لحقتني وقَعَدت جنبي ..تطلعت عليها وانا مستغرب منها ..
سهى مسكتلي ايدي لأول مره ...
سهى : لا انا مابدي نتطلق...بدي نبدأ حياتنا من اول وجديد ... وخلّينا نعتبر انو نحنا غلطنا بحق بَعضنا بس عنا فرصه العمر كلو لنصلح فيه غلطنا...
انا صرلي فتره عم راقبك وتأكدت انك انت كتير تغيرت وصرت شب بيجنن ..ملتزم ومهذب وشغيل ...
قمت وانا فرحان
ورجعت انام بالغرفه ... وكنت كتير حاببها وطاير عقلي فيها ... وهيه حست اديش صرت حنون عليها وبحبها كتير ...
الكل حوالي لاحظ أني صرت انسان جديد برفع الرأس ...وداومت فتره عند دكتور نفسي بس قطعت وماعاد بدي روح ...وبعد سنه اجتنا بنوته متل القمر ...وسميناها بانه.... كنت كتير خاف ع بنتي من نسمه ألهوا وادعيلا طول الوقت
انا : ياربي دخيلك عاقبني الي واحمي بنتي ..يارب لاتجعلها عقاب الي بالدنيا يارب ....
كانت حياتنا سعيده ومازالت لحد هلق .... صرلنا خمس سنين متزوجين وصار عنا بانه و مازن ولادنا ولهلق نحنا سمنه ع عسل وجميل رجع صار رفيقي وفهمت منه بعدين انو ديالا كانت وحده من موظفات المسبح بالمجمع والشباب للي معها مدربين النادي تبع المجمع ..وجميل دفعلهن لحتى ينفذو فكره انتقامو مني ... وهلق كل مامنمزح مع بعض بيقلي بجبلك ديالا وعناصرها ها !!! ونضحك ...
انا عن نفسي نسيت كل الماضي وسهى كمان نسيت كل شي وتعاهدنا انو نربي ولادنا تربيه صالحه ونذكرهن ونذكر كل شبابنا وبناتنا دايما انو الحياه دولاب... متل مابتزرع بتحصد ...وكما تدين تدان
#انتهت
القصه #واقعيه بكل تفاصيلها الكبيره والصغيره
(( @rwayate📘💙 ))

#الغفران_بقلم_مال_الشام
#ثلاثية #واقعيه

الجزء الثاني

من هداك الحادث .. وبهداك اليوم .. تغيرت كل حياتي ..

كنت صاحي وحاسس على كل شي هن وعم يسحبوني من السيارة .. بس ما كان في اي وجع .. دم مغطي عيوني و عم حاول احكي بس ما قدرت .. بعد ما رفعو السيارة وطلعوني حطوني على النقالة
وسمعت صوت سيارة الاسعاف ، و كمان ما كنت حاسس بأي وجع .. بعيوني بلشت دور على هناء بكل مكان وافكار كتيرة عم تروح وتجي براسي .. ابشع هي الأفكار انو هناء تكون ماتت !!

لوقت ما وصلت على المستشفى وسمعت الممرضين فوق راسي عم يقولو (( حالة خطيرة .. جهزو غرفة العمليات

.. )) ما كنت مستوعب انو الحكي عني لاني فعلاً ما كنت حاسس بألم

بغرفة العمليات ... كان الضو فوق راسي حط الدكتور اصابعو قدام عيوني و سألني بصوت عالي (( هدول كم ؟ )) .. حرك اصابعو يمين ويسار و انا عم تابعو .. بعدين رجع يحكي مع الطاقم الطبي الي معو
وانا رجعت اتطلع بالضو الي فوق راسي .. وما بعرف ليش شفت بالضو وحده حامل حاطه ايدها على ضهرها وعم تمشي .. ضيقت عيوني و حاولت اتطلع اكتر
ضلت عم تمشي هي المرا بعدين تمددت عالأرض و خلفت .. حملت الطفل الي بايدها وصارت تهدهدلو وتضحكلو .. وفجأة قامت و صار الولد يمشي جنبها وهي ماسكه ايدو
يوقع وتوقفو .. يوقع وتوقفو ..صار يكبر الولد وهي كمان تكبر .. هو ضهرو يستقيم وهي ضهرها ينحني .. اخر شي ترك ايدها وفل .. وهي قعدت بالأرض وصارت تبكي ..
ما عاد قدرت هدي حالي و صرت حاول اصرخ .. الي كنت عم شوفو مجرد شريع سريع لحياتي انا وامي .. وبعدها غبت عن الوعي ..

