#الجميل_والمتوحشة
#بقلم_فيلوفوبيا
الجزء العاشر
(كل شي عم يصير جواتي ماعم افهملو معنى و لاتفسير
رغم اني بخاف من كل الناس....بس منو ماعم خاف
رغم اني برجف اذا حدا حاول يلمسني....بس هو لما لمسني انا تطمنت
معو عم حس بالامان....و بحضنو...عم حس بالدفا
بغيابو على طول بحس شي ناقصني...بحس اني عم دور عالجزء الي ناقص مني
مع اني كنت اكرهو...و جواتي حقد كبير عليه
بس هو بتصرفاتو و بحنيتو عم يمحي كل الحقد الي جواتي...وعم يخلق بدالو حاجة الو
بلشت حس انو مالي غيرو بالدنيا...وبلشت حس بمرارة البعد عنو
بدي كون جنبو على طول....بدي حس بوجودو و بدي اسمع صوتو
عم حس حالي رجعت بنت ال18 سنة الي حبت وسيم
بس الفرق انو عاصفة الحب هالمرة اكبر ومدمرة اكتر))

_حطت القلم بالدفتر و سكرتو....فتحت جوالها لتطلع صورتها مع وسيم عالشاشة الرئيسية
سعادة كبيرة بتحسها لما بتطلع فيه لو بالصورة
وهيه شاردة....سمعت نقرات عالباب وراحت لتفتح_

ياسمينة:هاد انت!

حسان:ومين رح يكون ياحبي

ياسمينة:بس انا اتفقت مع وسيم يجي ياخدني للحفلة

حسان:معقول خطيبك موجود وتروحي مع غيرو....يلا خلينا نمشي

ياسمينة:(بلعت ريقها)طيب....خليني جيب الشال تبعي من جوا

حسان:ناطرك هون

_بالسيارة مع حسان_

ياسمينة:رح اتصل بوسيم و خبرو انك اخدتني

حسان:تمام

_وهيه عم تفتح جوالها لتتصل اتطلع حسان بطرف عينو ليشوف صورة وسيم عالخلفية وعلى شاشة القفل...وتفاجئ كتير بهالشي_

وسيم:prençes شوي و بكون عندك

ياسمينة:بدي خبرك انو حسان اجا و اخدني عالحفلة كرمال ماتعزب حالك وتجي

وسيم:بالله....طيب مافي مشكلة انا رح انطرك هون..انتبهي عل حالك

ياسمينة:اوك...باي

حسان:حبيبتي طالعة متل القمر

ياسمينة:ميرسي

حسان:اكيد هاد الفستان تصميم وسيم

ياسمينة:طبعا...ما انا الوجه الاعلامي لوكالتو ومافيني البس لغير مصمم

حسان:اها...وكيف علاقتك انتي وياه...انا لاحظت انكن مقربين من بعض...وكتير بتقضو وقت سوا

ياسمينة:بحكم الشغل منضطر نقضي اوقاتنا سوا
علاقتنا منيحة و نحنا اصدقاء

حسان:اممممم....وسيم منيح و انا بوثق فيه و بأمنو عليكي

ياسمينة:مالي ناطرة منك تأمن عليي مع حدا....انا قد حالي و مابسمح لحدا يتمادى معي

حسان:اي طولي بالك ياقطة ماحكيت شي

_مسك ايدها و باسها_

حسان:بحبك...ياحلوتي انتي

ياسمينة:ميرسي

_________________

_بحفلة خطبة مريم على قيس كان الكل موجود
و عم يحكو بالفستان اللي صممو وسيم لاختو العروس
و اديش هو مصمم بارع
كانت فرح ملزقة فيه كل الوقت بحجة انها غريبة
و كانت صفاء بنت خالتو عيونها عليه عشرة عشرة
بس هو تلخطبت افكارو لما عرف انو حسان اخد ياسمينة و خاف يعمل شي مومتوقع فيها
نطر وصولها على اعصابو....وبعد نص ساعة كانت واصلة و مشنكلة حسان_

وسيم:تأخرتي!!!....الصحافة ناطرينك

ياسمينة:اسفة ماقصدت

حسان:طول بالك وسيم....المخلوقة الها حياتها الخاصة

وسيم:لاتواخزني حسان بس لازم اخد جوري منك
الصحفيين ناطرينها

حسان:عحسابك بس لاتنسى ترجعها

وسيم:اكيد ولو....تفضلي

ياسمينة:(همست)كنت رح تكشفنا!!

وسيم:عملك شي

ياسمينة:لا....بس ماكان على طبيعتو

وسيم:بلش يشك انو في شي بيناتنا وهاد الي بدي ياه

ياسمينة:يعني مرحلة الخطر بلشت

وسيم:هيك شي....ليكي الصحفية هونيك خلينا نحكي معها كلمتين و بعدها منكمل حديثنا

_مرقت الحفلة بين نظرات عم ترصد اقل حركة و وعيون مشتاقة تلاقي بعضها....حسان كان متيقظ لكل شي عم يصير حواليه وكل كلمة عم يسمعها كان عم يسجلها و بلش الشيطان الي جواتو يتحرك و يرسم المكيدة لياسمينة و وسيم_

وسيم:الحفلة صارت بآخرها....حسان بتسمحلي اخطف منك جوري لاخر رقصة

حسان:ولو....مع انو كنت حابب انا ارقص معها بس معلش...تفضل

وسيم:prençes

_مسك خصرها النحيف بإيد و مسك ايدها بإيد
وعيونو تركزو على عيونها والتقى اللون الازرق بعيونهن ليتحول لمحيط عم يغرقهن هنه التنين و اكتفو بالنظرات و بدون مايحكو شي كانت عيونهن عم تحكي كتير كلام
و بآخر الرقصة همس باذنها_

وسيم:حسان رح يجن جنونو....بس يوصلك للبيت تفاديه ولاتخليه يدخل لعندك....انا رح الحقكن بسيارة غير سيارتي و رح كون معك اذا صار شي

ياسمينة:اوك...

_مسك ايدها و باسها_

وسيم:شكرا على هالرقصةma prençes

ياسمينة:شكرا الك وسيم

حسان:احم....نمشي

ياسمينة:اوك....بشوفك بكرا وسيم..au revoir

وسيم:مع السلامة

_بالسيارة مع حسان_

حسان:عملي حسابك بدي قرب موعد العرس

ياسمينة:qoi؟؟؟

حسان:ليكي جوري....حكي فرنسي معي مابدا...بتعرفي تحكي عربي متل البلبل هي واحد و تنين هيك انا بدي قرب العرس...وتلاتة بدك تنسي وسيم و الشغل مع وسيم بعد مانتزوج

ياسمينة:mais انا اللي بقرر هالشي

حسان(صرخ )قلتلك لاتحكي فرنسي!!!!!

ياسمينة:شو صرلك!

حسان:شو في بينك و بين وسيم!! احكي!!!!

