#استبدلت_العالم_بك_لماذا_خذلتني 💔
#الجزء_الأول :
#بقلم_سما_الشام

في ناس بتخون مشان تنسى ..
وناس بتنسى مشان تخون ..
وناس برغم أنو منعطيهن الحب بيخونو ..
وناس برغم انو بيعطونا الخيانة منبقى منحبهن ..
بس وقت يخونو بيصير إلنا كل الحق أنو نجردهن من #صفة_الوفاء .. من #صفة_الحب ..
بس يا ترى شو هو الحب ؟؟!
ويا ترى هنن حبونا عنجد؟؟!

قصتنا اليوم عن شب وصبية ..
كانت حب وعشق ❤️
بس انتهت فيهون الحياة لبعد وكره 💔
الشب اسمو سامي ..
والبنت اسما تهاني ..
البنت سنة أولى جامعة ..
والشب مانو دارس بس فهمان الحياة بكل تفاصيلا ..

ابتدت القصة من سنة 2015 الشهر 3 هي قصة الحب بيناتن
اما هنن كانو جيران بيعرفو بعض مضبوط ..
البنت عندها 4 اخوات بنات وهي الصغيرة فيهن ..
الشب عندو أخ واخت اصغر منو واخ واخت اكبر منو ..
عايشين بالريف ومبسوطين بحياتن ..

سامي من سنين اجتو فرصة السفر برا البلد ما وقف عند خوف الأهل تابع لحالو وشق طريقو وتحمل عذاب الغربة
طلع الشب وعارك وتعذب ونجح بحياتو وتغرب فترة من الزمن وكانت طويلة شوي بس رجع ع بلدو بنتيجة
لما رجع لعند اهلو وكانت أمورو ممتازة شاف جارتو #تهاني تطلع فيها وقال الحمدلله رجعت بالوقت المناسب ..
سامي شخص محترم وبيعرف انو الغلط ممنوع لهيك حافظ ع مبدأ التربية يلي نشأ عليها ..
#تهاني أهلها جماعة كتير طيبين ومحترمين و أكابر ما عندن اخوات شباب ..
برجعة #سامي عالبلد كانت #تهاني كبرت وصارت صبية وحلوة كتير ومهضومة وبتجنن ..
.
بهالفترة #سامي التحق بالجيش وراح احتياط
ما كان بيعرف إذا بيرجع ولا ما بيرجع بس ظل إيمانو بالله كبير وقدم يلي بيقدر عليه ..
ضل 3 سنين بالجيش وما بيعرف شي عن البنت يلي دخلت عقلو ..
تصاوب #سامي وكانت إصابتو خطيرة ..
بس الحمدلله إيمانو بالله ورضا أهلو مرق بخير وسلامة ..
بالفترة كانت اخبار #تهاني مقطوعة عنو وما بيعرف عنها شي ..
رجع #سامي ع بيتو وإصابتو كانت كتير صعبة وتعالج بالتخت فترة طويلة والحمدلله بعد سنة قام وقف ع رجليه وبلش يتحرك ..
رجع اتطوع بالجيش وما كان متعافي من جرحو القديم ..
و أول 3 أشهر بالدوام الجديد بالصدفة رجع التقى بجارتو #تهاني
كان اهتمامو فيها من زمان حب عذري يعني حب عادي كانت ع طول تمرق بخيالو بس وقت شافا صبية بتجنن وطالبة سنة أولى جامعة دخلت مخو أكتر ..
صار يرجع من دوامو بكير مشان ينطرها بالكراج ويطلع معها ع بيتا وكان الوضع عادي .. ضلو هيك حوالي شهرين
اخر شي #سامي ما حسن يتحمل هالشي وقرر يصارحا بحبو ..
فكر كتير قبل مايحكي معها ..
آخر شي أخد قرار وكانت النتيجة إنو يصارحها ..
رجع بكير من دوامو وخطط منيح لطريقة يخبرها عن مشاعرو بحيث هي ما تنفر منو أو تتدايق ..
هو عم ينطر بالكراج وعم يفتل متل المجنون وعم يحكي مع حالو ..
التفت وشافها جاية بأتجاهو ..
سلمت عليه وقالتلو : اليوم بالجامعة تعبت ورجعت بكير ..
ضحك #سامي وقلا : وأنا اليوم طلعت بكير بس مشانك ..
ستغربت #تهاني من كلامو!!
قالت :مافهمت عليك أنا شو دخلني؟؟
جاوب #سامي : معلش نروح نشرب فنجان قهوة بشي محل ونحكي ..
بحكم انو جيران وع طول بينطرو بعضن مشان يطلعو بنفس السيارة قبلت الدعوة و راحو قعدو بكفتريا ..

