📚قصص||روايات||منوعة📚

#جمعية_كارهو_النساء_بقلم_امل_احمد
جمعية كارهو النساء (حلقة 3)
@rwayate
ورجعتلكن بعد البوسات والعبوطات والاشيا يلي لساتني ما فهمتا ..

امي: يالا كلكن تجمعو حوالي بدي ملي عيني بشوفتكن

ايهم: شو وينا وفاء .. ما رح تجي؟؟

امي: لا رح تفطر اول يوم مع بيت حماها ويلي بعدو رح تجي

ما قلتلكن عن اختي وفاء .. يلي نسخة مصغرة بالحنان عن امي .. اختي وفاء خريجة ادارة اعمال .. صرلا سنتين متخرجة وهلا عم تدير اعمالو لزوجا وولادو التوام ..

مو قلتلكن الزواج مصيبة .. اربع سنين وهي عم تدرس لاخدت شهادة الجامعة وبالنهاية شووو ؟؟ .. ليكا بالمطبخ مع زوجا ... يلي للاسف خروف متل اخواتي ..

امي: هادي ابني

هادي: روحو لهادي

امي: رفاع راسك من هالجوال شوي وحاكيني

هادي: اي تكرمي .. وهاي سكرنا للجوال .. تفضلي

لؤي: بلا ما تزعل رلوشتك اخي ههههه

لمى: 😂 😂 😂 😂 😂 😂 😂 لك عيب ابن حمايي عيييب شو رلوشة هاي

ادهم: ستحي ولااا

لؤي: لك اي شبكن .. خلص سكتنا

هادي: اي بكون احسن بلا ما هرلك سنانك يا حلو

لؤي: لا دخيلك كلو الا سناني ههههه

امي: عزمتا لخطيبتك ع لفطور ؟

هادي: لا امي ما عزمتا

امي: لكن بتعزما تاني يوم مع اختك وفاء

هادي: حااااضر .. يعني فيني حاكيها هلا ؟؟

ابي: ههههههه قال يعني صرلك ساعة ما حاكيتا .. خود راحتك

هادي: رح اتركن تاخدو راحتكن

اجت مي ركض من المطبخ وهي فارطة ضحك ..

مي : لك سناااء تعي تعي

سناء: شو صاار

مي: لك سعادينك بالغسالة هههههههه

لمى: 😂 😂 😂 😂 😂 😂 اي لحقي لحقي سلفتي

لفت لمى وشا ع رهف مرتو لشادي .. اي شبك سلفتي وكانك بعزاا .. لك ضحكي والله الضحك بيرجعك شباب .. اساليني الي 😂 😂 😂

رهف: شو قصدك سلفتي .. انا ختيارة

لمى: 😂 😂 😂 لك لا يووه شو ختيارة .. بس يعني والله شكلك متل يلي قاعدة بعزا .. يعني هيك ع طول متخانقة مع حالك .. بقلك اضحك للدنيا بتضحكلك .. شوفيني انا قديش الدنيي عم تضحكلي .. لك ع شوي رح تفرط ع قد ما ضحكتلي 😂 😂 😂

لوت رهف بشفافا واطلعت بشادي .. (شادي رح روح ع البيت انا تعبانة كتير )

شادي: اي ماشي حياتي .. بس ليكي غيري الشراشف ولمعي الحمام ونفضي البيت قبل لتنامي

رهف: فففف .. حاضر

امي: الله معك كنتي

رهف: تسلمي مرت عمي

اجا هادي من البرندة .. (امي .. رولا بدا تسلم عليكي)

امي: اي هاتا .. الوو .. اهلين يا بنتي .. الله يرضى عليكي وانت بالف خير

مي: ليكو هالمقوصة عاملة فيها كنة محترمة

لمى: 😂 😂 😂 😂 شو قصدك لموووش

مي: لا ولاشي مرت اخي .. خليكي ضحكي انت

وهيك كانت سهرتنا .. بين ضحك ومزح ومناقرات وسعدنة صغاار .. وكل واحد انتقل ع شقتو استعدادا لاول يوم برمضان .. وبقيت انا ولؤي سهرانين ..

لؤي: واخيرااا هدووء

مي: ايي ابو اللول .. كيفا الجامعة اخي

لؤي: ماشي حالا

مي: وكيفن الصبايا 😉

لؤي: البناات .. اووو .. لك اكتر من الهم ع القلب

مي: هلا هيك .. لك نحنا الجنس اللطيف بتقول عنا هم

لؤي: 😂 😂 الجنس اللطيف ؟؟ لك قولي يا لطييف .. يا عفيييف .. جنس لطيف 😂 😂 😂

مي: لك انت ايمت صرت هيك سقيل وما بتتحاكا

لؤي: من وقت صاحبتك يا قردتي ههههه

مي: هلا هيك صار ... اي ماشي الا ما يجي يوم وزكرك بهالحكي

لؤي: اي ان شاء الله يا حلو .. بس لوقتا تركيني ناام .. هلكااان

مي: اي ومين مانعك .. ليكا غرفتك تفضل

لؤي: اي تصبحي ع خير يا احلا قردة بالعالم .. يوووه قصدي احلا اخت بالعالم

مسكت لمخدة يلي حدي وضربتو فيها وهو هرب ع غرفتو ..

مي: بس والله انك عسل يا اخي (تحاكي حالا)

وهلا رح اتركن لتنامو .. وبكرة بنكفي 😉

#جمعية_كارهو_النساء_بقلم_امل_احمد
جمعية كارهو النساء (حلقة 4)
@rwayate
وهيك الكل نام وبقيت سهرانة لحالي .. وكنت مالة كتير وبدي شي لحتى قضي الوقت فيه لوقت لسحور ...

فتت ع غرفتي انا ورنا واخدت قلم روج لونو احمر فاقع من غير ما تنتبه علي رنا وطلعت ع الحمام ..

لونت وشي كلو بالروج .. ما عاد بين منو شي .. ولبست عبايتي السودا وشالتي السودا يلي كنت مطالعتون من الغرفة ورحت شوي شوي ع الغرفة .. ودخلت بكل هدوء ومشيت من غير ما تحس علي اختي لوقفت وراها بالزبط وهي مدموجة بدراستا ..

مديت ايدي وحطيتا بكل خفة ع كتفا ..

رنا: ففففف مي .. بعدي عني اختي ماني رايقة

شلتا لايدي ورجعت حطيتا ..

رنا: مي حااج .. بعدي عني

شلتا كمان مرة ورجعت حطيتا .. عصبت مني ولفت وشا علي..

رنا: لك م.... م... م....

وقت تطلعت في وشافت وشي نشف الدم بعروقا وما قدرت تكمل ..
نطت متل المجنونة وهي عم تصرخ وهربت ع المطبخ وقفلت الباب وراها .. وانا لاحقتا وفارطة ضحك عليها ..
مطبخنا من التصميم يلي مفتوح من فوق ..
حطيت مجموعة كراسي ووقفت عليهن وطليت براسي عليها من فوق ..

مي: لوين رح تهربي مني ااه

اطلعت رنا علي وغطت عيونا باديها التنتين وبلشت تصرخ باعلا صوتا ..

انا وقت شفتا هيك ما قدرت ثبت حالي فرطت ضحك ..

وما بشوف غير الشحاطة بنص وشي ..

امي: لك الله يغضب عليكي .. لك نزلي نزلي

مي: اي امي .. نازلة نازلة شبك

امي: لك رح تجننينها لاختك يا مقوصة

مي: 😂 😂 😂 😂 😂 امي عم نتسلا

امي: لك نزلي قبل لاسحبك من شعرك .. وركض ع الحمام نضفي وشك بسسرعة

مي: 😂 😂 😂 😂 حاضر امي حاضر

تركتا مع رنا يلي كانت عم ترجف ورحت ع الحمام .. بقيت شي نص ساعة وانا عم نضف بوشي .. لك ما خليت شي ما حطيتو عليه .. لك كنت رح استخدم لفلاش وما كان يروح .. بس مو مشكلة .. المهم تسليت وقضيت وقت..

وبلش تسبيح لسحور . .. والتمو لمى .. وسناء وانا وامي .. جهزنا لسحور ورنا لساتا قاعدة ع جنب وعم ترجف ..

لمى: لك شبك رنا ههههههه .. لك ليش عم ترجفي هيك 😂 😂 😂 😂

رنا: مرت اخي تركيني بحالي دخيلك

لمى: اي حبيبتي ما قلت شي 😂 😂 😂 😂

قربت ع لمى وبلشت احكيلا شو صار .. ولمى عم ترجف من كتر الضحك ..

لمى: ااااااخ يا بتوني .. لك ما عم اتحمل .. لك ليش ما ندهتيلي لشوفا

سناء: ع مين عم توتوتو .. ااه

مي: عليكي مرت اخي

سناء: قطقوطة .. ضبي لسانك

لمى: 😂 😂 😂 😂 😂 😂 قطقوطة ههههه

مي: قطقوطة تخرمشك ... قلتلك ممنوع تقولي هاللقب

امي: لك سكتوووو .. صرلكن ساعة ولسا ما خلصتو .. سبحو وهللو بكون احسن الكن

سناء: حاضر مرت عمي .. روقي

لمى: 😂 😂 😂 اي اي مرت عمي .. ليكنا خلصنا .. بس وينا سلفتي رهف .. لساتا متخانقة مع حالا 😂 😂

مي: هههههه رهف ما بتتسحر بتخاف ع قسماتا

لمى: 😂 😂 😂 الله يرحم ايامك يا سناء

سناء: لا تزكريني لمى .. من غير شي ماني طايقة حالي .. خمسة كيلو زدت وما عم بقدر نزلن

مي: اي حبي بطلي كلي الاخضر واليابس بينزلو

لمى: 😂 😂 😂 😂

امي: لك الله يهديكون بس .. لك وقت فضيل هاد وانتو عم تستغيبو المخلوقة فيه .. تركوها بحالا

خلصنا تجهيز لسحور وفيقنا ابي واخواتي وتسحرنا سوا..

ابي: شادي .. ليش ما عم تاكل معنا يابي

شادي: يسلمن يابي .. رح روح اكل حلاوة بطحينية

امي: الله يهديك يا ابني .. لك في حد بيقرف من امو .. لك والله بغسل قبل لحط ايدي بشي

شادي: اوووف امي .. ماني قرفان بس ما بدي اكل

ابي: اي براحتك يابي .. ووينا مرتك

شادي: مرتي ما بتتسحر .. هلا بتجهز قهوة وبتجي

امي: اي الله يرضى عليها

سناء: هلا صرلنا ساعة عم نجهز لسحور ما قلتيلنا شي وست رهف ع فنجان قهوة الله يرضى عليها

لمى: 😂 😂 😂 😂 😂 هدي سلفتي شبك

امي: الله يرضى عليكن كلكن يا بنتي ويهديكن ويعطيكن

سناء: اي هيك ها مرت عمي .. بدك ايهم يزعل يعني

ايهم: لا ام السوس انا ماني معك بهاي .. انا ما بزعل من امي

لؤي: الله اكبررررر .. لا اصدق ما ارى .. لااااااا .. ايهم بخالف سناااء .. يا ويلتاه

لمى: 😂😂😂😂😂 لك شبك .. قامت الحرب شي سلفي

لؤي: اي هلا رح تقوم مرت اخي بس مو هووون هههههه

وبقينا هيك ع ضحك ودردشة وقهوة لوقت اذن الفجر ... وتوضينا وصلينا كلنا جماعة ورتبنا المطبخ ونمنا ..

#جمعية_كارهو_النساء_بقلم_امل_احمد
جمعية كارهو النساء (حلقة 5)
@rwayate
امي: مي .. مي .. حااجتك نووم فيقي

مي: (مغمضة عيونها) اي اميي .. حرام عليكي حرااام .. انا صايمة .. صاااايمة انااا

امي: والله جد صايمة !! اي حملينا منية بصيامك ست مي .. قومي وليي لحقي صلاة الظهر .. بسسرعة

مي: امي .. بدي ناام

ولسا ماكملت الكلمة ما بحس غير ع كاسة مي ندلقت بنص وشي ..
انتفضت من تختي وما بعرف كيف وصلت لنص الغرفة .. قلبت ع الرجل الوطواط ..

مي: لك شووو هاااد

امي: هاي لتنتعشي شوي .. ع صلاتك بسرعة

مي: ففففففف يا ربي

امي: سمعي ولي مقصوفة الرقبة ما بدي ضوع صيامي عليكي . .. اصصصحك اسمع صوتك طول لنهار .. صلي والحقيني بسرعة

صليت وانا عم جر حالي جر .. حاكم انا وقت صوم ما بعود شوف شي ولا اسمع شي ولا حس بشي .. كل حواسي بتنشل ..

خلصت صلاة وسجدت ع المصلاية ع اساس ريح راسي شوي .. وما بسمع غير صوت من ورايي ..

