#الورقة_السابعة_بقلم_حواء
#الجزء_الأول
@rwayate
غصون: أحمد كيفك
أحمد: هلا..الحمدلله
غصون: فيك تجي لهون
أحمد: هلأ..بهالوقت؟؟
غصون: اي.. هلأ تعا بسرعة
أحمد: طيب...نص ساعة بكون عندك
ببناية مهجورة..غرفة صغيرة بالقبو..ريحتها رطوبة و العفونة أكلتها..زواياها ملايانة كراكيب و غبرة... العتمة ساكنتها...
صوت الرعد مملي الدنيا...و ما في ضو برا غير ضو البرق...المطر عم تنزل شلالات..و الغيوم السودا و الضباب مغطي السما كلها...
واقفة عند الشباك بلباسها الأسود المعتاد..منزلة الطاقية يلي مغطية نص وشها..حاطة ايد بجيبتها...و التانية ماسكة السيكارة فيها و عم تدخن...
أحمد: كملي
سحبت سحبة طويلة من السيكارة و نزلت دمعة من عينها رغم القوة و الجبروت يلي مأظهرتو..بصوت مخنوق: ماتت..
أحمد: هيك...بهالبساطة!!
غصون: أي...بهالبساطة...يلي متل هدول العالم مستعدين يقتلو مية بني آدم كرمال ما ينكشفوا..حنين كانت رح تكشف كل ألعابهن الوسخة...كانت رح تحكي كلشي بالسبق الصحفي تبعها..لهيك تخلصوا منها..
أحمد: طيب..كيف عرفتي بكل هالشي..
غصون: هي الورقة...حنين كاتبة فيها كلشي..تاركتها بين غراضي يمكن كانت حاسة انو رح يصير شي .. كانت حاسة انو رح يقتلوها...كتبت هون كلشي..أسمائهن..عناوينهن..شو بيشتغلوا..شو معون مصاري... كلشي هون عنون..
أحمد: يعني...يعني انتي عرفتيهن..؟؟
رفعت ايدها و هي عاطيتو ضهرها...أشرت فيها ع طاولة قريبة منها..عليها سبع وراق شدة مقلوبين بالعكس..
غصون: هدول..
قرب أحمد من الطاولة بخطوات بطيئة..
أحمد: شو هدول؟؟
غصون: سحاب ورقة..
مد ايدو بتردد مو فهمان غصون شو عم تحاول تعمل أو شو عم تفكر..سحب ورقة و قلبها.. صورة ست عمرها بالأربعينات..التانية و التالتة و الرابعة و الخامسة و السادسة..كلون صور لأشخاص..أربع رجال و تنين نسوان...وصل لحد الورقة السابعة قلبها..ما كان عليها صورة حدا..كان عليها علامة استفهام بس ؟؟
أحمد: و هي
غصون: هاد الشخص يلي ما قدرت أعرفو..حنين حاكية معلومات عنو بس يبدو ما لحقت توصلو..تركت هالمهمة الي..
أحمد: و هلأ... شو بدك تعملي بهالوراق؟؟
فتلت وشها لعندو...عيونها عم تطلع شرار..و ضو البرق لمع ع وشها..رفعت ايدها و السيكارة بين أصابعها... ضغطت ع سنانها...
غصون: بدي احرقهن...
امتزج صوت الحروف يلي طلع من بين شفايفها بصوت الرعد القوي..
رجع أحمد لورا خطوتين..ضغط ع الوراق بين اديه..تطلع بغصون بنظرة كلها قوة و حزم..
أحمد: غصون.. أنا معك..رح نحاسبون و نخليهون يدفعوا التمن.. اسمعي غصون..حنين الله يرحمها بتكون أختك ..بس هي كانت بالنسبة الي روحي..كانت الهوا يلي بتنفسو..كانت حبيبتي يلي معبية حياتي سعادة..لهيك ما رح سامح يلي قتلها أبدا..
ابتسمت غصون ابتسامة خفيفة: لكن اتفقنا
_____________________________
زياد: اي اي...خلص ماشي..بس ضروري اليوم الشحنة توصل..و ديروا بالكن ها انو حدا ينتبه لأنو وقتها رح اخرب بيتكن..الله معكون
مراد: زياد بيك
سكر زياد الخط و التفت بسرعة و خوف لعند مراد: انت من ايمت هون لك حيوان
مراد: زياد بيك انا دقيت الباب بس حضرتك ما ..
زياد: خلص خلص..شو بدك؟؟
مراد: في آنسة برا بدها تشوفك..
زياد: خليها تفوت
مراد: حاضر... تفضلي آنسة ميرا
فاتت عم تتمايل ع مكتبو..بفستانها الخمري الناعم..و خصل شعرها البنية المفرودة ع كتافها و موصلة لخصرها..و كعبها العالي يلي لافف رجليها الناعمين..مكياجها الناعم و ريحة عطرها عم تفوح منها...وقف زياد و عيون تثبتت باتجاها..مدت ايدها و سلمت..
ميرا: مرحبا زياد بيك..ميرا
زياد: أ..أهلا و سهلا.. مراد خليهون يعملوا قهوة بسرعة
ميرا: وسط لو سمحت..
زياد: اي آنسة ميرا..بشو فيني اخدمك..
ميرا: سمعت انو حضرتك عم تعمل مسابقات توظيف عندك بالشركة..حابة سجل اسمي..
زياد: هلأ و لو انو التسجيل ما بتم هون بمكتبي..بس تكرم عينك هاتي اسمك و الخبرات يلي عندك..
ميرا: بعرف...بس انا حبيت اجي اكسب شوفتك زياد بيك..ههههه
زياد: هههه اي اهلا و سهلا.....تفضل
مراد: القهوة زياد بيك
زياد: فوت
مراد: تفضلي آنسة ميرا...قهوتك..
قربت ميرا أخدت القهوة من مراد كان عم يتطلع فيها تطليعات غريبة و غير مفهومة أبدا..
زياد: حط القهوة و طلاع.. اي آنسة ميرا كملي
مراد: ليلى خانم...لو سمحتي وين فايتة
ليلى: شو؟؟ فايتة لعند زياد من ايمت باخد اذنك مراد بيك ههههه
كملت طريقها..حط ايدو مراد بوشها: لو سمحتي..ليلى خانم..زياد بيك عند ضيوف
ليلى: ضيوف!!..مين هدول..
انفتح باب المكتب و طلعت منو ميرا...: تمام زياد بيك مستنية تليفون منك لكن...تطلعت ميرا بليلى نظرة طويلة و مبهمة و مشيت..
ليلى: مين هي يلي كانت عندك زياد
زياد: موظفة جديدة.
ليلى: بالله..و من ايمت التوظيف بتم بمكتبك
زياد: ليلى...بشرفك مو وقت هالحكي...في شي أهم لازم نحكي في..
ليلى: تفضل احكي..
