#العَنْقَــاء_بقلم_مال_الشام
#واقعية

شذى : هي انا افتحيلي ..

ملك : معك حدا ؟

شذى : لك مين بدو يكون معي افتحي خلصيني

ملك : طيب

فتحت الباب وانا متردد .. فاتت لعندي وقعدنا بالصالة و سالتني كيف امي وكيف ابي و كيف دراستي و مبين انها جايه مشان شي تاني
بلشت تسألني اسئلة خاصه لتتاكد انو ما صار شي و بعدا صارت تقلي انو رح تجوزني اخوها بس طبق ال15 مشان تستر علي
انا ما كنت عم اعمل شي غير انو هز براسي

شذى : وانتي ديري بالك تحكي شي لحدا خلص انا بحلها

ملك : اي

شذى : يلا انا طالعه لفوق

طلعت من عندي وانا رجعت قعدت مكاني !! كنت حاسه الكل عم يطعني ويستغلني ..

ما عاد شفت زيد بنوب و ازا صدفت والتقينا انا اهرب وخاف وهو يبعد عيونو عني ، بهديك الفترة ماتت ستي ام ابي بالمرض وحزن عليها الكل
و شذى كانت حامل وجابت بنت

شو فرحت لما سمعت انها جابت بنت !! مو مشان صار عندي اخت بس لان حسيت الله رح ياخدلي حقي منها ببنتها ! لان هي ما خافت علي
ولا حست بالذنب بالعكس صار بدها تورطني باخوها كمان وتجبرني على هالجوازة وكل يوم والتاني تجي وتعبي براسي انو رح انفضح وابي رح يدبحني
لوقت ما صار عمري 15 .. وكنت مبرمجة تماماً انو انا لازم وافق على زيد

وبالفعل شذى فتحت الموضوع معي ابي وهو رفض .. لما رفض ولقت حالها مو عارفه تدبر الأمور قالتلو انو موافقه و طلبت منها تحاول تقنعو
طبعاً ابي ما واجهني الي وراح حكى لامي .. كنت عم ادرس بغرفتي لما فتحت الباب علي و تطلعت فيني بشكل غريب

ملك : شبك ماما في شي ؟

بس خلصت جملتي هجمت علي وصارت تضربني

فادية : لك اخو ضرتي يا فلتانه بدك تتجوزي اخو ضرتتتي لك ما لقيتي غيرو الله لا يوفئك بدك تاخدي اخوها لشذى يخرب بيتك
يخرب بيتك هديتي حيلي هديتي حيييييييلييييييييي

كنت عم اكول الضرب من تم ساكت .. والحقد الي جواتي عم يكبر اكتر واكتر .. ما فكرت شو السبب ؟
طيب ما كان لازم تزعل لاني صغيره وقاصر ؟ الي وجعها اكتر انو اخو ضرتها ؟ طيب ما انا بنتا ما اولى تفكر فيني ؟

وصل الخبر لخوالي و لخالتي واجت حكت معي وصارت تقلي الله يهديكي والله يصلحك وشو صاير لعقلك

ملك : مو صاير لعقلي شي .. انا بدي ارتاح من هالحياة الي بتقرف بدي ارتاح من الوحده وبدي اتجوز خلص اتركوني بحالي

خالتي : ولك اخو شذى !! انتي مقتنعه بالشي الي عم تعمليه ؟

ملك : ايه مقتنعه .. انا بدي صير انانية متل ابي وامي .. بدي جرب الشعور الي عم يحسوه لما عملو فيني الي عملوه
انا حره و ما حدا يتدخل فيني ..

ما ضل حدا ما حاول معي من العيلة .. الكبير والصغير وكل الأطراف وانا راكبه راسي ، انو بدي استر على حالي وخلص ما ضل شي محرز ازعل عليه

وبيوم من الأيام كنت طالعه من المدرسه شفت ابن خالتي عمار ناطرني بآخر الطريق متل ايام زمان
فرحت كتير بشوفتو وكان جاي اجازة من العسكرية رحت لعندو وانا فرحانه كتير

ملك : عمار ايمت وصلت ؟

التفت علي مسكني من ايدي بقوة وسحبني على طرف الشارع

ملك : شبك شو في ؟

عمار : بدك تتجوزي ملك ؟ لك بدك تتجوزي ؟ كل عمرك 15 سنه .. جنيتي انتي جنيتي ؟
لك انا كنت وقت درسك شوف بعيونك البنت الزكية العاقلة .. كنت شوف فيكي مستقبل و اصرار .. هيك بيطلع منك ؟
بدك تاخدي هاد الأزعر ؟ بتعرفي اديه اكبر منك ؟ انتي بتعرفي شو يعني زواج ؟ كل هالشي بيطلع منك وانا الي كنت مفكرك شي مختلف تماماً
كنت قول هي البنت فيها شي مميز .. اكبر من عمرا و مختلفه عن بنات جيلها بس انتي

سحبت ايدي وصرخت فيه : انا شو اه ؟ انا شو احكي ؟ احكي يلا ؟ كلكن هلأ صار بدكن تعطو محاضرات ؟
هلأ صار الكل مصدوم من ملك ؟ انتو اصلا شو بتعرفو عن ملك ؟ شووو بتعرفو عني ؟ شو بيهمكن اتجوز ولا ادرس ولا انقبر لك مين سائل مين فارق معو ؟
ما حدا منكن بيعرف شو صار معي .. ولا واحد الو الحق يحاسبني .. ان شاء الله احترق وارمي حالي بجهنم انتو ما دخلكن
ما دخلكن لان ما انتو الي تعزبتو .. انتو ما بتعرفو شو صااار فيني

ما قاطعني .. ولا قلي وطي صوتك مع انو طلاب المدارس كانو عم يمرو ويتفرجو علينا .. ولا عمل شي بس كان عم يتطلع فيني وهو مصدوم
انا ابكي وامسح دموعي واحكي واحكي واحكي ... احكي على امي .. احكي على ابي .. سب على زيد .. العن مرت ابي
واخر شي .. انهار قدامو ...

عمار : شو في ؟

ملك : ما في شي .. بدي روح على البيت

مشيت بسرعه لان وعيت انو خبصت وهلأ ما رح يتركني ليفهم شو في
مشيت بسرعه وهو عم يمشي وراي ..

