#الحالمة_بقلم_نداء_الصوالحي
@rwayate
الجزء الأول
متل كل يوم بين اربع حيطان وهدوء كبير ووحدة قاتلة.. عيون مرهقة ومتعبة من قلة النوم.. والهالات السودة طاغية عليهم..
ما في ورايا غير اختي مايا والدمى.. بقعد وقت طويل لخلص الدمية الي بايدي.. حياكة الدمى القماشية شغلة تعلمتها لأشغل وقتي فيها وتحولت ل هواية وبعدها لموهبة حلوة كتير وباب رزق..
خلصت الدمية الي ع شكل سنوو وايت الي طلبتها مايا وطلعت من غرفتي لنادي عليها حتى تشوفها.. لحظتها كانت عم تقفل باب البيت
حور: مين يلي كان عالباب
مايا: ما بعرف.. شكلو ضابط
حور: ضابط !! ايه وشو بدو
مايا: ما حكا شي.. سالني عن امي قلتله انها مو هون بالشغل.. و
حور: اي! كملي
مايا: سال عنك
حور: عني!! كيف عني!!! شو سالك؟
مايا: اختي ولا شي.. سالني اختك حور هون.. قلتله لا.. وبعدا راح
حور: بيعرف اسمي!! يعني بيعرفني.. لك شو بدو مني هااد..
مايا: اهدي اختي ليه اتوترتي هيك
حور: ولا شي.. لا تقلقي لساتك صغيرة ع هيك شي
اطلعت فيني مايا باستغراب وبعدها اطلعت ع ايدي واتغيرت ملامح وجهها فوراً لابتسامة
مايا: ياااي بتجنن خلصتيها!!
حور: هههه اي خدي يلا وهاتي حقها
مايا: بالله شوو!!
حور: ايه هلكت وانا بعمل فيها
مايا: بس انا ما معي شي.. حتى مصروفي خلص
حور: هههههههههههه لك بمزح معك ههههه صدقتي اني رح اخد منك شي
مايا: ههههه لا اكيد ما صدقت
حور: اي قلتيلي ههههه
فاتت امي عالبيت ونحنا عم نضحك.. اول ما شفتها اتذكرت الضابط يلي سال عني وتلاشت ابتسامتي
امي: اي ان شاء الله دوم صوت ضحكتكم يارب
مايا: شوفي ماما حور عملتلي سنو وايت
امي: ييه شو حلوة
قربت مني امي ولاحظت توتري من لحظة ما فاتت
امي: شبك حور مو على بعضك!! شفتي شي جديد
حور: لا بس
مايا: امي حور خافت من لحظة ما اجا الضابط عالبيت
امي: ضابط! انو ضابط
حور: اجا عالبيت سال عنك وعني كمان
امي: ما تقلقي من شي.. القصة صرلا زمان وما حدا بيتذكرها يمكن جاي لشي تاني
حور: اي صح معك حق
امي: اي لكان خدي ياامي هالاغراض وحضريهم وتعو ناكل سوا جبتلكن معي اكلات طيبة كتير
مايا: ممم ياعيني
اخدت الظروف من امي ورحت عالمطبخ طلعت كل الي بالظرف كان اكل جاهز حضرت طاولة السفرة لناكل.. كنت عاملة شوربة سكبت 3 صحون وحطيتهم جنب الاكل وقعدت.. ثواني واجت امي بعد ما غيرت تيابها ولحقتها مايا..
قعدنا ناكل سوا متل كل يوم وكل شهر وكل سنة.. تعودنا ع وجودنا مع بعض.. ما النا الا بعض انا وامي واختي مايا.. بعد ما توفى ابي مقتول وعمري 12 سنة.. انتقلنا من المنطقة كلها واشترت امي هالشقة بمنطقة سكنية هادية.. بعد ما استقرينا فيها.. ولدت اختي مايا لانها كانت حامل فيها جديد وقت وفاة ابي.. توفى وما لحق يشوفها.. انا الي ربيتها لمايا من وقت الي ولدت.. امي اضطرت تشتغل لتصرف علينا وانا الظروف حكمت اني اقعد وكمل تعليم بالبيت بقيت لربي مايا واهتم فيها وبالبيت.. ومع الملل اتعلمت حياكة وتخييط الدمى..
امي: لك امي ردي شبك
حور: اه!
امي: بشو بالك مشغول
حور: ولا شي..
امي: طب كلي ما اكلتي شي
حور: ما الي نفس.. دايمة
قمت عن طاولة السفرة ورحت ع غرفتي.. تمددت ع سريري وغمضت عيوني.. كانو بيحرقوني كتيير من قلة النوم.. فاتت لعندي امي وقعدت حدي عالتخت
امي: عم تفكري بحالك مو هيك
حور: شو اعمل!! تعبت.. تعبت كتير.. لايمتى هالحال امي لايمتى
امي: والله ما بعرف.. انتي لو تردي عليا وتعملي الي قلتلك عليه
حور: شووو!! رجعنا لنفس الموضوع!! امي بترجااكي انا ما فيني انقذ حالي لحتى انقذ غيري
امي: يابنتي افهمي عليا
حور: انتي الي افهمي عليا.. انا مو بطلة خارقة ولا معجزة لاساعد الناس متل ما انتي متخيلة.. انا متلي متلك كائن ضعيف بدي مين يحميني
امي: بس الي بصير معك اكيد مو من فراغ
حور: امي انا تعبانة بدي ارتاح شوي
امي: متل ما بدك.. انا بكرة رح اخد اجازة ونقعد سوا
حور: ماشي امي
طلعت امي من غرفتي وقفلت الباب وراها وانا طميت وجهي بالمخدة وانفجرت من البكي.. على حالي ووضعي الي عم يأزمني كل مرة اكتر من قبل..
انا مجرد انسانة ما تجاوز عمري ال 222 سنة بعيش هيك ظروف خارجة عن الطبيعة.. ما بعرف السبب ولا الهدف من هالشي.. وما بيجيلي منه الا التعب والارهاق والخوف والدموع..
وامي المرة القوية الي بتحاول قد ما فيها لتشتغل في الخياطة والتطريز لتصرف علينا انا واختي.. حياتنا مستقرة وهادية بس صعبة وموحشة بدون اب بدون سند بدون رجال..