ياسمينة:مافي شي....وسيم صديق و رئيسي بالشغل

حسان:كزابة!!....انا شفتو كيف عم يطلع فيكي..شفتو بعيني

#الجميل_والمتوحشة
#بقلم_فيلوفوبيا
الجزء الحادي عشر
_بعد سنة_

مريم:طمني دكتور

الدكتور:مابخفيكي الوضع ما عم يتحسن ابدا

مريم:بس صار مارق سنة

الدكتور:مافي ادنى تجاوب مع العلاج النفسي او الدوائي للاسف

مريم:والحل

الدكتور:بدنا ننطر شي معجزة

مريم:ااااه....ماشي الحال....بتشكرك دكتور

_ودعت مريم الدكتور و كملت طريقها لغرفة الاعدة مطرح مو قاعدة امها و وسيم_

مريم:(بابتسامة مصطنعة)نشالله في امل

وسيم:لاتكزبي انا سمعت كل شي

مريم:اخي...ياسمينة داخلة بغيبوبة...صح عم تفتح عيونها بس عقلها غايب عن الدنيا...لاتعيش حالك بأمل كازب...ياسمينة خلص مافي امل منها

وسيم:ياريت ماتدخلو فيني و فيها....ومارح اقطع الامل لوشو ماصار

ام وسيم:(تصرخ)لك فوق كل شي خسرتو بسببها و لساتك متمسك فيها!!!وفوق هيك معيشها عندي بالبيت!!انا ماعاد اقدر اسكت عن هالوضع

وسيم:(بعصبية) امي!!!! تركيني بحالي

ام وسيم: مارح اتركك بحالك ابدا!!!!...خسرت ايدك و شغلك و سمعتك بين الناس...ولسا مخليها ببيتي وعم تصرف بلاوي على علاجها...ومتأمل انها تصحى و ترجعلك

وسيم:لك امي....امييييي....اذا انا خسرت ايدي و شغلي فهيه خسرت حالها...خسرت كل شي بسببي....كل شي عم تعيشو هيه صار بسببي انا....اول مرة و تاني مرة هيه عم تدوق المر بسببي انا.....وبعدين...انسي كل شي....انا بحبها..بحبها ومارح اتخلى عنها....و اذا شي يوم فكرتي تطالعيها من هالبيت...اعرفي اني رح اطلع قبلها و رح تحلمو تشوفو وجهي طول عمركن.....اللي عندي حكيتو و سكرو على هالموضوع نهااااائي

_تركهن و طلع لغرفة ياسمينة بالطابق التاني....ومتل عادتو نقر عالباب و تمنى يسمعها عم تقلو تفضل
نطر شوي و دخل لعندها...كانت قاعدة عالسرير وعيونها معلقين بالفراغ...شعرها الناعم مفرود على كتافها...والممرضة هلا خلصت من تبديل تيابها و تعطيرها
قعد جنبها عالكرسي...ومسك ايدها بايدو اليسار....لان اليمين انشلت على اثر الرصاصة_

وسيم(تنهد)كيفك اليوم......بعرف انك مالك حاسة بشي
بس حاولي تحسي فيني لوشوي...قلبي عم يحترق
و اعصابي تلفت و انا ناطر النهار البدي شوفك فيه صحيتي
(ابتسم و مسح دمعة بطرف عينو)بتعرفي شو....اليوم تمت معاملة زواجنا...وصرتي مرتي بالقانون
يمكن بكرا تقولي اني تزوجتك غصب عنك...بس انتي لازك تصيري ملكي...لازم تكوني مرتي....لانك خلقتي لتكوني مرتي
اليوم انا جبت رواية....بتحكي عن مراحل الحب التمانة
اللي انا عم عيشهن معك كل يوم....رح اقرألك ياها المسا

_قاطعو دخول مريم_

مريم(باستغراب):عن اي معاملة زواج عم تحكي وسيم!

وسيم:ياسمينة صارت مرتي

مريم:وكيف وهيه هيك!

وسيم:بالوكالة نسيتي اني وكيل عنها!

مريم:وسيم انت عم تغلط هيك

وسيم:بدي اسألك سؤال واحد بس....اذا جاوبتيني عليه
وقتها ممكن فكر اني اترك ياسمينة

مريم:تفضل

وسيم:قيس....زوجك...الي حبيتبه قبل ماتتزوجيه و هلأ ابنو جواتك...فيكي تتخلي عنو و ترميه بمهب الريح
و انتي بتعرفي تمام المعرفة انو مالو غيرك سند بالدنيا
لا اب و لا ام و لا اخ و اخت....فيكي تعملي هالشي

مريم:______

وسيم:وفوق هيك....حياتو تدمرت بسببك و دخل غيبوبة ماعم يطلع منها بسببك...تأذى بسببك انتهكت حرمتو بسببك....فيكي....لك فيكي جاوبيني!!!!

مريم:اخي انا.....

وسيم:ماااابتقدري...مافيكي..و انا هيك...مارح اتخلا عن ياسمينة...و هيه هلأ مرتي...ومافي شي رح يفرقني عنها غير الموت

مريم:مابعرف شو بدي قلك

وسيم:لاتقولي شي....نزلي خبري امك انو كتبت كتابي عليها...و رح تصير تنام بغرفتي...و اللي عندو اعتراض يقول مشان اطلع انا وياها من البيت...وهلأ طلع وسكري وراكي هالباب

_طلعت مريم بدون ماتحكي اي كلمة و سكرت الباب
و وسيم....قام من الكرسي و قعد مواجه ياسمينة عالتخت
لمس وجها بايدو...و نزل لرقبتها ليتحسس نبضها
و متل العادة ايديه باردين مع انو الجو دافي_

وسيم:(بهمس)مشتاق اسمع صوتك لو مرة وحدة....لوبدي موت بعدها!.......عيونك ضيعوني...وحتى قلبك حاسو نسيني

_هيك تعود كل يوم يقعد معها لساعات و يحاكيها....يحكيلا عن الماضي و كيف حبها....بس هيه ماعم تتجاوب مع شي من هالحكي.....و عقلها رافض يرجع للواقع بأي شكل من الاشكال_

_باليوم التالي_

ام وسيم:مفكر اذا كتبت كتابك عليها يعني حطيتني تحت الامر الواقع!

وسيم:امي لاترجعي تفتحي نفس الموضوع

ام وسيم:انا رح خلي الخدم يزتوها برا هيه و غراضها مشان يكون بعلمك

وسيم:عمليها....و بتخسريني

ام وسيم:لك وسيم اصحى من الوهم الي انت عايش فيه!!!.....هي البنت لو صحيت رح تصحى مجنونة

وسيم(خبط الطاولة بايدو):لو مجنونة بدي ياها

ام وسيم:شوف رح قلك اخر كلام.....اذا بدك ياني اتغاضى عنها....بدك تتزوج بنت خالتك

وسيم:نعم؟؟؟؟شو امرتي....ههههههه اي لا تتغاضى عنها انا رح اخدها و اطلع وخلصنا من هالموال....انبسطي ببيتك لحالك

#الجميل_والمتوحشة
#بقلم_فيلوفوبيا
الجزء الاخير
وسيم:نعم!!!!....كيف يعني فقدت الذاكرة!

الدكتور:الصدمة اللي تلقتها لصحيت من الغيبوبة كانت كبيرة....منظر الدم و الصراخ اثارو عندها ردة فعل عنيفة
و لما اغمي عليها ليومين...كان الاغماء رد فعل من الدماغ ليحميها...خلال هاليومين واضح انو كل الذكريات اللي بتخص حضرتك انمسحت و رجعت لمرحلة عمر ال18 قبل ماتعرفك وهلأ هيه مفكرة حالها عايشة ببيت عمتها و عندا فحص البكالوريا و رح تتعاملو معها على هالاساس

وسيم:يعني مافي امل تتزكر!!

الدكتور:مافيني اكدلك...في ناس بيكملو حياتهن بلا مايتزكرو شي من اللي دماغهن مسحو...وفي ناس بيتزكرو...بس مافي فترة محددة...ممكن ست شهور و ممكن سنة وممكن سنين...بنصحك تتعود على هالوضع
وماتحاول تضغط عليها لتتزكر شي....لانو اذا تزكرتك رح تتزكر الحوادث الاليمة اللي مرت فيهن

وسيم:هه.....نسيتني!!!.....بكل بساطة

الدكتور:دماغها لقى المخرج المناسب للوجع الي كانت عم تعيشو وحذف كل شي ذكريات بتخص هالوجع...وللأسف حضرتك شخصية اساسية لهيك نسيتك..بدك تتعود على هالوضع و ترجع تعرفها على حالك من اول وجديد....انا كتير متعاطف معك
بس صدقني هيك اريحلا....انا مضطر استأذن فيك تفوت تطمن عليها...بس متل ماتفقنا لاتحاول تزكرها بشي او تضغط عليها...بالاذن

_انهار وسيم عالارض...وحضن راسو بين ايديه
بدون ارادة صار يبكي...من قلبو...على حالو وعلى حبيبتو الي ضاعت منو....استجمع قوتو و مسح دموعو
ودخل لعند ياسمينة_

وسيم:مرحبا

ياسمينة:مين انت!!!