وصلو عالكفتريا قبل مايقعدو قالت #تهاني معلش أنا ما فيني طول
قلها #سامي أكيد ما رح خليكي تتأخري
طلبو قهوة وبهالحظة كان #سامي كتير متلبك وعم يحسب ألف حساب كيف بدو يصارحها بمشاعرو ويقلها أنو بيحبا من زمان وهوي شارد مدت ايدها تهاني وصارت تأشر الوووو وين صافن؟؟
نقز #سامي وقلا لا لا مافي شي بس ممكن اسألك سؤال؟
قالت : تفضل!
قلا انتي في بحياتك حدا يعني مرتبطة؟؟
ما ستغربت طلبو كان ردت فعلا كتير عادية
قالت : ليك سامي أنا بحترمك كتير وأنت حدا كتير محترم فهمت عليك شو بدك تحكي خلينا هيك أحسن إلي و إلك
انصدم سامي من جوابا البسيط والسريع وسكت ..
قلها : متل ما بدك بس يا ريت لو سمعتي يلي بدي احكي..
حس أنو تسرع كتير وبين عليه أنو زعل ..
قلها :ممكن آخد رقمك؟؟
بكل بساطة عطتو الرقم ثبت رقمها وقلها معلش سميكي متل ما بحب أنا؟؟

ضحكت وقالت : ع كيفك سجل يلي بدك ياه
وقامو و رجعو مشي عالكراج
وهنن بالطريق بلش يسألها عن وضعا وعن علاقاتها
وكانت تجاوب بدون أيا تردد
وصلو عالكراج وطلعو بالسيارة بقى هو ساكن قبل بيتا نزل قدامها وضل واقف عالطريق لحتى شافها وصلت ونزلت من السرفيس وهي فايتة عالبيت اتطلعت فيه وابتسمت وفاتت عالبيت
رجع #سامي عالبيت غير تيابو وعمل دوش وما تغدى ولا إلو نفس ياكل شي كان عم يفكر كتير بالحديث يلي صار بينو وبين #تهاني ..
قدام بيت #تهاني في جنينة بيقعدو فيها وبنفس الوقت في شارع بيتمشو العالم فيه ..
إلو بالعادة يمرق من قدام بيتها ويرمي عليهن السلام والكل كان يبتسم ويرد عليه السلام .
بس هالمرة غير ..
هو مارق متلبك وخجلان مرق من قدام بيتها و بخجل سلم وعيونو يا دوب لحقو يشوفو مين قاعد ..

ردو عليه الس

لام وهي كانت موجودة ضحكت ع الموقف يلي شافتو فيه ..
.
(( هلأ سامي رح يكفيلكن قصتو ))
.
أنا قطعت البيت وبعتتلي رسالة وضحكت وقالتلي ليش هيك مرقت كأنك هربان؟؟
فرحت كتير لما قريت الرسالة
تمشيت شوي وأنا عم فكر رجعت عالبيت من طريق تانية
فتت عالبيت ودخلت ع غرفتي وسكرت الباب
وتسطحت عالتخت ومسكت الموبايل وعم فكر شو ردلها ع الرسالة
هي أول رسالة ولازم تكون غير ..
وبلشت فكر وقت منيح ..
وفجأة بتجيني رسالة من #تهاني كاتبة فيها : شو هالتقل ما بعرفك تقيل هيك