====
فتحت عيوني بتعب شديد.. طول الليل ما غمضتلي عين.. رفعت راسي بتقل كبير وحاولت اركز شو هالصوت الي جاي من برا..
رفعت الغطا عني وقمت عن التخت.. اطلعت بالساعة كانت 99ونص الصبح.. كان صوت رجال عنا بالبيت.. فركت عيوني لانه النوم كان لسا فيهم.. فتحت طرف باب غرفتي وخطفت نظرة عالصالون لبرا.. شفت امي قاعدة عم تحكي مع ضابط.. فجأة لمحني وانا ارتعبت وقفلت الباب..
رجعت قعدت ع تختي وبثواني سمعت صوت حد عم يدق ع باب غرفتي
الضابط: انسة حور لو سمحتي افتحي الباب

#الحالمة_بقلم_نداء_الصوالحي
@rwayate
الجزء الثاني
فقت مرعوبة من حلم مخيف.. كنت عم شوف كيف ست كبيرة بالعمر عم تنقتل.. شفت البيت والعنوان.. شكل الست.. وشفت الساعة في صالون بيتها كانت عم تدق 12 منتصف الليل.. شفت شكل القاتل يلي فايت ع بيتها ليسرقو.. كان قلبي رح يوقف من المنظر يلي شفته.. تناولت كاسة المي يلي جنبي وشربتها ع نفس واحد.. قمت من محلي ومسكت الموبايل ومترددة دقله لييجي ولا لأ.. اطلعت بالساعة كانت 10ونص المسا.. ولازم قرر من هاي الليلة ومن هاد الحلم.. قرر ساعدو ولا اتركها تموت متل يلي تركتهم قبل.. بس انا تعبت.. انا تعبت كتير وبدي ساعدهم واخلص من هالشي يلي جواتي.. كلام معتصم لسا ببالي.. كل يلي قالو الصبح صحيح
((( معتصم: اسمعي.. انا مابدي اشهرك ولا احكي لحد عنك.. انا بس طالب مساعدتك..
حور: مساعدة شووو اتركني بحالي.. انت مفكر اني حابة شوف هيك احلام.. مفكر انه لما احلم بواحد بينقتل وافيق من حلمي وينقتل فعلاً.. هيك بكون مبسوطة.. انا تعبت انا بخاف حط راسي عالمخدة ونام.. بخاف غمض عيوني حتى ما شوف حد عم يموت واسمع تاني نهار انه مات.. انت مو حاسس بشي.. انا عم حس بالذنب طول الوقت.. عم اتألم وانا نايمة وقت بشوفهم عم يموتو قدامي وانا مو طالع بايدي شي.. بحس انه ذنبهم برقبتي اناا
معتصم: لكان خليني ساعدك.. لازم تساعديني انتي كمان حتى يتلاشى شعور الذنب يلي جواتك.. انتي ربنا حط فيكي شي مهم كتير وفيكي تستغليه وتنقذي ارواح من القتل
حور: انا ما رح استغل شي.. انا لو بايدي انقذ حد كان قدرت انقذ ابي
معتصم: بس
حور: لو سمحت انا كلامي خلص.. بدك شي
معتصم: انا رح اتركك تفكري.. ورح اتركلك رقم موبايلي ياريت تفكري منيح وترديلي خبر.. سواء جوابك اي او لا.. فأنا بانتظار ردك
بتمنى يكون ردك القبول..لانه حرام تدفني حالك بالحياة وتروح ارواح ناس بسبب خوفك واهمالك.. بخاطرك
امي: الله معك استاذ..
حور: ليه ياامي ليه!!
امي: ما كان عندي حل تاني الا هيك.. ما فيني شوفك عم تدبلي قدام عيوني بدون ما اعمل شي.. اذا كانت هالاحلام عم تاكل فيكي وتتعبك ف انا بفضل تتعبك وانتي عاملة شي مهم ولا انها تتعبك بدون فايدة.. )))
دقيت لرقمو وانا عم ارجف.. صار لازم اخد قراري.. بعد ثواني قليلة رد عليي
معتصم: الو.. مرحبا !
حور: مسا الخير..
معتصم: مسا النور.. مين معي
حور: انا حور..
معتصم: اهلا اهلا.. كنت واثق رح تدقيلي
حور: فيك تيجي لعنا هلء
معتصم: هلء!! الوقت متأخر كتير
حور: مو حابب تبلش وتساعد الضحية الجديد!
معتصم: ثواني رح تلاقيني عندك
=====
بعد ما وصل معتصم وخبرته تفاصيل الحلم كلها.. عنوان بيت الست والمنطقة يلي فيها وشو يلي بدو يصير.. اتصل ع دورية شرطة وطلع مستعجل وملهوف.. كانت الساعة رح تقلط 11 والمكان بعيد عنا شي ساعة.. تمنيت يلحقوها ويمسكو القاتل..
بقيت قاعدة ع اعصابي ومتوترة كتير.. ما بعرف يلي عم اعملو صح ولا غلط.. معقول يلي عم اعملو رح يأثر ع حياتنا وع طبيعة العلاقات.. وطب وبعدين شو رح يصير.. بدي وقف كل جرايم العالم.. هالشي مو منطقي.. مو منطقي ابداً..
بقيت فكر لوقت ما رن موبايلي كان رقم معتصم.. رديت بلهفة وصوت بيرجف
حور: طمني.. شو صار!!
معتصم: الحمدلله وصلنا بالوقت المناسب ولحقنا الست.. بس ما قدرنا نمسك القاتل هرب منا
حور: يييه عنجد
معتصم: لا تخافي.. الجايات كتار.. المهم اني بدي اتشكرك كتير وبدي تتاكدي انه يلي بتعمليه هوا الصح
حور: ان شاء الله..