وسيم:______

ياسمينة:عم قلك مين انت!!!...طلاع لبرا

وسيم:طولي بالك....(بلع الغصة و كتم دموعو)انا هون لاخدك للبيت

ياسمينة:وين عمتي!

وسيم:عمتك مسافرة ورح ترجع عن قريب...و خلتك ببيتنا بينما ترجع

ياسمينة:مين انتو؟؟!

وسيم:انا بكون....رفيق زوج عمتك...هنه خلوكي عنا بينما يرجعو من السفر

ياسمينة:بس انا مابتزكر هيك شي

وسيم:لانك وقعتي على راسك و نسيتي كم شغلة...بكرا بتتزكري

ياسمينة:وفحص البكالوريا!!

وسيم:هه...قدمتي كلو....ماعم قلك انك نسيتي كم شغلة

ياسمينة:بدي احكي مع عمتي و اتأكد منها...بلكي انت كزاب

وسيم:تكرمي....بس جوالي بالبيت...بس نوصل بخليكي تتصلي فيها

ياسمينة:انت شو اسمك؟؟!

_سكين ورا التانية عم تغرز بصدرو....دموعو ماعم تنحبس....والوجع ماعم ينحمل...
اخد نفس عميق و رسم الابتسامة على وجهو ليخفي خذلانو و خيبة املو_

وسيم:اسمي وسيم

ياسمينة:امممم....اسم على مسمى

وسيم(اتسعت ابتسامتو)شكرا....انا رح اطلع اعمل تلفون و ارجع لتكوني جهزتي...بخاطرك

_خبر وسيم اهلو عن وضع ياسمينة الجديد و بصعوبة كبيرة حتى قبلو يستقبلوها بالبيت.....اخدها و راح
وبقيت عايشة عندهن و هيه نسيانة كل شي و عم تتعامل مع الكل بشكل عفوي و كأنها بنت 18 سنة
وسيم تجاهل ياسمينة كل هالفترة لانو مابدو يتعود عليها مرة تانية و يفقدها بيكفيه الوجع اللي بقلبو
حاول كتير يتواصل مع عمة ياسمينة فاطمة
و بعد جهد كبير قدر يوصلا....خبرها عن اللي صار بالتفصيل من البداية لهاليوم و كل شي حكاه كان في ادلة عليه من صور ياسمينة قبل التجميل و اثناء و بعد و ملف القضية اللي انقتل فيها حسان و اثبات انو كان معتدي على ياسمينة
و حكي كتير ماستوعبتو العمة بسهولة...._

وسيم:وهلأ ياست فاطمة...ياسمينة ببيتي و مابتعرف حدا و عم تطلب ترجع لعندك

فاطمة:بس حسب حكيك انك كاتب كتابك عليها يعني بتكون مرتك كيف بدك تطالعها من بيتك!

وسيم:ماعندي حل للاسف....هيه نسيانة و مافيني زكرها بشي...اذا تزكرت لوحدها بيكون منيح...غير هيك انا مابقدر اعمل شي...واذا بقيت هيك على طول...انا بطلقها غيابي بالمحكمة و خلصت القصة

فاطمة:ااااه يابنت اخي عاللي صار فيكي

وسيم:بدي منك تنتبهي عليها...بدي ياها تكون مبسوطة

فاطمة:عم توصيني على بنتي!....انا بدي حطا بعيوني و عوضها عن كل الظلم اللي نظلمتو

وسيم:تمام....انا رح روح هلأ و جيب ياسمينة
وسمحيلي اخد الوراق معي...كرمال مايوقعو تحت ايدها ويسببو مشكلة

فاطمة:طيب....عم انتظركن

_ببيت وسيم_

ام وسيم:ابقي زورينا...رح نفقدلك

ياسمينة:والله و انا رح اشتقلكن....بخلي عمو وسيم يجيبني لعنكن كل فترة

مريم:انتبهي عحالك منيح

ياسمينة:و انتي انتبهيلي عالبيبي الحلو....يلا بخاطركن

_بوستهن و طلعت من البيت....من بعد ماتعودو على وجودها بيناتهن بلطافتها و عفويتها الحلوة
طلعت بالسيارة...ونطرت وسيم ليطلع جنبها_

ياسمينة:بتعرف شو عمو وسيم

وسيم:لا مابعرف

ياسمينة:انا بدي ادرس طب

وسيم:منيح

ياسمينة:مشان عالج ايدك...انا كتير بزعل عليك لانو ايدك هيك

وسيم:لاتزعلي...اذا انا مو زعلان على حالي.

ياسمينة:انت ليش بتكرهني!!!

وسيم(باستغراب)انا !!!!

ياسمينة:بحكي معك مابتطلع فيني و كل الفترة الي قعدت فيها ببيتك ماحاكيتني ولاكلمة و هلأ ملتئم فيني
انا شو عملتلك حتى تكرهني

وسيم:عملتي اللي مابينعمل

ياسمينة:شو يعني!

وسيم:ولا شي انسي

قصة جديدة: #الجميل_والمتوحشة
.............
قراءة ممتعة🦋💙"
#ⴅÂÐЄĦÂ

#الجميل_والمتوحشة
#بقلم_فيلوفوبيا
الجزء السابع

مالك:صباح الخير استاذ

وسيم:العارضة جوري....شوي و بتكون هون....رح ناخد قياساتها و نشتغل هاد الفستان(عطاه التصميم الي رسمو قبل بليلة)...شوف التصميم و عطيني رأيك

مالك:امممم.....حلو كتير...من زمان ما رسمت بشغف هيك

وسيم:و انا هيك حاسس....بعتت ورا نزار كرمال القماش

مالك:انا بشوف انو الحرير بيطلع كتير حلو على هالتصميم

وسيم:امممم....هلأ منشوف رأي نزار

_اندق الباب_

وسيم:تفضل

نزار:طلبتني استاذ

وسيم:اي....شوف التصميم الي مع مالك و قلي شو بتقترح قماش لتنفيذو

نزار:اها....انا شايف الحرير الهندي ممتاز...مع شيفون
كتير بيطلع حلو

وسيم:انا هيك فكرت كمان

مالك:باقي تتفضل العارضة

وسيم:على وصول...ماتاكل هم

_اندق الباب_

فرح:استاذ الانسة جوري برا

وسيم:وليش عم تعرفي عنها...ماتدخليها فورا

فرح:انا بس فكرت.....

وسيم:انتي لاتفكري تركي التفكير الي...انتي بس نفذس و دخلي جوري لهون فورا"

فرح:حاضر....تفضلي

جوري:بونجور

وسيم:بونجور مادموزيل...(قرب منها و باس ايدها)

مالك و نزار:بونجور!!!!

وسيم:مالك....فتاح دفتر قياساتك و عطيني المازورة لاخد قياسات جوري

مالك:(باستغراب)بنفسك استاذ!!!

وسيم:طبعا"....مادموزيل...شالك الكشمير عنك اذا بتريدي خليني اخد قياساتك

ياسمينة:اوك

_الكل استغرب الانقلاب المفاجئ لوسيم من العصبية والحزم لقمة اللطف مع جوري....خاصة ياسمينة اللي بهدلها من اقل من نص ساعة
شلحت جاكيتها و الشال اللي على كتافها و وقفت لياخد قياساتها وسيم ومالك واقف وراه ليسجل
بإيديه الباردين حاوط خصرها بالمازورة ورغم انها لابسة كنزة الا انها حست ببرودتهن وطلعت عليهن لتلاقي اطراق اصابعو محمرين من البرد و حست برجفة غريبة جواتها_

وسيم:سجل...24سم

مالك:ممتاز

وسيم:عالبيكار يامالك(غمزو وابتسم)

:هلأ قياس محيط الصدر

_طلعت ياسمينة بوسيم بخجل و حمرو خدودها...و ازدادت وتيرة انفاسها_

وسيم:احم....خليني شوف...سجل...40سم

مالك:في زيادة 6سم!

