#ورقه_شدة_نادين_معراوي
@rwayate
الجزء السادس

كنت رجعانه من السوق الظهر وشفت ناس مجتمعه حوالين رجال راكب على حصان ... وكان معو الإعلان للي فيه صوره عادل ..وعم يقنع الناس انو هادا مجرم ولازم ينمسك وانو اذا الناس تركوه رح يسرق بيوتهن وأملاكهن ....
قربت لعندو ... والنَّاس راحو ...شافني شارده بالصوره
شو ياانسه !! شفتي شي هادا المجرم الحرامي بشي محل
انا انزعجت من كلامو وقلت بصوت عالي ...
عادل مانو حرامي .... اتطلع فيني وسكت مع ابتسامه خبيثه
انا : اسفه بس شبهت عليه ...للاسف مابعرفو ولا شفتو هون ....
انسحبت ومشيت وقبل ماوصل على البيت حدا بيجي قدامي وبيبخ شي على وجهي وانا وقعت وماعدت أوعى لشي ....
فتحت عيوني لاقيت حالي متسطحه على كنبايه ببيت فخم كتير وقدامي محطوط اكل من افخر الأنواع .... تطلعت حوالي شفت شب واقف عم يدخن
مجهول : صحيتي ؟؟
انا : مين انتو وليش جبتوني لهون .. شو بدكن مني ...
مجهول : اسفين ... بس وجودك هون بيساعدنا كتير ع كل حال هلق مارح ناخد ونعطي كتير معك ... خدي راحتك وهي الاكل قدامك وفِي تلفزيون وحمام ... بس انتي رح بتاخدي راحتك ضمن هالغرفه هي وبس ...
انا : مابدي منك شي ...تركوني طلعوني من هون ...
وقمت ركضت لعند الباب ... وقف الشب بوجهي ومنعني ...
خليكي عاقله ورح تطلعي وانتي منيحه .. واذا عذبتينا رح يطلع وجهنا التاني ...
انا : شو بدكن مني !!
مجهول : انتي بتعرفي ، شفتينا اليوم بالسوق وانتي عارفه مين بدنا ...بدنا الحرامي !! وينو ؟؟
انا : عادل مانو حرامي ..انتو الحراميه للي سرقتو تعبو واستغليتوه لتبنوا ثروتكن ع كتافو وكتاف غيرو ..
بهل لحظه دخل الشب التاني :
مصطفى لساتك عم تأخذ وتعطي معها لهي !!!
انا اسمي هيا ومااسمي هي ...
مصطفى : طيب متل مابدك ...وينو صاحبك عادل ؟؟
انا درت وجهي عنهن ..مارح قلكن حتى تتعلم تحكي...
اجا الشب التاني لعندي معصب .. ومسكني من ايدي مسكه لئيمه ... وشال السيجاره من تمو وقربها عليي ... شوفي وليه ... قسما بالله اذا مابتحكي وينو لهل ساقط رح طفي هالسيجاره بكل بقعه بوجهك فهمتي ؟؟؟
كانت عيونو لئيمه كتير وخوفني...
بعدت عنه وصرت ابكي ...
مصطفى ركض و خلصني منو وقال
: كمال مابيصير هيك ...سايرها
كمال : انا مابعرف ساير وبدي هلللحظه اعرف هالكلب وين أخذ الفلوس وهرب ....
كمال رجع قرب مني وانا صرت ارجف وابعد عنه ...
كمال : عادل لازم يعرف انك هون ..
مسكني من دقني بلئم ...وشد عليي ووجعني ... وينو ؟؟ بعدين علا صوتو اكتر ... لك وينو ؟؟؟ انطقي
وقرب السيجاره وطفاها بايدي ...وانا صرخت من قلبي صرخه الم قويه ...
اجا مصطفى وبعده عني ..
مصطفى : كمال ماهيك اتفقنا ... البنت طعم لعادل مو اكتر ...
كمال : لسا بدي شوهها ستنى عليي ..هي لسا قرصه إذن ...
انا كنت لسا عالارض متوجعه وعم ابكي ..
نزل مصطفى لعندي وحط على ايدي قطعه تلج بارده ...
مصطفى : قوليلنا وينو عادل وبوعدك رح تطلعي من هون
نحنا مابدنا منو شي ....رح نخليه يروح بحال سبيلو بس يرجع المصاري ...
انا سكتت ومارديت وضليت عم اتطلع فيهن بنظره خوف وبكى...
اجا كمال لعندي ...شكلك ماتربيتي خليني زدلك العيار ...
انا :: لا لا الله يخليلك بترجاك بيكفي ورجعت ابكي، رح قلكن بس شرط ماتاذوه
كمال : وينو
انا : هوه عنا بالبيت عند عمتي ...
كمال : كيف بدنا نتواصل معه ؟
انا : بعطيك رقم ابن عمتي .. أحكيه وقلو أني هون .. جبلي كمال ورقه وقلم وخلاني اكتب الرقم .. وبعدين تركوني وطلعو برا الغرفه وقفلوا الباب عليي ...
بالبيت كان عادل كتيير قلقان عليي وسارح وعم يفكر
وعمتي عم تدعي وتروح وتجي بهل غرفه ... فتح باسل الباب ودخل وقال : مالها اثر بايا مكان ....
ام همام ::: راحت البنت ...ياربي راحت البنت ...
ووقعت بالأرض وصارت تبكي بصوت اعلى ...
عادل : انا رايح دور عليها وماني راجع بلاها ...
باسل : ووين بدك تدور يعني ...قعود قعود ...هلق بدل ماتدور عليها بيصير بدنا ندور عليك ...ماناقصنا مشاكل وتعب قلب ...وجهك نحس علينا ...
بيرن التلفون والكل بيجمد ... باسل رفع السماعه بسرعه :
الو ...ايوا ...اي انا باسل ... نعم ؟؟؟ شو قلت ؟؟؟ طيب .... حاضر .. رجاع اتصل شي خمس دقايق ...
سكر باسل التلفون وكان متضايق ...
عادل : شو خير ...احكي شو صاير ..انطق
باسل : هيا خاطفينها الرجال للي عم يدوروا عليك ... واذا مابتسلم حالك الهن انت والمصاري رح يشوهولها وجهها ... ومعك لبكرا الضهر بس ...