لمى: 😂 😂 😂 😂 😂 اخخخ يا امي .. لك شووو عم تعملي بنت حماييي

رفعت راسي وانا مفزوعة .. (شبك .. مانك شايفة .. عم صلي .. عم صلي )

لمى: 😂 😂 😂 😂 اول مرة بسمع بصلاة مع شخير وريالة نازلة

مسحت تمي .. واطلعت فيها ... (انا ريالتي نازلة )

لمى: 😂 😂 😂 فتحي جوالك ع جروب العيلة فتحي

مي: شو عملتي لمى .. اه .. شو عملتي

فتحت جوالي بسرعة وما كنت عم لحق ع الرسائل .. يلي كلا ضحك وشي ريالة وشي شد شد اكتر يا معلم .. وشي حيو ابو مسمار ..

طلعت بالرسائل لفوق وانصدمت من يلي شفتو ..
منظري كان مرعب .. راسي مايل ولعابي كلو نازل وعم اشخر متل التور 😥 😥

ضربت بئيدي ع وشي وما بعرف كيف نطيت فوقا للمى ... انا اضرب فيها وهي فاارطة ضحك ..( 😂 😂 😂 😂 لك هدي هدي ابو مسماار هدي )

مي: انا بورجيكي يا لمى .. انا بورجيكي

لمى: 😂 😂 😂 😂 لك حااج ولوو ابو مسمار .. ليكي كيف حركنا لجروب بعد ما كان نايم

عضيت ع شفتي لهدي حالي وتركتا واقفة وفارطة وفتت لعند امي ع المطبخ ..

امي: بلشي بالقطايف ليجو نسوان اخوتك

لمى: 😂 😂 😂 كيفك مرت عمي

امي: اهلين ست فضيحة .. تعي عاونيني ع اليبرق .. عجلي

لمى: وينن سناء ورهف 😂 😂

دخلت سناء من باب المطبخ .. (ليكني سلفتي ... ليكني )

امي: يالا تعي عاونينا يالا عجلي

سناء: حاضر مرت عمي .. بس لشو كل هالعجقة.. طنجرة شوربة وصحن سلطة بكفو وبوفو

امي: اي تعي بلا لعي .. كلو شهر بالسنة يلي كل ولادي بيجتمعو فيه سوا عندي وما بدك اكرمن

رهف: مسا الخير

امي: مسا الورد .. تعي عجلي رهف يالا

رهف: والله تعبانة مرت عمي

مي: اي شي طبيعي لانو ما تسحرتي مرت اخي

رهف: لك انت هون ابو مسمار .. لك شو عم تعمل

لمى: 😂 😂 😂 😂 😂

ما بعرف كيف ضربتا للمى بقرص القطايف يلي اجا بنص وشا

سناء: هههههههههه خلص ابو مسمار رووووق يا عسل انت رووووق

مي: انا بورجيكن

امي: 😂 😂 😂 😂 الله يهديكن

اكتر من تلت ساعات ونحنا بلمطبخ ع طبخ وتفخ وحلو ومدري شو .. خلصت وفتت ع الحمام وانا عم ازحف ع اديي واجريي من التعب .. تحممت وصليت العصر وقرات جزء قران ..

مي: امي انا رح نام .. هلكانة

امي: دخيلك يا ربي ع هالجيل .. روحي روحي نامي .. اصلا ما في منك فايدة

لمى: 😂 😂 😂 😂😂

مي: هلا انا ما في مني فايدة امي ... لكن شو صرلي من الصبح عم اعمل بلمطبخ

امي: اي روحي روحي بلا فزلكة

سناء: مرت عمي ازا القطقوطة نامت انا كمان رح روح نام ... لانو هلكانة انا

مي: لك قلتلك لا عاد تقليلي قطقوطة

لمى: 😂😂😂😂😂😂😂

امي: يا ربي صبرك .. روحو من وشي كلكن .. روحوووو

رهف: وانا كمان مرت عمي

امي: انت اولن يا روحا لمرت عمك

فتت لنام وانا عم سب واندب .. واختي رنا شمتانة في وعم تضحك وعيونا بكتابا ..

مي: اي ضحكي انت

رنا: اي طبعا رح اضحك .. لحتى تعرفي يلي بيعملو مقالب بالناس كيف الناس بتعمل فيهن مقالب وهي مرتاحة

مي: والله جد .. اي درسي انت بكون احسن

رنا: حبي انت ابو مسمااار

مي: لك تضربو كلكن

رنا: وانا 😲 .. اي تعي لهووون .. والله ما بتنامي قبل لتاخدي عبوووطة

مي: تركيني رنا

وبلشت تدغدغ فيني وانا فارطة .. (لك خلص اختي )

رنا: اي هيك ها .. ما تبلى هالضحكة الهي .. موااااه

مي: لك حبي انت مواااه

ونمت ... 😴

#جمعية_كارهو_النساء_بقلم_امل_احمد
جمعية كارهو النساء (حلقة 7)
@rwayate
رح كملكن عن اول فطور برمضان ..
المهم حطيت التمر والمي بتمي .. ما بعرف مين فيهن يلي سبق .. وتشاهدت مرة تانية لانو لساتني عايشة وما متت من عطشي ..

ورح بلش بالاكل .. لك بس هدول السعدين ما عم يسكتو ابدا .. وعم يعيطو ع بعضن ..

مي: لك سناء وقفي اكل شوي واطلعي بولادك .. لك متخانقين ع المعلقة

سناء: اي تركيهن هلا بحلو مشكلتن لحالن

مي: لك ما فيني اكل وهني عم يعيطو ع بعض

ميس : انا رح سكتن عمتو .. تعا انت وياه شبكن اه .. شبكن

غيث: اخدلي معلقتي

ليث: لااا عم يكزب هاي الي

غيث: انت يلي عم تكزب

ميس: هششششش .. سكتو تنيناتكن واطلعو فيني وانا رح اعرف من عيونكن مين يلي عم يكزب .. وعطوني المعلقتين .. يالا

اخدت المعلقتين منن وبدون مقاومة وكتمو وما عاد طلع صوتن .. وانا عم اتصفن بهالمخلوقة وماني مصدقة عيوني ..

ميس: ايييي .. انتو تنيناتكن ما عم تكزبو .. ليش يا حزركم

غيث.. ليث: ليييش

ميس: اي لانو المعلقتين نفس الشي .. ليكن

غيث.. ليث: اي والله مزبزط

ميس: لكن يالا خدو معالقكن وما بدي صوت

مي: هلا انت جد جد بنتا للمى

لمى: 😂 😂 😂 😂 شبك ميوش

ميس: اي طبعا بنتا .. الشغلة بدا شوووية عقل عمتو .. شوية صغيرة

ادهم: يسلملي الفهمان انا

بصراحة ما عم استوعب انو لمى اما لميس .. يعني انو ميس اما للمى والله بتركب اكتر ... ما علينا .. رح بلش باكلي انا ..

لك شبها هاي .. معقول شبعت لحتى قامت عن السفرة ..

امي: شبك رهف .. شبعتي

رهف: لا مرت عمي ما شبعت .. اكلت صحن سلطة رح صلي وارجع كمل اكل

امي: كملي اكلك يا بنتي وبنصلي سوا

رهف: لا مرت عمي .. هيك اريح لمعدتي

امي: اي براحتك

سناء: هههههه دخيلو لبرستيج انا

لمى: 😂 😂 😂 😂 نسيانة حالك سلفتي

لؤي: لك حااج تجروو .. والله صرعتولي راسي

ادهم: ع فكرة .. هالعادة من السنة فحاج عم تعلقو

شادي: لك مين عملا للسلطة هاي

انا حطيت ايدي ع قلبي .. (انا اخي .. ليش فيها شي؟)

شادي: لك كام مرة قلتلكن لا تحطو بقدونس بالسلطة .. لك بقرف منو

امي: حقك علي يا امي .. انا نسيت .. ما عاد نحط بقدونس

هادي: اي ليش الحكي .. والله اكلات ست الحبايب ما الن مثيل

ابي: اي لكن .. هاي ام ادهم هاي مو حيالله

ايهم: يسلمن هالديات امي

سناء: اي ونحنا كمان عاوناها لمرت عمي

ايهم: يسلمن مرتي الحلوة

لؤي .. لك مو قلتلكن .. خواااااريف ما في كلام

مي.. وهيك خلص فطورنا الاول برمضان بين مزح وتلطيش حكي ومناقرات وضحك ولعب .. ومن بعدا لمينا السفرة وتوضينا وصلينا كلنا سوا جماعة ..

ولرجال قعدو مع امي ع البرندة ونحنا كلنا ع المجلى 😔
والسرنوة سناء اخدت القهوة وسبقتنا لتقعد معن ع البرندة ..

لمى: 😂 😂 عجلو لنلحق فنجان قهوة

رهف: لمى .. هلا انت شو مشكلتك .. لك ليش ع طول عم تضحكي

لمى: ما بني شي 😂 😂 .. هيك الله خالقني بحب الضحك والبسط

رهف: اي بس انا خايفة ع حناكك سلفتي

مي: لا تخافي مرت اخي وخافي ع خطوط الكبر يلي رح تبلش تطلع بوشك من كشرتك

لمى: 😂 😂 😂 😂 😂 😂

رهف: هااا .. لا ولوو مو لهالدرجة

مي: لك مرت اخي .. والله شتهيت شوف سنانك والله .. لك تبسمي بس ابتسامة وحدة بس

رهف: اي ما بحب المسخرة

لمى: 😂 😂 😂 هلا الضحك مسخرة .. لك والله ما في بعد الضحك .. مو هيك ميوش

مي: مو مرت اخي مو

لمى: 😂 😂 لك صحيح رنا ليش انت هون بالمطبخ .. روحي درسي

رنا: بدي غير جو .. مليت .. بس بعد نقاشاتكن باين رح غير رايي وروح

مي: لا شو تروحي .. خلص رح نسكت

هلا صح ع طول بنقضي وقتنا نقار ونقير بس وربي احلا وقت هو وقت بكون معن .. بس هاي رهف ضروري طالعا من كشرتا .. فكركن شو لازم اعمل ؟؟

هلا كل يلي قدامي رغوة الفيري ومي .. مممم ... عم تفكرو بيلي عم فكر فيه؟؟؟

لا لا انسو الموضوع والله بتاكلني بلا ملح .. وازا هي ما اكلتني شادي راح ياكلني .. خلص انسووو ..

لحظة .. رح شاورا للرنا ..

رنا: لك جنيتي انت .. والله بتاكلك بلا ملح

مي: ففففف لك والله شتهيت شوفا عم تضحك

رنا: اي بكفي لمى عم تضحك

لمى: وكانو سمعت اسمي انا

مي: بسم الله .. لك لمى حكت جملة من غير ضحك .. الله اكبر

رهف: هههههههههه

مي: لك رهف عم تضحك .. ياااااا الله ما اكرمك

لمى: 😂 😂 😂 😂 😂 😂 لك قامت الحرب عم تكبري
رنا: هههههه لك انو حرب مرت اخي .. والله فرحتنا انا ومي بهاللحظة ما بتنوصف

رهف: اي لهالدرجة هاممكن امري

مي: لا ولوو.. لك صح انت ع طول بتخانقي دبان وشك .. وبتخانقي حالك لحالك .. وكشرة كتييير .. بس والله بحبك من بصبوص قلبي .. بكفي انك مرت اخي حبيبي شادي

وخلصو الجليات واخيرا ع خير وسلامة .. ورجعنا جددنا القهوة واخدنا القطايف يلي من تحت دياتي وطلعنا لعندن ع البرندة وقعدنا احلا قعدة ..

#جمعية_كارهو_النساء_بقلم_امل_احمد
جمعية كارهو النساء (حلقة 8)
@rwayate
متل ما خبرتكن .. رجعنا لتمينا كلنا ع البرندة..

مي: اي لؤي .. كيفك اخي حبيبي

لؤي: من الاخر شو بدك

مي: هلا هيك صار .. شو بدي .. لك الحق علي يلي عم اسال عنك

لؤي: ليكي مي .. انتو حوا مستحيل تسالو عن حدا هيك لله بالله .. الا ما يكون في هدف من وراه

مي: الله يسامحك اخي

لؤي: اي الله يسامحنا الجميع .. بس ما قلتيلي شو بدك

مي: لا تحرجني اخي

لؤي: اي خلص وصلت .. هلا احلا تشكيلة شوكولا لعيونك انت

مي: لك يخليلي ياك الهي .. هات بوسة

لؤي: لك مصلحجية انت .. مصحلجية

رنا: ليش حاسة انو في بالموضوع شوكولا

لمى: 😂 😂 😂 اي لانو مي ما بتعطي بوسات من غير شوكولا

سناء: قطقوطتي .. حسبي حسابي

مي: ليك ايهم سكتا لمرتك بلا ما زعلا هااا

ايهم: لك عم تدللك ولووووو .. رووق ابو مسمااار

لمى: 😂 😂 😂 يحرق حريشك سلفي .. لا تزكرني

لؤي: كل واحد يلتهي بمرتو وما حد يئرب من ميوشتي .. والله بدبحكن

مي: خليلي ياك اخي

ادهم: يالا جهزو حالكن .. صار وقت التراويح

وهيك كل العيلة جهزت حالا للصلاة .. لرجال كلن راحو ع المسجد .. وانا ورنا وامي ولمى ورهف .. وسناء بقيت بالبيت كرمال سعادينا ..