عمار : لك ملك انا عمار نسييتي ؟ تعي احكيلي شو في .. وقفي وتطلعي فيني .. ملك استنييييييي عم احكي معك

ملك : لك اعتدى عليييييي اعتدى علي شوووووو اعمل شو اعمل قلي

جمد بمطرحو و ضليت عيد الكلمة وكررها .. وبلشت احكيلو كل شي صار وكيف هجم علي وكان اقوى مني وما قدرت دافع عن حالي
و حتى حكيتلو كيف ضربتو و وقع عالأرض وصار يتوجع

حسيتو جن وهستر و صار يسب عليه ويقول انو رح

#العَنْقَــاء_بقلم_مال_الشام
#واقعية

الــجــزء العاشر

طلعت نتايج التاسع و رسبت .. اجتمعو اكتر من سبب قدام امي وابي ليزيدو اللوم علي وينزعجو مني
ما بعرف كيف كانت حياتنا كل واحد عم يشوف التاني مذنب وكل واحد قلبو مجروح من التاني ! عنجد شي غريب

حكي عمار مع ابوه ( جوز خالتي ) و هو حكي مع ابي وبلش يقنعو انو يبعتني لادرس فقه ودين وانو رح ارفع راسو وهنيك رح كون بمدرسة داخليه
يعني امان علي واحسنلي .. و امي تشجعت للموضوع لان شافت انو احسن الي ولمستقبلي ..

رحت لعند خالتي انا وامي وكان عمار لسه ماخد اجازه وقعدت معو

ملك : هلأ عنجد بدك تخليني روح لحالي ؟ انا ما عاد عندي ثقة بأي مخلوق ما تتركني روح لحالي

عمار : انا باعتك مع رفيقي و واثق و رايحين معكن كتير بنات غيرك
انا عسكري وحتى جوازي مو معي ما فيني سافر

كنت متدايئة ومو مرتاحه .. لهيك قام عمار وحكي مع امي مشان تقول لابي يروح معي .. و قالت رح تحكي معو
المسا بس قعدنا سوا رفض ابي لان ما بقدر يترك شغلو وعندو ضغط ..

انزعجت بس ما بينت .. وتاني نهار عرفت انو جوز خالتي هو الي رح ياخدني ويأمن علي هنيك وبعدا بيرجع
وارتحت شوي المهم معي حدا ..

بلشت التجهيزات للسفر .. وكنت متحمسة وخايفه بذات الوقت .. شي لان حاسه حالي عم اهرب من الخوف الي بداخلي
وشي لأن فخورة بحالي انو رايحه اتعلم كتاب الله
وشي لاني رايحه على مكان ما بعرف فيه شي !! ما بعرف

اجا الموعد وسافرنا .. وبلشت حياة جديدة

المدرسة كانت بضواحي القاهرة اول ما فتتا كنت اتلفت حوالي بشكل غريب مذهولة من كل شي و فرحانه
كل شوي تحكي مع آنسة وتكون من بلد مختلف وجنسية مختلفة .. حتى كان في مدرسات من سوريا
وكانت وجوهن رحمانيه و ناذرات حالهن للدين وللعلم اغلبهن لطيفات و ودودات
والسكن كان مريح .. كانت غرفتي مشتركه مع بنت مصريه محترمه كتير بس ما صرنا صديقات هلأ هيك بتحسي حالك كأنك نحلة
وعم تشتغلي بخلية نحل
كل شي بقوانين .. الشعر الحجاب الأظافير الحكي الضحك كان كل شي معتدل و مريح وعم نتعلم شغلات راقيه ومريحه للنفس
كنت حس كأنو عم يجهزوني لصير اميرة او ملكة .. حتى وقت احكي تليفون مع امي كانت الخطوط كلها مراقبة .. كان حرص لضبط الوضع اكتر مانو شك
لان بيجي طالبات من مختلف البلدان و الأجناس

كل آخر اسبوع كانو ياخدونا سيران .. شي على حديقة شي على المدينة الي قريبه منا واحياناً على السوق لنتبضع

حياتي انقلبت تماماً .. وصار عندي مجتمع جديد و عادات جديدة و افكار

#العَنْقَــاء_بقلم_مال_الشام
#واقعية

الــجــزء الثاني

ام جلال : حبيبتي انتي ما عندك رحم .. ما في مكان لتحبلي اصلاً .. وابني سيد الرجال
وانتي يعني ها يا دوبك نص مرا ..

سكتت شوي و جلال مشي وقعد وحط راسو بين ايديه وما تطلع فيني ..

فادية : شو ؟ ما فهمت ؟

ام جلال : لما كنتي عم تولدي وتعسرت عمليتك وماتو الاولاد كان ممكن تموتي انتي كمان .. بس وقعنا على اوراق انو يشيلو الرحم مشان تعيشي
وابني خبى عنك قال شو يا بعدي مشان مشاعرك .. تاني مره الزمي حدودك لان كلنا كنا نقول الله يعينها الي فيا مكفيها بس انتي تجاوزتي حدودك وكان لازم تعرفي حالك شو ..

سحبت حالها وطلعت من الباب !! لك طلعت ولا كأنو في شي .. ولا كأنو موتتني وتركتني بلا روح بلا احساس .. ولا كأنها حسستني اني ما بقى الي اي فائدة بالحياة
ولا كأنها حطمتلي كل احلامي بالحياة !!

مشيت لعند جلال و قعدت عالأرض عند رجليه و رفعتلو وشو بايدي : عنجد انا ما عندي رحم ؟ احكيلي عنجد هاد الحكي ؟

هرب بعيونو مني .. لف وشو للجهة التانية .. ورجعت لفيت وشو علي بايدي وصرخت فيه : ولك جاوبني بس قلي فهمني انا شوووووووووو
انا شو !!

جلال : انتي مرتي .. وام بنتي .. ونحنا عيلة بتجنن وما ناقصنا شي .. ليكي ما احلانا وكيف حياتنا هادية ومستقرة

بلشو دموعي يكتو وهو حط ايديه التنتين على وشي : اتطلعي فيني .. انا بحبك .. وما عندي اي مشكلة وما بدي ياكي تزعلي
بهديك الفترة كانت نفسيتك تعبانه كتير لهيك خبيت عليكي الموضوع .. حبيبتي اوثقي فيني انا مبسوط كتير وبنتنا ملك معبيه علينا حياتنا

شدني لحضنو ومسح على شعري .. وكنت حاسة روحي عم تطلع ببطئ .. بشكل مؤلم كتير ..كان بدي ولد !! كان بدي طفل
انا ما عدت بشبه اي ست بالدنيا .. انا هلأ ناقصه ! انا ما فيني جيب لجلال ولاد !!

ضليت خمس ايام ما احكي ابداً .. ولا حتى مع بنتي ملك ولا مع اهلي .. ولا مع جلال .. امي تجي تطعميني بالزور وتهديني وتزكرني انو في شي اسمو قضاء وقدر
وابتلاء و امتحان ولازم نصبر و نحتسب ! ..