#ورقه_شدة_نادين_معراوي
@rwayate
الجزء السابع

عادل بيخبط ايدو بالطاولة بكل عصبيه ...كلاب ..هدول كلاب
بيرجع التلفون بيرن ..ركض عادل ورفع التلفون...
ياكلاب انا بفرجيكن ..
اخد باسل السماعه منه .. ايوا ..اي موافق يسلم حالو ... اليوم الساعه ٩ بالليل بالغابه ... ماشي ...
سكر باسل التلفون ...
تفضل أستاذ جهز حالك شي ساعتين رح نشوفهن بالغابه ...
الوقت ..انفتح الباب عليي ودخل مصطفى وانا كان عندي فضول اعرف شو صار معهن بس ماحكا شي
انا : الله يخليك ماتأذيه
خود كل المصاري بس تركوه ...
مصطفى : شكلك غرقتي فيه يابنت ..لاتخافي بدنا المصاري وهوه جهنم للي تحرقه ..
رجعي ايديكي لورا
انا : ليش ؟؟ لا ..بترجاك ماتربطلي أيدي ..انا بخاف ..بوعدك مااعمل شي ..
دخل كمال ..وإجا لعندي وعيونو فيهن شرر ..عم بيقلك رجعي ايديكي لورا ..انتي شكلك مابتفهمي بالحكي
وقت شفت كمال صرت ارجف .. رجعت أيدي وكمال ربطلي هنن لورا ضهري ... وطلع من الشنته للي معو قماشه وربطلي عيوني فيها ...
قلبي كان عم يدق بسرعه ..كانت ابشع لحظات حياتي..
كنت عم انساق متل مابيسوقو الغنمه لمصير مجهول . انا بصوت عم يرجف : الله يخليك ..انت وعدتني ماتأذيه ...
كمال : هس مابدي اسمع حسك وإلا والله العظيم بلزقلك تمك ...هيك بتصيري عميا وخرسا ..
انا : لا خلص والله ماعاد احكي كلمه خلص ....كنت بيني وبين حالي واثقه إنهن بدهن يقتلوه ويقتلوني ..نفسي بلش يتسرع وصرت ارجف وبطلت اعرف امشي .. اجا مصطفى وحملني ...وكنت ماني
قادره شوف شي... وسمعت صوت خيول ..ورفعني مصطفى وحطني قدامو ع ظهر الخيل وايديه مرت من تحت خصري لحتى يمسك السرج
اجا الوقت وطلع عادل وطلع وراه باسل ...
عادل كان لابس قناع على عيونو ولابس وشاح على ضهرو كان طالع متل شخصيه توكسيدو ...
عادل : باسل مافي داعي تجي معي خليك مع خالتي ام همام ..هيه تعبانه وبدا حدا يبقى معها ...لاتخاف ع هيا ..انا بوعدك انها رح ترجعلكن بخير ...ساعه زمن بالكتير ورح تكون بالبيت ...
باسل : لا ماحزرت مارح خليك تروح لحالك ..
عادل : هنن بدن ياني انا ..مابدن حدا تاني
باسل : معليش انا بحب الشقا والتعتير
عادل : بس هي فرصتك لتخلص مني وترجع تتودد ل هيا ..
اتطلع عادل بباسل من طرف عينو وابتسم
باسل : لا معليش ..بتضل معنا وبندخل بمنافسه شريفه
عادل : مانك قدي ...رح تخسر
وصارو يضحكوا هنن الاتنين
وصلوا باسل وعادل عالمكان ...
عادل : باسل خليك متخبي مافي داعي تطلع ... خليك هون مشان تاخد هيا معك ... وانا لاتخاف علي رح اقدر اهرب منهن بعد ما اتطمن انو هيا صارت معك ...
باسل : طيب ماشي انا باقي هون عم راقبكن ...
وبعد دقيقتين ...اجوا كمال ومصطفى على الاحصنه ... وكنت انا قاعده مع مصطفى على حصانه بس كانوا مربطينلي ايدي ومسكرين عيوني ...
كمال : ياهلا وغلا ب عادل ... هيك يامنظوم بتغدر فينا بعد ماحويناك ودربناك وعملناك نجم ... هيك بتنكرنا...فعلا اتقي شر من احسنت اليه ...
عادل : انا اخدت فلوسي ..حقي .. حق سنين عمري معكن ... مارحمتونا يوم ...نحنا كنا عبيد عندكن وهلق انا تحررت ...
انا كنت عم اسمع صوت عادل وكنت أعم ابكي وماقدرت شوف شي ...
عادل : تركوا البنت ترجع على بيتها عيب عليكن انتو رجال انتو ..
كمال : ماحزرت ... سلم حالك بالاول ...
وبنفس اللحظه طلع كمال مسدس ووجهو ناحيه عادل وضغط عليه ... عادل تشقلب بالهوا بكل قوته وكانوا داخل بمسابقه أولومبيه ... وانا صرخت بصوت عالي وانهرت وقعدت بالأرض وصرت ابكي بعد ماسمعت صوت المسدس ... كنت ضايعه
ركضوا مصطفى وكمال ناحيه وشاح عادل للي كان مفروش على شجره صغيره ...طلعوا تحته وهنن مفكرين انو عادل متصاوب تحته ..شالو الوشاح مالاقوه ...
كمال : ياكلب ياحيوان ...ضحك علينا ... وبنفس اللحظه انتبهوا انو انا ضليت لحالي بدون رقيب ..اتطلعوا وراهن مالاقولي اثر ....
كل هالشي صار خلال ثواني ،، وبسرعة كتبر كبيره ....
بعد ماعادل اوهمهن انو طلقه المسدس صابته نط لعندي حملني ورجع نط لبعيد ...
بمكان تاني كان عادل متخبي بين الشجر وانا بين ايديه عم ارجف وأبكي ... مد ايده لعندي وشال القماشه للي كانت مغطيه عيوني ....
انا صرت ابكي بزياده وكنت منهاره وماعدت اعرف احكي شي ...
فكلي ايدي ... ولفني بقوه وانا لفيتو بقوه كمان ..
عادل : ماتخافي نحنا هون مع بعض وماحدا رح ينتبه علينا ... باسني من جبيني.. وضل يهديني وبعدين حملني ورجعني عالبيت ... وترك باسل بالغابه عم يستنانا
فتحت ام همام الباب ولفتني وكانت عم تبكي ...
عادل : خالتي ..هي هيا منيحه ماتخافي عليها بس نفسيتها منهاره شوي ...شربيها شي سخن يهديها ...بنفس اللحظه دخل باسل :لك وينك انت ...
عادل : أسف بس ماقدرت ارجع للمكان للي كنت انت فيه .. كان كتيير صعب ...
باسل بدي احكيك على انفراد
انا فورا سمعت كلمه على انفراد بس عملت حالي مو سامعه شي ... دخلوا هنن الاتنين عالغرفه .وسكروا الباب ...

