#الظلام_في_الخارج_قصص
#الظلام_في_الخارج_8 #الظلام_في_الخارج
الحلقة الثامنة

الشرطة أجت عالمدرسة تحقق بموت مس إنتصار .. كنت عم بتفرج عليهم ينهارو شوي شوي بدون ما اقرب أو احكي شي.. اخدو أقوال البنت اللي شافتها والمديرة وإشراق.. إتضح بالنهاية انها رمت حالها من سطح المدرسة ومافي دليل على موتها .. بس الطب الشرعي قال هالشي.. جابولنا معلمة عربي جديدة وأهالي الطالبات صارو كل يوم يتصلوا مع وحدة منهم بسبب موت المعلمة والخوف تزعزع بقلب كل وحدة وبكل مكان بالمدرسة.. خصوصاً انه نجدت بين الحيا والموت وطلع من المدرسة نهائياً.. بهالليلة ماكان حدا قادر ينام من الشي اللي صار.. كل المدرسة هاديه والجو رجع عاصف وشتوي.. بس ماحدا جاييه نوم والكل عم بفكر وأنا أولهم.. وفجأة سمعنا صوت شي وقع وتكسر بصوت عالي بالطابق اللي احنا فيه !.. صرخ نص الطالبات من الخوف وقمنا من تخوتنا لنشوف شو صاير .. ماكان عند وحدة الجرأة لتفتح الباب واستنينا حدا يجي يفتح علينا بس كان بدنا نعرف شو اللي وقع ونكسر.. سمعنا صوت المديرة وإشراق والمعلمات بممرات الطابق وفتحنا الباب بس اطمنا انهم اجو.. اتطلعنا لقينا كل الأضوية متكسره والعتمة بكل مكان .. بطبيعتي بخاف من العتمة والظلمة بس تغلبت شوي على خوفي لما نزلت للطابق الأرضي ..كل الطالبات كانو خايفين ومنهم اغمى عليهم وزاد الإرتباك بهاللحظة وما كان حدا عارف شو بصير.. بلشت اشراق تصرخ اخرسوا انتي وياها وترتوني.. والمديرة تطمن فينا وتحكيلنا ماتخافوا الكهارب طبيعي تخرب وتتكسر بسبب الأجواء العاصفة .. كان الجو بارد وهوا ومافي ولا كهربا مشغلة بالمدرسة .. كل شي تدمر بلحظة .. حسيت وقتها انه حيصير شي كانت ليلة مرعبة جداً.. جابت المعلمة شمع وصار الكل يمسك الشمع ويولعه ووقفنا كلنا بمكان واحد حتى مانخاف.. بواب الممرات صارت تفتح لحالها وتسكر لحالها .. زاد الخوف بقلوب الطالبات .. كنت بقرأ ادعية وبقول يارب مايصير شي.. وفجأة لقيت حالي بقول بعقلي.. يارب يكون تنبيه إنه رح تتأذى إشراق بعد شوي .. اللي صار ماكان حدا متخيله .. الأصوات المرعبة اللي كنا نسمعها تحت صارت تطلع بنفس المكان اللي احنا فيه.. ناس بتحكي وصوت بنت صغيرة بتبكي عمرها بحدود 8 سنوات أو أكتر بشوي.. صوتها واطي بس مسموع للكل والطالبات فقدوا اعصابهم.. أنا ماكنت عم بحكي شي وساكته خفت احكي شي يعرفوا اني بعرف .. إلتزمت الصدمة واكتفيت بالمشاهدة.. إشراق توترت والمديرة صارت تحكي الوضع مابطمن خلينا نطلع برا عالمزرعة لحد ماتهدى الأمور هون .. إشراق عصبت وصارت تحكي كيف بدك تطلعي ستين طالبه وأكتر من عشر معلمات عالمزرعة مابنقدر نتركهم برا والدنيا ليل.. نحنا بالصبح ما بنسيطر عليهم كيف بالليل.. البنات عم ببكوا وأنا صوت نفسي عم بزيد ومتوترة بس ساكته وكلامي مع الأرواح تحت طمني شوي بأنه أنا مش رح أنأذى.. نيروز وهويده ماسكين بإيدين بعض وعم برجفوا وبتطلعوا عليه انه ليه انتي مش خايفة متلنا !!؟ اصوات التسكير رجعت وصوت البنت عم بيجي وعم بتختفي فجأة .. بتبكي وبتصرخ .. صرت أركب هالحدث مع خيال البنت اللي كانت تحت وكان شكلها زعلانة ومقهورة وفي حيه جنبها.. حكيت معقول هيه روح ساكنه بالمدرسة؟ شو قصتها؟ ضليتني بتطلع بصمت.. في بنات طلبو يدخلو على الحمام بس ماكانو قادرين إشراق حكتلهم هاي الحمام اللي عندها الجرأة تدخل تفوت تدخل واللي مش قادرة تعملها على حالها!! من الآخر ..