📚قصص||روايات||منوعة📚

بلعت بثينة ريقا برعب ، و بس شافت انو الحركة و الصوت جايين من تخت جنان ، تنهدت براحة @rwayate
بثينة : كنتي رح تموتيني من الخوف هاد انا بثينة

اقتربت جنان من مصدر الضو لتشعلو بس نهرتا بثينة و ما خلتا

جنان : لك شو صايرلك انتي ؟ عم تتصرفي متل الحرامية

بثينة : شو نسيانة انو بدي اطلع مع نبيل

جنان : لا تواخزيني من صدمتي باللي سمعتو اليوم نسيت

بثينة : دخيلك يا جنان يعني شو تغير عليكي بعد يلي سمعتيه ؟

جنان : ما تغير شي

بثينة : لكن اعتبري حالك ما سمعتيه ، ولا بقى تقهري حالك

جنان : مو بايدي ، ما بقدر الا ما فكر انو طلعت بنت حرام لام عاطلة و اب مجرم

بثينة : ريتا بتموت حرق هالصبحية شو مكيودة و لئيمة ، لو بقيت مخروسة مو احسن

جنان : كانت مضطرة تخبرني لانو رح تزوجني و ما عاد رح تشوفني

بثينة : تزوجك ! ما قلتيلي شي عن هالموضوع

جنان : جايبتلي عريس

بثينة : الحكي هاد صار بدو قعدة

جنان : بلا ما تتأخري على نبيل ، روحي هلا و بس ترجعي منبقى منحكي

بثينة : ماشي ، بس ما تنامي احسبي حسابك رح نسهر للفجر حتى نحكي

لبست بثينة تيابا و جهزت حالا ، و قبل ما تطلع من الغرفة طلبت منا جنان انو تنتبه على حالا و ما تسمح لنبيل يغلط معا او يتجاوز حدودو

بثينة : لك ما تخافي نبيل بحبني كتير و مستحيل يإذيني

جنان : اي الله ييسرلك

نزلت بثينة للطابق الاول على الهدا و بدون ما تطالع صوت ، كانت عم تفكر كيف بدا تقطع من قدام غرفة صبحية بلا ما تشوفا ، هي و عم تتسلل لمحت حدا عم يمشي ، لهيك تخبت فورا

بثينة : يضرب حظي ! مين هاد هلا ؟

وقفت بثينة شوي هي و عم تضيق عيونا لتحاول تشوف مين و استغربت بس شافت نبيل واقف على باب الادارة

بثينة : شو عم يعمل هاد الغبي ! واقف على باب صبحية ! شو بدو يفضحنا ؟

زادت دهشة بثينة اكتر بس شافت ضو غرفة صبحية اشتعل ، التفت نبيل مرتين حواليه و بعدا فات لجوا

بثينة : فات لعندا !

زاد فضولها لتعرف شو عم يصير ، حاولت تقترب من باب الغرفة على قد ما بتقدر لتسمع شو عم يحكو بهالليل ، بس عبث صوتن كان كتير واطي و ما استفادت شي من محاولتا ، و بعد مرور نص ساعة حست على الباب عم ينفتح ، ركضت بثينة و تخبت حتى شافت نبيل عم يطلع و بايدو مغلف كبير ، اول ما بعد نبيل شوي عن باب الادارة ندهتلو بثينة

نبيل : ب بثينة !!! انتي من ايمتى هون ؟!!

بثينة : من وقت ما دخلت لعند صبحية ؟ شو عم يصير معك ؟ و شو هادا اللي بايدك

تعرق نبيل و بان التوتر على ملامحو فورا

بثينة : نبيل شبك ؟ عم اسالك شو كنت عم تعمل هون ؟

نبيل : تعي معي شوي

مسكا نبيل من ايدا و شحطا لبثينة على الحديقة الخلفية مطرح ما كانو متفقين انو يلتقو

بثينة : عم اسمعك

نبيل : كنت جاي لهون حتى قلك انو ما فينا نطلع اليوم ، علاء مريض و ما بيقدر يغطي محلي ، يعني مشان نأجلا لغير يوم ، بس شافتني صبحية واقف هون و تحججتلا انو جاي اخد كاستين شاي الي و لعلاء ، قامت خبرتني انو في مشكلة بحساب الاغراض اللي اشتريتن اليوم و انو المبلغ المفقود كبير و لازم راجعا بالادارة باسرع وقت ، بقي بالي مشغول و قلت بما انو مو طالعين اليوم رح روح على غرفتا و اذا لقيتا فايفة لراجعا و بس هاد كل يلي صار

بثينة : و شو هاد يلي بايدك

نبيل : هاي امانة عطتني اياها لوصلا لمكتب البريد

بثينة : بتعرف انو بس شفتك فايت لعند صبحية بهالوقت ما ضل فيني عقل و صارت افكار تجيبني و توديني

نبيل : سلامة عقلا حبيبتي ، لو بعرف بدي اقلقك بهالتصرف كنت نطرت للصبح ، بس قلتلك بالي ضل مشغول لانو المبلغ كبير و خفت ينخصم من راتبي

بثينة : و نحلت المشكلة

نبيل : اي اي نحلت ، و هلا ارجعي على غرفتك بلا ما تبردي

بثينة : يعني انت بتخاف علي امرض

نبيل : معلوم بخاف ! لك مو انتي حبيبتي و عمري و روحي

احمر وشا لبثينة من الخجل و عطتو ضهرا لنبيل

نبيل : لك دخيلو حبيبي اللي بيخجل

ما تحملت بثينة تسمع كل هالحكي الحلو من نبيل لهيك تجاهلتو و فاتت بسرعة لجوا حتى بدون ما تودعو ، كان قلبا عم يدق بسرعة و الحرارة عم تتدفق من وشا ، ما عرفت كيف صارت بالغرفة بلمح البصر

جنان : بسم الله عليكي شبك ؟

بثينة : بحبو ، بحبو كتير يا جنان

جنان : هههههه اي شو الجديد

بثينة : اليوم زاد حبي الو اكتر

جنان : يا لطيف شو صار معكن حتى راجعة بكل هالحب ، و صحي ما طولتو

بثينة : ما قدرنا نطلع قعدنا شوي بالحديقة و بقي عم يتغزل فيني و يسمعني كلام حلو كتير يا جنان

جنان : الله يهنيكن

بثينة : و هلا صار دورك ، شو قصتو عريس صبحية ؟

جنان : ما بعرف ، قالتلي جاييني عريس ادمي و مناسب لالي هاد كل شي بعرفو

بثينة : اي و ليش زعلانة ؟ لازم تكوني فرحانة مو هاد كان حلمنا على طول ؟ انو نأسس عيل و نخلف ولاد و نعيش بسعادة

جنان : مو زعلانة بس مقهورة ع الحكي يلي سمعتو

بثينة : قلتلك خلص اعتبري انو ما عرفتي قصتن و اخترعي براسك قصة حلوة لالهن و صدقيها ، مو كنا على طول نهرب من واقعنا بالاحلام ؟ و كل شي ما كنا نحبو بالواقع كنا نلاقيلو بديل بالاحلام ، خلينا نتخيل انو امك و ابوكي كانو يحبو بعضن كتير و عايشين بكوخ صغير بالغابة بعيد عن الناس

جنان : و ابي كان حطاب و امي ربة بيت و بتشتغل بالحياكة

بثينة : و انتي كنتي ثمرة حبن

جنان : و كانو فقراء كتير و ما قدرو يامنولي حياة كريمة لهيك حطوني بالميتم

بثينة : اي ضحو بسعادتن و حبن الك حتى تعيشي حياة كريمة

جنان : هههههههه نحنا مجانين

بثينة : اي و اخيرا ضحكتي

قضو البنتين ليلتن سوا عم يحلمو و يتخيلو و يضحكو ، هيك كانو على طول يعملو بس تقسى الحياة عليهن يهربو بخيالن على مكان اكتر دفء و عطف و حنان

تاني يوم كان يوم عادي و روتيني متل كل يوم فاقو البنات لبسو تيابن فطرو و بلشو بشغلن كالعادة ، كانت جنان عم تمسح الارض بوقت فاتت لعندا صبحية و طلبت منا تلبس تياب مرتبين و تسرح شعرا و تلحقا لغرفة الادارة ، عملت جنان متل ما انطلب منا و بس فاتت لعند صبحية استغربت وجود مرا كبيرة بالعمر واضح ع وشا التعب و الارهاق بس كمان كانت ملامح وشا مريحة و فيهن شي من الطيبة و الحنان ، ابتسمت المرا لجنان بلطف و بادلتا جنان الابتسامة

صبحية : شبك جنان ، فوتي قعدي

فوزية : ما شاء الله عليكي ، متل ما قلي اية من الجمال

قعدت جنان هي و مستغربة حكي المرا

صبحية : بعرفك على فوزية خانم ، امو للشاب يلي طلبك مني للزواج

تلبكت جنان فورا و نزلت عيونا بالارض و خجلت

فوزية : لا تخجلي مني يا بنتي انا رح صير متل امك

صبحية : ابنا لفوزية خانم شافك وقت طلعتي للسوق مع البنات لتشترو تياب العيد و عجبتيه ، لهيك اجا لعندي و طلبك مني و انا ما رضيت ردلو خبر لوقت سالت عنو و تاكدت انو شاب محترم و خلوق ، شغيل و عايش مع امو ببيت لوحدن ، لمن شفت الشاب مناسب قلتلو يبعت امو تطلبك حتى يتم الموضوع حسب الاصول ، و هلا بعد ما شافتك امو صار فيكي ترجعي لعند البنات