أنا فتت بالحيط وتلخبطت كتير ..
ما عرفت شو رد عالرسالة رحت دقيتلا
وأنا متلبك ما بعرف شو احكي أو شو بدي بلش الحديث !! رن الهاتف
#تهاني : أهلين كيفك؟
#سامي: تمام انتي كيفك؟
#تهاني : ماشي الحال (مع ضحكة) منيحة
#سامي : والله كنت بدي ابعتلك رسالة بس ما بعرف شو اكتب فيها لهيك دقيت بس ما كون عطلتك عن شي بعتزر؟!!
#تهاني : لا لا عادي اصلاً أنا مالة وضايجة كتير عندك واتس؟؟
#سامي : أي عندي منحكي واتس قصدك؟؟
#تهاني : أي أحسن ما كتير عم احسن علّي صوتي
#سامي : اي ماشي فوراً
سكرت الخط وفتحت عالواتس وفوراً ع اسمها
شفت صورتها وسحبتا فوراً ونطرت لحتى تكون متصلة وأنا ع نار في كتير شغلات لازم اعرفها وكتير شغلات لازم احكيها .
هيك شي 5 دقايق .
اجتني إشارة إنها متصلة
بعتتلها :😊 كيفك؟؟
ردت :😄 أهلا
وبلشنا نحكي .
كيف دراستك وكيف وضعك؟؟
وهيه تسأل كيف إصابتك وكيف دوامك؟
حكينا كتير .
حكينا أكتر من ساعتين كنت اختار حديث يخليها تضحك منشان نحكي أكتر
فجأة بطلت ترد وأنا ابعت رسائل وما ترد عليهن

تلخبطت كتير وخفت يكون حدا من اخواتها حس عليها أو صار شي بلشت فكر وضوج وما بعرف شو اعمل دق ولا ابعت رسالة؟!!
بدي طريقة تخليني اطمن عليها ما حسنت أوصل لنتيجة ضليت ع هالحالة للساعة 3 الصبح
ما ستلمت ولا رسالة مني
فجأة بتستلم الرسائل يلي باعتون من مبارح وكمان ما ردت ولا ع رسالة وسكرت ..
هون أنا صرت بين نارين أول شي اطمن انها منيحة وتاني شي لسا قلبي ع نار ليش ما ردت عليي وشو صار معها!!
تركت الهاتف ورحت غيرت تيابي ونمت..
انا بطلع بسيارة خاصة عالدوام بطلع بكير .
#تهاني بتطلع بعدي بشي نص ساعة
يعني صعب إني شوفها الصبح
أول يوم كان صعب عليي ما عرفت ركز بشغلي و أنا مدرب ع أنواع من الأسلحة العسكرية ما عرفت تابع واعطي الدروس نظامي
قررت آخد إذن و ارجع بكير وهيك عملت رجعت بسرعة ونطرتها بالكراج
تأخرت على غير العادة بس بعد وقت طويل إجت وشافتني
أنا عم اتطلع عليها نسيت الوجع والسهر والتعب نسيت كلشي .
كانت فرحة كبيرة أنها بخير
وصلت لعندي ومع ابتسامة قالتلي : كيفك شو اخبارك؟!
قلتلا :أنا تمام الحمدلله انتي كيفك والله شغلتيلي بالي عليكي مبارح خير نشالله ليش ما بقى رديتي وفجأة اختفيتي وأنا انشغل بالي كتير ونطرتك ترجعي تردي وما رديتي .
ردت عليه مع ابتسامة : والله كانو رفقاتي عم يحكو معي واضطريت تابع الحديث منشان المحاضرات والدروس
أنا هون قبلت الجواب لأنو كان لمصلحتها ..
وبقينا ع هالحالة حوالي شهر ..
وكل يوم نحكي فيه انشد إلها أكتر و أكتر و زاد حبي إلها أضعاف
وهي كمان صارت ترتاح أكتر و أكتر وتفتحلي قلبها وتأمن تحكيلي عن ظروفها الصعبة وبشو عم تعاني
كان عيد ميلادي قريب
قررت اعترف بحبي إلها بهالمناسبة
وهيك صار
خبرتها أنو بكرا عيد ميلادي وحابب يكون مميز ممكن تحتفلي معي بهاليوم؟؟
وافقت وكانت فرحتي كبيرة
اتفقنا بالليل وين بدنا نلتقي وشو رح نعمل تاني يوم
وأنا عم احكي كتبتلها (حبيبتي) لا تنسي
دققت ع هالكلمة وبعتتا ☺️
أنا دقات قلبي أسرع من السيارة وفرحتي ما بعطيها لحدا
سكرت المحادثة مع كلمة تصبح ع خير
كان جوابي إلها
وانتي من أهلي ياسنفورة 😙

