#حب_قتله_الشيطان_بقلم_حلا_الشويكي
القصة واقعية
@rwayate
الجزء الأول
الامنيات ليس دائما تتحقق .. وان تحققت ليس دائما تكتمل وان اكتملت .. ستنهدم تتحطم .. ستنكسر وتكسر روحك .. حتما ستكسرك ..
انا رنا .. عمري 24 سنة .. كان عمري 20 سنة وقت خطبني مؤيد .. خطبتنا كانت تقليدية بس بفترة الخطبة حبينا بعض كتير .. كنت لو اطلب منو نجمة من السما ينزلي ياها لحضني لك اييي ايييي حبينا بعض لدرجة انو لغينا كلمة مستحيل من قاموس حياتنا .. كلشي ونحنا سوا بيصير ممكن
رنا : حبيبي .. شايف هالنجمات يلي بالسما ؟
مؤيد : لا بس شايف قمر قاعد جنبي
رنا : ( بخجل ) تسلملي
مؤيد : شايفن للنجمات ( مسك ايدا وباسا )
رنا : على عددهن وعدد النجمات المخفيات بحبك بحبك بحبك بحبك
مؤيد : وانا بموت فيكي
سندت رنا راسا على كتفو وتنهدت ..
مؤيد : شبك عم تتنهدي حبي ؟ في شي زاعجك ؟
رنا : لا .. شو رح يزعجني وانا معك ؟ بس مو حابة اتركك وارجع عالبيت بدي ابقى معك
مؤيد : يلا .. بس ليتحسن وضعي شوي بنحدد موعد العرس
رنا : بحبك
انا ومؤيد كنا حالة حب نادرة بهيك زمن .. يخاف علي من النسمة .. يحبني ويهتم فيني ما كان يجي يوم ما شوفو او اسمع صوتو
كنا نسهر سوا .. نحكي ونخطط كتير لحياتنا اللي جاي ..
اشتقت اليك يامن انسج الحرف من دمعي
اشتقت ان اغفى بين احضانك وتهمس لي
كلمات عشق وحب وانت تقسم لي
لن يفرقنا شيء ابدا .. ولكن اااه والف اااه من قدري
مؤيد : حبيبتي انا رح روح عند خالتي .. اتطمن عليها ومر لعندك شوفك .. اشتقتلك
رنا : ماشي حبيبي ناطرتك
راح مؤيد لعند خالتو واجا لعندي معصب كتير ..
رنا : روق حبيبي روق .. شبك يا قلبي ؟
مؤيد : لك انو انا بعمل شي خير ليش هيك يصير ؟ لك خالتي خالتي ترفع صوتا علي وتهددني ؟؟ شو عملت انا ليش ؟
رنا : اهدى حبي .. رح اعملك فنجان قهوة لتروق وافهم منك ليش معصب شغلت بالي
قمت وانا متلبكة وقلبي عم يدق بسرعة وصرت ابكي بالمطبخ وانا عم بعمل القهوة فاتت علي امي وشافتني عم ببكي
امي : رنا ؟ شبك ؟
رنا : مؤيد زعلان
امي : انتي زعلتيه يعني ؟
رنا : لأ
امي : لكن ليش عم تبكي ؟
رنا : ما بحب شوفو زعلان ومعصب قلبي بيوجعني
اي اي عنجد ما عم بالغ .. اي شي يحس فيه حس فيه معو .. ازا فرحان بفرح معو بلا ما اعرف ليش فرحان وازا زعلان بزعل معو بلا ما اعرف ليش زعلان .. وهو نفس الشي .. كانت مشاعرنا مرتبطة ببعض بكلشي
عملت القهوة ومسحت دموعي ورحت لعند مؤيد قدمتلو القهوة وقعدت جنبو وصرت اتطلع فيه مشان يقلي شو يلي زاعجو
رنا : اي حياتي صارلي ربع ساعة عم اتصفن فيك ناطرتك تحكي شبك وما عم تحكي .. شبك ؟
مؤيد : رحت عند خالتي .. وانتي بتعرفي خالتي وحيدة ما عندا ولاد .. اي رحت دقيت الجرس كتير ما فتحت خفت عليها .. فتحت الباب وفتت
رنا : اي ؟
مؤيد : وانا عم بدخل لجوا وبنادي عليها اجت من عند جارتا وشافتني جوا البيت .. صارت تدعي عليي وتهددني وتقلي انا بفرجيك ما رح خليك تتهنى بحياتك وحكت حكي كتييير .. بس اكتر شي زعجني بس قالتلي ما رح خليك تتهنى بحياتك انو لييييش ؟؟
رنا : حبي .. هي ما حكت هيك من قلبا اكيد هي تفاجأت بوجودك يمكن ارتعبت بس شافت في حد ببيتا ومن الرعبه ما عاد عرفت شو عم تحكي
مؤيد : لك ما شفتيها شلون كانت تحكي كانت احمر ومعصبة و ...