طلعت جنان و فورا راحت لعند رفيقتا خبرتا شو صار معا ، كانو تنيناتن فرحانين بالشي يلي صار و بالتطورات يلي عم تدخل حياتن

بثينة : و هاي رح بصير عندك عيلة و زوج و ولاد

جنان : و حماية بتجنن

بثينة : لك ما قعدتي معا خمس دقايق للمرا دغري عرفتي انها بتجنن

جنان : في ناس بس تشوفيها فورا بترتاحيلا و بتحسي انك بتعرفيها من زمان

بثينة : و صايرة تفهمي بالناس كمان ههههه مشي مشي عنا شغل لفوق روسنا

مر باقي اليوم بسلام ، و المسا بعتت صبحية ورا جنان لتكمل معا النقاش و تاخد رأيها

صبحية : كيف شفتي امو للشاب

جنان : باينتا منيحة

صبحية : اي المرا كتير منيحة و اكابر و قالتلي رح تعاملك متل بنتا ، شفتي كيف الله بدو يعوضك و يبعتلك ام تانية بدل يلي تخلت عنك

غصت جنان بس تزكرت

صبحية : الشاب طلع مسافر عندو شغل هالفترة لهيك ما قدر يجي ، بس بدو اياكي بسرعة و مستعجل على ما تصيري ببيتو ، لهيك معك اسبوعين تجهزي حالك فيهن حتى تروحي لعند زوجك

جنان : هيك بهالسرعة ؟ و بلا ما شوفو و اعرفو ؟

صبحية : لتكوني مفكرة انو بسمح لزلمة غريب يفوت و يطلع على كيفو على ميتم كلو بنات و صبايا مشان حضرتك تتعرفي عليه و تحبي و تعيشي قصص الافلام و الروايات ؟!

جنان : ع الاقل خليني شوفو مرة وحدة

صبحية : حسبت هالحساب ، و انو تطلعيلي بقصة بدي شوفو و اتعرف عليه ، خدي هاي صورتو

تناولت جنان الصورة بتردد ، و اول ما وقعت عينا عليه ابتسمت لا ارادياً كان شاب اسمر طويل مفتول العضلات و حليوة

صبحية : اسمو نزار

جنان : نزار ، ما عم اتزكر انو شايفتو بالسوق

صبحية : ما احلاكي و تتزكري ! ليش انا ببعتكن ع السوق مشان تبصبصو ع الشباب

جنان : انا ما قصدت …

صبحية : اي اي ، خدي هدول كمان

جنان : شو هدول

صبحية : مصاري بعتلك ياهن نزار حتى تنزلي ع السوق و تجهزي حالك ، حطي ببالك انو ما رح اسمحلك كل يوم و التاني تنزلي ، اختاري يومين حتى ابعتك فيهن مع نبيل و وحدة من البنات لتشتري كلشي ناقصك و بتحتاجيه

جنان : اي

صبحية : ما تنسي بعد اسبوعين رح ترجع فوزية خانم لتاخدك على بيت ابنا لتحطي غراضك فيه

جنان : و نزار ما رح يجي معا ؟

صبحية : ههههههههه شو بلاقيكي مستعجلة على لقائو

خجلت جنان من حكي صبحية بس كان حقا تسال و تعرف ، بالنهاية هاد مستقبلا و مصيرا

صبحية : نزار مروح من سفرو بعد يومين من نقلتك لبيتو ، هيك احسن الك بتكوني اخدتي ع جو البيت و تأقلمتي ، و لا تخافي رح يتصل و يحكيكي بكرا و تتعرفي عليه

جنان : شغلة اخيرة ، فيني اخد بثينة معي

صبحية : اي فيكي بس لا تطولو بالسوق

جنان : حاضر

تاني يوم طلعت جنان و رفيقتا و معن نبيل على السوق ، و ما تركو محل يعتب عليهن ، و اشترو كلشي عجبن

بثينة : باينتو كريم هالنزار باعتلك كتير مصاري

جنان : اي معك حق ، حلو هالفستان مو هيك

بثينة : اي كتير عجبني

جنان : لكن خديه هدية مني الك

بثينة : انتي رفيقة بتجنني

كان نبيل واقف ع جنب و عم يراقبن من بعيد لبعيد

جنان : شبو نبيلك صافن فينا من وقت ما طلعنا

بثينة : تركيه يمتع ناظريه

جنان : هههههههه يا عليكي شو قوية

بثينة : رح ناديلو
يا نبيل نحنا خلصنا و صار لازم نرجع

اجا نبيل فورا و تناول الاغراض من ايدا لجنان

نبيل : ساعدك بشي تاني ؟ احمل عنك الاكياس هدول ؟

جنان : لا خلص هدول انا بحملن

زورتو بثينة و قالتلو : خد هدول عني

مرو الاسبوعين بلمح البصر ، كان نزار يتواصل فيهن مع جنان عن طريق التليفون ، كل يومين يتصل مرة
حتى اخدو وش على بعضن و خلال هالفترة بعت وكيل عنو و كتب كتابو عليها غيابيا ، و اخيرا اجا اليوم الموعود يلي رح تطلع فيه جنان لبيت زوجا ، كانت واقفة عم تودع رفقاتا و تبكي عليهن و يبكو عليها

صبحية : يلا يا جنان الخانم ناطرتك

طلعت جنان ولاقت فوزية ناطرتا، ركبت معا بالتكسي و انطلقو ،و هون بلشت رحلة جديدة و فصل جديد بحياة جنان ، و اجا الوقت لتتعرف فيه على بيتا الجديد و حياتا الجديدة
اول ما بعد بعد التكسي و اختفى عن انظار الواقفين يلي كانو عم يودعو جنان فاتت صبحية فورا على غرفتا و اتصلت بسعاد لتخبرا باخر التطورات

صبحية : كل شي صار متل ما خططنالو يا خانم ، اي اتطمني خلصنا منها للابد
ههههههههه
انتي كريمة و انا بستاهل

اما جنان فاتت مع فوزية على بيت صغير و متواضع بحارة شعبية ، بس هالشي ما هما كتير لانو يلي كانن هامما اكتر الشخص يلي رح تعيش معو ، بقيت جنان متوترة و حاسة بجو غريب عليها

فوزية : هاي غرفتك يا بنتي ، فوتي ارتاحي و غيري تيابك ، ابني بعد شوي بيجي

جنان : الست صبحية قالتلي انو بكرا رح يجي مو اليوم !

فوزية : كيف يعني بكرا ؟ بتكون مخربطة
ها صوت الباب نفتح بكون اجا رايحة استقبلو

تسارعت نبضات قلبا لجنان بثواني و حست انو ركبا ما عادو يحملوها ، لهيك قعدت على التخت

جنان : مو قالو بكرا رح يجي ! يا الله نفسيتي مو متهيأة
خلص جنان اهدي و روقي ما صار شي
بكرا او اليوم كلو نفس الشي

اول ما سمعت جنان صوت الباب رح ينفتح حطت عيونا بالارض و بقيت متجمدة مكانا
@rwayate
….. : نورتي بيتك

جنان : …..

اقترب الشاب من جنان و رفعلا وشا بين ايديه حتى التقت عيونن ، و هون كانت الصدمة

جنان : نبيل !

طلع نبيل لبرا و رجع بعد شي عشر دقايق هوي و حامل حبل بايدو ، دق الباب مرتين و ما اجا رد ، دفش الباب و فات ، كانت جنان متسطحة على التخت

جنان : ما ازنتلك تفوت

نبيل : غرفتي و مو بحاجة ازنك لفوتا

انتبهت جنان على الحبل و تبدلت ملامح وشا فورا

جنان : شو هاد يلي بايدك

نبيل : حبل بدي اربطك فيه

مشي نبيل باتجاه جنان يلي كانت خايفة منو و عم ترتعش ما بتعرف شو بدو يعمل فيها

جنان : بس انت قلتلي لسا رح تعطيني وقت

نبيل : اي قلت ، هاتي ايدك لهون

بلشت جنان تبكي و تترجى

جنان : مشان الله لا تإزيني

نبيل : لك لا تبكي ما رح اعملك شي بس بدي اربطلك ايديكي حتى ما تهربي

جنان : كيف ؟!