خلصت الصلاة واجواءها الروحانية مع صوت اخي ادهم يلي بخليك تخشع بالصلاة غصب وتنزل دموعك ..

مي: الله يخليلنا ياك يا اخي وما يحرمني من صوتك الهي

ادهم: الله يحفظك يا روحي ويستر عليكي ويهديكي للخير

ميس : جد بابا ما قدرت انو امنع دمعتي وقت كنت عم تدعي بالوتر .. ربي يخليلنا ياك

مهند: ابي .. انا رح صير متلك امام وصلي بالناس لحتى كل اكسب اجر كل اهل الضيعة

ادهم: ان شاء الله يابي .. ان شاء الله

لؤي: اي ميووش .. وهاي يلي وعدتك فيه

مي: لك يسلمن احلا واغلا اخ .. رح اعمل قهوة لنشرب معن

لؤي: لا لا لا تحسبي حسابي عندي سهرة مع رفقاتي

مي: ماشي اخي .. يسلمن

.....................
لؤي.. طلعت من البيت لعند رفقاتي .. طلال وغالب ..

طلال: هلااااا بالشباااب والله

لؤي: لك هلا بشواربك ابو شريك

غالب: لك والله زمان عنكم شباب

قعدنا سوا مع الارجيلة والقهوة والمكسرات والحلووو .. وبلشنا اجتماعنا السري .. اجتماع جمعية كارهو النسااء..

طلال: اي شباب .. الصفحة كل مالا عم يزيدو معجبينا .. ههههه والله طلع في كتير متلنا حاقدين ع حوا

لؤي: لك استنا شوي .. رح تشوف كيف رح تصير اكبر صفحة ع الفيس كلو .. الكل عم يكتشف بخيانة حوا وعم يجو لعنا واحد واحد

غالب: لك لؤي .. بس انو ما عرفنا شو قصتك مع حوا .. انو مين يلي كرهتك بحوا هيك

لؤي: لا تزكرني ولووووو

طلال: اي لا احكي لنشوف

لؤي: لك هاد وقت كنت صف رابع كنت حلو كتير وجنتل .. كالعادة طبعا

طلال.. غالب: 😂 😂 😂 😂 😂

لؤي: اي وكانو تلت بنات رفقات كلن يحبوني ويركضو ورايي .. وانا حبيت وحدة منن .. كان اسما دعاء .. الله لا يوجهلا الخير

طلال: لك ايييي

لؤي: اي وهالسرنوة غدرت في ع اول قرطوس بوضة تقدملا

غالب: بربك جد 😂 😂

لؤي: لك اييييي .. بوقتا كنت رايح ع المدرسة وشفتا واقفة عم تاكل بوظا مع رفيقي .. رحت لعندا وندهتلا
(دعاء: شو بدك لؤي

لؤي: بدي حاكيكي شوي

دعاء: ما عاد بدي رافقك .. لانو ما بتجبلي بوظة .. وهلا روح ولا عاد تحاكيني )

ومن وقتا كرهت كلشي اسمو حوا

غالب: 😂 😂 😂 😂 لك هلا هاي هي قصتك مع حوا

لؤي: لك اي اي ... والله كسرتلي قلبي بوقتا .. اي هاتو لشوف انتو شو قصتكم مع حوا

غالب: والله انا ما كان في بينا شي لوقت شفت مسلسل الزير سالم .. وشفت البسوس والجليلة ومن وقتا كرهت كلشي حوا

لؤي: والله معك حق .. وانت طلال هات لنشوف

طلال: والله يا ابو شريك انا جرحي لساتو جديد .. صرلنا سوا تلت سنين وع اساس بتحبني وعم تستنا لخلص دراسة ونتجوز .. ومن اسبوع ما بسمع الا خطبت ورح تسافر كمان

لؤي: اي بالناقص منا ابو شريك .. ولا يهمك ولووو

غالب: لك ااخ بس لو يحكموني فيهن يوم واحد .. لجنن وربيهن .. 😂 😂 بس بربكن كيف المقلب يلي عملناه بحبيبة احمد

لؤي: لك لا تزكرني 😂 😂 😂

طلال: لك شو هاد .. ما بعرف فيه انا .. هاتو لشوف

لؤي: لك هالبنت شايفة حالا بصورة هستيرية والغبي احمد حبا .. وهي جننتو وكل ما بدو يحاكيها تفضحو بين رفقاتا وعملوه مسخرة .. بس ربك بيحبو لانو وحدة من رفقاتا كانت تكرها وحاولنا نستدرجا بالحكي لوقت عرفنا انو هي بتموت ولا تشوف ضفدع
طلال: خخخخ اي

غالب: اي .. ومحسوبك نحنا عشقنا الضفادع .. جبنا ضفدع وعطينا لرفيقتا اللئيمة وحطتلا ياه بشنتتا ونحنا شغلنا الكاميرا وقعدنا نتفرج بنص الكفتيريا .. ولووو بس شفتا وقت فتحت الشنتة ونط الضفدع بوشا .. بلحظة وحدة كانت بحضنو لاحمد وكل الكافتيريا حششت عليها ..

#جمعية_كارهو_النساء_بقلم_امل_احمد
جمعية كارهو النساء (حلقة 9)
@rwayate
خلصت سهرتي مع الشباب ورجعت ع البيت وتفاجات فيهن كلن لساتن سهرانين ..

لؤي: مسا الخير

وفاء: مسا الخيرات والليرات لحبيب قلبي انا

لؤي: لك هاي فوفتي هون

وفاء: اي تعا تعا لضمك

قربت منا وضميتا وبستا من جبينا ..

لؤي: لك يا اهلا وسهلا بام العيال

وفاء: 😂 😂 ضحكتني من قلبي والله .. شو لعيال اخي .. لساتن تنين

لؤي: اي وازا تنين ههههههه

وفاء: 😂 😂 😂 لك يسعدو يا ناس

لمى: 😂 😂 والله يا وفاء ما حد بفهمني غيرك

وفاء: 😂 😂 😂 😂 لك اي والله يا مرت اخي ما في حد عايش غيرك انت .. ان شاء الله بيسلملك اخي وبتضلي تضحكي ع طول

لمى: امين يا رب 😂 😂

ادهم: يخليلي ياكن تنيناتكن الهي

لؤي: فففففف .. لك فكونا يااااا

امي: الله يرضى عليكن يا امي ويهديك يا لؤي يا ابني
لؤي: امين امي .. امين .. ميوووووش

اجت مي من المطبخ ركض .. (اي اخيي .. جييت )

لؤي: بدي كاسة متة ع كيف كيفك

مي: من عيني هاي قبل هاي

سناء: لك يا الله شو الشوكولا الها مفعول ههههه

لمى: 😂 😂 😂 اي لكن

رهف: خليكن ع الشوكولا لشوف شو رح تفيدكن

لمى: 😂 😂 😂 لك ريتك تسلميلي يا سلفتي .. لك ما حدا خالص منك .. حتى الشوكولا

شادي: هههههه لا حد يجي بمرتي النعنوعة .. فهمانين

وفاء: الله يخليلك ياها اخي .. بس نحنا يعني كرمالا .. والله شتهيت شوف سنانا انا

رهف: والله يا بنت حمايي الدنيا ما عم تتركني بحالي .. وانا ما فيني كون متلكن وانسى بسهولة وجاملا للحياة

وفاء: يا عمري يا مرت اخي .. بعرف موت اخوكي اثر ع نفسيتك كتير .. بس هاد قدرو .. وانت ما بصير اتمي هيك حادة عليه طول العمر .. اي من الله ما بجوز .. صرلو سنة واكتر ميت

لمى: 😂 😂 يسلم تمك بنت حمايي .. ومتل ما بقول المتل الحزن بيجر حزن

سناء: يسلم تمكن .. وانا بضفلك ازا بدك تستني الحياة لتسعدك فرح اتمي طول عمرك تستني .. انت اسعدي حالك من حالك وعيشي حياتك

شادي: ع طول عم قلا هالكلام .. اليوم يلي بروح ما بعود يرجع

لاول مرة بحياتي بحس حالي تفاعلت مع انثى واتعاطفت معا .. اطلعت عليها لرهف وكانت دمعة نازلة ع خدا ع الساكت .. مسحتا بايدا بسرعة وقامت ..

رهف: بالازن منكن .. انا رح روح ع بيتي

امي: الله معك يا بنتي .. الله يرضى عليكي

شادي: وانا كمان رح روح .. تصبحو ع خير

لؤي: لك اخي لوين .. يعني انت كل يوم معا لمرتك .. تعا لنسهر سوا

امي: تركو ابني .. برضايي عليك لا تتركا لحالا يا امي
وفاء: لا حول ولا قوة الا بالله

اجت مي ومعا المتة .. ووقفت وفتحت تما متل الجدبة .. كالعادة طبعا وسرحت فينا ..

مي: لك شبكن اسم الله عليكن .. ليش هيك وشكن

لمى: 😂 😂 😂 ما في شي تعي

مي: اي ازا انت قلتي ما في شي فربك يستر

ادهم: هههههه تعي اختي تعي .. والله هالمتة اجت بوقتا

سهرنا سوا شي ساعتين ومن بعدا كلن راحو ينامو وبقيت انا ووفاء ومي سهرانين ..

وفاء: اي اخي .. ايمت رح تفكا لهالعقدة هاي

لؤي: ايا عقدة

مي: 😂 😂 عقدة كارهو النساء اخي

لؤي: لحتى موت

وفاء: بعيد الشر عن قلبك يا قلبي .. ليك اخي شوفني .. هلا انا مو منيحة .. ليك امك ... اختك رنا .. اختك مي .. شبنا نحنا

لؤي: ليك وفاء .. هلا ازا بدي عددلك قديش غلط فيكن رح تزعلو مني .. لهيك انسي هالموضوع.. وكمان انا اعتراضي ع الزواج كلو كمان مو بس حوا

وفاء: وليش بقا .. شبو الزواج

لؤي: انت يلي عم تقولي شبو .. يعني عاجبك وضعك هيك

وفاء: 😲 😲 وشبو وضعي .. اه شبو

لؤي: ههههه ولا شي .. 12 سنة مدرسة وسنتين روضة واربعة جامعة .. ونهايتك وين .. بين اربع حيطان وبين البامبرز والببرونات

وفاء: اول شي هالوضع يلي انا فيه مؤقت .. انا قدمت لوظيفة وان شاء الله رح اتوظف .. بتعرف شو .. يمكن ما تصدقني .. بس جد مو حابة اتوظف .. صدقني ساعة مع ولادي وبين هالببرونات والبامبرز عندي اغلا من كلشي واحلا من كلشي بعالمك انت

لؤي: ههههه تعودتي اختي .. تعودتي .. انت كمان خورفتي

وفاء: ليك لؤي .. الزواج مسؤولية كبيرة كتير .. وحياة مختلفة تماما عن حياة لعزوبية وخصوصا بالنسبةللبنت لانو رح تنتقل من البيت يلي ربيت فيه لبيت تاني غريب عنها .. بس صدقني اخي الزواج استقرار نفسي وهدوء روحي .. الزواج مودة ورحمة بين تنين ربنا الف بين قلوبن

لؤي: اي تركيكي من هالحكي

وفاء: مانك مصدقني مو ... اي ان شاء الله ما بيخلص هالشهر غير وانت علقان بشي بنت حلال لتفكلك هالعقدة

لؤي: اي هاد من سابع المستحيلات .. انسي

وفاء: اي لنشوف .. ع العموم انا طفيت .. رح قوم نام قبل ليفيقو ولادي .. تصبحو ع خير

لؤي.. مي : وانت من اهلو

لؤي: لك كلو عم يخورف

مي: عقبالك اخي

لؤي: اي روحي من وشي ولووو .. ولا قلك .. انا رح روح .. تصبحي ع خير

مي: وانت من اهلو روحييي

#جمعية_كارهو_النساء_بقلم_امل_احمد
جمعية كارهو النساء (حلقة 15)
@rwayate
طلال: اي لؤي .. خير شو صاير

لؤي: لك صدتلكن صيدة غير شكل

غالب: صيدة شو

لؤي: لك بنت بتكره جنس حوااا

طلال: عم تمزح

لؤي: والله ما عم امزح .. بكرة بتشوفو كيف رح حطا ادمن بالصفحة .. اويلييي والله لنكيف

غالب: لك هاي يلي رح تنجح صفحتنا

لؤي: اي لكن

طلال: بس ما قلتلي مين هي

لؤي: بنت عمي .. بس من هلا الحكي معا ع الخاص ممنوع

غالب: هههههه اساسا ما في داعي

لؤي: والله لنكيييف

هالة .. خلصت السهرة ورجعت ع البيت غيرت تيابي ومباشرة ع الفيس لتنفيذ الخطوة التانية من المخطط ..
بعتت طلب صداقة للؤي .. وبلشت اتصفح بحسابو .. يا الله شو انو جد جد معقد .. لك قلبو مليان ع حوا وكلشي بخصا .. وع كلشي زواج كمان

بس بعيدا عن كلشي .. شخصية .. جد شخصية .. فففف لوين رحتو .. قال شخصية قال .. شو بدنا فيه .. خلينا بموضوعنا ..