____________________________

#الورقة_السابعة_بقلم_حواء
@rwayate
#الجزء_الخامس
مسج مراد ما كان بطمن ابدا..و ربطو مع المسج يلي وصلني قبل..بثواني كنت برا البناية و عم اركض..فجأة حسيت حالي عم طير بالهوا..تولد ضغط كبير بأداني حسيتون رح ينفجروا...ما عاد حسيت ع شي بعدها...
فتحت عيوني... بصعوبة قدرت ميز حالي انا وين.. بيت متواضع..حاولت جلس حالي من ع الكنباية..كان في جروح بسيطة بأديي و رجلي..سمعت صوت من المطبخ..مشيت ع مهلي..وقفت عند الباب
مراد: ليش قمتي..عم اعملك كمادات حرارتك مرتفعة كتير
غصون: شو صار؟؟
مراد:.....
غصون: شو هاد يلي صار..مين عمل هيك و ليش؟؟
مراد: تعالي فوتي لجوا خلينا نحكي..ارتاحي
غصون: اي..ما تحكي
مراد: غصون...لك انتي وين فايتة؟؟... مع مين عم تعلقي و ليش؟؟..شو بدك؟؟
غصون: هلأ أنا طلبت منك تشرحلي شو صار..مو تفتح تحقيق معي!!
مراد: يلي صار انو في حدا كان بدو يتخلص منك...كان بدو يقتلك
غصون: مين؟؟
مراد: ما بعرف..انا كنت جاية لعندك..لحقتك وقت رحتي مع زياد و ما كنت مطمن..و بس وضليت ناطر لطلع شب من عندك ما بعرف مين بكون..كان بدي اجي احكي معك.. بس في حدا اجا حط شي متفجر جوا البناية و ركض بسرعة..كان واضح انو بدو يتخلص منك..
غصون: .......
مراد: انتي بتعرفي مين ممكن يكون؟؟
غصون: لا
مراد: غصون شو مخبية؟؟ احكيلي
غصون: هه..احكيلك..طيب هات يا أفندي احكيلي انت شو مخبي..
مراد: كيف؟؟
غصون: مهندس طبي..قادر ع فتح شغل لوحدك..و الحصول ع وظيفة مميزة..و عم يشتغل مجرد سكرتير عند رجل أعمال..أمك يلي كانت مرضانة مبارح متوفية من عشر سنين.. جيتك لعندي بنص الليل هربان ما بعرف من مين و ليش..كل هاد ليش؟؟
مراد: هه...طلعنا خلاص لكن واحد بواحد
غصون: تماما..واحد بواحد
مراد: وين رح تروحي؟؟
غصون: على بيتي
مراد: عندك بيت و قاعدة بهالخرابة!!
غصون: اي..عندي بيت
مراد: طيب خليكي هلأ هون و بكرا بوصلك
غصون: لا بدي روح هلأ
مراد: طيب..رح وصلك
غصون: لا..ما في داعي.. بروح لحالي
مراد: طيب...براحتك.. انتي ما بينخاف عليكي
غصون: مممممم.. طيب
طلعت من عند مراد و اتصلت بأحمد يجي ياخدني..لحد الآن و أنا مصدومة..مين بيعرف كل تحركاتي..مين عم يحاول يقتلني...كنت مستبعدة مراد تماما..هلأ ليش ما بعرف بالضبط..بس ما حسيتو عندو نية يأذيني أبدا..و لا بيعرف لشو عم خطط..و اساسا ما كان بعتلي مسج لو هو يلي حاول يقتلني..
أحمد: غصون...شبك شو صاير..
غصون: حاولوا يقتلوني
أحمد: شووو؟؟
غصون: خدني ع بيتك..
أحمد: لعندي؟؟
غصون: اي..ما بدي روح ع بيتي خايفة حدا يكن عم يلحقني و يعرف البيت..وقتها رح يعرفوا اني اختها لحنين..
أحمد: اي بس..
غصون: بس شو؟؟
أحمد: يعني كمان اذا عرفوا مكان بيتي مو منيح..خلينا نروح ع الفندق انا معي مصاري...
غصون: طيب...منروح ع الفندق
أحمد: تمام.. يلا
رحت ع الفندق..قضيت ليلة هنيك من أبشع الليالي...ما غمضلي جفن فيها و لا ارتاح قلبي..كنت طول الوقت متوترة و عم فكر...
طلبت من أحمد يجبلي تياب و مكياج من بيتي مشان اقدر ارجع روح ع الشركة..الصبح رحت ع الشركة...كان يوم عادي جدا..داومت طبيعي و ما كان الي نفس شوف زياد و لا حتى مراد..ضليت طول الوقت بمكتبي...اجاني مسج ع موبايلي من نفس الرقم المجهول..
" بما انك نفدتي هالمرة..اعتبري هالشي يلي صار انذار الك..اذا ما بعدتي..المرة الجاية رح تكون حاسمة"
ما اهتميت..ما عاد فرقت معي شي...مو فارقة معي ابدا اني روح لعند اختي..ع الأقل بكون عملت يلي علي و حاولت انتقملها...
قبل ما يخلص الدوام بشوي اجا مراد لعندي ع المكتب..
مراد: مرحبا
غصون: هلا
مراد: صرتي أحسن؟؟
غصون: أحسن
مراد: بكرا في احتفال عاملو زياد بيك مشان نجاح مشروعو..كل الموظفين لازم يكونوا موجودين.. و انتي كمان
غصون: تمام
مراد: بجي باخدك؟؟
غصون: لا...شكرا
مراد: طيب..هي الكرت...اه..و كمان في شغلة..زياد بيك عاوزك ضروري
غصون: طيب...جاية
رحت لعند زياد....كالعادة كان قاعد عم يتصفن..فتت لعندو..بدون ما احكي و لا حرف
زياد: ليش ما شفتك اليوم؟؟ مزعوجة؟؟
ميرا: لا أستاذ..من شو بدي انزعج..
زياد: لا لا لا..هي أستاذ ما عاد بدي اسمعها..وقت كون انا و انتي لحالنا ندهيلي زياد و بس.. اتفقنا؟؟
ميرا: تمام..الفكرة انو مبارح كنت تعبانة كتير لأنو رجعنا متأخرين و بالزور اجيت ع الشغل
زياد: طيب ما كان ضروري تجي..خلص ارتاحي اليوم.
ميرا: لا ما بصير..في شغل مراكم
زياد: مو مشكلة.. فداكي..خبرك مراد مشان الحفلة بكرا؟؟
ميرا: اي..عندي علم
زياد: رح تجي اكيد صح؟؟
ميرا: اي طبعا
زياد: انا كان بدي نروح سوا بس
ميرا: مو مشكلة..بروح لحالي
زياد: طيب..وصلك هلأ؟؟
ميرا: لا لا...جاية ابن خالتي ياخدني
زياد: تمام..فيكي تروحي..حاكيني
ميرا: اكيد..منحكي

#الورقة_السابعة_بقلم_حواء
@rwayate
#الجزء_السادس
مراد: انتي بتكوني اختها للصحفية حنين؟؟
غصون:.......