نبيل : ما بدي تعمليلي حركات بطولية و تحاولي تهربي من هون ، لهيك رح اربطك احتياطا

جنان : ما رح اهرب ، اصلا ما عندي مكان تاني روح عليه ، ما بعرف غير الدار و مستحيل روح عليها لانو صبحية رح ترجعني لعندك

نبيل : لا تخافي ما رح اعمل معك هيك على طول ، بس اول فترة حتى اضمن تصرفاتك

بعد عنها نبيل بعد ما ربطلا ايدها و رجليها بالتخت

نبيل : انا رح نام برا ، و كل ما كنتي اعقل و عجبتيني اكتر بفكك من هالقيود اسرع ، تصبحي على خير

بقيت جنان طول الليل عم تبكي و تتحسبن على صبحية و نبيل و اللي عملوه فيها ، ضلت على هالحال لوقت تعبت و غلبا النعس

تاني يوم اول ما طلعت الشمس ، فاق نبيل و فات لعند جنان يتطمن عليها ، كانت بعدا نايمة ، طبعا لانو بقيت للفجر سهرانة عم تبكي ، كان وشا احمر و عيونا متورمة ، و عم تشهق حتى و هي و غفيانة من كتر ما بكيت ، شفق على حالتا نبيل و سال بينو و بين حالو اذا كان مستاهل يعمل كل هالشي كرمال المصاري

نبيل : يلا بكرا بتتعود ع حياتا الجديدة

طلع من الغرفة و سكرا بالمفتاح ، صبح على امو و نبه عليها ما تزعج جنان و تتركا نايمة ، و طلع على الميتم لعند صبحية

صبحية : طمني كيف كانت ليلتك يا عريس

نبيل : قضيناها مقاهرة و نكد و بكي

صبحية : اي المبلغ اللي قبضتو مو قليل ، معلش تعزبلك شوي

نبيل : انسي ، رح اترك الشغل

صبحية : اي يلي صار معو كل هالمصاري شو بقى بدو بالشغل ، ما قلتلي مرقت عليها القصة للهبلة ولا شاكة بشي ؟

نبيل : حاولت اقنعا انو كنت حبا ، و انو تقربت من رفيقتا كرمالا

صبحية : و اقتنعت ؟

نبيل : معا معا بتقتنع

صبحية : اي اهم شي ما ارجع شوف وشا بعد اليوم

نبيل : صار عندي فضول اعرف شوفي ورا هالبنت حتى دفعتيلي هديك الحسبة لاتزوجا و خلصك منا

صبحية : دفعتلك هديك الحسبة حتى ما تفتح تمك و تسالني هيك اسئلة ، والا نسيت

نبيل : لا ما نسيت ، بس بدي تزوديلي المصاري شوي ، بتعرفي هلا بدي اضطر اقعدلا بالبيت اربعة و عشرين ساعة حتى سيطر عليها و ما اسمحلا تطلع لبرا ، و بالتالي ما رح اشتغل

صبحية : طيب ، رح اعطيك قد نصن كمان

نبيل : ضعفن

صبحية : ماشي بس ما بقى بدي شوف وشك بعد اليوم

نبيل : اي مو تكرمي

صبحية : مر لعندي بكرا بكون امنتلك المبلغ

نبيل : و مشان بثينة

صبحية : ما رح تعرف شي و قلتلك رح دبر بعريس هالكم يوم

نبيل : اي ما بدي وجع راس

صبحية : لو ما كنت عم تخبص مع هالبنات من ورايي ما كان اجاك وجع الراس

نبيل : شو بدنا نعمل هاد يلي صار
عن ازنك

صبحية : ازنك معك

طلع نبيل لبرات الغرفة و قامت صبحية من بعدو فورا على ارشيف الميتم ، طالعت كل الاوراق و المستندات يلي بتثبت انو جنان كانت عايشة بهالميتم و حرقتن

صبحية : اختفيتي انتي و سرك للابد

اما ببيت نبيل
فاقت جنان من النوم و شافت حالا على وضعا ، مربطة بالتخت من ليلة مبارح ، فرطت اعصابا على الاخر و بلشت تصرخ و تبكي

جنان : فكووووني يا كلاب فكوووني
الله يلعنك يا نبيل الواطي
الله ياخدك يا صبحية
لك فكوووني

نقزت فوزية بس سمعت الصوت و خافت ، و راحت فورا على غرفة البنت بس ما قدرت تفوت لانو الباب كان مقفل

فوزية : شبك يا بنتي شو صايرلك ؟
افتحيلي الباب

جنان : هاد ابنك الواطي مربطني و مقفل عليي الباب ، خلصيني بترجاكي

فوزية : يا بنتي اهدي شوي ، نبيل مو هون
@rwayate
جنان : بترجاكي ساعديني و خليني اطلع من هون قبل ما يجي

بهالاثناء كان بعدو نبيل واصل ، سمع صوت صراخ جنان معبي البيت ، فات ركض لجوا و شاف امو واقفة عند الباب عم تحاول تهديها

نبيل : امي فوتي على غرفتك انا بتصرف

فوزية : لك ابني شو عامل بالبنت ؟ حابسا جوا ليش ؟ ما بصير تتعامل معا هيك حرام

نبيل : امي بترجاكي فوتي على غرفتك ، و تركيني حل مشاكلي مع مرتي على انفراد

فوزية : بس يا ابني

نبيل : امي … بترجاكي

راحت فوزية من على الباب و فات نبيل على الغرفة معصب ، و بدون ما يحكي حرف واحد هجم على جنان متل المجنون و صار يضربا

جنان : بعد عني يا مجنون ! اتركني الله لا يوفقك

نبيل : خرسي يا حيوانة صوتك واصل لاول الحارة فضحتينا بصريخك

جنان : بعد عني مشان الله ما عاد فيي اتحمل

نبيل : ببعد عنك بس صوتك ازا برجع بسمعو بدي افرمك و زتك للكلاب

جنان : اي كسرو ماني طالعة

فوزية : يا ولاد روقو و اهدو ، الامور ما رح تنحل بهالطريقة

نبيل : امي بعديلي ، و انتي جنان خانم بعدي من ورا الباب رح اكسرو

بعد نبيل خطوتين عن الباب و استعد ليكسرو بس سمع صوت قفل الباب نفتح ، و شاف جنان واقفة
كان بدو يتهجم عليها بس امو ما سمحتلو

فوزية : يا ابني حرام عليك اللي عم تعملو بهالبنت ، يعني لانو يتيمة و مالا حدا عم تستقوي عليها

نبيل : امي ما تحكي و كانك مو شايفتيها كيف عن تتعمد تستفزني و تجاكرني

فوزية : يا ابني صبور عليها شوي مو غلط ، حتى تتعود عليك و على اطباعك

نبيل : بدا تمشي متل ما بدي غصبا عنا مو بكيفا ، و ازا ما بدا رح خلص عليها

فوزية : يا بنتي و انتي كمان سايريه شوي ما بصير شي لو سمعتي كلامو ، بضل زوجك

جنان : هاد واحد كزاب و مخادع مانو زوجي

فوزية : شو هالحكي يا بنتي ما بصير والله ما بصير

جنان : اسأليه شو عمل ، قلا لامك ليش سكتت !

فوزية : شو صاير بيناتكن

جنان : هاد ابنك اتفق مع صبحية و لعبو علي لعبة وسخة كتير ، بيعرفني ما بقبل اتزوجو لهيك كزبو هوي و صبحية و قالولي انو رح اتزوج شخص اسمو نزار و انا على هالاساس قبلت ، و كتبو الكتاب غيابيا حتى ما شوف مين العريس و ارفضو ، و بتفاجئ بس وصلت البيت انو متزوجة من نبيل مو نزار

فوزية : صحي هالحكي ؟! شبك ما تجاوب

نبيل : ……

جنان : سكت لانو حكيي صحيح

فوزية : يبقى لهالسبب ما كانت تسمحلي صبحية انو اقعد معك او احكي انا و اياكي و على طول تتحجج ، و ازا قعدنا ما تتركنا لوحدنا و يا دوب خمس دقايق و تبعتك من عندي فورا

جنان : شفتي انو كلامي صحيح و ما عم كزب

فوزية : لك ابني انت شو شيطان ! بتضحك على البنت و بتتزوجا بالخداع ؟ باي شرع بصير هالحكي ؟

نبيل : عملت هيك لانو حبيتا كتير يا امي و ما قصدت انو ضرا بشي ابدا

فوزية : حتى لو بتحبا الزواج مو بالغصب !

نبيل : هالزواج تم و هي صارت مرتي ، و تتصرف على هالاساس احسن الي و الها

جنان : فشرت انا بعمري ما رح صير مرتك

نبيل : والله لاقبرك

هربت جنان بسرعة و فاتت على الغرفة و بقيت فوزية برا عم تهدي ابنا حتى ما يعمل شي للبنت

فوزية : يا امي الحق عليك و انت الغلطان بهالقصة بعدين قلتلي انك بتحبا ، يبقى حاول تتقرب منها و تلاطفا و تجبلا هدايا لتبادلك الحب و تتقبلك مو تضربا و تحبسا

هني و عم يحكو رن تليفونو لنبيل ، كانو رفقاتو عم يعزموه على سهرة براس الجبل ، و كمان كانو حابين يباركولو بزواجو اللي صار بسرعة و بدون سابق انذار

نبيل : امي بدي اطلب منك طلب

فوزية : اي يا ابني

نبيل : بدي اطلع اسهر الليلة مع رفقاتي ، بس خايف انو جنان تهرب

فوزية : لا تقلي بدك ترجع تحبسا

نبيل : اي مضطر ، و بدي منك تخليلي عينك عليها

فوزية : يا ابني والله ما بجوز هالشي حرام

نبيل : بس الليلة و بعدا رح راضيها و حسن الوضع بينا

فوزية : لكن اشتريلا شي هدية لتصالحا فيها

نبيل : امرك

فوزية : و برضاي عليك فوت هلا احكي معا و لا تتركا زعلانة

نبيل : كمان امرك

كانت جنان واقفة على الباب عم تتسمع على الحديث يلي دار بين نبيل و امو و عرفت انو الليلة رح تكون فرصتا لتهرب من هالبيت ، اول ما شافت نبيل جاي باتجاه الغرفة سكرت الباب و قعدت على التخت هي و مقررة انو تسايرو لتقدر تنفد

نبيل : جنان ، بدي اعتزر منك على اللي عملتو بس والله انتي استفزيتيني كتير

جنان : بتعرف شو يمكن معك حق انا زودتا شوي ، نحنا ازا بقينا على هالحال رح نتعب و نزعج بعض ع الفاضي

نبيل : يعني انتي عم تحاولي تقليلي تعال نفتح صفحة جديدة

جنان : مو هيك بالضبط ، لانو لسا ما قادرة انسى كيف خدعتني ، بس ع الاقل نتعامل مع بعض باحترام عبين توضح الامور بيناتنا و ناخد قرار يناسبنا نحن التنين

