#الحاسة_رقم_سبعة_قصص
@rwayate
الحلقة الثانية
يوم الجمعة مضى بهدوء وضليت طول الوقت نايم .. والسبت نفس الشي.. وماصار شي من اللي حسيته وقلت مش معقول يكون إحساسي غلط .. صبرت ليوم الأحد للكل راح على جامعته ومدرسته وحتى ما يكون في حدا بالبيت غيري وغير ماما واختي الصغيرة هبه .. قلت لازم أكتشف الشيء اللي ورا التلاجة .. واللي صار غريب كتير .. تكسر كل شي فوقها وجنب الرفوف عشان يصحوا خواني وما أقدر أشوف شو اللي ورا المكان .. صباح يوم الأحد كنت صاحي من وجه الفجر وكانو خواني عم بلبسو.. اغراض البيت كلها ترتبت وما ضل في كركبة والبيت نظيف وكل شي تمام.. اتطلعت من الشباك شفت نفس الكلب الأسود بنفس المكان وعم بتطلع عليه.. ما كنت بحب اشوف الكلاب لأنهم بشائموني بطريقة مش طبيعية.. طلعوا كل خواني من البيت وبابا وصلهم .. ضليت انا واختي الصغيرة وماما.. لبست نظاراتي ونزلت فوراً للمطبخ.. شافتني ماما حكتلي ليش صاحي بكير حبيبي !؟ حكيتلها عطشت وبدي أشرب.. وقفت بنفس المكان واتطلعت على الحيط اللي ورا ماشفت شي.. لمسته ما حسيت بالشعور اللي حسيته أول مرة .. الحيط بلوك ومش متل ملمس الفلين والوضع طبيعي جداً .. نصدمت وقلت مش معقول يوم الخميس كان بتهيألي !!؟ والشي كله مجرد خيال !؟ اجت عليه ماما عم بتلمس بالحيط ووجهي ما بتفسر حكتلي اسم الله عليك حبيبي خير شو في؟؟ حكيتلها ولا شي وقع مني شي ورا التلاجة ومش لاقيه.. حكتلي شو هوه .. حكيتلها خاتم صغير.. حكتلي اه في خاتم فضة أسود لقيته ورا التلاجة مبارح وأنا بكنس وبنظف مع خواتك وسألت أبوك وأخوك غسان اذا الخاتم إلهم حكوا لأ.. استنى اجبلك ياه حبيبي.. طبعاً جابت الخاتم وفرجتني ياه .. الخاتم ما كان إلي أبداً .. وكنت أول مرة بشوفه بس كيف الشي صار هيك فجأة وطلعت من الموضوع وكأني ماكذبت!! اخدت الخاتم وحسيت حالي متل كأني شايفه قبل مرة !؟ بس وين ماعرفت .. حاولت أتذكر .. طلعت على غرفتي وطلعت الصورة اللي لقيتها ورا التلاجة كان الولد اللي بالصورة لابس نفس الخاتم أو هوه الخاتم بالذات !!. حكيت مش طبيعي اللي صار .. تناسيت الموضوع وبعد دقايق دق جرس البيت.. حسيت وقتها انه رح يصير شي .. حاستي السادسة إشتغلت بدقة الجرس.. سمعت ماما بتأهل وبتسهل بحدا وبتحكيله تفضل عنا.. حملت حالي ونزلت أشوف مين .. كانت مرة بنفس عمر ماما لابسه طاقية وجكيت أسود طويل صوف.. ماما مابتعرفها بس فيها عادة انها بتوخد على الناس بسرعه وبصيرو صحابها لأنها اجتماعية وحتى لو هيه مابتعرف مين همه.. أنا مابوثق بأي إنسان ولأنه نحنا بمنطقة جديدة وبعيدة عن منطقتنا ما كان بدي لأهلي يأمنو لأي بني أدم.. نزلت قعدت معهم .. كانت المرة بتحكي أنا كنت صاحبة للمرة اللي ساكنه عندكم وبصراحه كنا متل الخوات وعز عليه انهم رحلو من البيت.. حكيتلها احكيلي عنهم منيح.. حكتلي شو أحكيلك يا ابني.. ناس أكابر كل الحي كان يحلف فيهم وبإحترامهم.. حكيتلها كان عندهم ولد صغير ؟؟ حكتلي اه كان عندهم ولد إسمه إسماعيل.. كتكوت وبجنن بس كان شقي يا ابني كتير.. حكيتلها طيب كيف ملامحه.. ماكنت وقتها حابب اجيب الصورة .. كان في جواتي شي وإحساس قوي بحكيلي انه في شي غامض جوا هالبيت وكان عندي متل لغز وبدي أحله .. وجية هالمرة كانت غريبة كتير وفيها كتير ألغاز.. حكتلي الولد ناصح شوي واله خدود وشعره خشن .. كانت المواصفات نفس الي بالصورة تماماً.. وقتها عرفت انه كلامها صحيح .. حكيتلها طيب انتي وين كنتي ساكنة يعني قريب من هون ؟ حكتلي اه يا ابني انا البيت اللي جنبكم بالزبط.. حكتلها امي لعاد رح تسمحيلنا بزياة تانية.. حكتلها طبعاً اهلا وميت سهلا فيكم .. وقتها كانت امي عم تحكي معها بمواضيع ما الها دخل بأهل البيت .. عن أسعار الخضرة وطلعاتها وفوتاتها بالبيت وشو بشتغل زوجها .. بس انا كان بدي اعرف تفاصيل اكتر عن الناس اللي سكنو بالبيت.. حكيتلها احكيلي شو كان يشتغل صاحب البيت.. حكتلي أبو إسماعيل كان بالجيش وتقاعد بعدين ورجع عند إبنه وبنته .. حكيتلها كان عندهم بنت ؟ حكت اه اسمها ريماس بتجنن وقمر .. وفجأة المرة صارت تطلب من أمي تفرجيها البيت .. حكتلها امي طبعاً رح افرجيكي كيف رتبناه وكيف صار العفش.. طلعتها على غرفنا وصارت تفرجيها بكل مكان .. أنا طلعت معهم وامي حكتلي مالك لاحقنا يا إحسان روح شوف اختك هبه شو بتعمل.. إحساسي كان بحكيلي لازم أضل !! .. عملت حالي نزلت عن الدرج وطلعت مرة تانية.. كانت بتحكيلها المرة جيبلي كاسة مي لو سمحتي طقطق حلقي من طلعة الدرج .. نزلت ماما للمطبخ وأنا دخلت على غرفتي حتى مايشوفوني.. طلعت من غرفتي وصرت اتطلع على المرة من طرف الباب وأشوفها شو بتعمل بغرفة خواتي.. كانت بتطلع على صورة أختي هديل وحطت إيدها على البرواز .. وصورة تانية معلقة على الحيط وحطت إيدها عليها .. ورفعت الفرشة اللي تحت التخت ورمت عليها شي .. كان غبرة أو تراب ما قدرت اشوف من نظري ما ركزت بالشي اللي عملته منيح ..