مراد: شبك... ما تردي
غصون: انت يلي قتلتها؟؟
مراد: لا...أنا ما بقتل..أنا مستحيل اقتل حدا
غصون: لكن شو بتعرف عن أختي؟؟
مراد: بدك تنتقمي؟؟
غصون: جاااااوبني..شو بتعرف
مراد: انتي جاوبيني..بدك تنتقمي؟؟
غصون: اي.. بدي خليهون يحترقوا واحد واحد...شوف..هدول الوراق..رح يحترقوا كلون...كلووووون
التفت لعندي و تطلع الوراق...قرب خطوتين باتجاهي: اي..و هي لمين؟؟
غصون: لسا ما بعرف..بس رح أعرف أكيد..
مراد: مممممم..تمام..يعني انتي هلأ فايتة ع الشركة بشخصية مزيفة و عم تتقربي من زياد كرمال تنتقمي لأختك..
غصون: برابو..ها ليكك طلعت بتفهم..
مراد: في حدا معك لسا؟؟
غصون: لا..لحالي
مراد: لحالك!! و هداك الشب..يلي كان عندك
غصون: مراد..لا تحاول تحقق معي..او تتحسسني انو مصيري بإيدك..و تسحب مني معلومات ع هالأساس..أنا كمان بعرف انو انت يلي حرقت الشاحنة..
مراد: شو!!!
ما كنت متأكدة انو مراد يلي حرق الشاحنة..بس ما لقيت شي تاني ابتزو في متل ما عم يحاول يضغط علي..
غصون: اي..الشاحنة يلي طلعت تستلمها بهداك اليوم..كنت هنيك..شفت كيف النار هبت فيها فجأة..ما في غيرك حرقها..و اكيد مو من مصلحتك يعرف زياد انو انت..
مراد: و انتي مو من مصلحتك يعرف زياد انك اختها الصحفية حنين
غصون: بالضبط..يعني في بيناتنا مصالح مشتركة حاليا..وحدة بوحدة
مراد: بالضبط
غصون: احكيلي لكن..ليش حرقت الشاحنة..مو انت بتشتغل مع زياد..و شو عرفك بحنين اذا مو انت يلي قتلتها؟؟
مراد: بشتغل مع زياد ههههه..لا أبدا..ع العكس تماما أنا كنت اشتغل مع اختك حنين
غصون: شووو
مراد: اي.. لا تستغربي..كنت اشتغل مع حنين..و ع هالأساس صرت اشتغل مع زياد..
غصون: فهمني..كيف؟؟
مراد: عدي خلينا نحكي
_____________________________ ليلى: يعني شو..ايمت رح نخلص منها.
هشام: ليلى..انا حاولت كتير بعدها عن زياد..حتى حاولت اقتلها و هددها بس هالبنت يبدو مانها سهلة..انا من وقت ما شفتها بمكتب زياد ما ارتاح قلبي..لحقتها و شفت وين ساكنة..ما قدرت فسر تصرفاتها..و لا اقدر اوصل لمعلومات عنها..ع الأغلب اسمها مزيف..لهيك حاولت اتخلص منها..بس زياد معمي ع قلبو تماما..ما فارق معو شي غير انو هالبنت تضل معو
ليلى: خلينا نخطفها..منخليها تعترف بكلشي
هشام: هيك خطوة بدها دراسة كتير.. اني اقتلها اسهل بكتير من اني اخطفها..
ليلى: اي و شو هلأ؟؟
هشام: هلأ بس رح نصبر..انتي حاولي تبعدي زياد عنها بحجج الغيرة و هيك..منشوف بعدين شو بدنا نعمل
ليلى: طيب
_____________________________
كنت راجع من الوظيفة متأخر المسا..الدنيا عتمة و عم سوق بسرعة..طلعت بوشي اختك..لابسة اسود و متلتمة متلك تماما..عم تركض بسرعة.. واضح انها كانت هربانة من حدا..طرقتها بالسيارة..بس الطرقة كانت خفيفة..نزلت لعندها..
حنين: بسرعة..بسرعة طلعني و امشي
كانت عم تحكي بالزور..فهمت انو بدها اخدها و نهرب..طلعتها بالسيارة..رفضت تروح ع المشفى..أخدتها ع بيتي..
غصون: صح..يومها ما رجعت ع البيت و بعتتلي مسج انها بدها تضل عند رفيقتها..
مراد: بالضبط.. وقت وصلنا ع البيت كانت غايبة عن الوعي..تركتها مرتاحة ما صحيتها...طبعا فضولي دفعني اني اتطلع ع الوراق يلي كانوا معها...بطاقتها الصحفية و وراق و ثبوتيات كانت معها عن زياد و جماعتو..كنت لسا ما بعرفو لزياد..السبق الصحفي يلي كانت مبلشة في و عم تكتب كلشي فضايح عن شغلون بالمخدرات..و انا عم أقرأ و عاطيها ضهري..ما لقيت غير مسدس انحط ع راسي من ورا..
حنين: لا تتحرك..تريك كلشي من ايدك
تركت الوراق و بلشت هدي حنين و اقنعها انو انا ما بدي ضرها... لحتى هديت شوي و نزلت المسدس و خلتو معها..
غصون: حنين كان معها مسدس؟؟
مراد: لا المسدس الي اخدتو من ع الطاولة..المهم حكتلي كلشي عنون و كيف بيشتغلوا و انو هي بدها تكشفون و انو في ضحايا كتير عم تروح بسببون.. ما بعرف ليش و كيف قررت ساعدها و كون معها..أول فترة حنين ما وثقت فيني ابدا..بعدين بلشنا نشتغل سوا و انا توظفت عند زياد بحجة اني بحاجة شغل ضروري و هو وظفني دغري..صرت اسحب معلومات و اعطيهن لحنين..و هي جمعت كلشي وثائق عطيتها ياهن..بهي الفترة كان زياد حاسس اني عم العب من ورا ضهرو..بلش ياخد و يعطي معي..و انا ما انتبهت ع شي..المخدرات كانت عم تمشي بدمي..بالقهوة و الشاي و الأكل يلي بطلبو ع مكتبي..صار يزيد الجرعات اكتر...لحتى أدمنت و صرت اطلبون منو رسمي..و بهاد الوقت كانت حنين مبعدة شوي و مختفية عن الساحة حسب طلبي لأني خفت عليها كتير من زياد..آخر مرة زياد واجهني و ورجاني وراق موقع عليهون وقت كنت مو بوعي..وراق بتديني.. صار يضغط علي لاحكي مع مين عم اشتغل..لآخر لحظة رفضت احكي شي عن حنين رغم العذاب يلي شفتو..بس جوالي كان معون..عرفوا كلشي عنها..و انا ضليت محتجز عند زياد..لحد ما..