اول كلمة حكيتها كانت ( طلقني ) ما بعرف ليش طلعت على شفافي .. كان عم يحاول يمزح معي مشان احكي معو
بس ما بعرف ليه هالكلمة طلعت من تمي ..
كانت ملك عم تلعب قدامنا وبس سمعت الكلمة تركت العابها والتفتت علينا وكانت عم تراقبنا باستغراب

جلال : مجنونة .. نطفتي قلبي لاسمع صوتك و هاد الي طلع معك ؟

فادية : انا تعبانه

جلال : انا ضهرك وسندك و قوتك .. ارمي حملك علي ..

و من هون بلشت حياتي الجديدة الي كنت فيها نص عايشه ونص بحس ونص بضحك ونص بحب ومتل ما قالت حماتي ( نص مرا ) ..

بعد شهر رجعنا طبيعين ( ظاهرياً ) و بسبب صدمتي صبيت كل اهتمامي ورعايتي لملك .. كأنها كنز و املي الوحيد بالحياة
كانت مدلله بشكل لا يوصف .. حب و اهتمام و الي بدها ياه بيحضر قبل ما تطلبو
جلال كان مقدر وضعي ويسايرني بكل شي ..

لوقت ما اجت مره يارا .. ولمحتلي انو حماتي عم تزن على موضوع الأولاد وبدها تجوز جلال !! يعني كيف تجوزو ؟ ما هو اصلاً بحبني
ما رفلي رمش لان بعرف شو مكانتي بقلبو و واثقه فيه ..

صارحتو وسألتو ازا بدو يتجوز بخبرني وما يلف ويدور واكدلي انو مافي هيك شي ومستحيل يتطلع بأي وحده غيري

وعلى هالأساس كنت حاول طفي نار الغيرة والخوف الي جواتي و اعمي عيوني عن مكالمات حماتي الطويلة مع جلال
وزياراتو اليوميه والمتكررة لهنيك ولما يرجع لعندي يرجع مكركب ومزعوج ..

اجتمعنا هنيك ببيت اهلو بعد 8 شهور من الموقف الي صار بيني وبين مرت عمي لما كانت اخت جلال ( نور ) جايه زيارة من الكويت .. كانت لمة عائلية وطبعاً اهلي واهلو عيلة وحده فــ كنا كلنا مجتمعين

و خبرتنا نور بهي القعده انها حامل ..

ام جلال : الف مبرووك بنتي .. كتر خيرك فرحتي البي حاكم كان ناطف قلبي على حفيد يفش القلب كتر خيرك

عملت حالي ما فهمت شي وقمت عالمطبخ .. تناولت كاسة وفتحت البراد لطلع منو ابريئ المي وكانت ايدي عم ترجف كتير
كان من البلور .. وانا عم طلعو وقع عالأرض و انكسر ..

من رعبتي رميت الكاسة الي بايدي كمان .. وطلعو الصوتين ورا بعض واجو يركضو لعندي ليشوفو شو صار .. التفتت وكانت يارا و جلال وامي على الباب

حطيت ايدي على تمي وانا عم ابكي : ما بقصدي هن لحالهن وقعو

قرب جلال لعندي : ديري بالك لا تجرحي حالك

نزل عالأرض وشال القطع الكبار وانا عم اتفرج عليه

امي : بسيطه حبيبتي انكسر الشر تعي

نزلت لعند جلال وهمستلو : بدك تتجوز علي ؟

ضل عم يلم البلور و رد : لا

قربت منو اكتر : ازا بدك تتجوز اتجوز ..

ضغط على البلور الي بايدو وجرح حالو وماني منتبهة

#العَنْقَــاء_بقلم_مال_الشام
#واقعية

الــجــزء الــثــالث

فادية : مرت عمي ؟ ..

بعدتني و فاتت بدون ما تحكي

فادية : خير في شي؟

ام جلال :ليش بدي سبب لزور بيت ابني ؟

فادية : لا بس ابنك مو هون .. قصدي جلال طلع

فتلت ضهرها عني وحطت الشنته من ايدها : انا ضليت واقفه برا لطلع جلال وفتت .. ليكي يا فادية .. انا بدي جوز ابني رضيتي ولا ما رضيتي
بقى كني واتركيني اعرف اتفاهم معو لان ما عم يتجاوب بنوب

عضيت على شفافي و بلعت الغصة : ايه انا ما قلت شي وما عم اعمل شي بس هو ما بدو يتجوز .. من ايمت الزواج بيصير بالغصب ؟

فتلت علي وهي عم تضحك : لا ياه ؟ ليش في رجال بصحلو يتجوز التانيه وبقول لأ ؟قال بالغصب قال .. ليكي جوزك ناطف قلبو و ناطر الفرصة المناسبه .. بس خايف على مشاعرك

تجاهلت حكيها : رح اعملك فطور لان وش الصبح اكيد ما افطرتي

ام جلال : فادية انا عم احكي معك بتوقفي وبتردي علي ..

فلتت من عيني دمعه ما قدرت خبيها

فادية : والله هو ما بدو يتجوز اسأليه انا ما قلتلو شي

ام جلال : ليكي انا بعرف انو بيحبك .. وانا ما عم قول انو يطلقك لا سمح الله .. كرامتك محفوظة و مكانتك متل ما هي
انتي فكري فيا .. ابني ما بعيبو شي ومادياتو فوق الممتاز .. لازمو ولد يحمل اسمو و يشيل الشغل من بعدو
طيب انسيني انا وابني و الشغل .. بنتك ؟ ما بدها اخ تسند ضهرها عليه بالأيام ويوقف جنبا وقت الحاجه ؟
حدا بيضمن عمرو ؟ مشان انانيتك بدك تخلي هالطفلة وحيده كل عمرها ؟

كنت عم اسمع وعيوني بالأرض وما عندي اي شي رد فيه لان ازا رديت رح صرخ بكل صوتي وقلها بكفيييي انتي ما دخلك .. ما دخلك
ما حدا دخلو

ام جلال : انا حكيت اللي عندي .. وابني رح جوزو لو كان اخر يوم بعمري .. بخاطرك ..

مرقت من جنبي و ضلت طالعه .. بعد ثواني اجت نسمة هوا قوية وطرقت باب البيت وضرب بقوة ... نقزت .. قعدت بالأرض
مسحت على وشي .. وضليت كل النهار مكاني وعم اتطلع بالحيط على صورة معلقة .. تصورتا انا وجلال بعرسنا و كبرها وعلقها بالصالة
كان دايماً يقلي كل ما بشوفها بتزكر كل تفاصيل عرسنا وبنبسط .. لهيك خليناها هون ..