رنا : خلصنا حبيبي ما تزعل بزعل معك انا
فاتت امي وانا عم بحكي ومعها كاسات عصير ...
امي : اي والله بتزعل معك ههههه
رنا : اميييي
امي : كانت تبكي لأنك معصب وزعلان هههههه
مؤيد : عنجد رنوشتي ؟
رنا : اي .. ما فيني شوفك زعلان
مؤيد : اي مرت عمي ممكن اخطف منك رنا اليوم ونطلع نتعشى برا ؟
امي : اي خدو راحتكن
مؤيد : تسلمي .. يلا رنوشتي البسي مشان نطلع
لبست وطلعت انا ومؤيد .. رحنا لمطعم نتعشى ... طول الطريق وانا متل المصدومة .. انو ما خبرني انو عازمني عالعشا ولا خططنا لشي ابدا
مؤيد : شبك متفاجئة ما ؟
رنا : بصراحة اي
مؤيد : طيب بس نخلص عشا بنحكي
رنا : هلأ احكي لا تخوفني .
مؤيد : لك ما في شي بس ناكل بنحكي
رنا : ماشي
خلصنا اكل وبعد العشا طلب الحساب و طلعنا من المطعم على مول .. مسك ايدي ومشينا سوا ..
مؤيد : احزري شو ؟
رنا : شو ؟
مؤيد : بحبك
رنا : وانا بحبك
مؤيد : رنوش قربي بدي قلك شغلة
رنا : ( بإستغراب ) اي ؟؟
مؤيد : رح نحدد موعد العرس بعد جمعتين منيح ؟
من الفرحة ما عاد تزكرت انا وين وصرت اضحك وابكي بصوت عالي .. وكتير ناس وقفت وصارت تتفرج علينا ..
مؤيد : فرحتك هي نستني كل همومي
رنا : هموم شو يا عمري ونحنا سوا .. ممنوع الحزن ممنوع البكي ممنوع الزعل بس بنفرح وبنطييييير
مؤيد : يلا تعالي ناكل بوظة بهالمناسبة
رجعت عالبيت وكنت مبسوطة كتير .. فتت على غرفتي وانا عم بتخيل حياتنا شلون رح تكون .. الحب يلي بيننا اكيد رح يكبر اكتر واكتر ..
تسطحت عالتخت وصرت فكر بالحفلة وسو رح نحط أغاني كنت اضحك كتير من فرحتي بحبيبي يلي رح نعيش سوا انا وهو طووول العمر ..
بنص الليل فقت الساعة 12 مخنوقة وصرت ابكي

#حب_قتله_الشيطان_بقلم_حلا_الشويكي
@rwayate
الجزء الثاني
اجت امي لعندي ...
امي : رنا ؟؟ ليش عم تبكي ؟؟؟
رنا : ما بعرف يا امي بس شفت منام بشع .. بشع كتير
امي : شو شفتي ؟
رنا : حلمت انو انا و مؤيد افترقنا
امي : اي ؟؟
رنا : شو اي ؟ في ابشع من هيك منام ؟؟
امي : ( ضمتني ) روقي حبيبتي انتي لأنك متعلقة فيه كتير عم تخافي تفترقو لهيك شفتي هالمنام لا تخافي
رنا : امي انا ومؤيد مستحيل نفترق .. صح ؟
امي : اي صح .. (مسحت على راسي ) يلا نامي حبيبتي ولا عاد تبكي استعيذي بالله من الشيطان ونامي
تركتني امي وطلعت من الغرفة .. وانا ما نمت ابدا .. فراق مؤيد كان بالنسبة لألي كابوس مرعب .. هالكابوس تكرر اكتر من مرة من يوم يلي حددنا موعد عرسنا ..