غصون: شو؟؟

#الورقة_السابعة_بقلم_حواء
@rwayate
#الجزء_السابع
حسيت قلبي رح يوقف..معقول هلأ بس وصلت لآخر الطريق رح يروح كلشي هيك..بس ما أظهرت خوفي أبدا..حطيت ايدي بجيبتي مكان ما حاطة سكين..و وقفت و التفتت لورا..
غصون: متل مو شايفة
مرام: يلي شايفتو انك عم تحاولي تسرقي...
غصون: اسرق ههههه...لا لا يا حلوة..انا ما بسرق.. يلي عم حاول أعملو شي أكبر من هيك بكتير..أكبر من السرقة
ضليت عم قرب منها و انا عم حاكيها..بالثانية يلي قررت اسحب السكين لهددها..قاطعتني بكلامها: ليكي..أنا ما بعرف شو عم تحاولي تعملي..بس بنصحك لا تلعبي مع زياد..ما حدا بيقدر عليه..ديري بالك
غصون: هاد مو شغلك..انا بعرف شو عم أعمل
مرام: ليش بدك تفتحي الخزنة؟؟
غصون:......
مرام: عم اسأل لأنو فيني ساعدك..انا بعرف كلمة السر
غصون: ليش بدك تساعديني؟؟
مرام: اذا هالشي بضر زياد انا مستعدة ساعدك
غصون: ليش؟؟
تذكزت انو مراد ذكر اسم مرام وقت كان متعاطي..كمان هي كانت عم تعاني من زياد و مستعدة تضرو بأي شي..عطتني كلمة السر و فتحت الخزنة..كان في أوراق بتخرب بيت زياد و عصابتو كلها... ما كان بدي يحس زياد ع شي لأنو لسا ما خلصت..لسا في شي مفقود..الورقة السابعة..لهيك اتفقت انا و مرام اخدت الوراق و صورتون برا بمكتبة قريبة و رجعت لعندي اخدت النسخة و رجعت الوراق الأصليين ع مكانون الأصلي و رحت..
تاني يوم الصبح رحت ع الشركة عادي.. ما لقيت مراد هنيك..اتصلت في كتير بس كان موبايلو مقفول طول الوقت...اجا عمو أبو سعيد و خبرني انو زياد طالبني ع مكتبو..
زياد: تفضل
ميرا: قال بدك ياني أستاذ
زياد: أستاذ!!!..شو عم يصير معك..بعدين وين رحتي مبارح ؟؟
ميرا: وين رحت؟؟ ... مو انت نمت و تركتني و لا كأني موجودة..و لا غيرت رأيك و أنا ما خرج تسهر معي..؟؟
زياد: لك شبك جنيتي..شو عم تخبصي انتي..انا ما حسيت ع حالي مبارح..لا تزوديها
ميرا:.....
زياد: لك شبك.. خلصنا فرديها...اي هيك ها ضحكي دخيل هالضحكة..
ميرا: اي بس ما رح مرقها هيك ها..
زياد: اي مو تكرم عينك..خلص العطلة الجاية أحلى سهرة لعيونك..
ميرا: اي..و منشرب من هداك المشروب حبيتو كتير هههههه
زياد: اي لعيونك ههههه
ميرا: شو وينو مراد مو برا
زياد: ما بعرف..لهلأ مو مبين
طلعت من الشركة و رحت ع بيت مراد دقيت الباب كتير بس ما رد..اختفى تماما ما عاد بينلو أثر...رجعت ع البيت و فردت كلشي وراق معي و اجا أحمد.. ضلينا ننسق سوا و نخطط شو بدنا نعمل..
أحمد: تمام..هيك خلص لكن..فينا نوجه ضربتنا و صار لازم تبعدي بقا و تتركي الشغل
غصون: لااا..لسا
أحمد: لسا شو؟؟
غصون: لسا بدي اعرف الشخص المجهول
أحمد: غصون...ما عاد في داعي..انا خايف كتير عليكي..ممكن ننكشف بأي لحظة و ينتهي كلشي.. ما بدي ياكي تنضري..هالشي يلي حصلنا عليه بكفي
غصون: لا...لازم يتحاسبوا كلون...كلون
أحمد: خلصنا غصون..حااج بقا انسي
غصون: لك شو بدي انسا...بدي انسا انهن قتلوا اختي..كيف بدي انسا
أحمد: لا..بس خلص متى ما وقعنا هدول الشخص السابع ما عاد الو أهمية..
غصون: ما بعرف..لسا ما ارتاح قلبي..ما بعرف ..لك صح..قلتلك انو مراد اختفى...
أحمد:.......
غصون: أحمد..أحمد وين شردت
أحمد: ليكني معك..شو قلتي؟؟
غصون: عم قلك مراد اختفى
أحمد: اختفى!! كيف يعني؟؟
غصون: ما بعرف..آخر مرة حكا معي وقت عرفني اني اختها لحنين و بعدها ما عاد عرفت عنو شي ابداا..
أحمد: شفتي..هاد بأكد حكيي...قلبي مو مرتحلو من الأول
غصون: ما بعرف..و انا كمان حاسة في شي
ضليت فترة عادي بالشركة و طول الوقت أحمد عم يقنعني اني اترك و خلص و كلشي وراق ضلت معو للاحتياط..و مراد طول هالفترة مختفي تماما عن الأنظار..رحت مرة تانية لعند زياد ع البيت و وقت حسيتو صار مو طبيعي تحججت انو لازم روح لأنو خالتي تعبت كتير..
و ما شفت مرام هنيك بالبيت كمان أبدا..
أحمد صار يبعد كتير عني و مل مني لأنو ما عم اقتنع اترك شي..ما لمتو بهداك الوقت..صح كان حبيبها لحنين..بس هو لسا شب بأول عمرو..و مو مضطر يضيع حالو و يفني حياتو.. طلبت منو الوراق بعدين بس رفض و قال خليهون عندو لأنو خايف علي.. و انا ما اخدت و عطيت كتير بالقصة..كنت مشغولة بشي أهم..عم حاول أعرف أي شي عن الشخص المجهول..طلعت الورقة يلي كاتبتها حنين و بلشت الحق معلومة معلومة عنو..
اول معلومة كانت كاتبتها انو هو شب صغير بالعمر..أصغر واحد بالعصابة.. بلشت فكر بكل حدا بعرفو بالشركة بهالعمر و بيناتن مراد..المعلومة التانية انو هو ساكن قريب من بيت زياد بس مو معروف البيت وين بالتحديد..