نبيل : ممتاز كتير هالحكي ما توقعتك تغيري رأيك بهالسهولة

جنان : ما كنت رح غير رأيي بس اعتزارك قبل شوي خلاني اتجاوب معك لانو طريقتك كانت محترمة

نبيل : معناها اتفقنا ، رح يكون الاحترام متبادل بينا
@rwayate
جنان : اي

نبيل : لكن يلا طلعي خلينا نقعد و ناكل مع امي ، من مبارح انتي بلا اكل

جنان : اي والله كنت رح موت من الجوع

مرق اليوم بسلام بدون مشاحنات او مشادات كلامية بين جنان و نبيل و هالشي عطى نبيل شعور بالثقة و عطى جنان شعور بالامان ، كانت امو لنبيل مبسوطة بالتطور اللي صار بيناتن و انو بلشو يحكو بعضن باحترام ، و كمان فرحت انو صار في عندا حدا بالبيت تتساير معو و يساعدا شوي بالشغل لانو نبيل كان اغلب وقتو برا البيت

جنان : عنك خالة لا تتعبي حالك ، انا بشيل السفرة و بجلي الجليات كمان

فوزية : ما بصير يا بنتي انتي لسا عروس جديدة و بعدين كمان شلتي و جليتي بعد الغدا ما بدي عزبك بالعشا كمان

جنان : ولا يهمك خالة انا متعودة ع الشغل ، و بعدين يا محلا جلياتك قدام جليات الدار ههههههه

فوزية : هههههه
الله يبعتلك ايام حلوة متل قلبك

نبيل : و هاد وعد مني ما بقى قرب منك ولا حتى المسك ، انتي هون خدامة و بس

قال جملتو و طلع من الغرفة معصب ، و جنان فورا لبست تيابا و لحقتو

نبيل : امي شو عم تعملي ؟ عم تغسلي التياب

فوزية : اي في شوية غسيل قلت برتاح منن

نبيل : اي اتركي فورا من ايدك ، بهالبيت ما بقى تشيلي قشة ، في عندك جنان بتشتغلك كلشي بدك اياه

يا جنااان تعي شيلي من ايد امي

اجت جنان هي و مزعوجة من اسلوبو ، اشرلا بعيونو فهمت فورا

جنان : هاتي عنك خالة انا بغسلن

فوزية : يا حبيبتي ما بدي عزبك

جنان : مو مشكلة انا متعودة

تناولت جنان التياب من ايدا و بلشت شغل ، كان نبيل قاعدلا و عم يعطي اوامر ، فش كل قهرتو فيها ، شي اطبخي و شي مسحي و شي عزلي ، ما تركا ترتاح ولا ثانية لحل المسا ، عملت ابريق شاي و قعدت تشرب معو و مع امو ، كانت شايفة هالقعدة و كاسة هالشاي متل الجنة بالجحيم يلي عاشت فيه اليوم ، بس نبيل حتى بهاي ما تركا تتهنى ، دلق كاستو ع الارض عمدا

نبيل : يييي يا الله نكبت بالغلط ، جنان تعي امسحي هون

زورتو و فاتت على المطبخ هي و عم تسبو بقلبا

جنان : الله ياخدك و يريحني منك

فوزية : يا امي مرتك من الصبح ما ارتاحت و ما هديت عزلت و نضفت البيت كلو صار عم يلمع يسلم ايديها ، ما تزودا عليها بالطلبات

نبيل : انا ما قلتلا شي هي نضايفية و بتحب تشتغل
مو هيك حبيبتي

كانت جنا بعدا راجعة و بايدها الممسحة، نقزت بس سمعتو عم يقلا هيك ، ابتسمتلو بتصنع و مسحت الارض و طلبت تفوت على غرفتا ترتاح و تنام

فوزية : اي تعبتي كتير اليوم ، فوتي حبيبتي

جنان : بدك شي نبيل ؟

نبيل : اي

جنان : تفضل

نبيل : والا خلص بلاها ، استنيني بدي فوت نام معك انا كمان تعبان

جنان : و كأنك عملت شي حتى تتعب ( قالتا بعقلا)

فاتت على الغرفة و هوي لحقا ، رفعت غطا التخت و بدا تنام

نبيل : لحظة شو عم تعملي

جنان : بدي نام والا هاي كمان ممنوعة !

نبيل : لا مو ممنوع بس هاد مكاني ، انتي نامي على الارض

جنان : بس انا تعبانة كتير و ضهري رح ينكسر من الشغل ، ما فيني ارتاح على الارض

نبيل : مو مشكلتي ، فيكي تصيري مرتي و تنامي على التخت

انزعجت جنان من حكيو ، كان ما يوفر فرصة حتى يضايقا و يهينا ، لهيك برمت وشا و تمددت على الارض بدون ما تحكي شي

نبيل : هاتي ايدك لهون

ما حاولت تقاوم ، كانت تعبانة و بدا بس ترتاح ، مدتلو ايدا باستسلام ليربطا

مرق اسبوع على هالحال كان نبيل ما يوفر فيهن فرصة ليشغلا و يذلا و يذكرا بانو هي خدامة عندو ، بس كل ما كان يمر وقت اكتر ، كان نبيل يخف غضبو تجاها و تخف حديتو بالتعامل معها ، صار كل واحد فيهن بيعرف شو في الو و شو في عليه ، جنان بتفيق و بتشتغل شغل البيت يلي عليها من تم ساكت و بعدا بتاكل و بتتساير مع خالة فوزية ، اما نبيل ما كان يتعاطى معها كتير او يتدخل فيها ، يا دوب يحكو بعضن كلمتين باليوم ع الماشي ، و هالوضع بلش يعجبا لجنان و تستسيغو اكتر ، كمية الاعمال يلي كانت تقوم فيها بالبيت اقل بكتير من يلي كانت تعملو عند صبحية ، و خصوصا بعد ما زهق نبيل و بطل يتدخل او يتأمر عليها ، كانت شايفة هالحياة مثالية بالنسبة الا و ما عادت فكرت بالهريبة

نبيل : جنان وين قميصي الاسود

جنان : غسلتو ، جبلك شي تاني

نبيل : اي هاتي الابيض ، لانو رفقاتي جايين لعنا

جنان : ماشي ، بدن يتعشو ؟

نبيل : اي اعمليلنا شي خفيف

جنان : اي ، لفوت جبلك القميص

وصلو رفقات نبيل و قعدو بالصالون ، يتسايرو و يحكو بعد ما تعرفو على مرتو لنبيل ، و هي فاتت على المطبخ تعملن العشا

صالح : حظك بيفلق الصخر يا نبيل ، وين لقيتا لمرتك ، بشرفي مو شايف مرا احلى منا بحياتي ، دخلك ما عندا خوات شبها ؟

نبيل : خراس ، انت عم تحكي عن مرتي

صالح : شبك عم قلك بدي اختا

سامر : خلص انت و اياه سكتو و خلونا بالمفيد
شو وضعنا ؟
جاهزين للعملية الجاية ؟

صالح : للاسف في شي صار ما كنا حاسبين حسابو ، سوزي حكت معي اليوم و قالت انو رح تنسحب من العملية

سامر : الله يلعنا بعد ما جهزنا كلشي

صالح : هاد اللي صار

سامر : تنسحب هي حرة بس ما تفتح تما و تفضحنا ؟

صالح : لك لا هاي سوزي منا و فينا ما بتعملا ، بس اما مريضة و خايفة لننمسك و تروح فيها ، بتعرفو شغلنا المرة ع التقيل

نبيل : دخلكن ما بيلتقى بنت غيرا لسوزي ؟

سامر : هون المشكلة ما فينا نثق بحدا بهالسرعة

صالح : عم فتش و شوف بس متل ما قال سامر ما فينا نثق باي بنت ، لازم يكون قلبا قوي و لسانا بحلقا

سامر : شو نبيل ما في حواليك بنت تساعدنا ؟ رح يطلعلا مبلغ محترم ، هاي فيلا كريم الخياط يعني ما رح نطلع منا الا بمبلغ يأمن مستقبلنا

نبيل : ما بعرف نسوان غير امي ههههههه

صالح : ههههه يحرق حريشك يا زلمة

سامر : اي خالة فوزية بيطلع منا بتهزلو هزتين لكريم بيوقع على طولو ههههههه
@rwayate
نبيل : ما بتضحك

سامر : شبك قلبت بوزك عم امزح

صالح : طيب يا شباب انا طالع لعند سوزي و بطريقي بقلا تشوفلنا شي بنت من معارفا

سامر : اهم شي تكون حلوة و بتعرف تتغنج حتى توقعلنا البيك على وشو طب

صالح : ولا يهمك رح بحبش و ردلك خبر ، يلا بستأزن منكن

سامر : لحظة خدني معك

نبيل : لك وين رايحين لسا ما تعشيتو

سامر : لغير مرة حبيب

صالح : مستعجل على حبيبة القلب ، سلام

طلع نبيل مع رفقاتو يوصلن لعند الباب ، و بس ودعن برم ليفوت ، تفاجئ بجنان واقفة وراه