#ورقه_شدة_نادين_معراوي
@rwayate
الجزء الثامن و الأخير

عادل طلع من غرفتو وجه الصبح كانت الساعه بحدود الخمسه ... ولسا الشمس ماكانت طالعه ...
أخذ شنته تيابو وغراضو ومرق لعندي عالغرفه ..دخل لعندي بهدوء ونزل قعد لصار بمستواي ..اتطلع فيني شي دقيقتين وبعدين باسني ... بتمنى تلاقي كل خير بحياتك يااميرتي ...بحبك ...
وهي المره الوحيده للي قلبي بيحب فيها حدا فيها ...حطلي ورده حمرا جنب تختي ..وقال : سامحيني ..
طلع من البيت على مهلو مشان ماحدا يفيق ...سكر الباب وطلع ... مشي بطريقه ودخل بقلب غابه الصنوبر ... حفر وطلع كيس المصاري للي كان مخبيهن وكمل طريقو ..
وهوه ماشي لمح حدا واقف مستند على جذع الشجره ... قرب اكتر ..وطلعت انا للي واقفه عم استناه ومنزله راسي عالارض ...
عادل : هيا ؟؟؟؟؟؟ هي انتي ؟؟ شو عم تعملي هون !!! رجعي عالبيت
انا : وين رايح .. وين تاركني ورايح ..
عادل : أسف هيا سامحيني بس انا لازم اروح ...مابدي ساويلكن مشاكل ..انتو اطيب ناس قابلتن بحياتي ومارح سامح حالي اذا بيصرلكن شي بسببي ....
انا صرت ابكي ... وانا مافكرت فيني ..مافكرت بمشاعري ..تاركني ورايح بهل سهوله هي ...
عادل نزل الشنتايه من ايده وقرب مني ولفني ..
عادل : انتي احلا شي صار بحياتي ... انا مارح انساكي ابدا ..بس مابقدر ضَل جنبك
انا لفيتو بقوه وصرت ابكي اكتر ...خدني معك ... لاتبعد عني ..
عادل ... أسف مابقدر ...هيا انا حياتي صعبه ومانها مستقره انا شب متشرد ... وصعب تعيشي معي
انتي بتستاهلي تعيشي اميره بقصور ... رفعلي ايدي التنتين وباسهن ... بحبك يااميرتي
انا بكيت آكتر ...
وعادل طلع من جيبه ورقه شده ...
عادل : هيا مبارح لعبت لحالي لعبه الورق وسحبت هي الورقه ..
تطلعت على الورقه لاقيت صوره طير فارد جناحاتو بالسما ...
انا : شو معنى هالرمز
...عادل عطاني الورقه وقلي ... هادا رمز الفراق ....
قعدت بالأرض ابكي وانا منهاره
وعادل قسى قلبو وضل مكمل طريقو بدون مايلتفت علي حتى مايتراجع ... واختفى بين الغابات ... بكيت كتير وبس تعبت قمت من الارض وكانت الشمس طالعه .... وهدوء وعادل اختفى اثرو
مشيت بالغابه ووصلت لحرف الوادي ... وصرت أتفرج ع الشمس وهيه عم تطلع ..كنت مخنوقه ... طلعت من جيبي كرت الحب ..وبايدي التانيه كرت الفراق
فتحت أيدي التنتين بالهوا
والهوا طير الكرتين عالوادي ....
راح عادل وراحت وراق الشده .... ورجعت ل هيا القديمه ..وكأني نمت وحلمت حلم حلو ورجعت فقت منو ... بنفس اليوم ضبيت غراضي واخدت معي الورده الحمرا للي تركلي ياها ورجعت عند اهلي ...كنت هربانه من ذكرياتي مع عادل ..وراجعه لأعيش حياتي وإبداها من جديد بس عادل معي لحد الان عايش بكل لحظه بحياتي وبتفكيري ...وانا كمان كنت عايشه بحياتو وتفكيرو
ولحد الان انا وهوه مستنيين يجي يوم تجمعنا فيه الصدفه
الله كريم اللا مايجي هاليوم

انتهت ;-)