داق خلقي و ما كملت..اخدت الموبايل و حاولت اتصل ع رقم مراد...فجأة علق الخط...ضل عم يرن شي تلت دقايق بعدين فتح الخط..صرت اسمع ضجة و كلام مو مفهوم و بعدين سكر الخط..رجعت رنيت طلع مقفول..تركت الموبايل و نمت..الصبح رحت ع الشركة..فتت ع مكتبي لقيتون عم ينقلو غراضي..
ميرا: عمو أبو سعيد شو عم تساوا؟؟

#الورقة_السابعة_بقلم_حواء
#الجزء_الثالث
@rwayate
عم تحاول تهرب بعيونها منو...قاعدة ع الكرسي و عم تحرك الحطبات.. و هو قاعد مقابيلها عم يتأملها..عم يحاول يجمع تفاصيل وشها و ملامحها يلي ما قدرت تخبيهون بشخصيتها المزيفة..حركاتها الاعتيادية يلي ما قدرت تسيطر عليهون...
مراد: شو عم تحاولي تعملي؟؟
رفعت غصون راسها و وقفت تحريك بالعصا..اتطلعت في بنظرة بمعنى ما فهمت..
مراد: لشو بدك توصلي؟؟
غصون: هاد الشي ما بخصك..
مراد: بس انا صرت بعرف مين بتكوني غصون.. أو ميرا..شو بتحبي ناديكي؟؟
رفعت الطاقية عن عيونها..شالتها من ع راسها..لينساب شعرها الحريري ع ضهرها..طلعت سيكارة و شعلتها...
غصون: مو مهم..ما رح تحكي..متأكدة
مراد: هههه و شو عرفك
غصون: كمان ما بخصك..بس انا بدي افهم شي واحد..كيف عرفتني؟؟ كل يلي شفتني فيهن ساعة.... و نص وشي مغطا..كيف عرفت؟؟
مراد: عادي جدا...بحة صوتك المميزة..و طريقة مسك السيكارة..كل العالم بيمسكوها بين الوسطى و السبابة..بس انتي بتمسكيها بين السبابة و الإبهام متل مو ماسكتيها هلأ و متل ما كنتي ماسكتيها بمكتب زياد...و الأهم من هيك..الجرح بأصبعك بإيدك اليميني..انتبهتلو وقت كنتي عم تنقري ع الطاولة بمكتبك..و وقت كنتي حاطة السكين ع رقبتي مبارح..
كل هاد خلاني شك بنسبة 90 بالمية انك ميرا..و 100 بالمية تأكدت منون هلأ وقت سكتي لفترة بعد ما سألتك عن قهوتك..
و هاد كلشي...شو رأيك؟؟
غصون: ههههه ولله طلعت أذكى من يلي توقعتو يا أستاذ مراد...
مراد: اي لا يغرك المظاهر هههه...ما رح تحكيلي شو السر يلي مخبيتي؟؟
غصون: بس تحكيلي انت شو السر يلي مخبي
مراد: انا؟؟
غصون: اي..شو جابك الساعة 22 بالليل ع مكان مقطوع هون..لا و شو هربان من قطاعين الطرق...ههههه
مراد: بتعرفي تأخر الوقت..لازم روح..
غصون: الله معك...دير باااالك يطلعلك قطاااعين طرق...
مراد: ماااشي ماااشي خاطرك..
غصون: أهبل هه
_____________________________
أحمد: غصون غصون..صباح الخير
غصون: صباح النور..
أحمد: رايحة ع شركتو للحقير
غصون: اي... لازم تتعمق علاقتي معو اكتر لاقدر اسحب الملفات يلي بدي ياها..
أحمد: ماشي...بس ديري بالك منو ها.. ليكي خليني وصلك احسن
غصون: لا لا شو توصلني..ما بدي حدا يشوفك
أحمد: طيب..حاولي تجيبي شي خبر محرز اليوم...الله معك
غصون: ماشي...خاطرك
_____________________________
وصلت ع الشركة بكير..كان زياد لسا مو جاية..ما شفت سيارتو..طلعت ع مكتبي..أول ما فتحت الباب شفت ليلى قاعدة ورا المكتب و ماسكة قلم عم تضرب في بإيدها..
ليلى..الورقة الأولى...ست مطلقة بعمر ال477 سنة..على علاقة حب مع زياد و شريكتو بشغلو..ما عندها ولاد..و عايشة لحالها.. كلشي بالشغل بيمشي من تحت أمرها و زياد بيرجعلها بكل قرار بدو ياخدو..
ميرا: صباح الخير
ليلى: أهلا أهلا ميرا خانوم..صباح النور..مبكرة اليوم خير انشالله..
ميرا: مدام ليلى..في شغل كتير متراكم هون...يبدو أنو الموظف أو الموظفة يلي قبلي كان كتير مهمل..
ليلى: ههههه و هلأ انتي رح تجي تلعبي دور الموظفة الشاطرة و يلي رح تأنقذ الموقف و رح ينبرع الكل بشطارتها
ميرا: مدام ليلى...ما بعرف ليش و مشان شو عم تعامليني بهي الطريقة..بس يلي بعرفو انو ما في شي بيني و بينك لحتى نكون أعداء..ع العكس تماما انا بشرفني كون مقربة من مدام متلك الها خبرتها بالحياة و الشغل..
ليلى: ممممم...منشوف آنسة ميرا..منشوف
ميرا: فرصة سعيدة مدام
طلعت من المكتب...كان واضح انو ليلى رح تكون عقبة كبيرة بوشي..لحد الآن ما شفت شخصيا غيرها هي و زياد...ما كتير اهتميت لأمرها بالوقت الحالي...كان في هدف واحد بعيوني حاليا..زياد..متى ما وقعتو بشباكي.. رح يخف حمل ليلى علي شوي..استنيت شوي..صار وقت يجي زياد...زبطت حالي شوي و رحت ع المكتب...مراد ما كان برا..استغربت ليش..قربت لدق باب مكتب زياد سمعتو عم يحكي مع شخص..كان صوت مراد..
زياد: حاول تمشي كل الأمور تمام..ما بدي اي خطأ فهمان
مراد: تمام زياد بيك و لا يهمك
زياد: الشي يلي صار بالشحنة السابقة ما بدي يا يتكرر ابدا...هي آخر فرصة الك مراد..
مراد: تمام..
زياد: كالعادة...بتروحوا اول ع المستودع و بعدين بتنطلقوا من هنيك...فيك تروح
رجعت لورا بخطوات خفيفة لوصلت لبرا تطلعت من الباب...طلع مراد و استند ع الحيط و غمض عيونو...رجعت فتت مرة تانية..فكرتو رح يفتح عيونو ع صوت خطواتي بالكعب..بس كمان هالمرة كان بعالمو التاني..مو حاسي ع شي..
ميرا: مراد..مراد..عم تسمعني
فتح عيونو و صار يضحك: اديش في تشابه..
ميرا: قصدك اديش في اختلاف..