#الحاسة_رقم_سبعة_قصص
#الحاسة_رقم_سبعة_1
(( @rwayate ))
الحلقة الأولى
الخميس كان اليوم اللي وصلنا فيه على البيت الجديد.. ومن الوقت هاد وعيوني ماعاد شفت فيهم منيح.. حسيت المكان اللي احنا فيه بديق الخلق وروحي بتطلع كل ما بنكون فيه.. حكيت لأمي لأنها منبع اسراري وبتفهمني هيه بس .. أنا كتير تعبان يا امي مو قادر اتحمل سكنتنا بالبيت ..حكتلي ياحبيبي والدك اشتراه بمبلغ وقدره ومستحيل نقدر نبعد من هون .. هاد حزن جواتك عشان فارقت البيت اللي عشت فيه طفولتك انت وخوانك وانتو صغار .. لهيك عازز عليك وحاس بحرقة من جواتك.. كان عندي حاسة سادسة لكل شي ممكن يصير أو ممكن انه يصير.. هالاشي كان من طفولتي بس ماكان حدا يصدقني انه فيوم ممكن أحس بشغلة قبل ماتصير وتصير.. هالشي خوفني من حالي ولما كبرت ووعيت خفّت هالأمور وانه يصير شي اكون عارف فيه من قبل وشايفه بذاكرتي.. ولأنهم خواني كذبوني بكتير شغلات وبس تصير يحكولي بمحظ الصدفة بطلت احكي شي الهم وقررت اضل ساكت .. ولو فيوم حسيت شي ما احكي لحدا عنه .. اسمي إحسان بعمري ماغلطت على حدا ولا حدا غلط عليه .. انسان طموح وعنده أحلام وبنفس الوقت بخاف من المستقبل واحساسي تجاه الأشياء كتير قوي.. بخليني أخاف من حالي لدرجة لا توصف.. عندي 9 أخوة غيري .. هديل و شذى وأفنان ودعاء وتغريد وغسان وفريد وسعد وهبه .. هديل أكبر وحدة فينا وبتشتغل فبنك أنا واخوي غسان اكبر مني بسنة وبشتغل بشركة سيارات وأنا اصغر منه بسنة وعمري 23 وتخرجت بس ما اشتغلت لأنه ماحدا رضي يشغلني بسبب المرض اللي بعيوني أني مابشوف منيح .. أما شذى توجيهي وأفنان سنة أولى جامعه هندسة .. والباقين بالمدارس من الصف العاشر للثاني.. والصغيرة هبه بالروضه.. حاولت أتأقلم عالبيت بس ماقدرت ارتاح فيه .. خواني كانو مقسمين الغرف من قبل ما ادخل عندهم وأنا ماكان عندي مجال اختار لأنه دايماً هاضمين حقوقي ومابقدر احكي بس امي بتوقف جنبي.. هديل عصبية وكل شي بتحكيه بده يمشي عالكل لأنها اكبر وحدة فينا وهاد الشي مخلي اخوي غسان كمان يحسبلها حساب لأنه شخصيتها قوية.. اعطوني غرفة بعيدة بآخر الممر اللي بالبيت وكانت صغيرة شوي وباردة ومع الجو حسيت بخنقة فيها أكتر وماعدت اقدرت اتحمل البيت والازعاج اللي فيه.. حكيت لأمي الغرفة كتير باردة ومارح اقدر اتحملها .. صارت تصرخ هديل عليه وتحكيلي بكفي دلع يا إحسان كل شي مابدك ياه لازم تحكي لماما وتشكيلها عشان توخد اللي بدك ياه وغرفتي مارح اعطيك ياها لو شو ماصار.. حكيتلها مابدي منك شي ومش قصدي عن غرفتك بس تعي شوفي الغرفة عندي كيف باردة وسقفها مهرهر.. دخلت امي عالغرفة وحستها فعلاً باردة حكت لازم نشوفلك غرفة تانية.. صارت تدور عكل الغرف كانو خواني مقسمينهم كلهم وحتى الصغار متفقين على غرفة كبيرة ومجهزين غراضهم فيها وحاجزينها .. ماكان عندي خيار تاني وماقدرت اعرف شو بدي اعمل.. سكرت عحالي الباب ونمت عالتخت المهرهر كمان .. بعد شوي اجت امي حاملة بطانيات وسجادة وفرشتلي الغرفة وحطتلي مخدات .. ودفتني حكيتلها بدي انام عيوني بوجعوني وياريت تحكيلهم يخففو صوتهم وبكفي عم بتخانقو.. كانو خواني بتقاتلو عكل شي وصوتهم واصل لآخر الحي التاني.. برغم البيت كبير والمنطقة اللي فيه هادية والحي كأنه مافي ناس بتسكنه واستغربت من البيت .. يعني كبير وفي مداخل ووسيع وبمنطقة هادية وبمبلغ رخيص !! .. يا انه المبلغ جد رخيص او البيت ماحدا راضي يشتريه يا أما بابا حكالنا انه رخيص بس هوه فعلاً غالي.. بس هوه كان دايماً يشتكي من الديون وحتى أقساط جامعاتنا كانت تغلبه.. طيب كيف هيك جاب المصاري للبيت .؟ فكرت كتير ومالقيت جواب.. بعد ساعه سمعت صوت بابا بفتح الباب من تحت كانت غرفتي تحتها باب البيت مباشرة وبسمع صوت الدعسات لو كانت خفيفة لأنه فوق تختي في شباك شفاف وعريض وبحس حالي شايف الشارع وكل شي.. وصل بابا وجاب أكل وكانت ماما وخواتي بشطفو بالأرض والدرج وبنضفو بالغرف وصوتهم كلهم عم بتخانقو.. بابا من النوع اللي مابحب الإزعاج وبمجرد مايسمع صوت واحد بنزعج فوراً ومرات بهدى فوراً .. ماكان بدي اكول لأني مخنوق من البيت ومش قادر اتحمله.. عملت حالي نايم ودخلت عليه ماما تناديني شافتني نايم.. وسمعتهم عم بياكلو بصوت عالي وصوت الصحون لعندي.. جعت وفتحت الباب كان الكل تحت .. تفقدت كل غرف البيت وأنا ماشي ومابدي حدا يسمع صوت رجلي لأنه الطابق السفلي فيه غرفة الجلوس والمطبخ والحمامات وفوق كله غرف نوم وضيوف.. مالقيت راحه بالبيت أبداً وصرت أحس انه في ناس غريبين كانو ساكنين البيت من قبلنا ورح يرجعو مرة تانية.. اجاني هالإحساس بس كيف يرجعو الناس والبيت ملك ألنا؟ ماعجبني الوضع أبداً وحتى الحيطان كانت بتحكي قصص كتير لهدول الناس اللي كانو ساكنين البيت.. كإنها شهدت على لحظات من حياتهم صعبة أو سيئة أو حلوة !! .. كنت كل ما اتطلع على حيط أحس انه في قصة صايرة بكل غرفة من هالغرف ..

#الحاسة_رقم_سبعة_قصص
@rwayate
الحلقة السابعة
تركت أمي وهديل بالمطبخ وحكيتلهم خليكم حتى أطلع أشوف مين في فوق.. أخدت معي سكين من المطبخ وامي خافت وصارت تحكيلي دير بالك عحالك أنا خايفة.. قلتلها لا تخافي.. حكتلي إتطلع منيح عشان نظرك الخفيف.. طلعت لفوق وحسيت في صوت بغرفة البنات.. مشيت شوي شوي.. وبدون ما أطلع أي صوت.. مسكت السكينة لأدافع عن نفسي في حال طلعلي حدا بوجهي.. فتحت الباب بأقصى قوة.. ما لقيت حدا.. دخلت صرت أفتش بكل مكان بالغرفة.. بالخزاين ورا الستاير تحت التخوت.. مافي حدا!! .. خفت وأنا عم بدور يلتهي وينزل أو يهرب كونه مافي حدا بالبيت أبداً.. أو يكون متخبي بغرفة تانية.. طلعت بسرعة من الغرفة .. وتوجهت لغرفتي.. بسبب صغر حجمها ماشفت فيها حدا أبداً.. سكرتها وتوجهت لغرفة ماما وبابا.. فتشتها منيح .. ماكان في حدا.. استغربت.. هديل بتحكي انها شافت الشخص الي تزوجته !! توقعت انها بتهلوس أو من بسبب الصدمة اللي صارت معها صارت عم تحكي هيك.. نزلت فوراً وحكيتلهم مافي حدا فوق.. أنا متأكد دورت بكل مكان مافي أي مخلوق.. حكتلي هديل بس أنا مابهلوس أنا شفته صدقني.. وفجأة إختفى.. قلتلهم معناته اذا مش فوق.. فهوه هون حوالينا !!!!!.. صارت هديل ترجف بقوة وأكتر من الأول وأمي شوي وكان رح يغمى عليها.. قلتلهم إطلعوا فوق بسرعه أنا رح أدور هون وماتخافوا عليه إطلعوا لأنه هبه لحالها فوق وهلأ بتصحى تبكي.. بكفي اللي صار معها .. طلعت ماما وهديل لفوق بركضو.. وضليت أنا لحالي بالمكان .. صرت أتطلع حواليه .. وأدور هون وهون.. فتحت الباب الخارجي واتطلعت برا .. مافي ولا صوت.. لمحت عيني مرة تانية على الكلب الأسود اللي بشوفه قبل ماتصير أي مصيبة بالبيت.. كنت حاسس أنه رح يصير شي لأنه لمحت عيني عليه مرة تانية.. كان عم يعوّي وصوته معبي كل الحي.. سكرت الباب بالمفتاح ورجعت أفتش بكل مكان.. فجأة خطرلي أنه ممكن يكون دخل للمكان اللي ورا الحيط.. صرت احكي مع حالي .. بركي طلعلي الولد الصغير مرة تانية.. حكيت أنت هون؟؟ أنا عم بحكي معك ؟! .. قربت ناحية الحيط .. وفتحت أوله لحتى أدخل بس مش دائماً بكون متل مابدي وبقدر أدخل لهالغرفة الغريبة .. فجأة طلعلي صوت الولد وصار يحكيلي .. بكفي.. بكفي .. بكفي.. حكيت شو قصدك انت هون ؟ رجع عم بكرر نفس الجملة وبحكيلي بكفي بكفي.. قلتله شو يعني بكفي؟؟ شو الي بكفي.. وفجأة اختفى الصوت.. طلعت لماما وصرت احكيلها ماتخافو مافي حدا بالبيت.. هديل ضلت تبكي وتحكي بدي أتطلق ولازم تلاقولي ياه من تحت الأرض لو شو ما صار.. امي كانت منهارة على خواتي اللي ضاعو وخايفة بنفس الوقت يكون في حدا بالبيت .. حكتلنا خلص من بكرا لازم نطلع من هون حتى لو مافي مكان نروحه.. الوضع بطّل يحتمل .. كل واحد عم بصير معاه مصيبة شكل ومش قادرين نعمل اشي.. واختك تزوجها واحد مابنعرف مين هوه بس عشان يهربها.. ليش صار هيك وشو السبب؟! اكيد في سبب لكل هالشي.. هديل حكت نفس الشي .. أنه الشخص ليه ليتزوجها ويتركها؟ وكلام المره اللي اجت عنا طلع صح.. لهيك تخربطنا وبطلنا نعرف شو بدنا نعمل.. ما أجالنا نوم.. وعالفجر كان جاي بابا ومعاه خواتي التلات .. امي صارت تحمد الله وتشكره وسألتهم وين لقيتوهم.. حكالي غسان لقيناهم جايين .. اللي خطفوهم تركوهم وما بنعرف شي عنهم.. ليه ليخطفوهم دام بدهم يتركوهم!! .. هديل بطلت تجمع وصارت تحكي نفس الشي.. اللي خطفني ليه ليتزوجني دام بده يتركني.. والبنات نخطفو وطلعو فوراً.. اللي عم بخطفنا بس بده يخوفنا ما بده يأذينا بس انا نأذيت انه تزوجني وانا مابعرفه.. حكالها بابا ماتخافي حبيبتي .. اللي تزوجك رح نجيبه من تحت الأرض واحمدي الله انه تركك وماصار شي .. يعني بس كان بده يخوفك.. ماما اقنعته نطلع من البيت ونروح لمكان تاني بكرا الصبح بس العفش بالبيت كتير وماصارلنا اقل من شهر ساكنين .. حكالها بابا الطلعة من البيت مابتصير بيوم وليلة بدها وقت ولازم أقل شي أسبوع.. أنا كان عندي احساس انه كان حيحكي هيك.. قلتلهم لازم تعرفو انه طول ما احنا هون رح تستمر المشاكل.. اللي بضرونا مارح يتركونا بسهولة تأكدو عندهم هدف.. طلع الصبح .. بهاللحظة كنت صاحي أول واحد .. نزلت لحتى أفطر.. حسيت بصوت بالبيت وواحد بحكيلي أنا هون.. اتطلعت وراي.. وكتمت صرختي.. شفت واحد شبه بابا بالزبط بإختلاف بسيط بالملامح.. حكيتله مين انت ؟ انت بابا .؟!! .. انا هسه شفته نايم فوق وكلهم نايمين.. يبقى مين انت ؟! ليه بتشبهو هيك.. حكالي أنا أبو الولد الصغير.. حكيتله ليه بشبه بابا؟؟ انت شبهو بالزبط.. جاوبني.. حكالي لسه بكير لتعرف ووقتها رح تقتنع ليه أنا شبه أبوك.. شفته عم بطلّع ناحية الحيط ومصدوم.. قلت شو شاف.؟؟ لفيت راسي مالقيت شي.. رجعت تطلعت عليه لقيته اختفى وراح.. نصدمت وطلعت مرة تانية على غرفنا.. فتحت باب غرفة ماما وبابا لقيتهم نايمين وبابا موجود..

#الحاسة_رقم_سبعة_قصص
@rwayate

الحلقة الثامنة
كنت بحكي مع امي وبحكيلها عن اللي شفته بالمطبخ والولد الصغير اللي حكا عني.. والشخص اللي ظهرلي بالليل شبه بابا.. ولمّا رن التلفون وحكالنا الشخص هاد انه بابا مخطوف نصعقت .. وطلبت مني امي احكي مع اخوي غسان بسرعه.. حكيت معها وحكيتله اللي حكالنا ياه .. اجا من الشركة بسرعه على البيت.. وقاللنا مانطلع ابداً ولا حدا يطلع من البيت.. وصّل بعد ثلث ساعه.. حكيناله شو اللي صار وانه حدا اتصل.. حكالنا اعطوني التلفون بسرعه .. اخد تلفون ماما وطلع الرقم.. للأسف كان الرقم برايفت .. عصّب وصار يضرب كل شي بوجهه .. حكيتله غسان كل اللي بتعمله هاد مارح يفيد.. شوف اختك نخطفت ورجعت سليمة وماعملولها اشي.. بس الحقير هداك تزوجها واحنا مابنعرف كيف صار هيك.. وليه تركها اذا بده يتزوجها ومابنعرف مين هوه .. خواتك نفس الشي.. خطفوهم ورجعوهم سالمين.. ما اظن انهم يأذو أبوك أنا متأكد إنهم رح يطلعوه متل ماطلعو خواتك خلينا نصبر شوي.. حكالي هاد ابوي عارف شو يعني .. زلمة كبير مابتحمل واحنا مابنعرف شو اللي ممكن يصير لهيك لازم نخبر الشرطة وحالاً.. حكيتله الشرطة مارح تفيدنا .. انا متأكد انه كل اللي بصير لعبة أرواح .. اللي بلعبو معنا أرواااااح ميته .. ومافي إلهم وجود.. وحتى اللي تزوج هديل روح.. يعني هيه مش متزوجة رسمياً واللي صار شيء شكلي وما إله وجود بأرض الواقع.. اللي بعملوا هيك بدهم يانا نطلع من البيت وبس.. لأنه انا من شوي كنت بحكي لأمك عن شغلات بشوفها كل يوم بهالبيت بالليل وماكنت بدي أحكي لحدا لأنه ببساطة أبوك مابصدقني وما حدا ممكن يصدق.. واذا كنتوا تكذبوني بسبب حاستي السادسة ولما احكيلكم شي بده يصير.. تحكولي هاد شي كذب وخيال.. لسه مبارح حاكيلكم رح يصير شي اليوم كمان وكنت حاسس هيك.. حكالي غسان انت شو بتشوف؟؟ حكيتله بشوف ولد صغير كل مرة بحكيلي نطلع من البيت وبشوف أبوه بشبه بابا بالزبط قريب من ملامحه ومبارح ظهرلي بالليل وكنت متأكد وحاسس انه رح يصير شي فبابا لهيك حكيت للكل ديرو بالكم على حالكم .. أنا كنت حاسس بس ماحدا بصدقني.. صار يصرخ غسان بكل مكان بالبيت ويحكي لو انتو أرواح وعايشين هون اطلعو واجهوني.. حكيتله هديل قارءة كتير عن الأرواح وكيف الواحد بتصرف معهم وكانت بدها تفيدني المرة الماضية بس نخطفت قبل ماتحكيلي شي.. بعد شوي بس تروّح من الدوام خليها تحكيلنا .. استنينا هديل لروّحت وخواتي التانين روحوا.. قعدت هديل صارت تبكي على بابا وتحكي ليش هيك بعملوا .. حكيتلها مافي داعي تخافي لأنه اللي تزوجك مجرد روح وانتي شفتي بعينك لما شفتيه بالبيت وأنا طلعت دورت بكل مكان وكان مختفي.. هدول مابدهم يتركونا.. ممكن يكونو جد همه عايشين بهالبيت وماتو بسبب حادثة ما واللي كان بعرف عنهم كل شي المرة اللي شفناها بس هيه برضه توفت من شهر.. واحنا سكنّا بيتهم بدون أحم ولا دستور .. أنا متأكد انهم بس بدهم يانا نطلع من البيت ومابدهم أكتر من هيك ولو طلعنا رح يحلّو عنا.. صارت امي تبكي وتحكي كنت بدي احكي لأبوك اليوم خلص نطلع بس هيه نخطف .. حكا غسان أنا طالع ادوّر على بيت واللي بده يصير يصير خلص.. حكيتله هاد هوه وتأكدو انه بابا رح يطلع اليوم المسا أنا هيك حاسس.. امي صدقتني وصارت تحكي كل أحاسيسك صحيحه لهيك رح نستنى.. مر الوقت واحنا قاعدين انا وخواتي وامي بغرفة وحدة ومش حاسين على شي.. وفجأة فتح الباب .. طلعنا نطلع من فوق الدربزين.. شفنا غسان جاي وبحكيلنا مالقيت ولا بيت .. كله غالي وكله فوق طاقتنا .. واحنا مامعنا هيك أجارات.. حكت أمي أنا رح أبيع صيغتي وكل شي المهم نطلع من هون مش مهم أجار .. حكالها مهوه هاد البيت مش مبيوع ومش قادرين نتصرف فيه.. لازم خلص يملكه شخص تاني.. وياخسارة اللي بده يملكه رح ينخدع فيه وينتقل كل شي صار معنا لأله .. صرت احكيلهم هاي المره اللي اجت عنا أول يوم سكنا فيه أم عامر هيه عندها كل السر واكيد هيه اللي بتعرف كل شي.. بس هيه مجرد روح واحنا مش قادرين نكشف شي.. صابنا إحباط .. وبعد ساعه رجع بابا.. شفناه مغبّر ومتوسخ.. ماما هجمت عليه وصارت تبكي وتحكي وين كنت وشو صار معك ؟! حكالنا انه سمّع صوت مره هددته وحكتله نطلع من البيت وماكان سامع شي لأنه خطفوه من الشغل وربطو عيونه واديه وماعرف لوين ودوه وبعد ساعه سمع صوت هالمره وزلمة تاني.. وبعدها حملوه ورموه قريب من البيت.. حكولي كان معك حق واحاسيسك صحيحه ومن وقت هاللحظة صارو يعتمدو عليه بكل شي وقبل مايحسوا انه رح يصير شي يحكولي حاسس شي؟؟ احكيلهم لأ مش حاسس.. ضليت لحالي بالغرفة مهموم وبستنى يطلع الصبح حتى نطلع كلنا ندور على بيت خلص .. بهاللحظة دق بابي .. قلت مين؟؟ طلع غسان بحكيلي بدي احكي معك شوي.. دخل لعندي وصار يحكيلي انه هوه ماحس انه ليه هدول بعملوا معنا هيك .؟ قلتله اكيد عشان البيت أنا متأكد لأنه اللي كانو ساكنين فيه مابدهم يانا ..

