مرفت محمد
(الجزء الثاني)
@rwayate
بس فارس ما وقف ع قصة علي.. رجع كرر الموضوع مع ايهم ..ايهم يلي كان عمرو سبع سنين..
مرفت: ايهم ..من وين هاد الدم
ايهم:...........
مرفت: ايهم لا تخاف حبيبي.. احكي
ايهم: اذا حكيت بيقتلني
مرفت: مين هو
ايهم: (ببكي)........
مرفت: فارس؟
هز براسو انو اي..
مرفت: تعا يا روحي تعا.. هالمرة رح اخد بحقكن انت وعلي
راحت فورا لعند امين..
مرفت: سيد امين.. فارس رجع كرر عملتو مع ايهم.. ليكو ايهم سالو.. هالمرة ما لازم تسكت
امين: (بعصبية) مرفت انا بتصرف..حكيتلك من قبل ما بدي فضايح.. خدي لايهم ع غرفتو
مرفت: لك ايا فضايح هاي.. هاي روح اطفال يتامى.. وهاد تصرف حيواني مو تصرف بشر
امين: انا المسؤول عنن.. وانا بتصرف.. انت بتنفذي يلي بقولو وبس
مرفت: انت سالتو شي يوم لوين بياخدهن.. ولشو لحتى ياخدهن هو ..لك مانا حكيتلك شو عمل بعلي.. ليش لساتو بشغلو
امين: و كيف بدي اتاكد انو ما عم تفتري عليه لتغطي ع شي عملة من عمايلك
انصدمت مرفت من جوابو..
مرفت: انا؟؟؟؟؟
امين: تركي هالقصة.. بلالك المشاكل.. فارس مانو هين
تركتو مرفت وطلعت من عندو.. وهي طالعة التقت بفارس ع الباب..
ركض ايهم واتخبى وراها وهو عم يرجف..
مرفت: لا تخاف حبيبي.. لا تخاف انا معك
اطلع فيها فارس بخبث وابتسم بوجها ابتسامة صفرا..
مرفت: مااا رح اسكت ولا رح اسمحلك تاذيهن وتعمل فيهن يلي عملتو بعلي .. انا يلي رح وقف بوشك
رجعت هي وايهم ع غرفتن ونامت حدو وضمتو لحتى تحميه..
باخر الليل دق تلفونها لمرفت وفاقت عليه..
مرفت: الووو
اية: ماما ليه ما رجعتي ع البيت
مرفت: حبيبتي ماما عندي شغل كتير مهم.. وينو بابا
اية: نايم
مرفت: من وين عم تحكي.. لمين هاد الجوال
اية: هاد لعمو
رجف قلبا لمرفت وعدلت قعدتها..
مرفت: مين عموو
فارس: شو يا حلوة.. انا مع ابنك وبنتك بالبيت وزوجك مانو دريان عن شي.. اذا ما سكتي وتركتيني بحالي ولادك التنين رح يلحقو علي بالمرة الجايي
حكا هيك وسكر الخط معا..
مرفت: والله اذا...... لك فارس ...فارس
فاقت ع صوتا سالي..
سالي: شبك.. شو في
مرفت: فارس.. فارس ..ببيتي مع ولادي
شهقت سالي وحطت ايدا ع تما.. وسحبت الغطا عنا وقامت من تختا فورا..
سالي: لك ولساتك هون.. روحي لعندن فورا
قامت مرفت من تختا وراحت لعند باسل..
مرفت: باسل بترجاك.. بدي توصلني لبيتي ضروري
باسل: شبك!! ليش عم ترجفي ..صاير شي
مرفت: هلا بخبرك ع الطريق
باسل: اي مشي معي
حمل باسل مفاتيح السيارة وطلعو سوا..
ركبو سوا باسل ومرفت بالسيارة..
مرفت خبرتو لباسل بكلشي شافتو وسمعتو..
مرفت: هدول يلي انا كشفتن.. الله اعلم بالمخفي.. سالي عم تلمحلي ع اشيا صايرة هون قبل لاجي..
باسل: اي وانا حسيت ع هيك شي.. وضع الميتم مانو مزبوط..
مرفت: لك والمصيبة الاكبر انو وصلت معو للقتل.. وما في مين يوقف بوشو.. والسيد امين متل ما قلتلك.. ما بدو فضايح.. وباينتو خايف من فارس
باسل: باينتو ماسك عليه شي ممسك
مرفت: هيك قولتك؟!
باسل: اي.. انت لا عاد تحكي شي معن.. انا رح تابع القصة وحاول وقعو لفارس من غير ما نتاذا نحنا
مرفت: اي ماشي.. قلبي عم يغلي غلي.. بترجاك عجل شوي
وصلت مرفت ع بيتا.. فتحت الباب وطلعت ركض ع غرفة ولادا.. كانو غفيانين وفارس مو بالبيت..
من رعبتا قعدت ع الارض وحطت ايدا ع قلبا.. ودموعا بعيونا..
مرفت: الحمد لله يا ربي.. الله ياخدك يا فارس
قضت مرفت ليلتها ببيتا وتاني نهار فاقت ع بكير وراحت ع الميتم..
سالي: صباحو .. كيفك
مرفت: مو منيحة.. قلبي واجعني
سالي: اهدي واتركيه لفارس.. الا ما يوقع.. انا سالت باسل عنك وطمني
مرفت: (تبكي) لك بغرفة ولادي كان.. لك لو عملن شي شو كان صار فيني
سالي: مرفت تركي هالقصة بلا ما يصير فيكي متل ما صار بهبة
مرفت: مين هبة؟؟!!
سالي: هلأ روحي ع شغلك والمسا بخبرك بكلشي
مرفت: اي ماشي حبيبتي
كانت عم تشتغل مرفت وقلبا واجعا.. عم تتخيل ولادا مدبوحين متل علي...
مرفت: يا ربي تحميهن ..يا الله
خلصو مرفت وسالي شغلن وراحو ع غرفتن ..
مرفت: ما بدي ابقى هون.. بدي روح لعند ولادي.. قلبي عم يغلى عليهن
سالي: اي الله معك حبيبتي.. بس متل ما وصيتك.. انسي موضوع فارس
مرفت: لك صحيح ما خبرتيني.. مين هبة وشو قصتا
تنهدت سالي وغصت ودمعو عيونا.. قعدت ع طرف تختا ..
سالي: هبة كانت تشتغل هون معنا.. وبيوم اجت لعندي وجسما كلو عم يرجف
سالي: شبك.. شوفي
هبة: لك هالكلب فارس.. لك الله ياخدو
سالي: شبو فارس
هبة: لك عم يبعت بنات الميتم لشباب صغار مقابل كام ليرة
شهقت سالي ورجف جسما..
سالي: وكيف عرفتي؟
هبة: هلا سمعتو عم يحاكي شب.. باينتن مختلفين ع كام ليرة
سالي: يخرب بيتو
هبة: انا لازم خبر الاستاز امين
سالي: اي لازم يعرف
راحت هبة لعند السيد امين ع مكتبو..
هبة: وهاد كل يلي سمعتو
امين: لك الله يلعنو
وبعت وراه لفارس ع المكتب .. فارس وقت سمع حكيا لهبة جن ..