مراد: لا لا صدقيني تشابه...و تشابه كبير..بس يمكن انا لوحدي بشوفو هيك
قربت من باب مكتب زياد حطيت ايدي ع القبضة و نقرت الباب: انت بتشوفو هيك..

#الورقة_السابعة_بقلم_حواء
@rwayate
#الجزء_الرابع
غصون: ما عم سدق..كل هااد!!!
أحمد: وطي صوتك لحدا يسمعنا
غصون: يا لطيف هالدفعة شو كتيرة...رح تكون ضربة غير شكل ههههه
أحمد: لكن خلينا نبلش
غصون: لاااا..شو نبلش لينزل الشوفير..قلتلك ما بدي كون السبب بقتل روح حدا..
أحمد: ليش بقا؟؟
تطلعت بأحمد و رفعت حاجبي: أحمد!! بدك يانا نقتل؟؟!
أحمد: أي..ليش هنن ما قتلوا حنين..كلون يلي شايفتيهن هون السبب بموت حنين..كلووون
غصون: و لو.. نحنا ما منحاسب.. القانون بحاسب و الله بالآخرة بحاسب..نحنا بس رح نمهد الطريق لينمسكوا..
فتل وشو و ما عجبو حكي و صار يتأفأف...
غصون: ها...ليكو نزل...بعدو عنها.. يلا انت روح من ورا..و انا رح قرب شوي..
أحمد: طيب ماشي...
غصون: ليك...انت بس راقب الوضع.. انا رح نفذ جسمي أصغر من جسمك ما رح بين..
أحمد: طيب طيب
بلشت قرب من السيارة..كان الكل بعيد عنها..فجأة هبت النار فيها...وقفت و جمدت بمكاني..تطلعت لورا لشوف اذا أحمد لسا هنيك و لا هو يلي شعل النار..لقيتو وراي...ركضت بسرعة لورا و رجعت تخبيت ورا التلة..
أحمد: برابو عليكي...بهالسرعة!!!
غصون: مو...مو انا...مو انا
أحمد: كيف؟؟
غصون: خلينا نروح بسرعة بعدين بحكيلك..
_____________________________
مراد: كيف صاااار هيك... لكككك كيف صاااار هييييك..كيييف
مؤيد: مراد.. طول بالك
مراد: لك شو طول بالي...البضاعة راحت انحرقت..شو بدي قول لزياد بيك
مؤيد: مين الو مصلحة..مين عم يلعب فينا؟؟
مراد: ما بعرف...ما بعرف...الله يستر
مؤيد: و هلأ شو بدنا نعمل؟؟
مراد: شو بدنا نعمل يعني..بدي روح خبر زياد بيك..
مؤيد: ولله ليلحقنا بالبضاعة كلنا
_____________________________
لك أديشك حلوة...بحياتي ما شفت أنثى متلك..رح تكوني الي متأكد...كمان انتي شكلك واقعة و ما حدا مسمي عليكي... هههههه
مرام: زياد بيك
زياد: نعم...شوفي بهالوقت ما قلت لا حدا يزعجني بدي نام
مرام: زياد بيك في شب اسمو مراد بدو ياك
زياد: مراااد!! شو صاير..خلي ينطر نازل
مرام: حاضر
زياد: شوفي...شو جابك بهالوقت لعندي
مراد: زياد بيك..البضاعة انحرقت
زياد: شووووو
مراد: هاد يلي صار
مسكو من جاكيتو و صار يصرخ بوشو..عيونو عم تشعل نار أكبر من النار يلي حرقت الشاحنة: لككك كييف كيف بصير هيك؟؟
مراد: أنا ما بعرف شي...فجأة النار هبت بالشاحنة..ما عرفنا مين و لا كيف
زياد: لك الله ياخدكون..حيوااانات..انقلع من وشي...روووووح
_____________________________
أحمد: شو يعني؟؟
غصون: ما بعرف..انا ما عملت شي..النار شعلت لحالها..ما بعرف كيف..معقول يكون في حدا تاني غيرنا عم يلاحق زياد؟؟
أحمد: الله أعلم..
غصون: ع كل حال..ما بتفرق..المهم زياد بكون جانن هلأ هههههه
أحمد: أي..لسا رح يشوف شي ما شافو بحياتو
غصون: يلا انت روح بتكون تأخرت ع أمك
أحمد: بس لو ترضي و تجي تسكني عنا
غصون: أحمد حكينا بالموضوع كتير..خلص روح
أحمد: طيب
بعد ما طلع أحمد من عندي نمت بدون ما حس ع شي...
( حنيين...حنين...قومي لك أختي..قومي..لك وين رحتي و تركتيني..لكك حنين قومي..انتي عايشة صح؟؟ عم تسمعيني..حنييييين..
صرخت بأعلى صوتي...ضليت عم حركها ساعة لترد علي...دموعي نشفوا..بس ما ردت..جثة هامدة بدون و لا حركة..بدون و لا نفس...
قرب أحمد و بعدني عنها: غصون..بكفي..خلص خلص اهدي..
غصون: لككككك ااااخ...لكككك حنين ماتت...لك اختي يلي مالي غيرها ماااتتت..
الضابط: سجل عندك..عثر على المغدورة حنين في المنطقة***** و قد قتلت طعنا بالسكين ثلاث طعنات إحداهما في القلب... ذلك في تمام الساعة الحادية عشر مساء..
ممكن تجوا معنا ع المخفر لو سمحتوا..لنسجل أقولكن..
أحمد: تمام
الضابط: طيب..حاولي تتذكري.. اختك ما حكت شي معلومات قدامك عن هالعصابة؟؟
غصون: لا ابدا..ما حكت شي
الضابط: لكن نحنا رح نستمر بالتحقيق و اي شي بصير معنا رح نخبركون
أحمد: يلا غصون خلينا نمشي..
راحت حنين...أمي التانية و أختي الحنونة راحت..تركتني بغابة كلها وحوش لحالي... يا الله هالبيت شو بارد بدونك يا حنين..ما قدرت ضل بالبيت... بعد اسبوع من الحادثة تركت البيت و تركت جامعتي و تركت كلشي وراي و دفنت حالي هون بهالغرفة المهجورة...)
فتحت عيوني...اتأخرت كتير و ما حسيت ع حالي..قمت بسرعة لغير لبسي و حط مكياجي..طلعت من البيت بسرعة...سمعت صوت زمور سيارة من وراي..التفتت لورا و قربت منها..نزلت راسي لشوف مين فيها...شال النضارات الشمسية و ابتسملي: صباح الخير...قلت بجي بوصلك
طلعت بالسيارة بدون ما رد عليه..