نبيل : شو عم تعملي هون ؟

جنان : خدوني معكن بدل سوزي

جنان : بترجاك نبيل ، انا خلقت و عشت يتيمة ما الي حدا بكل هالدنيا غير بثينة يلي كنت بعتبرا اختي و فرقتني عنها ، طول عمري عشت خايفة من المستقبل و على طول احسبلو الف حساب ، بتعرف كم مرة اجت على راسي فكرة انو انطرد من الميتم ؟ كم مرة فكرت انو ليش انا مو متل بقية البنات ليش ما الي ضهر ولا سند ، ليش على طول محرومة و بشتهي كل شي ، اسمحلي ولو لمرة وحدة اكتفي بذاتي و حقق ولو جزء من احلامي ، اقل ما فيها اسمحلي اشتغل لاقدر امن طلباتي و احتياجاتي الاساسية

نبيل : اذا في شي بقدر امنلك اياه ما رح قصر ، بس انتي ولا مرة طلبتي مني شي ، بقى من وين رح اعرف شو بدك

ساد جو من الصمت ، فجأة سكتو تنيناتن و صفنو ببعضن ، كانت عيونن عم تحكي ، و قلوبن عم تنطق ، اما لساناتن أُلجمت على غير عادتن

جنان : رح اعترفلك بشي

نبيل : عم اسمعك

جنان : بتعرف انو العيشة عندك مع كل الاهانات و الضرب اللي وجهتلي اياهن باول يومين و الشغل اللي كنت تشغلني اياه لتنتقم مني كانت ارحم علي من عيشة الميتم اللي كلا ظلم و قهر و حرمان

نبيل : ……

جنان : بعرف انك مستغرب حكيي و مفكرني مو مبسوطة عندك و حابة ارجع للدار ، بس الحقيقة انو انا ما عدت فكرت اهرب من وقت طويل

نبيل : عم تقولي هيك لتطمنيني و ترجعي تخططي بمحاولة هرب جديدة

جنان : انا فعلا صحتلي اكتر من فرصة لاهرب ، بس ما حاولت حتى ، انا ارتحت بالعيشة هون خصوصا بس خففت ضغط علي و تركتني بحالي ، حتى انو صرت ما بقدر عيش بلا خالة فوزية ، هي بتحن علي كتير و بتعاملني متل بنتا

نبيل : جنان ليش ما بتعطي هالزواج فرصة ، يمكن تحبيني و نأسس عيلة صغيرة ؟

جنان : حتى لو بدي ، و حابة انو اسس عيلة معك ما بقدر ، انت بالنسبة الي كنت و رح تضل حبيبا لاختي

نبيل : جنان بس انا حبيتك ، وصدقيني هالحكي طالع من قلبي و ربنا بيشهد عليه ، انتي بنت رايقة ناعمة لطيفة و مجنونة احيانا و على طول معيشتيني على اعصابي ، حلوة كتير و قوية ، انتي هي الانثى اللي كنت بحلم ارتبط فيها على طول

جنان : ….

نبيل : قولي اي و خلينا نبلش صفحة جديدة ، و بوعدك بس صار معي مصاري ساعدك تفتحي المشروع اللي بدك اياه ، رح تتحسن حياتنا ، رح نبيع هاد البيت و نشتري واحد اكبر و يصير عندي شغل خاص فيني و بعدا شغل خاص فيكي

جنان : و رفيقة طفولتي و اختي ؟ بخونا بهالبساطة

نبيل : بثينة تزوجت و اكيد نسيتني ، و بلشت تاسس لحياة جديدة مع زوجا

جنان : بثينة تزوجت !!

نبيل : اي ، هيك قالولي ، من كم يوم رحت لجيب بقية غراضي من الدار ، و سمعت من علاء انها خطبت و رح تتزوج خلال ايام

جنان : و ليش ما خبرتني

نبيل : ما صار مناسبة و نفتح الحديث عنها غير هلأ

جنان : كنت حابة احضر عرسا

نبيل : اكيد تزوجت بنفس ظروفك بسرعة و خلال ايام ، ميزانية الميتم ما بتحمل اعراس

جنان : يا ترى نصيبا منيح ؟ و رح يكون العوض الها عن الظلم اللي شافتو ؟

نبيل : الله ما رح ينساها

جنان : ان شاء الله حظا بكون احسن من حظي

نبيل : شبو حظك ؟ يعني انا ما معبي عينك ؟

جنان : …..
نبيل : بتكرهيني ؟

جنان : لا

نبيل : قولي موافقة و ادخلي جنتي الليلة و شوفي الوش التاني لنبيل اللي بيعطي و ما بياخد ، تعرفي على نبيل الانسان الحقيقي مو المصلحجي ولا الخاين ، بعرف ارتكبت بحياتي اخطاء كتيرة و لعبت على بنات و عشمتن بالزواج بس كلو كان طيش و تهور ، انتي الوحيدة اللي دخلت قلبي و امتلكت عقلي و تفكيري

جنان : بس انا بخاف اوثق فيك و تغدرني من جديد

نبيل : نبيل اذا حب ما بيغدر

جنان : …..

نبيل : ليش ما بتعطينا فرصة ؟ليش بدك تقتلي هالعلاقة من قبل ما تنولد ؟ جربي و اذا ما ناسبتك هالعلاقة ما رح اجبرك عليها

انتي ما بتعرفي شو صعب شعور انو تكون المرا الوحيدة اللي تمنيتا هي مرتي ، بوشي طول الوقت و ريحتا محاصرتني بكل مكان و مع هيك مني قادر احصل عليها

سكتت جنان شوي و كانت عم تفكر بينا و بين حالا ، انو العائق الوحيد قدام هالزواج كان رفيقتا و هالعائق زال ، ليش ما بتسمح لقلبا يتنفس ولو لمرة ، ليش ما بتسمحلو يطلق مشاعرو و يعيش السعادة يلي بيستحقا …

نبيل : شو قلتي

جنان : وافقت

نبيل : جنان عم تحكي جد ! موافقة يعني موافقة ؟

جنان : يمكن انت ما بتعرف انو كانت وحدة من امنياتي اسس بيت و عيلة صغيرة ، ما بتعرف انو كنت ادعي الله على طول بس تجي اخرتي موت دافية بفراشي و حولي اهل و اصحاب ، كنت خاف من فكرة انو موت وحيدة

نبيل : شو جاب سيرة الموت هلا ؟ بعد عمر طويل ان شاء الله

جنان : وثقت فيك و رح اعطيك فرصة ، دخيلك ما تخيبلي ظني هالمرة ، قلبي مجروح كتير و ما بيتحمل جرح تاني

نبيل : بوعدك عوضك عن كل شي بشع شفتيه بحياتك ، رح كون زوجك و بيك و خيك و كل عيلتك

قام نبيل من محلو و ركع عند رجلين جنان و مسكلا ايديها و باسن بحنان

نبيل : ما بتعرفي قديش فرحتيني ، انتي عطيتيني الامل و رجعتي الحياة لروحي ، انا بحبك كتير

القاضي : عندك شي بتحب تضيفو

نبيل : لا ، ما عندي حكي زيادة عن يلي قالتو جنان

القاضي : و انتي يا جنان بتحبي تتشكي على نبيل و ترفعي عليه قضية خداع ؟

جنان : لا ما بريد هالشي ، انا بس بدي اتطلق

القاضي : طلقا يا ابني

طلعت الكلمات من تمو لنبيل بصعوبة بالغة ، بس كان بيعرف انو ما في امل لتبقى معو جنان بعد اليوم ، بس على الاقل هيك ممكن تسامحو بيوم من الايام

نبيل : انتي …. طالق. طالق .. طالق

و اخيرا و بعد جهد و عناء قدرت جنان تحصل على حريتا المطلقة ، بعد اليوم هي رح تكون سيدة قرارا و نفسا ، بعد اليوم محدا الو كلمة عليها ، طلعت جنان من باب المحكمة هي و عم تحس بنشوة الانتصار ، اما نبيل فكان عم يتطلع عليها بعيون الحسرة و الندم

نبيل : جنان

جنان : اي

نبيل : الله يوفقك و يبعتلك ايام احسن من يلي شفتيها معي

جنان : بتمنالك نفس الشي

نبيل : طيب ما فكرتي وين رح تروحي ؟ ما عندك مكان تنامي فيه، و ما بتعرفي حدا غيري

جنان : انا هلأ ما عم فكر بشي غير انو روح لعند بثينة و اشرحلا الوضع

نبيل : و اذا رفضت تسمعلك

جنان : رح اجبرا ، و ما رح حل عنا لتعرف الحقيقة كاملة

نبيل : طيب اسمحيلي اعرض عليكي تنامي ببيتي لبين ما تلاقي مكان

جنان : مستحيل على بيتك ما برجع

نبيل : انا بروح نام عند رفقاتي و انتي بتبقي مع امي بالبيت لوحدكن

جنان : شكرا الك بس ما فيني ، عم فكر روح لعند بثينة ، هي بتضل اختي و رفيقة العمر لازم تسمعني و تسامحني ، واذا بقيت مصرة على موقفا، برجع على الدار ما عندي خيار تاني

نبيل : على الدار ما ترجعي

جنان : هلا بعرف انو صبحية ما رح تنبسط كتير برجعتي ، بس بالنهاية ما رح تكبني بالشارع

نبيل : في شي مهم انا لازم خبرك اياه

جنان : قلي

نبيل : صبحية دفعتلي مصاري حتى اتزوجك

جنان : صبحية البخيلة تدفعلك مصاري لتتزوجني !!