وسيم:معلش....خلي الفستان يتعبا

مالك(باستغراب)بس هاد مو القياس المثالي!

وسيم:(بلهجة حازمة)بس عاجبني و رح تخيط عليه و مارح تنحف حالها

مالك:امرك

وسيم:هلا محيط الورك.....36سم

مالك:تمام

وسيم:اي تمام.....فيكي ترتاحي جوري

جوري:ميرسي

_لبست جاكيتها و قعدت على كرسي بعيد شوي....راقبت ملامحو وهو عم يحكي مع موظفينو بكل حزم
حست بحرارة خدودها و تلمستهن بطرف اصابعها
وعرفت انو لونهن احمر...لقت وسيم عم يطلع فيها و يبتسم....يمكن هو عم يقرأ افكارها...او حتى حاسس بنفس الشي الغريب اللي هيه حاسة فيه و عم تأنب حالها لانو حستو_

_بعد شهرين_

ياسمينة:بونجور فرح

فرح:بونجور

ياسمينة:وسيم جوا

فرح:اي

ياسمينة:ميرسي
_نقرت عالباب و دخلت_

وسيم:اهلا بجوري

ياسمينة:هلا فيك

وسيم:العرض كان كتير حلو....المجلات كلها كاتبة عنك

ياسمينة:قرأت

وسيم:رح تصيري نجمة عن قريب

ياسمينة:ايمت رح نخلص من حسان

وسيم:ماعم يجي لعندك عالبيت؟

ياسمينة:صار جاية كزا مرة

وسيم:قربت نهايتو ماتخافي

ياسمينة:قيس اتصل فيني عزمني عالشعا

وسيم:طلعي معو

ياسمينة:بس انا

وسيم:بدون بس.....طلعي مع قيس وبس ونطري لتشوفي شو رح يصير

ياسمينة:و اطلع مع حسان؟

وسيم:اكيد مجرد ماعزمك طلعي وخلي يأمنلك

ياسمينة:كيف بدك تحرق قلبو وهو طلع لاعندو زوجة و لاعيلة ولاحتى حبيبة

وسيم:هاد شغلي موشغلك

ياسمينة:طيب

وسيم:خليني ورجيكي التصميم الجديد اللي صممتو الك

ياسمينة:لحقت!!!!!لسا مبارح كان العرض لاخر مجموعة و كلها تصممت الي

وسيم:ماعم اقدر وقف...هاد الجمال عم يخلق جواتي نهم للرسم

ياسمينة:ورجيني التصميم

_لمست اطراف اصابعو لتلاقيهن باردين متل العادة و لونهن احمر....تاملت الورقة لثواني ورفعت نظرها لتلاقي عم يتأملها_

ياسمينة:ليش ايديك على طول باردين

وسيم:ههه...ما اجت ايد تمسكهن و تدفيهن

ياسمينة:حاسس حالك حققت انجاز لما نقلت حلمك من الورق للواقع

وسيم:بتقصدي حالك؟

ياسمينة:اكيد

وسيم:اكبر انجاز.....هاد الجمال الي كنت احلم فيه وصار عندي...وملكي...وفيني استوحي تصاميم لمية سنة وبدون ما مل حتى او اتعب

ياسمينة:ملكك؟؟!!!!

وسيم:اي طبعا....انا اللي عملتك

ياسمينة:هيك بتكون ملكتني

وسيم:لكن صرفت اموالي هيك!!!....بس حتى عوضك عن الي فقدتيه بنظرك؟

ياسمينة:ماعم افهم عليك

وسيم:يمكن صار لازم اكشفلك ورقة من وراقي....انا عملتك متل مابدي....حتى يقوا شغلي...ولانك رح تكوني وسيلة لانتقم لشرفي...و لانو في كزا شغلة رح تكوني كرت رابح بايدي فيهن

ياسمينة: !!!!!!!!!

وسيم:مصدومة صح

ياسمينة:يمكن انا كنت مشوهة من برا كتير....بس صدقني...كل بشاعتي ماكانت رح تغطي على ربع تشوهك من جوا...وبشاعتك من جوا

_احمر وجهو بثواني....وبرزو عروق رقبتو وشد قبضات ايديه...بس كتم كل هالشي جواتو وحاول يكون هادي اد مابيقدر_

#الجميل_والمتوحشة
#بقلم_فيلوفوبيا
الجزء الثامن
_رمت الجوال من ايدها عالتخت و فاتت اخدت حمام سخن و نامت بدون ماتحس...لتحس على دقة الباب تاني يوم الصبح
دقة قوية سريعة....ركدت بسرعة باتجاه الباب و فتحت....لتلاقي وسيم بوجها و بس شافها صار يضحك على منظر شعرها المنكوت_

وسيم:لهلأ نايمة

ياسمينة(بنعس)ليش اديش الساعة

وسيم:الساعة 9

ياسمينة:لك بكيييير...بدي ارجع نام

_مشيت خطوتين و شدها من ايدها ليرجعها لعندو_

ياسمينة:اااخ....تروك ايدي عم توجعني

_طلع بالكدمة الي صار لونها ازرق....و رفع نظرو لعيون ياسمينة...حس بوجع عم ينخر قلبو...حس بشي مو طبيعي جواتو...و كأن غصة تجمعت بحلقو و منعتو يتنفس....و كأن جرح عم ينزف بصدرو...ومع كل نفس عم يفتح اكتر_

وسيم:انا اسف....عنجد انا اسف....ماتخيلت تتأثري كل هالقد

ياسمينة:عادي...حصل خير

وسيم:لاماحصل خير ابدا....انتي متوجعة بسببي
هاد الجمال...مالازم يشوهه اي شي لوكان بسيط

ياسمينة:بتحكي عن هاد الجمال و كأن الجمال بحد ذاتو مجسم ادامك على هيئة بنت....بس مابتفكر بشي تاني غير الجمال...مابتفكر مثلا انو هي البنت بتحس...هي البنت بتفكر..انت فاصل شكلي و جمالي عني انا
كيف بتقدر تفكر بهالمفارقة مابعرف
انت بتكرهني..و بتكره تصرفاتي...و بتكره اي شي الة علاقة فيني و بدك ياني كون تحت امرك بكل شي
بس بنفس الوقت....مابتطيق انو وجهي او جسمي ينخدش...لانك شايفة معيار الجمال الاول

_هيه كانت عم تحكي بس هو كان بعالم تاني...عالم مشاعرو الي تخربطت عالم من حركاتها وهيه عم تحكي
نظرات عيونها كيف بيروحو يمين و شمال بدون مايركزو على عيونو....لانو بيعرف انو بتخاف من عيونو
ابتسملا من قلبو....وماشاف حالو الا اخدها بين ضلوعو و عم يمسح على شعرها_

وسيم:سكتي وحاج حكي فاضي

ياسمينة:وسيم!!!

وسيم:نعم

ياسمينة:انت حاضنني

وسيم:بعرف...سكتي لو لثواني....

_غمض عيونو...وسمح لنفسو يحس بالدفى والطمأنينة معها...سمح لنفسو يحس بالشي اللي مانع حالو منو من سنين....وهلأ غصب عنو و بدون ارادتو...عم يحس
بشي فوق ادراكو...معها هيه و بس
وبالمقابل...هيه ماكانت فهمانة شي...ولاعرفانة ليش هيك عم يعمل.....بس اللي بتعرفو انو نار الكره جواتها بلشت تطفي_

ياسمينة:وسييم!!....نحنا عالباب صرنا فرجة للناس

وسيم:(تنهد و بعد عنها و الابتسامة ماعم تفارقو)مافيكي تسكتي موهيك!