#ورقه_شدة_نادين_معراوي
@rwayate
الجزء الثاني

فقت الصبح متحمسه لبست فستان مكسي احمر ساده وفوقو جاكيت قطن اوف وايت وانا عم مشط شعري ضربت عيني على ورقه الشده اللي كانت عالطاولة ... مسكتها وتاملتها وماحطيت ع بالي كلام الغجريه
حطيت الورقه بجيبتي ونزلت
لاقيت عمتي مجهزه الفطور
انا : صباح الخير عمتي ليش عملتي الفطور انتي كنت حابه انا للي اجي ساعدك فيه
ام همام : معليش بكرا دورك شفتك نايمه وماحبيت فيقك، انتو اهل المدن بتتاخرو بالفيقه
اجا باسل وفطرنا كلنا سوا وقمت شلت الفطور وجليت الجليات ورحت مع عمتي بزياراتها الصباحية للي كانت تعملها كل يوم ، كان عمتي فرحانه فيني وتحب تأخذني معها عند رفقاتها
ونحنا راجعين بالطريق عالبيت سألتها
عمتي مبارح شفت من بعيد اضويه وسمعت صوت موسيقا وأصوات عالم شو القصه ؟؟
اي يابنتي هون الضيعه بيصير فيها مهرجانات صيفيه خفيفه منظيفه، على قد اهل الضيعه مو متل مهرجانات المدينه
كانوا مستضيفين مبارح جماعه السيرك
انا : سيرك يالله مااحلاه حابه احضر ياريت احضر
ماني حاضره سيرك بحياتي كلها
ام همام : شكلك متحمسه ، تكرمي رح شفلك اذا اليوم مستمرين ولا لا
رجعنا عالبيت واجت عمتي بدا تعمل غدا
انا :لا ياعمتي لسا في ملوخيه من مبارح وانا لسا ماشبعت منها بدي اكل منها كمان، تغدينا ونظفنا البيت شوي
وطلعت ارتاح بغرفتي
أتطلعت من الشباك كان الجو حلو وهدوووء
قمت حطيت مكياج خفيف والوانو مناسبه لبشرتي
ومشطت شعري
ونزلت أتمشى حوالين البيت المسويات لانو الجو كان كتير حلو
وانا عم أتمشى خطرلي روح لوسط الضيعه محل الساحه الرئيسيه وحاول شوف الضيعه وناسها ومهرجاناتها لانو ولا مره بكل زياراتي لعمتي من قبل مافكرت مر من غابه الصنوبر وأروح للطرف التاني من الضيعه، مشيت ودخلت جوا غابه الصنوبر لحتى أقطعها للطرف التاني وأصير عند الساحه وانا ماشيه حطيت ايدي بجيبه الفستان الاحمر وضربت ايدي عالكرت ... طلعت الكرت واتطلعت فيه وانا عم اتذكر كلام الغجريه وابتسمت
فجاه ايدتين بتنمد لعندي من بين الشجرات الصغيره أيد بتنحط ع تمي والتانيه سحبتني بقوه لجوا الشجرات
كان في شخص قاعد بين هالشجرات متخبي وشاددني لعندو بايدو من خصري والايد التانيه مكمملي تمي بقوه وانا عم اصرخ بس صوتي مو طالع
فتحت عيوني وشفت الكرت واقع مني عالارض مديت ايدي بدي اخد الكرت كان بعيد عني شوي شدِّيت حالي اكتر ومديت ايدي لقدام لحتى وصلت لورقه الشده...
مسكت ورقه الشده وكأنو شي مهم وغالي ، وقام الشخص حط ايدو فوق ايدي بكل حنان وقلي
لاتخافي مني ، اتطمني ، مارح ائذيكي ، بس اهدي شوي
انا هديت وضليت ساكته وماسكه الورقه بايدي وهوه حاطط ايدو فوق ايدي ومابعرف ليش اتطمنتلو
وفجاه بسمع صوت رجال جايين ع أحصنة وعم يدورو ع حدا
وواحد منهم قال
شفتو لهل كلب دخل عالغابه من هالطريق، شفتو بعيني
بس مالحقتو العمى مااسرعو .. متل السعدان
التاني قال دورو عليه منيح
وصارو ينكشو الشجرات الصغار بالعصي ودخلو العصي بين الشجرات للي كنا متخبيين فيهن بس كان حظنا حلو انو ماضربت فينا وهوه كان يتمسك اكترر فيني ويشدني لعندو وخايف أني افضحه او اعمل حركه ...راحوا الرجال وشكلهن بدن يدورو بمكان تاني
حاولت أفلت حالي منه بس ضَل ماسكني بقوه
قلي : أسف بس اتحمليني كمان خمس دقايق حتى يبعدو من هون، بخاف تصرخي وتفضحيني
انا هديت وضليت ع حالتي وسمعت دقات قلبو كانت سريعه كتير ونفسو سريع وواضح انو خايف وبعد خمس دقايق اتطلع عالطريق وتأكد انه فاضي ...نزل ايدو عن تمي وفلتني
وبنفس اللحظه هربت منو وركضت بسرعه
وانا عم اركض تطلعت لوراي لانو كان عندي فضول شوفو
تفاجأت انه كان عم بنزف من كتفه وتعبان كتير
كان شب طويل كتير ونحيف شعرو خرنوبي وبشرتو بيضا وعيونو زرق غامقين وملامحه هاديه
وقفت بأرضي وأتطلعت فيه وسكتت
الشب: ساعديني الله يخليكي انا مجروح وحاسس أني رح موت
كان عم ينزف وبعدين غاب عن الوعي
وكان في جرح كبير وعميق بكتفو ومبين انو في خنجر صايبو
حاولت أني ارفعه وأخليه بستند عليي
كان تقيل كتير
وبالزور حتى وصلت عالبيت وانا مهدوده كان طول الطريق مستند علي والحمدلله انو المسافه ماكانت طويله
شافني باسل ، ركض لعندي واخدو عني وطلعو للغرفه سطحه عالتخت وراح يجبلو دكتور .