بعد شي عشر دقايق وانا لساتني عم اتفتل بحسابو وصلني اشعار انو قبل صداقتي .. ومباشرة اجاني رسالة ع المسنجر ..

ودق قلبي مع دقتا تلت دقات او عشرة ما بعرف ههههه .. هلا المهم بمخططي ضروري كون صبورة وتقيلة .. لهيك ما رديت فورا .. لبعد شي ربع ساعة .. كفيت فيهن تصفح لحسابو ورجعتلو ع المسنجر ..

هالة .. هلا لؤي
لؤي.. كيفك
هالة.. تمام .. انت كيفك
لؤي..الحمد لله .. مممممم .. فينا نكفي حديثنا
هالة..اي طبعا .. تفضل
لؤي..كنت عم قول انو انا عندي صفحة عامة لكل الاشخاص المميزين يلي ما بينتمو لهالكوكب بخواريفو وبقصص حوا المعتة
هالة.. شي حلووو
لؤي.. يحلي ايامك .. وكنت بدي قلك تنضمي لالنا
هالة.. اي ما بدا سؤال .. بعتلي دعوة
لؤي.. فورا

كان قلبي عم يضحك ع هالسرعة بالاستجابة .. وخلال ثواني وصل الاشعار وفتت الصفحة وانصدمت فيها .. اسما جمعية كارهو النساء .. وكل البوستات بس عن حوا والشخصيات التاريخية والسياسية السيئة ..

هالة: لك شو هالجنان هاد

ولسا عم حاكي حالي بعتلي لؤي..

لؤي.. اي هالة كيف شفتي الصفحة
هالة.. ليكني عم اتفتل فيها... بس فكرتا حلوة
لؤي.. يحلي ايامك .. عم قول بما انك اول انثى معنى .. ازا بتحبي فيكي تكوني ادمن معنا فيها
هالة.. 😍 كتيير حلوو .. اي اكيد بحب
لؤي.. تمام هلا رح ضيفك

وهيك ضافني ادمن بالصفحة .. ومع المدة اضطريت نزل نكت ضد جنسي الحبيب .. جنس حوا العظيم ..

ومشت الايام وانا كل يوم عم حاكي لؤي ولؤي يحاكيني وكلو بخصوص هالجمعية الغبية .. لوقت اجت الخطوة التالية من مخططي ..

لؤي: لك شبها هالة اليوم ما فتحت ولا عم ترد .. يا ربي دخيلك .. رح روح شوف مي لتدقلا

رحت ع غرفة مي وكان الوقت ظهر ومي غرقانة بالنوم ..

لؤي: مي .. مي .. مييي

مي: اي اي اييييي .. شو صاير

لؤي: فيقي .. عاوزك بشغلة

مي: شو صاير

لؤي: مسكي التلفون دقي ع بيت عمك وسالي عن هالة .. صرلا من مبيرح المسا ما فتحت وبعتلا رسالة واتس وما ردت

مي: لا اله الا الله .. هلا لهيك فيقتني اخي

لؤي: اي لهيك .. مسكي دقيلا

مي: حاضر اخي حاااضر

مسكت مي التلفون ودقت ع بيت عمي وردت عليها مرت عمي وخبرتا انو هالة نايمة وست مي سكرت الخط بكل بساطة ..

لؤي: لك ليش سكرتي ... ليش ما قلتيلا تفيقا

مي: لك شو صرلك انت .. ولشو بدا تفيقا

لؤي: اه .. لشو .. اي هاتي هاتي التلفون ورجعي نامي

تركتا لمي ورجعت لغرفتي وقلبي لساتو عم يغلا غلي .. طيب ليش انا قلقان .. وع مين قلقان .. وشو هاد الوجع يلي عم حس فيه .. اووووف ياااا

مي: لك والله باينتو وقع وما حدا سما عليه ههههه .. قال كارهو نساء قال .. لشوف الفيس بما انو راحت الناعوسة وراحت

فتحت الفيس .. وكالعادة فتحت ع حساب الرجل الفضائي ابو حرف الطاء ...

لك هاد جانن ع الاخير .. ههههه .. لك شوهاااد .. منزل صورة قطة شقرا .. وكاتب فوقا ..
(ينكسر قلبك وتجرح روحك وتهشم عواطفك .. ثم يبعث الله لك من وسط كل هذا قطةً لتعيد ترميم كل هذا )

لك اويلييييييي شو بعشق الطاء انا 😍 ..
ومدري كيف اصبعتي نطت وحطت احببته ع البوست .. لك شو اعمل بحالي .. اكسرا .. اكلاااااا .. لك الله ياخدني وياخد هالاصبع يا حق ..

يا ربي شو اعمل .. لك شووووو اعمل هلا ..

#جمعية_كارهو_النساء_بقلم_امل_احمد
جمعية كارهو النساء (حلقة 16)
@rwayate
طلال .. صار وقتي لاحكيلكن .. متل ما عرفتو من قبل انا كنت حب بنت .. حبيتا من كل قلبي بس هالبنت وبكل بساطة تركتني وبكل دم بارد

تعزبت كتير وقت تركتني .. حسيت الدنيا كلا سودا .. وكنت عم فش خلقي بالفيس .. لوقت شفت هالصفحة .. جمعية كارهو النساء .. دخلتا لفرغ شوي من الغضب يلي بقلبي ع حوا .. وعن طريقا تعرفت ع لؤي وغالب ..

وبقي هالغضب ع حوا بقلبي لهديك الليلة .. الليلة يلي شفتا فيها .. مبلولة ومتخبية بين الخزانات متل قطة صغيرة هربانة من بيتا ..

وقت شفتا بهالمنظر حسيت قلبي رح يوقف .. ومن وقتا وهي عم تشاركني ليلي ونهاري وكل تفكيري .. بس لهلا ما بعرف عنا ولا شي ابدا غير انا اختو للؤي رفيقي .. وهالشي عم يعزبني ويحسسني باني واحد خاين ..

بس بتعرفو شو .. هلا وانا عم حاكيكن وصلني اشعار ع الفيس .. وبتعرفو شو هالاشعار من بنت اسما مي .. وبتعرفو شو هالبنت هي اختو للؤي .. يعني بتعرفو شو .. يعني هالبنت مراقبة فيسي .. يعني بتعرفو شو .. اكيد بتعرفو شو .. اويليييييييي

هالة .. وهلا دوري انا .. صرلي تلت ايام مسكرة فيس وما عم رد لا ع رسائل مسنجر ولا واتس .. بس شايفتن كلن .. والضحية وقعت وما حدا سما عليها .. خطتي نجحت باسرع ما كنت متخيلة .. وهلا بكفي هيك رح حاكيه ..

هالة .. كيفك لؤي
لؤي.. هااالة .. لك وينك يا بنت
هالة.. هلا لؤي .. بعتزر ما رديت عليك .. بس كنت تعبانة شوي من الدنيا 😔
لؤي.. خير شبك
هالة.. ولاشي .. ما تحط ببالك
لؤي.. خير شو صار
هالة.. لؤي بصراحة انا حبيت شخص
لؤي.. كيف !! كيف يعني حبيتي شخص .. ومين هو
هالة.. والله ما بعرف كيف حبيتو .. بس حبيتو وخلص
لؤي.. مين هو
هالة.. ما فيني احكيلك
لؤي.. ماشي براحتك .. صار لازم سكر بحاكيكي بغير وقت

سكر لؤي الخط وحسيت بوجع كبير بقلبي .. وجع عليه ؟؟ او منو ما بعرف .. بس ليش هالوجع 😔

مي .. مرق ع الحادثة السودا يومين والحمد لله الوضع لساتو مستتب وما في شي جديد .. غير انو مااالة وبدي شي غير جو .. وكالعادة ما الي غير حبيبة قلبي رنا .. ليكا نايمة .. كيف رح فيقا ..كيف

رحت ع المطبخ متل البطلة وجبت اطرميز المربى يلي بحبو وبلشت ادهنلا بوشا لرنا .. بس خفت تفطر بسببي لهيك ما حطيت حوالين تما .. وقعدت ع جنب اتفرج وصور ..

ليكا اجت اول دبانة .. اووووو بلشت تنده ع اخواتا .. يا سلااام بلشو يجو كلن ..
بلشت رنا تتدايق واخيرا وتحرك بحالا .. ولييي حطت ايدا ع وشا 😂 😂 😂

رنا: لك شو هاااد

مي: 😂 😂 😂 😂 😂

رنا: ولي مي والله لادبحك

مي: 😂 😂 😂 😂 😂

سكرت التلفون وهربت منا بسرعة وهي ركضت ورايي متل المجنونة .. وانا عم اركض بكل خفة واطلع لورا واززززز في شي كبيير كتيير وقف بطريقي .. هالشي حافظتو منيح .. بعرفو من ريحتو .. لك هاي ريحة نبع الحناان .. بلعت ريقي وهيات وشي للشحاطة .. بس كانت ردة الفعل غير متوقعة ابدا ..

وهلا بعد ساعتين من هالحادثة ليكني الحمد لله قاعدة بكل صحتي وكمادات المي الباردة ع ادي التنتين .. حاكم نبع الحنان سنانا لساتن شباب اسم الله ..

#جمعية_كارهو_النساء_بقلم_امل_احمد
جمعية كارهو النساء (حلقة 17)
@rwayate
لؤي .. لك انا شو بدي فيها حبت مين ما تحب .. تضرب منا لالو

امي: لؤي امي

لؤي: تفضلي امي

امي: مممممم كيفك

لؤي: هههههه منيح امي .. شو ورا هالسؤال

امي: ما بعرف .. صرلك يومين مالك ع بعضك

لؤي: ما في شي امي .. يمكن لصيام تعبني

امي: متاكد !! يعني ما بدك تخبرني شي

لؤي: لا ابداااا .. بس جوعااان مووت .. شو عاملتلنا ست الكل اليوم

امي: شبك امي .. اليوم فطورنا ببيت عمك محمد

لؤي: عم تمزحي امي

امي: لا ما عم امزح .. كل العيلة اليوم فطورا عندن

لؤي: ماشي ماشي امي

طلعت امي من عندي ووقفت ع السرير وصرت نط متل المجانييين .. (يا ليلي ويا ليلا ... )

امي: اسم الله ابني .. فيك شي

لؤي: امي .. انت لساتك هون

امي: لا انا مو هون هههههه

لؤي: اي خلص طمنتيني فكرتك هون

امي: هههههه الله يثبت علينا العقل والدين

مي ... مر اسبوع كامل ولساتنا ع حالنا .. قلبي عم يجعني كتير .. لك تضرب الخزانات وتضرب المي واضرب انا وقلبي الغبي

ندق الباب واجت لمى .. (مييي .. شو عم تعملي 😂 😂)

مي: ولا شي مرت اخي .. كنت عم صلي ورح اقرا قران

لمى: اي كتير منيح .. تقبل الله

مي: منا ومنك

لمى: 😂 😂 مي .. حبي بدي اسالك فيكي شي.. حابي تحكيلي شي

مي: هااا .. شي متل شو يعني

لمى: 😂 😂 ما بعرف ايا شي .. حاكم حاسيتك هيك متغيرة شوي هاليومين

مي: لا سلامة قلبك لموشتي .. ما في شي .. بس بالي مشغول ع رهف وايهم .. رهف اعصابا تعبانة وشادي صار لازمو دكتور

لمى: 😂 😂 😂 والله معك حق .. حاكم الدبان كتران هاليومين

مي: مرت اخي .. بتعرفي وقت حاكيكي بالغصب شي من جواتي بيضحك هههههه .. بس انو شو قصة ضحكتك هاي

لمى: 😂 😂 والله ما بعرف .. بس بحسا بتطالع كلشي جواتي .. الحياة كتير صعبة وبدا عقل كبير وقلب ميت

مي: انت عم تحكي هيك .. والله اخي ادهم ما في منو وبيحبك كتير

لمى: 😂 لك يا ريت الدنيا كلا متل ادهم .. لك صوتو وهو عم يقرا قران كفيل بانو ينسيني كل همومي .. بس الحياة بدا كتير .. واساسا لو ادهم مو معي ما كنت تحملتا .. بكرة ربنا بيعطيكي شي واحد اجدب بيحب القطط وبتفهمي حكيي 😂 😂 😂

مي: قطط 😲 😲 لك شو قصتكن انتو

لمى: لك ليش في احلا من القطط 😂 😂 .. تعي معي لنروح لعند رهف نطمن عليها

مي: اي يالا .. رح دق لسناء كمان

رحنا كلنا لعند رهف ..
سناء: اوووووو .. لك ازا من باب بيتا هيك الروائح بتشل كيف جواة بيتا

مي: اي والله غير شكل

فتحت رهف الباب ووقت شافتنا تغير لونا ..