ياسمينة:شو اللي كان عم يصير

وسيم:لاتسأليني لأني مابعرف....روحي جهزي حالك عنا شغل قبل المقابلة...ناطرك بالسيارة

ياسمينة:طيب...مابتأخر

_كل واحد فيهن انخطف منو شي بهاللحظات القصيرة
رغم انشغالهن...بس احساس النقص جواتهن كان موجود
احساس الحاجة لشي بدون مايعرفو شو هو
احساس انو في قطعة منك و بعيدة عنك...وبكل لحظة انت بدك ياها لتعرف تعيش!_

(بوكالة الازياء)

وسيم:فرح....اتصلي بفريق التجميل تبع الوكالة خليهن يجو على مكتبي...و اتصلي بالمصور محمود كمان خلي يجي

فرح:حاضر استاذ

وسيم:اي ساعة بالضبط المقابلة؟

فرح:11 ونص

وسيم:تمام في وقت...يلا تفضلي جوري...لاتدخلي حدا لحتى اطلب منك انا

فرح:حاضر استاذ

رجاء:شو القصة اليوم!!

فرح:معجوق فيها زيادة للخانم...رح يجبلا فريق التجميل لخدمتا و مصور الوكالة كمان

رجاء:لك شوفي....سكر الستاير تبعات مكتبو

فرح:لااااا في شي مو طبيعي...شوصاير اليوم

رجاء:شكلو حبيبك وقعان ياروحي

فرح:اي لااا ماحزرت بنوب هي جوري....انا رح خبر حسان بكل شي خليه يتصرف وياخدها عن دربي

رجاء:احسن شي تخبري حسان

فرح:هو هيك

_بمكتب وسيم_

ياسمينة:شو في!...لشو كل هاد

وسيم:تعالي معي

_كبس زر بالحيط لتفتح المكتبة بالنص و يظهر وراها مشغل خياطة صغير...ماكينتين خياطة و طاولة كبيرة و غراض الخياطة كلها.....وفستان باللون السماوي معلق على موليكان_

ياسمينة:انت بتخيط!!

وسيم:كيف مصمم ازياء و مابخيط؟...كل مصممين الازياء بيخيطو

ياسمينة:بس ماشفتك ولامرة عم تخيط

وسيم:لانو عندي خياط بيفهم عليي تمام....بس هاد الفستان حسيت انو لازم بايدي خيطو لانو ماحدا رح يفهم عليي كيف بدي يكون

ياسمينة:ايمتا صممتو

وسيم:مبارح...بعد ماوصلتك...بالسيارة طالعت ورقة و قلم و بلشت ارسم...شفت دموعك ادامي..ومن دموعك طلع معي هالفستان

ياسمينة:هههه....هي من دموعي هيك لكن كيف ماتشوف دمي شو رح تعمل

وسيم:اذا شفت دمك....رح انسى الرسم و التصميم من اساسو

_خجلت و نزلت راسها لتخفي خدودها اللي احمرو...بس هو شافهن وعمل حالو ما انتبه_

وسيم:انا سهرت كل الليل و انا عم خيط و اشتغل
بدي منك تقيسي لشوف اذا في اي تعديل عليه
لانو رح تلبسيه بالمقابلة و تتصوري فيه

ياسمينة:بس الدنيا برد وهاد شيفون

وسيم:وماكانت برد لما كنتي نايمة بالبجامة النص كم!!

ياسمينة:____

وسيم:بدي ابقى رايق....لبسيه و انا ناطرك برا لشوف شو ناقصو

ياسمينة:حاضر

#الجميل_والمتوحشة
#بقلم_فيلوفوبيا
الجزء التاسع
_برمها لعندو ليشوف عيونها عم تلمع و الدموع محبوسة جواتهن_

وسيم:انو شو؟

ياسمينة:انو بيحبني

وسيم:ههه....كنت متوقع هالخطوة بس مو هلأ

ياسمينة:طلب ايدي للزواج

وسيم:كمان!....شو جاوبتي

ياسمينة:قلتلو بدي فكر

وسيم:(بصيغة الامر)رح توافقي

ياسمينة:بس....

وسيم:بدون بس....رح توافقي...اللقمة وصلت للتم...لازم توافقي

ياسمينة(تبكي)الله يخليك....لاتخليني عيش هالشي

وسيم:ليش عم تبكي!!مو بدك تنتقمي....رح ننتقم انا وياكي...لازم توافقي

ياسمينة:(بصوت مخنوق)انا بخاف منو!

_ماعاد يقدر يتحمل اكتر....حضن وجهها بين ايديه و مسح دموعها ليهديها شوي_

وسيم:(بهمس)انا معك...مارح اتركك

ياسمينة:وسيم!!!

وسيم(لنفسه)انتي الروح الي جوات وسيم....تحملي مني بس هالشي و بعدها رح عوضك

ياسمينة:(تبكي)انت مابتعرف هو شو عمل فيني

وسيم:بعرف....ورح نعمل فيه اكتر...والله العظيم انا معك ومابتركك طالما فيي روح...ماتخافي انا بضهرك

_مسكت ايديه وهنه على وجها...وغمضت عيونها و حاولت تهدي انفاسها_

ياسمينة:انا كتير ضعيفة....كتييير

وسيم(ابتسم)رح ريحك من حسان و بعدها رح عوضك عن كل شي....

_اندق الباب_

وسيم:مسحي دموعك ماتخليني شوفهن اكتر من هيك

ياسمينة:حاضر

وسيم:ااحم...تفضل

فرح:استاذ...الصحفية و المصور تبع المجلة برا

وسيم:تمام...خليهن يتفضلو...وطلبي محمود فورا"

فرح:حاضر استاذ

وسيم:(ابتسم)خلصنا بقا روقي....وحياتك مارح يلمس شعرة منك...عالاقل مو و انا عايش

ياسمينة:(ابتسمت)نشالله

الصحفية:صباح الخير استاذ وسيم

وسيم:صباح النور

الصحفية:نحنا اجينا على موعدنا كرمال المقابلة

وسيم:اهلا و سهلا تفضلو

الصحفية:بتحب نبلش بالتصوير او باللقاء

وسيم:خلينا نبلش بالصور احسن

_دخل محمود_

محمود:طلبتني استاذ

وسيم:اي...(للصحفية)هاد المصور تبع وكالتي...بدي ياخد نفس اللقطات اللي رح ياخدهن المصور...لانو الي شغل فيهن

للصحفية:تمام...مافي مشكلة...خلينا نبلش

_بلشت جلسة التصوير...و بلش المصور ياخد صور مشكلة لوسيم و ياسمينة....و بأكتر من مرة خلاهن يقربو من بعض بشكل كبير ومحمود عم ياخد نفس اللقطات
و بأخر لقطة...خلا وسيم يحاوط خصر ياسمينة و يقربها منو...وهيه تمسك طرف الفستان بايدها و تزيحها لورا ليظهر قماش الفستان
بهاللحظة طلع وسيم بعيونها بتركيز....خلاها تخجل و تزيح وجها للجهة التانية وهيه عم تبتسم....و اخدو المصورين اللقطة لتطلع احلا صورة...وبشكل عفوي
و بعد ايام قليلة نزلت الصورة مع اللقاء الصحفي على غلاف المجلة ومواقع الانترنت...والكل عم يحكي عن فستان"دموع الملائكة"_