نبيل : كان هدفا تخلص منك بس ما بعرف السبب يلي دفعا تعمل هيك

جنان : قلقتني كتير

نبيل : بصراحة المبلغ يلي دفعتو كبير كتير و هالشي ما بطمن ، بمعنى تاني صبحية كانت معنية و بقوة انو تخلص منك

جنان : ليش ؟ انا شو عملتلا ؟ ما اذيتا بشي

نبيل : صدقيني ما بعرف ، رفضت تخبرني شي و دفعتلي بزيادة حتى ما اسال عن السبب

جنان : انا لازم شوفا و افهم منا ليش عملت هيك

نبيل : ما بنصحك ! بلا ما تحاول تإذيكي

جنان : و كيف رح اعرف السبب ؟ هالقصة مو هينة اكيد في شي كبير وراها

نبيل : اذا بدك برجع بحاول مع صبحية ، بلكي قدرت اسحب منا حكي

جنان : بتكون خدمتني خدمة كبيرة ما رح انسالك اياها ابدا

نبيل : ولا يهمك
خدي هدول مني

جنان : لا ما بقبل اخد منك مصاري

نبيل : هدول حقك اصلا ، اعتبريهن جزء من المصاري يلي دفعتن صبحية ، و كل ما خلصو رح اعطيكي متلن لبين ما تدبري امورك

مدت جنان ايدها بخجل و اخدت منو المصاري هي و حاسة بالاحراج

جنان : شكرا الك ، ممكن تتصلي برفيقك سامر ليخبرنا بمكان بثينة

نبيل : ماشي ، هلا بتصل فيه و باخدك لعندا

جنان : لا ما بدي تاخدني ، بخاف بثينة تعند اكتر بس تشوفك و ترفض تتعاطى معي

نبيل : بس انا ما بامن اتركك لوحدك ، انتي ما بتعرفي شي هون و بخاف انك تضيعي

جنان : معلش بتعلم

نبيل : انتبهي على حالك ، و اذا عزتي شي تعي لعندي فورا ، و لا تنسي انو حبيتك كتير

جنان : و بالنسبة الي انا سامحتك

اخدت جنان العنوان ، و راحت لعند بثينة ، و تفاجأت بالمكان يلي ساكنة فيه رفيقتا ، كان عبارة عن بناية قديمة كل غرفا مأجرة لبنات بيشتغلو متلا ، كان الكل عم يتطلع فيها متل كأنا شي كائن فضائي

جنان : عفوا بتعرفو بنت هون اسما بثينة

…. : شو جايبك لهون ، ما شكلك تعيت هيك قصص

جنان : عم دور على رفيقتي ، اسما بثينة ، هي صبية حنطية شعرا اسود و ….

قبل ما تكمل جنان كلمتا كانت البنت تاركتا و رايحة

جنان : يا الله ليش الكل هون تصرفاتن غريبة

بقيت جنان اكتر من نص ساعة بالمكان عم تدور عليها ، كانت رح تفقد الامل انو تلاقيها ، بس لمحتا عم تفوت على وحدة من الغرف ، لحقتا بدون تردد و دقت عليها الباب ، فتحتلا بثينة و تفاجئت بس شافتا ، كانت رح تسكر الباب بوشا ، بس جنان سبقتا و فاتت

بثينة : شو عم تعملي هون ! و كيف بتسمحي لحالك تفوتي على غرفتي بهالطريقة

جنان : بثينة شبك ، انا اختك و حبيبتك جنان شو نسيتي ايامنا سوا ؟ ايام الولدنة و الطيش ، طفولتنا و مراهقتنا ؟

بثينة : انا ما نسيت شي ، بس انتي نسيتي

جنان : بحلفلك بالله ما نسيتك ولا يوم و لا حتى خنتك ، اعطيني فرصة اشرحلك شو صار معي ، و شو ما كان حكمك بعدا انا راضية فيه

قعدت بثينة على التخت ، و تطلعت فيها بنظرات كلا لوم و عتب

بثينة : عم اسمعك

جنان : انا يا بثينة وقت تزوجت نبيل ما كنت بعرف انو نبيل ، اكيد بتتذكري وقت قالتلي صبحية انو جاييني عريس اسمو نزار و ما اجا زارني ولا مرة و كتبو كتابو علي حتى بلا ما يجي

بثينة : اي

جنان : انا بس رحت مع امو على البيت تفاجئت انو العريس طلع نبيل مو نزار

بثينة : كيف يعني ؟

جنان : يعني صبحية اتفقت مع نبيل و ضحكو علي

بثينة : ليش؟

جنان : في شي عرفتو من نبيل اليوم ، انو صبحية دفعتلو مبلغ كبير حتى يتزوجني و تخلص مني

بثينة : جنان كلامك مو منطقي ، صبحية ليش لتدفع مصاري حتى تخلص منك ؟ يعني قعدتك بالدار شو مأثرة عليها

جنان : صدقيني انا متلك ما بعرف السبب و حتى نبيل ما بيعرف ، سالا زات السوال دفعتلو مصاري اكتر حتى ما يرجع يفتح هالسيرة

بثينة : غريبة هالقصة

جنان : رح اعرف السبب ، صدقيني ما رح اترك القصة ، و بدي لاحق صبحية لاعرف شو في وراها

بثينة : في شي خطر على بالي هلا ما فكرت فيه من قبل ، بس حكيك اثار شكوكي

جنان : شو هوي

بثينة : يا ترى ممكن صبحية كانت عارفة من البداية انو اللي زوجتني اياه تبع هيك قصص و كانت قاصدة تخلص مني انا كمان ؟

جنان : والله فكرة معقولة كتير

بثينة : يبقى صبحية قبضت حقي ! بس انتي ليش دفعت لتخلص منك

جنان : ما صار لازم نحط ايدينا بايدين بعض و نعرف شو القصة ؟

بثينة : ……

جنان : كل هالشي ما خلاكي تقتنعي انو رفيقتك ما خصا بكل يلي صار و انو نضحك عليها متلك

بثينة : في شي مو مفهوم بقصتك ، عكس قصتي يلي صارت واضحة متل عين الشمس

جنان : قلتلك ما رح اسكت و رح ضل ورا القصة لاعرف حلقتها المفقودة

بثينة : انتي و نبيل صار بينكن علاقة ؟

جنان : بالاول لا ، انا رفضت برغم انو ضربني و حبسني ، لانو ما قدرت خونك

بثينة : اي و بعدين

جنان : مبارح بس تزوجنا انا و اياه فعليا ، و هالشي بعد ما قلي انك تزوجتي و كملتي حياتك ، مشان هيك انا سمحتلو يقرب مني …

بثينة : اي

جنان : و بعد ما طلعتي بحياتي مرة تانية و خبرتيني بقصتك ، ما قبلت ابقى على ذمتو ثانية واحدة ، طلعنا على المحكمة و تطلقنا

بثينة : تطلقتي ؟

جنان : اي من شوي و ليكا ورقة طلاقي
هيك انتي صرتي بتعرفي الحقيقة كاملة ، و القرار الك تسامحيني و نرجع اخوات او تطالعني من حياتك

بثينة : …..

جنان : طيب ، بدك وقت لتفكري ؟

بثينة : بدي وقت لاستوعب القصة ، و بفضل اترك موضوعنا للزمن يتكفل بحلو ، اما بالوقت الحالي بفضل ابقى بعيدة عنك و عن نبيل

جنان : طيب رح اتركك على راحتك
بدي روح ، انتبهي على حالك

تركتا جنان و طلعت من عندا ، بس خاب املا كتير بالشي اللي صار ، توقعت انو بس تعرف الحقيقة تتفهما و تاخدا بالاحضان ، بس للاسف هالشي ما صار ، هي و نازلة من البناية لمحت سامر عم يصف سيارتو ، لهيك راحت لعندو

جنان : كيفك سامر

سامر : اهلا جنان ، شو عم تعملي هون

جنان : جيت لعند بثينة اشرحلا الوضع ، ما عليك، انت كمان جاي لعندا

سامر : اي جاي اقنعا ترجع للشغل

جنان : انا بعرف شو شغلكن

سامر : يعني نبيل خبرك ؟

جنان : تقريبا هيك شي

سامر : اي ، بقيان يومين لموعد مهمتنا و لهلا ما لقينا بنت

جنان : ليش بثينة ما عاد بدا نهائيا ؟

سامر : هي من البداية كانت مترددة بس هلا رفضت الموضوع بشكل قاطع ، قلت بجي بشوفا و بحاول اقنعا لعل و عسى

جنان : اي صعب تلاقو بنت تانية بهالفترة القصيرة

سامر : اذا ما لقينا بدنا نضطر نأجل المهمة كم شهر و يمكن ما يعود يصحلنا فرصة تانية تكون فيها فيلا كريم الخياط فاضية

جنان : طيب شو رأيك فيني ؟

سامر : من اي ناحية ؟ ما عم افهم

جنان : بقصد مشان الشغل ، بتقبلو فيني اشتغل هالشغلة معكن ؟

سامر : بس نبيل !