معتصم: انا لازم شوفك بكرا لنتفق ع كل شي
حور: اي ماشي تفضل لعنا باي وقت.. دائما بالبيت
معتصم: لا انا رح استناكي ب سيارتي ع باب البيت لاخدك ع شي محل
حور: بعتذر ما فيني اطلع لمحل
معتصم: خلص متل ما بدك.. رح اجي لعندكم عالبيت المهم تكوني مرتاحة
حور: شكراً الك.. تصبح على خير
زتيت الموبايل من ايدي وارتميت ع السرير.. ارتحت كتير وقت طمني انهم انقذوها للست.. مابعرف شو الي كان مخوفني كل هالقد.. ليه ما حاولت ساعد من قبل.. ليكني ما خسرت شي.. بالعكس ارتحت كتير
=====
في بلكونة بيتنا.. كنت قاعدة انا وامي والضابط معتصم.. كان عم يحكيلنا تفاصيل الليلة وكيف فاتو عالبيت ولحقو الست الكبيرة قبل لا تموت.. كانت نظرات الفرحة ع وجه امي ما بتتفسر ومركزة بكل كلمة عم يقولها معتصم
فاتت بهاللحظة مايا عالبيت.. كانت مروحة من المدرسة.. اجت ركض لعنا
مايا: ماما.. حور.. هاد انت
معتصم: كيفك يازعرة
مايا: منيحة عمو كيفك انت
حور: ايه ومنين بتعرفو بعض..
مايا: لك هادا الضابط يلي مرة اجا عالبيت وسال عنك
حور: ااه.. يعني انتي كنتي حاكيتيلو من قبل امي
امي: اي يومها كنت مخبرته عنك لييجي ويسال
حور: اي وعملتي حالك ما معك خبر
معتصم: ايه مدام هداية طابختها مظبوط ههههه
حور: ههههه
امي: انا رح روح اعمل شاي.. عن اذنكن تعي مايا
معتصم: اذنك معك خالة.. حور!!
حور: ايه تفضل
معتصم: بدي اسالك.. من ايمتى بتجيكي هي الاحلام.. يعني الها فترة طويلة!!
حور: اي.. من وقت الي اتوفى ابي
معتصم: كيف توفى!
و

#الحالمة_بقلم_نداء_الصوالحي
@rwayate
الجزء السابع و الأخير
حور: لك شووو عم تعملووو.. لك سم الهااااري ان شاء الله.. قوموووو
دكتور: انتي شوو فوتك لهوون
حور: لك اللواء جابر عم يمووت وانتو عم تاكلووو
بس سمعو شو حكيت اطلعو ببعض بخوف وركضو كلهن ورا بعض.. وصلو الغرفة وطلعو معتصم منها بالقوة.. وبلشو يضربو اللواء بالصعقات الكهربائية ويحاولو ينعشو قلبه والتنفس.. كانو يعدو ويصدموه.. يعدو ويرجعو يصدموه
ونحنا عالباب ومعتصم ماسك فيني وعم يبكي متل طفل صغير..
لوقت ما بلحظة سمعنا صوت الجهاز رجع اشتغل.. والاطباء بعد بوقت طلعو يطمنونا انهم لحقوه وحالته استقرت
للحظة جسم معتصم ارتخى ورمى كل حالو عليي وهوا عم يطلع بعيوني
معتصم: الحمدلله.. الحمدلله.. ابي عااش يا حوور.. ابي عااش
كنت عم اطلع بعيونو وابكي معه.. بكيت كتير كإني انقذت ابي انا.. كإنه التاريخ عاد نفسه لأرجع ابي ع الحياة وخلص الناس من نضال واشكاله..
=====
بعد ما قبضو على نضال وكل يلي عم يشتغلو معو.. وبعد ما معتصم اطمن ع والده رجعني ع البيت وراح عالمركز ليحقق مع نضال ويلي معه..
فتت البيت وانا حاسة في هم كبير وانزاح من على قلبي..
كانت امي قاعدة على نار وخايفة كتير.. خبرتها كل يلي صار معي وليه طلعت بسرعة بدون ما خبرها.. وخبرتها عن الشبه الكبير يلي بين ابي وبين والد معتصم.. والصدف يلي صارت وما بتتصدق..
مر 5 ايام ع الي صار وما شفت معتصم ولا مرة فيهم.. سالت عنه بالمركز كم مرة بس قالولي ما بنشوفه وما بيفضى بنوب وعم يحققو مع نضال ويلاحقو كل يلي شغالين معو..
تركت الموضوع ونطرت لييجي لوحده لاني كنت بعرف ما رح يضل بعيد عني.. وفعلاً باليوم السادس كان جاي ع بيتي بدون ما يخبرني..
كنت قاعدة بغرفتي عم اطلع بالدمية يلي بتشبهو وأتأمل فيها لاني إشتقتله كتير.. فاتت إمي لعندي وخبرتني انه معتصم قاعد برا وبدو يشوفني.. طلعت بدون وعي.. ما اطلعت ع شكلي ولا تركت يلي بايدي.. اللهفة والشوق كانو اكبر من اني انتبه ع شي
وقفت قدامه وهوا قام من محله وبقي يطلع فيني
امي: طيب انا رايحة اعمللكن قهوة
راحت امي من عنا وبقينا لوحدنا عم نطلع ببعض ونظرات عيونا عم تحكي شغلات كتيرة..
معتصم: كيفك حور
انتبهت اني سرحانة فيه وما عم اعطي اي ردة فعل.. اخجلت وحاولت صلح الموقف
حور: اهلا وسهلا معتصم.. تفضل ارتاح لا تضل واقف
انتبهت انه عم يطلع ايدي ويبتسم.. اطلعت لقيت الدمية بايدي انحرجت كتير وخبيتا ورا ظهري.. قرب مني كتير وسحبها من ورا ايدي بقوة
حور: لك هااات مو الك هي
معتصم: ههههه لك هاد اناا !!!
حور: لاا مو انت
معتصم: امبلا انا.. ليكي متل شعري.. ونفس الزي تبعي.. حتى شوفي عاملة متل ساعتي كمان ههههه
حور: لا لا بجوز بشبهك
معتصم: اشتقتيلي مو
اتلبكت وما عرفت شو اعمل
حور: ماماا..
حاولت اهرب بس سحبني من ايدي وقعدني ع الكنبة وقعد جنبي
معتصم: ع طول بدك تهربي.. خلص ما بدي خجلك هههه وها هي الدمية خبيتها.. المهم طمنيني عنك
حور: انت يلي طمني عنك.. وينك مختفي.. سالت عنك كتير وما عم شوفك ابداً
معتصم: انشغلت كتييير بعد يلي صار.. واليوم ل خلصنا تحقيق وانكشف كل شي
حور: اي الحمدلله
معتصم: حور..