غصون: يلا امشي اتأخرت
مراد: أي أمرك غصون خانم.. في أوامر تانية؟؟ غصون: حاليا لا...شكلك تعبان
مراد: اي...شوي..مبارح اخدت أمي ع المشفى كانت تعبانة شوي
غصون: له له...سلامتها نشالله
مراد: الله يسلمك
غصون: ما قلتلي اديش الك بتشتغل عند زياد
مراد: صرلي زمان
غصون: يعني من ايمت ؟؟
مراد: من زمان
غصون: ههههه مو طبيعي شو عنيد

#الورقة_السابعة_بقلم_حواء
@rwayate
#الجزء_الثامن
هشام: هلا هلا...ميرا خانم
غصون: ......
هشام: هاتي لشوف يلا..احكيلي كلشي يا حلوة..شو عم تحاولي تعملي؟؟
غصون: ما دخلك
مسكني من وشي بإيدو و صار يضغط ..كان منظرو مقرف..مقرف جدا..
هشام: اسمعي وليهث.روحك بطلعها فهمانة
صرخت بوشو: طلعهاااا...مو فارقة معي
هشام: لا...لا تحلمي اقتلك..رح تضلك ملحوشة هون و عم تتعذبي لحتى تحكي و غصب عنك..شوووو مخبية اااااه..
غصون:.......
هشام: ما رح تحكي ما...ماشي..راجعلك
طلع هشام و بعدين فتحوا الباب شبين و فوتوا مرام لعندي كانت عم تبكي ربطوها جنبي..
مرام: آسفة..ضلوا عم يعذبوني لاعترفت..قلتلون انك اخدتي وراق من عند زياد غصون: يعني زياد عرف؟؟
مرام: اكيد بكونوا حكولو
غصون: ......
مرام: رح يقتلونا..متأكدة
غصون: لا تخافي..ما رح يصير شي
مرام: هدول وحوش ما بتفرق معون..مستعدين يقتلوا مية بني آدم..
غصون: بعرف..بس لا تخافي... رح نهرب
و انا عم هدي مرام انفتح الباب و فاتت ليلى..
ليلى: قلتلك و لا لاء...لك أنا ليلى
غصون: هه...بالله شو
ليلى: خرسي وليه..ما بيطلعلك تحكي..رقبتك بإيدي هلأ بقتلك
غصون: ممممم...بس اذا قتلتيني ما رح تستفادي شي ها...لأنو وقتها جماعتي رح يحكوا كلشي و يخربوا بيتكون يا حرام...
ليلى: هههههه لهيك انا ما رح اقتلك.. رح تعدي هون متل الشاطرة و تحكي كلشي يلا...
غصون: فشرتي
ليلى: طيب..متل ما بدك...خليكي هون
__________________________
أحمد: أمي الله يوفقك ركزي معي..هلأ غصون اجت و فاتت ع غرفتي و اخدت وراق و طلعت
أم أحمد: أي
أحمد: طيب..ما قالتلك وين رايحة
أم أحمد: لا..بس عطتني عنوان هالاوتيل
أحمد: طيب طيب..هاتي..وين بدك تكوني لك.. .غصون..لككك اااخ منك بس
راح احمد ع الاوتيل سأل عني و ما عرف شي..ضل عم يدور علي بس ما وصل لشي.. وقتها عرف انو ممكن كون بين ادين زياد هلأ..
ضليت فترة محتجزة هنيك..و طبعا كلشي وراق و الفلاشة رجعت لإيد ليلى و هشام و زياد عرف كمان اني عم العب من ورا ضهرو..دقت هنيك كل أنواع العذاب النفسي و الجسدي..و عرفوا اني اختها لحنين...
غصون: مرام مرام..
مرام: نعم
غصون: هلأ مراد كمان بين اديهن؟؟
مرام: مراد!!
غصون: اي
مرام: هه..مراد بين اديهن...ما بظن
غصون: ليش
مرام: شبك ما تردي علي؟؟
و انا عم حاكي مرام شميت ريحة بنزين بالمستودع...و بعدها بلشت تهب النار..كانت النار قريبة و رح توصل..انا و مرام مربطين و مو قدرانين حتى نتحرك..صرنا نصرخ و نعيط بس ما حدا عم يسمعنا..واضح انو المكان مهجور..و الحريق مفتعل ليتخلصوا منا..صرنا نزحف و نبعد ع النار لوصلنا ع الباب..بس كان مسكر..نخبط عليه بس ما في فايدة..قريب مني كان في شفرة قربت لعندها و اخدتها من ورا..حاولت اقطع الحبل..كان سميك كتير و انا عم اقطعوا جرحت ايدي من عند الشرايين بدون قصد بس انقطع.. اتمالكت نفسي و فكيت مرام..ما قدرنا نطلع من الباب نطينا من شباك صغير فوقو..كل هاد و النار عم تهب و ايدي عم تنزف..صرنا نركض و بلش ضرب رصاص علينا..اجت رصاصة بمرام و وقعت بأرضها..حسيت حالي انانية كتير بس ما كان في وقت وقف شوفها..تركتها و كملت ركض..آخر شي وصلت لشارع رئيسي و ما عاد قدرت كمل نزفت كتير و دخت..فقت لقيت حالي بالمشفى..كان في سيارة مارقة من الشارع و أسعفوني..طلبت منون يتصلوا بأحمد اجا أحمد ع المشفى..كان صايبو حالة هستيريا تماما.. أول ما شافني ضمني و صار يصرخ علي و يعاتبني
أحمد: لك قلتلك خلللص...قلتلك بكفييي لهووون.. ليش ما بتقتنعي...لكككك لييش.. هيك احسن..اخدوا كلشي..بدل ما يكونوا هلأ ملحوشين بالسجن ليكون عم يلاحقونا و نحنا هربانين منون..
غصون: هربانة..انت ما دخلك
سكت أحمد و اتطلع فيني..
غصون: اي انت ما دخلك..ما حكيت شي عنك..صح تعذبت كتير بس ما رضيت احكي شي انت ما ذنبك..روح من هون..لا عاد تقرب مني..انا صرت خطرة كتير..ما رح يتركوني..رح يقتلوني اكيد و اذا عرفوا انو الك علاقة رح يقتلوك كمان..روح من هون
أحمد: خلصتي؟؟
غصون: اي
مسكني أحمد من كتافي بقوة..كأنو كلامي شرارة شعلت في..عصب مني كتير..
أحمد: لكككك شو عم تحكي انتي..بدك ياااني اتركك...بدك ياني روح و خليهون يقتلوكي و اهرب... لك انا أحمد لك غصون..انا احمد..و لا نسيتي..نسيتي عهد الاخوة يلي بيني و بينك..نسيتي انو انتي اختها لحنين...حنين يلي كانت أغلى شي بحياتي..حنين يلي قالتلي قبل ما تموت بيوم انو اذا صرلها شي انتي رح تكوني أمانة برقبتي...هلأ جاية تقليلي روح من هون..صدقيني انا اذا كنت عم اطلب منك تتركي كلشي فمو لأنو خايف ع حالي.. انا خايف عليكي
غصون: خلص أحمد مشي الحال ما عاد في شي اخسرو هلأ أنا خسرت كتير..بس انت عندك أمك مالها غيرك لازم تضل جنبها..