لمى: 😂 😂 لك شبك وكانو شفتي عفاريت

رهف: لا ولووو اهلا وسهلا .. بس دخيلكن شلحو من اجريكن برا .. والله هلا شادي بيخليني ارجع اشطف كل البيت

مي: تكرمي مرت اخي تكرمي

دخلنا للبيت ويلي كان متل العادة .. بيسحر بيجنن .. ريحة النظافة بتهفهف هفهفة .. وقعدنا ع الكنب .. ولسا عم نحكي معا وما بنسمع غير صوت شادي من جوا عم يصرخ ..

رهف: لا اله الا الله

اجا شادي من جوا متل المجنون وقميصو بايدو .. (لك رهف .. لك ليش هيك معلقتي هااا .. ليييش )

رهف: ايهم عنا ضيوف

شادي: هدول مانن ضيوف لا تغيري السيرة .. ستني ستني شوي .. عقمتيلن اديهن قبل ليفوتو

لمى: 😂 😂 😂 😂 😂 العمى لك هاد جانن ع الاخر

مي: لك شبك اخي والله نحنا نضاف والله .. يعني كلنا بنصلي وبنتوضى خمس مرات .. وغير الجلي والغسيل والشطف والتمسيح .. يعني طول الوقت عم نغسل ونضف

شادي: اي وازا .. انا ما فيني دخلكن غير مع معقم .. وفهمتا هالشي بس هي ناوية تجنني

اطلعت رهف فبنا ودمعو عيونا .. (بعتزر منكن كتير )

سناء: لا تعتزري حبيبتي ... خلص نحنا رح نروح .. بخاطركن

وقفنا لنطلع وما بنسمع غير صوت شادي.. (رهففففف .. شبك .. لك شو صرلك)

سناء: لك تضرب منك لنضافتك .. غميت المخلوقة من قهرا

بلشنا فيها ع عطر وبصل ومدري شو لتورم انفا وما كانت تصحى ..

لمى: 😂 😂 لك انفا رح يطق .. حملا ع المشفى سلفي
واخدها ع المشفى هو وامي يلي طلعت ركض لخبرا ... وبعد ساعة رجعت امي والدنيا مو واسعتا من فرحتا ..

مي: خير امي .. طمنينا

امي: مرت اخوكي حامل ولله الحمد

مي: الحمد لله .. الحمد لله .. يا سلاااام واخيرا بعد تلت سنين عزاااب .. رح روح شوف شادي

امي: تعي تعي تركيهن هلا .. شادي جانن هههههه .. وقت قلو الدكتور بلش يبكي ويبوس بايدا ويقلا سامحيني والله من بكرة لنروح عند دكتور نفسي ... سامحيني .. خلص ما عاد بدي تشطفي ولا تغسلي

مي: اوووخ .. واخيراا

امي: وهلا جهزو حالكن لنروح لبيت عمك ما بقي وقت

#جمعية_كارهو_النساء_بقلم_امل_احمد
جمعية كارهو النساء (حلقة 18)
@rwayate
لؤي .. لبست وجهزت حالي وعقلي كلو عندا .. هالة .. ما بعرف شو عم يصير معي .. لك انا لؤي يلي كل بنات الجامعة عم تركض ورايي وولا وحدة قدرت تحرك فيني شعرة .. تجي هالة وبكل بساطة تقلب كياني .. اوووخ يا ربي ساعدني

امي: يالا يا امي وينكنن اتاخرنا

مي: اميي وينو ابو مسمااار

امي: ستحي ولي

مي: ما حكيت شي امي .. هلا بدي اسالك .. هلا انفو لبابا وقت اخدتي كان هيك معقوف او انت عقفتيلو ياه

امي: مييييي .. سكتييييي

مي: ايييي امي شبك .. عم امزح معك

لؤي: انا جاهز

ابي: شو جاهزين يابي

مي: اي ابو مسمااار جاهزين معلم

ابي: هههههههه مشي ميوووشتي مشي

طلعنا كلنا سوا لبيت عمي .. اشيا غريبة بقلبي عم حس فيها .. شي حلو وبنفس الوقت موجع ..

دقينا الباب وطلو علينا عمي وبعد شوي مرت عمي .. البنات فاتو لجوا وبقينا نحنا لرجال ع البرندة ..

وبقينا ع هيك لوقت لفطور .. واجت هالة ..

هالة: كيفك لؤي

لؤي: تمام .. الحمد لله وانت كيفك

هالة: الحمد لله منيحة

تجمعنا كلنا ع الفطور .. وكنا قاعدين وعم نستنا لياذن وقت قالت امي .. (وقت استجابة الدعاء يا ولاد .. ادعو لبعضكن )

وما بعرف كيف لقيت نفسي عم تردد هالدعاء .. (يا رب نور دربي وقربني لالك .. يا رب بعدني عن الحرام وقربني من الحلال .. يا رب اجمعني بهالة بالحلال واجعلا من نصيبي .. يا رب ازا ما كانت نصيبي تشيلا من تفكيري ومن كل حياتي)

وقت رددت هالدعاء انصدمت من حالي .. لك انا هلا اعترفت لحالي باني .. اني .. بحبا .. لااااا 😲

مو زااابطة .. لك وجمعيتي ومبادئي وين راحوووووو .. لك شو رح يعملو فيني الشباب .. لك وبعيدا عن كل هاد .. هالة عندا شخص بحيانا .. فففففف ..

وطالعني من هالتفكير والمشاحنات صوت الاذان .. يلي حسيت كل كلمة منو عم تتغلغل فيني وبكل كياني ..

كنت مغمض عيوني وعم ردد مع المؤذن ووقت خلص فتحت عيوني واطلعت قدامي واتفاجات بهالة مقابيلي .. وشفتا مسحت دمعة من عينا .. الظاهر حبا متعبا كتير ..

مي.. خلصنا فطور وفتنا سوا ع المطبخ وبلشت احاديثنا الحوائية ..

مي: اي ولي هالة .. شو صار خبريني .. وكيف لقيتيها للصفحة بالله

سناء: لك ايا صفحة

لمى: 😂 😂 لسا ما عرفتي .. صفحة تجمع كارهو النساء والاشخاص الذين لا ينتمون لهذا الكوكب البائس

رهف: والله انا رح روح معن هههههه

مي: انت ما بتروحي ع مكان .. انت مكانك بقلبو لشادي وبس 😉

سناء: يما الحب يما .. والله يا رهف وشك وردد

لمى: 😂 😂 اي لكن هاد من اثر لولاد ربي ما يحرمن لمخلوق

مي: هلا ليش غيرتو الموضوع .. شبك ولي هالة ليش ساكتة .. تعي لشوف شو صار والله اخي مانو ع بعضو ومكركب كركبة غير شكل

هالة: اي نسو للموضوع .. انا فشلت بالرهان خلص ما عاد بدي

مي: شو هالحكي .. هلا انت هالة يلي عم تحكي

لمى: 😂 😂 طفشا للمخلوقة

وبقينا ع سيرة رايحة وسيرة راجعة لخلصو الجليات وكملنا السهرة ورجعنا ع البيت ..

تحممت حاكم كل زفرة الاكل حسيتا علقت فيني وتوضيت وصليت العشا وتراويح ... وبلشت اقرا قران وقت دق لؤي الباب واجا ..

لؤي: تقبل الله يا حلوة

مي: منا ومنك اخي

لؤي: مي .. انت ع طول رفيقتي مو

مي: وهاي سكرنا المصحف .. الواضح هالمرة انت يلي بدك شي مني هههههه

لؤي: بس بدي اسالك سؤال .. بس بدي توعديني يبقى سر بينا

مي: ولا يهمك اخي .. بيييير

لؤي: بيير ؟؟ ما علينا .. بدي اسالك عن هالة

مي: ههههه شبها

لؤي: ليش عم تضحكي وليي

مي: ولا شي اخي كمل كمل شبها

لؤي: انت رفيقتا وعلاقتكن منيحة .. ما خبرتك ازا الا علاقة هيك او هيك مع شي شب

ضربت ع صدري وشهقت .. (لك شو هالحكي يا اخي حرام عليك .. هاي بنت عمك وما الا بهيك حركات )

ضربني بكفو ع رقبتي وقفلي كل حواسي .. وحسيت بكل مسامير عيلة ابو مسمار عم ينكشو براسي ..

لؤي: ولك يا جدبة .. قصدي ما خبرتك انو معجبة بشي شخص

مي: ليش عم تسال اخي .. من الاخر خبرني لخبرك كلشي بعرفو ... بس مو قبل لتخبرني كلشي

لؤي: هلا بصراحة .. هالبنت الظاهر انو قدرت علي وغيرت مسار حياتي .. ما بعرف شو صرلي من وقت حاكيتا .. ما عم تروح من بالي ابدا .. وكاني لاول مرة بشوفا وبعرفا .. بس بصراحة هي خبرتني انو في شخص بحياتا ومتعبلا قلبا

مي: ايوااااه .. اخي الوضع هيك ما بينسكت عليه .. سماع لقلك .. بصراحة اخي .. هالة عم تلعب لعبة .. او بالاحرى كلنا نحنا عم نلعب لعبة .. هالة راهنت بانو رح تفك عقدتك خلال شهر .. بس خزيت العين باسبوعين فكتا وفكت ابوها كمان

لؤي: م... م.. ما فهمت .. لعبة شو .. ومين انتو .. مين كلكن

مي: كلنا حواء ابو مسمار وبنات عمومك .. ومتل ما قلتلك كل الشغلة رهان ولعبة .. وهالة لا بتكره حوا ولا بتحب صفحتك ولا جمعيتك ولا في شخص بحياتا ..
كلو كزززب او لعببب

#جمعية_كارهو_النساء_بقلم_امل_احمد
جمعية كارهو النساء (حلقة 19)
@rwayate
فجاة حسيت الدنيا عم تدور فيني .. وما خطرلي بهاللحظة غير قرطوس البوظة والبنت ام جدايل يلي تركتني كرمال هالقرطوس ..

مي: اخي انت منيح

ما بعرف كيف هجمت ع مي ومسكتا من رقبتا وصرت صرخ بوشا .. (لك كلكن كززززابات .. خايناااات .. لك عم تلعبو بمشاعري .. وعااادي وعم تتمسخرو علي .. والله ويلي اسمو الله لخليكن تندمووو .. لك انا لؤؤؤي لؤؤؤي )

وفجاة وعيت من عصبيتي ع صوت رنا .. (،لؤي .. رح تموتا .. لؤييي .. تركا اخي تركااا)

اطلعت برنا يلي تخيلتا شيطانة .. كلن شياطين كلن .. وتركتا لمي واطلعت ع السطح وانا مخنوق ومحتار كيف اتصرف .. وكيف بدي ردلا ياها..

ولسا عم فكر وشارد بهالعتمة يلي بتشبهن كتير .. بتشبه حوا يلي كلن سواد بسواد .. بدق تلفوني .. اطلعت بالرسالة وكانت من هالة ..

لؤي : ههههه رح تكملي لعبتك .. اي ماشي كملي

فتحت الرسالة وكانت هيك .. (لؤي .. مخنوقة كتير لو سمحت حاكيني ازا في مجال )

ومباشرة دقيتلا .. وع اول رنة ردت ..

هالة: لؤي .. كيفك

لؤي: منيح .. كتير منيح .. انت كيفك

هالة: مو منيحة ابدا .. تعبانة لؤي ومخنوقة

شديت ع ايدي لفرغ غضبي وما تفرط اعصابي ورديت عليها بكل برود ..

لؤي: ليش .. شو صاير

هالة: لؤي .. متزكر وقت قلتلك انو .. انو حبيت شب

لؤي: اي

هالة: ساعدني لؤي بترجاك .. هالشب عم يتغلغل فيني .. ما عم بقدر طالعو من تفكيري ... كلشي فيه عم يشدني الو .. صوتو .. ضحكتو .. عصبيتو .. شكلو .. عطرو

ومن بين كلماتا سمعت شهقات بكي .. ما عم بستوعب كيف فيها تقدر تمثل لهالدرجة .. نخنقت وتميت ساكت لفترة .. كنت بتمنى تكون هالكلمات واقع ومو كزب .. كنت بوقتا ما ترددت ولا لحظة لقلا انو هي الي انا وبس و مستحيل اتركا لغيري او اسمحلا تحب غيري..
بس هلا رح كمل اللعبة معا .. ورح قلا قديش بحبا .. ورح خليا تحبني بالغصب ..بس لحتى اقدر ردلا ضربتا ..

هالة: لؤي .. انت معي

لؤي: معك .. معك هالة .. بس ما عم بقدر اتحمل انو تحكي عن حبك لشخص تاني قدامي .. انت عم تموتيني يا هالة

هالة: ما فهمت .. انت شو الك علاقة بالموضوع

لؤي: هالة .. هالة

غمضت عيوني وحسيت بالدمعة يلي نزلت مننن .. كانت سخنة كتير .. حرقت جفني متل ما حرقت هالة قلبي ..

لؤي: هالة انا بحبك

شهقت هالة شهقة بصوت عالي .. (لؤي .. صار لازم سكر .. بعتزر منك )

سكرت الخط وما بعرف شو صرلي .. نزلت ع ركبي ع الارض وبكيت من كل قلبي ..