مرت الأيام واجا موعد عرسي .. كنا فرحانين كتير انا و مؤيد .. دقلي وانا بالصالون ..
مؤيد : حبيييي
رنا : اي عمري لحظه ( حكيت مغ الكوافيرة مشان تطفي السيشوار شوي ) اي حبي معك
مؤيد : شلونا عروستي الحلوة ؟
رنا : مبسوطة كتييييييير كتيييييير مو مصدقة متى شوفك وضمك و ... احم حوالي عالم ( التفتت وكان الكل عم يتطلع فيني ومبتسم خجلت كتير )
مؤيد : اي عادي عروستي انتي ليش الخجل
رنا : اي بس هلأ لازم روح يا عريسي هههه
مؤيد : ماشي حبي .. باااي
ما كان في شي ممكن يوصف فرحتنا .. خلصت من الصالون واجا اخي اخدني عالبيت لحتى وصلو مؤيد واهلو .. واخدوني من بيت اهلي .. طول الطريق ماسك ايدي وعم يبوسا ويقلي بحبك .. وصلنا القاعة وبلشت الحفلة .. كانت الحفلة حلوة كتير تصورنا سوا صور كتيييير كتييير ....
وهيك خلص العرس ركبنا بالسيارة مشان نروح على بيتنا .. اول ما فتنا السيارة انكسر الشباك يلي جنبي
رنا : شلون انكسر ؟ ما قربتلو شلون هيك ؟
مؤيد : ..... ما بعرف .. لا تزعجي حالك فداكي حبي .. هلأ رح نوصل بيتنا ونعيش سوا انا وانتي .. رح يتسكر علينا الباب ورح تصيري ملكي انا
رنا : ...... ( ضحكت بخجل )
مؤيد : دخيل هالضحكة شو بحبا
وصلنا انا ومؤيد بيتنا يلي حلمنا نعيش سوا فيه ...
رنا : صرنا سوا حبيبي .. ما عاد يمر يوم بلا ما شوفك ابدا
مؤيد : اي
رنا : مؤيد شبك ؟؟ ليش مزعوج ؟
مؤيد : ما بعرف يمكن من الضغوطات هالفترة ... ما بعرف انا بدي نام تصبحي على خير ( فتل وشو للجهة التانية )
رنا :مؤيد انا زعلتك شي ؟
مؤيد : لا بس انا تعبان بدي نام نامي انتي كمان
رنا : ........
نمت وانا عم ببكي .. شو يلي تغير من 5 دقايق كان مستعجل لنوصل البيت .. شلون ما عاد طايق يتطلع بوشي ؟ لك ليش ما لمسني ليش ما ضمني ؟؟
تاني يوم الصبح اجت امي لعنا ..
امي : صباحية مباركة يا عروستنا
رنا : اهلين امي
امي : رنا .. شبك ؟؟ مو على بعضك ليش ؟
رنا : ما في شي امي تفضلي اقعدي ..
امي : وينو مؤيد ؟
رنا : نايم هلأ بفيقو
امي : لا خلص .. طمنيني .. كلشي تمام ؟
رنا : .....
امي : رنا .. عم بسألك كلشي تمام ؟
رنا : ( تبكي ) .... ما قربلي ولا اتطلع بوشي يا امي
امي : عم تمزحي ؟ خجلانه تخبريني ؟
رنا : لا والله
امي : طيب اصبري يمكن لأنه انضغط هالفترة بالعرس وهيك تعبان شوي
هزيت براسي وابتسمت .. وقمت عملت قهوة شربتا امي وراحت .. فتت لفيق مؤيد مشان يفطر
رنا : مؤيد حبيبي .. يا عمري قوم نفطر سوا
مؤيد : اي اي يلا .. ( فتحت عيونو اتطلع فيني وشو صار احمر كتير وحسيتو اختنق لف وشو عالجهة التانيه ) افطري انتي انا ما بدي
رنا : ......
