#مابعد_الاكتمال #الجزء_الاول_رند_محمد

-- : مو ضروري تكون حدا صادق و أمين كتير ..
-- : بس أنا مو هيك ..

حط إيدو ع الطاولة ولملم رزم المصاري يلي كان صاففلي ياهن قدامي وهو عم يسحب من سيجارتو بكل برود : لحتى تعيش بدك تنسا إنك مو هيك .. وتصير هيك

مسحت عرقي عن جبيني و أنا عم اتطلع بالمصاري .. للحظة أجاني حدا براسي عم يذكرني بولادي ومصريفن بحياتن يلي انا بشغلي هاد ما رح اقدر اضمنا تكون حلوة... حسيت انو فعلا لازم ماضل هيك ..

فكيت كرافتي شوي عن رقبتي وفكيت اول زر من القميص و انا بعدني صافن بالمصاري يلي حليت بعيني فجأة : موافق
_______

يمكن الإنسان لازم يبيع ضميرو ليأمن حياة حلوة الو ولولادو بس مقابل شو ياترى !! معقول ابني سعادتي ع تعاسة حدا تاني .. معقول عييش ولادي ع تعاسة أم فقدت ولادا .. معقول اسرح و امرح ببيت كبير مقابل ناس فقدت بيتا وعاجزا انو تأمن غيرو .. معقول ومعقول ومعقول ...

بتول : شو بابا مو ناوي تترك مكتبك بقى وتجي تتغدى معنا ..

سمير : مبلا حبيبتي جاية

تركت كلشي من أيدي ورحت ع المطبخ لأن الغدا مع بناتي مابيتفوت بصراحة و بحب شوف ضحكتن دايماً ..

بتول : بابا كأن ما اخدت حبة قبل الغدا ؟

سمير : اووف والله نسيتا .. الحمدلله الله طعمني بنت دكتورة تدير بالا عليي

بتول : يخليلي ياك ...

كملنا الغدا و رجعت للصالة .. كانت بنتي بتول آعدة عم تقرأ بكتاب .. بتول طبيبة جراحة عمرا 29 سنة بتشتغل بمشفى قريبة من سكننا وهي بنتي الكبيرة
أما بنتي الوسطى هي ديمة مهندسة معمارية عمرا 26
أما الصغيرة نور طالبة أدب فارسي وعمرا 22 سنة

حقيقيةً انا فخور ببناتي كتير كلن اتربو متل ما أنا بدي .. و درسو و تعبو ع حالن
أنا متعهد بناء وعقارات وبشتغل مع مهندسين كبار

--------------
خبر عاجل “

- لغاية تاريخ يومنا قد تم تسجيل ستة حالات خطف ، ولم تستطع السلطات معرفة أياً كان سبباً في هذه الجريمة لكنها تعمل على ذلك ، لتحويل أولئك المجرمين إلى القضاء لمحاسبتهم على أفعالهم الشنيعة .
نرجو الحذر و الانتباه وخاصة على الأطفال .

رميت الجريدة ع طاولتي و انا عم اتنهد : اوففف يا الله لأيمتا قلة هالأمان

اخدت شفة من فنجان النعناع يلي جنبي ع الطاولة .. و بقيت عم فكر بالعالم يلي بيفقدو حدا من أولادن ..
كيف هالأم يلي انخطف ابنا منا و اختفا فجأة من قدام عيونا بدا تقدر تكفي حياتا ؟!
كيف مابضل بالا مشغول ليل نهار عليه و آخرتا تموت من التفكير !!

َمعقول كل الخطف وقلة الضمير تكون كرمال " المصاري "
لهالدرجة البشر بلا ضمير و بلا أحساس ؟!

اندئ باب مكتبي و انا بعدو عقلي بساحة التفكير : اتفضل

- الدكتور رائد : صباح الخير دكتورة بتول

- بتول : يسعد صباحك .. تفضل شاركني عم اشرب نعناع

- رائد : كيفو الوالد ..

- بتول : تمام يسلم عليك

- رائد : بدي اسألك .. صحيح ابوكي مستلم مشروع الإسكان يلي عم يطلع بالريف ؟

- بتول : اي مزبوط هالحكي ..

- رائد : الله ييسرلو يارب ..

رجعت ع البيت .. كان التعب آكل من دماغي شقفة .. نهار طويل و مرضى ومشي من سرير لسرير و من ممر لممر ..
أمي عم تحضر الأكل و ديمة اعدة ع طاولتا عم ترسم مخططات و بابا بمكتبو عم يشتغل بأوراق المشروع

ارتميت ع سريري وغمضت عيوني. ...

بتول : يارب خايفة كتير ع ولادي

كان في مرة ختيارة واقفة وىايي و بإيدا في عصا كبيرة
قربت لعندي وحطت ايدا ع كتافي : لاتخافي الدنيا دولاب

بتول : بس ولادي شو ذنبن ؟

الختيارة : مو انتي امهن ؟

بتول : شو عملت انا !

قربت مني وهي عم تضحك ضحكة مخيفة بوجهي وضلت تقرب لحتى صرت صرّخ وفقت من نومي و انا مرعوبة ..
كان صوت ماما جاية من الصالون : يلا الغدا جاهز يابنات

ئمت من سريري و انا عم حاول أتناسى هالمنام المزعج يلي شفتو .. أعدت ع السفرة مع أهلي و انا بعدني مكركبة

نور : الليلة رايحين أنا ورفقاتي ع عيد ميلاد رفيقتنا ليندا رح آخد معي السيارة بابا مشان اذا تأخرت ما ارجع لحالي بالليل

بابا : طيب خديا .. اذا بدك مصاري قليلي ..

نور : لا لسا معي من لما عطيتني من يومين بكفوني ..

ماما : بتول شو اسكبلك !! بتول مااما شبك ؟

بتول : هاا اي سكبيلي رز ..

بابا : فيكي شي حبيبتي !

بتول : لا نعسانة بس ..

(( رن تلفوني ))

بتول : الو .. اهلين رهام
رهام : دكتورة .. الدكتور رائد حدد عملية المريض أيمن يوم الخميس الساعة ١٢ الضهر
بتول : هفف طيب عملية شو بالضبط ؟
رهام : تبديل شرايين للقلب ..
بتول : طيب ..

سكرت تلفوني وعليي ملامح غضب

سمير : شبك بابا ؟

بتول : الدكتور رائد بيفحص المرضى و بيمشي معن خطوة خطوة بالصور و التحاليل بس وقت العملية بحددا بدون ماياخد رأيي

سمير : يمكن لانك مجتهدة ومعروف مستواكي بالجراحة

مضى الوقت وكل مين فينا آعد بجهة .. أمي عند جارتنا سهرانة و نور راحت ع عيد ميلاد رفيقتا و ديمة ع طاولتا عم تشتغل و بابا بمكتبو