ما بعرف كيف مرق الوقت .. صارت الساعه 1 .. ورجع جلال وهو حامل ملك معو وكان الباب مفتوح .. لما فات شافني قاعده متل ما انا والبيت متل ما هو

نزل ملك من ايدو وركضت لعندي

ملك : ماما ماما .. اخدت عشرة

ضحكت .. رفعت شعري عن وشي : شطورة حبيبتي

ملك : والأنسه قالت عني اميرة

فادية : ايه

جلال : حبيبتي فوتي غي

#العَنْقَــاء_بقلم_مال_الشام
#واقعية

الجزء الرابع

لبست تيابي بسرعه و وصلني ابي على بيت عمي و فات معي لهنيك .. و كانت قاعده مرت عمي وحاطه جلال بحضنها وعم تملس على شعرو

فادية : جلال ؟؟؟ لك وين كنت ؟؟

وقف وابتسم وسلم على ابي وسلم علي بهدوء

جلال : طلعت ريح راسي وحبيت بعد عن الكل

ابي : بس يا ابني انت رجال عندك عيله الي عملتو ما بجوز

جلال : حقك علي عمي كنت مضغوط كتير طلعت يارا من غرفتا واجت وقفت جنبي .. قعدو الكل الا انا وياها

ام جلال : ابني الله يرضى عليه حط عقلو براسو و وافق على الجوازة الحمدلله الله هداه

ابي : _ _ _

تطلعت بيارا وهي مسكت ايدي لتسندني بس ما كان في شي بهي اللحظة ممكن يسندني .. ولا اي شي

فادية : اي .. الحمدلله ..

ام جلال : اليوم رايحه اتفق مع الجماعه على كتب الكتاب .. وبدنا نجهز الطابق التاني الي فوق بيتك يا فادية ونفرشو مشان ضرتك تسكن فيه
او ازا بتحبي انتي تاخديه وهي تنزل على الطابق الأول ما في مشكلة

فادية : لا .. بدي ضل ببيتي

تطلع فيني ابي وهو مستغرب مني كيف عم احكي وكيف متماسكه .. والكل بيعرف اديه انا بحب جلال وهو اديه بحبني
او أديه ( كان يحبني ) ..

رجعت على بيتي انا وجلال بدون ما نحكي ع بعض ابداً .. فات على غرفتنا ونام وانا بعد هاليوم عيوني ما عاد عرفو طعم النوم

كتب كتابو على ضرتي ( شذى ) و بلشو يفرشولها الطابق الي فوق بيتي ... يمكن شي بعمرها ما شافتو من العز والجاه والمال ..
وانا اعمل حالي مو شايفه ولاعب بنتي وما ورجيت جلال ولا دمعه ويمكن هاد كان اكبر غلط لان كنت عم استفزو بطريقه غبيه

بليلة العرس رفضت روح وضليت لابسه البيجامه وعامله حالي نايمة و خليت ملك عند اختي لان كنت حسها فهمانه كل شي عم يصير
حبيت ابعدها وما خليها تشوف كيف ابوها عم يروح من بين ايدينا وعم يصير لمرا تانيه !!

حطيت الغطا فوق راسي و نزلو الدموعي و سكرت تمي بايدي لان جلال كان عم يلبس عندي بالغرفة !!
لبس بدلة سودا و سرح شعرو كنت حاسه عليه عم يتحرك حوالي .. وعم اتخيل كيف بعد شوي رح يكون بحضن وحده تانيه

ما عاد سمعت حركتو .. فكرتو طلع .. رفعت الغطا عن راسي شوي شوي .. وما لقيتو بالغرفة ..
طلعت من غرفتي .. وشفتو قاعد بالصالة .. وعم يبكي !! قربت لعندو وانا عم ابكي كمان بس هو كان يبكي ويشهق متل الطفل
وشو احمر كتير ودموعو متل المطر

فادية : عم تبكي يا جلال ؟

جلال : مخنوق .. حاسس روحي عم تطلع

فادية : سلامة عمرك .. دخيل اسمو لالله على هالامتحان شو صعب

حط ايدو على خدي ومسحلي دموعي و باسني على جبيني

فادية : تأخرت لازم تروح

جلال : بحبك ..

قام تركني وطلع من البيت ...

بقيت قاعده على الشباك .. لوقت جابوه هو وعروستو بزفة وطنه ورنه .. .نزلو من السيارة وكان ماسك ايدها

عملولو عراضه .. ضلو تحت خمس دقايق وانا عم اتفرج عليهن من الشباك ..

وبعدا بلشو يطلعو عالدرج .. ركضت لورا الباب .. بعدا ركضت على شباك المطبخ .. بعدا ركضت على البرندة

وبعدا شفتهن طفو ضو غرفتهن !!!

كأنو حدا شال قلبي من صدري حسيت بوجع قوي كتير ما بعرف ازا هاد مجرد ألم ولا انا عنجد عم موت من جوا ما بعرف

ضليت ع راقب شبابيك بيتهن ...

وبعد شوي اجت امي واخي وجايب معو ملك ..

وكانو مقررين ينامو عندي لانهن خايفين علي ..

كنت هادية كتير وساكته وملك عم تسأل عن ابوها .. اخدها اخي وفوتها على غرفتها و شرحلها انو هلأ الها مرت اب
وانو ابوها ما رح يكون بالبيت متل ايام زمان لانو صار عندو بيت تاني

بنتي ملك بتشبهني كتير ... بكل شي ... كنت المس فيها شجاعة واصرار ... بحس رب العالمين وهبها صفات ما موجودين عند كل الناس
كتير كنت انبسط فيا ... بس ما بعرف هلأ الأيام شو مخبيتلها ! وكيف بدي احميها ..

ضلينا كلنا صاحين ما حدا عينو غفيت .. وما حدا عم يحكي شي .. صمت فظيع وقاتل

كأنو كل واحد عم يتخيل شو مخبيه الأيام و شو رح يصير فيني انا وبنتي .. وكيف بدي بلش اتعود انو في الي شريكة بالرجال الي بحبو
ورح تجبلو ولاد .. رح تعطيه الي انا ما عم اقدر اعطيه ياه !