حسيت بوجع بقلبي ليش هيك عم يعاملني .. والله بحبو كتير ليش هيك مو طايقني .. ما عملتلو شي انا بالعكس هو يلي عم يكسر خاطري مو انا .. عصيت بدمعتي وقمت من جنبو
بعد نص ساعة طلع من الغرفة .. لابس ومجهز حالو يطلع من البيت ..
رنا : مؤيد
مؤيد : ( علي بلا ما يتطلع فيني ) نعم حبيبتي
رنا : حبيبتك وعم تعاملني هيك ؟؟
مؤيد : رنا اتحمليني ما عم اعرف شو بني
رنا : لوين طالع ؟؟
مؤيد : لعند اهلي
رنا : لازم هني ييجو اليوم مو انت تروح
مؤيد : اتصلت بأختي هناء وقلتلن اني رح روح عندن
رنا : ( بعصبية ) الله معك
تأفف مؤيد وتنهد وطلع من البيت .. وغرقت انا بدموعي وقفت اتفرج على وشي وجسمي بالمراي
( يعني انا شو فيني شي مو عاجبو ؟ وربي ما تغير فيني شي وريحتي عطر ليش ما لمسني ابدا ؟ مو صار جوزي وكنا نتمنى هاللحظة على احر من الجمر ؟ يا الله ساعدني )
قعدت عالتخت و صرت ابكي واشهق ودموعي تنزل بغزارة .. كانت تنزل متل الجمر .. تسطحت وانا عم ابكي وغفيت
فقت بعد ساعتين على موبايلي عم يدق ..
رنا : اي امي
امي :شو صار معكن ؟
رنا : ولا شي
امي : ..... صوتك تعبان فيكي شي ؟
بس سألتني امي رجعت ابكي ..
رنا : امي شو عم يصير ؟ والله بنحب بعض كتير ليش هيك صار ؟
امي : لك لسا ما صارلك 24 ساعة متجوزة لا تزعلي .. كتير بتصير بس انتي اهدي وكلشي الو حل
رنا : انا مو مشان شي بس معقول انا مو عاجبتو ؟

#حب_قتله_الشيطان_بقلم_حلا_الشويكي
@rwayate
الجزء الثالث
اول مرة يشوفك هو ؟ صارلكن حدود سنة ونص مخطوبين هلأ ما عاد تعجبيه ؟شيلي هالحكي من بالك و اصبري شوي وازا بقي هيك انا بحكي معو
رنا : لا لا لا .. لا تحكي شي
وانا عم حاكي امي رجع مؤيد عالبيت ..
رنا : امي اجا مؤيد بنحكي بعدين
مؤيد : مرحبا
رنا : اتطلع فيني طيب .. مرحبا الي ولا للباب
مؤيد : ( اتطلع فيني ) مرحبا
رنا : ليش صار وشك احمر بس اتطلعت فيني و طلعت الكلمة من تمك مخنوقة اه ليش ؟ انت ما عم تعرف مين انا ؟ انا رنوشتك ( قمت من تختي ورحت لعندو ) لك شبك ما عم تتزكر ايامنا الحلوة سوا ؟ ما عم تتزكر شو كنا نتمنى نعيش سوا ببيت واحد ؟ ( مسحت دمعتي و مشيت من جنبو )
مؤيد : انا ما عم اعرف شو فيني يا رنا والله ما عم اعرف شو فيني بس ما عم احسن اتطلع فيكي ولا عم احسن قربلك .. عم حس اني فقدت رجولتي كلا ما عم حس بشهوة حتى وانتي جنبي .. ونحنا مخطوبين كنت حس بشهوة لو لمست ايدك بس هلأ انا ما عم اعرف شو فيني ما عم حس بشي ابدا .. ابداااااا ( خبى عيونو بإيدو وصار يبكي )
رحت لعندو مشان امسحلو دموعو .. لف وشو عني وقلي اطلعي من هون بدي ارتاح ..
اتصلت فيني حماتي ...