#الحاسة_رقم_سبعة_قصص
@rwayate
الحلقة التاسعة
طلع الصبح وكل واحد من خواني راح على مدرسته واللي راح على جامعته.. ضليتني بالبيت مع غسان وهوه ماطلع أبداً.. وامي معنا.. ضلينا بالمطبخ قاعدين حوالين الطاولة وبنتصفن فبعض.. بتحكي أمي وبعدين أنا خايفة عليكم.. حكالها غسان بابا طلع يدوّر على بيت وان شاء الله اليوم حنكون طالعين منه.. وبالنسبة لهالبيت أتصلت مع صاحب إلي وحطينا إعلان بالجريدة إنه ينباع بأقرب وقت بس مكانه كتير صعب وابوكم أخده بسعر رخيص لهيك ماحدا عم بفكر يشتريه.. فجأة أمي صارت تحكي أنا مستعدة أبيع كل صيغتي وكل شي بملكه عشان نشتري بيت جديد بأي منطقة حتى لو كان بيت صغير مابهم.. وطلعت لفوق حتى تجيب صيغتها.. ضليتني مع غسان.. صار يحكيلي شو حاسس؟ حكيتله مش حاسس خير.. انت رح تتأذى اليوم لهيك خليك بالبيت.. حكالي كيف بتحس؟ حكيتله وقت ماكنت احكيلكم عن أحاسيسي ماكنتوا تصدقوني.. كان كل واحد منكم يجرحني ويزعلني ويحكيلي اسكت اسكت.. بس كنت بحس شو حيصير.. كتير شغلات حسيتها بس مارضيت أحكي عنها.. وبس صارت كنت انصدم من جواتي وما استرجي احكيلكم.. لأنه كل واحد فيكم كان ينبذني ويسكتني.. ويعايرني بالمرض اللي ماكان في اله شفى حتى بالمدرسة نفس الشي.. وفجأة سمعنا ماما بتصرخ وانا لسه بكمل كلامي.. طلعنا لنشوفها انا وغسان.. صارت تحكي ذهبي ذهبي !!! مش موجود في حدا سارقه .. حكيتلها مين بده يكون دخل على البيت وحاول يسرقه مين ؟؟؟!!! حكتلي مابعرف لازم نشوف غرف خواتك همه عندهم ذهب كمان .. ولازم ندور عكتير شغلات حتى نتأكد انه جد في حرامي.. صار يحكي غسان لازم نتصل بالشرطة خلص الوضع مابنسكت عليه .. قديش كمية الذهب اللي نسرقت؟؟ صارت تحكيله ماما .. ذهبي كله العلبة كلها أكتر من عشرين اساورة وعقود غالية وكلها ذهب خالص خواتم وسناسيل .. غسان ماسكت وحكا انا طالع على الشرطة .. حكيتله غسان انا نبهتك ماتطلع من البيت !! .. ماتطلع .. وامي حكتله خلص بكفي حرقة دم مابدي يصير فيك اشي رد على اخوك.. بس هوه كان عصبي ودفشني وطلع من البيت للشرطة.. وقفت مع امي وصرت احكيلها تعالي نروح نفتش غرف خواتي أكيد في شي ناقص.. طلعت معها وصرنا نفتش غرف هديل واتصلنا عليها عالبنك وحكينالها وين بتخبي ذهبك ؟ حكت بالخزانة ومن زمان مش لابسه ولا مطلعه شي منهم .. خير في شي؟! حكينالها ماتشغلي بالك وكملي شغلك وبس تخلصي تعالي على البيت .. حكت لأ هلأ بدي اجي اشوف شو في ورح احكي للمدير في امر طارئ .. تعقدت الأمور بالبيت .. مين بده يكون دخل على بيتنا وسرق الذهب .. بهاللحظة رن تلفون البيت.. حكا بابا بحكيلنا لقيت بيت بس طالبين مصاري كتير واليوم حضروا حالكم لنطلع منه بكفي مشاكل لازم نتركه واللي بده يصير يصير.. ماما ماكانت قادرة تحكيله شي لهيك قررت تسكت وحكتله بس تخلص شغل تعال على البيت بسرعه.. هوه خاف وحكا شو في؟ حكتله ماتخاف بس في شغلات نفقدت بالبيت.. وفجأة سكر الخط.. صرت اتناقش مع امي واحكيلها ماما بدي تقتنعي بكلامي.. أنا هلأ حسيت شي ولازم تعرفيه .. حكت احكي بسرعه شو حاسس ؟؟ رح يصير شي سيء ؟؟ حكيتلها مش شي سيء بس حاسس انه اللي سرق الذهب هوه الشخص اللي كان بالبيت مبارح اللي حكت هديل انه تزوجها وهوه اللي خطفها والمره هيه السبب من اليوم اللي رشت فيه شغلات بغرفة البنات بعتت ناس تأذينا .. واللي كلفهم بهالشي همه أهل البيت اللي كانو ساكنين هون .. مابدهم يانا نعيش لهيك بدهم يأذونا ويطلعونا.. وهمه أرواح يا أمي .. لو مارح نطلع من البيت اليوم رح نتأذى كلنا.. ياريت تفهميني.. لازم نطلع بكفي.. حكتلي هلأ بيجي أبوك وبنطلع من البيت وهسه بدي تساعدني عشان نلم غراضنا وغراض خوانك قبل ما يجو من المدرسة ماضل غير ساعه وكلهم بكونوا هون.. حكيتلها فعلاً هاد القرار الصحيح خلص بكفي بس أنا خايف على غسان حكيتله ما يطلع من البيت لأنه رح يصير في شي ومع هيك طلع .. صارت تدعي وتحكي ياري مايصيرلك اشي يا ابني .. بعد نص ساعه بلشو خواني يجو من المدرسة واحد ورا التاني ومش عارفين شو القصة حكيتلهم خلص رح نطلع من البيت.. روحو لمو غراضكم وساعدو امكم.. وانا بلشت الم بالأغراض .. زحت التلاجة وبهاللحظة أجت اختي هبه .. صارت تتطلع عليه وتبكي .. بحكيلها مالك حبيبتي.. ماما اجت عالمطبخ وشافتها بتبكي .. ومبين كإنها خايفة من شي بالمطبخ .. حكتلها من شو خايفة حبيبتي.. بتتطلع عليه وبتبكي .. امي حكت اكيد في شي غريب او البنت شايفة شي غريب.. اتطلعت على امي وحكتلها ماما خايفة .. صفنت فيه امي وحكت البنت رجعتلها الذاكرة .. حكت ماما !!! يعني عرفتني .. حكيتلها الحمدلله الحمدلله اتصلنا على شغل بابا ماكان يرد كنا بدنا نطمنه انه اختي الصغيرة رجعلتها الذاكرة.. بس ضلت تبكي وتبكي وماعرفنا نهديها وماما فرحانه انه رجعتلها الذاكرة وأخيراً بس من شو خايفة مابنعرف.. خواني كانو يلمو غراضهم وأنا بالمطبخ بتأمل بالمكان اللي بطلعلي فيه الولد الصغير ..