حسيناها توحشت وحتى بس كانت تحكي المديرة شي تسكتها .. عاشو البنات أصعب لحظة مرعبة بالمدرسة.. صوت البنت اختفى صارت هويده تحكي للمديرة .. انه المكان في شي غلط والأصوات هاي مؤذية للكل واذا مارح تنحل القصة رح نضطر نخبر أهالينا.. بهالوقت إشراق خلتنا نطلع على المزرعة وتغير رأيها بسرعه.. نزلنا كلنا واخدنا حراماتنا ومخداتنا ونزلنا نمنا تحت الشجر.. نمت أنا تحت الشجرة اللي خبيت تحتها الذهب.. وحكيت مارح أكشف هالشي وبكون استفدت من هالمدرسة اللي ما اجاني منها شي غير التعب والقهر والظلم.. نمنا بالمزرعه لحد ماطلع الصبح والأصوات ضلت بالطابق الأول عم نسمعها من بعيد.. صحينا وكان الوضع منيح ومافي خوف ومعظم الطالبات تحسنت نفسيتهم.. حكت هويده لازم أخبر أهلي على الشي اللي صار .. حكيتلها اصبري شوي بلا ماتحقد عليكي اشراق.. بعد ما افطرنا حسيت انه بده يصير شي.. وكان بدي أروح أجيب القطعه الذهبية اللي وقعت مني بغرفة إشراق بس ماعرفت أدخل عندها بسهولة.. اسنيت لحد مادخلو الطالبات نفطر ولحد مادخلت اشراق دخلت فوراً لغرفتها واستغليت الوقت.. سكرت باب غرفتها وصرت اتطلع على اغراضها الشخصية.. أي دليل ممكن يحسسني انه إشراق عاملة شي.. مالقيت شي وخفت تدخل فجأة .. قلت باخد الذهبه وبطلع بدون ماتحس أحسن ماتفكر انه في ذهب بالمدرسة وانا كنت بعرف انها لو حطت براسها شي رح تعمله.. وصلت سلة الزبالة جنب الباب محل مازحتها برجلي.. وسمعت صوت طقة كعب كندرة.. وصوتها من بعيد ..

#الظلام_في_الخارج_قصص
#الظلام_في_الخارج_10 @rwayate
الحلقة الأخيرة

إشراق ماتت .. كانت هالكلمة إفتتاحية الصباح للجميع.. المعلمات بصرخوا والطالبات واقفين على البواب والممرات..سكروا باب غرفتها عليها ومنعوا حدا يدخل عندها وطردوا البنات اللي بالممرات .. دخلونا على الصف وسكروا علينا وضلينا كلنا عم نتصفن ونتسائل شو اللي صار .. كيف ماتت وليش ؟! بعد ربع ساعه أجت الشرطة والإسعاف مع بعض وأخدوها.. الشرطة أخلت المدرسة وطلعتنا كلنا لبراتها ..حكولنا إذا بدكم توخدوا اشي ضروري خدوه معكم لأنه رح يتم التحقيق مع الكل.. المدرسة صار فيها أكتر من جريمة غريبة ولازم نكشف السبب.. طلعنا كلنا طابور ورا بعض وحدة ورا التانية نازلين.. وصلنا جنب غرفة إشراق.. قلت لازم استرق النظر بسرعه عالغرفة.. إتطلعت لقيت بوت وردي لبنت صغيرة جنب تختها عالأرض.. هاد اللي شفته أول ما لمحت عيني على الغرفة وبابها مفتوح.. اخدونا على التحقيق وتم التحقيق مع كل الطالبات.. وكل وحدة حكت اللي عندها ..المديرة والمعلمات جميعهم.. طلبوا منا نروح ننام اليوم لآخر مرة بالمدرسة لأنه رح يتم الإتصال مع أهالينا ليجو يوخدونا وينقلونا لمدرسة تانية..وصلنا على المدرسة وكان باب إشراق متربس ومسكر لأنه خلص ماحيدخلها حدا ولسه فحصها ماخلص ليجي الطب الشرعي يحدد سبب الوفاة باليوم التاني وبالليل ضليتني متوترة وبسأل حالي كيف ماتت .. الأرواح أذتها وليش البوت اللي جنبها.. وشو خطية مس إنتصار! ..نزولي للطابق الأرضي كان لا بد منه بهاللحظة لأنه بكرا رح يتم ترحيلنا من المدرسة بشكل نهائي.. قمت من تختي وكان معظم البنات نايمين من التعب والإرهاق والخوف.. بس حسيت هويده ونيروز مش نايمين.. طلعت من الغرفة .. وقلت أبو هلال راح خلص وماضل حدا بالمدرسة غير كم معلمة والمديرة.. والمفتاح مش موجود غير بغرفة إشراق.. مشيت ناحية الغرفة ولقيتها مسكرة.. حاولت أفتحها بس ماقدرت.. حكيت لازم اتصرف وانزل بأي شكل من الأشكال.. كان الطابق التاني كمان مسكر ومابقدر انزل للأرضي بهالحالة.. قررت أرجع وانسى كل شي اتطلعت فجأة ! ..شفت البنت قبالي وعم تضحك .. حكيتلها كيف طلعتي لهون ؟ ضلت تضحك.. سألتها ليه ماعم تبكي؟ شو عم بضحكك؟ ماردت عليه .. قلتلها احكيلي .. حكت مبسوطة لأني انتقمت وصارت تركض لبعيد.. فجأة حدا مسكني من ظهري لفيت خايفة لقيت نيروز وهويده بحكولي لوين رايحه ومع مين بتحكي؟ حكيتلهم ماشفتو البنت اللي كانت واقفة معي.!؟ حكولي لأ ماكان معك حدا وكنتي عم تحكي مع حالك ؟! .. حكيتلهم مستحيل كيف ماشفتوها فهموني.. اخدوني للغرفة وكنت متدايقة كتير وبهاللحظة قررت احكيلهم كل شي.. قلتلهم على كل شي وانه نزلت وحكيت مع الأرواح وشفت البنت هاي مع حيه سودة على الحيط.. حكتلي نيروز لازم تحكي هالشي للشرطة بكرا.. وهويده نفس الشي.. قلتلهم خايفة احكي.. قالولي انتي عم تشوفي الشي الي مابنقدر نشوفه أحنا ولازم تحكي للكل انه المكان مسكون واللي بصير فيها سببه هالشي أحسن مايتناسوا الموضوع ويجي بنات من بعدنا يدرسوا فيها .. لازم تتسكر المدرسة خلص.. اخدوني على الغرفة ونمنا احنا التلاتة كلنا بتخت واحد وكانت آخر ليلة إلنا بالمدرسة.. طلع الصبح وطلعونا من المدرسة واجا بابا وماما مع بعض طلعوني.. فضيت المدرسة ولأول مرة بشوفها فاضية من كل شي .. مافيها روح ولا حياة.. اختفى صوت البنات وصوت اللعب والحيوية اللي كانت فيها.. أحلامنا مع بعض وذكرياتنا الحلوة راحت.. حملت شنتتي وحكيت لبابا انا عندي كلام لازم الشرطة تعرفه حكالي شو هوه؟؟ قلتله لازم أروح احكيلهم اللي عندي بسرعه.. وصلت الشرطة مع هويده ونيروز وبابا وماما.. وبلشت احكيلهم كيف حبستني إشراق تحت وكيف حكيت مع الأرواح وكيف شفت البنت وشفت الحيه وحتى عن الذهب.. وبهالوقت تفاجأت !!.. بلشت تحكي هويده انها هيه اللي اخدت الذهب من الحفرة عشان تذلني ومش عشان بدها ياه لأنه نقهرت بس سمعت إشراق بتساعدني وبتوقف معي وهيه بتكرهني ففكرتني بخدعهم معها.. حكيتلها وين حطيتي الذهب قالتلي انها دفنته بمكان تاني.. اخدونا مرة تانية على البيت وطلعنا الذهب والشرطة تحفظت عليه وعرفت انه هاد ذهب قديم وأثري كان مدفون من زمان بالمدرسة قبل ماتكون مدرسة لأنها كانت بيت فخم وقديم لأسرة غنية ومعروفة وبعدين تم إمتلاكها من قبل مستثمر وعملها مدرسة داخلية عريقة بإدراة غفران.. نزلت الشرطة على اخر طابق ومالقيوا ولا شي يثبت كلامي.. بس حلفتلهم اني ماكذبت بحرف واحد.. وصدقوني وبعد ما اجت نتيجة الطب الشرعي تبين انه إشراق توفت نتيجة لدغة حيه والتفت حولين رقبتها وخنقتها.. وقتها تم تصديق كلامي بإني شفت الحيه..!! قبل مانطلع من عند الشرطة.. رجعت تذكرت كلام المديرة مع إشراق لما كنت بالخزانة ووقفت اهلي وحكيتلهم تذكرت شي مهم .. حكيتلهم في كلام انا سمعته من المديرة وإشراق..

رحنا ورا المدرسة وضلت الشرطة عم تراقبني.. حكيتلهم أنا واقعه بقضية وانتوا كنتو متل اخواتي .. وماكنت متوقعه يصير فيوم هالشي ..بدي اعرف منكم شو اللي صار.. صارت نيروز تخربط بالكلام.. وهويدة مابدها تحكي بس انا حسيت وصرت ابكي واشفقهم عليه لحد ما حكت نيروز كل اشي.. حكت انه اشراق هيه اللي خلتهم يحكوا انه همه نضربوا من نجدت بسببي.. حكيتلهم ليش طيب؟ وانتوا كيف بتقبلوا.. حكوا هددتنا انه ترسبنا وتخلينا نعيد الفصل كامل.. نصدمت كيف انهم باعوني بلحظة وتخلوا عني عشان دراستهم برغم انهم عارفين منيح انه انا بريئة.. حكيتلهم ونجدت ليه ليعترف بشي ماعمله معي؟ حكولي مابنعرف وهاد بس اللي بنعرفه.. قطعت علاقتي فيهم بعد اللي سمعته وكان بدي اعرف نجدت ليه عمل هيك بس يجي عالمدرسة من المستشفى.. شفت الخدامة وداد بعد ماخلصت الفسحه عم تبكي.. حكيتلها ليه عم تبكي حكتلي مافي شي.. ضليتني وراها وصارت تصرخ بوجهي وتحكيلي روحي خلص هلأ اذا شافتنا اشراق رح تفصلني.. ضلت كلمتها اللي حكتها المرة الماضية براسي انه كل واحد رح يوخد جزاته وتوقعت انها بتعرف شي.. حكيتلها ارجوكي احكيلي شو اللي بتعرفيه صارت تتهرب مني.. بالآخر ضليتني لاحقيتها وخوفتها .. حكيتلها أنا مصاحبة جن وشياطين هون بالمدرسة ومآمنه فيهم وبحكي معهم كل يوم.. وممكن اخليهم يستلبسوكي ويخربوا عيشتك اذا ماحكيتي.. خافت ونصدمت من كلامي وحكتلي خلص رح احكيلك كل شي.. وبالوقت اللي كانت بدها تحكيلي شو اللي صار كنت بدي استغلها كمان لأخليها تسرقلي مفتاح الباب الحديد المسكر اللي بودي لآخر طابق بالمدرسة حتى أنزل واكشف شو اللي نكتب بالورقة اللي لقيتها.