حور: ايه !!
معتصم: اولا انا اسف ع كل كلمة قلتلك اياها.. نضال اعترف وخبرني انه هددك بامك واختك لهيك رفضتي تساعديني.. ليه ما خبرتيني كنا لقينا حل سوا
حور: ما قدرت كنت خايفة ينإذو بسببي
معتصم: اي معك حق.. والاهم بدي اتشكرك كتير ع الي عملتيه.. لو ما لحقتي وخبرتيني عن الحلم كان هلء ما بعرف شو صار بأبي
حور: انا ما عملت شي.. عملت الي لازم ينعمل
معتصم: بتعرفي نضال اعترف ع كل شي تحت التحقيق .. فتحت كل القضايا المقفلة باسم قاتل مجهول.. اعترف نضال بكل جرائمه.. اعترف بقتل ناس كتير بهدف الانتقام والسرقة.. واعترف كمان بشغلة تانية
حور: ايه! بشو؟
معتصم: هوا ااي قتلو لابوكي
حور: اي بعرف
معتصم: بتعرفي!!! من متى!؟
حور: من وقت الي خطفوني.. تذكرت صوته لنضال وشكله هوا والي معه.. ما بنسى صوتهم وهيتهم ابداً يوم الي قتلو ابي.. وتاكدت اكتر بس حلمت فيهم
معتصم: وكمان في شي مو حابب خبيه عنك.. مابعرف كيف بدي خبرك اياه
حور: شو!
معتصم: وقت الي قتلو ابوكي.. مو خبرتيني انهن قتلوه بالغلط وكانو عم يحكو مو هوي المطلوب
حور: ايه
معتصم: يوما كانو بدهن يقتلو ابي انا.. والرجال الي كان عم يراقب ليعرفو البيت لحق ابوكي بدل ما يلحق ابي بسبب الشبه الكبير يلي بينهم.. وبعد ما قتلوه انتبه نضال انه مو هادا اللواء جابر.. انا حاسس بالذنب ومخنوق كتير من وقت الي عرفت.. ما بتخيل انه ابوكي مات بسبب شبهه من ابي
حور: لا تحكي هيك.. لو ما كان خلص عمرو ما كان لحقوه هوا بالغلط.. هي كلها تصاريف القدر
معتصم: يعني مانك زعلانة او مقهورة من هالشي
حور: بالعكس معتصم.. انا بعرف انه ابي مات ظلم بس ما فيني حمل المسؤولية لحدا غير للقاتل نفسه.. لهيك لا تحس بالذنب
معتصم: ما بعرف شو بدي قلك.. انتي انسانة طيبة وطاهرة كتير
حور: بعرف هههه

#الحالمة_بقلم_نداء_الصوالحي
@rwayate
الجزء الثالث
مر ثلاث ايام بدون اي تواصل بيني وبين الضابط معتصم.. ما بعرف ليه للحظة تمنيت احلم بشي لحتى دقله واحكي معه.. استحقرت نفسي ع هالشعور.. وقمت من مكاني.. طلعت برات الغرفة كانت امي عم تحضر العشا
حور: شو عاملة للعشا
امي: عملت فول ورح ركب ع الشاي
حور: ممم امي ما اتصل الضابط معتصم فيكي.. او ما شفتيه وانتي رايحة عالمشغل
امي: لا الي كم يوم ما شفته.. ليه عم تسالي
حور: لا ولا شي.. بس استغربت انه ما عم يسال او ييجي لهون
امي: بكون انشغل ياامي.. هاد ضابط ما رح يضل قاعد عنا هون
حور: اي اكيد.. ساعدك بشي!!
امي: لا خلصت نادي ع مايا لنتعشى
====
غمضت عيوني بخوف.. وحاولت نام.. تمنيت الليلة كمان تمشي بهدوء ونام نومة بدون احلام وازعاجات.. بثواني كنت غرقانة بالنوم..
حاسة جسمي متل النار.. عم اعرق وارجف بنفس الوقت..
شفت شارع سريع.. طويل ومحاوط بغابات وشجر كثيف.. وبنت عم تركض بخوف وبشكل هستيري.. عم تركض وتطلع وراها.. شفت اشارة ع الطريق.. شفت علامات.. ورقم 6.. شفت الشمس عم تطلع كإنه وقت شروق الشمس.. قربت منها سيارة بسرعة كبيرة ودعستها بقوة..
فقت عم اصرخ.. شربت مي وركضت لبرا غسلت وجهي.. اتدايقت كتير من هالحلم يلي ما شفت معالمه.. ماشفت بيت ولا عنوان.. ما شفت الوقت
حور: ياربي شو بدي اعمل
امي: بسم الله الرحمن الرحيم.. شو الي مفيقك هلء ليه عم تغسلي!.. حلم جديد!!
حور: اي امي اي
امي: طب اتوضي وتعي صلي معي الفجر لتروقي شوي
توضيت وصليت وقعدت مع امي شوي.. وبعدا فتت ع غرفتي.. مسكت الموبايل ومترددة كتير لدق ع معتصم.. الوقت مو مناسب والنهار لسا ما طلع الساعة 5 الفجر.. وخفت كتير لازعجه او ازعج يلي عندو بالبيت.. دقيت مرة وفصلت بسرعة
بس بعد ثواني رجع دقلي
معتصم: حور! صباح الخير
حور: اسفة فيقتك من النوم
معتصم: لا ابداً انا بفيق بهادا الوقت بصلي وبحضر حالي وبطلع ع المركز من بكير
حور: كيفك
معتصم: انا بخير الحمدلله.. كيفك انتي؟ صاير شي!
حور: اي شفت منام
معتصم: اي!!
حور: مافيني احكيلك هون.. فيك تيجي لهون وانت طالع ع شغلك
معتصم: ماشي انا دقايق ويكون عندك
فيقت امي حتى تعرف بجية الضابط معتصم ع بكير.. طلعت مايا ع مدرستها وبقيت انا وامي ننطر معتصم لحتى وصل وبلشت اشرحلو يلي شفته بالمنام..