#الحاسة_رقم_سبعة_قصص
@rwayate
الحلقة الأخيرة
فتحت عيوني.. إتطلعت حواليه وكانت آخر لحظة متذكرها وأنا بحكي بالتلفون وبعدها حدا ضربني على راسي بعصاية.. أول حدا شفته أمي بتبكي وبتطلع عليه وأخوي غسان جنبها ومعه شرطه وهديل جنبه وبابا وخواني الصغار وكلهم بتطلعوا عليه وأنا بحالة صدمة وماكنت عارف شو بدي أرد.. صرت أحكي لماما احكيلي شو في؟ شو اللي صار ؟ ليه كلكم بتطلعوا عليه هيك..؟ مين اللي ضربني على راسي؟ مالكم إحكوا ؟ ضلت ماما تبكي وأول كلمة سمعتها من الشرطي صار يحكي لبابا رح تشتكوا عليه ؟ إتطلعت عليهم وماكنت قادر أقوم من ألم الضربه ..بعدها صار يحكي غسان .. اه بدنا نشتكي عليه هالحقير الواطي والسجن قليل عليه.. وقتها عرفت شو اللي صار.. حكيتلهم شكلها اللعبة خلصت خلص.. برغم أنها خلصت بكير بس قبل ما يوخدوني لازم أحكي اللي عندي.. بسنة ال69 كان عمري سبع سنين.. بهاليوم كنت جوعان وماكنت قادر احكي لأنك كنتي متزاعلة انتي وبابا وكنتوا تصرخوا وخواني كانو خايفين.. رحت عالمطبخ لأكول حاولت أنزل الطنجرة عن الغاز ماقدرت .. وبسبب ضعف نظري اللي خلق معي غصب عني من وأنا صغير وقعت الطنجرة على راسي أكيد كلكم متذكرين هاليوم.. وبدل ما تخافوا عليه صرتو تسبوني وتغلطوا إني ماحكيت إلكم إني جوعان وتصرفت من راسي.. شتمتوني وحكيتولي واحد أعمى وبسبب خناقتكم مع بعض تأثروا عيوني أكتر وزاد المرض معي بزيادة.. وإنت صرت تضربني بالسيارة برغم إنه مش ذنبي إني جعت وخفت أحكيلكم.. ومش ذنبي بهاليوم إني خفت تجرحوني وتحكولي واحد أعمى ومابتشوف .. بس انا كنت بشوف وبحس كل شي حواليه وبعرف اللي بصير.. كنت بعرف إنكم كنتوا تحكوا عني بالغرفة وتفكروني مابسمعكم ياريته ما أجا عالدنيا .. وليش؟ لأني كلفتكم كتير على مرضي اللي ما أله دوا واللي أنا ما إلي دخل فيه.. ومرت الأيام وبلشت أحقد عليكم أكتر.. على كل حدا فيكم جرحني ..عليكي ياهديل يلي كنتي تحسسيني عطول إنك أحسن مني بدراستك وانك تفوقتي وأنا لأ وصرتي تشتغلي وأنا لأ وكبرتي وبعدك بتجرحيني.. كل واحد فيكم كان اناني أكتر من التاني وانت يا غسان بدال ماتدافع عني كنت تزيدني عجز وجرح وتوقف مع أبوك وتحسسه أنك أحسن مني وإنك إنت بتعيله وبتوقف جنبه وانا عالة.. دخلت المدرسة وحتى الطلاب كانوا يشتموني ويستغلوا ضعف نظري حتى يتسلوا عليه ويضربوني بأوقات الفراغ.. ولما يحكيلي المدير ليه ماتخبر ولي أمرك أسكت.. لأني ببساطة ما بقدر احكيلك هيك شي ورح تحملني سبب ألمي لإلي وتجرحني قدامهم بحجة أنه ضعف الشخصية مادخله بضعف النظر .. ولازم أكون متل أخوي غسان زلمة وأدافع عن حالي عطول ولهيك أخوي شاف حاله عليه أكتر.. بس كان في شخص واحد يخفف عليه ألمي وحزني .. إسمه عامر.. كان طالب معي بالمدرسة وضل معي للثانوية.. ولما انتقلنا على البيت الجديد اكتشفت إنه بيتهم جنبنا ..رحت زرته وكان بعرف كل شي عني وكل شي بصير معي وظلمكم لإلي.. حكيتله إني حاقد عليكم وبدي أنتقم من كل لحظة سيئة عيشتوني ياها مع نفسي.. سمعتني أمه وصارت تحكيلي إني مستعدة أساعدك أنا رح اخلي عيلتك يندموا على كل لحظة سيئة عشتها لأني بعرف كل شي عنك وأبني كان يحكيلي.. وقتها رتبت معها موعد وقلتلها تعالي زورينا بكرا تاني يوم إلنا بالبيت الجديد.. أجت الصبح وحكت مع أمي وعملت حالها بتعرف سكان هالبيت وأنا حكيتلها رح أحكي لأمي انك دخلتي غرفة خواتي ورشيتي شي على الفرشات حتى أخدعهم وأحكي اللي رح يصير شيء سيء وإنتقام بسبب السكان اللي كانوا بالبيت أو أرواحهم وبما انهم بعرفوا من زمان انه عندي حاسة سادسة رح أخليها سابعه وتكون السابعة خدعة إنتقام مني لإلهم.. إتفقت مع المره إنه تحكي وين بيتها حتى أروح أنا وأمي تاني يوم بعد ما انكش غرفة هديل وأوهمكم إنه نكشتها لأكشف الشي اللي رشته بس أنا نكشتها عشان أسرق ذهبها لأعطيه لهالمرة اللي طلبت مني وعرفتني على شخص تاني قريبها ليساعدني وهوه اللي رح يتولى شغلة الخطف لأنتقم منكم كلكلم.. وبس رحنا على بيتها خليت إبنها صاحبي عامر يحكيلكم إنها ماتت حتى تتوهموا وتدخلوا بجو الرعب الي حطيتكم فيه وأرعب وأخوف قلوبكم زي ماخوفتوني وظلمتوني وأنا صغير.. وبعد بكم يوم حكيت لصاحبي يطلع من البيت ويختفي لحد ماتخلص القصة.. عرفتني على هاد الشخص بس للأسف طلع شخص مادي وكل شوي بطلب مني مصاري ولا رح يفضح القصة لأهلي .. وبعد ماخطف هديل وحكيتله إنك فهمها انك بدك تتزوجها عشان تندم من جواتها وتخاف.. طلب مني مصاري أكتر بس ماكنت قادر اعطيه لأنه ماضل معي ..ضل يهددني وأجا على بيتنا ودخل على البيت ليسرق وبهاللحظة شافته هديل وصرخت لما كانو خواتي الصغار مخطوفين وغسان وبابا مش بالبيت .. ولما طلبت منهم يطلعوا فوق كنت بتفاهم معاه وبهربه من البيت ووعدته أعطيه مصاري أو ذهب تاني يوم .. وسرقت ذهب ماما بس أنا ماكان بدي أأذيها لأني بعرف إنها بتحبني وما بأيدها إشي تعمله وكل اللي كان بدي ياه أخليه يتمم القصة على خير مع أم صاحبي..

