قاعدة قدام المراية بفستاتا الابيض لبجنن..كمامو دانتيل والو فتحة من عند الضهر مشكوك باللولو والالماس نفشتو كبيرة وعاطيتو جمال كتير..شعراتا مرفوعين رفعة بسيطة ونازل منن خصل ملفلفين..مكياج ناعم ولابق لوشا كتير عاطيها جمال فوق جمالا..سلسال ناعم لابستو برقبتا زايد من انوثتا وحلاوتا..
عم تتأمل حالها...حلوة كتير كلشي فيني حلو..الا حظي! ليش..ليش ياربي..ليش حظي انزف لواحد ما بحبو وقلبي معلق بغيرو..كان حلمي يوم لبدي البس الابيض لغيث وصير ملكو..انزف هلئ لغيرو!
نزلو دموعا من دون ما تحس ع حالها..
روح:يااي شوو حلو..غيث ليك هالفستان بجنن 😍بفرحنا بدي متلو شو رأيك؟
غيث:مو حلو 😒
روح:تضرب 😒..اي انا عجبني اصلا 😌
غيث:اي انا ما عجبني..ليكي كيف مكشف كتير
روح(زورتو):يعني فستان عرس كيف بدك ياه يكون؟!
غيث:بكمام في بكمام وحلو كتير ما ضروري يكون النص لفوقاني مالو موجود 😕
روح(ضحكت بصوت عالي ع كلمتو):ههههه حبيبي هاد بقولو عنو قطع مو مالو موجود 😂😂
غيث(حط ايدو ع تما وهو معصب):هسسس يادبة حاج تضحكي..وامشي حاج الرايح والجاي عم يطلعو علينا😡
روح(عضتلو ايدو ورجعت تضحك):ههههه دخيل الغيور انا..غيوثتي الله يخليلك تعا نفوت نشوفو من جوا..حباب..الله يوفئك
غيث:لك شو بدك تشوفي يا هبلة 😳
مسكتو من ايدو وسحبتو معا وصارو يتفرحو عالفساتين وروح عم تلف حوالين الفساتين وغيث تعب وهو عم يلف وراها وتدخل من طرف تطلع من طرف وهي كتير مبسوطة كأنو طفلة بعمر خمس سنين وعم تتفرج على الالعاب وهي تقلو هاد حلو وهو يقلا لا الو فتحة من عند الصدر ما بصير هاد مغطا وحلو ويرجعو يضحكو وكأنو عم يختارو الفستان وبكرا عرسهن
غيث(مسكا من ايدا وحكا بشقاوة):روح روح ليكي عندي فكرة شو رأيك تقيسي هاد الفستان بيطلع بجنن عليكي 😍
روح:اي والله فكرة حلو 😍(قربت منو وهمست بأدنو)بس اذا حس علينا صاحب المحل انو عم نتسلا وما رح نشتري شو رح يعمل؟😂
غيث(بثقة وغرور):يسترجي يعمل شي وانا معك😌..استني
غيث(لصاحب المحل بدل ملامح وجهو للجد وحكا)يعطيك العافية معلم.. عجبنا هالفستان ممكن تقيسو؟
الشب:اكيد..تفضلي يا انسة من هون..
عطاها الفستان وفاتت ع غرفة القياس لبستو وغيث كان ناطرا برا فتحت الباب شوي ومدت راسا بحركة طفولية وقالتلو غمض عيونك..ضحك غييث وغمض وقلا يلا ما بقا فيني اصبر..طلعت قدامو وقالتلو فتح وصارت تفتل قدامو وهي طايرة من الفرح وكأنو نسيت الشغلة مزح..
غيث(قلبو عينو لقلوب حب):😍😍😍لك دخيللل الله
شو هل جمال بيجننن الله يحميلي ياكي يا روحي
روح(بخجل):عجبتك مو؟
غيث(بحب):لك طيرتيلي عقلي
تنحنح الشب وحكا..احمم شو انسة عجبك؟في غير شي اذا بتحبي..
روح وغيث عم يخفو ضحكاتن وحكا غيث حلو كتير بس صار عنا ظرف ولازم نمشي منعتذر بس رح نرجع مرة تانية(نكش روح بأيدو بمعنى احكي شي)
روح(عم تحبس ضحكتا ومتلبكة):اييي صح..انشالله رح نرجع..يلا غيث
طلعو لبرا وفرطو ضحك..
روح:ياااخ يا غيث اديش صرلي ما ضحكت هيك😂😂لا وبدو يورجيني غيرو اخ يا ربي 😂😂
غيث:حاسس حالي مراهق 😂😂..بس شو النا بالحكي الفستان كان رح ياكل من جسمك شقفة😉
روح:يييي منيح لشلحتو قبل ما ياكل ههههه
غيث:لك تضربي انتي ولبدو يغازلك اصلا الحق علي اخدتك عقد عقلك 😒
روح:مو طبيعي 😂😂😂
فاقت من شرودا ع صوت تنقيرة الباب مسحت دموعا بطرف ايدا وحكت فوتي ماما
زينب(بأبتسامة عريضة):اسم الله عليكي..طالعة بتجنني الله يحميكي من العين
روح(بحنان):تسلمي يا قلبي
زينب:يلا روني ناطرك برا قومي مو حلوة ينطر اكتر..
برا واقف روني منتظر حبيبة قلبو يلي حبا سنين وماقدر يكسب قلبا..عم يروح ويجي بتوتر ببدلتو الرسمية السودة والكرافيتة الخمري..شعرو منظم بطريقة ناعمة وملفتة للنظر..دقنو الكثيفة لعطيتو رجولية زيادة..
روح اخدت نظرة اخيرة ع حالا ومسكت ايد اما وطلعت..لقت ابوها وروني عم يستنوها..روني كان رايح جاي فتل ضهرو لما سمع صوت كعبا عم يقرب وقف متل الاهبل لما شافها وجمد بمكانو ونسي شو لازم يحكي ويتصرف..بعدين تذكر حالو واخيرا حكا بكل رجولية واتزان..اهلا روح ما شاء الله طالعة كتير حلوة..خجلت روح وقالتلو شكرا..لمحت دموع ابوها..مشيت لعندو ووطت لعندو وقعدت مقابيلو بوست ايديه وحكت..
روح:بابا شبك..ليش الدموع هلق..(كملت بشقاوة)مالك فرحان لوحيدتك؟😌
عادل(عم يمسح دموعو):اكيد فرحان وهي دموع الفرح وزعلان انو رح تتركنا..
روح(حكت بولدنة ودلال):مارح اتركن كل يوم رح نط لعندكن
ضحكو كلن وروني مسكلا ايدا وقوما قرب منا وهمسلا.. طالعة بتاخدي العقل❤️
اكتفت روح بأبتسامة ناعمة ومشيو..
وصلو قدام الصالة مسكلا ايدا ونزلا..وقلا جاهزة؟ هزت راسا وبتسمت وقالتلو يلا..
فاتو عالصالة وايديهن بأيدين بعض ووراهن امو واما عم يهنهنو ويزلغطو..وعيون الكل عليهن وبلش الهمس منن يلي بحبهن وعم يتمنالن السعادة والهنا ومنن يلي عم يحكي عليهن ومو عاجبو العجب..بس روني كان مالو مركز غير بروح طالعة متل الملكة ماعم يشبع تطليع فيها..