قالبين الدنيا عليه لهدا الحشرة ومو عارفين يمسكو عليه دليل
ركز الشرطي معها وبكلامها
روما: وانا عندي الدليل
صفن بكلامها شوي ..: يا عسكري خليك معها هون ..
طلع الشرطي من مكتبو وتوجه لرئيسو وخبرو بكلامها .. طلب من رئيس القسم انو يتواصل مع فرع المخدرات باسرع وقت
_____
بعد ساعة
وقفت روما بنص المكتب ..: انا لامتى بدي ابقى ناطرة .. انتو مفكرين اني هالقد فاضية
الشرطي: احترمي حالك ولي بلا ما ارميكي بالحجز
روما : جرب اشوف ..
خبط الشرطي عالطاولة..: بلا وقاحة .. لا تخليني اقلب عوجهي التاني
كانت رح تحكي وترد عليه بس سكتت لما شافت الباب انفتح ودخل منو شخصين والشرطي وقف واعطى التحية
الشرطي: احترامي سيدي .. تفضل حضرة المقدم كريم .. تفضل حضرة الرائد ماجد
كريم: وين البنت اللي قلت عليها
روما: بنت!!
التفت كريم للصوت وشاف روما واقفة وعلى وجهها علامات انزعاج
ركز فيها منيح وبلش يراجع ذاكرتو وين شافها
صحي من شرودو على صراخها
روما بصراخ ..: مين هدول اللي جايبهم .. لحظة مو انت تبع الفراولة
صدحت ضحكتها بكل المكتب
ابتسم كريم ابتسامة صغيرة بعد ما تذكرها وعرف وين شايفها
اطلعت عليه روما وشافت ابتسامتو..: وانت عشو بتتبسم
صرخ فيها الشرطي..: احترمي حالك
روما : انا محترمة غصب عنك
رفع كريم ايده ..: فيكو تتركونا لحالنا
الشرطي: حاضر سيدي
طلع الشرطي وماجد من المكتب وبقي كريم وروما
قعد كريم عالكرسي ورا طاولة المكتب واشر لروما تقعد
كريم: تفضلي انا سامعك .. شو اسمك بالاول