_____________________

هناء : حبيبي .. خالد ؟

فتحت عيوني على صوتها وعلى لمسة ايدها ..

حطت ايدها على راسي وصارت تبكي : الحمدلله انك بخير .. خفت كتير عليك

خالد : انتي منيحه ؟

هناء : منيحة .. مابني شي ..

كانت ايدها ملفوفة و قاعده على كرسي متحرك ..: ليش هاد الكرسي ؟

جاوبتني الممرضه الي واقفه جنبها : ما تقلق زوجتك بخير بس في كسر بايدها وبرجلها ولازم تضل مرتاحه وهي اصرت تجي تشوفك لهيك جبتها على الكرسي المتحرك

ابتسمت و شديت اصابعي على ايدها : الحمدلله على سلامتك

هناء : الحمدلله على سلامتك انت ياعمري ... لو تعرف شو خفت .. هاد الحادث ابشع شي صار بحياتي .. اهلي كلون خافو عليك .. كنا ناطرين لحظة بلحظة لتصحى ونطمن عليك

خالد : ليش اديه علي نايم ؟

هناء : تلات ايام ..

تطلعت حوالي على الغرفة الي انا فيها ..

هناء : بابا جابنا على هاد المشفى بعد ما طلعت من العملية .. هون بيهتمو فينا احسن

غمضت عيوني وكنت حاسس بتعب فظيع .. حتى عظامي كانت عم توجعني ... والوجع بلش بالتدريج لبعد ساعة ونص بلشت اصرخ وهناء صارت تبكي من الخوف
اجا الدكتور و اعطاني مسكن الم خلاني ارتاح وارجع نام بهدوء ..
يومين اضافيات بالمستشفى على المسكنات وبعدين بلش الوجع يصير مقبول نوعاً ما .. كانت هناء كل الوقت جنبي ما تتحرك ولا ثانيه رغم وجعها والكسور الي بجسمها ..

تطعميني بايدها و تحاول تحكي معي بس كنت حاسس حالي داخل بصدمة ولسه ماني مستوعب الي صار معنا .. وكل ما اتطلع على هناء واتخيل انو كنت ممكن اخسرها تسود الدنيه بوشي

هناء : حبيبي .. جبتلك خبر حلو

خالد : ليش الحلو بجيب غير الاخبار الحلوة .. هاتي لشوف بدهن يخرجوني ؟

هناء : يا الله منك هيك حرقت المفاجئة ؟ ..

خالد : هههههههه خلص اسف رح اعمل حالي ما معي خبر وانتي ارجعي فوتي واحكيلي

هناء : حسابك بالبيت .. هلأ رح جهز اغراضك وبعدين منتفاهم

خالد : كيف بدك تجهزيهن اقعدي انتي وهلأ بتجي الممرضة بتضب كل شي

هناء : اوووف لك عنجد مليت حاسه حالي مربطه

خالد : ايه على الاقل انتي صرتي تمشي و عندك ايد تانيه تحركيها .. انا لهلأ مو قادر اتحرك اي حركة

هناء : _ _ _

خالد : بالله خليني شوف الدكتور هلأ لافهم اديش بدي ضل على هالحالة

هناء : بس بابا حكي معو وشرحلو حالتك كلها ..

خالد : اي وشو قال عمي ؟

هناء : قلي انو رح تتحسن بالتدريج بس هلأ ما فيك تمشي بنوب

خالد : اي يعني شو المشكلة بالضبط ؟

قربت وقعدت جنبي على التخت وحطت ايديها على وشي : ما تكتر اسئلة المهم نطلع من هون رح اختنئ

خالد : عيونك

هناء : عيوني ؟

خالد : اي

هناء : شبهن ؟

خالد : بشلو

______________________

طلعنا على بيت عمي وبقينا هنيك شهر ونص .. لوقت ما رجعت هناء تتحرك بشكل طبيعي وصار فيها تدير بالها علي لحالها .. رجعنا على بيتنا .. وفتت على بيتي محمل وعمي وهناء عم يسندوني
بعد ما طلعت منو واقف على رجلي ..

حطني عمي بالفرشة و كان وشو مبين عليه الانزعاج ومانو مبسوط ابداً .. شكرتو مرتين وما رد علي.. بس طلع من البيت رجعت هناء وفتحت الشنته لتطلع تيابنا وتحطهن بالخزانة

خالد : هناء .. شبو ابوكي كأنو مو طايقني ؟

هناء : اه ؟ ليش عم تحكي هيك ابي كتير بحبك بس هو ما كان حابب نطلع من عندن