ما سدقت يطلع الصبح وأنا ناطر بشوق ولهفة شو رح يصير ..
نمت وبخيالي حب وعشق
فقت الصبح بكير ولبست وجهزت حالي ولسا الساعة ما صارت 7
نطرت ع مفرق بيتها وستنيت لحتى تبعتلي رسالة إنها طالعة برات البيت ..
الساعه 9 بعتتلي رسالة أنها جاهزة وطالعة برات البيت .
أنا نسيت الوقت وستنيت تجي لعندي ونطلع سوا
طلعت من البيت و إجت ناحيتي كانت ملاك ماشي شعراتا عم يطيرو ع خطواتا وريحة عطرها وصلت لعندي كانت متل الملاك ..
أنا بهاللحظة نسيت كلشي نسيت أنو لازم صبح عليها نسيت أنو لازم مد أيدي وصافحا
وأنا شارد فيها وهي صارت قدامي
ما عرفت شو احكي و شو بدي اتصرف
تلخبطت من ابتسامتها ومن جمالها
صارت قدامي وبكل نعومة قالت : صباح الخير
دخل صوتها ع قلبي بطريقة خلتني انسى أنا ليش واقف هون وشو لازم اتصرف
رديت : صباح الورد صباح الجمال صباح الرواق صباح الفل 😍
ضحكت وقالت :شو مطول الصباح عندك؟؟
ابتسمت وقلت : معقول شوف الملاك قدامي وما قدم صباح يليق فيه
مشينا وطلعنا بسيارة نحنا وبالسيارة حكينا وين بدنا نروح
اتفقنا آخر شي نروح ع مكان هادي طبيعة وخضار وشجر وهيك يعني
رحنا ع المكان المقصود وصلنا وقعدنا لحالنا جنب شجرة

#استبدلت_العالم_بك_لماذا_خذلتني 💔
#الجزء_الثاني :
#بقلم_سما_الشام

ضحكنا وتسلينا و أكلنا وشربنا ومرق الوقت بسرعة وصار لازم نمشي
قبل ما نمشي قالت شو رأيك نكتب أسامينا ع الشجرة يلي كنا قاعدين جنبها؟
قلتلها : اكيد فوراً
وكتبت اسمي واسمها والتاريخ مع قلب صغير ..
ومشينا ونحنا ماسكين إيدين بعض وعم نطلع بعيون بعض .. رحنا عالسوق وصرنا نفتل مرق الوقت بسرعة ما تمنيت هاليوم يخلص بحياتو
وصلنا عالكراج وركبنا سيارة ورحنا عالبيت .
أنا ماسك إيدها وحاططها ع صدري وكل ما تشيل نظرها عني ارفع إيدها وبوسها
وهي تقلي : لك عيب هلق بشوفونا العالم يلي جنبنا
وأنا قلها : هاد اليوم بيخصني إلي وما حدا دخلو 😌
وهي تخجل وتقلي : أي لشوف آخرتها معك وتبتسم
وصلنا عالبيت ما كنت انزل قدامها ضليت حدها لحتى وصلنا لجنب بيتها
قالتلي : لا تنزل معي انزل بعدي مشان أهلي.
قلتها : أكيد هيك بدي ساوي
هي ونازلة أنا ما تركت إيدها ضليت ماسكها وسحبت إيدها بهدوء كبير وكأنو عم تقلي لا تترك إيدي .. نزلت وأنا بعدا بشي 50 متر نزلت ورجعت لناحيتها
كانت الدنيا ليل وهي فوراً فاتت عالبيت .
وانا صرت اتمشى ع مهلي من قدام بيتها لحتى بعتتلي رسالة
قالت : مشي الحال ما حدا سألني شي
هي بالعادة بتتأخر لأنو بعد الجامعة أحياناً كانت تشتغل بمحل خياطة و تتأخر لهيك ما حدا انتبه
رجعت أنا عالبيت و كالعادة عالسريع مسكت هاتفي وفتحت واتس بس هالمرة غير ..
صرت ابعت كلام غزل وحب وشغلات كتير بتدل ع العشق ..
أنا وعم راسلها فتحت هي
وبعتتلي : روق روق شو هاد يلي باعتو؟؟
أنا وقفت بطلت اكتب شي ..
قالت : اليوم عيد ميلادك وخلص هي متل ما حبيت يكون يومك مميز وكان مميز ..
كتبتلها : بس أنا بحبك

