الجزء السادس ..
رجعت عالسجن .. ههههه بقصد رجعوني ولاد الحرام عالسجن .. وفتت قعدت وأنا عم فكر بكلام الضابط ..
وأكتر شي خطر على بالي ..قدي تفكيري بسيط وبريء وغبي ..كنت مفكرة يلي بيفوت السجن بيكون بأمان وأن الجريمة بتبقى برا حدود البواب .. وأن الشرطة ناس من أنضف وأشرف البشر .. أتاري صدمتي كانت كبيرة .. أتاري كلشي فكرت فيه كان خيال .. لك أوسخ ناس هنن السجانين .. أوسخ مكان هو السجن ...ناس فايتين لجوا سياحة والطلعة والفوتة بأمرهن متل يلي فايت ع فندق .. بتدفع بتطلع .. والمعتر بتاكلو الفيران ..
بجوز تستغربو هالنتيجه وشو عم أحكي بس هاد الحكي يلي أثبتلي ياه هالضابط الابن الحرام ..
لما أخدوني لعندو قعدت أترجاه يفهمني انا شو عامله وليش سجنوني ..
واستغربت أكتر وقت شفت ابتسامة ثعلبية ع تمو .. اطلع فيي وقلي .. أنا فيي ساعدك وطالعك من هون .. وزيادة ع هيك أنتي بنت صغيرة وحلوة وجذابة .. وباينتك معترة وع باب الله لهيك انا رح ساعدك وهالشي بيصير طبعا اذا وثقتي فيي وسمعتي مني متل ما بقلك بالحرف .. وما بتكوني غير مبسوطة وبتعيشي ملكة زمانك ..
مع كل هي الاغراءات وكل القرف لي شفتو بالسجن ومع بساطتي وقلة خبرتي ومعرفتي بأطباع الناس .. وافقت بسرعة بس ما بخفيكون كان في خوف جواتي .. صوت عم يندهني .. صوت عميق جايي من المجهول .. ما فهمتو كان هالصوت عم يصرخ بس ما فهمتو ..
قلتلو .. اي مشان الله ساعدني او عالاقل فهمني انا ليش هون ..
قلي .. موضروري تعرفي ليش انتي هون بس ببساطه بساعدك شو ما كانت تهمتك وبطلعك من هون بس لازم تلتزمي وإلا والله برجعك لهون و بتهمة أكبر تخليكي تعفني بمراحيض السجن ..
هي كانت بداية كلشي .. بداية التغيير .. بداية الموت الأكبر ..
مر عليي 5 أيام بعد .. أجو تنين رجال أخدوني ورجعوني لعند الضابط .. وخبرني أنو رح يطالعوني اليوم ورح تجي وحده اسما سوزان تاخدني ع بيتا مبدئيا لبين ما يظبطولي وضعي وهيي بتفهمني ع كلشي ..
ولله أنا طلعت معاهن متل الهبلة لوين أخدوني وكيف رحت ما بعرف ..يلي بعرفو اني عم شوف زفت الشوارع من جديد .. وعم شم ريحة غريبة عن أنفي .. صرلي شهور ما شميتا ..
وصلنا على مكان فخم .. شارع منظم .. وبيوت ما شفت منها بحياتي غير على تلفزيون ابو عبدو الحلاق جار الرزق .. على شي مسلسل تركي ..
دخلوني على بناية ضخمة وطلعنا لفوق بشغلة متل العلبة بتوقف فيها وبتكبس شغلات بتاخدك لفوق بعدين عرفت انو اسمو اصنصير ..هههه ..
وصلنا على شقة وفتحتلنا وحدة .. كانت عم تدخن والدخنة عم تطلع من مناخيرا .. وأول مرة بحياتي بشوف هيك أشكال ... فتت وراحو الرجال لي جابوني .. سكرت المرا الباب وقالتلي أهلين يا حلوة انا سوزان ..وانتي شو اسمك ؟
اطلعت فيا بخجل وقلتلا اسمي نور ..
ضحكت ضحكة غريبة بصوت قوي رجفتني ... وقالتلي ريحتك جرابات وعفن فوتي اشلحي هالوسخ لي لابستيه لأعطيكي تياب من عندي والمسا مننزل منشتريلك أكام قطعة .. يلا الحمام من هون ..
انبسطت كتير لأن بدي أتحمم حسيت القمل أكلني .. تحممت ولبست تياب لي جابتلي ياهون .. وطلعت .. دورت على سوزان ما لقيتا بس لقيت أكل على طاولة المطبخ فتت أكلت وشربت كاسة عصير .. ودورت بالبيت لقيت غرفة نوم فتت نمت فيها ..
وما صحيت كأن ألي مليون قرن كو نايمه .. فقت على صوت سوزان .. عم تفيقني لننزل عالسوق .. فقت غسلت وجهي وعطتني بنطلون وبلوزه خرج طلعه لبستون ونزلت انا وسوزان .. أتاري عندها سيارة كتير حلوة ولونا أسود كمان .. وهيي عم تسوق .. انصدمت وقت شفتا وعجبني منظر العز لي هيي فيه ..بس لساتني ما بعرف شو بدي أشتغل معاهن ..
وصلنا على مكان كتير كبير وفيه محلات كتير خبرتني سوزان أنو اسمو مول .. اشترينا تياب كتير وشغلات الصراحة مابعرف كيف بتنلبس حتى اشترتلي شغلات مزركشة بس بتخجل .. يعني مثلا كيلوت مو متل كيلوتاتي .. تخيلو قماشتو شفافة ومن ورا عليه بس خيط انا استغربت ليش هيك بس قلت يعني عادي اذا تحت التياب مافي شي بيخجل عادي مين رح يشوفو يعني ..
رجعنا عالبيت قالتلي سوزان انو اذا تعبانه فوت ارتاح وبكرا بتفهمني عالشغل ...
ما كذبت خبر فتت عالغرفة ونمت ..لتاني يوم الساعه 10 الصبح فيقتني .. وقالتلي قومي نشرب قهوة سوا ونحكي ..
قمت وغسلت وجهي وقعدت معا .. قالتلي اليوم رح تجي منى .. ومنى هيي الكوافيرة لي رح تساويلي شكلي وشعري وحواجبي وتعملني أنثى بكل معنى الكلام .. انبسطت بالحكي .. انو اخيرا رح عيش بالعز ..
ولهمتني انو اليوم عندنا سهرة وأنو جايينا أهم شخصيات بالبلد يسهرو عنا ولازم ينبسطو بالسهرة وإلا بيغضب علينا المعلم ..
انا هون تكركبت بس ع بساطتي وغبائي ما فهمت شو قصدا ...
اجت منى بعد الضهر ساوتلي شعري .. ونتفتلي حواجبي وشواربي وعملتلي مكياج كتير حلو .. اطلعت ع حالي بالمراية صرت أتلفت يمين شمال .. لشوف هي انا ولا حدا واقف جنبي .. وعم فكر وينو جعفر لي كان لابسني .. واكتشفت أنو توب البنات قدي بيلبقلي ..يتبع..