معتصم: اي الي فهمته منك انه صبية هاربة من سيارة لحقاها ودعستها
حور: اي.. بس ما في شي واضح
معتصم: كيف ما في شي واضح.. مو شفتي شكل الطريق كله
حور: اي
معتصم: وشفتي شروق الشمس والرقم 6
حور: اي صح
معتصم: لكان هاد الوقت يلي رح يصير فيه الجريمة.. الساعة 6 الا ثلث.. باقي ثلث ساعة وتصير 6 يادوب نلحق.. مشي معي
امي: شو ياابني لوين.. الوقت كتير بكير.. ومابصير تروح معك.. كلام الناس ياابني
معتصم: خالة انا ضابط.. بدك تخافي مني! بعدين لو مو واثقة تعي معنا يلا قومي البسي
امي: استغفر الله مو هيك ياابني انت ما في منك.. بس انت بتعرف نحنا ما عنا رجال بالبيت وما بدنا نسمع حكي بيسوى وما بيسوى
حور: امي لا تخافي هاد ضابط وانا مو طالعة مع حد غريب.. ما رح اتاخر لا تخافي
امي: ماشي.. انتبه عليها ابني
معتصم: لا تقلقي خالة.. حور بعيوني
نزلت راسي وابتسمت.. لبست الجاكيت تبعي وطلعت مع معتصم بالسيارة.. ونحنا بالطريق طلب عساكر يلحقوه.. وبلش يمشي بالطريق السريع يلي بمنطقتنا.. ما كنا نشوف شي.. كله كان خلا وهدوء.. لوقت ما وصلنا لنص الطريق وشفت الاشارة يلي بالحلم
حور: هون هون.. هون رح تموت البنت
معتصم: متأكدة
حور: اي هاد المكان.. عند هي الاشارة.. وهي شروق الشمس بلش.. كم الساعة
معتصم: 6 الا خمس دقايق.. لكان خلينا ننزل بهاد الزاوية بين الشجر.. العساكر على وصول
حور: بس انا خايفة كتير
معتصم: انتي لا تخافي من شي.. خليكي هون بالسيارة وما تتحركي شو ما يصير
حور: ماشي.. انتبه ع حالك
معتصم: بتخافي عليي!
حور: مو وقته هلء رووح
معتصم: ههههه
نزل معتصم من السيارة وبقيت انا راقب فيه.. لوقت ما لمحت بنت.. عم تطلع من بين الشجر يلي قبالنا وتركض باتجاه الطريق السريع.. البنت يلي شفتها بحلمي نفسها بقيت تركض لوقت ما طلعت سيارة من نفس المكان ولحقتها.. وقف قلبي بهي اللحظة وقت بلش معتصم يقوص ع عجال السيارة لحتى وقفت.. مسك بالصبية واتصل عالعساكر لحد ما وصلو لعنده.. اخدو الصبية معهم والشب يلي بالسيارة.. وطلعو
كان كل شي اشبه بفيلم اكشن.. كإني عم تابع فيلم وعم شوف النهاية
ارتحت كتير انه ما صاب البنت اي أذى
وصل معتصم لعندي وقعد بالسيارة وهوا عم ياخد نفس
حور: يعطيك العافية.. الحمدلله يلي مشيت ع خير
معتصم: الحمدلله.. كل شي بخير بفضل الله وبفضلك
حور: بفضلي! بس انا ما عملت شي
معتصم: انتي سبب كل شي منيح عم يصير هلء
حور: شكراً معتصم
معتصم: انا ما عم جاملك.. وهدية الك رح اعزمك عالفطور بأروق مكان
حور: مافي داعي.. لازم طمن ماما هلء بتقلق
معتصم: اذا مشان امك انا هلء بطمنها..

#الحالمة_بقلم_نداء_الصوالحي
@rwayate
الجزء الرابع
بعد ما خلصت ترتيب البيت.. قعدت ارتاح شوي.. كانت امي بالشغل ومايا بالمدرسة.. مسكت قطعة قماش جديدة وادوات الخياطة ونويت بلش بدمية جديدة.. بس هالمرة رح اعملها إلي انا..
قديه عملت دمى وبعت منهم.. بس ولا مرة عملت وحدة الي..
بلشت اشتغل فيها والتهيت ساعات وانا بعمل.. لوقت ما اتذكرت انه معتصم طلب مني ابعتله اسماء بالاشخاص الي حلمت فيهم من قبل..
كتبت الاسماء يلي تذكرتها وبعتتله اياهم بمسج وكملت شغلي..
===
فقت ع صوت مايا عم تزق فيني.. فتحت عيوني واطلعت فيها.. انتبهت اني نايمة متل ما انا والقماش بايدي
مايا: الي ساعة عم فيق فيكي
حور: والله! من ايمتى جيتي
مايا: قبل شوي.. فتت غيرت تيابي وقعدت فيق فيكي كنتي بسابع نومة
حور: ااخ ما بعرف يمكن نمت من التعب وقلة النوم
مايا: هلء ما بدك تحكيلي شو عم يصير معكن
حور: مابصير شي
مايا: وعمو معتصم شو عم ييجي يعمل هون كل يوم
حور: شغل يا روحي شغل
مايا: شغل شوو
حور: خلص مايا لا تضلي تزني فوق راسي.. قومي لحضرلك الاكل هلء شوي وبتوصل ماما
هربت من مايا واسألتها الي ما بتخلص.. طول عمرها فضولية وطفلة صعبة وعنيدة ولو بدها تعرف شي رح تعرفو حتى لو بأي طريقة.. وهاد الي كنت خايفة منو..
بلشت حضر بالغدا لحتى وصلت امي.. تغدينا سوا وطبعا ما خلصت من اسألتها طول ما نحنا بناكل.. عن معتصم والي صار.. ووين رحنا ووين جيتا ومتى رجعت عالبيت..
====
المسا كنا قاعدين جنب المدفأة وعم نحضر فيلم.. رن موبايلي وكان معتصم.. فتت ع غرفتي ورديت عليه.. كنت مشتاقة اسمع صوته كتير
حور: اهلين معتصم
معتصم: مسا الخير.. ازعجتك!
حور: ابداً.. كيفك
معتصم: بخير مشتقلك
حور:...