_بعد اسبوع_
وسيم:الف مبروك ياعرسان

حسان:الله يبارك فيك

ياسمينة:الله يبارك فيك

وسيم:ومين كان يتخيل اني كون شاهد على كتب كتابكن...احلا صديقين بالدنيا

قيس:لا والله مين كان يتخيل انو حسان يسبقنا و يخطب

وسيم:والله يامعلم حسان وقع بشباك جوري...وجوري مالها قليلة

قيس:مبروك جوري

ياسمينة:merci boucou

وسيم:بس ليش ماعملت خطبة و عزمت معارفك و قرايبينك؟

حسان:هو العرس مومطول....وقتها منعزم الكل نشالله

_ابتسم حسان و حاوط كتف ياسمينة يلي ارتعشت من هالحركة و بين عليها الانزعاج وطلعت بوسيم يلي عيونو اكلتها كل الوقت...خاصة انو ملبسها على زوقو وجن جنونو لما شاف حسان حاضن كتفها بإيدو بس مابيقدر يعمل شي ولايحكي اي كلمة_

وسيم:احم....خلينا نمشي قيس و نترك العرسان ياخدو راحتهن

قيس:ايه....لاتنسو تشرفونا الاسبوع الجاية على خطبتي انا و مريم

حسان:اكيد رح نجي...مو هيك جوريتي

ياسمينة:(زاحت ايدو عن كتفها)اكيد مبلا...لازم احضر كرمال وسيم

_طلعت فيه لتشوفو كيف عم يبتسم لما شالت ايد حسان عن كتفها_

وسيم:لاتنسي بكرا تجي بكير عالوكالة...عنا شغل

ياسمينة:اكيد....سمحولي رافقكن للباب

وسيم:تفضلي

_عالباب_

وسيم:سبقني قيس لاحقك انا

قيس:اوك

وسيم:(همس)انتبهي عحالك منو

ياسمينة:(بلعت ريقها وقربت تبكي)والله بقتلو اذا حاول يعمل شي وسيم!!!

وسيم:ماتخافي....رح وصل قيس و ارجع وقف بسيارتي جنب البيت....اي شي بيصير بس رنيلي رنة وحدة بكون عندك...واذا ماقدرتي فتحي الشباك و صرخي

ياسمينة:طيب...روح انت بلا مايحس على شي

وسيم:(ابتسم)حاضر...انتبهي على حالك

ياسمينة:طيب...سلام

_بغرفة الضيوف عند حسان_

ياسمينة:باردون....تأخرت عليك

حسان:فداكي...بس كأنو اخدك الحديث مع وسيم

ياسمينة:شغل

حسان:اها....تعالي قعدي جنبي ليش قعدتي بعيد

ياسمينة:خلينا هيك احسن

حسان:بتخافي عحالك مني

ياسمينة:موهيك...بس لسا ماتعودت

حسان:لاتقربي انتي....انا بقرب

ياسمينة:هه....bian

حسان:je t'aim جوري

ياسمينة:ههههه....tu parlér françes

حسان:hwie

ياسمينة:هههه tres bian

حسان:بحبك....بحبك...بعشقك
_قرب منها ليبوسها بس بعدتو عنها بسرعة_

ياسمينة:شو عم تحاول تعمل!!

حسان(همس)عم عبرلك عن حبي

ياسمينة:مو مبكر! اذا بتريد حسان

#الجميل_والمتوحشة
#بقلم_فيلوفوبيا
الجزء الاول
_بين ممرات هالمبنى الانيق و الحديث...كانت عم تعلى الهمسات بين الكل...هي الي عم تشاور عليه من بعيد و هي عم تعدل هندامها لتظهر ادامو باجمل شكل
وهو.....ماشي و سكرتيرتو جنبو عم و يطلع عالورق بين ايديه...وصل لمكتبو و سند ظهرو عالكرسي و رجع لورا كتير...حمل الورقة بايدو و تأملها كتير بصمت و تمعن
جعلكها و رماها لبعيد......

وسيم:هاد التصميم مارح يمشي حالو....ستدعيلي العارضة ماريتا و جيبي تصميمي تبع مبارح لحط عليه اللمسات الاخيرة و ابعتو للتنفيذ

فرح:حاضر

وسيم:و بعتيلي الخياط مالك لعندي كمان بدي فهمو كم شغلة

فرح:تمام

وسيم:شوفي مواعيد اليوم؟

فرح:عندك موعد مع مدير شركة اون ستايل....وموعد مع مدام صافي

وسيم:وشو بدها هي؟

فرح:الي فهمتو انو بدها ياك تصمم فستان الها

وسيم:اووووف....كم مرة بدي احكي اني مابصمم تصاميم خاصة!!!

فرح:بعتذر منها؟

وسيم:لا خلص...خليها تجي و انا رح اتفاهم معها

فرح:تمام

وسيم:روحي عملي الي قلتلك عليه (تنهد وسكت للحظة)و جيبيلي فنجان قهوة قبل كل شي...انصرفي

فرح:حاضر...بالاذن

_طلعت من مكتبو و سندت حالها عالحيط جنب الباب و حطت ايدها على قلبها و خدودها حمر متل التفاح
و هيه عم تبتسم بعفوية وقفت جنبها رجاء لتهويلها شوي_

فرح:اي...دخيلك هويلي

رجاء:ولي عليكي كل مرة هيك بدو يصير فيكي

فرح:لك دخيل الله شو بحبووووو.....بيجنن...بيجنننن كل شي فيه بياخد العقل

رجاء(تنهدت)اااه والله معك حق

فرح:شفتي الكحلي شو حلو عليه!!ولا ااقميص الزهر رح ياكل منو حتة..ههههه عقولة المصريين...ولي على قلبي انا

رجاء:اي والله...بيجنن

_هنه التنتين تحولو عيونهن لقلوب و عم ينبضو كمان
بس فجأة انتفضت فرح و زورت رجاء_

فرح:وليه...نحنا ماتفقنا انو هو الي

رجاء:هههههههه....عأساس شايلك من ارضك

فرح:اي يعني شايلك الك

رجاء:لا الي و لا الك و لا لحداااا....لك هاااد شايف الناس من برجو العاجي....موشايف حدا ياعمري ولا حدا...لاتتعبي حالك و تحاولي لانو مارح تفلحي
كان غيرك اشطر و ماطلع معهن شي

فرح:اوووف...قولتك مافي امل!!

رجاء:مااافي امل....صرلو3 سنين مسكر باب قلبو وماااعم يفتحو لحدا....من قبل...يووووه شو كان نسونجي...مافي سكرتيرة تسلم منو ولا موظفة و لامصممة و لاخياطة...لك حتى الزباين الي يطلبو تصاميم خاصة...بس فجأة انقلب و ماعاد سمح لانثى تدخل حياتو لامن قريب و لا من بعيد

فرح:طيب شو السر برأيك؟؟

رجاء:مابعرف....بيقولو صارت معو حادثة غيرتو بس شو هالحادثة مابعرف

فرح:طي....(رن جوالها و قاطعها)....ييي هاد هو...(بارتباك)الوو...اي..اي استاذ

وسيم:ماخلص حديثك ادام شباك المكتب؟

_برمت ضهرها و اكتشفت انها كانت مستندة على بلور شباك مكتبو وهو عم يتزورها_

فرح:ب.ببعتذر استاذ

وسيم:جيبي القهوة بسرعة و عملي الي قلتلك عليه

فرح:حاضر استاذ

_قام عن الكرسي و توجه للشباك الي بيطل عالشارع....كانت المطر بأول هطولها و الناس عم تتدارى من المطر...تنهد و حط ايديه بجيبو...وشرد لأسوأ ذكرياتو....يلي من يوم صارت مافارقت ذهنو لحظة وحدة
و عملتلو هاجس و رعب...._

_______________________________

_قبل 3 سنوات

وسيم(بيصرخ)مرااااااام....ردي يامرااااااااام!!!!!
_رن جوالو_

وسيم:شو عملت فيها ياحقير!!!!

_ههههههههه......عملت الي لازم ينعمل فيك يا دنجوان زمانك يازير النساء انت

وسيم:وينها!!!....رد عليي وين مخبيها!!!