#ورقه_شدة_نادين_معراوي
@rwayate
الجزء الثالث

طلع الدكتور من الغرفه وكتبلو مضادات التهاب ومسكنات ومراهم
الدكتور : واضح انو اصابه باله حاده من بعيد .. برجع بشوفو بعد يومين استأذن الدكتور وطلع
وصله باسل لعند الباب
باسل : انا رايح اجبلو الادويه مابتاخر
انا : اي باسل بسرعه لاتتاخر
باسل : لاتخافي الدكتور عطاه أبره رح يرتاح عليها
اجت عمتي لعندي : بنتي معقول نتركو عنا كم يوم ؟؟نحنا مامنعرفو ولا منعرف عنو شي ،، بركي هادا عامل شي وهربان ، بركي مجرم ، او مطلوب كيف بدنا نحويه عنا
انا قاطعتها بكل قهر : عمتي مستحيل نرميه برا وهوه بهل حاله ، انا رح ابقى جنبو لحتى يتحسن ماحدا يشغل حالو فيه
ام همام : ماقصدي شي يابنتي ياحبيبتي بس انا خايفه عليكن والحرص واجب مابدنا وجع راس ومصيبه ...
تركت عمتي وطلعت لعند الشب دخلت وقَعَدت جنبه وهوه كان نايم ومو حاسس ع شي ابدا
ضليت اتطلع فيه كانت ملامحه كتير هاديه ورزينه وبريئه
لحقتني عمتي وقَعَدت جنبي
روحي نامي .. الشب مارح يصحى للصبح ...
انا : لا عمتي انا منيحه ورح ضَل معو ممكن يصحى ويحتاج شي
...عمتي لاتستغربي مني بس جد مابعرف كيف لاشعوريا اتطمنت لهل شب .. لما كان شاددني لعندو كنت خايفه بس لما قلي لاتخافي حسيت بشي غريب
كنت بقدر افضحه وادل ع مكانه بس مابعرف ليش ضليت متطمنتلو ومرتحتلو ..
ام همام : بس يابنتي الأحاسيس مو دايما بتكون صادقه احيانا أحاسيسنا بتكذبنا وبتخيبنا انا قايمه انام ..الله يشفيه ويهديكي ويحميكي .. رجع باسل وجاب الادويه
باسل : هيا روحي نامي انا رح ضَل معو
انا : لا انا مارح أتحرك من هون ليصحى
باسل : روحي وخلص لاعاد تناقشي رح نام هون بالتخت للي بجنبو وإذا احتاج شي رح ساعدو
وع كل حال الدكتور عطاه أبره وأشك انو يصحى قبل الصبح
بس انا عندت وضليت جنبو وماكنت روح ع غرفتي
صار الوقت نص الليل وعمتي وباسل راحوا ينامو وانا لاشعوريا غفيت
بعدين صحيت بسرعه كانت الساعه ٤ الفجر أتطلعت عليه لاقيت حرارته عاليه قمت عملتلو كمادات مَي بارده وضليت هيك للساعه ٦ الصبح ..طلعت عمتي ودخلت لعنا وشافته ...
ام همام : روحي ارتاحي وانا بكمل عنك ..
انا : لا عمتي انا منيحه اصلا نمت شي ٣ ساعات او اكتر وماحسيت ع حالي .. وبلشت هلق حرارته تنزل شوي شوي ..
ام همام : الله بعيني عليكي والله يسترنا من شي مصبيه ...دخيلك يالله تحمينا
انا : عمتي بكفي انتي مزودتيها..خوفك مانو بمحلو...
دخل باسل للغرفه وسمعنا عم نتناقش
باسل : هيا امي معها حق او مابتخاف عليكي وعلى مصلحتك مابتحكي معك هلحكي
بنفس اللحظه فتح الشب عيونو بس كانو لسا دبلانين ...تطلع حواليه وبكل الغرفه وشافنا واقفين حواليه ..بس كان ضايع
انا بحماس : الحمدلله ع سلامتك ..كيف صرت وكيف حاسس حالك ؟؟؟
تطلع فيني وضل ساكت وكانوا عم يحاوا يتأكد ان كان بيعرفني وشايفني من قبل او لا
ام همام : مين لللي طاعنك هيك طعنه بكتفك
باسل : شو قصتك انت ممكن نعرف ؟ وليش كان في رجال لاحقينك ؟؟
الشب ضاع بين كل هالاسئله وماجاوب على شي
انا : بيكفي اسئله ..مانكن شايفين حالتو؟ لساتو مريض ؟؟ خلص روحو انتو وانا رح اقعد وافهم منه ع رواق...
تطلع الشب فيني وابتسم وكأنو اتذكرني ومدلي ايده ...
وانا مسكت ايده بايدي التنتين
الشب : شكرا ياانسه .. انتي كتير لطيفه بتشكرك كتير لانك ساعدتيني
انتي ساعدتيني مرتين مره بالغابه والمره التانيه هون ..وانا مارح انسالك هالمعروف ...انا اسمي عادل وعمري ٢٣ سنه ...انا لاعب جمباز وكنت مشارك باستعراضات السيرك ...
باسل بتهكم : وشو للي سببلك هالجرح ؟؟؟ ومين هدول للي كانو ملاحقينك واستغليت بنت خالي كرمال تهرب منهن ...
عادل انفعل : انا ماستغليتها ابدا ولا فكرت بهل الأسلوب
بس لما تخبيت منهن شفتها عم تمشي بالغابه وهنن كانوا رح يوصلوا وخفت يعملولا شي او يتعرضولها لانو مو معقول بنت ماشيه لحالا بمكان مقطوع
بالعكس البنت كانت خطره علي لانو كان ممكن تفضحني بايا لحظه .....
انا : بيكفي خلص طلعو وخلوه يرتاح
ام همام : ارتاح ياابني الدكتور رح يجي يرجع يتطمن عليك هلليومين ، انا نازله اعمللكن فطور
انا قعدت جنبو وكنت مبتسمه وعم اتطلع فيه
عادل : شو اسمك ياانسه ؟
انا : اسمي هيا ، خلص ماتسال كتير لازم ترتاح
عادل : شكرا كتير الك وابتسملي
كانت ابتسامتو كتير حلوه وهاديه متلو
باسل حسيتو متضايق ونزل لتحت عالمطبخ
باسل بانزعاج : انا مابعرف شو للي مخليها تهتم فيه .. شب مو معروف اصلو من فصلو...الله واعلم شو عم يخطط وشو في ببالو ،،، حسيتو غامض وماحكا شي عن حالو وللي مجنني تصرفات هيا معو واهتمامها فيه وانا صرلي سنتين عم أتقرب منها وماعم تفهم علي ولا عندا اي اهتمام فيني ...
ام همام : لازم تصبر هاليومين لنشوف شو بدنا نعمل
هيه عقلا متل التيس وكل مانصحناها رح ترفض النصيحه وتعمل للي برأسها برايي نسايرها ونراقبها من بعيد ...
باسل : متضايق كتير ومزعوج
جاي عبالي شيلو وارميه برا