أحمد: غصون..ليكي..رح نسافر اي..منروح منسافر..رفيقي بدبرلي كلشي بأسرع وقت ما رح يقدروا يعملوا شي صدقيني..

#الورقة_السابعة_بقلم_حواء
@rwayate
#الجزء_التاسع #الأخير
طلعت الورقة السابعة من جيبتي و قربت لعندو..حطيتها ع الطاولة جنبو..
غصون: هاد انت لكن...حضرتك بتكون الورقة السابعة..برابو...بتعرف تمثل و تلعب دور المظلوم منيح...بس بتعرف معك حق..فعلا أنا غبية..عنجد انا وحدة غبية...ما عم سدق..
طلع مسدس من جيبتو و وجهو ع راسي..
أحمد...الورقة السابعة...باختصار مفيد..حبيب اختي حنين..و الشب يلي كنت معتبرتو أخي و سندي..حبو لحنين ما كان إلا جزء من خطتو..
أحمد: بس شفت الساعة برا عرفت انك شفتي كلشي..بعد ما طلعتك من المشفى اجيت لهون و شفتها..عرفت انو خطفوكي من هون..ما حكيتيلي مشان ما تورطيني ع حسب تفكيرك..بس انا فكرت انك عرفانة شي..لهيك خليت رجالي يجوا ع البيت ع اساس بدون يخطفوني..لأعرف اهرب منك و رتب اموري..
غصون: هي الساعة يلي هدتك ياها حنين بعيد ميلادك..بوقتها كنت مستعجلة و خايفة ما انتبهت عليها..كنت عند حنين وقت تذكرت انو هي نفسها الساعة يلي مكتوب عليها اسمك و اسم حنين من جوا..و هي وصلتي لعندك..
أحمد: مبروك..ههه منيح عرفتي
غصون: طالما انت معون..ليش تركتني من الأول عم لاحقكون..
أحمد: لا لا..هي ما حبيتها منك..تركتك عم تلاحقيهن..و هالشي كان من مصلحتي..هلأ صحيح أنا كنت اشتغل معهن و أنا يلي دبرت قتل حنين..بس بعد ما انقتلت حنين اختلفت معهون كتير و قررت اتركون و ما كان عندون شي بديني..بما اني كنت اليد الخفية يلي عم تدبر أمورهن..لهيك انبسطت كتير وقت قررتي توقعيهن..بس طلعتي غبية و ما قدرتي.. توقعت تخبري عنون دغري بس يصيروا وراقهن بإيدك..و وقت انخطفتي خفت كتير بصراحة..بس مو عليكي..خفت تحكيلون شي عني..بس طلعتي كفو و ما حكيتي ههههه بتشكرك من قلبي..
غصون: لكن مو انت يلي حاولت تقتلني وقتها؟
أحمد: لا طبعا..لسا كنتي لازمتيني
غصون: كان بدك ياني سلم الوثائق للشرطة و ينمسكوا كلون و انت تنفد و تهرب..
أحمد: بالضبط
غصون: و لهيك ضليت بعيد و حطيتني بالواجهة و انا الغبية كنت عم رد عليكو اعمل يلي بدك يا
أحمد: كمان صح
غصون: حنين عرفتك قبل ما تقتلها؟؟
أحمد: اي..بالثانية نفسها...خليت رفيقي يحكي معها و يخبرها انو هو صحفي و بدو يتعاون معها و عندو معلومات عن الشخص المجهول..و بس اجت انا قتلتها بإيدي..شافتني وقتها..
غصون: اديشك حقير
أحمد: شايفة بالله
غصون: و مراد؟؟
أحمد: انا يلي خطفتو..بس بلشت تتعمق علاقتك معو خفت يساعدك توصلي لشي..لأنو مراد أذكى منك بكتير...
غصون: شو عملت في؟؟
أحمد:......
غصون: شبك؟كأنك تذكرت شي مهم؟؟
أحمد: اي..لهيك لازم اتخلص منك بسرعة عذريني..لأني مستعجل..سلميلي ع اختك..
مراد: تأخرت أحمد بيك..
كان مراد جاية من ورا و عم يمشي ع مهلو و انا منتبهة و عم الهي أحمد بالحكي..حط المسدس براسو و هددوا اذا ما بنزل مسدسو رح يقتلو...
مراد: شو؟؟..كأنك نسيت انو وقت اخدت رجالك ع بيتك يخطفوك ما ضل غير واحد مسكين معي.. و طبعا كان كتير سهل علي اتخلص منو و الحقك..كنت بعرف جاية لهون احمد بيك..
حط أحمد المسدس تبعو ع الأرض و اجيت لورا مراد..طبعا أحمد ما استسلم بهالسهولة..ضرب ايد مراد برجلو و هرب..
غصون: راح...هرب الكلب
مراد: اهدي شوي
غصون: مراد...انت منيح؟؟
مراد: انا منيح ما تخافي..لو حكيتيلي كلشي من الأول ما كنا وصلنا لهون..
طلعت انا و مراد من البيت..رحت معو ع بيتو..كنت يئسانة..مقهورة..مكسورة..لحد الآن ما عم استوعب..أحمد!! ...أحمد هو..لك ليش.
مراد: غصون..صرتي احسن
غصون: وين رح يكون راح؟؟
مراد: هلأ ارتاحي ما رح يقدر يأذيكي مرة تانية
غصون: شفتك وقت اجيت ع بيتك
مراد: اجيت آخد المسدس..أحمد قال انو بدو يقتلك..كان عم يحكيلي كلشي و كأنو عم يخليني اتعذب و يشمت فيني..لهيك عرفت عنوان بيتو و عرفت انو هو هنيك..
غصون: خلص...راح كلشي
مراد: اي...بس الإنسان مو بالضرورة يستسلم..حتى لو فشل مرة و تنين و تلاتة و حتى عاشرة..في يرجع يبلش من أول و جديد و يرجع يحط هدف بين عيونو و يسعى ليحققو..
تطلعت بمراد بغرابة..هاد الحكي يلي حكيتو لزياد بالمكتب: كنت عم تتسمع
مراد: ههههه طبعا..و ع فكرة لما بدك تعطي نصيحة للناس..طبقيها..
غصون: يعني انا لسا فيني حقق هدفي
مراد: طبعا
غصون: كيف؟؟
مراد: هاد الشي انا الي عم دبرلو اكتر من سنتين و قلتلك هالشي من وقت ما حكينا عن حنين الله يرحمها..هلأ صار الوقت لاكشف كلشي جمعتو و خبيتو
غصون: يعني...يعني انت؟؟
مراد: اي..يعني انا معي كل المعلومات يلي راحوا منك..لا تخافي انا كمان قتل حنين أثر فيني كتير..ما كنت رح اسكت ابدا..