_ههههههه.....رح تلاقيها مرمية على شط البحر...يابتلحقها يا لأ

وسيم:والله لاخرب بيتك....والله لخليك تلعن حالك الي فكرت فيها تلعب معي ياواطي

_اذا طلع بايدك لاتقصر

_ركد بسرعة و طلع من المصنع المهجور...ركب سيارتو و توجه بأقصى سرعة للشاطئ....كان البحر هايج
و الامواج عم تضرب بالصخر بقوة....بعد 10 دقايق وصل...نزل من سيارتو و بلش يركد عالشاطئ و يفتش عنها...تهيئتلو من بعيد...مرمية عالرمل...ركد بسرعة لناحيتها و شافها بهداك المنظر...تيابها مخزقين..و عم تنزف و غايبة عن الوعي قعد على ركبو وحط راسها بحضنو و صار يطبطب على خدودها_

وسيم:مرام....مرام...ردي حبيبتي....ردي انا وسيم....مراام
ردي ببوس ايدك ردي........

_تلخبطت انفاسو لما شافها ماعم تستجيب....صار يلهث و دموعو تنزل بدون شعور....قرب ادنو من قلبها ليسمع نبضها....بس النبض كان موقف
حط ايدو على شريان رقبتها وماكان عم يهتز ولاعم ينبض....

وسيم:(يبكي)مرام...مرام...مرام...ببوس ايدك لاتموتي...ببوووس ايدك لاتموتي مراااام
(صرخ)لا يااااارب...لااااااا.....لاتعاقبني فيها دخيييلك
هيه مالها ذنب يااااااارب...مو مراااام دخيلك خدني بدالها بس تركها تعيش...هيه مالها ذنب...مالها ذنب...مالها ذنب
_____________
_صحي من شرودو على صوت فرح_

فرح:استاذ...القهوة

وسيم(بصوت مخنوق وبدون مايلتفت)حطيها عالطاولة و طلعي

فرح:شوي و رح جيب تصميم حضرتك و طلبت من مالك يحضر لمكتبك

وسيم:تمام...الله معك

#الجميل_والمتوحشة
#بقلم_فيلوفوبيا
الجزء الثاني

_مساء نفس اليوم_

قيس:تفوت و تطلع بالسلامة معلم

وسيم:هههه....الله يسلمك

حسان:فوت انت رح ننطر هون شوي وبعدين منروح

وسيم:لا خلص روحو انتو و بكرا منلتقي

قيس:طيب....الله معك

_طلع وسيم برفقاتو نظرة كلها ثقة.....دفش سور القصر المصدي و الي طالع صوت صرير وقت انفتح ودخل بدون اي تردد...سكر الباب و ابتسم لرفقاتو وشغل الكشاف و دخل....
احساس بالوحشة انتابو بهيك مكان مخيف....كان عم يسمع صوت تكسير قطع من الحطب تحت دعساتو
مافي اي صوت....هدوء مخيف
وصل لباب القصر الداخلي.....تلمسو بايدو ليحس بالخشب كيف مقشور و مهتري
دفشو و فتح فورا بدون اي جهد......كانت دقات قلبو سريعة بهاللحظات....سلط ضو الكشاف ليعرف شو فيه حواليه....فرش مهري...ورق شجر و حطب مكسر و تراب بالارض
ريحة غبرة عشقت بأنفو وخلتو يعطس...وصوت العطسة عطا صدى بالقصر كلو
قرب كم خطوة....و اذ بيتسكر الباب وراه بخبطة دوا صداها بالقصر
التفت ليلاقي المكان فاضي ومافي حدا!!!!
احساس الخواف جواتو بلش يتزايد
حاول يكبح هالاحساس وكمل ليتفقد ارجاء القصر
كان في موقدة حطب....و عاليمين مطبخ مهجور....و الفيران عم تلعب فيه...كمل بعد المطبخ ولقا مكتبة و الكتب منشورين بالارض و عالكراسي
و بعدها غرفة سفرة و الكراسي مكسورين و الجلايل وقعانين عالارض
طلع من الغرفة و توجه للغرفة الي بعدها
كانت غرفة نوم.....بسرير حديد و مصدي
و خزانة صدف قديمة كتير وبوابها مكسرين و مايلين للارض
و بيرو عليه شمعدان فيه 3 شمعات....قرب منو و طالع ولاعتو و شغل الشمعات ال3....
اشتغلو الشمعات و شاف انعكاس وجهو عالمراية....
طلع وراه.....ليلاقي شي بيشبه الشبح...شخص...لابس عباية سودا...وموطي راسو
تسارعت انفاسو و قطرات العرق تجمعت على جبينو
طلع منيح و حاول يتأكد اذا كان هاد شبح موجود او هو عم يتخيل....طلع بالمراية بتمعن....و اذ بيرفع الشبح راسو و مابيظهر الا شفافو لما قال

_نور القصر....ياوسيم!!!!!

_الرعب قطع جوف وسيم و التفت بسرعة ليواجه الشبح
بس انصدم لما لقاه مختفي!!!!!
حاول يطلع بارجاء الغرفة بس بدون فايدة
حمل الكشاف و الشمعدان و قال لحالو احسن اذا بيبقى بالصالة
طلع و مشي باتجاه كنبة قديمة ومهرية
حاول ينفضها من الغبار.....و قعد عليها و حط الشمعدان عالارض جنبو
تذكر صوت الشبح الي حكا معو....وكان صوت انثوي
معقول تكون روح عم تتجول بالبيت!!!!
بس لا وسيم مابيآمن برجعة الارواح للحياة
معقول جن!!!......و يمكن يكون إنس!!

افكار صارت تاخدو و تجيبو....وهو موطي راسو و عيونو عالشمعات يلي بلشو يدوبو
سكون مخيف عم بالقصر كلو وماكان في الا صوت حبات المطر يلي عم تضرب بارضية القصر من خلال فتحات زجاج الشبابيك المكسور
للحظات تناسى كل شي....وسند راسو على ايد الكنبة
و حس حالو غفل لثواني قبل ما يسمع صوت ضحكة مخيفة عمت ارجاء القصر وصداها عم يتردد باذنو
انتفض برعب و طلع حواليه_

وسيم:مين في هون!!!!....(بصوت اعلى)مين في هون!!!!

_اجيت عالموت برجليك ياوسيم!!!

وسيم:مين انتي!!!....ظهري حالك...ظهري حالك احسنلك

_ههههههه.....انا اميرة القصر الي بعتلك رسالة مبارح

وسيم:يكون بعلمك انا مابخاف الا من الي خلقني...عم تفهمي!!!!

_ههههههه بدليل صوتك الي عم يرجف!!!

وسيم:شو انتي!!!انسية و لا جنية!!!شوبدك مني!!!

_(بنبرة تهديد و صوت عميق)انا لا انسية....و لاجنية....انا الانتقام....انا الماضي يلي رح يحرقك....انا افعالك السيئة
انا كل شي قبيح فيك

وسيم:شو بدك!!!.....ظهري حالك احسنلك

_رح تشوفني....بس مو هلأ....

_صرخت بصوت عالي خلا وسيم يسد ادنيه و بعد دقايق طلع لناحية الدرج و قرب منو وحاول يطلع للطابق التاني_

وسيم:يكون بعلمك انا مالي خايف منك!!!....مااااالي خايف عم تفهمي

_(بصوت مبحوح)رح تخاااف ياوسيم

وسيم:اظهري حالك !!!!

_طلاع لعندي لورجيك حالي!!!