عملتلي امي كاسة يانسون وحطتلي شرشف على ضهري

#العَنْقَــاء_بقلم_مال_الشام
#واقعية

ما ناقشتو بشي .. نمت جنبو وضليت اتأملو .. وهو ما كان نايم انا متأكده بس كان عم يعمل حالو نايم ..
ونمنا لتاني نهار الظهر .. صحيت على امي عم تنقر على باب غرفتنا .. قمت من جنب جلال شوي شوي وطلعت لعندا

امي (بهمس) : خلي جوزك يطلع لعند شذى بسرعه هلأ بيجو اهل مرتو واهلو وجايبين معن الصبحية

فادية: بس تأخر كتير لنام وحاسستو مرتاح ما بدي صحيه

امي : يا بنتي جوزك صار الو مرا تانيه والها عليه حق بكون محروق قلبها من امبارح .. خلي جوزك يطلع بسرعه

صفنت شوي بحكيها .. وضحكت على حالي .. ووفتت صحيتو شوي شوي .. وقلتلو ازا اجو اهلها واهلو وما لقوه عندا رح تصير مشكلة
قام غسل وشو وطلع وكان واضح عليه الإنزعاج ..

مضي اليوم بصعوبة كنت ناطرتو كل ثانية ينزل لعندي .. اشتئتلو ايه اشتئتلو لاني بعرف انو هلأ مانو بالشغل هلأ هو عند مرتو التانيه
اكتر شعور صعب بتعيشو الي عندا ضره انو دايماً رح تضل مشتاقه لزوجها حتى وهو معا لان عقلها بكون عم يفكر ببعد شوي لما بدو يروح من عندا

هديك الليله ما نزل ولا شفتو ابداً .. بس تاني نهار اجا لعندي وضل اسبوع كامل ما طلع على مرتو بنوووب .. ولا حتى ليشق عليها
كانت فرحتي ما بتتثمن كان طاير عقلي انو عندو عروس وحلالو وبموافقتي ومع هيك قاعد عندي انا وبنتي

بس بعدين فتنا بمرحلة الحياة الطبيعية والمتوازنة .. ليلة هون .. وليله هون ... يوم هون .. ويوم هون .. اوقات يغش
ويطلعلي يومين .. اوقات يعمل مشكله ويتحجج ويطلعلي ليلتين .. بس بعد شهر .. انتظم الدور تماماً ..

هلأ الشي الي حتى انا كنت عم اتعاطف فيه مع ضرتي هو انو كل يوم والتاني حماتي تنط بوشها وتسألها عن الحبل

كانت هي الها حياتها وانا الي حياتي ما في شي مشترك بيناتنا غير هالدرج .. و الرجال !!

ضلينا على هالوضع سنتين ... لوقت ما حبلت شذى .. وجابت ولي العهد وسيم !! جلال هيك سماه لان دايماً كنا نحلم نجيب ولد ونسميه وسيم
فرحت كتير لما حملتو بين ايدي .. كانت الضحكة تطلع من بين الدموع بقلب محروق
حط جلال ايدو على كتفي ... وقدام ضرتي قلي : مبروك يا ام وسيم

تطلعت فيه وضحكلي ومسحلي دمعتي ... وكانت شذى لسه تعبانه كتير ... حطيتلها الولد بحضنها ... ورجعت نزلت على بيتي
كان البي عم يلهف كتير للولد .. يمكن لان جوزي حسسني انو هالطفل بيخصني والو علاقه فيني !!

كان ملك صار عمرها 8 سنين .. يعني وعيانه كل شي ومدركة .. لما اجا وسيم صارلو مولد ومباركة ما صارو لملك
شي ما بينوصف ضلت الأفراح والاستقبالات شغاله اسبوعين ورا بعض بس انا ما تدخلت بشي وكنت مسكرة على حالي باب بيتي

انا كنت مبسوطه بالولد والله ... وكنت عم اتأقلم مع حياتي ... بس حاسه حالي ضايعه بين الأرض والسما
لما ابي شاف وضعي اقترح علي انو اشتغل .. طبعاً كنت متاكده انو جلال مستحيل يخليني .. دقلو ابي وقلو يجي
وفتح معو الموضوع

ومنتفاجئ كلنا انو ما عندو مشكلة بالعكس قال هو بشجعني انو كون نفسي واكتشف ذاتي ونمي قدراتي !!
حسيت انو هو و ابي حاكين بالموضوع من قبل وشايفين انو افضل الي ..

كانت ملك قاعده معنا .. ومبين عليها مو عاجبا الحكي ..

فادية : طيب ازا اشتغلت مين رح ينتبه لملك ؟

ام عمار ( اختي ) : بتضلها عندي وبس تخلصي شغلك بتمرقي بتاخديا

قامت ملك وراحت شغلت التلفزيون وقعدت عليه ونحنا كملنا نقاشنا بالموضوع واخر شي توصلنا لانو لازم اشتغل مشان تتحسن نفسيتي
والكل رح يوقف جنبي ويدعموني ... و حسيت بطاقة غريبه جواتي كأنو عنجد انا بحاجة لاستقل وكون قوية وما لازم ضل تحت جناح جلال

وعلى هالأساس .. وافـــــــقـــــــت ..

وبعد اسبوع بلشت شغلي ... دبرلي ابي عن طريقو شغل وكان الراتب الحمدلله ممتاز وحتى الوظيفه مناسبه كتير الي ومريحه

من الصبح كنت وصل ملك على المدرسة ... وابن اختي ( عمار ) يروح ياخدا على بيتهن ..

اختي كان عندها اربع شباب .. الكبير عمار والأصغر صهيب

وكنت مأمنه عليها هنيك .. وارجع الساعه اربعه اخدها ونروح على البيت ,,، بهديك الفترة كنت انا اكتر ام انانية على وش الأرض
وما كان عندي اي فكرة انو بنتي عم تضيع معي ... ما كنت بعرف انو بنتي عم تكير بغيابي كل يوم بشهر
وكل شهر بسنه
وكل سنه .. بعشر سنين

#العَنْقَــاء_بقلم_مال_الشام
#واقعية

الــجــزء السادس

(( مــــــــلـــــــك ))

كنت حاسة حالي عايشه بدوامة وانا عم شوف ابي عندو عيلة جديدة وحياة مستقله عنا .. كنت كتير متعوده على دلالو واهتمامو
لما اجا اخي وسيم فرحت فيه كتير بس ما كان يصحلي كتير شوفو او احملو وما كنت حب احكي مع مرت ابي لان كنت حسها سرقت ابي مني

تفاجئت بقرار امي انو تشتغل كان بدي ياها الي وبس ... يمكن كان لازم وقف ودافع عن حقي وقلها انو انا بدي ياكي معي
وانا محتاجتك اكتر لان ابي مانو معي ... متل ما كان لازم قول لابي انو ما لازم يتجوز وانو انا بكفيه وما بدي

اخ

يمكن لو قلت الشغلات الي بقلبي كان جزء كبير من حياتي رح يتغير !!

كانت امي كل يوم الصبح توصلني على المدرسة وتروح و بعد الدوام يجي عمار وياخدني وكل الطريق نحكي ونضحك
ويحمل الشنته عني ..