يتبع..
Mahmoud Salloum
#الظلام_في_الخارج_قصص
#الظلام_في_الخارج_5 #الظلام_في_الخارج
الحلقة الخامسة
خوفت الخدامة وداد وحطيت بقلبها رعبة أني بلعب مع الشياطين وبس لحتى تعترف.. لأنه كلمتها ضلت براسي وكان بدي اعرف شو بتقصد.. حكتلي انا خايفة اشراق تشوفني معك وتعرف اني انا حكيتلك .. حكيتلها ماتخافي من اشي ومارح احكيلها شي بس احكيلي أنا بدي اعرف ليه عملت هيك معي وليه انا بالذات.. حكتلي خلص حبيبتي رح احكيلك بس مش هون بالساحه .. رحنا لمكان بعيد كان ضايل عالفسحه خمس دقايق وبتخلص وبتبلش حصة مس أشراق الرياضيات.. كان بدي اعرف بالخمس دقايق شو عم بصير واهرب من الشرطة اللي لاحقيتني بكل مكان.. اخدت الخدامة وداد لآخر مكان برا بالمدرسة واجا الشرطي حكالي لوين رايحه؟ حكيتله مش هاربه بدي احكي أنا وهاي المره.. خليك هون لتتطمن اني مش هاربه.. حكيتلها احكي بسرعه .. بلشت تحكي.. حكتلي الطباخ نجدت سمع في أصوات غريبة عم تطلع بالليل من الطابق اللي هوه فيه .. استغرب من الموضوع وحس انه في شي عم بصير كل يوم بالليل .. شغلات عم تتحرك وكراسي غرفة الأكل بالأخص.. وبحس انه غرفته بطلع منها اصوات وخيالات وهوه نايم.. راح حكا لمس اشراق وفكرته بتخيل وكذبته من خوفها على سمعة المدرسة.. بس قررت تنزل تتأكد بنفسها مع المديرة بيوم غير محدد.. واجتمعت مع نجدت قبل ماتنزل ومع المديرة بغرفة الإدارة حتى يعرفوا شو القصة.. بهاللحظة في بنت سمعت كل الكلام وراحت نقلته للبنات بغرفتهم.. وانتشر الموضوع بينهم.. إشراق نزلت فجأة مع المديرة على طابق المطبخ بالليل.. وشافت نفين طالعه من غرفة نجدت وخايفة.. مسكتها وحققت معها لإعترفت بكل شي.. وإشراق هددت نجدت وحكتله رح تفضحه هوه ونفين.. نجدت بطل عارف شو بده يعمل.. نفس هالليلة اللي كشفت فيها إشراق نجدت ونفين.. طلعت عليكم فجأة وشافتكم مولعين شمعه ومتجمعات حولين بعض ومش نايمات.. حست انكم بتحكوا عن نفس الموضوع وبهدلتكم .. وبعد مانزلت, انتوا نزلتوا للطابق لتشوفو شو اللي عم بصير.. انتي ونيروز وهويده.. وأكيد في شي غريب صار معكم بالطابق اللي تحت.. نيروز وهويده نضربو ونحبسو وانتي ماصار فيكي شي وارتميتي بغرفة الأكل.. سمعت إشراق صوت بالطابق ونزلت تشوف وانتي بهاللحظة كان مغمى عليكي وصاحباتك مضروبين.. أجت إشراق هددت نجدت بإنه يعترف انه هوه اللي كان معك وانك انت على علاقة معه وعشان مايكشفوكي صاحباتك ضربهم وفهمتهم إشراق رح تنقص علامات الهم وترسبهم بالفصل اذا ماحكوا انه نجدت ضربهم.. ولحتى مايخاف فهمته إنها رح تطلعه من القصة متل الشعرة من العجين ورح تنسى موضوعه ومارح تفصله ورح تخلي نفين بالمدرسة من شدة خوفها على سمعة المدرسة .. وأنا سمعتها بتحكيله فضيحه صغيرة أحسن من فضيحة كبيرة تخرب بيتي وبيتك وينقطع رزقنا كلنا وإذا عرفوا أهالي الطالبات مصيبة كبرى ورح يتزعزع الخوف إلهم.. يعني انتي كنتي كبش الفدا عشان ماتخرب سمعة المدرسة .. حكيتلها شكراً وبوستها عجبينها وحكيتلها انتي احسن واطيب وحدة هون شكراً عن جد.. حكتلي شو رح تعملي.. حكيتلها إحكي شو مارح اعمل؟ حكتلي ماتخوفيني .. فهمتها ماحدا رح يعرف شي.. بس بدي منها تسرقلي مفتاح باب الحديد المسكر .. حكتلي هاد صرله سبع سنين مقفول وماحدا بنزله والمفاتيح بجوز يكونوا بغرفة اشراق..