انا لؤي .. يلي كنت مسكر قلبي من كلشي حوا .. كلشي مؤنث كنت اكرهو .. اوقع بفخ وحدة متل هالة ..

قويت حالي ومسحت دموعي ورحت لعند مي .. يلي كانت عم تبكي .. ووقت شافتني ركضت لعندي وضمتني .. (سامحني اخي بترجاك .. سامحني )

مسحت ع شعرا .. واطلعت فيها ..

لؤي: لك قديش صرلك ما مشطي شعرك ولي شرنة

مي: اخييي سامحني يا روحي

لؤي: مسامحك .. اساسا ما فيني غير انو سامحك .. بس بدي وعد منك وايااااك تخلفي

مسحت دموعا متل المجنونة ومسحت انفا بطرف كما ولعتلي نفسي .. (بوعدك اخي بوعدك)

لؤي: لك من ايمت انت معفنة هيك وليي

مي: بلا غلاظة لؤي

لؤي: ههههه .. بدي تكملي اللعبة مع هالة وما تقليلا انو انا عرفت

مي: بوعدك اخي بوعدك .. بس ع شو ناوي

لؤي: مييي .. ما دخلك عملي يلي قلتو

مي: حاضر اخي حاااضر

#جمعية_كارهو_النساء_بقلم_امل_احمد
جمعية كارهو النساء (حلقة 20)
@rwayate
مي .. مشت الايام ومخلوقي الفضائي غاطط .. ما بعرف عنو شي .. والفيس ما عم ينزل عليه شي .. خلص قررت انو انساه قبل لاتعود عليه واتعلق فيه .. ما عاد بدي حبو ..

نمت وانا مقررة هالقرار .. والصبح وقت فقت رحت ع خزانتي لبدل تيابي .. وانصدمت من يلي شفتو ..

صندوق كبير جواة الخزانة مغلف بورق هدايا مرسم عليه قطط ...

مي: لك رنا .. رناااااا

رنا: لك شبك .. تركيني بدي نام .. تعبااانة كتير

مي: لك جاوبيني وبعدا نامي

رنا: اييييي

مي: انت حطيتي شي بخزانتي

رنا: اي انا حطيت سم فيران لتاكلي واخلص منك

مي: رناااا .. ما عم امزح

رنا: اي وانا عم امزح .. تركيني ما حطيت شي .. بدي نام

مي: لك مين يلي حطا .. ما حدا بيقلي قطة غير ايهم وسناء .. بس لشو هالهدية .. مستحيل هني

فتحت العلبة وكانت كلا شوكولا وعلبة صغيرة فتحتا .. وياااااااااااا .. لك هاي ريحتو لحرف الطاء .. والله ريحتو .. ومداليات كلن ع شكلل قطط ملونين وبجننو .. واسطوانة صغيرة ع شكل خزان المي .. بسم الله .. لك هاد هو .. والله هو ما في غيرو .. كيف وصل لغرفتي .. ياااا ربي

ومن لبكتي نسيت بدل تيابي ورحت لعند امي ع المطبخ ..

امي: فقتي امي

مي: هااا .. انا فقت؟ .. ما بعرف امي .. بالله تقرصيني امي .. قرصيني لاعرف ازا نايمة او فايقة

امي: والشحاطة من شو بتشكي يا بعدي

مي: شحاطة .. يعني انا فايقة

امي: شبك ولي جدبة

مي: امي .. انت فتي ع غرفتي شي .. او شفتي حدا فاتا

امي: لا .. ما بعرف .. ليش

مي: لا ولاشي امي .. سلامتك .. ما في شي

بقيت طول لنهار وانا متل السكرانة .. ماني وعيانة ع شي .. وكل شوي امي تبهدلني شي بهدلة .. لوقت فطرت وشربت قهوة وبلشت صحصح شوي ..

اخدت فنجان القهوة وطلعت ع الاطلال .. لعند الخزانات وحبة الشوكولا بايدي .. وفتحت الفيس ع حساب الحب 🙈 .. وفرفح قلبي من البوست يلي شفتو ..

(اتمنى ان تكون هديتي قد نالت اعجاب قطتي )

وتاكدت انو ما كنت عم احلم والهدية منو لكائني الفضائي ..

وبلشت احلم واحلم وعيوني ع الخزانات لوقت سمعت صوتو لهادي .. (اي حبيبتي .. كلو اسبوع بيخلص رمضان وبنجوز وما عاد شي يفرقنا )

لك من ايمت هاد هون ..

مي: هادي .. انت هون اخي

هادي: ميووش .. شو عم تعملي هون

مي: عم اشرب قهوة .. بس خلصتا اخي خلصتا .. سلملي ع رولا .. رح روح انا

هادي: ههههه ماشي روحي وهي كمان عم تسلم عليكي

مي: اخي حااج كززب .. هي ما بتعرف اني هون .. كيف بقى قالتلك تسلم علي

هادي: روحي من وشي روحي هههههه

مي: 😜 😜 رااايحة

نزلت ع غرفتي وانا طاااايرة وعم دندن وغني وكالعادة ست فضيحة طلعت بوشي ..

لمى: 😂 😂 الماخد عقلك يتهنى

مي: امين مرت اخي .. امييين

برايكن كيف وصلت الهدية لخزانتا ومين حطا؟؟

#جمعية_كارهو_النساء_بقلم_امل_احمد
جمعية كارهو النساء (حلقة 21)
@rwayate
رهف: الحمد لله شادي بلش بالعلاج

امي: الحمد لله يا بنتي .. ربي يتمم عليكن

سناء: اميين .. ويعطيكي متل ولادي

مي: لاااااا .. حرام عليكي

سناء: لييه قطقوطة خانم .. شبهن ولادي

مي: اول شي قطقوطة تخرمشك مرت اخي .. وتاني شي هدول مووو ولاد .. سعادييين .. قرووود شمباااانزي

سناء: اي صح طالعين لعمتن

لمر: 😂 😂 😂 😂 لك حااج تنيناتكن .. وانت سناء مو سامعة صوت المي .. لحقي ولادك لحقيهن ههههه

سناء: ولييييي

نطت سناء متل السعدانة لتشوف ولادا .. او سعادينا .. طلعت من الباب وع اول درجة لسا وازززز بربيش المي بنص خلقتا .. وزحطت رجلا ونزلت فشكلة ع كل الدرج .. ويااا امي ع منظرااا ..

لمى: 😂 😂 😂 😂 😂 اااخ يا بتونيي لحقونييي

سناء: يلحقوكي لقرود الهي .. لك تعي ساعديني وخدي البربيش منن

مي: 😂 😂 😂 😂 😂 هدول ملائكتك مرت اخي روحي انت ورااهن

واجت امي ع صواتنا هي ورهف ... (لك ليش صواتكن طالعة )

ووقت شافت الشوفة جنت .. ليث وغيث وعدي عم يركضو ورا بعضن ببربيش المي ويضحكو .. وسناء لساتا ع الارض ..

امي: لك شو صرلك سناء

سناء: ولا شي مرت عمي ولا شي

ووقفت سناء وراحت ركييض ورا ولادا وهني هربانين منا وفارطين ضحك .. وكل شوي يوجهو المي ع امن ويبلوها بزيادة ..

لوقت لمى قدرت تثبت حالا من بين ضحكاتا ومسكت البربيش منن وانا سكرت المي .. ويا ويلييي وقت مسكتن سناء .. مسكت الشحاطة وبلشت فيهن ع 🙈 ع ضرب وهني فارطين ضحك ..

ومن بين كل هالعجقة اجا لؤي ومعصب ..

لؤي: لك حاااج بدي ناام .. حاااج

مي: هدي اخي شبك

لؤي: ما بني شي .. كلن كم يوم وماني قدران ارتاح فيهن .. كل يوم ع صريخ وتكسير ولعي .. لك حاااااج .. حاااج

امي: اسم الله عليك يا ابني .. شبك يا امي .. ليش هيك وشك

لؤي: ما بني شي .. تركوووني ارتاح شوييي

ودخل لغرفتو وانا ركضت وراه .. وانصدمت وقت شفتو ..

كان قاعد ع طرف لسرير وساند اديه ع ركبو ومغطي عيونو ..

مي: لؤي .. حبيبي

لؤي: لك كيييف فيكن تكونو كزابيين لهالدرجة ... كييييف .. لك كيف فيكن تلعبو بمشاعر البشر بكل سهولة .. لك كييف .. فهميني كيييف

مي: لؤي .. انت عم تبكي

لؤي: اييي عم ابكي .. انا لؤي الرجال يلي متل الصخر عم ابكي كرمال وحدة كزااابة حقيييرة

مي: اخي اهدى وفهمني شو صار

لؤي: لك عم تكزب علي .. عم تلعب فيني وبمشاعري .. صرلا يومين ما عم ترد ع رسائلي .. بس انا بداويها انااا

ولسا عم احكي معاه وصلو مسج ... فتحو متل المجنون .. وتبسم وما بعرف شو صرلو . .. مسك التلفون وكسرو بالارض بكل قوتو ..

مي: لك شو صااار

لؤي: كززااااابة .. حقييييرة

#جمعية_كارهو_النساء_بقلم_امل_احمد
جمعية كارهو النساء (حلقة 22)
@rwayate
يومين وهو بحالة سيئة كتير .. لا عم ياكل ولا عم يشرب .. حابس حالو بغرفتو .. حتى رفقاتو ما عم يروح لعندن ..

مي: لؤي .. فهمني شو صار اخي .. لك صرلي يومين عم اترجاك

لؤي: ههه بدك تعرفي شو صار ... رفيقتك الحقيرة بعتتلي انو بتحبني .. بعتتلي انو كل كلمة قالتا كانت بتخصني الي وما بتخص شخص تاني .. وبعتتلي انو ما فيها بلاي

مي: اخي .. يعني ما بعرف بس يمكن جد حبتك

لؤي: وكيف فيني صدقا ... قليلي كيف .. عطيني تلفونك وفتحيلي ع حسابي .. رح انهي هالمهزلة هلا

مي: شو رح تعمل

لؤي: هلا بتشوفي

اخد التلفون مني وبعتلا ع المسنجر ... (شو ست هالة .. مفكرة حالك كسبتي الرهان .. لا روحي .. انا لؤي ... ما فيكي تلعبي فيني بسهولة .. انا كنت فاهملك من البداية وكل لعبتك بعرفا ... بس حبيت جاريكي يا حلوة ... وهلا حاج لانو مليت من هاللعبة السخيفة )

وخلال دقيقة كانت باعتلو ..
هالة.. يعني شو كل حكيك معي عن حبك الي كزب بكزب
لؤي.. طبعا كزب .. ليش انت شو فيكي شي ينحب ولي جدبة 😂 😂
هالة.. بس لؤي انا جد حبيتك
لؤي.. هالة اللعبة خلصت .. حاج
هالة.. لؤي بعرف انو غلطت بالبداية .. بس والله ما كزبت بمشاعري اتجاهك .. انا حبيتك وبحبك وبموت فيك
لؤي.. وانا ما حبيتك ولا ممكن حبك وهلا سلامات يا حلوة

سكر التلفون وحطو ع جنب ووشو ع شوي رح ينفجر من القهر ..

مي: اسفة اخي .. انا الغلطانة .. ما كان لازم اقبل بهيك شي .. سامحني اخي بترجاك

ضمني لؤي وحسيت بنفسو يلي عم يطلع بالزور .. (ولا يهمك .. لا تقهري حالك اختك .. مرقت ورح اتجاوزا .. انا قدا )

مي: ان شاء الله اخي .. ان شاء الله

لؤي: جيبي القران وتعي حدي لعلمك احكام تجويد متل قبل .. يالا ههههه

مي: حاضر يا روحي .. بس لاتوضى والبس يانس الصلاة

رحت توضيت ولبست وقلبي عم يتقطع عليه .. واجيت لعندو وبلشنا نقرا قران ويعلم فيني ع الاحكام لوقت حسيتو راق ..

مي: يسلمن اخي حبيبي .. بكرة ليلة القدر .. رح ادعي ربي انو يشفي جرحك ويسامحني

لؤي: ما تحطي ببالك ولووو .. عادي اختي عادي .. وهلا روحي من وشي بدي حاكي رفقاتي

وهو قلي هالكلمة وحسيت اشيا عم ترقص رقص بقلبي .. (هاا .. ماشي .. تمام .. تمام اخي )

طلعت من الغرفة وانا كل عقلي وحواسي عندو للؤي او بالاحرى عند رفقاتو .. الحبابين لظراف .. الفضائيين .. محبين القطط .. صحابين حرف الطاء المبجل ..

#جمعية_كارهو_النساء_بقلم_امل_احمد
جمعية كارهو النساء (حلقة 23)
@rwayate
لسا ماني قدرانة استوعب كيف الهدية وصلت لخزانتي .. لك رح يطئ عقلي .. يعني استخدم جني ليحطا عندي .. اوووف يااا

ولسا عم حاكي حالي بيندق الباب وبتجي لمى ..