#الحاسة_رقم_سبعة_قصص
#الحاسة_رقم_سبعة_3 #الحاسة_رقم_سبعة
@rwayate
الحلقة الثالثة
ما عدت اوثق بأي شخص بحياتي مين ما كان يكون .. بعد ما سمعت كلام صعب من عيلتي والكل بعلق أغلاطي على المشكلة اللي بعاني منها في نظري.. وبالآخر اتهموني أني سرقت أختي بس الغباء الأكبر كان مني أني اعترفت بهالشي بس ماقدرت وقتها أحكي عن المره اللي دخلت بيتنا واللي أمنتلها ماما وخلتها تدخل على غرفنا ورشت شي على التخوت وخرمشت بإيدها على الصور اللي على الحيط.. كل واحد بالعيلة صار يطلع عليه بطريقة سيئة أني حاولت أسرق وأني مش عارف اشتغل حتى خواني الصغار.. تاني يوم الصبح وبعد ماطلعو خواني على المدرسة وخواني الكبار على جامعاتهم وشغلهم .. حكيت لماما خلينا نروح نزور المرة اللي أجت زيارة لعنا .. خلينا نعرف مين هيه .. وقتها سألتني شو بهمك لتعرف مين هيه ؟؟؟ حكيتلها إحساسي بحكيلي أنه في شي سر وراها.. حكتلي أنت دائماً بتحكيلنا إحساسك وبطلع غلط .. بس أنا وعدتها بزيارة وهيه حكتلي وين ساكنه ووصفتني البيت .. حكيتلها شو إسمها؟؟ حكتلي ميرفت أم عامر.. حكيتلها طيب بعد شوي خلينا نروح ندور عليها.. لبست وطلعت معها ومعنا اختي هبه الصغيرة.. وصلنا المكان اللي وصفتنا عليه وعنفس البيت بالزبط.. كان في برا ولد صغير بلعب حكيتله وين ماما.. دخل وصار يبكي .. طقينا جرس الباب طلعتلنا الخدامة .. حكينالها وين المدام؟؟ حكت أي مدام ؟ حكيتلها مافي حدا نحكي معاه هون .؟ دخلنا على البيت طلعلنا شب بعمري .. لسه قبل ما أسأله عن أمه شفت صورة معلقة بغرفة القعدة لنفس المرة اللي اجت عنا وعليها شريطة سودة من جنب .. توفت !!! .. سألته أمك توفت ؟ حكالي اه من شهر تقريباً.. حكيتله شهر ؟! كيف شهر ؟! مبارح أمك أجت لعنا .. حكالي انت بتهلوس وين أجت ؟! أمي بهالوقت صار رح يغمى عليها وجابلنا الولد ميه شربناها .. سألته شو اسمه حكا عامر.. قلي أمي متوفية من شهر حكيتله طيب كيف؟ حكالي انت شكلك مضيع او مشبه .. قلت إحساسي بمحله أكيد في شي صار كيف توفت من شهر وهيه اجت عنا مبارح ؟ حكالي كيف شكلها حكيتله هاي المرة اللي بالصورة هيه اللي اجت عنا .. اتهمني بالجنون وحكالي نحنا مش متحملين لسه مش متعودين على فقدانها ومع السلامة.. طلعنا أنا وأمي من البيت وعلى وجهنا علامات استفهام وقتها ماكنا عارفين شو اللي صار بالزبط.. حكتلي ماما مش مصدقة كيف هيك لعاد مين اللي اجنا عنا مبارح .. يعني ياهدول بكزبو علينا يا أنه اللي اجت عنا اعوذ بالله.. بس كيف حكينا مع روحها ؟ وشو غرضها لتيجي عنا .. شو بدهم يا امي انا خايفة.. حكيتلها امي انا من أول ما اجيت على البيت وحاسس رح يصير اشي وانتي بتكذبي احساسي .. أنتي لما نزلتي تجيبيلها مي كانت بترش اشي على تخوت خواتي وخرمشت بأصابعها على الصورة.. وانا ما كنت بدي اسرق كنت بفتش على الشي اللي حطته تحت الفرشات .. بس اجت هديل واتهمتني بالسرقة وخبرت بابا ولو نحكيلهم على الشي اللي صار ماحدا رح يصدقنا.. لهيك انا سكتت .. حكتلي طيب خلص يا ابني أنا وياك رح نكشف الموضوع اللي صار بس ما تخبر خوانك ماحدا منهم رح يصدقك وماحدا شاف المرة غيرنا وانت بتعرف العيلة بكذبو كل شي ..لازم نعرف شو اللي صار.. روحنا على البيت وصرنا نشوف الأماكن اللي قعدت فيها .. امي كبت فرشات خواتي ورمتهم برا البيت .. وحاولت تحرقهم كمان.. وكبينا كل الفناجين اللي شربت فيهم.. ومسحنا كل مكان دعست عليه.. بس ماكنا بنعرف شو حنستفيد لو عملنا هيك لأنه مش عارفين شو اللي صار!!.. رن التلفون فجأة رحت أرد طلعلي واحد بحكيلي هون بيت أبو غسان حكيتله اه تفضل حكالي إسمعني.. لازم تعرف إنه في ناس عايشين معكم بالبيت وأنا واحد منهم.. وسكر الخط!! وقتها نشفت رعبة وصرت أحس إنه الشي اللي صار ورا الثلاجة مش من قليل.. مارضيت احكي لأمي مين على الخط وشو حكا.. صرت احكيلها واحد غلطان حكتلي كيف غلطان وحكالك بيت أبو غسان.. ماتخبي عليه واحكي.. حكيتلها مابخبي يا امي بس ناس تانين مش إحنا يعني مافي غيرنا بيت أبو غسان.. مين الناس اللي عايشين معنا ؟؟ شو الي عم بصير؟؟ والمرة اللي اجت عنا طلعت ميته.. حكيت لأمي إحنا لازم نقنع بابا انه نرجع نطلع من هالبيت.. صدقيني إحساسي قوي وبحكيلي انه البيت رح يجيبلنا وجع راس للكل .. لازم نطلع منه بأسرع وقت.. حكتلي أبوك شراه بمبلغ منيح كيف بدك يانا نطلع منه .. حكيتلها خلينا نحاول نقنعه بأي طريقة المهم نطلع منه ..أجو خواني من المدرسة والجامعه وهديل من البنك .. صارت تحكي إنه في شي صار معها غريب بالبنك.. حكينالها شو.. حكت اليوم أجت عندي مرة وصارت تسأل عني وكأنها بتعرفني .. وصارت تحكيلي إنك رح تتزوجي واحد مش منيح والمرة بتعرفنا كلنا وصارت توصفني أشكالكم .. انا مرعوبة وخايفة .. كنت أول مرة بشوف هديل مكسورة وتعبانة وخايفة لهالدرجة .. حكيتلها كيف شكل هالمرة ؟ صارت تحكي لابسة طاقية وجكيت اسود وعمرها قريب من عمر ماما..

#الحاسة_رقم_سبعة_قصص
@rwayate
الحلقة الرابعة
كانت الصدمة كتير كبيرة بس شفت أختي وقعت من التلاجة بنص الليل.. وصوت صراخي صحى كل خواني والبيت.. ولما شافوها على الأرض وحكيتلهم انها كانت بالتلاجة كذبوني.. وهديل اتهمتني بالجنون وانه انا اللي عملت فيها هيك متل ماحاولت اسرقها.. بس فجأة ماما سكتتها وحكتلها اسكتي انتي مش عارفة اشي.. صارت تحكيلها هديل كيف يعني مش عارفة.. حكتلها مش وقت هالحكي هسه .. خلينا نتصل بالإسعاف بسرعه .. اتصلنا بالإسعاف واجت واخدت اختي ..وضليت أتسائل انه معقول تعيش ..؟؟ معقول نعرف شو اللي صار بالبيت.. ضليتني بغرفتي وعيون خواني بتستحقرني كل شوي .. لحد ماطلع الصبح.. كنت بدعي انها اختي تقوم بالسلامة لتحكي شو اللي صار معها.. بعد ساعه اجانا اتصال من بابا بحكي انه اختي قامت بالسلامة وحالتها منيحه ولحقوها بالوقت المناسب.. صرت احمد الله وبس بدي ياها تروّح عالبيت حتى نعرف شو صار معها .. دخلت عليه هديل على الغرفة وسركت الباب بإجرها وهيه معصبة.. وكنت عارف انها جاي تكمل حكيها وتجرحني أكتر.. صارت تحكيلي هسه بدي افهم انت شو عم تفكر تعمل؟؟ احكيلي انت بتكرهنا .!! كل هالقد حاقد علينا فهمني.. كيف فيك تقتل اختك الصغيرة وعشان شو .؟؟ وكيف فيك تحاول تسرقني؟؟ حكيتلها اقعدي واسكتي وخلينا نحكي بكفي عم تظلميني وانتي مش عارفة اشي!!. حكتلي شو بدك تحكي وشو بدك تكزب!! .. حكيتلها مابدي أكذب وامي الصبح كانت رح تحكيلكم شي قبل ماتيجي الإسعاف على البيت.. حكيتلها شفتي المرة اللي اجت عندك على البنك وحكت معك ؟! حكتلي اه ؟؟ حكيتلها هاي نفسها اجت عنا على البيت.. وطلعت على غرفتكم ورشت شي على التخوت وبعدها طلعت ولما رحنا على بيتها اللي هوه فوق بيتنا شفنا صورتها وعليها شريطة سودة ولما سألنا وينها حكالنا إبنها إنها توفت من شهر !! تخيلي من شهر... !! انا ماكنت بدي أخوفكم بس انتوا ظلمتوني.. بهاللحظة هديل بطلت تستوعب شي وصارت تحكي معقول اللي بسمعه!؟ مين هاي المرة وشو هدفها من اللي عملته وشو بدها منا وليه هيك عملت؟؟ حكيتلها انا مابعرف مابعرف اشي ماتحكولي لأنكم ظلمتوني بما فيه الكفاية وامي حكتلي خلينا نحل الموضوع بينا عشان مانخوف حدا وانتي عارفة ابوكي لو عرف رح يعمل مشكلة لهدول الناس أو اخوكي غسان عشان هيك ماحبينا نحكي.. ياريت تساعديني وتوقفي معي وما تضلي تتهميني إني حدا عاطل وبنتقم منكم عشان نظري لأنكم أحسن مني .. حكتلي طيب خلص بس شو لازم نعمل.. قلتلها لازم نلاقي المرة ونمسكها وياريت تحكيلي شو حكتلك بالزبط.. حكتلي اجت على البنك وصارت تحكيلي انها بتعرفنا وانها اجت عنا وانه انا حتزوج واحد مش منيح بس لازم أقبل فيه ووصفت خواني واحد واحد كإنها بتعرفنا من سنين.. فجأة اتطلعت عليه وصفنت وعيونها كانت خايفة حكيتلها مالك؟؟ قالتلي خايفة تكون عن جد ميته وجاي تنتقم منا لأنه سكنا هالبيت لأنه عحسب حكيك انه لما اجت عنا ضلت تحكي عن أهل البيت؟! .. حكيتلها ماكان مبين عليها انها ميته .. بتشرب وبتمشي وشايفينها متل أي حدا.. حكتلي انا قارءة عن هالشي كتير وعن الأموات وممكن تكون فعلاً ميته وجاي تبلينا لتنتقم من شي كان بهاد البيت.. اكيد في الها هدف بهلاكنا ليه لعاد رمت على تخوتنا شغلات اكيد بدها تأذينا.. طلعت من الغرفة وصارت تعاملني بشكل منيح.. اجت امي من المستشفى وكانت بتبكي وما عرفنا نوقفها.. هديل حكت لأخوي غسان ولبابا انه هبه دخلت التلاجة من حالها عشان تجرب فيلم كرتون شافته بس صعب يصدقوها لأنه كانت شايلة الرف السفلي من التلاجة وكيف سكرت عحالها.. في حدا عمل هيك.. هدينا ماما وصارت تحكي أبوكم ضل عند أختكم بالمستشفى لأنه الدكاترة حكوا انه طوّلت وتجمدت البنت وأثر هالشي على خلايا مخها لهيك فقدت الذاكرة .. صرنا كلنا نبكي ومش عارفين شو بدنا نعمل.. كيف بدنا نعرف اللي صار؟ دخلت امي منهارة على غرفتها وبتبكي ومافي حد عارف يهديها وبابا ماكان مصدق أنه هيه اللي عملت بحالها هيك بس ماكنا قادرين نحكيله عن شغلة المرة وعن أهلها من خوف ما يأذوهم لأنه ممكن فعلاً تكون ميته وبدها تنتقم.. حكيت لهديل في حال شفتي هاي المرة بلغي عنها امن البنك واذا لقيتك برا البنك لهيها واتصلي معي فوراً.. اتفقت مع امي ومع هديل عنفس الموضوع.. وما حكينا لحدا وخلينا القصة بس بينا.. ضلت اختي بالمستشفى وبنفس اليوم بالليل نزلت على المطبخ لأشوف اذا بقدر اكشف شي تاني بنفس المكان.. نزلت وايدي على قلبي خايف يصير شي تاني .. وصلت المطبخ وشغلت الضو.. مشيت شوي شوي ناحية حيط التلاجة.. شو السر اللي جنب الحيط .. مش قادر أفهم شو اللي بصير وليه كل يوم بالليل بظهرلي.. كان قلبي بدق وحاستي السادسة بلشت تشتغل انه رح يصير شي بهاللحظة.. حاولت أتراجع حتى ما يصير شي تاني أصير فيه متهم.. قربت ناحية إيد التلاجة وفتحتها بسرعه.. لقطت أنفاسي بعد ما شفت انه مافيها حدا.. تراجعت مرة تانية وحاولت أسرق نظر ناحية التلاجة .. سمعت صوت ولد صغير..بحكيلي أنا هون ..

#الحاسة_رقم_سبعة_قصص
@rwayate

الحلقة الخامسة
طلعت أنا وهديل عالغرفة فوق عندي بعد ما سمعت صوت الولد بالمطبخ.. حسيت الشي غريب لدرجة لا يمكن تصدق.. حكتلي احكيلي كل شي شو سمعت تحت أنا سمعتك بتحكي مع حدا.. حكيتلها في ولد صغير عايش معنا هون بالبيت.. وعلى ما اظن هوه روح .. توفى مع والده ووالدته والمرة اللي شفناها توفت معهم!! .. أكيد في علاقة بتربطهم وقوية كتير وأنا سمعتها بتحكي مع ماما بس اجت عنا.. ومستحيل يكون غير هيك لأنه على حسب حكي ابنها هيه متوفية من شهر.. نحنا لازم نعرف كيف توفت!! .. حكتلي كيف بدنا نعرف قلتلها اليوم بنحاول مع ابوكي نقنعه أنه البيت ما لائمنا لازم نعمل شي انا وياكي حتى نطلع منه لازم!!.. حكتلي شو لازم نعمل.. حكيتلها خلينا نخرب البيت .. نخرب أماكن الصرف الصحي ونخرب الحيطان وكل شي عشان يقتنع انه البيت على وشك الإنهيار أو شي متل هيك.. يا بنأذي البيت وبنطلع منه يا أما نحنا بنتأذى كلنا.. انتي بترضي انك تتأذي وتضل علينا لعنة كلنا أنا وانتي وخوانك وأمك وأبوكي ؟ حكتلي أكيد لأ.. قلتلها طيب خلص لكن امشي معي وخلينا نخرب البيت بكرا الصبح حاولي تعطلي من البنك وياريت ماتروحي حتى نباشر بمهمتنا.. في شي تحت كمان بالمطبخ أنا صرلي حاسس عليه من لما سكنا.. ورا التلاجة في حيط بلوك عم بتحوّل الحيط لملمس متل الفلين خفيف وأظن انه في شي وراه.. لازم بكرا الصبح نحاول نعرف بس اللي محيرني أنه مابطلع هالشي غير بالليل.. أنا حاستي السادسة بتحكيلي أنه بكرا بالذات رح يصير شي كتير قوي.. حكتلي شو حاسس؟؟ حكيتلها واحد منا يا هديل رح يتأذى .. ممكن أنا .. ممكن أنتي .. ممكن أمك .. ممكن خوانك .. المهم لازم نخرب البيت ونخلي أبوكي يقتنع انه خطر علينا بأي شكل من الأشكال.. ولازم مانحكيله شي على قصة الأرواح اللي فيه أو عن المرة .. مابدنا مشاكل انتي بتعرفي ابوكي ما بآمن بهالأمور شو ماصار ومابدنا يصير مشكلة مع بيت المرة اللي اجت عنا خصوصاً انه هيه متوفية وبيتها قريب منا.. فهمتي؟ حكتلي فهمت وطلعت من الغرفة .. وبهاللحظة أنا ضليتني أفكر شو ممكن أعمل وكيف ممكن أتصرف بكرا خصوصاً انه حاسس رح يصير شي كتير قوي.. طلع الصبح وكل واحد من خواني راح على مدرسته وشغله .. افطرت مع امي وضليتني أتفحص البيت شوي شوي.. عرفت وين منفذ الصرف الصحي والأماكن اللي ممكن تخرب علينا عيشتنا بالبيت .. هديل ماراحت على شغلها واتفقنا نخرب البيت.. بس للحظة رن تلفونها كانت صاحبيتها بالبنك بتحكيلها لازم تيجي عالشغل بسرعه في شغلات ضايعة ومش لاقيتها ومافي غيرك ممكن يلاقيها.. حكتلها بس انا اليوم تعبانة ومش قادرة.. اقنعتها تروح وبالفعل تركتني بالبيت وراحت على شغلها وضليت لحالي أخرب بالبيت.. كانت امي بتشتغل بالمطبخ وفجأة المي فاضت عليها بهاللحظة ماكنت بعرف اذا هالشي رح يجيب نتيجة واصلاً بده وقت حتى يقتنع بابا فيه.. حكتلي ماما كيف بدي اشتغل هلأ وكل شي خربان بالمطبخ حتى طبخ مش عارفة أطبخ.. حكيتلها طيب شو رأيك توخدي طبختك وتروحي عند جارة من الجارات بما انك تعرفتي على ناس كتير.. حكتلي ممكن معك حق.. طلعت من البيت واخدت طبختها وضليتني لحالي بالبيت.. أول شي حاولت أحكي مع الناس اللي بالبيت معنا.. قلتلهم فرجوني حالكم اذا انتوا موجودين.. أنا لحالي وبدي أواجهكم.. يا ولد يا صغير انت ياللي حكيت معي مبارح بالليل.. اطلع فرجيني حالك انا لحالي.. ماكان حدا برد عليه وفجأة اطلت بالمراية ورايه شفت وجه مغبّش لولد وكان يبكي.. لفيت راسي ماشفت حدا.. حكيتله انت هون ؟؟ شو ببكيك ؟؟ حكالي بابا زعلني.. حكيتله ليه شو صار احكيلي انا جنبك وبساعدك.. فجأة اختفى الصوت .. وصرت أخرب بالبيت أكتر بكل شي بقدر عليه.. طلعت من البيت وحكيت لازم أطلع أراقب بيت المرة اللي حكولنا توفت .. لازم أتوصل لشي.. طلعت وضليتني اراقب بيتهم من بعيد ماكنت بشوف شي ملحوظ.. رجعت على البيت بعد ساعه من المراقبة كان بابا بالبيت ومعه اختي هبه..وماما رجعت من عند جارتنا.. وصلوا خواني من المدرسة ولقيت بابا بحكي بصوت عالي مع اخوي غسان وامي.. بحكيلهم التحاليل بتحكي انه البنت نعطالها منوّم قبل ما يصير الشي معها .. معناته في حدا معطيها اشي وعمل معها هيك .. انتوا متأكدين انه ماحدا دخل على البيت .. اخوي صار يحكي الشي اللي صار غريب وليه حتى يأذو بنت صغيرة شو بدهم منها.. ومين الي بده يكون عمل هيك.. كانت هبه فاقدة الذاكرة تماماً وحاولوا يفرجوها المطبخ والمكان اللي كانت رح تموت فيه وأكتر من مكان بالبيت حتى تتذكر.. العابها ووجه ماما .. بس ماكانت متذكرة اشي وبس بتطلع بوجوهنا يا أما بتضحك يا أما بتبكي.. روحوا خواتي شذى وأفنان ودعاء من المدرسة بركضو على البيت وببكوا كلهم حكينالهم شو مالكم شو في؟ حكولنا في مرة مسكتنا برا وصارت تحكيلنا انه احنا رح نموت وانها بتعرف اهلنا وبتحكيلنا لازم نطلع من البيت .. كان بابا موجود صار يحكي شو الي بسمعه ؟؟ مين هاي المرة..

