((#أيمكننا_تغيير_قراراتنا!!!))
#بقلمي 📖 ✏️
#نـورايـــة(( @rwayate ))
(ملاحظة: السرد بالعادة بالفصحى ... والحوار بالعامية )
(1)
نظرت إلى ساعتها ففرغت بفيها:أووه آسفة ع تأخيركم انتهت المحاضرة بإمكانكم تتفضلوا.. واللي عندو سؤال عندي فراغ ..موجودة بالمكتب
الطلاب: يعطيكِ العافية دكتورة
....بابتسامة:الله يعافيكم
بدأ الطلاب بالخروج من القاعة .. وبدأت بجمع أغراضها وبوضعهن في الحقيبة.. عندما رفعت رأسها وأرادت إنزال نظاراتها الخاصة ... وجدت
منير: دكتورة ريم
ريم: اها اتفضل منير في اشي
منير : دكتورة انا وندى بندعيكِ ع حفل زواجنا
ريم بابتسامة: وأخيرا يا روميو .. بدنا نفرح فيك إنت وجولييت
منير أطلق ضحكة: هههههه شايفة يا دكتورة بدي أعقل
ريم محافظة على ابتسامتها: مبارك يا ندى .. الله يعينك بس على منير هههه
ندى تبتسم: شو بدي أعمل مجبورة ههههه
منير: هلأ لفيتوا عليّ وانا البريء شوفي كيف انا كيووت
ريم: ههههه خلص بكفي... والله يا ندى رح تقضيها ضحك مع السيد روميو .. الله يخليكم لبعض ويجمعكم بالخير والبركة يارب
ندى: شكرا إلك دكتورة
منير: دكتورة مش تنسي إنت أول المعازيم.. الموعد بعد الامتحانات بأسبوع وهاد الكرت في الموعد والقاعة
ريم: إن شاء الله مابكون عندي اشي وباجي
منير: لالا حتى لو كان عندك اشي بتفضي حالك .. ول ما بدك تشوفيني وانا عريس(قال كلماته وهو يزبط ياقة قميصه)
ريم: هههه إن شاء الله ع خير...
**
ذهبت إلى مكتبها ألقت بجسمها منهكة على الكرسي المتحرك وتغمض عينيها.. بعد مدة ليست بكبيرة.. يطرق باب مكتبها .. نفضت جسمها وقالت: اتفضل
....:شو يا دكتورة وين ما بينتي.. ثقلاني علينا ولا شو
ريم: هههه يخرب شرك يا سوسن في حد هيك بدخل يا قاتل يامقتول
سوسن: في العادة بتيجي عندي المكتب وين ما بينتي
ريم تنهدت: قلت للطلاب عندي فراغ .. لأنه يمكن حد عندو سؤال وبتعرفي الامتحانات ع الأبواب
سوسن: وطبعا ما حد إجى
ريم: اها ..مستغربة
سوسن: أكيد ما حد رح يجي ... إنت ما شاء الله عنك ما بتقصري في شرحك في وقت المحاضرة .. وغير هيك فارضة هيبتك وقوتك ما في حد بسترجي يرفع صوتوا عليكِ.... يعني يخزي العين من عيني إنتِ جاذبة كل الطلاب يسجلوا المساقات عندك ... وانا يا حسرة عليّ الطلاب بنعدوا على العدد
ريم: ياستي الحمدلله.. مع إني شايفك أحسن مني .. إنت من أيام دراستنا أشطر مني وعلاماتك أعلى مني
سوسن: مش كل اشي بالعلامات.. إنت عندك أسلوبك الخاص وقدرتك على الشرح فظيعة وتقبلك لآراء الطلاب كمان... اما انا يا حببتي ماعنديش مزاج بعطي اللي عندي وبخرج
ريم بابتسامة: هيك بدك تخليني أغتر بنفسي
سوسن: هههه بصحلك ... اها صحيح شو رأيك تيجي عندي اليوم
اكتفت ريم بنظرة ذات معنى لسوسن
سوسن: ليش هيك بتطلعي ما طلبت اشي كبير
ريم: شو اليوم
سوسن: الخميس
ريم: عليكي نور .. مادام اليوم الخميس بكرة بكون عطلة وإنت يادوب تفضي لابنك وجوزك هذول اليومين .. لإيش آجي أغلس عليكم
سوسن: وك انا بفرح لما تيجي عندي.. وابني بكون مبسوط معك وبحبك
ريم: وانا بحبو لحمودي بس غير هيك انا بدي أروح ع البيت أرتاح شوي وبدي أكتب أسئلة امتحانات لحد الآن ما كتبت سؤال
سوسن: إذا على كتابة الامتحانات انا لحد الآن كمان ما كتبت .. مش عارف ليش بتموتي حالك بكتابة الأسئله .. يا ستي كرري من أسئلة اللي كنتي تجيبهن من قبل
ريم قطبت حاجبيها: لأ يا سوسن ما بقدر أعمل هيك .. ضميري ما بسمحلي الامتحان الواحد أقل اشي بدي بوضعه وكتابته 4 ساعات... هاد لما أكون مرتاحة .. وكيف هلأ بعد أسبوع متعب
سوسن: خلص خلص بسحب كلامي.. المهم شو قلتِ مابدك تيجي عندي
ريم: للأسف لأ.. بس لما نخلص الفصل ع خير رح تزهقي مني
سوسن: اممم ماشي ع راحتك
باب المكتب يدق...
ريم: ها في حد إجى هلأ بتفرجيني عرض كتافك اوك
سوسن: اوكشن
ريم: اتفضل
********
ويمر اليوم ... وتذهب إلى شقتها بإحدى العمارات .. بعد فترة من الراحة تبدأ بوضع الأسئلة
بعد مدة معينة تنام على مكتبها... وتدخل في أحلامها
..:شو اخبارك يا غزالتي
ريم بدموع: اشتقتلك ليش تركتني
..:انا مرتاح كثير .. انت شو اخبارك
ريم: بحاول اضلني قوية
...: هيك بدي إياكي رافعه راسك لفوق
ريم: مابدك توخذني عندك
..: لأ انت الك مكانتك لسا يا غزالتي
ريم: ماتروح خليك كمان شوي
تفيق والدموع في عينيها .. تحرك رأسها بحركة دائرية من نومة المكتب غير المريحة... تذهب تتوضأ وتصلي الفجر وتقرأ القرآن
ومن ثم تذهب إلى مكتبها مرة أخرى لإكمال عملها
.....**....**
وتمضي الأيام وتأتي الامتحانات وتنتهي على خير وسلام
في يوم المحدد لعرس طالبها منير.. تتصل بسوسن
سوسن: يا أهلا وسهلا
ريم: أهلين فيكي يا سوسو
سوسن: الله الله في ورا هاد الدلع اشي
ريم: ههههه دايما كاشفتيني
سوسن: ههه قولي شو في
ريم: اليوم عرس طالبين درستهم وعزموني على عرسهم. فيعني انا مش حابة أروح لحالي شو رأيك تيجي معي