لمى: 😂 😂 ميوشتي .. كيفك

مي: اي مرت اخي .. تمام

لمى: ممممم .. فيني حاكيكي بموضوع 😂 😂

مي: تفضلي .. بس من غير ضحك .. والله مو رايقة

لمى: 😂 😂 😂 😂 😂 حاااضر

مي: لا كتير واضح انو حاضر .. تفضلي تفضلي

لمى: بصراحة ميوش .. وبكل صراحة .. في شب حلو وبجنن وعم يدرس جامعة وبعد شهرين بيخلص .. وطلب مني انو حاكيكي بموضوع

مي: اييي .. وشو الموضوع

لمى: بصراحة مي ... الشب بيحبك كتير وبدو ياكي بالحلال 😂 😂 😂 .. يا الله والله ما فيني اسكت

مي: لحظة لحظة لحظة .. انو بيحبني .. وبدو ياني وحاكاكي لالك انت .. ليش

لمى: 😂 😂 😂 😂 😂 وبعتلك هالهدية .. تفضلي

شفت الهدية وكان رح يغط ع قلبي .. قطة بتجنن بيضة وعيونا زرق .. وكملتا لمى ضغطت ع بطنا والقطة قالت بحبك .. بحبك .. بحبك

مي: لمى .. بربك فهميني .. انت شو عم تعملي . . وهالشب مين هو

لمى: 😂 😂 انت بتعرفي منيح .. وقلي العلامة هالقطة وخزانات المي

وهي قالتلي هيك ووشي صار بالالوان وضغطي فجاة نزل وحسيت حالي رح يغط ع قلبي ..

لمى: اسم الله عليكي .. لك شبك مي .. شبك 😂 😂

مي: ط .. ط .. ط

لمى: لك شبك عم تطرطري هههههه روقي

مي: انت .. انت كيف عرفتي لطلال .. وكيف وصلك

لمى: 😂 😂 😂 ولي جدبة .. طلال اخي

مي: شوووووو عم تكزبي لمى مووو

لمى: 😂 😂 😂 وليي استحي شو تكزبي وما تكزبي وليش لاكزب انا

مي: وكيف انا ما بعرفو

لمى: 😂 😂 😂 اي لانو ما بيدرس هون .. من سنتين اجى لهون بس وعم يكفي دراستو هون .. كان ببلاد برا

مي: يا خجلتي منك يا لمى

لمى: 😂 😂 لك ايا خجلة .. لك لو بيلف الدنيا كلا .. ما حيلاقي بنت متلك .. ع العموم جيت خبرك لانو ما عم يصبر .. وبدو يجي ليطلبك رسمي من بيت حمايي .. حبيت استشيرك قبل لخبرن انا

مي: هااا .. يخطبني .. بس ... يعني

لمى: اي سكتي سكتي .. قال بس قال 😂 😂 😂
لك صح .. عجبتك الهدية

مي: 😲 😲 هاي انت لمى

لمى: 😂 😂 لا الجني يا عسل انت

#جمعية_كارهو_النساء_بقلم_امل_احمد
جمعية كارهو النساء (حلقة 26)
@rwayate
هالة .. انا بلشتا بلعب ..بس كيف هاللعب قلب لجد ما بعرف .. حبيتو .. والله حبيتو من كل قلبي .. ومن اول لحظة .. كلشي في بيشدني لالو .. كل تفصيلة من تفاصيلو عالم تاني ..

ووقت اعترفلي بحبو لالي حسيت حالي ملكت الدنيا كلا .. وما عاد بدي زيادة

بس كيف هيك صار .. وكيف انقلبت الموازين ما بعرف .. كل هالفترة وهالاحلام يلي رسمتا طلعت كزززب وانقلب السحر ع الساحر .. طلع بيخدعني وبيكزب علي .. بس خرجي انا الحوبة يلي صدقت انو ممكن يتغير ويحبني ..

بس شو اعمل هلا .. انا تعبت .. تعبت كتير وما بدي غيرو .. لؤي .. بس لؤي

مي .. تركني لؤي عم ابكي وراح .. واجت رنا لعندي ..

رنا: عم تحبي من وراي ولي ههههه

مي: رنا تركيني بحالي

رنا: عم تمزحي مووو .. اي مو بكيفك روحي .. تعي خبريني كلللشي وهلا

ولسا رح بلش خبرا وازز بتلفوني عم يدق ..

مي: لك شو بدا هاي كمان

رنا: مين

مي: هديل .. مرحبا .. اي هديل كيفك .. شوو .. عم تمزحي موو .. هديل هالشي ما في مزح .. يااا ربييي .. ماشي ماشي

رنا: لك شو في .. شو صاير

مي: الغبية هالة بالمشفى

رنا: ليييش

مي: ما بعرف .. بس اكيد بسبب يلي صار .. لازم خبر لؤي

طلعت ركض ع غرفة لؤي ..

لؤي: لك شبك هيك فايتة من غير ازن

كان عم يبدل تيابو ومو لابس غير شرط .. تلبكت كتير ولفيت وشي عنو ..

مي: بعتزر اخي .. بس هالة

لؤي: لا اله الا الله .. شبهااا

مي: هالة تعبانة كتير وهي بالمشفى

لؤي: مي .. عم تكملو الفلم علي موو

مي: والله يا اخي لا فلم ولا شي .. هالة بالمشفى .. بالمشفى

لؤي: فففففف لك شووو اعمل بحالي انا شوووووو .. ولا قلك خرجا لحتى تعرف كيف تلعب بالناس ومشاعرن

مي: بس اخي...

لؤي: خلصنا مي

تركتو وانا كتير مقهورة وما في عشر دقايق الا كان
لابس تيابو وطلع من البيت متل المجنون ..

مي: خدني معك اخي

لؤي: تعي تعي

طلعنا سوا ع المشفى وطول الطريق لؤي عم يسب حالو ويسبنا كلنا ..

وصلنا المشفى ودخلنا ولؤي عم يركض ركض لوصلنا لعند غرفتا وكانت مرت عمي وعمي وهديل قاعدين برا وعم يبكو ..

لؤي: شو صااار .. شبهاا

مرت عمي: راحت البنت .. راحت

هديل: لؤي .. اختي رح تروح من بين ادينا .. صرلا يومين ما عم تاكل ابدا ومع الزعل عملا مشكلة كبيرة

لؤي: لك الله ياخدكن كلكن .. هاااد هو نتيجة رهانكن الغبي ع مشاعر البشر ... لك شو اعمل انا هلا شوووو

عمي: لؤي .. وطي صوتك شبك .. نحنا بمشفى ومو ناقصينك .. وشو رهان وما رهان

هديل: ولا شي بابا ولاشي

لؤي: عمي من بعد ازنك تركني فوت شوفا

مي: اخي شبك .. جنيت شي

لؤي: سكتي انت

عمي: كيف يعني رح تفوت تشوفا .. ما فهمت

لؤي: يااا ربي دخيلك .. ليك عمي .. باختصار انا بطلب ايد بنتك ع سنة الله ورسوله

مرت عمي: لؤي انت جنيت اكيد .. لك بنتي هنيييك عم تموووت

عمي: لؤي .. انت منيح

لؤي: لا .. مو منيح .. عمي ما بصير ترد طلبي انا ابن عما واولى فيها من غيري

عمي: لؤي .. مو وقتو

لؤي: لا عمي هاد وقتو .. بترجاااك وافق لحتى فوت لعندا .. وافق لروح راضيها واعتزر منا .. عمي انا بحبا لبنتك .. والله بحبا وبدي ياها بالحلال .. انا كسرتلا قلبا تركوني فوووت لعندااا والله بجننن عليكن كلكووون وبلم هالمشفى كلو عليكن

انا كنت عم اطلع بلؤي وحاسة نفسي انقطع .. لك فصللل اخي .. فيوزاتو طقو ع اللخير .. اويلييييي يلعن ابو الحب شو بزززل

#جمعية_كارهو_النساء_بقلم_امل_احمد
جمعية كارهو النساء (حلقة 27)
@rwayate
عمي وقت شاف لؤي بهالحالة حسيت الدم نشف بعروقو .. وخاف يصرلو شي للؤي ..

عمي: لؤي روووق ابني روووق

لؤي: لا حدا يقلي رووق .. انا طلبتا لبنتك وافق وخلينا نقرا الفاتحة عمي

ضربت مرت عمي اديها ببعض .. (لا حول ولا قوة الا بالله .. لك نحنا ناقصينك يا ابني )

مي: لك اخي شو صرلك

لؤي: انت خرسيييي .. اساسا كل المصايب منكن .. والله ازا صرلا شي لادبحكن وحدة وحدة

عمي: لؤي شو عم تحكي انتي .. شو الن علاقة هني

لؤي: مو وقتو هلا .. عمي .. مرت عمي . . بترجاكن

عمي: ازا الله اشفاها وبعد ارادتو ومشيئتو فهي الك

لؤي: الفاتحة عمي

عمي: لؤيييي

لؤي: الفاااتحة كلكن

عمي: الله يجيبك يا طولة البال ... قرؤو الفاتحة

قرانا الفاتحة وخلال ثواني مدري كيف اختفى .. وراح لعندا .. ع غرفتا ..

لؤي .. فتت الغرفة وشفتا بهالحالة وطقو فيوزاتي .. انا السبب بيلي صرلا .. انا .. ما رح سامح حالي ازا صرلا شي

لؤي: هالة .. بنت عمي ورفيقتي وحبيبة قلبي .. سامحيني بترجاكي .. انا غبي .. غبي كتير وكزززاب .. لك انا بحبك وبحب كلشي فيكي .. لك حتى كزبك حبيتو .. انا بعشقك يا روحي .. بترجاكي فيقي .. ليكي .. هلا .. هلا نحنا صرنا لبعض .. اي لبعض .. هلا طلبت ايدك من عمي ووافق وقرانا الفاتحة .. فتحي عيونك يا روحي .. فتحي

النيرسة: هههه نيالا عليك وع هيك حب .. جد نيالا

لؤي: بترجاكي عملي المستحيل لترجعيلي ياها .. شتقتلا وشتقت لضحكتا ولعبااا

النيرسة: لا تخاف .. انا متاكدة رح تصح .. اي لو كانت ميتة وسمعت هالكلام رح تفيق .. فلا تقلق

لؤي: يااا رب

بقينا بالمشفى عم ننطر لوقت السحور .. بوقتا دقت امي ..

لؤي: اي امي .. انا بالمشفى .. اي امي لساتني بالمشفى .. اي .. لساتا ع حالا ... ماشي امي ماشي .. ليكنا جايين

سكرت الخط واطلعت بمي .. (مشي معي رح وصلك ع البيت )

مي: ماشي اخي

ركبنا بالسيارة ونحنا ساكتين .. لوقت حكت مي ..

مي: اخي .. انا جد بعتزر منك .. بس والله ما تخيلت الامور توصل لهون والله (تبكي)

لؤي: ففففف .. حاااج بكي اعصابي تعبانة كتير .. انا يلي بعتزر منك .. انت ما الك علاقة وانا زودتا كتير عليكي

مي: الله يخليلي ياك يا اخي ويريح قلبك ويشفيها لهالة

لؤي: امين يا رب

وصلتا لمي لباب البيت .. (نزلي )

مي: ما رح تنزل انت

لؤي: لا .. رح ارجع ع المشفى

مي: ماشي اخي .. انتبه ع حالك

رجعت ع المشفى واخدت معي مي وتمر .. وصلت لغرفة هالة وما كانو اهلا موجودين .. للحظة حسيت الدنيا كلا وقفت .. وما بعرف كيف ركضت ع غرفتا .. كانو كلن مجمعين حولا السرير .. وقف قلبي من شوفتن .. لوقت سمعت صوتا ..

هالة: الله يسلمكن ويخليلي ياكن

رتحت ونزلت دمعتي بالغصب .. مسحتا بسرعة وقربت لعندن .. والتمر والمي لساتن بايدي ..

لؤي: تفضلي بنت عمي .. هاد مهرك

هالة: لؤي !!

لؤي: اي .. لؤي .. ابن عمك وخطيبك

هالة: لؤي .. شو عم تحكي

لؤي: ازا ما بدك خلص بلاها

هالة: لا يعني بس انوو

لؤي: انو شو ... يا اما بتوافقي يا اما بخطفك

مرت عمي: لك شو هالجيل هاد .. لك ستحو

لؤي: حماتي حياتي .. ليكون ما عجبك مهر بنتك .. ترا ما في ابرك من المي والتمر هااا

عمي: هههههه الله يرضى عليكن يا ابني .. بس لسا بكير ع هالحكي البنت لساتا مانا قدرانة تطالع الكلمة .. واهلك ما عندن خبر

لؤي: محلولة عمي محلولة .. كلشي محلول .. وهلا كلو تمر وشربو مي قبل لياذن

#جمعية_كارهو_النساء_بقلم_امل_احمد
جمعية كارهو النساء (حلقة 28)
@rwayate
فتت ع البيت واستقبلتني اسئلة امي ..