جنان : ما خصو نبيل ، انا و اياه تطلقنا

كان الكل مبسوط و عم يضحك باستثناء نبيل يلي التفت لجنان يسألا

نبيل : عملك شي ؟

تطلعت فيه جنان بحنية و ابتسمتلو لتطمنو ، و هوي بدورو زفر بقوة ليعبر عن ارتياحو

راحو الشباب و جنان لبيت سامر ، و اول شي عملوه انو عدو المصاري ، كان المبلغ كتير كبير لدرجة ما صدقو عيونن ، هاد بالاضافة للدهب و المجوهرات الثمينة ،شالو حصة توفيق و الخادمة ماريا على جنب و قسمو اللي ضل لحصص متساوية بينن الاربعة

صالح : و هلا صار لازم نحتفل

سامر : انت بس بتفكر بالكيف و البسط

صالح : من يوم و رايح ما رح فكر بشي غيرن

جنان : انا بالنسبة الي تعبت كتير و فرطت اعصابي بعد هالمغامرة ، لازم نام و ارتاح

نبيل : اخدك لعندي على البيت ؟

جنان : لا ما بدي عزب حدا منكن ، رح نام الليلة بشي اوتيل و من بكرا بدي دور على بيت استاجرو

نبيل : لكن خليني وصلك

جنان : ما في داعي ، بركب شي تاكسي
بالمناسبة كانت تجربة جديدة علي ، كلا اكشن و خطورة بس النتيجة كانت بتستاهل
و هلا عن اذنكن ، بدي روح

سامر : ما قلتيلي بتشاركينا مهمات تانية

صفنت جنان شوي ، و بعدا ردت

جنان : اكيد

طلعت لبرا و لحقا نبيل

نبيل : بتمشى معك عبين ما نلاقي تاكسي و اعطيه عنوان اوتيل قريب

جنان : طيب

نبيل : الكلام يلي قلتيلي اياه قبل ما تروحي

جنان : انساه

نبيل : ما فيي

جنان : كنت متوترة و خفت ما ارجع شوفك مرة تانية لهيك قلتو

نبيل : و هلا شو بيمنع

جنان : انت بتعرف شو اللي بيمنع
ها في تاكسي جاية وقفا

رفع نبيل ايدو للتاكسي و وقفا ، اعطى الشوفير عنوان اوتيل و طلب منو يوصل جنان لهنيك

نبيل : حسبي حسابك بكرا بدي شوفك حتى نحكي و نتفاهم

جنان : ….

نبيل : شو قلتي

جنان : ماشي بشوفك بكرا

انطلق التاكسي بجنان ، بس عطتو عنوان تاني ، الهيأة انو كانت عم تخطط بينا و بين حالا لشي تاني محدا فكر فيه

الشوفير : هاد هوي المكان يا انسة

جنان : اي هون ، فيك تنطرني شوي بدي جيب رفيقتي و ارجع

الشوفير : تمام بس لا تطولي

لبست جنان شنتة الضهر يلي كانت معا و طلعت على غرفة رفيقتا بثينة مباشرة ، دقت الباب و نطرتا لفتحت

بثينة : هاد انتي !

جنان : مشي معي بسرعة

بثينة : لوين ؟

جنان : احنا لازم نخلص من هالعيشة ، بدنا نهرب سوا

بثينة : كيف ! جنيتي انتي ؟ مين قلك بدي روح معك ؟

جنان : انا رح اهرب ، معي مصاري كتير ، رح نعيش ملوك ، مستحيل اتركك بهالمستنقع لوحدك

بثينة : بس انا ما فيني اهرب ، وين ما رحت بيقدرو يلقطوني ، انتي ما بتعرفيهن ممكن يقتلوني اذا اكتشفو الموضوع !

جنان : محدا رح يكتشف اذا هربنا هلا و فورا

بثينة : بس غراضي

جنان : منك بحاجة شي

مدت جنان ايدا لبثينة ، و التانية مسكتا ، ابتسمو لبعضن بعفوية

جنان : يلا يا رفيقتي

بثينة : قلتلك بالفرن

وقفت جنان ، و ضربتا كف لبثينة

جنان : لا تكذبي

بثينة : عم تضربيني ؟!!

جنان : شفتك واقفة مع سامر بنص الشارع عم تتباوسو بكل وقاحة قدام عيون الناس

بثينة : بس انا

جنان : انتي شو !
تركنا كل شي ورانا و هربنا مشان ترجعي تتواصلي معن !! ما على اساس بدنا نخلص من هالقصص و نكبا ورا ضهرنا

بثينة : سامر ما خبرا حدا بمكانا تطمني ، و بعدين لو عرفو شو رح يعملولنا ! ما الن علينا شي

جنان : انا هربت لحتى اقدر انساه و بلش حياة جديدة بعيدة عنو و انتي بدك ترجعي تحطيه بوشي؟ و ترجعيني لنقطة الصفر

سكتت جنان بس انتبهت على حالا شو قالت ، دغري حطت ايدا على تما و نزلت عيونا بالارض ، استغربت بثينة من الحكي اللي سمعتو ، هي ما كانت بتعرف انو رفيقتا عم تكن مشاعر لنبيل فكرتا نجبرت عليه و ما صدقت انو خلصت منو ، خصوصي انو هي يلي عرضت عليها فكرة الهرب ، حست حالا انانية كتير بهديك اللحظة ، معقول ما لاحظت انو رفيقتا تعيسة ! و عم تهرب من شخص بتحبو بس لحتى تكسب ثقتا !

بثينة : ……

جنان : انا طالعة لعند ريتا ، كانت موصيتني على فساتين ، بدي اخدن لعندا

بثينة : جنان ما تروحي لمكان ، لازم نحكي

جنان : ما في شي نحكيه ، انتي حرة تتقربي من الشاب اللي بدك اياه ، بس انتبهي على حالك و لا تعطيه عنوان بيتنا

بثينة : لازم افتحلك قلبي و تفتحيلي قلبك حتى ننهي هالموضوع ، من يوم هربنا تحاشينا نفتحو او نحكي فيه حتى ما نخلق توتر بيناتنا بس هالشي غلط ، كان لازم نتصارح من البداية ، او على الاقل من وقت ما حسيت بمشاعر تجاه سامر

جنان : ليش انتي من متى عم تشوفي سامر

بثينة : من شهرين تقريبا ، بس بلشت حسلو بمشاعر جديدة من شي شهر

جنان : ليش خبيتي عني

بثينة : كنت عارفة انك رح تعصبي و ترفضي هالعلاقة لانو ما بدك يكون في اتصال بينا و بين الماضي ، بس هلا لادركت السبب الحقيقي ، انتي ما بدك ترجعي تشوفي نبيل لانو بتحبيه و عم تخبي بقلبك !

جنان : هالحكي مو صحيح ! انا ما بحبو

بثينة : و اللي قلتيه قبل شوي

جنان : حكي طلع بلحظة غضب

بثينة : اصدق حكي بينقال بيكون وقت الغضب ، لانو ببطل في قيود على القلب و العقل

جنان : …..

بثينة : لكن اسمعي انا ولا مرة حبيتو لنبيل

جنان : كيف !

بثينة : كنت اقنع حالي انو بحبو وقت كنا بالميتم ، كان عندي احتياجات متلي متل اي صبية بعمري ، انثى كاملة مكملة محبوسة بين اربع حيطان ما عم تشوف حدا غير شوية بنات ايتام متلا و خدم ، كان نبيل الشاب الوحيد اللي فيني شوفو ! سمعت منو كم كلمة حلوين و قلي انو بحبني و افتكرت اني حبيتو ، بعذا اختفى من حياتي و انا تعزبت كتير بسبب زواجي ، لهيك حطيت الحق على نبيل و اعتبرتو المسؤول عن الشي اللي صار معي ، كنت قول على طول لو نبيل تزوجني ما كان صار فيني هيك ، و بس طلع بحياتي فجأة و عرفت انو كان متزوجك ، كرهتك و اعتبرتك مسؤولة متلو بشكل غير مباشر عن مأساتي ، بعرف تفكيري كان غلط ، بس ما ادركت هالشي بوقتا يمكن بسبب الضغط و الظلم اللي كنت عم عاني منو ، بس بعد ما اخدتيني و طالعتيني من هداك المستقنع و حسيت بالامان و الاستقرار فهمت مشاعري اكتر و عرفت حقيقتا
قد ما شكرتك ما بقدر اوفيكي حقك انتي كنتي السبب برجعتي على الحياة

جنان : ما تقولي هيك ، نحنا عشنا و ربينا و كنا متل الاخوات و اعز ! معقول وقت اجتني الفرصة لعيش و اتنفس اتركك ورايي ؟

بثينة : بعتذر لانو كنت انانية و ما فكرت فيكي و بمشاعرك ، بس لمن خبرتيني انك طلقتيه بنفس اليوم اللي عرفتي فيه قصتي ما خطرلي ولا للحظة وحدة انك بتحبيه

جنان : ……

بثينة : بتحبيني لدرجة تتخلي عن شاب بتحبيه كرمال ما تجرحيني ؟

جنان : انتي اختي يا بثينة ، الله ما راد يكون عندي اهل بس عطاني اياكي ، كيف بدي اتخلى عنك!

لفو بعضن هني و عم يبكو

بثينة : جنان انتي لازم ترجعيلو لنبيل !

جنان : انا تركتو و التفتت لحياتي و هو اكيد بكون عمل نفس الشي ، ما بدي ارجع اطلع بحياتو و خربلو اياها مرة تانية

بثينة : ما تحكمي عليه حكم مسبق ، روحي شوفيه و حاكيه و بعدا قرري ، يمكن يكون ناطر رجعتك على احر من الجمر !