حماتي : الو كيفا عروستنا ؟
رنا : ( بصوت تعبان ) الحمد لله مرت عمي كيفك انتي ؟
حماتي : تمام .. ليكي حبيبتي انا متأكدة انه مؤيد ما خبرك .. لهيك رح خبرك انا
رنا : شغلتي بالي مرت عمي شو في ؟
حماتي : بس حكالي مؤيد مشكلتو اتصلت بجارتنا ام حسني هي ام حسني يلي بترقي اطفال وصبايا بيجو عندا من وين مكان
رنا : عرفتا اي
حماتي : وخبرتا كلشي صار مع مؤيد .. حكتلي انو ضروري يشوفو شيخ ويشوف ليش هيك عم يصير
رنا : يعني رح يتحسن ما ؟ ورح يرجع يحبني صح ؟
حماتي : ان شاء الله يا عمري لا تزعلي انتي .. كلشي الو حل
رنا : يااااارب
فورا تزكرت المنامات يلي كنت شوفا قبل عرسنا بكم يوم .. ( يااااااااااارب لا تفرقنا )
راح مؤيد عند اول شيخ .. قرأ عليه وخبرو انو مسحور .. والسحر الي والو مشان ما يلمسني ولا يقربلي .. و فيه مس من 7 شياطين خرس .. وطرش يعني مستحيل يطلعو منو وهنن جواتو بس ليمنعوه عني انا !
بس مؤيد ما يأس .. وكل يوم كان يروح عند شيخ اقوى من يلي قبلو ..
بعد 8 شهور من المحاولات الفاشلة اجت لعندي امي بلا ما تخبرني ..
رنا : امي .. تفضلي
امي : اي رح فوت بس انطرك لتلبسي وتضبي تيابك وتجي معي
رنا : لوين ؟
امي : ترجعي لعنا .. مر 8 شهور وانتي ومؤيد متجوزين بالإسم .. وكنتي تصبريني بكلامك انه شاف شيخ قوي وعلاج قوي ومدري شو بس هلأ خلص البسي وتعالي معي ورح يطلقك بسهولة لأنه مو رجال
رنا : اول شي لا تحكي عن مؤيد هيك .. هاد حبيبي وجوزي تاني شي ما رح اجي معك وانا بدي عيش معو حتى لو ما صار شي بيناتنا بدي ابقى معو لأني بحبو بحبوووووووو
صرت ابكي واضرب رجلي بالأرض وصرخ ما بدي روح معا .. اجا مؤيد وانا بهالحالة .. وكنت قول لأمي اني بدي ابقى معو وما بدي اتركو فتح باب البيت وسمعني عم ابكي و وصرخ ما بدي اتركو بدي ياه بحبو
مؤيد : رنا .. ما عاد يزبط نكفي سوا خلص كل الشيوخ حكو انو مستحيل نقدر نكون ازواج
رنا : مؤيد ؟ ( مسحت دموعي وركضت لعندو اختنق وصار يلف وشو عني ) مؤيد .. حبيبي اتطلع فيني انل رنوشتك انا حبك انا وانت مستحيل نفترق
مؤيد : هيك القدر بدو يا رنا بس اتركي ايدي رح اختنق اتركيني بعدي عني وروحي مع امك .. ما رح يزبط نكون سوا
وقفت متل المصدومة .. شلون يعني ؟ انا مو فهمانة شي يعني نحنا اجتمعنا بس مشان نفترق ؟؟ مشان يحترق قلبي ؟
رجعت مع امي على بيت اهلي .. وقلبي مكسور وعم حس الدنيا بوسعا داقت فيني .. بعد يومين من القهر والوجع والبكي اتطلقنا رسمي .. دقتلي اختو مشان تطمن علي لأنه الكل بيعرف انا بموت بمؤيد انا مجنونه فيه هو كل حياتي
هناء : كيفك رنا والله قلبي معك
رنا : ( تبكي ) كيف رح كون يعني .. ااااخ يا هناء ااااخ
هناء : الله لا يوفق يلي كان السبب
رنا : مين رح يكون مين يلي بدو يفرقنا مين ؟ او قصدي مين يلي فرقنا ؟؟ وليش ؟؟ رح موت يا هناء رح موت
هناء : الكل شك بخالتي .. هو اكيد سحر واكيد مستحيل تكونو مع بعض بس مين يلي سحرو ما بنعرف بس الكل شك بخالتي لأنها بتتعامل بهالشغلات .. بتزكر بس كانت تروح عمشعوذات مشان يعملولا حجاب مشان تجيب ولد وكانت تدفع يلي فوقا ويلي تحتا .. هي بتغار من اي حد بيجيب ولاد حتى لو اختا .. يعني هي عقدة عندا ما بتحب تشوف حد مبسوط فهمتي علي ؟
رنا : يعني شافتنا بنحب بعض كل هالقد راحت مدري كم دفعت مشان نفترق ؟ يا رب ازا كانت هي دعوة مظلوم مقهور قلبو مكسور ربي يفرجيني فيها يوم اسود من السواد .. اسود من قلبا الحقود
هناء : روقي ولا بقا تبكي حاج اهدي استعيذي بالله من الشيطان
رنا : امانة ديري بالك على مؤيد هاد رووووحي يا هناء
هناء : ليكي رح ضيفك عالفيسبوك هلأ ورح ضل اتطمن عليكي ازا ما بيزعجك هالشي
رنا : لا ما بيزعجني ناطرتك
سكرنا الخط وانا انهرت بكى من جديد ...

