#بقلم_فيلوفوبيا
الجزء الرابع
_وقف و استعد ليطلع بس الحمى ماسمحتلو و داخ ووقع بالارض وهو مغمى عليه
مابيعرف اديش بقي نايم.....بس لما صحي لقا حالو على سرير دافي و مريح....و غرفة مرتبة ونضيفة و موقدة الحطب شغالة فيها....طلع بالسقف
كان معلق فيه تريا قديمة ومصدية
صوت المطر الي جاية من برا كان قوي
فتش بعيونو ليعرف وين هو......خلال هالدقايق دخلت
بعبايتها السودا بس راسها ووجها مكشوفين
طلع فيها و الخوف دب بقلبو من منظرها....وهيه لما شافتو صاحي....حطت صينية الاكل عالارض وغطت راسها ووجها بطاقية العباية
و رجعت حملت الاكل وحطتو جنب وسيم_
وسيم:انا وين؟
_بالقصر
وسيم:هي غرفتك اكيد
_اي غرفتي
وسيم:عايشة لوحدك؟
_ومين رح يقبل يعيش مع حدا متلي!!!
وسيم______
_عملتلك شوربة تدفيك....انت لازم تشوف طبيب لان الحمى الي صايبتك سببها سم الافعى الي لدغتك
وسيم:ليش بيهمك امري؟؟؟مبارح كنتي بدك تنتقمي و اليوم مسطحتيني على سريرك و بغرفتك وبدك تطعميني!
_صرلي 4 سنين ماحكيت مع انسان...كنت رح انسى الحكي من اصلو
وسيم:يعني عم تهتمي فيني لاني قبلت احكي معك!
_لانك ماهربت من شوفتي...ولانو بدي ضميرك يعذبك بس تعرف ليش انا هيك.....ولانو...يمكن
وسيم:يمكن شو؟
_يمكن....تاخد حقي
وسيم:انا ماعم افهم شي!
_كول هلأ....وبعدين بتفهم كل شي
_تجلس وسيم حتى ياكل....وهيه كانت قاعدة على مسافة قريبة منو...اكل لقمتين من الشوربة....هيه كانت موطية راسها و عم تتجنب النظر الو
بدون تفكير....ترك الملعقة من ايدو....ومسك الطاقية الي مغطية فيها راسها و وجها و بعدها عنها....لتظهر ادامو
بكل بشاعتها و منظرها المشوه
جلد وجها متني فوق بعضو ومجعد و عينها اليمين مغمضة و الجفون ملزقين ببعض...حواجبها مختفيين من الحرق....وعينها التانية مفتحة بس حواليها في كم حرق صغار
نص شفايفها محروقين و النص التاني شبه سليم
و انفها ممحية ملامحو وباقي منو فتحتين للتنفس
و شعرها بيشبه كل شي الا الشعر
قصير كتير...محروق...و من مظهرو مبين ملمسو الخشن
طلعت فيه بدون ماتزيح نظرها عنو
وهو تأملها لدقيقتين....بس ماقدر يتحمل بشاعة منظرها
قلبت معدتو و ستفرغ اللقمتين الي أكلهن عالارض
هيه طلعت فيه.....ودمعت عينها....رفعت الطاقية وغطت حالها...وبعدت عنو لتجيب شي تمسح فيه الارض_
وسيم:انا اسف ماقدرت اتحكم بحالي
_عادي...ماتعتذر
وسيم:خليني امشي....بس اتزكر شي برجع لعندك
_مع السلامة
وسيم:طيب.....بس خبريني عن اسمك
_اسمي؟؟؟.....اسمي ياسمينة
وسيم:ياسمينة.....طيب...سلام
_طلع وسيم وترك ياسمينة عم تمسح الارض.....
خلصت وقعدت على طرف سريرها....شلحت العباية ليظهر جسمها النحيف كتير و الشاحب
حملت مرايتها وطلعت بوجها....تلمست الجزء السليم منو بطرف ايدها....عينها و نص خدها ونص تمها....و الباقي كلو مشوه...غمضت عيونها ليرجعلها احساسها بالحروق و كأنها هلق عم تصير
تزكرت صرخاتها...وجعها....طلعت بايديها كيف مجعدين
و حتى جزء من رجليها و بطنها نفس الشي
مية النار شو بتعمل بالبني ادم!!!
ياسمينة:مابقي شي منك الا اسمك
كل شي راح....ضحكتك...سعادتك...جمالك
كل شي فيكي راح....وكرمال مين؟؟كرمال وسيم!
_تركت المراية و تمددت عالسرير...وضمت جسمها وسمحت لحالها تبكي
بلكي البكا بيسحب منها الضعف و الحزن و بيعطيها قوة
حتى تعاقب كل حدا اذاها وتسبب باللي هيه فيه
و أولهن وسيم!
________________
_باليوم التالي_
وسيم:الغي كل المواعيد اليوم مابدي شوف حدا
فرح:حاضر استاذ
وسيم:جيبيلي قهوتي و نصرفي لمكتبك
فرح:حاضر
_حضن وجهو بين ايديه و اخد نفس عميق....حاول يحصر تفكيرو بالماضي....قبل 3 سنين...ماكان في شي بوقتها ملفت للنظر!!
شو علاقة ياسمينة بالماضي؟
بس هو مستحيل قبل 3 سنين يطلع بوحدة متل ياسمينة
معناها هيه ماكانت هيك...معقول كانت موجودة بحياتو
وشو علاقة مرام بالموضوع!!
لازم يتزكر و بأي طريقة....لازم يعرف قاتل مرام و ياخد بتارو منو لااازم
بهالاثناء اندق باب مكتبو_
وسيم:تفضل
حسان:مرحبا وسيمو
وسيم(باستغراب)اهلين حسان!
حسان:جيت شوفك و اتطمن عليك
وسيم:انا منيح الحمدلله...تفضل ارتاح
حسان:شو قصة هالجروح اللي بوجهك ؟
وسيم:مافي قصة
حسان:شواللي هاجم عليك بالقصر
وسيم:شو بدو يهجم عليي مثلا!!....قطة دعست على دنبها قامت شبت عليي و خرمشتني
حسان:هي كل القصة؟؟
وسيم:اي نعم
حسان:بدي اعرف شو شفت بالقصر
وسيم:ماشفت شي الوضع كان طبيعي...مجرد قصر مهجور و الريح عم تلعب فيه
حسان:والاصوات الي على طول الناس بتسمعها
وسيم:بجوز مسكون من الجن بس انا ماشفت هيك شي ابدا
حسان:ليش حاسك عم تكزب!
وسيم:شبنا حسان شو تحقيق!!!!عم قلك مافييي شي و ليكني ادامك بشحمي و لحمي ومافيني البلا
حسان:(هز براسو)طيب......انا بدي روح عالقصر بنفسي و اتأكد
وسيم:روح...مالي ماسكك...بس اذا هاجموك الجن انا مادخلني
حسان :مالي خايف بدي اتأكد فضولي رح يقتلني
وسيم:ايمتا رح تروح؟