#ذكرى_وجع_بقلم_امل_احمد

(الجزء الاول)
@rwayate

كانت واقفة حد التخت يلي نايم عليه وعم تتصفن فيه وهي مشلبكة اديها ببعضن ..

تاليا: لايمت رح تضل هيك .. ايمت رح تفتح عيونك

ندق الباب ودخل الدكتور..

تاليا: هلا بابا .. لايمت رح يضل ع هالحالة هاي .. صرلو شهر ع هالوضع هاد

ربت ابوها ع كتفا بحنية وهو عم يطلع عليه ..

ابو تاليا: والله يا بنتي ما بعرف .. بايا لحظة ممكن يفتح عيونو ويفيق

تاليا: بس شي غريب كل هالفترة ما حدا سال عنو .. معقول ما يكون الو قرايبين

ابو تاليا: الله اعلم يا بنتي .. يمكن هلا اهلو قالبين الدنيي عليه .. ما بتعرفي

برم ضهرو ومشى ليطلع من الغرفة .. وهو عم يفتح الباب اطلع فيها ..

ابو تاليا: لا تضلي هيك فوق راسو .. رتاحي شوي .. وشوفي غير مرضى كمان

هزت راسا ..

تاليا: لا بابا .. ما فيني .. حابة كون حدو وقت يفتح عيونو

ابو تاليا: هههههههه .. والله انت امرك غريب يا بنتي

تاليا بنت قمة بالهدوء .. وهالهدوء معطيها جمال انثوي ملفت .. شعرا الخروبي لمطعج وبشرتا البيضة وعيونا العسليات يلي فيهن لمعة ساحرة .. جسما المتناسق .. كلا ع بعضا كانت ملفتة كتير لكل مين شافا .. وهي دكتورة بمشفى ابوها ..

طلع ابوها من الغرفة ورجعت تطلع ببهاء .. او يلي هي سمتو بهاء .. ما كانت تشبع منو .. من وقت اسعفو ع المشفى وهي ما الها شغل غيرو ..

ع طول معو بالغرفة .. عم تعتني فيه بكل حذر .. وع طول عم تتامل بهالانسان يلي كان متل نجوم السينما .. شعر اسود ناعم .. وعيون لوزية .. سمار شرقي .. جسم كلو عضلات ..
كلشي فيه كان ملفت بالنسبة لتاليا .. وكانت عم تنطر الوقت يلي يفتح فيه عيونو لتعرف تحل هاللغز يلي قداما..

تاليا .. كمالة الاول
بعد بيومين.....

فتح عيونو بكل صعوبة .. راسو عم يوجعو كتير .. عيونو منفخين .. مانو قدران يحرك اديه .. ومانو حاسس بجسمو ..

اطلع بصعوبة شاف بنت قاعدة ع كرسي وماسكة كتاب بئيدا .. ما ميز ملامحها .. بس شافا لابسة ابيض ..

بهاء: ااااخ .. ااخ .. وين انا

وقفت تاليا واجت لعندو ركض وقلبا عم يدق من فرحتو ..

تاليا: واخيرا .. الحمد لله ع سلامتك

كان عم يحاول يفتح عيونو منيح ليحسن يشوفا ..

بهاء: وين انا .. وشو صار

اطالعت عليه تاليا بوشا الناعم البريئ وتبسمتلو ..

تاليا: انت بالمشفى .. لا تقلق

بهاء: راسي عم يجعني .. كتيير

تاليا: سلامتك .. رح جبلك دوا وناديلو للدكتور

طلعت تاليا ركض لعند ابوها ..

اطلع بهاء بالغرفة يلي هو فيها وهو متلبك كتير ..

بهاء: شو عم يصير معي .. رااااااسي

دخل ابوها لتاليا ( الدكتور ) وهو كتير فرحان بانو بهاء واخيرا فاق..

الدكتور: اييييي.. واخيرا فاق مريضنااا .. الحمد لله ع السلامة يا ...... شو ناديلك .. نحنا طول هالفترة عم نندهلك بهاء .. هيك تاليا سمتك ههههههه

اطلع فيه بهاء بخوف ..

بهاء: كيف يعني؟ ما فهمت

الدكتور: وقت اسعفوك لعنا من شهر .. ما كان معك حدا بيعرفك .. وما لقينا معك شي يثبت هويتك

اطلع فيه بهاء وهو كتير متوجع ..

بهاء: دكتور انا ... انا ما بعرف اسمي .. ما بعرف شي .. انا ما بعرف شي .. راسي .. رااااااسي

كان عم يحكي بهاء بصوت عم يرجف وبخوف ..
اطلعت تاليا بابوها واختفت البسمة عن وشن .. مسك الدكتور ايدو لبهاء .. وشد عليها..

الدكتور: لا تخاف يا ابني .. نحنا معك .. ما رح نتركك

اطلعت تاليا ببهاء بحزن ...

تاليا: كلشي رح يكون احسن .. اطمن

بعد بيومين ..

بهاء عم يغير تيابو بغرفتو بالمشفى .. ندق الباب ودخلت تاليا ..

تاليا: صباح الخير

بهاء: صباح النور

تاليا: كيفك .. جهزت

بهاء: تمام .. اي جاهز .. بس ...

اطلع فيها بهاء بحيرة ووجع ...

تاليا: بس شو .. شبك

بهاء: يعني ما بعرف .. رح تقل عليكن هيك

قربت منو تاليا وبلشت تلم تيابو وتحطن بالشنتة وهي عم تحاكيه..

تاليا: لساتك عم تفكر بهالموضوع .. عم قلك بيتنا كبير .. وما في حدا .. انا وبابا وماما بس .. وهيك بتضلك تحت اشراف بابا ع طول

بهاء: انتو ما في منكن .. ربي يجزيكن الخير

تاليا: لا تقول هيك بهاء .. نحنا تعودنا عليك .. وما فينا نتركك

بهاء: بس وجع راسي ما عم يروح

تاليا: اي هاد شي عادي .. رح نتابع ع الادوية ولنشوف شو بصير

مشيت تاليا قدامو واشرتلو بئيدا انو تعا .. وطلعو سوا ...