معتصم: اي انا اتصلت لخبرك عن الاسماء يلي بعتيلي اياهن
حور: ايه!!
معتصم: متل ما قلتلك في شي مشترك بين هالاحلام وهالناس يلي عم تنقتل.. يعني مو غريبة انه ما بتحلمي باي حد بنقتل.. يعني انا ضابط وعم شوف حالات قتل وطعن كتير بعيدة عن احلامك.. بس الحالات يلي بتحلمي فيهم والاشخاص يلي بحثت عنهم معظمهم كانو اغنياء وشخصيات معروفة
حور: والله!
معتصم: اي مثلاً الست الكبيرة يلي لحقناها كانت مرتو ل وزير الاقتصاد.. والبنت يلي انقذناها اليوم طلعت بنت عقيد في الشرطة
حور: شو!!
معتصم: متل ما عم قلك.. غير الاشخاص بالسنوات الي فاتت كلهن شخصيات مهمة .. والملفت للانتباه انه ولا واحد منهن عرفو يلي قتلو
حور: بتقصد القاتل ممكن يكون الشخص نفسه
معتصم: مو بالضرورة يكون شخص واحد يلي قتل.. بس ممكن يكونو كلهن لاجئين لشخص واحد.. او مجرد رجال عم يشتغلو عند شخص واحد
حور: معتصم انا بلشت خاف
معتصم: من شو تخافي.. حور انتي بامان ما حدا بيعرفك ولا بيعرف عنك شي اطمني
حور: ان شاء الله..
معتصم: انا رح سكر هلء.. لو صار معك شي جديد خبريني
حور: ماشي.. تصبح على خير
===
عم تمر الايام.. والاحلام مرفقاني بمناماتي.. كل كم يوم لازم شوف حلم.. ولحتى الان انا ومعتصم عملنا انجاز كبير بالارواح يلي انقذناها.. لدرجة الكل عم يتسائل كيف معتصم عم يلحق كل هالجرائم.. والصحافة بلشت تتسائل.. بس كالعادة معتصم ما بيعطي اي معلومة لحدا..
معتصم صار جزء كبير من حياتي.. جزء لا يتجزء من يومي..
صرت شوفه كل يوم.. وكإنه شخص من عيلتي وساكن معنا..
امي عم ترتحلو كل يوم اكتر من يلي قبله.. وانا عم حس بالامان والراحة بوجوده معي.. حتى مايا بلشت تحبه وتتعلق فيه..
====
فقت الصبح مفزوعة من حلم جديد بس ما بتذكر ايا شي منه غير وجه معتصم ..
غسلت وجهي وتناولت الموبايل ودقيت ع معتصم كتير بس ما رد
خفت كتير وحسيت قلبي رح يوقف.. رجعت ضليت دقله بس ما رد ابداً
بقيت انطر ساعة لحد ما نفذ صبري.. اطلعت بالساعة كانت 100 الصبح.. امي بالشغل ومايا بمدرستها.. فكرت روح لعنده عالمركز اطمن عليه بس اترددت وخفت امي تنزعج مني
اتصلت فيها لحتى خبرها واخد رأيها
امي: اي امي صاير شي!
حور: لا ماما بس بدي قلك شي
امي: شو امي قلقتيني
حور: ماما انا حلمت ب معتصم
امي: اولي.. صرلو شي
حور: ماما ما صرلو شي بس انا كتير قلقانة وعم دقله ما بيرد.. بدي روح اطمن عليه.. شو رايك
امي: اي امي روحي روحي
حور: ما عندك مانع
امي: لا امي اطمني عليه وطمنيني.. وانتبهي ع حالك
حور: حاضر امي رح حاول ما طول وارجع قبل مايا عالبيت
امي: ماشي حبيبتي الله معك
لبست تيابي وطلعت ركض من البيت.. طول الطريق وانا حاسة نفسي رح ينقطع بدي اوصل لعند معتصم بأي طريقة.. بدي اطمن عليه
بعد ربع ساعة نزلت من التاكسي ع باب مركز الشرطة.. كنت بشوفه لاول مرة من قريب.. اله هيبة والقرب منه بيخوف
فتت لجوا وبلشت اتفتل يمين شمال ما عرفت وين روح.. وقفت عند عسكري لافهم منه
حور: لو سمحت..
العسكري: ايه تفضلي
حور: وين ممكن لاقي الضابط معتصم
العسكري: هاد مكتب الضابط معتصم بس هوا مو هون.. شوي ورح ييجي اذا بتحبي تنطريه
حور: طب فيني اعرف وين هوي
العسكري: عفوا انسة هالشي مو من حقك.. بامكانك تنتظري هون

#الحالمة_بقلم_نداء_الصوالحي
@rwayate
الجزء الخامس
نزلوني ع باب البيت الساعة 6 المسا .. كان وجهي شاحب والخوف عم ياكل جسمي اكل
فتحت الباب وفتت لجوا لقيت امي بوجهي.. ركضت لعندي تصرخ وتقاتل فيا
امي: وييينك لهلء.. لك موتيني من الخوف والرعبة.. وين كنتي
حور:.....
امي: لك ردي.. النا من الظهر عم ندور عليكي.. معتصم رح يموت من خوفه.. ما خلا مكان الا وسال عنك فيه.. ليه موبايلك مسكر.. لك ردي
حور: انا منيحة.. بنحكي بعدين.. لو سمحتي بدي ناام
امي: تنامي!! حوور.. حووور
تركت امي عم تنادي عليا وفتت غرفتي.. قفلت الباب وقعدت عالارض.. ما كنت عم صدق الي صار والحال يلي وصلتله.. كنت حاسة انه هالقصة من الاول ما رح تمشي على خير
طالعت الموبايل من جيبتي وفتحته.. وصلني رسائل كتير من معتصم وامي.. ما قدرت اقرأ شي.. اتصلت ع معتصم ورد من اول رنة
معتصم: حوور.. حور سامعتيني؟!!!
