#مجتمعي_القآسي_بقلم_ندآء_الصوالحي

الجزء الأول:

(صار عمرك 28 سنة.. لك الي قدك هلء عندهن ولاد)

كلام بسمعه كل يوم من مرة اخي او احياناً من امي.. كلام بسمعه من اقرب الناس لإلي.. كإنو إلي ذنب اني ما تزوجت لهلء وما إجآ نصيبي..

أنا شام عمري 28 سنة خلصت جامعة وقاعدة بالبيت.. ما قدرت أتوظف بسبب الوضع الاقتصادي يلي عم نعيشه..
انا صبية حلوة كتير وناعمة ومافيني اي شي يتعيب الحمدلله.. عايشة انا وامي وابي واخي شادي يلي بيكون توأمي.. تزوج من 3 سنين وعندو صبي وعايش وهوا ومرتو وابنو عنا بغرفة بالبيت

ام شادي: يا شاام لك قومي امي الساعة صارت 12 وانتي لساتك نايمة رح يأذن الظهر

شام: يا الله ياماما خلص تركيني شوو بدي اقوم اعمل يعني

ام شادي: قومي ساعدي مرة اخوكي بالمطبخ

شام: حاضر ليكني قايمة

طلعت امي من الغرفة وفقت متل كل يوم ملانة وقرفانة وما الي خلق أعمل شي.. ما الي خلق اقوم من سريري واتصبح بسهام مرة اخي.. مابدي اسمع كلامها يلي بسم البدن متل كل يوم.. بس شو بدي اعمل.. مافيني ابقى نايمة ومابهون عليي اترك امي تعاني لوحدها مع مرة اخي..

غسلت وشي وغيرت تيابي وفتت عالمطبخ لعند سهام يلي كانت عم تجلي

شام: صباح الخير

سهام: والله منيح يلي فقتي.. لتكوني مفكرة حالك عروس واليوم صبحيتك

شام: سهام مو فايقة لكتر حكيك

سهام: اي اكيد مو فايقة شوفي قديه الساعة صارت وانتي لساتك ملقحة عالسرير.. انتي اساساً مين بدو يقبل يتزوجك وانتي هيك متل التنبل ماعم تعملي شي

شام: لا اله الا الله.. انا طالعة ساعد امي

سهام: اي روحي روحي انشري هالغسيل فوق السطوح بركي بررركي ها بتلقطيلك شي عريس

تجاهلت كلام سهام لاني تقريباً تعودت اسمع هالنمط منها كل يوم.. صحيح انها عم تجرحني كتير.. بس ما فيني رد واخد واعطي معها بالحكي.. يمكن لانه مابيهون عليي شوف اخي وتوأمي عم يحل بينا او يشوف خناقاتنا لهيك كنت اتغاضي عن هالشي كرمالو وكرمال امي المريضة يلي مابتتحمل الزعل
طلعت عند امي عالصالون لقيت عبود ابن اخي بوجهي اول ماشافني ركض لعندي حملته ورحت قعدت حد امي

شام: ماما وبعدين مع سهام شوفيلك حل معها انا لهلء ساكتة وما بحكي شي ل شادي ع الكلام يلي بسمعو منها كل يوم

امي: خلص ياامي طنشيها طنشيها

شام: منا عم طنشها بس هيا ماا بتبطل برم

امي: يعني هيا شو عم تحكي خلص مافيها شي

عبود: ما تذعلي عمتو ماما هبلة

شام: ههههه ياروح عمتو انت بس عيب ماتقول هيك عن ماما..
امي انتي شوووو قصدك شو عم تحكي لتكوني بتأيديها بلي عم تقوله

امي: ما بأيدها بس هيا ما عم تقول شي غلط والله ياامي الي قدك صار عندهن ولاد ليكي مرة اخوكي اصغر منك والها 3 سنين متزوجة

شام: بحياة ربك ياامي انتي كماان عليي.. لك وانا شو ذنبي.. اطلع دور بالشوارع على عريييس

امي: لا انا ما بقول هيك بس انتي بيجيكي عرسان وع طول بترفضيهن ياامي لإيمتى رح تضلي ترفضي

شام: يا ماما بالله لا تجننيني متى اجا واحد عدل ورفضته.. كل يلي بييجو مدلة عمتي شي متجوز تنتين وشي عمرو 60 سنة حرام عليكي بدك اياني اقبل فيهن خلص لاني كبرت شوي

امي: انتي حرة خليكي قاعدة بلا جوز ولا ولاد

شام: متقلة مني ياامي؟!

امي: اعوذ بالله ولك انتي قطعة من روحي.. بس انا بدي افرح فيكي وشوفك عروس متل كل هالصبايا

شام: ان شاء الله ياامي ان شاء الله

قمت من حد امي يلي كلامها دايقني اكتر من كلام مرة اخي.. ليش الكل عم يعاملني هيك.. ليش الزواج شي مهم لهالدرجة.. شو يعني لو ما تزوجت ما بقدر اعيش بلا زوج!!!
اذا رحت عند حد من قرايبي.. ع طول بيسالو.. شووو ما اجا عريس الهناا؟؟؟ ايمتى بدنا نفرح فيكي!!
صار الكل محور حديثن معي عن الزوج والزواج والله كرهت اطلع من البيت وشوف حدا..

فتت ع غرفتي ومسكت الموبايل لدق لرفيقتي فاتن يلي ما برتاح بالحكي الا معها.. هي رفيقة العمر.. الروح والقلب.. مابنخبي ع بعض شي..

فاتن: شمشوم ياصباح الفل

شام: حبيبتي كيفك

فاتن: تمام مشتقالك

شام: شو عم تعملي

فاتن: ولا شي كالعادة عم اكل برتقان عالاسطوح بركي حدن شافني واعجب فيني ههههه

شام: ههههه لك لو بدو يعجب فيكي حدن كان تركك كل هالوقت انزلي انزلي بلا ما تنحرقي من الشمس وانتي تستني بعريس

فاتن: يييه على عمرك ذكرتيني

شام: شو

فاتن: مو هيفا خطبت

شام: عم تحكي جد والله فرحتينييي

فاتن: اي والله وحياتك ابن عما

شام: طب لييه ماخبرتنا

فاتن: اي شايفة.. عرفت هلء من اختها.. شكلا خايفة نحسدا بعدين

شام: لا مو معقول

فاتن: لا معقول ونص.. هلء بنلاقيها مبلكانا ولغيانا من حياتا وصابغة كنفوشا اصفر ههههه

شام: ههههه هلء كل يلي بيخطبو لازم يعملو هيك معنا شو القصة

فاتن: الله يخلينا لبعض.. ولي اوعي لما تخطبي تعملي فيني هيك وتتركيني لوحدي

شام: لك انا بس ييجي عريس بالاول.. مارح تعرفيلي طريق بعدا ههههه

فاتن: العما

شام: عم امززح