#حب_قتله_الشيطان_بقلم_حلا_الشويكي
الجزء الرابع و الأخير
@rwayate
انو نحنا عنجد افترقنا واحلامنا انهدمت .. فتت عاليوتيوب دورت على غنية مشان ابعتلو ياها شفت غنية خليني ذكرى .. سمعتا وبكيت اكتر
لو عشت بعدي وبعد بعدي جيت وحبيت
ابقى افتكرني واحكي عني مهما كنت نسيت خليييني ذكرى جميله عندك واوعي تنسى زماان
متقولش حبي وقت عدى ويوم خلاص عشنااه
قول ان حبي حب غاالي بس هي حياه
وابقى افتكرني بكلمه حلوه تنسي قلبي الأه
خلي الفراق اجمل فراق في دنية العاشقييين وأن حد سألك عني قولو.....كنا اوفي اتنين وكان حبيبي وكان حياتي وعشره ليها سنين
بعتلو ياها وقلبي عم ينزف .. وكتبتلو بحبك بحبك كتيييييييييييير
عشت اصعب ايام حياتي وانا عم حاول انساه .. وانا عم حاول قول هاد القدر ولازم نرضى ..
بعد كم يوم من طلاقنا حسيت اني لازم حاكيه وقلو واني اشتقتلو كتير .. ما حسنت ما دقلو وحاكيه .. دقيت كتير وما رد علي ابدا .. حضنت الموبايل وانا عم اتزكر لحظاتنا الحلوة سوا وابكي واشهق وبكل شهقة بكى حس قلبي رح يوقف ..
تاني يوم .. رحت اخدت من الأستديو صور وفيديو عرسي ورجعت عالبيت .. ترددت كتير اني افتحن .. بس قويت قلبي وفتحت الكيس يلي فيه الصور طالعت اول صورة كان لونا اسود .. والتانية والتالتة وكلن هيك شغلت فيديو عرسي كان نفس الشي كلو اسود كسرت السيدي وشقيت الصور وانا عم ببكي ( ايييييي متل حظي ) اجت امي وانا ببكي
امي : شو في رنا شبك ؟
رنا : كلشي اسود اسود صور عرسي والفيديو وحظي وايامي
ضمتني امي وباستني ومسحتلي دموعي ..
امي : الله لا يوفق يلي كان السبب
مرت هالفترة وكانت من اصعب ايام حياتي وانا ما عم اكل ولا اطلع من غرفتي بس عم اتزكر مؤيد وايامي معو وابكي .. اشتاقلو وغصة بقلبي عم تخنقني ..