حور: اي معتصم
معتصم: لك وينك انتي.. شغلتي بالي.. لك كنت رح موت.. وين اختفيتي.. صرلك شي
حور: لا انا منيحة بس انشغلت شوي
معتصم: لازم شوفك
حور: ما فيني شوفك.. معتصم انا ما عاد بدي ساعدك
معتصم: شو!! ليه شو الي تغير
حور: ولا شي.. انا اليوم فكرت منيح ولقيت من الافضل انه تتركني بحالي.. انا ما عاد بدي ساعدك ولا بدي شوف وجهك
معتصم: حور انتي واعية شو عم تحكي
حور: اي واعية كتير.. عم قلك انا ما عاد بدي ساعدك.. وياريت لا بقى تتصل عليي.. بخاطرك
معتصم: حور... حووور
سكرت المكالمة وزتيت الموبايل ع الارض.. وانهرت بالبكي.. حسيت قديه انا ضعيفة .. فعلاً انا ما رح اتغير ورح ضل هيك جبانة
قمت عن الارض ونمت ع التخت وضميت رجليي لصدري بخوف وانا عم ارجف.. قعدت اتذكر يلي صار معي من وقت ما فوتوني ع السيارة..
من لما فقت بمكان مهجور ومخيف ومعتم كتير.. فتحت عيوني وقتها بصعوبة من قوة الضو الي موجه عليي
((( حور: بعد الضو عن عيوني رح تعميني
مجهول: هيك احسن!!
حور: مين انتو شو بدكن مني
مجهول: ما بدنا غير راحتك وسلامتك انسة حور
حور: طب خلوني ارجع عالبيت انا ما عملت شي
مجهول: مو هلء.. بس ييجي البيك
حور: انو بيك
مجهول: ها ليكو اجا.. اتفضل يابيك هي البنت يلي طلبتا
نضال: اهلا وسهلا بست الحسن والجمال
اطلعت بالرجال يلي عم ينادولو البيك.. كان رجال كبير باواخر الخمسينات.. الشيب غازي ع شعرو.. كان مألوف الي بطريقة غريبة.. حتى صوته كإني سامعتو من قبل او محفور بذاكرتي
حور: مين انت
نضال: انا نضال باشا.. الي رح يخليكي تعرفي تسكتي
حور: اسكت عن شوو.. انا ما عملت شي
نضال: هلء كل يلي عم تعمليه وبتقولي ما عملتي شي.. لا لا رح ازعل هيك انا
حور: لك شو بدك منننني
قرب مني وشدني من شعري بقوة لدرجة حسيته رح يطلع بايده
حور: اااااخ اترك شعررري
نضال: هلء انااا نضال باشا.. يخرب شغلي ومخططاتي من تحت راس وحدة زعرة متلك
حور: مخططات شو
نضال: كنتي مفكرة احلامك هي رح تضلها سر وما حدا رح يدرى فيها!!
حور: شوو
نضال: عملتي من الجبان معتصم بطل! طالعتيه ع حساب شغلي وكتاافي
حور: انا ما بعرف عن شو عم تحكي
نضال: اسمعي.. انا ما بدي أئذيكي.. وما بدي اخد واعطي معك اكتر انتي ما بتهميني.. كل يلي بدي اطلبه منك تسكري تمك.. صعبة هي!!
حور:....
نضال: نحنا كنا عم نراقب الضابط معتصم وكنت شوفك معه.. وضليت وراكن لعرفت حكايتك.. يعني ما فيكي تنكري.. وكل شي ساعدتيه فيه كان عم يخرب شغلي لهيك لازم تسكتي عم تفهمي
حور: انا ما رح اسكت ولا وقف شي.. انا رح كمل وانقذ ارواح ناس ابرياء انت عم تقتلهم بلا سبب
نضال: هههههههه برافوووو.. زقفولها شباب..
ضحك بصوت عالي وسكت فجأة وتحولت ابتسامته لغضب واطلع عليي بعيون متل الجمر
نضال: هدول مووو ابرياء.. كلهن ناس نصابين بينهبو مال العالم كلهن بيستحقو الموت.. وانا عم اعطيهم الشي يلي بيستحقوه
حور: مين انت لحتى تحاسبهم.. الهم رب يحاسب.. انا ماا رح اسكوووت عم تفهم
نضال: لا رح تسكتي غصب عنك مو بكيفك.. والا بدي تودعيلي هي الامورة
قرب مني موبايل وفتح فيديو لمايا اختي وهي عم تطلع من مدرستها وتمشي بالشارع.. بس شفتها حسيت قلبي رح يوقف.. خفت كتير واتاكدت انه كلامه مو لعب ولا مجرد حكي.. القتل عندهم متل شرب المي وممكن باي لحظة يقتلوها
حور: ط ط طيب انت شو يلي بدك اياه
نضال: شطورة.. ما بدي شي.. بدي رجعك ع بيتك سالمة وآمنة.. وكل يلي عليكي تطلعي معتصم من حياتك وتطفشيه وما عاد تساعديه وتتركيني اعرف اشتغل.. وشو ما حلمتي تفي ع جهتك الشمال وكملي نومك
حور: بس
نضال: ولا بس ولا شي.. ما عندك الا خيارين.. اما تنسي قصة الاحلام وتعيشي بين اختك وامك.. او تودعيهم وتقرأي ع ارواحهم الفاتحة
حور: ماشي ماشي بترجاك لا تإذي اختي وامي انا ما الي غيرهم .. انا رح اعمل متل ما بدك
نضال: ايه هيك ها.. من اول ماشفتك قلت هي بنت ذكية.. تشرفت بمعرفتك ياحلوة.. ما بدي ارجع شوف وجهك مرة تانية اي..
حور: ولا انا..
نضال: خدوها من وجهي..

#الحالمة_بقلم_نداء_الصوالحي
@rwayate
الجزء السادس
مر يومين ع الي صار وانا ومعتصم ما شفنا بعض ولا حكينا.. كلماته لسا عم ترن براسي.. نظرة الخيبة الي شفتها بعيونه ما عم تفارقني.. عرفت حالي قديه ضعيفة ومحتاجة احكي وفضفض.. كل شي عم اعملو غصب عني.. مافي شي بإرادتي..
بقيت بغرفتي طول الوقت عم اطلع بالفراغ.. ما كنت حاكي امي ولا اختي.. حاولت امي تفهم مني سبب تغيري بس ما قدرت احكيلها شي.. لدرجة انها اتدايقت مني كتير وحست يلي عملته خوف وضعف مني.. حتى مايا حقدت عليي لاني زعلت معتصم وما بقى ييجي لعنا..