امي: وينو اخوكي

مي: رجع ع المشفى امي

امي: لا اله الا الله .. جن هالولد جن

مي: اي والله يا امي جننن ع الاخير

امي: وكيفا هالة

مي: لساتا ع حالا .. بس الدكتور طمنا انو رح تتحسن

ابي: اي ان شاء الله .. ان شاء الله

قعدت معن وتسحرنا .. وصلينا ونمنا ..

كنت نايمة وغاطة بالنوم .. ومخلوقي الفضائي قدامي بشعراتو وعطرو .. وبئيدو قطة صغيرة عم يلاعبا وطعميها .. وانا عم اطلع عليه وسرحانة ببديع خلق الله ..

امي: مي .. مي .. ميييييي

مي: اي اي اي .. اييي امي

امي: فيقي صلي الظهر .. يالا يا امي

مي: حاضر يا امي حاضر .. الله يسامحك بس

امي: اي الله يسامحنا الجميع .. فيقي عجلييي وليي

مي: حاضر امي حاااضر

امي: صلي وتعي لعندي ع غرفتي

صليت ورحت لعندا ع الغرفة .. كانت عم تقرا قران وابي عم يتصفح فيس .. وقت شافتني حطت القران ع جنب ..

امي: تعي امي تعي

مي: اي امي

امي: بعرف امبيرح عصبت عليكي كتير وزعجتك ... بس صدقيني كلو من خوفي عليكي .. بكرة وقت بتتزوجي وبيجيكي بنات رح تفهميني .. البنت يا امي متل القزاز ازا نخدشت مستحيل ترجع متل قبل .. وانا بدي ياكن تبقو قزاز بيلمع وما حدا فيه يخدشكن .. ربي يوفقك يا امي ويسعدك

نزلو دموعي بالغصب وضميتا لامي .. (ربي يخليلي ياكي يا امي وما يحرمنا منك )

ابي: اي وانا شو

مي: لك انت الاساس عمو ابو مسمااار .. حبك انا

امي: تادبي ولييي

ابي: اي لا تدخلي بيني وبين بنتي .. تعي يابي تعي عطيني عبوووطة

رحت لعندو وضميتو وبوستو ..
ابي: والله وكبرت ميوشتنا لصغيرة وصارت عروس

مي: الله يخليلي ياكن يابي

امي: وهلا يامو .. اول شي رح نروح لعند لمى لطيب خاطرها .. وتاني شي بترجعي لتجهزي حالك .. بعد لفطور جايين الجماعة ليطلبو ايدك

وبلشت لطبووول تدق بقلبي وصار قلبي يغني ويرقص .. ووشي قلب ع احمر واصفر واخضر .. ونفسي داق وعيوني زغللو..

امي: لك شبك .. مييي

مي: هااا .. لا .. ولاشي امي ولاشي

امي: لكن لبسي يانس الصلاة لنروح لعند لمى

لبست ورحت مع امي لعند لمى ..
دقينا الباب وفتحتلنا ..
لمى: 😂 😂 يا اهلا وسهلا .. تفضلو تفضلو

ضمتا امي للمى وبوستا .. (سامحيني يا بنتي .. والله مو بقصدي .. مدري كيف طلعت مني )

لمى: شو هالحكي مرت عمي .. بعرف ولا يهمك .. تفضلو .. كيف لموشتييييي 😂 😂

مي: اهلا مرت اخي

لمى: 😂 😂 😂 لك والله ما عم صدق .. هلا رح اضطر قلك مرت اخي

مي: ششششش سكتي

لمى: 😂 😂 😂 ماشي ماشي

قعدنا شي ساعة عند لمى واجو سناء ورهف وقضيناها ع ضحك وحكاوي وخصينا بالذكر اخي حبيب قلبي شادي وفصولو يلي ما بتخلص مع رهف ..

امي: هلا الله يرضى عليكن يلي عليها شي شغلة تخلصنا وتجي فورا خلال ساعة كلكن بتكونو عندي .. بدنا نرتب البيت ونجهز الضيافة ..

سناء: والله ما عم صدق .. القطقوطة رح تتزوج

مي: ففففففف

سناء: خلص خلص فهمنااااا 😂 😂

رهف: 😂 😂 😂 والله وانا كمان ما عم صدق

امي: كلشي بهالدنيا نصيب

رجعنا ع البيت ودقت امي لاختي وفاء ولرولا ليجو ع جمعة المسا .. وبلشنا بتجهيز البيت ع حت ونتف وتلميع وتزيين ومدري شو ..

خلصنا وفتت ع غرفتي لاخد تيابي لاتحمم .. وازز برنا عم تبكي ..

مي: اختييي .. لك شبك

رنا: ولا شي يا روحي .. سلامتك

مي: انو سلامة هاي .. اختييي انت زعلانة لانو رح اخطب قبلك .. خلص اختي هلا بنهي كلشي والله

ضربتني ع كتفي وتبسمت من بين دموعا . ..
رنا: ولي جدبة .. وليش لازعل هاااا .. انا بس نفسيتي تعبانة كتير من البكالوريا .. لفحوصة قربت وحاسة حالي ما عم لحق .. وكل سهرات رمضان راحت .. لا عم شوفكن ولا عم لحق دراسة

مي: يا قلبي انا .. هلا ليكي انا لسا ما جربت البكالوريا .. بس صدقيني متاكدة انو كل يلي فيكي بس تعب نفسية .. لك انت ع طول متفوقة ليش لتخافي ... وغير عن هيك من بداية هالسنة وانت راسك بالكتاب وانا متاكدة ربنا رح يجبر بخاطرك وتحصلي مجموع لتدرسي الطب يلي بتحلمي فيه

رنا: ومين قال انو عم احلم بالطب

مي: لك شو بعرفني .. انا دائما بشوفن بالمسلسلات حلمن يدرسو طب

رنا: 😂 😂 😂 لك تضربي اييي .. انا رح ادرس تاريخ .. بس تاريخ لعلم الناس تاريخ بلادنا وجدودنا

مي: ههههه اي كلو طب عادي يعني

رنا: ههههه وكيف بقى هاي

مي: لك الطب العادي بيعالج الناس من المرض .. وهاد تاريخك رح يعالج عقول الناس من جهل تاريخا .. كيفك فيني

رنا: 😂 😂 😂 بتجنني

مي: لك راح الوقت وانا عم اعطيكي محاضرات .. والله لو تجي امي هلا وتشوفني لساتني ع حالي لتقطع الشحاطة علي

رنا: لكن قومي وعجلي هههههه

#جمعية_كارهو_النساء_بقلم_امل_احمد
جمعية كارهو النساء (حلقة 30)
@rwayate
خلصت سهرتنا ع خير والكل مبسوط وفرحان الا امي يلي كانت قاعدة ع جنب وعم تبكي ..

ادهم: شبها ست الكل .. حبيبتي امي ليش عم تبكي

مي: امي دخيلك .. ازا مانك موافقة ما رح يتم شي

امي: لا يا روحي .. الله يهنيكن عم ابكي ع هاللمة يلي بعد يومين رح انحرم منا .. نصيبي ينحرق قلبي بغربتكن عني

ايهم: لك يا عمري انت يا امي .. كلو اسبوع يلي عم نغيبو عنك

ابي: قولي الحمد لله .. نحنا احسن من غيرنا .. ع الاقل قدرنا نجمعن برمضان

امي: الحمد لله رب العالمين .. الله يحميكن يا امي

لؤي: احم احم .. سمعوني يا قوم ابو مسمار العظيم .. ومسحولي دموعكن .. لسا بكير ع البكي 🐸

مي: الله يجيب العواقب سليمة .. اخي شو رايك تمشي هالليلة ونحنا مبسوطين

لؤي: سكتي انت ولي قطة

مي: 😲 انت كمان .. حاضر اخي وهاي خرست

لمى: 😂 😂 😂 😂 لك شبكن انتو

لؤي: ابي .. امي .. بما انو هالفصعونة خطبت .. وبما انو انا اكبر منا فمن حقي انو انا كمان اخطب

سناء: ههههه هاد يلي كان ناقص

رهف: ما عم صدق .. لؤي رح يفك العقدة

امي: لسا بكير عليك امي .. قدامك مشوار دراسة طويلة

لؤي: لا مو بكير .. وانا مصر ع فكرة

ابي: والله وكبرو ولادي وعم يتصرفو من راسن .. ويخطبو ويقرؤو الفاتحة من غيري

اطلع لؤي فيني وعيونو رح تاكلني اكل .. (مييي)

مي: والله ما دخلني اخي .. والله ما دخلني ولا قلت شي

امي: شو مخبصين كمان

ابي: اختك مالا دخل .. عمك محمد حاكاني وقلي كيف كسرت المشفى كلو وفضحتن

امي: شووو .. لك شو صار

ابي: كل خير .. ابنك خطب هالة .. وبكرة بعد المعايدات رح نروح نطلبا رسمي

لؤي: لك الله يجبر بخاطرك يا احلى ابو مسمار

كلن صفنو في ومانن مصدقين .. ولمى وسناء ورهف ورنا ووفاء ع شوي رح يغط ع قلبن ..

لمى: 😂 😂 😂 😂 😂 😂

سناء: والله وعملتا السلالة

امي: لك انتو جنيتو شي

ابي: تركيهن لهالولاد وتعي معي انت .. وانا بفهمك كلشي

امي: لاااا ماني متحركة لتفهموني .. ولا قلكن والله لاتركلكن هالببيت وروح لمكان الجني الازرق ما يعرفو

قرب منا ابي ومسكلا ايدا .. (اي تعيييي .. ليش في جني ازرق وانا موجود .. تعييي معيي )

والكل فرط ضحك .. وبلشو يسلمو ع لؤي ويباركولو ..

مي: لك رهف .. وكانو شادي لفو للؤي وبوسو كمان

لمى: 😂 😂 لك اي والله

رهف: اي الحمد لله .. بس لسا بدنا شوط طويل

سناء: اي الحمد لله

رولا: ع فكرة انا ماني فهمانة شي

وفاء: ههههه اي اريح لراسك حبي

هادي: تعي يا روحي تعي وانا بفهمك بطريقك ع بيت اهلك

هالليلة كانت مميزة بكلشي فيها .. خلصنا سهرتنا وفتت ع غرفتي وكل حركة وكل كلمة قالا طلال لساتا عم ترن بادني .. ومع كل كلمة اتزكرا قلبي يدق اكتر واكتر ..

وبقيت هيك لوقت غفيت ..

وما صحيت غير ع صوت التكبيرات والتهليلات بالمساجد .. شي من جواتي تحرك وحرك كلشي مشاعر بقلبي ..صرت عم ردد معن وابكي ..

فتحت رنا عيونا واجت لعندي وضمتني ..
رنا: اختي .. كل عام وانت بالف خير يا روحي

مي: وانت بخير اختي

رنا: شبك يا روحي عم تبكي

مي: قلبي تعبان كتير وموجوعة

رنا: لك ليش .. انت عروس هلا يا روحي وما حدا قدك .. صار شي معك

مي: لا ابدا .. بس مدري شبنبي

ولسا عم حاكيها دق تلفوني ..

رنا: اييي بلشنا .. ردي اختي ردي.. رح روح اتوضى لصلي

مي: هههه ماشي .. سلام

طلال: كل عام وانت حبيبتي .. بحبك

بلعت ريقي وانحبس الحكي بحلقي ..

طلال: شبك .. عم تسمعيني

مي: اي .. وانت بالف خير .. ربي يخليلي ياك

طلال: امين ويخليكي الي .. حبيت تكوني اول شخص عايد عليه .. وهلا بالازن منك رح روح

مي: شكرا كتير لالك .. خد راحتك

طلال: هههه ماشي سلام

لؤي .. فتحت عيوني ع صوات التكبيرات .. تنهدت وانا ما عم صدق يلي صار .. كابوس بشع كتير وانتهى

لؤي: الحمد الك يا ربي .. الحمد لله

قمت توضيت وصليت الفجر وجهزت حالي لصلاة العيد ودقيت لهالة ..

هالة: بحبك وبموت فيك

لؤي: لك ركزي شوي .. شبككككك .. قولي الو ع الاقل

هالة: ما بدي اركز معك .. بدي جن وجن وجن .. وبدي حبك وخلي الكون كلو يحكي بحبك

لؤي: لك مجنوونة .. جد مجنوونة ... بعشقك وليي

هالة: اي وانا بعشقك وبعشق كلشي فيك .. لك بتعرف الشعرة يلي بتهر من راسك .. لك حتى هاي انا بعشقا

لؤي: هههههه اااخ شو بحبو لهالجنان انا .. جهزي حالك المسا ماشي

هالة: جاااهزة .. بكل وقت وبايا وقت جااهزة

لؤي: ماشي يا مجنونة ... رح روح صلي العيد هلا

هالة: ماشي يا عمري .. تقبل الله

وهيك صلو اخواتي وابي العيد واجو .. وكنا كلنا مجتمعين سوا .. وسلمنا ع بعض وعايدنا بعض وجهزنا لفطور وضحكنا وفرفشنا .. وبلشت المعايدات لوقت المسا .. واجا وقت لؤي وخطبتو ..