جنان : ما بقدر على هيك خطوة بالوقت الحالي

بثينة : طيب فكري و خدي وقتك ، و بس قررتي رح كون اول شخص بيدعمك و بيوقف معك
بعتذر منك مرة تانية انو كنت السبب بمعاناتك

جنان : لا تقولي هيك

خلصو الصبيتين شغلن و رجعو على بيتن سوا ، كانو طول الطريق ساكتين و عم يفكرو باللي صار معن و يتسائلو شو مخبيلن المستقبل ، وصلو للبيت و فاتت بثينة تحط العشا ، اما جنان كانت هلكانة من كتر الشغل ، تمددت على الصوفاية و شغلت التلفزيون و صارت تقلب بين المحطات

بثينة : اعمل عصير فواكه ؟

جنان : بلاها مو جاي على بالي

بثينة : معناها رح اعمل

جنان : هههههه
بثينة كان بدي اسالك ، كيف تواصل معك سامر

بثينة : شفتو صدفة بالسوق قبل شهرين و طلبت منو ما يخبر حدا ، تفاجئت فيه تاني يوم جاي ليشوفني ، و هيك صرنا كل فترة نلتقي بعدا اعترفلي بحبو و انا اكتشفت انو كلشي عشتو من قبل سامر ما كان اسمو حب

جنان : خبيثة كل هالشي صار و ما خبرتيني عنو

بثينة : كنت مرتاحة لفكرة انو عم شوفو و اطلع معو و خفت تعارضي و تمنعيني

جنان : ما بدي اتدخل بخصوصياتكن كتير ، بس اللي بعرفو انو سامر عندو مشاكل مع النسوان يعني بقصد ما بحبن و بشوفن خاينين

بثينة : اي خبرني بقصتو و خبرتو بقصتي ، و عم نحاول نداوي جروحاتنا سوا

جنان : الله يكملا معكن ، و يفرحكن

كانت بثينة عم تحط الصحون على طاولة الاكل ، فجأة وقع الصحن من ايدا هي و عم تطلع على التلفزيون

جنان : شو صرلك ؟

بثينة : هاي انتي طالعة على التلفزيون مو هيك ! ارفعي الصوت شوي

تطلعت جنان لتتأكد و نصدمت بس شافت صورتا طالعة على الاخبار العاجلة مكتوب عليها مطلوب و في ارقام تليفون للاتصال في حال حدا عرف عنا شي

جنان : وصلولي ! رح يحبسوني !

بثينة : روقي شوي لسا ما فهمنا القصة ! لا تستبقي الاحداث

جنان : هاد الفستان يلي بالصورة كنت لابستو وقت رحنا نسرق فيلا

بثينة : ايواااا!!!

جنان : الهيئة كان في كاميرات بالبيت و صورتني

بثينة : بس مو كاتبين انك عاملة شي و كمان ما حاطين صور الشباب

جنان : لانو الشباب كانو ملتمين و كمان غيرو نمرة سيارتن صعب يعرفو اشكالن او هوياتن

بثينة : ليكي عم يقولو في مكافأة للشخص اللي بيلاقيكي

جنان : شووو !
لك المكافأة المطروحة اكبر من المبلغ اللي سرقناه

بثينة : في شي غلط ! بلكي عم يكزبو و كتبو هيك ليشجعو الناس تبلغ عنك

جنان : ما بعرف ما بعرف
شو الحل ؟ شو لازم اعمل

بثينة : هلا بكونو اهل المنطقة شافو الاخبار و كمان جيرانا بالسوق

جنان : اكيد لانو الخبر طلع عاجل

بثينة : ما لازم تضلي هون !

جنان : وين بدي روح

بثينة : منرجع نهرب و بندبر مكان جديد و شغل جديد

كريم : لا تقول هيك ، رح تطلع بنتي ! صارلي شهور عم اتعذب ، من وقت ما عرفت إنها عايشة و ما بقدر اتحمل ارجع دور عليها من جديد !

اغيد : طيب روق عمي ولا تنفعل ، ان شاء الله خير

بعد ما تطمنو على جنان و وضعا الصحي سمحولا الدكاترة تطلع ، اخدها كريم على بيتو ، و اول ما دخلت جنان حست باحساس غريب ، البيت اللي فاتتو حرامية من كم شهر عم ترجع عليه اليوم معززة مكرمة و في احتمال كبير انو تكون صاحبتو .

كريم : سعاد يا سعاااد
تعي تعرفي على البنت ، جبتا معي

ماريا (الخادمة): للاسف سعاد خانم مالا هون

كريم : لكن وينا

ماريا : اجاها اتصال من فرنسا انو رفيقتا مرضانة و عم تحتضر ، راحت تشوفا

كريم : من متى سعاد عندا رفقات بفرنسا ! مين هي رفيقتا؟ و كيف بتترك البيت بهيك ظرف و بتسافر

ماريا : ما بعرف يا بيك هي هيك قالتلي

كريم : طيب ، رح اتصل شوف شو القصة

اقتربت جنان من اغيد و سالتو عن سعاد لانو فكرتا المرا اللي ممكن تكون اما

اغيد : لا لا ، طليقة عمي ديران توفت من شهر بمرض الله يرحما ، سعاد بتكون زوجتو التانية ، يعني اللي المرا الممكن تكون امك كانت منفصلة عن عمي

جنان : اها الله يرحما

احست جنان بالحزن و ما عرفت السبب يمكن لانو كانت متأملة يصير عندا ام كمان

كريم : اغيد خد كارلا بقصد جنان على غرفة لترتاح فيها

مرقو اليومين بالفيلا طوال كتير متل كانن سنتين كان الكل خلالن قاعد على اعصابو ناطر النتيجة ، بهالأثناء وصل اتصال من المختبر لاغيد ، و الكل تجمعو حوالين التليفون و ايديهن على قلوبن ما بيعرفو شو مخبيتلن الدقائق الجاية ، امل كبير او خيبة اكبر !

اغيد : اي عم اسمعك
الكل هون على اعصابو

فجأة انقلبت ملامح اغيد من التوتر للفرح و السعادة

اغيد : الله يبارك فيك شكرا شكرا
الف مبروك يا عمي
بنتك طلعت بنتك !

و بدون وعي من كريم ركض لعند بنتو يبوسا و يضما ، و يشم ريحتا و يبكي على السنين يلي قضاهن بعيد عنا ، اما جنان نفجرت بالبكا و صارت تحمد الله و تشكرو انو طلع عندا اهل ، و بنفس اليوم اجو كل قرايبا و اهلا يباركو و يهنو و يتعرفو عليها ، عمومتا و ولادن و زوجاتن ، عماتا و كل شخص الو علاقة بالعيلة حتى لو من بعيد اجا بس كان في شخص ناقص و الكل افتقدو و بلش يشك بامرو انو زعلان لانو البنت رجعت ، اكيد كلكن عرفتو مين ؟ سعاد !

كريم : من وقت ما خبرتني مربيتك قبل ما تموت انو انتي عايشة يا كارلا عيوني ما شافت يوم راحة ، هلكت انا و عم دور و فتش عليكي و بالاخر صدفة غريبة جمعتنا فيكي

كارلا : ليش شو عرف المربية انو انا عايشة ؟

كريم : كانت الله لا
استغفر الله ما بتجوز ع الميت الا الرحمة
كانت خاطفتك

كارلا : خطفتني ؟ ليش ؟ شو مصلحتا ؟

كريم : في حدا بعتا بس ماتت قبل ما تخبرني مين بس انا ما رح اترك القصة و بدي حاسب كل شخص كانلو يد فيها

كارلا : صبحية !

كريم : كيف ؟

خبرت كارلا ابوها و اهلا عن كل شي عملتو معا صبحية و كيف دفعت مصاري لشاب حتى تخلص منا ، و كمان عن المرا يلي شافتا بالميتم و ندهتلا كارلا ، و كتير قصص و كزبات قالتلا اياهن متل بيا المجرم و اما العاطلة حتى تخليها تفقد الامل و ما تدور عليهن

اغيد : بيك اهم رجل اعمال بالبلد و امك مرا ارمينية من عيلة ارستقراطية عريقة ! كيف بتسترجي تعمل هيك معك و تكزب بهالطريقة البشعة !

ما استنى كريم لحظة واحدة ، فورا خبر الشرطة يلي اعتقلوها و حققو معا لاعترفت بكل شي عملتو و اعترفت عن سعاد كمان ، و تم تحويلها للمحكمة لتتقاضى على كل جرائما

و بيوم المحكمة كانت قاعدة كارلا برفقة اهلا و بثينة لحتى يحضرو محاكمة الشخص يلي عزبا و اذاها كل هالفترة بدون رحمة او شفقة

القاضي : خبرني المحامي انو في شاهد
قلولو يفوت

فجأة دخل نبيل من الباب و توجهت كل الانظار عليه ، دق قلبا لكارلا اول ما شافتو و اتسعو عيونا

كارلا : بثينة ! كيف عرف و اجا لهون ؟

بثينة : ليش ضل حدا بالبلد ما عرف قصتك ، بعدين بكون سامر قلو عن موعد المحاكمة

القاضي : انت نبيل القاسم

نبيل : اي

القاضي : خبروني انو عندك شي حابب تخبرنا اياه

نبيل : صحيح
انا كنت زوجا لجنان يعني كارلا الخياط
و اول ما سمعت بالقصة استغربت متل كتير ناس و ما توقعت انو البنت يلي كانت مرتي سابقا صاير معا كل هالشي ، و بس عرفت بموعد المحاكمة جيت لقول اللي عندي

القاضي : عم نسمعك

نبيل : صبحية دفعتلي مبلغ كتير كبير و طلبت مني اتزوج كارلا لتخلص منا

القاضي : و انت ما كان عندك علم بنوايا صبحية ؟

نبيل : ابدا ، سالتا عن السبب قام دفعتلي اكتر حتى ما اسال ، بس انا حبيتا لكارلا و حاولت اسعدا بكل الطرق بس لمن شفتا مو مرتاحة طلقتا بالمعروف

القاضي : شكرا الك
شهادتك كتير مهمة
و هلا رح اسالك يا صبحية لاخر مرة ، عندك شي تضيفيه ؟

صبحية : ……