#الظلام_في_الخارج_قصص
@rwayate
الحلقة السادسة
دخلت عغرفة إشراق بالفسحه وخلعت درجها برجلي لحد ماطلعت المفاتيح كلهم منه.. حاولت اهرب فوراً بس مالحقت لأنهم طلعوا بوجهي كلهم وشافوني.. ضليتني واقفة وخايفة وانا حاملة المفاتيح ومش عارفة وين اروح ودرج المكتب من وراي مخلوع .. كلهم صفنو فيه وبلشت إشراق تبهدل وكسبتها فرصه منيحه لتنتقم مني.. صارت تحكيلي شو بتعملي هون ياحقيرة وشو هاد اللي بإيدك.. حكيتلها مفاتيح .. قالت وبتجاوبي بكل ثقة يا سراقة يا حرامية .. إطلبو الشرطة بسرعه!.. حكتلها المديرة طولي بالك البنت لسه طالعه من قضية.. قالت مارح اتراجع عن شي وبدي اشتكي عليها هالملاك الطاهر اللي الكل مفكرنا ظلمناها شوفي اتطلعي خالعه الدرج وبدها تهرب بس الله كبير لحقتها قبل ما تهرب هالحقيرة.. حكيلتها احترمي حالك.. أنا اخدت مفاتيح الطابق المسكر اللي تحت عشان اكتشف شو فيه وافضحكم وافضح المدرسة المسكونة اللي متسترين عليها من خوفكم من لا حدا يعرف.. واحنا متل الغنم عندكم بتضحوا فينا وقت مابدكم !.. المديرة شفقت عليه واشراق حكتلي تكرم عينك ياروحي بدك تنزلي عالطابق المسكر اللي مانفتح من سبع سنين.؟ تعالي معي وغالي والطلب رخيص .. جرتني من ايدي وماقدرت اقاومها كنت أنا رفيعه كتير وهيه جهمة واديها متل لواح الخشب .. المديرة ماقدرت توقفها مابعرف شو حكتلها او شو عملتلها بس بجحرة منها سكتت المديرة فوراً.. والمعلمات التانين دافعو عني لأنهم عارفين اني شاطرة وبحالي من زمان بس ماقدرت اعمل شي .. نزلتني لتحت وضلت تجر فيه لحد ماوصلنا طابق المطبخ.. شافوني كل الطالبات ونيروز وهويده وشفتهم مستغربين وبدهم يعرفو إشراق لوين موديتني ؟ بس صارت متل المجنونة تصرخ وتبهدل بالكل ووجها احمر .. ومنعت حدا ينزل عالطابق وسكرت بوابه .. حاولت تفتح باب الطابق الأخير المسكر من سبع سنين عشان تحبسني فيه.. توقعت ردة هالفعل منها لأنه لو جابتلي الشرطة رح اكشفها واطلع حالي من القصة واكشف كل شي مخبينه علينا بالمدرسة .. ماكنت خايفة لأنه الفرصة اجتني على طبق من ذهب وهيه انه تنزلني بإيدها لجوا المكان اللي بدي ياه.. المفتاح مارضي يفتح الباب .. صارت تصرخ وتحكي جيبولي العامل.. اجا ابو هلال العامل وصار يحاول يفتحه وبعد محاولتين تلات فتح الباب.. كانت ريحة اول الدرج مقرفة ووسخه.. رمتني عأول الدرج وحكتلي يلا انبسطي .. وسكروا عليه الباب.. وطلعوا كلهم وأولهم المديرة.. حسيت انه تسكر عليه طابق المطبخ كمان كامل.. مارضيت اهددها فبابا او ماما قبل ما اكشف شو في تحت وليش كان هيك مكتوب بالورقة.. صرت اتطلع لتحت الدرج انزل ولا اضل.. ضليتني حايرة ساعه بين كلمة أنزل ولا أضل.. بطبعي بخاف من العتمة وكل شي فيه ظلام بخليني اتشائم ..حاولت اتناسى الوضع اللي أنا فيه وما أكمل الدرج .. مضى خمس ساعات وانا قاعدة عالدرج ومحتارة .. خفت بالآخر يرجعوا يفتحوا عليه الباب وما اكون شفت شي.. وبلشت أنزل درجة درجة .. الليل اجا وقررت انزل خلص.. نزلت لآخر درجة وشفت ممر متل اللي فوق بالزبط ومتل نفس ممرات الطوابق التانية بس كله عتمة وكان مبين بس أوله أما آخره مش ظاهر لعيني.. كيف بدي اشوف كل شي؟ هاد السؤال اللي كنت أسأله لحالي.. سمعت صوت الباب فوق بخرخش خفت كتير وقلت الأصوات نفسها ! .. الصوت من نفس الباب مش من المكان اللي انا فيه .. طلعت من جديد لفوق .. لقيت نيروز وهويده عالباب بحكولي احنا اجينا.. حكيتلهم شو بتعملوا هون ؟ قالولي اذا بدك بنحاول نطلعك حكيتلهم مابدي منكم شي بكفي انكم تخليتوا عني عشان علامات.. حكولي رح نصحح غلطتنا معك وهينا ضحينا بحالنا ونزلنا عشانك ..