#ورقه_شدة_نادين_معراوي

الجزء الرابع
@rwayate
قعدت بغرفتي وتذكرت ورقه الشدّه .. طلعتها من درجي وصرت أتأملها ...
معقول تكون هي الورقه الها علاقه ب عادل ؟؟؟
حطيت الورقه بجيبي وطلعت برا غرفتي ..مريت ع غرفه عادل فتحت الباب شوي شوي لاقيتو نايم ..نزلت لتحت شفت عمتي عم تتفرج عالتلفزيون ..
ام همام : حبيبتي هيا بدي شويه غراض من السوق بتقدري تجيبيلي هنن ؟ باسل عندو زياره ويمكن مايرجع للمسا ...
انا : تكرمي عمتي هلق بروح بس امانه برقبتك ديري بالك ع عادل
ام همام : حاضر امرك
طلعت من البيت ووصلت للسوق اشتريت جبنه وبيض وحليب وانا وراجعه شفت بالصدفه الغجريه اللي كانت معي بالقطار ...جمدت بأرضي وبعدين ركضت لعندها بكل سرعتي وكانوا رح تختفي
انا : مسالخير خالتي انا هيا
الغجريه : اهلين يابنتي ..تفضلي قعدي ..هالمره سحب الكرت مو ببلاش
انا : تكرمي رح ادفعلك وفوقها حبه مسك بس بسرعه خليني اسحب الله يخليكي
خلطت الغجريه الوراق ببعضها وبعدين رتبتهن وقلبتهن لورا . مديت ايدي وسحبت ورقه... طلعلي ورقه عليها رمز عقرب ماشي بالصحرا ..تطلعت الغجريه بالكرت وعبست انا شفتها وعندي فضول ...
انا : خالتي احكيني وقوليلي شو هادا الرمز...
قالتلي ... مابعرف ... ضلت ساكته وانا كنت متاكده انها بتعرف ومابدا تقلي ...عصني قلبي .. ..دفعتلا ومشيت وانا عم فكر
انا : اصلا هي كلا خزعبلات ... وكلو ورق تسالي وبس ..وصلت عالبيت مالاقيت حدا ..شكلا عمتي رايحه تقضي زياراتها كالعاده..
انا :: عمتي مابتترك زياره تعتب عليها بس بالمقابل بتضلها تشتكي من التعب والإرهاق...ضحكت بيني وبين حالي وقلت ؛ الله يخليلي ياكي ياعمتي .. السله كانت عالطاولة وكانت رح توقع
وفجاه حدا بيسند السله عالطاولة وبيبلش يرمي البيض بالهوا متل ماالمهرجين بيرموا الطابات بالهوا وبيدوروهن وانا شفت هالشوفه وقلبي وقع من صدري كنت خايفه يوقع البيض وينكسر
بس كان عرضه حلو
عادل :صدقتي أني لاعب سيرك استعراضي وماني من اصحاب المشاكل
انا كنت عم اتطلع فيه بإعجاب وعم صفقلو
انا رجعت اتطلع بعيونو الزرق : عادل انا مصدقتك انا بثق فيك وماعندي اي شك ناحيتك
سكتنا وتطلعنا بعيون بعض ، زراق عيونو كان غامق وكانوا مَحيط غميق ، قرب لعندي و لف أيديه حوالين خصري وقربني لعندو اكتر وقلبي صار يدق بسرعه وقلي
رموشك حلوين كتير، وفجاه بيدخل ابن عمتي ...وعادل بعد عني فورا وبطريقه سريعه خلت باسل يشك فينا.
باسل : مسالخير وهوه عم يتطلع ع عادل بعيون واسعه جامده وعم تلمع
انا تلبكت وعملت حالي رايحه اجلي
انا : هلا مسالنور ، عادل جرحه بلش يطيب هلق كنت عم افحصه
قعد باسل وهوه عم يتطلع فينا بتهكم
باسل : اي منيح بركي لبكرا الصبح بيكون طاب تماما وبيصير يقدر يطلع من هون
انا ماقدرت اعترض او احكي شي
عادل : اي انا صرت منيح وبكرا الصبح رح اطلع من هون وبدي اتشكركن كتير ع لطفكن معي وعاللي عملتوه مشاني
طلع عادل ع غرفته ... وانا طلعت وراه ..بس ماحكينا عن الموضوع ..عطيتو الدوا ودهنتلو الكريم مكان الجرح ...
عادل : تسلم هالايدين الحرير
مسك ايدي وباسها وبعدين باسني من جبيني وانا خجلت .. وكنت مرتاحتلو كتير ... عادل : بتعرفي ، عيونك كتير حلوبن ورموشك سيوف
انا : يالله لازم تنام هلق وانا بشوفك بكرا ...
عادل : حاضر ماما ....
ضحكت وطلعت من غرفته. ورحت ع غرفتي
دخلت ع غرفتي لاقيت باسل فيها
انا : انت شو عم تعمل بغرفتي؟؟
طلاع من هون فورا
باسل : وانتي شو كنتي عم تعملي مع هادا الغريب
بقا انا مابترضي فيني بالحلال والغريب بالاحضان ..
انا : باسل استحي من كلمتك وطلاع برا غرفتي هلق ... مسكني من ايدي ولزقني بالحيط لاتضطريني صير عنيف معك وصدقيني اذا بسمع او بشوف اي شي مو مزبوط بيناتكن انا بايدي رح لفقلو تهمه وسلمو للشرطه وارميه بالسجن
انا : طيب اذا خلصت كلامك تفضل طلاع لبرا
باسل : طالع طالع وصار يضحك
سكرت وقفلت الباب عليي