ملك : كأنك تأخرت اليوم ؟

عمار : تأخرت ؟ لأ ما تأخرت

ملك : لك امبلى تأخرت تلات دقايق انا متاكده

عمار : ههههه بالله ؟ خلص حقك علي ما رح عيدا

ملك : مممممم ماشي سامحتك

وبس نوصل تجهز خالتي الغدا وناكول .. كانو هن ياكلو ويحكو وانا اطلع فيهن وانا مستغربة .. ما سبق وعشت هاد الشعور حتى لما اجتمع انا وامي وابي بحس في شي ناقص .. كانو في شي ضايع ...
غريبه كتير ! كتير غريب يكون عندك عيلة واب وام و اخوان وتقعدو سوا وتحكو وتضحكو .. لانو كنت عم احلم بهيك عيلة
قررت يصيرو هن عيلتي و اهلي وكل حياتي ..

خسرت ابي و خسرت أمي بوقت انا كنت محتاجتهن فيه اكتر من اي شي تاني ..

عمار ابن خالتي الكبير .. كان يدرس جامعه وبذات الوقت يهتم بدراستي بالامتحان ويساعدني مشان حل وظايفي
كان بالنسبه الي هو اخي ..د .. كنت حب مضي الوقت عندهن كتير ...
برغم كل الظروف والكركبة الي بحياتي بس دراستي كانت ماشيه بشكل ممتاز وخالتي وعمار دايماً مبسوطين من علاماتي
ومن تفوقي .. بس هالنجاح هاد ما كان يدخل الفرحة لقلبي .. يمكن لان كان ناقصني شي اكبر منو
ويمكن لان ما كنت شوف ذات الأهتمام بدراستي من ابي وامي ..

الكل كان اكبر مني ببيت خالتي بس كانو يلاعبوني ويهتمو فيني بس كان لسه في صراع جواتي انو بالنهاية هي ما عيلتي الحقيقيه
انا مشتاقه لأبي وامي كتير ! مرت ابي لئيمة نوعاً ما .. يمكن هاد الوضع الطبيعي لدورة الحياة
كنت بس التقي معا على الدرج تزورني وتطلع فيني كأنو قرفانه مني .. ما كتير كانت تخليني قرب من اخي
حتى امي وقت تجبلو شي تتناشف فيا وما تلبسو ياه بنوب !! يمكن لو ما ابي كان حاطلها حدود كانت حياتنا رح تصير متل الجحيم

علاقتي بأمي بلشت تصير سطحيه .. ماشي هي كانت تحاول تعوضني عن الوقت الي بتنشغل فيه بس انا صرت مشتته تماماً
كنت بحاجة لحضن ورعاية .. بدي حدا يحسسني انو انا محور حياتو .. بدي حياة طبيعيه

بدي ام تصحيني الصبح عالمدرسة وترتبلي شعراتي وتضبلي السندويشة وتبوسني .. وتكون ناطرتني لما ارجع
تغمرني بين ايدها و احكيلها شو صار معي بمدرستي .. وتطعميني بايدها .. بدي ابي يكون قاعد معنا على السفرة
مشان احكيلو كتير شغلات ومشان يصير بيناتنا مغامرات ومواقف احكيهن لرفقاتي متل ما هن بحكولي عن مغامراتهن مع اهلهن

عشت هيك سنوات طويلة لوقت ما صار عمري 14 سنه مرت ابي جابت بنت سموها إيمان و ابن خالتي عمار راح يخدم عسكرية ... وصرت صبيه !! صبيه كامله مكملة .. بهاد العمر لقيت انو بكفي
صار لازم اعتمد على حالي .. ما عاد بدي حدا يهتم فيني .. كل الألم الي عشتو صار بدي طلعو على شكل قوة

ملك : ماما بدي احكي معك بموضوع

فادية : حبيبتي تعبانه تعبانه كتيييير منحكي بعدين

ملك : اميييي اسمعيني .. انا ما بئى بدي روح على بيت خالتي ..

وقفت امي وتطلعت فيني : في حدا عم يدايئك ؟ زعجوكي بشي؟

ملك : لا لا ابداً ... بس انا صار فيني ابقى بالبيت لوقت ما ترجعي ما عدت صغييرة .. يعني ما عاد بدي حدا يطعميني ويدرسني

سكتت امي شوي

ملك : شو ؟

فادية : خليني اخود رأي ابوكي ..

ملك : ماشي بس حاولي تقنعيه

حكيت امي مع بابا والحمدلله اقتنع وقال هو رح يوصي خالتي مشان تنتبه علي بالوقت الي هن ما بكونو موجودين فيه
ورح ينبه عليها تنزل تطل علي كل ساعه والتانيه وتنزلي الأكل .. ما كان بهمني شي وما اعترضت على شي

انا ومرت ابي كنا متصالحين مع طبيعة علاقتنا .. هي تنزل كل يوم ثواني سريعه تقلي ( محتاجه شي )
وانا ابتسملها وقلها ( شكراُ ) .. وبس يتصل ابي تنبه علي قلو انها عندي وجابتلي اكل و سايرتني ودرستني ومن هالحكي الي كلو كزب

#العَنْقَــاء_بقلم_مال_الشام
#واقعية

الــجــزء السابع

ملك : يعني مانك عم تفهم علي .. ما في حدا بالبيت ما فيني فوووتك

زيد : لك ليش مكبرتيها انا بقربلك و كمان انتي ...

قبل ما يكمل حكيو اجت شذى ..

شذى : زيد ؟ انت شو عم تعمل هون ؟

زيد : انا ؟ .. لك .. لك ابنك عم يبكي تعي شوفيه مريض

شذى : خدو واطلاع لفوق عالسريع

زيد : طيب يلا الحقيني لا تتأخري عاوزك بموضوع

طلع زيد و وسيم معو وانا حسيت الله رحمني بجيتها لشذى ... اول مره بفرح بشوفتها بس كتير كنت خايفه
قربت لعندي وضلت تراقب اخوها لطلع لفوق بعدين همستلي

شذى : دايئك شي ؟ عملك شي ؟ بتعرفو بعض قبل هالمره ؟

ملك : انا بعرفو بس هو اول مره بشوفني وبدو يفوت على البيت غصب عني وانا عم قلو ما في حدا جوا وهو ما عم يفهم

شذى : طيب فوتي وسكري الباب و مره تانيه لا تفتحيلو ولا تقولي لحدا الي صار

ملك : طيب

طلعت مرت ابي وانا قفلت الباب وفتت اركض على غرفتي وقعدت ابكي .. بدي امي .. بدي امي معي
بدي تحميني من كل شي .. بدي حسها رفيقتي .. يا ربي بدي اميييييييي بدي امييييي بدي اميييي