#الحاسة_رقم_سبعة_قصص
@rwayate
الحلقة السادسة
نصدمنا كلنا بس سمعنا إنه هديل نخطفت وتسكّر الخط بسرعه بدون سابق إنذار.. ولما راح يركض بابا على بيت المرة هوه وغسان حكتلي ماما الحقهم قبل مايصير مشكلة ومصيبة جديدة.. وما كنت عارف شو ممكن يصير لأنه من كلام هديل أنه المرة اللي شفناها كان إلها إيد بقصة الخطف.. وشو بدها منا ما كان حدا عارف!! .. راحو يركضو على بيتها ولحقتهم .. برغم إنهم مش عارفين أي بيت بالزبط هوه بيتها.. بس حكولي أدلهم واحكيلهم بسرعه حتى يتصرفوا.. دليتهم على البيت وضلو يدقو على الباب بس ماحدا يفتح.. حكيتلهم شكله مافي حدا بالبيت واحنا مش متاكدين من كلام هديل خلينا ندور عليها أحسن ما نظلم الناس.. حاولو يكسرو شباك بيتهم ويصرخو لحتى يفتحو بس ماكان حدا يفتح لحد ما طلعلنا واحد جارهم وصار يحكيلنا انهم تركوا البيت اليوم الصبح.. بهاللحظة بطلنا نعرف شو بدنا نعمل وليه هيك بالزبط صار.. رجعنا من محل ما اجينا وراح منا كل واحد على مكان يدوّر على هديل بس للأسف رجعنا آخر الليل وما لقينالها أثر.. ضلت ماما تبكي وانا احكيلهم شفتو بس كنت احكيلكم انه احساسي بحكيلي انه رح يجينا وجع راس من سكتنتنا هون ورح يصيرلنا مشاكل كتير بس ماصدقتوني ياريتكم صدقتوني.. طلعت على غرفتي وضليتني أقكر شو ممكن تكون بدها منا هاي المره ومن عيلتي .. سامع صوت امي بتبكي وبهالوقت بدي انزل عالمطبخ أحاول أحس اذا في شي صاير .. أخدت الخاتم والصورة اللي كانو معي ونزلت حتى استدرج فيهم الولد اللي ساكن معنا ومتل ما حاسس انه روحه بهالبيت وبركي عرفت شي وصلني لهديل.. كنت أدعي أنه امي ما تنزل من غرفتها لعندي عالمطبخ وماحدا من عيلتي يصحى لأنه الوضع كان مكهرب وكنت وقتها حاسس رح يصير شي.. نزلت تحت ومسكت الخاتم والصورة بإيدي .. ووقفت بنص المطبخ وصرت أحكي.. الخاتم معي مابدك ياه؟؟؟ وينك ؟؟؟ إتطلعت مافي حدا ومش سامع ولا صوت .. وفجأة شفت ضو جنب التلاجة .. فكرت التلاجة فتحت وممكن يكون صار شي.. كان الحيط عم بفتح وعم بطلع منه ضو.. قربت شوي.. وشفت طرف غرفة ظاهر من الحيط.. غرفة تانية ورا الحيط اللي جنب التلاجة..!! كيف هيك .. الحيط كان عم بفتح بشكل تدريجي لحد ما صار فيه أدخل لهالمكان .. صار الضو عم بختفي شوي شوي.. ودخلت للمكان.. والحيط رجع تسكر ..خفت كتير وقلت أنا وين وكيف فيه أرجع.. كان في ضو جوا الغرفة متل أضوية البيت العادية.. والغرفة عبارة عن غرفة قعدة تانية .. فيها أثاث قديم كإنه من الستينات من حوالي عشرين سنة من اليوم.. وصورة الولد الصغير مكبرة بنص الغرفة وكاسات شاي وصحون أكل ودخان وتلفزيون .. كانت الغرفة كإنها بتعبرلي إنه في عيلة موجودة هون .. في حياة .. وفي ناس عايشين فيها.. بس ماشفت حدا.. فجأة ظهر بوجهي الولد الصغير وكانت أول مرة بشوفه شخصياً فيها بعد ماكنت اشوف صورته وأسمع صوته.. حكيتله هاد انت ؟ شو بتعمل هون ووين اهلك انتو عايشين بهاي الغرفة.. حكالي مافيك تهرب مني وأنا رح ألحقك وين مارحت.. ومش بس أنت عيلتك كلها .. رح أضل وراكم وراكم.. أنا لحالي هون بس الأثار اللي شايفها لعيلتي هون هيه مجرد شغلات بتوضح انهم كانو موجودين.. انا هون من عشرين سنة.. ورح اضل بهالبيت.. حكيتله انت ميت ؟ حكالي اه انا ميت.. ميت من جوا أكتر من ما اكون ميت من برا.. بدي انتقم من كل واحد عذبني .. حكيتله انا منهم ؟ وين هديل ؟ حكالي هديل رح ترجع بكرا .. ورح تحكيلكم شي.. قرب عليه وصار يتطلع عليه وحكالي لازم تطلعوا من البيت ..وضربني على وجهي واغمى عليه.. صحيت بتطلع على الساعه ومرمي بأرضية المطبخ لقيت الساعه صارت سبعة الصبح.. وماحدا ملاحظ وجودي لسه.. قربت على الحيط مالقيت شي.. طلعت بوجهي ماما وصارت تحكيلي ليه نايم بأرضية المطبخ .. حكيتلها ماما انا حاسس انه اليوم هديل رح ترجع .. احساسي بحكيلي هيك.. حكتلي شو اللي بخليك تحس هيك انا مانمت طول الليل وأنا أفكر وين ممكن تكون موجودة هسه.. حكيتلتها اصبري اليوم.. اقتنع بابا وأخيراً انه البيت سيء ومافي منه نتيجة ولازم انه نطلع منه .. وحكا لماما انه بلغ الشرطة عن هديل وبعد ما يلاقوها لازم نجهز حالنا لنطلع منه وحط خبر بالجريدة عنه انه للبيع.. بعد مارجع غسان يدق على بيت المرة وماحدا يجاوبو لأنه كان متأمل انه يرجعو سكان البيت مرة تانية وماصدق الشخص اللي حكاله انهم طلعو .. حكالي لازم نعرف مين هالمرة ولو شو ماصار.. لأنه هيه الوحيدة اللي بأيدها كل شي وبتعرف كل شي وضروري نعرف ليه هيك بتعمل فينا.. رجعت هديل بتبكي على البيت وبتحكيلنا صارت مصيبة معي .. حكينالها خير شو اللي صار.. بوقتها امي اتطلعت عليه بخوف وكإنها صدقت انه احساسي كان صح برجعة هديل وماحكيتلهم انه حكيت مع الولد اللي ساكن معنا بالبيت لأنه ماحدا رح يصدقني أبداً.. واكتفيت انهم يصدقوا احساسي مرة وحدة بالعمر.. حكينالها شو الي صار معك خبرينا..