قالت : أنا بعرف إنك بتحبني بس أنا ما عم فكر ارتبط واليوم قبلت هالشي منك لانو عندك مناسبة وأنا ما حبيت خرب عليك هاليوم ..
قلتلا : انتي في بحياتك حدا ؟؟
قالت : لا أنا ما عم فكر بهالموضوع عندي دراستي هلق أهم ..
وهيك صار ..
ضلينا هيك حوالي شهر ونص ع نفس الروتين ..
كل يوم بنهار شوفها وبالليل نحكي واتس ..
أنا ما تراجعت وكل يوم قلها بحبك ..
بيوم كان مطر و غيم ورعد وبرد كتير ..
حاكيتها كانت بالبيت ..
عالواتس قلتلها :كيفك؟
قالت : تمام ..
قلت : شوعم تساوي وكيف البرد معك؟؟
قالت : برد كتير وأنا هلق عم ادرس ..
قلت : شو مشان أنو انا بحبك وبحبك كتير أيمت انتي بدك تبادليني نفس الشعور؟؟؟
قالت : هلق ..
انا تلخبطت قلت : شوو!! كيف؟!
شو شو شو قلتي عيدي عيدي شو قلتي؟!!
قالت : وأنا بحبك
هون انا تركت الهاتف وبلشت نط من الفرح واعمل حركات بتضحك إرجع إمسك الهاتف و اتأكد من الكلمة يلي قريتها وارجع نط وجن وصفق 😂
دقيتلها فوراً
ألووو
#تهاني: نعم
#سامي : حبيبي أنا بموت فيكي أنا بعشقك أنتي حياتي وعمري وروحي
#تهاني : وأنا بحبك
#سامي : يا الله ما أجمل هالكلمة طالعة من تمك متل العسل
#تهاني : أنا بحبك بس في شغلات كانت عم تخليني ارفض هالعلاقة ..
بس بعد ما عرفتك مضبوط وفهمتك أمنتلك وعرفت إنك بتستحق قلبي ومستحيل تغدر فيني .
#سامي : أنا مستحيل اغدرك أو اتخلى عنك رح ابقى حدك ومعك وكون سندك ونشالله ما بقصر شي من ناحيتك ..

بس انتي خليكي معي وكوني إلي وأنا جبل صامد إلك بس حبيبي بحسن أعرف وجعك وشو السبب أنك أخدتي كل هالوقت لحتى قبلتيني بحياتك؟؟
حبيبي نحنا روح وحدي وقلب واحد
حكيلي ولا تخبي شي بقلبك ..
قالتلي : معلش نأجل هالموضوع لبعدين
قلت : أي أكيد حبيبي متل ما بدك ..
حكينا شوي وبعدا قالت : حبيبي أنا بدي سكر مشان كمل دراستي معلش؟!
قلت : أكيد حبيبي أكيد ..
وسكرت من هون وفتحت عالواتس من هون وفوراً حطيت صورتها ع بروفايلي ..
بعتلها رسالة وقلتلها :حبيبي شوفي شو حطيت صورة عالواتس ..
فتحت و دقتلي فوراً
قالت : مشان الله شيلها ما بدي حدا يشوفها إذا سمحت شيلها
فوراً شيلها
حاكتني بعصبية أنا توترت فيها وشلتها فوراً ما عرفت السبب وغضيت النظر عن الموضوع بالوقت الحالي ..
مرت أيام ونحنا كل يوم عم يزيد حبنا عن يوم ..
كل ما حاول ارجع افتح الموضوع تقلي بعدين ..
وأنا غرقت بحبا وعشقتا بجنون ..
صارت أساس بحياتي وأول أولوياتي ..

فكر فيها ع مدار الساعة ..
التهيت عن كلشي وصارت أيامي محسوبة ع قربي منها وتعلقي فيها لا شغل ولا نوم ولا سهر ولا أهل ولا رفقات صارت هي كلشي كلشي ..
مر وقت منيح ونحنا ع نفس الحب وكل مانو عم يزيد من ناحيتي أنا ..
أما من ناحيتها وقف وما حسيت فيه ولا خلتني اشعر بهالشي ..
كنت اتحمل أغلاطها بس ما انتبه ولا دقق ع السبب وقول معلش ضغط دراسة ..
ل مرة تخانقنا مشان موضوع كتير صغير ..
موضوع شغلها بالمشغل ..
وهون اضطريت آخد موقف واحكي بشخصيتي يلي كنت عادمها قدامها وماني محسسها بهالشي أبداً ..
تفاتشنا وتحدثنا بالموضوع ..
وفجأة صارت تبكي ..
أنا اهتز كياني لما شفت دموعها ولمت حالي ألف مرة لأني كنت سبب بهالشي .
لما طلبت منها ت