قبل وصلت امي بنص ساعه قمت غسلت وشي و ربطت شعري و حطيت الكتاب بحضني على اساس عم ادرس
ولما فاتت سالتني شو عملت اليوم وازا مرت ابي نزلت لعندي وقلتلها عادي متل كل يوم ما صار شي

صار كل يوم والتاني زيد يجي يدئ علي الباب وما كنت افتحلو ابداً بس كنت احكيه من ورا الباب وقلو امي بتقفل علي الباب وما معي مفتاح

زيد : طيب ما شفتيلي شذى ؟

ملك : لا بس سمعت صوتها وهي نازله ومعا الأولاد

زيد : ايوه .. طيب انتي شو اسمك ؟

ملك : اسمي ملك

زيد : شو حلو اسمك .. ليكي بما انو نحنا عيله وحده اعتبريني متل خالك واي شي بتعتازيه احكيلي
اديش عمرك انتي ؟ ودايماً بتبقي هيك لحالك ؟

ملك : 14 . .ايه اغلب الأوقات لان امي موظفة

زيد : طيب يلا انا رح روح برجع بشق عليكي بكرا ... محتاجه شي جبلك معي ؟ اكلات طيبه او اي شي؟

ملك : لا شكراً ..

زيد : سلام

بس راح فتت و كان الجو عم يبرد كتير وفتنا بالشتويه .. حسيت حالي دايخه كتير و مرضانه وما في حدا عندي
قعدت على الكنباية و غمرت حالي بالأغطيه وكنت عم ارجف وحاسه بالبرد .

حاولت نام وكنت عم هلوس كتير ... صرت اتخيل ايام زمان ... لما كان ابي ياخدنا سيرانات انا وامي و بعد شوي فتح عيوني و راسي عم يفتل وعيط بكل صوتي
( امييييييي ) .. ( ماااااااماااااا )

قمت على غرفة امي وابي .. كنت عرقانه كتير و حاملة الغطا فوق ظهري .. وقفت بالغرفة وتطلعت حوالي بالتخت وبالصورر وبالخزانة
وبكل زاوية ..
هون كنت عم اركض ويلحقوني
هون كنت نام بالنص بيناتهن
هون كنت لما اصحى مرعوبة اجي وحس بالأمان وهلأ ما ضل مكان حس فيه بالأمان ..

مشيت لجنب التخت ... ورجعت بذاكرتي لليلة الي تزوج فيها ابي .. لما فوتني خالي على غرفتي وصار يشرحلي هلأ كيف رح تصير حياتنا

خالي : ملوكتي انتي صبيه حلوة مو ؟

ملك : ايه

خالي : طيب انا بدي قلك يا خالو انو هلأ ابوكي تجوز وحده تانيه غير امك

سكتت وتطلعت بالسقف وما بعرف شو حسيت .. خفت كتير بس ما كنت فهمانه بالضبط شو الوضع

وقتا نمت وصحيت بالليل ..

#العَنْقَــاء_بقلم_مال_الشام
#واقعية

الــجــزء الثامن

كان عم يتوجع و يسب علي بابشع الألفاظ .. لما تاكدت انو مو قادر يقوم يضربني او يئذيني وقفت على رجلي وانا حاسة روحي رح تطلع كل شهقة اشهقا تساوي طلوع الروح
مرقت من جنبو وانا خايفه وفتحت الباب .. وفوراً طلعت بوشي مرت ابي

بس شفتا تطلعت فيا وتطلعت فيني وهي مصدومة .. وبعدا شافت اخوها مرمي على الأرض وراي

مسكت فيها والحكي ما عم يطلع معي .. كنت انطق كلمات مو مفهومة و مسكت ايديها ورجليها .. فاتت لجوا وسكرت الباب وراها وهي عم تضرب على وشها

شذى : لك شو عامل بالبنت .. ولك شو عملت الله لا يوفئك الله ينتقم منك يا ندل

زيد : لك الــ ـ ـ ـ .. ضربتني والله لادبحها

تطلعت فيني شذى وكانو تيابي مقطعين و جسمي مخرمش

شذى : عملك شي ؟ شو صار ؟ شووو صار ؟

ملك : ما .. ما .. ما

شذى : قوم .. قوم الله لا يقومك قوووم

راحت لعند اخوها وساعدتو ليقوم .. طلعت من عندي وطلعت لفوق وبعد دقيقتين نزلت لعندي بسرعه وكنت قاعده مكاني عم انتفض

رفعتني من الأرض : قومي تعي

فوتتني على الحمام وحطتني تحت الدش .. شالت عني تيابي و غسلتني ولفت علي المنشفة .. طلعنا على غرفتي و لبستني بيجامتي وانا عم ارجف وابكي وبس

شذى : اوعي تحكي لامك شي اووعي هاااااااا

كانت تخوفني كتير وانا اصلاً لسه عايشه بصدمة الموقف .. هزيتلها براسي انو ايه

شذى : ازا قلتي لحدا ابوكي رح يطلقني .. وبعدين اخواتك بصفو بالشارع .. انتي ما بدك وسيم يصير بدون اب وام مو ؟

رجعت هزيتلها براسي و جمعت جسمي على بعضو وحطيت راسي على الوساده

قامت غطتني : هلأ نامي و ما تحكي شي لحدا ... وما تخافي ما في شي الي صار عادي

سكرت باب غرفتي وطلعت وانا قمت و وقفت على المرايا وصرت اتطلع بحالي و اتزكر كيف هجم علي .. كيف كنت عم اصرخ وما في حدا يحميني منو

ما بعرف بدون وعي فتحت باب غرفتي و طلعت من البيت وانا لابسه بيجامتي و نزلت عالشارع وضليت اركض و حاسه حالي رح اختنئ
ما بعرف كيف لقيت حالي قدام بيت خالتي .. الجو برد بشكل فظيع ...

دقيت باب البيت .. فتحتلي خالتي وشافتني بمنظر مو طبيعي ابداً

خالتي : ملك !!

ملك : خالتييييييييييييي

رميت حالي بحضنها وصرت صرخ وابكي

خالتي : يا ربي دخلك ولك شبببك شو فيييييييييييي

كان نفسي احكيلها كل شي مشان تاخدلي حقي بس بلحظة مرت صورة وسيم قدام عيوني .. ما بدي ياه يعيش متل حياتي .

