وهي قصة تازايه وجديدة😋💙
#فتاة_البنفسج_بقلم_حلا_الشويكي
الجزء الأول
@rwayat
الصبح الساعة 7 ونص ..
فتحت عيونا شوي شوي ورجعت سكرتن .. غفيت 5 دقايق .. و فاقت .. اتطلعت عالساعة بطرف عينا وصارت تحاول تعدل قعدتا .. مسحت وشا بإيدا وفركت عيونا نزلت عن التخت كانت عم تحاول تقاوم التعب ..
تسحبت للمطبخ .. ركبت ركوة القهوة عالنار وفاتت غسلت وشا وطلعت عملت القهوة ورجعت على غرفتا فاتت .. اتطلعت عالشباك لمحت شب واقف بعيد وعم يتطلع عالشباك .. قربت من الشباك وفتحتو ما شافت حد ..
تالا : اوووه الظاهر بعدني نعسانه !
جيهان : صباح الخير حبيبتي .. مع مين عم تحكي ؟
تالا : ولا مع حد ماما بس عم قول لساتني نعسانة وتعبانة
جيهان : انتي عملتي القهوة ؟
تالا : اي .. حسنية بإجازة ما ؟
جيهان : اي بالليل طلبت مني اجازة و وافقت بس ماتوقعت من الصبح تروح ..
تالا : يلا ما صار شي رح بدل تيابي وروح على جامعتي .. حد سأل عني وانا بالمشفى شي ؟
جيهان : ( تلبكت كتير وهربت بعيونا من تالا ) اي اي لكن الكل سأل عنك
تالا : الكل ؟ مين الكل ؟
جيهان : يعني .. انو .. الكل اي الكل
تالا : هههه ماما ! ما حد سأل عني بعرف
جيهان :يا عمري المهم انك هلأ انتي بخير .. مو مهم يسأل حد عنك المهم انتي منيحة
تالا : طيب ماما بدي بدل تيابي واطلع .. اعطيني مفتاح سيارتك لحتى صلح سيارتي
جيهان : بس انتي بعدك تعبانة بلا ما تسوقي خلي ابو عبدو يوصلك
تالا : هيك قولتك ؟
جيهان : اي .. رح خبرو يجهز السيارة
بعد 10 دقايق ..
ركبت تالا بالسيارة ..
( ابو عبدو عم يحكي بصوت واطي : السلام ل الله يا بنت الأكابر )
تالا : استعجل شوي تأخرت على جامعتي
ابو عبدو : الحمد لله على سلامتك انسة
تالا : ( هزت براسا )
وصلت الجامعة .. تنفست بصعوبة شالت نضاراتا الشمسية ونزلت من السيارة .. اتطلعت من بعيد .. كل بنت عم تمشي مع رفيقتا او رفيقا .. او كل مجموعة عم يتمشو سوا
رجعت لبست النضارات ومشيت بيناتن بس ما حكت مع حد .. سمعت شب بيقول ( اجت فتاة البنفسج ) والكلمة كانت موجهة لإلها ورنت بإدنا ..
وقفت شوي ورجعت خطوتين لورا ..
تالا : مين فتاة البنفسج ؟
رائد : انا قصدي يعني ... انو يعني ...
تالا : خلص خلص .. ما بيهمني اعرف شي
كملت طريقا وهي عم تحاول تتناسى الكلمة يلي سمعتا من رائد ..
( تالا : ليش عم يحكي عني فتاة البنفسج ؟ معقول لأني بلبس هاللون دايما ؟ او لأنه على طول بشتري ورد بلون البنفسج وبزين مقعدي فيه ؟ اييي ما بيهمني شي ولا بيهمني حد )
بعد الجامعة ....
دقت تالا لأبو عبدو ..
تالا : ابو عبدو خلصت جامعتي وطلعت ما لقيتك !
ابو عبدو : يلا ثواني وبجي
تالا : رح تتحاسب على اهمالك
كان رائد واقف جنبا وسمعا كيف بتحاكي السواق
رائد : انسة تالا
اتطلعت تالا على رائد بإستغراب ..
رائد : اول شي الحمد لله على سلامتك
تالا : شلون عرفت ؟
رائد : عرفت
تالا : شلون عرفت عم بسألك !
رائد : بس عندي سؤال ..
تالا : طيب ما رح التفت لألك ولا جاوبك على شي الا بس تقلي شلون عرفت ؟
رائد : اه .. اي .. كنت بالمشفى بس جيتي عليها اسعاف كنت عم بزور رفيقي هنيك وشفتك
تالا : اها
رائد : ممكن اسأل سؤال ؟
تالا : بعدين
وصل ابو عبدو وركبت بالسيارة بلا ما تسلم على رائد ..
اتطلعت عالساعة و قالت بنبرة عصبية ...
تالا : شوف كم الساعة .. تأخرت
ابو عبدو : تأخرت ؟ يا انسة انتي رح تروحي من هون للبيت عن شو تأخرتي وكلن 5 دقايق مو مستاهلات الزعل والعصبية
تالا : وعم تجادلني كمان ! امشي بطريقك وازا بقى بتتأخر علي اعتبر انك مطرود فهمان ؟
ابو عبدو : حاضر
تالا : وقفلي عند اقرب محل زهور
ابو عبدو : شو بتريدي انا بنزل بجيبلك
تالا : لأ انا بجيب
ابو عبدو : تفضلي هاد محل زهور راقي وحلو
نزلت تالا فاتت عالمحل .. ورجعت معا 3 بوكيهات ورد وكلن لون بنفسجي
اتطلع فيها ابو عبدو بإستغراب ...
تالا : خير في شي ؟
ابو عبدو : لأ
تالا : يلا امشي تاخرت انا
( ابو عبدو بينو وبين حالو : شو هالبنت الغريبة !! كانت غريبة وهي بالمدرسة بس مو كل هالقد ! صارت غريبة كتير ! ما بتنفهم .. يعني لشو كل هالورد ؟ وليش ما بتلبس الا هاللون ؟ وليش ما بتبسم ابدا وليش متكبرة كل هالقد ! بنت غنية هالقد وما عندا رفقات !! غريييييب )
كان ابو عبدو شارد وعم يحاكي حالو وما فاق الا على صرخة تالا ....
تالا : انت غبي .. غبي بدك تروحني انا ما لحقت خف من الحادث يا حمار .. يلي عطاك رخصة غبي متلك نزلني بدي اركب تاكسي
ابو عبدو : لا خلص بعتزر واصلا وصلنا ما في داعي للتاكسي
تالا : هففف غبي غبي
وصلو الفيلا ونزلت تالا معصبه وحملت الورد بإيدا ومشيت بسرعة فاتت لغرفتا ..
قعدت عالأرض و ارتكت بإيديها عالتخت وصارت تبكي بحرقة و وجع
غفيت وهي عم تبكي بعد ساعتين فتحت عيونا .. اتلفتت حواليها
( تالا : الورد .. وين الورد ؟ مامااااا )
جيهان : اي حبيبتي اي كنت عم حطلك الورد بمزهرية حلوة
تالا : وااااو كتير حلو
جيهان : عجبوكي ؟
تالا : اي .. كتير
