بقيت المرة عم تحكي و تعطينا مواعظ نحن عم نهز راسنا ،بالاخير ادارك الموقف امير حتى يسكتا و مسك كل التياب عن العليقة و اخدن و راح على الكاشير ،جيت لاشلح الفستان و ارجع البس تيابي ،ما شفتن ،شقيت الباب شوي
قمر:اميرررر...اميررر..تبا لك رجعلي تيابي ...امير وينك
طلعت من غرفة المقاس انا و حافية ،شفتو عم يحاسب ،نادتلو بصوت واطي ،التفت علي
قمر:اميررر اخدتلي تيابي
امير:اه يلا.. ليكن
مسكن و اجا لعندي
امير:تفضلي ،كيف طالعة حافية القدمين هيك ، احترمي حرمة المكان على الاقل هههههه
قمر:هات لهون ،كانو حدا اعطاها ميكرفون و قلا اعملي خطبة بالاخلاق
لفيت و ضهري و مشيت
امير: يا ربي دخيلك ..قمر قمر
قمر:ايه
امير:كنت عارف انو هالفستان رح يطلع بجنن عليكي كأنو اتفصل الك
حطيت ايدي على خصري
قمر:انت جايبني لاشتري لاهلك الا لتبصبص علي بهيك فستان
امير:ههههههههه اكتر شي بيعجبني فيكي صراحتك الدج ،ما في كنترول على لسانك
لبست تيابي و طلعنا من المحل ،فتح باب سيارتو لاطلع فيا
قمر:انا برجع لحالي
امير:طيب ماشي ،صرت حافظك منيح و ما رح جادلك ،رح وقفلك تكسي كرمال ما ترجعي بالباص
وقفلي تكسي و حاسبو و طلعت و رجعت على البيت ،تاني يوم اجت ميساء من الجامعةو فاتت عندي
و حاملة معا كيس
ميساء:هيدا من امير الك
قمر:الي انا
فتحت الكيس ،كان فيه الفستان الاسود يلي اشتريناه لبنت عمتو
ميساء:واو حلو كتير ،ولله عم تعرفي دبري حالك معو و تقشطيه منيح ،بس هو امير هيك بيسخى كتير على البنت يلي حابب يتسلى معا
قمر:بالله ،اي خديه من وجهي و رجعيلو اياه و قليلو هديتك مرفوضة
ميساء:انا باخدو ،ما بيلبقلك النعمة
قمر:لا رجعيلو اياه،بخاف يفكر اني قبلتو و هو بيعطيكي اياه لحالو و بعدين اذا كل هالقد شايفة امير نعمة ليش ما بترافقيه انت
ميساء:هههههه انا و امير ،يا روحي انا بدي شاب غني بس يكون راكز ما متل امير صايع و بيشرب و كلو مشاكل ،و كل يوم مع بنت شكل و ما بتهدى البنت معو شهر و بغير عنا ، و الو 6سنين بالجامعة لهلأ ما عرف يتخرج ،ايييه و انت كمان ما تنخدعي فيه كتير و يصير فيكي متل ما صار بغيرك ، بيقعد معك شهر زمان و بعدين بقلك الله معك
قمر:بفهم من حكيك انو صار معك هيك انت كمان
ميساء(مرتبكة):انا ...لا ...ابدا
قمر:اممم ،طيب معناها رجعيلو الفستان و اذا اتصل فيكي ليحكي معي قليلو ما بدا تحكيك
ميساء:ما دخلني انا ،انت قليلو هالحكي
قمر:ليش؟بتخافي منو مثلا
ميساء:لا ليش لخاف
قمر:كيفا سارة مع ابن عمتو؟
ميساء:منيحة ،ما شكلو كتير بيفرق عنو كتير يلا انا طالعة و انت ادرسي
طلعت ميساء من غرفتي بعد ما رمت كل هالحكي قدامي و تركتني بصراع مع افكاري حتى ما بقا عرفت ادرس ابدا بهديك الليلة ، نمت انا و عم فكر بأمير و شخصيتو غير المتزنة و اخدت قرار انو ابعد عنو و ابعد عن اي مناسبة او فرصة ممكن تجمعني فيه لانو هيك شاب بضل ورا االبنت ليحس حالو انو ملكا و بعدين بيتركا و بدور على غيرا ،بعد يومين فاتت ميساء لعندي هي و حاملة موبايلا
ميساء:امير على الخط
اخدت الموبايل منا و سكرت الخط بوجهو
ميساء:شو عملتي يا هبلة
قمر:ما بقا بدي احكي معو و ما بدي اياه يسمع صوتي ابدا ،هيك خبريه
رجع رن موبايلا ،اعطيتاه و طلعت من غرفتي ،تاني يوم انا و طالعة من المدرسة ،شفتو واقف قبال الباب ،بعدت نظري عنو و تجاهلت وجودو ،مشيت انا و رفيقتي ،هي طلعت على بيتا و انا تابعت لحالي ،لحقني بالسيارة و صار يناديلي ،عملت حالي ما شايفتو و رجعت على البيت ،تاني يوم انا و رايحة على المدرسة الصبح الساعة 7،كنت ماشية بالشارع ،حدا مسكني من ايدي و دخلني على شارع ضيق
قمر:رعبتني هيدا انت ،شو فايق بكير اليوم
امير:شو قصتك ؟ مغيرة التردد هالفترة و ما عم تردي على اتصالاتي
قمر:بصفتك شو بدي رد عليك
امير:.....
قمر:لتكون مفكر عنجد انو انا صاحبتك ،اطلع من حياتي و ما بقا تتعرضلي بهالطريقة ،انا مستحيل رافق انسان هامل فاشل متلك ، غير مسؤول و ولد صايع من بنت لبنت ،اصلا البنات هن يلي بتسلو فيك ما انت و مرافقينك على مصرياتك ما على اخلاقك و هضامتك
امير:كل هدول انا ؟
قمر:و...كسلان كمان ،الك 6سنين بالجامعة و ما تعرف تتخرج ،بكرا بفوت انا عالجامعة و بتخرج قبلك و انت بعدك عم ترسب او تنجح شحط
مسكني من ايدي