#ورقه_شدة_نادين_معراوي
@rwayate
الجزء الخامس

تاني يوم فقت الصبح بكير ونزلت حضر الفطور مع عمتي
كان عادل لسا بغرفتو
ونحنا بلشنا نحضر الفطور
دخل باسل معصب ومعو لوحه اعلانيه وحطها قدامنا
باسل : تفضلو شوفو هالشوفه ، الأخ مطلوب وهي صورتو عالاعلان ومكتوب تحتو انو حرامي كبير وخطير كمان ومكافاه ماليه للي بيدل عليه
نحنا مالازم نبقيه هون ولا لحظه ....انا تطلعت بالاعلان وكنت مصدومه كتير وماطلع معي حكي ابدا ...
كان بلحظتها عادل نازل من فوق
باسل بصوت عالي : اتفضل أستاذ حضرتك مطلوب ونحنا مخبيينك عنا وعم نشوه سمعتنا معك عم تضحك علينا وعامل حالك مسكين
عادل كان عم يتطلع فيني وأنا عم اتطلع فيه بنظره حزينه
عادل : ممكن تعطوني فرصه و احكيلكن قصتي؟
ام همام : تفضل رح نعطيك فرصتك
عادل : شكرا ، كان عمري سنتين توفوا اهلي ونرميت بدار أيتام ..اجو مستثمرين السيرك وأخذوني ودربوني تدريبات شاقه وقاسية وطويلة للجمباز لحتى كون استعراضي معهن وهيك دخلهن بيزيد اكتر واكتر ...انحرمت عيش طفولتي والعب متل كل الاطفال ...ماعرفت بحياتي طعم الحنان او العطف او المعامله المنيحه ...نحنا منسافر بين المدن والضيع منقدم استعراضاتنا والنَّاس بتنبسط علينا بس الناس مابتعرف الظروف للي عايشينها ...حياتنا فقر وذل وتعب
نحنا مجرد عبيد عند اصحاب المال ...المستثمر وشريكه مافرجونا بيوم اي عمله ...فلوس تعبنا ماوصلتنا بحياتنا انا ورفقاتي كان يخلص العرض من هون ويتقاسمو المصاري من هون ونحنا نشتغل بس بحق اكلنا وطبعا ممنوع نطلع نشتغل بمكان تاني او نعترض وماكان عنا الجرأه نتمرد
هلق انا صرت شب وصرت بال ٢٣ سنه يعني بلشت عظام جسمي تقسى شوي شوي وبعد كم سنه مارح اقدر اعمل هالحركات وبالتالي ماعاد الي لزمه عندهن ورح يتخلصو مني حاولت أطالبهن بحصتي ، كنت مفكر اعمل فيهن صاله جمباز صغيره ادرب فيها الاطفال المبتدئين، بس صارو يضحكو ويتمسخرو وقالولي مالك عنا شي ، ولما جينا ع هالضيعه وخلصو العرض قمت تاني يوم الصبح وقررت أتمرد وسرقت حصتي او بالأحرى استرديت شقاي وتعبي طول هالسنين وكنت ناوي اهرب بس واحد فيهن حس علي ولحقوني
انا هربت للغابه ودفنت كيس المصاري بالغابه وانا عم اهرب صابني خنجر بكتفي انرمى علي من بعيد ...هربت ونطيت واتخبيت بين الشجر مشان مايلاحقوني ويشوفو نقط الدم وراي
للحظه حسيت انو انا رح موت... اما رح يلاحقوني وانقتل او يصفى دمي وموت
وبلحظتها لمحت هيا جايه من بعيد وخفت يشوفوها ويأذوها مشان هيك سحبتها لعندي وطلبت منها تهدى
وهيه جابتني لهون
وهنن جانين هلق مشان المصاري للي هيه أساسا حقي انا وطالبيني ليقتلوني...يعني بالمختصر انا ماني حرامي .. انا استرديت حقي
حق تعبي وقهري والظلم للي شفته
حق شقا عشرين سنه...
انا هون لما سمعت قصتو قويت شوكتي ...
انا : باسل أظنك هلق عرفت حالك انك ظالمه وأنك متسرع
باسل : بالله مفكرتيني اجدب لصدقو وصدق قصصو؟؟؟
عادل : مابيهمني انت تصدقني انا بيهمني هيا تصدقني وتضل واثقه فيني ....
انا كنت اتطلع فيه وعيوني كانو مليانين محبه
انا حبيتو وحبيت عيونو الزرق... .ورقه الشدّه صدقت وجابتلي الحب .. ..
ماعاد اقدر اتخيل انو يروح ويتركنا
عادل : انا بدي استأذن منكن ..انا بدي امشي ...
انا : لا ...ماتروح .. الله يخليك ... ماتروح
... اليوم الدكتور رح يجي ويشوفك ...بعدين بلا ماحدا يشوفك ويسلمك لهدول الجرمين...خليك معنا ..مسكتلو ايديه .. وتطلعت عليه نظرات ترجي ...
غمض عيونو وبعد وجهو عني ..وكانوا عم يتهرب من عيوني مشان مايضعف...
ام همام : خليك هون ياابني عالاقل لبعد مايشوفك الدكتور ...
باسل تركنا ومشي ... وبعد الظهر اجا الدكتور وفحصه وطمنا عليه ....
وبعد ماراح قعدت معه نحكي ... طلعت من جيبي ورقه الشده وفرجيتو هيه ... تطلع عادل عليها وقلي .. هادا رمز الحب ... استغربت وقلتله : ليش انت بتعرف تقرا هادا الورق ؟؟ قلي طبعا بالسيرك هادا يعتبر جزء من شغلنا ... فتح شنتايه كانت معو وطلع منها ورق شده نفس اللي كان مع الغجريه وخلطهن وصفهن ع القفا ... طلب مني اسحب ورقه .. سحبت وطلعلي رمز شخص مربطه رجلو اليمين ومعلق بالسقف بالعكس . شرد بالورقه وبين عليه الانزعاج وعبس وسكت وضب الورق ... عادل : مين عطاكي الورقه للي معك ؟ حكيتلو القصه كلا ...
عادل : اي عرفتا هي ام سعيد الغجريه بتشتغل معنا بالسيرك وهيه للي علمتني هاللعبه ...انا : يالله شو هالصدفه الغريبه ... حكينا كتير وضحكنا وبعدين حسيتو نعس .. عيونو كانت عم تدمع ...
وكانت كأنها مَحيط هايج
انا : يالله صار وقت تنام انت نعسان وانا كمان نعسانه تصبح على خير ...
عادل : وانتي من أهله
مسك ايدي متل كل مره وباسها ...
عادل : هيا انا بحياتي كلها ماحسيت حدا تعامل معي بهيك اهتمام ... بتشكرك كتييير ... انا كتير مبسوط فيكي ..

#ورقه_شدة_نادين_معراوي

بعض اجزاء القصه مستوحاة من روايه انكليزية
@rwayate
مقدمه :

الثقه ....هذا الخيط الوهمي اللذي يمتن علاقتنا بالآخرين ويشدنا إليهم بمحبه ...علينا ان نخلص لمن نثق بهم لأنهم يحملون لنا في قلوبهم الأمان والود ...الأمان اللذي يشعرنا بالسعاده ويمنحنا الامل اللذي يدفعنا قدما نحو المستقبل المشرق .....