_قرب خطوة.....وطلع على اول درجة....اخد نفس وطلع عالدرجة التانية....ومنها للتالتة...تشجع شوي لما شاف انو ماصار شي
بس عند الدرجة الرابعة...ماشاف الا شي وقعو...و اسطول من الخفافيش هجم لناحيتو...حاول يحمي وجهو بايديه....وغمض عيونو...بس الخفافيش ماتركو مطرح بجسمو ماجرحوه....حتى وجهو تجروح...وحس بحرارة الدم على تيابو....خاف اكتر بهاللحظات...وركد باتجاه الكنبة الي كان قاعد عليها...بعد مانتهى هجوم الخفافيش عليه!
انفاسو متلاحقة و مرعوبة...القلق خلص استقر جواتو
ودقات قلبو ماعم تهدا
تلمس وجهو و مسح شوية دم عن جبينو
.وفكر بكلام الشبح

وسيم:لا انس و لاجن....الانتقام...الماضي البشع...شويعني!! مين بدو ينتقم مني....وليش بهالطريقة!

_لسا الليل بأولو ياوسيم!!!

_انتفض من مكانو و حاول يطلع بجهة الصوت_

_من هﻻ للصبح....بوعدك...يبطل اسمك وسيم

وسيم:(صرخ)شوبدك مني!!!!

_بدي عذبك!!!

وسيم:ليش!!!ولك ليش فهميني....مين انتي!انا بشو ضريتك لتعذبيني بهالطريقة هي!!!

#الجميل_والمتوحشة
#بقلم_فيلوفوبيا
الجزء الثالث
وسيم:مفكرة اللعب معي سهل!!!

_سمع صوت ضحكتها من برا و طلع بسرعة من الغرفة!_

_ههههههههه....الهيئة انت مفكر اللعب معي سهل!!!

_طلع من الغرفة و شاف خيالها واقفة على بعد كم متر منو_

وسيم(بصوت هادي)احكي مين انتي...قوليلي مشكلتك وبوعدك ساعدك

_مشكلتي انت!!!الحل اني شوهلك وجهك هاد...وكرهك حياتك وخلي الناس تنفر منك!!

وسيم:لك ليش كل هالحقد ليش!!!

_قلب بصفحات ماضيك!!....فتش...تذكر يمكن بوقتها تعرف ليش

وسيم(بارتباك)ليكي...بدك مصاري بعطيكي...بس حلي بلاكي عني

_هههههههه....عم تحلم!!!!....انت اذا طلعت من هون عايش....بأكدلك انك رح تطلع مشوه

وسيم:انا صبري بلش ينفذ ها!!!!!!

_هه....وينفذ...مو مشكلتي

_ثواني قليلة و اختفا خيالها....طلع حواليه بكل الجهات بس ماشاف حدا..ثقتو بنفسو تزعزعت...والرعب بلش يتحكم فيه و بتصرفاتو....نزل عالدرج بسرعة...ورجع قعد جنب النار يلي بلشت تطفي
حاول يشغل تفكيرو....يتزكر مين اذى بماضيه
مين بدو ينتقم منو!!!
بس التفكير ماجاب نتيجة
وهو قاعد عالارض....سمع صوت حفيف واطي ويادوب مسموع
طلع حواليه....
و اذ بأفعى طولها بيتجاوز المترين جاية باتجاهو
انتفض من مكانو وهو عم يلهث و وقف على كنبة كانت قريبة منو

وسيم(يصرخ)لك وينك!!!!تعالي واجهينييي.....اذا بدك تقتليني فهميني ليش بس!!انا مالي خايف من الموت
بس حقي.....حقي اعرف ليش رح انقتل

_طلع حواليه و انتظر الجواب بس ماسمع صوتها بأي مكان.....تحول نظرو للأفعى يلي عم تتحرك بالمكان وعم تقترب منو_

وسيم:لك ردي!!!!!!

_خايف مو هيك

وسيم:تعالي واجهيني قبل ماتقتليني

_ليش بدي واجهك...بعدين قلتلك انا بدي شوهك قبل ما اقتلك

وسيم:انا بحياتي ما اذيت حدا حتى انأذى هيك

_مبلا....اذيتني....كل شي انا عانيتو بسببك

وسيم:قلتلك مستعد عوضك عن كل شي

_ههههنه مافيك تستغني عن وسامتك مو هيك...مافيك تتخيل حالك و انت مشوه...كيف رح يقبلو فيك البنات بعدها!!!!.....كيف رح تطلع مع هي و تسهر مع هي و تتسلى مع هي

وسيم:لا!!!! البنات مابيعنولي....انا بدي اعرف ليش هيك عم تعملي

_بكييييير كتير لتعرف ليش....لسا اقامتك عندي مطولة

وسيم:شوقصدك!!!.....ااااخ

_بهي اللحظة حس على لسعة الافعى لرجلو....تسارعت دقات قلبو و حس عيونو غبشت....شد جفونو بقوة و ضغط على رجلو....بس السم كان سريع و مشي بعروقو فورا.....ثواني و اغمي عليه وماعاد شاف شي_

_بفيلا وسيم_

ام وسيم:يامريم اتصلي بأخوكي مابين من مبارح!

مريم:مارح اتصل فيه ان شالله بيروح و مابيرجع

ام وسيم:لك ليش هيك عم تدعي عليه!

مريم:لأنو بيستاهل!!!بكرهوو و بكره وجودو بحياتي و بكره كل شي بيتعلق فيه

ام وسيم:بس هاد اخوكي و مالنا غيرو سند

مريم:بالناقص من هيك سند

ام وسيم:هاتي الجوال انا بتصل

_____________________

قيس:يخرب بيتك الزلمة اكيد راح بشربة مي

حسان:شو عم تحكي يازلمة هلأ بيطلع

قيس:لك صارت الساعة 5 العصر وماطلع و لا سمعنا صوتو

حسان:شو بدو يكون صرلو يعني!!!هلأ بيطلع

قيس:اذا رجال فوت تفقدو

حسان:لااااا مابفوت

قيس:انا رح فوت و الي بدو يصير يصير.....الرجال صاحبي ومارح اتخلا عنو

_دفش قيس البوابة الكبيرة بايدو و اخد نفس عميق قبل مايفوت....خطا كم خطوة...لما ظهر وسيم و هو فاتح ايديه على عرضهن و عم يبتسم وعم يمشي باتجاه قيس و حسان...
بس الغريب.....وجهو الاصفر........الجروح بوجهو و تيابو المخزقة....وضعف مشيتو!!!_

قيس:وسيم!!!خوفتنا عليك يازلمة وينك لهلأ!

وسيم:هون..بالقصر

_قرب قيس ليحضن وسيم بس بعدو عنو و كمل خطواتو لبرا وعيونو متوجهة لحسان_

حسان:الحمدلله عسلامتك ابو السيم

وسيم:تسلم

حسان:معناها هيك انا خسرت الرهن...ولازم نفذ الشرط ونام اسبوع بهالقصر

وسيم:(رفع ايدو بوجه حسان)لا!!....ماحدا رح يدخل على هالقصر هاد

قيس:شو فيك وسيم

وسيم:مافيني شي....بس الرهن لاغي...ومابدي شي من حسان

حسان:بتعرفو شباب...هالقصر لازم ينهدم ولا شو قيس

قيس:و انا هيك عم قول

_كان وسيم عم يطلع برفقاتو ويسمع كلامهن بدون تركيز و وعي....كل تفكيرو بالشي الي شافو جوات القصر....و السم الي انسحب من جسمو....فضل الصمت ومارد على اسئلة قيس و حسان و توجه للبيت حتى يرتاح من الليلة الطويلة الي مرت عليه بالقصر المهجور_

ام وسيم:وينك حبيبي من مبارح!!

وسيم:كنت نايم عند رفيقي

ام وسيم:قلقتني عليك

وسيم:مافي داعي للخوف....انا طالع لغرفتي ارتاح

مريم(بلهجة استفزاز)شفتي...قلتلك مافي داعي للقلق

_طلع فيها وسيم وطلع لغرفتو بدون مايبدي اي ردة فعل
دخل على الغرفة....طلع بحالو عالمراية...وجهو شاحب