بعد شهر كنت عم اتصفح الفيسبوك .. انتبهت على صورة نشرتا هناء على صفحتا مبروك الخطوبة لأحلى اخ بالعالم مبروك مؤيد ربي يفرح قلبك .. رجفت ايدي وتجمعت الدموع بعيني .. خبيت تمي بإيدي وصرت ابكي .. يعني انا مو فهمانة شي .. مو فهمانة شلون يعني طلقني وخطب .. يعني هو عم يكزب علي ؟ يعني بيقدر يعيش مع غيري ومعي لأ ؟
نطرت شوي لحتى هديت .. وبعتت لهناء
رنا : مرحبا
هناء : اهلين كيفك ؟
رنا : فرحانة كتير
هناء : دوم ؟؟
رنا : ليش كتبتيلي علامات سؤال ؟؟
هناء : انو فرحيني معك
رنا : حبيبي خطب .. بعد شهر من طلاقنا خطب .. بيقدر يعيش مع غيري بس معي لا صح ؟؟
هناء : اهدي حبيبتي فيكي تحكي صوت ؟ رح دقلك
رنا : احكي هون ما بدي احكي صوت تعبانة
هناء : طيب انتي وهو السحر يلي بينكن مشان تبقو اخوات .. مستحيل يقدر يلمسك .. و كل الشيوخ عجزو عن علاجو هو ما سكت حتى بعد طلاقكن سأل شيخ انو ازا رجعك بيرجع وضعكن طبيعي او لا والشيخ قلو مستحيل تعيشو سوا ومستحيل تكونو ازواج .. رنا اخي بيحبك بس الله لا يوفق يلي فرقكن
رنا : امين
كان ردي بارد ببرود روحي .. ما عاد حس بشي تخدرت من كتر الوجع .. قفلت مع هناء ونمت .. نمت مشان انسى الواقع يلي عايشتو .. حبيبي تجوزني وطلقني وخطب غيري ..
بعد 3 شهور ..
رنا : مرحبا هناء
هناء : اهلين
رنا : كيفك ؟
هناء : تمام
رنا : شو صار مع مؤيد ؟ كنت بدي ابعتلك عالماسنجر لقيتك حاظريتني
هناء : اسفة لأني حذفت صداقتك بس ما بدي تنقهري اكتر
رنا : ليش انقهر شو في ؟
هناء : ولا شي
رنا : مؤيد اتجوز ولا لسا ؟
هناء : رنا .. مؤيد تجوز ومرتو حامل شهر ونص
رنا : هههههه
هناء : ليش عم تضحكي ؟
رنا : فرحانتلو هههههه اسمعي اسمعي .. ( كملت كلامي بزلغوطة وانا عم ببكي واشهق ) اوييييها و يا حبيبي ونور عيوني اويييها وعنك اللي ما بيخافو الله بعدوني اويييها وانت تجوزت من بعدي اويييها ورح يصير عندك ولد من غيري اوييييها منهن لله يلي حرقو قلبي وقهروني لولولولوليييش
وقع الموبايل من ايدي وقعدت عالأرض وصرت اضربا بإيدي واصرخ .. و مرضت وارتفعت حرارتي لمدة اسبوع فيق اشرب مي وارجع نام ..
بعد شهر بلشت صحصح و تقبلت الأمر الواقع وصرت امنع دمعتي تنزل بس دمعتي كانت تخونني كتير وتنزل بلا ما اسمحلا
وهيك انتهت القصة .. وهالرسالة مني انا ( رنا ) لحبيبي ( مؤيد )
عارف شو حبيبي ..
من اول يوم رجعت لعند اهلي
فتت ع مكان ما كنا نقعد ونضحك
حطيت ايدي ع مكان ماكنت تقعد
واتلمست مكانك كتير منيح
تخيلتك معي هلا وعم تمسح دمعتي
وتقلي والله مابهون علي شوف هالدموع ع خدك
مع ان ولا مره بكيت وانا معك ولا مره زعلت وانا بحضنك ولا مره ادايقت منك
وافترقنا ..
واخدت فتره طويله لأقدر اتعود ع فراقك
وتعودت وتأقلمت وقفلت قلبي بمفتاح وكبيتو
وقررت اني عيش واتقبل الواقع بعيد عنك وعن حبي الك..
مرت علي اوقات بشعه كتير
وماكنت معي تساندني فيها
وقفت لحالي وساندت حالي بحالي
مع الوقت بلشت انساك ويمكن وصلت لمرحله نسيت كيف كانت اول دقة قلب
نسيت اول لهفه .. واول ضحكه طلعت معك
سنه ونص وانت معي بنينا قصص كتير وزرعنا أمل كبير ..