الجزء الأول

حملت شنتتي الجلد وطلعت عالقطار بعد ماسمعت النداء الأخير واخترت كرسي وقَعَدت عليه وكان بدي كرسي مطل عالشباك ... تحرك القطار وانا قاعده عم أتفرج من الشباك عالمناظر الطبيعية للقرى للي عم بيمر فيها ...نعست ونمت من الملل
.....اسمي هيا وعمري ٢٢ سنه
بدرس بكليه التجاره والاقتصاد سنه ثالثه وعايشه مع أهلي واخي
ابي مهندس مدني
وإمي مابتشتغل واخي عامر السنه الجاي بكالوريا
شعري كثيف طويل ملفلف ولونو خرنوبي فاتح وعيوني شهل ورموشي طوال كتير وبشرتي حنطيه عاطيه ع سمار وفِي على وجهي نمش خفيف
طويله ونحيفه وستايلي حلو
كنت محبوبه نوعا ما بقضي يومي بالجامعه مع رفقاتي وبرجع بس بخلص دوامي بساعد أمي شوي بشغل البيت وبدخل ع غرفتي بقرا قصه او بدرس او بحكي مع رفقاتي عالتلفون او بقعد قدام اللابتوب
وهيك كانت أيامي طول السنه
اجا الصيف واخي بدأ يحضر لدروس البكالوريا وانا حبيت روح عند عمتي ام همام للي كانت ساكنه بالقريه بين غابات الصنوبر
كانت مطلقه عندها شبين الكبير همام بالخليج وباسل بيشتغل مهندس معماري بالمدينه معنا وبيطلع لعندا كل فتره وفتره بيطمن عليها اما عمتي مرتاحة بجو القريه ومتعوده على حياه البساطه والجو المريح الهادي
ابنها و ابي كتير ألحوا عليها تجي تعيش بالمدينه بس كانت ترفض وتقول للي بيطلع من داره بيقل مقداره ...
فقت والقطار لسا عم بمشي وشفت وحده مره ختياره ومبين أنها من البدو الغجر او للي بيسموهن القرباط بلهجتنا قاعده قدامي ومعها ورق شده كانت صحتها منيحه ولابسه تنوره طويله لونها برتقالي ومزهره بلون ازرق وفوقها جاكيت بلوفر كمامه طوال وحاطه حجاب ازرق مزهر ابيض وكان على دقنها نقشات لونهن مزرق ووجهها مليان تجاعيد وكل تجعيده بتحكي قصه من قصص حياتها ...اكيد حياتها متعبه وكان معها زواده اكل وصره قماش كتير كبيره واضح انو مستخدمتها لحتى تحط تيابها فيهن
للي لفت نظري انو ورق الشده للي كان بأيديها ماكان مالوف بالنسبه الي
كان عباره عن صور ورموز بس ...طلعت فيني وهيه عم تقلب الورق بأيديها وتخلطه
وقالت بصوت مبحوح : سبحان الله على جمالك يابنت
انا عم اتطلع فيها من طرف عيني وكلي فضول اعرف شو بتعمل
انا : شكرا خالتي
رتبت الأوراق على طاوله قدامها وكانو مقلوبين ومخبايين
الغجريه :سحبي ورقه يابنتي
انا : اسمي هيا خالتي
سحبت ورقه وكان مرسوم فيها شخصين دايرين ضهرهن لبعضن
وكانت الصوره بتشبه رمز برج الجوزاء ...
انا : شو هي ياخالتي
ضحكت وقالتلي هادا رمز الحب شكلو الحب جاييكي
انا ضحكت و فرحت لاني سمعت كلمه حب
انا بنت بحياتي ماجربت الحب
ما حبيت بحياتي ولا حتى انحبيت مع أني كنت حلوه كتير
وكان عندي لهفه أني جرب أحب حدا او انحب بس مابادرت ابدا بهل شي ولا دورت على الحب ...
فرحت بكلمتها وانا من النوع للي بيحب وبيصدق هيك قُصص مع انو عندي ثقه داخليه انو
كذب المنجمون ولو صدقو
انا : خالتي بقدر اخد هادا الكرت ؟؟؟؟حسيت حالي متفائله فيه
الغجريه : خديه ...بس وقت للي بتخلصي منو رجعيلي هوه
انا : اخلص منه ؟؟؟ كيف يعني ؟
ووين بدي ارجع شوفك حتى رجعلك هوه ؟؟؟؟
الغجريه : لاتخافي .. انا بلاقيكي ايمتا مابدي
أخدت الكرت وخبيتو بجيبتي وبعد ساعه وصلت للقريه للي ساكنه فيها عمتي
نزلت من القطار ورحت لعندها فتت كانت عم تطبخ لتحتفل فيني
سلمت عليها
انا : اشتقتلك كتير عميم الله بعطيكي العافيه ياعمتي تسلم ايديكي الريحه بتدوخ
شو عاملتيلنا ؟ ريحه ملوخيه
ام همام : عملتلك ملوخيه بعرفك بتحبيها وساويتلك كبه وساويتلك قالب تشيز كيك غير شكل
انا : ياسلاااام اديشني مدلله تسلم ايديكي يارب يااحلا عمه بالكون
ام همام :حضرتلك غرفتك والحمام سخن دخلي خديلك دوش
انا : حاضر يالله فورا
طلعت ع غرفتي بالطابق للي فوق حطيت غراضي ودخلت عالحمام وشلحت فستاني
وبنفس اللحظه وقعت ورقه الشده من جيب الفستان
شلتها تطلعت عليها شردت فيها وبالرسومات وحطيتها ع جنب
طلعت من الحمام لبست تيابي ونزلت تغديت مع عمتي وكان ابن عمتي باسل واصل وقاعد معنا وباسل كان قبل بسنه طالبني من ابي وانا رفضتو لانو كنت حس انو هوه متل اخي وماعندي مشاعر ناحيته بس هوه كان لسا عندو امال أني احبو
باسل : حليانه ياهيا
انا : شكرا باسل كلك زوق
كان طول الوقت عم يتطلع فيني وانا عملت حالي مو شايفتو مشان اتجنبو
باسل كان شب طويل عريض ضخم وعضلاته معبيه زنودو وكانو الناس يسموه الوحش....ابيضاني بشعر اسود متل الليل وعيون سودا صغيره ...والو دقن خفيفه ... كان نزق كتير وعصبي بس بنفس الوقت كان قلب