الجزء الاول
#طريق_الشهرة
اضواء ، فلاش كاميرات ، سجادة حمرا وممر طويييل ، صور صور صور
صحافة ، مقابلات تلفزيونية ……
و الكل عيونو عم تتوجه ناحيتي ………
نفتح باب سيارتي المرسيدس و نزلت انا و حاملة جائزة افضل ممثلة لعام 2018
بفستاني الدهبي الطويييل اللي عم يجر ورايي
مشيت بين حشود الصحافة متل الملكة
…… : ست ميسا شو شعورك بعد ما حققت افلامك اكتر مبيعات بالسينما لهالسنة؟
……: ست ميسا فيكي تخبرينا شو خطوتك القادمة
ميسا ……
يا ميسا يا بنت
اصحي يا ميسا
ميسا: اي شبك اسراء شو فيه
اسراء: صرلي ساعة عم حاول فيقك لك المخرج بعت وراكي
ميسا: شو بعت ورايي! رح يعطيني دور بالفيلم؟!
اسراء: شو انك ساذجة ههههه
لساتك عم بتشوفي احلامك الوردية و انتي على السجادة الحمرااا
ميسا: ما اغلظك يا اسراء ، بس كان حلم كتييير حلو
اسراء: انا برأيي تاخدي تياب البطلة و تروحي ركض على موقع التصوير والا رح تنطردي
ميسا:ااه ييي بعدي بعدي رح اتبهدل
اسراء: لك خدي التياب معك بالاول
ميسا: هاتيهن لهون
حملت التياب و طلعت من الكرافانة ركض على موقع التصوير
و بصراحة كنت خايفة انطرد هالمرة لانو صار المخرج منبه عليي كزا مرة بسبب
تأخيراتي ، بس شو اعمل كل ما غمضت عيني بشوف هداك المنام الحلو 💕
………: 123 اكشن
المخرج: اي لتحت شوي قربي ناحو ايوا ايوا برافو
وشكن باتجاه بعض
سنان خدلي زوووم هون بهالزاوية ايوا صورهن كزا صورة
المخرج: قربو اكتر اي هلأ …… يلا تباوسو ، بلشو خفضولي الاضاءة شوي شوي ……شوي شوي
كتير حلو
بدي مشاعر و احاسيس اكتر
تمام هيك ، كااااات (cut) وقفو التصوير كان مشهد كتير حلو
بدلو تيابكن و ارتاحو شوي مشان المشهد التاني
المخرج : ميسا لساتك واقفة لك روحي ساعديها لبطلتنا ساعدي ميرنا ركض لشو عم ندفعلك مصاري احنا
ميسا: اي حاضر استاز
ميرنا : اففف ليش هيك تأخرتي هلأ بحترء من الشمس ، عطيني مي ، و امسكي هدول عني
جيبيلي كريمي و تيابي يلا
انا بعقلي كنت قول ييي ما اغلظك و ما اكتر طلباتك ، ما اميعك اصلا لولا ابوكي ما كانو حطوكي حتى ممثلة ثانوية بهالفيلم
ميسا: حاضر يا انسة ، اقعدي هون بالكرافانة عبين ما جبلك اللي طلبتيهم
ايييي و ببساطة هيك كان شغلي ، ما بنكر انو اول ما شتغلت هالشغلة كنت حس انو عم قرب من اهدافي و ممكن شي مخرج او منتج يلتفتو لموهبتي و يعطوني دور بطولة بشي فيلم بس شوي شوي بلش هاد الامل يتلاشى عندي و صرت افهم اكتر انو هالمجال لحتى افوتو لازم يكون امي او ابي ممثلين او منتجين كبار ، بس ابدا ما فقدت ايماني باحلامي و طموحاتي و موهبتي
…………
و هيك كان يخلص يومي و انا عم اركض لحتى نفز طلبات ميرنا بطلة الفيلم
صح هالشغلة ما بتسلي و مو حلوة بس كنت حس انها قريبة من قلبي لانو بتعلم شغلات جديدة
عن الفن و التمثيل و شغلات كتير
ميسا : شو اسراء رح تروحي ؟ خلصتي شغل ؟
اسراء: لا لسا الغرفة هون بدها كتير تنضيف انتي روحي و انا بلحقك
ميسا: تمام بشوفك بالبيت
طلعت من موقع التصوير لحتى ارجع ع البيت و بطريق الرجعة شتريت شوية غراض كانو ناقصينا بالبيت
ميسا: لك شو عم تنصبو على العالم عينك كنت عينك
ليش هيك سعر الفاصوليا عندك ليكا عند جارك ارخص بكتير
……: يا انسة والله بضاعتي كتير نضيفة و سعرا فيا ما عم بيعك غير الشي الممتاز
ميسا: اي دخيلك كلكن بتقولو هيك و بضاعتكن بتكون مضروبة و فيها حشرات كمان
…… : يا انسة عجبتك بضاعتي اشتري ما عجبتك لا تعمليلي بلبلة و تلمي العالم و تطلعي سمعة مو منيحة لبضاعتي
ميسا: ييي شو بتحكو اي خلص هات كيلو مو مشان شي بس والله مستعجلة والا ما كنت اخدتها منك بهيك سعر
…… : تفضلي هاي كيلو
اي بعوض الله
الحياة صارت كتير غالية باخر فترة و انا وضعي المادي عم يسوء لورا
وقفت و تطلعت بالسوق
يا الله دخيلك كل شي غليان اصلا ما في غير شغلة وحدة رخصت هون هي حياة البشر
تابعت باتجاه بيتي انا و عم طلع بهالناس
و شوف الحياة كيف صايرة عنجد تحول هاد الزمان
…… : ميسا يا بنت تعي لهون لك ردي السلام
ميسا بعقلا : ولي خالتو ام تحسين هلأ ما بتتركني بساعتين تحقيق
ميسا: ها ها خالتو ام تحسين كيفك ؟شو اخبارك ؟ كنت مستعجلة لهيك ما انتبهتلك
ام تحسين: و بشو مشغولة حضرتك مل على اساس تكملي وين وصل الفيلم تبعك بالاحداث
ميسا: لك مو هلأ خالتو هلأ عندي شغل بالليل بالليل
ام تحسين : اي بس ما تطولي كلنا بالحارة ناطرين نسمع الاخبار
ميسا: ولا يهمكن بس جهزو سهرة مرتبة
ضحكت و تابعت مسيري يالله شو طيوبين الناس بحارتي بسيطين كتير و اقصى احلامهم توفير قوت يومهم ع فكرة انا ما كنت مختلفة عنهم بطريقة حياتي و لبسي و تصرفاتي كنت بنت هديك الحارة ،
حارة الياسمين كنت ازا بتوقف براس الحارة تهف عليك ريحة الياسمين لانو الناس هون كتير بتحب تزرعها
صح انا وعيت ع الدنيا و اهلي متوفيين لهيك ربتني ستني و كانت حنونة عليي كتير بس الله اخد امانتو
و توفت هيي كمان من تلت سنين