حكيتلهم أنا مابدي اطلع من هون هلأ.. بس لو بدكم تساعدوني عن جد جيبولي مصباح أو ضو عشان بدي انزل اشوف شو في تحت بوضوح .. وقلتلهم بعدين كيف نزلوا مش اشراق سكرت بواب الطابق كله .. حكولي ماسكرتهم بالمفاتيح بس منعت حدا ينزل عالطابق وهينا نزلنا.. نيروز حكت رح تطلع تجيبلي المصباح من غرفة البنات ومابتطول.. طلعت فوق وهويده ضلت تحكي معي ..أتناقشنا بموضوع كيف تخلوا عني صارت تحلف أنه ماكانت بتعرف انه اشراق مفكرة تعمل هيك وتتهمني هالإتهام الوسخ.. وبعد دقايق نيروز جابت المصباح واعطتني ياه من ورا حدايد الباب .. لأنه كان باب حديد مكشوف واله قضبان متل قضبان السجن بالزبط.. اخدته وحكيتلهم خلص اطلعو لا تنكشفوا .. طلعو وتركوني واقفة نزلت لآخر الطابق وشغلت المصباح .. كنت عم بشوف كل شي بوضوح .. الممرات واضحه بالنسبة إلي .. وريحة الغبرا رح تقتلني كمان شوي .. بس حكيت لازم اشوف اخر طابق شو فيه.. اتطلعت بالغرف كان فيهم دروج مخلعه وكراسي وكراكيب قديمة.. وفجأة بلشت نفس الأصوات تطلع .. ومتل كإنه حدا وراي وعم بمشي معي.. ضليتني الف متل المجنونة لأشوف وماكنت بشوف حدا.. حكيت مين هون ؟ ركضت بإتجاه باب ووقتها خلص الممر ومالقيت شي.. شفت خيال أسود عالباب وكان متل خيال بني آدم بس شفاف وظاهر الشي اللي وراه ..

#الظلام_في_الخارج_قصص
#الظلام_في_الخارج_3 #الظلام_في_الخارج
@rwayate
الحلقة الثالثة
ضليت لحالي بغرفة الإدارة وما معي غير الخوف والرعبة من اللي صار.. ماكنت فاهمة ليه هيك صار وكل شي متل الحلم.. قمت وصرت أطبل على الباب حتى يطلعوني لأنه مارضيت بالظلم ومابحب أنظلم من حدا أبداً ..ضليتني أخبّط وأطبل عالباب سمعتني الخدامة وداد وصارت تحكي معي من ورا الباب .. بحكيلها وداد افتحيلي لو سمحتي.. حكتلي مابقدر المديرة واشراق نبهوا عليه ما ادخل حتى لو بدي انضف.. صرت ابكي بحقرقة حسيتها تعاطفت معي وكان كلامها معي كأنها حاسه اني مظلومه وصاير شي مش طبيعي.. وتحكيلي اهدي يابنتي رح تنحل الأمور ماتزعلي حالك ان شاء الله كل واحد بوخد جزاته.. حكيتلها وداد شو قصدك بهالحكي؟ مش فاهمة انتي عارفة شي عن اللي صار خبريني.. بلشت تخربط بالحكي وفجأة سمعت صوت إشراق بتبهدل فيها وبتصرخ عشان حكت معي من ورا الباب وطردتها ونزلتها لطابق المطبخ وفتحت عليه .. حكيتلها بدي اطلع انا مرهقه لو بدكم تحاسبوني على شي جيبوا ادله للي صار .. الملابس مش كافية ومش ضروري تكون لإلي لأنك عارفة منيح انه كلنا هون بنلبس متل بعض.. صارت تسب عيه وتحكيلي الك عين تحكي يا واطية تعالي معي.. اخدتني لغرفتها وخلتني أمسحلها البلاط وانضفلها غصب عني وحرضت كل المعلمات عليه وشوهت سمعتي بين كل المعلمات ..في منهم صدقوا وفي منهم حكوا كارولين مستحيل تعمل هيك ومابنصدق.. رنت على امي وخوفتها بطريقتها وحكتلها لازم تيجي تشوفي عملة بنتك.. معك أربعة وعشرين ساعه بتكوني هون ولا رح نخلص عليها.. ماما حكت معي وحكتلي ما اخاف وكل شي رح ينحل ورح تنتقم منهم في حال عملو معي شي.. نزلتني على غرفة الطالبات وماخلتني احضر ولا درس.. نمت على تختي ببكي وفجأة دخلو على الغرفة نيروز وهويده كانو مضروبات ومكسرات وتعاليم الضرب واضحه على وجههم.. حكيتلهم فهموني شو حكيتو عني؟ انا هيك عملت ؟ هيك بتحكو عني؟ صارت تحكي نيروز حبيبتي احنا ماحكينا شي احنا بنحبك ومستحيل نصدق انه انتي عملتي هيك فينا.. حكيتلهم بس اشراق حكتلي انكم اعترفوا اني عملت فيكم هالشي.. وفجأة دخلت اشراق حاملة عصايتها وصارت تبهدل فيه وقعدت نيروز وهويده وفجأة بس شافوهم تغيرو معي وصارت تحكي هويده ليش لأ ممكن تكوني عملتي هيك فينا عشان موضوع العلامات اذا مش عشان نجدت .. انا نصدمت وصرت احكي مستحيل تكونو صاحباتي انتو بتحكو هيك.. احنا متل الاخوات كيف فيكم تتهموني بعدين انا نزلت وراكم ونيروز هيه اللي نزلت أول شي ووراها هويده يعني مش انا اللي نزلت أول وحدة والبنات كلهم شاهدات هون عليه.. وصرت احكيلهم احكي انتي وياها احكوا !! .. مش أنا حكيتلكم ماتنزلو وراي عشان المشاكل وعشان ماتدرى مس اشراق.. ليه ساكتين.. فجأة البنات انكروا اللي صار ومعظمهم حكوا انه انا نزلت اول وحدة .. ومنهم بنت اسمها نيفين صارت تكذب فيه وتحكي عليه حكي ماصار وتقول هيه اللي نزلت بالليل وفتحت الباب وبعدين البنات فقدوها ونزلو وراها .. ماصدقت اللي صار وضليتني استنى ماما لأجت .. وصلت ماما وفهمتني انه بابا مسافر عشان شغل وهيه رح تحل الموضوع .. ماما مابتسكت عالظلم وبرغم انها روسية بس بتحكي عربي احسن من الكل.. دخلت عالمديرة واشراق وراها.. انا كنت احكيلها كتير عن اشراق ولما بلشت اشراق تحكي معها حكتلها ماما معلش مابدي اسمع منك .. أنا بدي افهم من المديرة ورئيسة المكان هون.. المديرة غفران فهمتها كل شي وحكتلها شو اللي صار وانه انا الوحيدة اللي ما تأذيت وانهم مسكوني بغرفة الأكل وكان نجدت عالباب واجا نجدت اعترف انه نزلت عنده وصار اللي صار.. ماما ماصدقت ووقفت معي وحكت بنتي مستحيل تعمل هيك شي انا بعرف شو بنتي.. ومس اشراق تحكي شو بعرفك ما انتي راميه بنتك عنا من وكانت صغيرة هلأ جاي تحكي انك بتعرفيها.. هددتها ماما ترفع قضية عليهم لأنه مافي أدلة كافية وانها شوهت سمعتي وفي حال طلعت من المدرسة رح تثبت الفضيحه عليه لهيك حكتلي لازم تضلي بالمدرسة وخوفت المديرة ومس اشراق لأنهم حسو اكتر انه ماما واصله وخصوصاً لما عرفوا بعلاقات بابا تغيرو كتير معي وخافو تخرب المدرسة وقرروا يخلوني ونبهتني ماما في حال صار اشي احكي معها فوراً.. ورح تيجي تزورني بعد يومين هيه وبابا لحتى يشوفو شو صار تغييرات.. بعد التهديدات اللي حكتها ماما وتراجعهم كان نفسي اعرف ليه هيك صار .. فقررت اغير معاملتي مع الكل واقلب من طيبة لأنسانة حقيرة تماماً حتى اكشف كل واحد على حقيقته لأنه ما نفع معهم ولا مع نفسي أكون منيحه.. قلبت على الوجه التاني وصرت شريرة حتى مع نيروز وهويده ويادوب أحكي معهم وأي حدا بجرب يحكي معي كنت اصده بوجهه وأبهدله.. والغريب أنه كان المفروض أول واحد يطلع برا المدرسة هوه نجدت بس ماطلعوه وهاد خلاني أشك أكتر أنه في شي مخبى.. صرت اعمل حالي نايمة حتى اشوف البنات شو بعملوا .. بأول ليلة ماكنت شايفة شي.. وتاني يوم الصبح نزلت على الصف وحضرنا أول محاضرة وكانت مع المس أشراق ..

#الظلام_في_الخارج_قصص
@rwayate
الحلقة الخامسة
خوفت الخدامة وداد وحطيت بقلبها رعبة أني بلعب مع الشياطين وبس لحتى تعترف.. لأنه كلمتها ضلت براسي وكان بدي اعرف شو بتقصد.. حكتلي انا خايفة اشراق تشوفني معك وتعرف اني انا حكيتلك .. حكيتلها ماتخافي من اشي ومارح احكيلها شي بس احكيلي أنا بدي اعرف ليه عملت هيك معي وليه انا بالذات.. حكتلي خلص حبيبتي رح احكيلك بس مش هون بالساحه .. رحنا لمكان بعيد كان ضايل عالفسحه خمس دقايق وبتخلص وبتبلش حصة مس أشراق الرياضيات.. كان بدي اعرف بالخمس دقايق شو عم بصير واهرب من الشرطة اللي لاحقيتني بكل مكان.. اخدت الخدامة وداد لآخر مكان برا بالمدرسة واجا الشرطي حكالي لوين رايحه؟ حكيتله مش هاربه بدي احكي أنا وهاي المره.. خليك هون لتتطمن اني مش هاربه.. حكيتلها احكي بسرعه .. بلشت تحكي.. حكتلي الطباخ نجدت سمع في أصوات غريبة عم تطلع بالليل من الطابق اللي هوه فيه .. استغرب من الموضوع وحس انه في شي عم بصير كل يوم بالليل .. شغلات عم تتحرك وكراسي غرفة الأكل بالأخص.. وبحس انه غرفته بطلع منها اصوات وخيالات وهوه نايم.. راح حكا لمس اشراق وفكرته بتخيل وكذبته من خوفها على سمعة المدرسة.. بس قررت تنزل تتأكد بنفسها مع المديرة بيوم غير محدد.. واجتمعت مع نجدت قبل ماتنزل ومع المديرة بغرفة الإدارة حتى يعرفوا شو القصة.. بهاللحظة في بنت سمعت كل الكلام وراحت نقلته للبنات بغرفتهم.. وانتشر الموضوع بينهم.. إشراق نزلت فجأة مع المديرة على طابق المطبخ بالليل.. وشافت نفين طالعه من غرفة نجدت وخايفة.. مسكتها وحققت معها لإعترفت بكل شي.. وإشراق هددت نجدت وحكتله رح تفضحه هوه ونفين.. نجدت بطل عارف شو بده يعمل.. نفس هالليلة اللي كشفت فيها إشراق نجدت ونفين.. طلعت عليكم فجأة وشافتكم مولعين شمعه ومتجمعات حولين بعض ومش نايمات.. حست انكم بتحكوا عن نفس الموضوع وبهدلتكم .. وبعد مانزلت, انتوا نزلتوا للطابق لتشوفو شو اللي عم بصير.. انتي ونيروز وهويده.. وأكيد في شي غريب صار معكم بالطابق اللي تحت.. نيروز وهويده نضربو ونحبسو وانتي ماصار فيكي شي وارتميتي بغرفة الأكل.. سمعت إشراق صوت بالطابق ونزلت تشوف وانتي بهاللحظة كان مغمى عليكي وصاحباتك مضروبين.. أجت إشراق هددت نجدت بإنه يعترف انه هوه اللي كان معك وانك انت على علاقة معه وعشان مايكشفوكي صاحباتك ضربهم وفهمتهم إشراق رح تنقص علامات الهم وترسبهم بالفصل اذا ماحكوا انه نجدت ضربهم.. ولحتى مايخاف فهمته إنها رح تطلعه من القصة متل الشعرة من العجين ورح تنسى موضوعه ومارح تفصله ورح تخلي نفين بالمدرسة من شدة خوفها على سمعة المدرسة .. وأنا سمعتها بتحكيله فضيحه صغيرة أحسن من فضيحة كبيرة تخرب بيتي وبيتك وينقطع رزقنا كلنا وإذا عرفوا أهالي الطالبات مصيبة كبرى ورح يتزعزع الخوف إلهم.. يعني انتي كنتي كبش الفدا عشان ماتخرب سمعة المدرسة .. حكيتلها شكراً وبوستها عجبينها وحكيتلها انتي احسن واطيب وحدة هون شكراً عن جد.. حكتلي شو رح تعملي.. حكيتلها إحكي شو مارح اعمل؟ حكتلي ماتخوفيني .. فهمتها ماحدا رح يعرف شي.. بس بدي منها تسرقلي مفتاح باب الحديد المسكر .. حكتلي هاد صرله سبع سنين مقفول وماحدا بنزله والمفاتيح بجوز يكونوا بغرفة اشراق.. حكيتلها رح تساعديني.. حكتلي رح احاول بس لما انضف رح اشوف وينهم واحكيلك لتوخديهم بس أنا مارح اقدر اخدهم لأنه بخاف.. حكيتلها بكفيني اعرف وينهم وبس.. هربت بسرعه للحصة وكانت مبلشة.. مسكتني اشراق حكتلي وين كنتي قلتلها كان عندي تحقيق.. سبت عليه وكملت الحصة.. كان بدي اقوم امسح فيها بلاط الصف واضرب راسها بكل حيطانه واخلي كل الطالبات يدعسوا على وجهها بكنادرهم الوسخه.. حقدت عليها لحد ماوصل حقدي أني أفكر بموتها .. وسخت سمعتي بكل مكان وفهمت الكل اني وحدة حقيرة وانه انا كنت مع نجدت وأنا حرقتهم هوه ونفين.. بس الكل شك بالمدرسة انه شو ممكن تكون بتعمل نفين بالغرفة معاه.. وهاد اللي كنت ناوية اشتغل عليه انه اثبت برائتي .. بعد ماخلصنا حصص وطلعنا على غرفنا.. سمعت هويده بتحكي .. نجدت ونفين طلعو من المستشفى وهيهم نزلوهم.. كان نجدت على كرسي متحرك ونفين ماسكة عكازة.. انبسطت بس شفتهم هيك واشتفيت فيهم كتير برغم اني مش أنا اللي عملت فيهم هيك.. اجا الشرطي ناداني من الغرفة ونزلت معاه.. كانو عم بوخدو أقوالهم .. والبحث الجنائي عم بعاين المكان ويشوف شو اللي صار بالغرفة.. نزلت لغرفة الإدارة ولقيت نجدت ملفوف بالشاش وطرف وجهه مشوه ونفين نفس الشي مشوهين واشكالهم بتخوف.. كنت عم بسب عليهم جواتي وكان بدي يتعذبوا اكتر من هيك.. اخدو اقوالهم وكذبو بكل حرف حكوه .. رجع حكا نجدت انه انا وياه كنا على علاقة مع بعض ونفين كانت معه بالغرفة فأنا عرفت انهم جوا ونزلت حرقتهم .. وكانت اقوال نفين نفس الشي.. أقوالي أنا صارت معروفة.. بس الفرحة الغير متوقعه لما دخل الشرطي التاني وحكا انهم توصلوا للشي اللي صار بالغرفة..