المسا تعبت من كتر التفكير وحاولت اشغل حالي بشي.. طالعت الدمية يلي كنت اعملها لحالي وطالعت الغراض وقعدت كمل فيها واعمل ملامحها وحاول انهيها.. الساعة 9 ونص المسا كانت خالصة تماما.. اطلعت فيها وقعدت ابكي
كانت نسخة مصغرة عن معتصم.. دمية بتشبهو كتير.. بلون بشرته وخيوط بلون شعره الاسود واللبس يلي عم يلبسو ع شغلو.. ما عرفت اضحك ع حالي ولا ابكي
حاولت طول الوقت اشغل حالي عنه.. بس بالنهاية ما طلعت الا بدمية طبق الاصل عنه..
====
من كتر التعب والارهاق ولاني الي يومين ما غفيت عيني.. نمت الليل بلا هز.. رميت كل شي من ايدي ونمت
كانت نومة عميقة ومريحة كتير.. بس سرعان ما بلشت اعرق وارجف والكوابيس بلشت تيجي لعندي..
بالحلم هاد كنت عم اختنق وحاسة روحي عن تنسحب مني.. شفت حالي واقفة ع باب مشفى وعم أقرأ باسمه.. وشي عم يقلي فوتي.. فتت وبلشت امشي كان المشفى فاضي وما في اي مخلوق.. عم امشي واطلع حواليي.. ودور ع حدا بس ما بعرف ع مين عم دور..
بقيت امشي لوقت ما وصلت ل باب غرفة مريض.. كان ع باب الغرفة 22 عساكر مقتولين عالارض.. بس شفتهم غمي ع قلبي.. اخدت نفس وكملت مشي وفتحت الباب شوي شوي واطلعت ع المريض يلي متمدد ع السرير واطلعت ع الساعة يلي بجنبه كانت واقفة ع 7.. رجعت دققت بالمريض الي نايم بلعت ريقي بس شفت شكله.. كان ابي.. اي ابي.. نسخة عن ابي بس ع رجال اكبر نفس وجهه وشعرو.. نفس ملامحو بس اكبر بالسن وشايب.. كنت رح روح اركض لعنده وحط راسي ع صدرو.. بس قبل ما اتحرك اي خطوة.. انتبهت انه في عندو تنين جوات الغرفة عم يقربو عليه.. كانو عم يقربو وانا ارجع لورا..
اتخبيت ورا الباب من برا واطلعت عليهم بطرف عيني.. كان واحد منهم ماسك مخدة وبيقربها على ابي.. حطها ع وجهو وبلش يخنق فيه.. وانا حاطة ايدي ع تمي ومو قادرة طلع صوت ولا صرخ وحاسة حالي عم اختنق مع ابي.. والرجال التاني كان عم يضحك.. كان فاتل ظهرو ومو شايفة شكلو.. كان عم يضحك ويحكي للقاتل..(( اخنقو.. اخنقو لنخلص منو.. واخيراً وصلنا للشخص المطلوب)) واول ما خلصو فتل لناحيتي.. وانا بس شفت شكله صرخت وفقت من الحلم
=======
صرت ارجف بشكل هستيري وصابتني بردة فظيعة.. جسمي كلو صار يوجعني..
ما استوعبت شي من الحلم
ليه حلمت بأبي.. وشو الهدف من هالحلم اذا ابي ميت من زمان..
ركضت عالحمام وصرت استفرغ بشكل كبير.. راسي عم يوجعني وبطلت جمع ومو قادرة اربط كل هالاحداث مع بعض..
فاقت امي ع صوتي واجت لعندي
امي: حور.. شو صاير معك.. بردانة! تعبانة شي!!
حور: تعبانة كتير امي.. تعبانة وحاسة رح موت.. تعبت من الاحلام تعبتتت
امي: اهدي يابنتي اهدي..
اخدتني ع غرفتي وساعدتني لاتمدد عالتخت..
امي: شفتي حلم جديد
حور: لا امي.. باينتو كابوس مو شي تاني
امي: يعني ما حلمتي بحد عم ينقتل
حور: لا امي حلمت.. بس بشخص ميت من الاساس.. يعني كان حلم مكرر.. ما بعرف يمكن كابوس او ذكريات
امي: خلص ارتاحي انتي هلء انا رح ضل جنبك
بقيت امي جنب راسي عم تقرا قرآن وانا حاولت غمض عيوني وارجع نام بس ما قدرت.. تفاصيل الحلم لسا ببالي.. وشكل نضال لما فتل ظهرو بالحلم ما قدرت انساه
هالحلم اكدلي انه نضال كان السبب بموت ابي.. وكان ورا كل شخص انقتل
بس ليش لارجع احلم انه قتل ابي مرة تانية.. شو الفايدة هلء بعد كل هالسنين.. وكيف بدي اثبت انه هوا يلي قتلو لابي.. مافي اي اثبات.. وما حدا رح يصدق احلامي..
ضليت اتقلب بتختي لتطلع النهار .. اطلعت ع الساعة كان 6 الصبح كان الوقت بكير وامي بعدها ما نامت متلي ولساتها مع تقرأ أذكار وقرآن.. قمت اخدت دوش وعملت قهوة الي ولامي وقعدنا سوا.. كانت طول القعدة عم تحاول تحكي معي وتفتح مواضيع بس انا كنت شاردة تماماً ومو مركزة باي شي عم تقوله.. لوقت ما نطقت باسم معتصم
حور: شبه معتصم.. بعتذر امي ما سمعت شي كنت شاردة شوي
امي: كنت عم احكيلك اني عم اتواصل مع معتصم ع طول واطمن عليه بس حالته النفسية كتير سيئة بسبب والده
حور: اي !!
امي: من وقت الي مرض وهوا موجود بالمشفى وفايت بغيبوبة مفاجأة وما بعرفو شو سببها
حور: اي خبرني من قبل.. يعني والده لهلء ما فاق!
امي: لا ابداً.. هوا كتير خايف ع والده وبيتمنى يطلعه من المشفى حاسس خطر ع حياته
حور: كيف يعني ما فهمت