#العَنْقَــاء_بقلم_مال_الشام
#واقعية

انا بعشقك انا كلي لك
يا من ملك روحي بهواه الامر لك طول الحياة
الماضي لك .....وبكرة لك....وبعده لك
انا في سهادي وبمنامي بندهك ...وبسألك؟؟؟؟
بتحبني ولا الهوى عمرو ما زارك؟؟!!
بتحبني ولا انكتب على القلب نارك؟؟!!
قول يا حبيبي ..يا حبيبي..قول يا ملاك

جلال : يا عيني يا عيني .. شو هالجو الرومنسي هاد

التفتت وراي وابتسمت : انت جيت ؟

جلال : تأخرت عليكي ما حبيبي ؟

فادية : لا عادي .. نيمت ملوكة .. و عملت مته وطفيت ضو البرندة وشغلت مياده الحناوية وشوفت عينك عم صفي راسي

قرب جلال على المسجل و وطى الصوت .. و اجا قعد جنبي على المرجوحه : بس الجو بارد ما ؟

فادية : ايه شوي .. بس ليك القمر شو حلو

جلال : ايه عنجد كتير حلو بس انتي احلى منو

فادية : ههههه بالله ؟

حطيت راسي على صدرو : كيف كانت سهرتكن ؟

جلال : تمام منيحه اختي بكرا مسافرة على الكويت هي و جوزها

فادية : الله ييسرلها يارب وصلتلها سلامي ؟

جلال : ايه وقلتلها انو ملك مرضانه وما قدرتي تجي و عذرتك ..

سكتنا تنيناتنا ...انا عم اتفرج على السما الواسعه وعم فكر بالموضوع الي شاغلني تماماً هالفترة .. وهو عم يتفرج على عيوني

فادية : ليه عم تطلع فيني اتطلع بالسما

جلال : .. ما في اي اختلاف
عيونك نفس زرقة السما .. وفيهن نفس لمعة النجوم .. ورموشك متل الشلال الغزير عم يرفو كل ثانية .. و برف قلبي معهن

كانت المرجوحه عم تتحرك فينا بهدوء .. و عم نسمع اغنية ميادة الحناوي وهي عم تحلف حبيبها يقلها ازا بيحبها او لأ !!
ضمن هاد الهدوء كلو وهالسهرة اللطيفة ... صحي كائن صغير ..

فادية : جلال .. سامع صوت شي ؟

جلال : اي .. ملك ؟ عم تبكي ؟

قمنا نركض على غرفتا و فتحنا الباب .. كانت الغرفة عتمه .. وملك الطفلة الي بعمر الاربع سنين وعيانه وعم تبكي

حملها جلال بين ايدي و صار يهديها و جبتلها مي وشربتها .. بس سكتت اخدناها معنا على غرفتنا ونيمناها بالنص بيناتنا .. انا عاليمين و جلال عالشمال .. واحد عم يبوسا ويشما و واحد عم يلاعبا ويحكيلها حكاية لتنام ..

تاني يوم صحينا بشكل طبيعي كتير .. ملك كانت متعافيه الحمدلله و انا ودعت جلال طلع على شغلو بالمعمل وانا بلشت شغلي متل النحلة النشيطة

كانت حياتي مستقرة نوعاً ما .. عندي زوج بحبني ... بكون ابن عمي .. وعندي بنت متل الوردة
تزوجنا زواج أهل بما انو اهلي و اهل جلال بيناتهن املاك ضخمة ومصانع وشركات ما حبو شي من هالأملاك يطلع لحدا غريب
وعلى هالأساس تم زواجنا وخلال فترة الخطبة تعلقنا ببعض كتير .. لقيت فيه كل شي بتمناه وهو صريح وجريئ بحبي قدام الكل
ما عندي مشاكل .. جوزي ما بخوني .. وحماتي ما بتنكد علي .. وما عندي بنات احمى غليظين بالعكس بنت حماي الصغيرة كتير رفيقتي
وما بدي انحف و ما بتابع سعر الدولار .. وما عندي جارة حشرية .. انو المفروض حياتي تكون مثالية !! بس لأ للاسف الواقع مو هيك !!

خلصت شغلي وانا تعبانه كتير وحاطه ملك تلعب بغرفة الألعاب وعم شق عليها لاتاكد من حرارتها كل شوي
وقعدت بالصالة جنب التليفون ودئيت على بنت حماي يارا وردت علي حماتي وبعدا اعطتني يارا

يارا : هلا فدو .. كيفك ؟

فادية : تمام ؟ مرت عمي جنبك ؟

يارا : لا انا فتحت الخط من عندي من غرفتي .. شو في ؟

فادية : لك رح جن

يارا : يوه .. خير شبك ؟

فادية : شو شبني .. ذات الموضوع ما عم يروح من بالي .. اخوكي ما بدو مني ولاد من بعد ملك
ناطف البي لجيبلها اخ ...

يارا متلبكة : ييي على هالسيرة ما كانت تخلص

فادية : لا وما رح تخلص .. ليش هيك عم يعمل طيب ؟ لك المصيبه انو بقلي ياها بكل بساطه
انو ما بدو ولاد مني .. بالأول كان يقلي خلينا نأجل الموضوع هلأ بقلي ما بدو ولاد بنوب

يارا : ايه حبيبتي .. انتي لما رجعتي حبلتي بعد يارا بالتوأم وصار معك نزيف وكان ممكن تروحي فيا لا سمح الله
جلال خاف كتير كتير .. كان خايف عليكي بشكل كبير واكيد هو خايف يتكرر الموضوع

فادية : بس يا يارا هاد قضاء وقدر وانا كنت اكتر وحده متحطمة لما خسرت ولادي وماتو برحمي الي كبرو فيه تسع شهور
انا كنت حس فيهن وعايشين جواتي .. و انا الي شفت الموت بولادتي يعني انا اكتر حدا لازم يخاف
والدكتور قلي انو المشكلة مو مني .. الحبل السري التف عليهن وماتو يعني ما في شي يخوفنا من انو نعيد التجربة

يارا : يا الله منك يا فادية شو عنيدة .. خلص جوزك بحبك وعندك بنت بتاخود العئل .. ربيها وانتبهي عليها وشو بدك بكترت الأولاد
اصلاً ما بجيبو الا وجع الراس ..

سكتت شوي وانا مستغربة من حكيا !! لك معقول ما مشتهية تشوف ولاد لاخوها !

يارا : وين رحتي ؟

فادية : انا بلشت افهم عليكن .. بس انتو مكبرين الموضوع

يارا : ما فهمت شي؟

فادية : ليكي .. الي سنتين بحاول اقنع فيه وهو عم يتهرب ويمكن انا فهمت شو القصه .. بس لازم هو يصارحني ويشوف دكتور

يارا : مين اللي يشوف دك