#تحت_الأرض_الجزء_الثالث #رند_محمد
اول مافقت ماكان في حدا بالبيت.. تركوني لحالي وراحو ..
رحت ع غرفة امي فتحت الباب ووقفت اتطلع حوليي صفنت بالحيط و طلعت من الغرفة وسكرت الباب ..
كان عم برن تلفوني ، فارس ابن عمتي هو يلي عم يتصل
رديت عليه : اهلين فارس
فارس : لاتحكي انو انا يلي ع التلفون .. في موضوع مهم بدي شوفك حاكيكي ياه
جويل : طيب.. بشوفك بالحديقة يلي بآخر الشارع عود ع الكرسي يلي جنب الشجرر..

سكر فارس و انا اتصلت بأمي لاعرف وينا هي و انجيلا..
ماما : اهلين جويل
جويل : وين انتو ماما
ماما : نحنا عند عمتك .. يلا شوي وطالعين
جويل : طيب ..

سكرت التلفون ولبست وطلعت ع الحديقة يلي وعدت فيا فارس ابن عمتي.. اعدت انطرو لبين ما اجا
اعد جنبي : كيفك
جويل : منيحة و انت
فارس : تمام... جويل بدي حاكيكي بموضوع ومابدي حدا يعرف فيه لا امك ولا انجيلا
جويل : ماحدا رح يعرف
فارس : ماسألوكي امك و انجيلا وين رايحة ؟
جويل : امي و اختي عندكن بالبيت
فارس : لا .. انا هلأ اجيت من البيت و امك و انجيلا مو عنا.. اساسا امي مو بالبيت ومابعرف وينا
جويل : ايوا ..

شو السبب يلي بخلين يكذبو عليي .. شو عم يعملو من ورا ضهري ..
جويل : قلي شو القصة؟
فارس : بصراحة انا بدي سافر ع اوروبا بس مابدي حدا يعرف وين رحت غير انتي
جويل : مافهمت كيف يعني ماتخبر حدا
فارس : يعني بدي سافر من غير ماحد يعرف انا وين
جويل : ليشش؟ طيب ليش عم تقلي الي؟
فارس : سمعي انا متورط بمشكلة كبيرة و مضطر اترك البلد ومابدي حدا يعرف انا وين .. اهلي رح يخبرو الناس انا وين و اخواتي الشباب رح يمنعوني سافر لان بعدني صغير
و امك و انجيلا مابدي يعرفو بأي شي لان ممكن يحكو لأمي
السر عندك وبس لأن بعرفك مابتتعاطي مع العيلة كتير ومابتحبي الحكي الزايد وتوصيل الكلام لحدا وخبرك مشان ازا متت يكون في حدا بيعرف السر
اكتفيت اني اسكت وبس.. بعدين انسحب و طلع من المحل وطفا تلفوناتو
رجعت ع البيت كانو امي و انجيلا اعدين و جمال بغرفتو
صارو يتطلعو فيني من اول مافتت للبيت أمي صارت تبهدلني لأن طلعت بدون مآخد اذنا
طنشت حكيهن يلي كان مابيعنيني ابداً و دخلت غرفتي .. انزرعت بسريري
الساعة كانت 10 بالليل .. البيت هدوء وكل مين منا فات لغرفتو وانعزل لحالو .. اخدت الكتاب يلي بالدرج ورجعت اقرأه بس هالمرة قررت اقرأ من بعد الصفحة 12
بديت بالصفحة 13 كانت عم تحكي عن بنت اسما أليس
كان محتوى هي الصفحة مختلف تماماً عن الصفحات يلي قبلها
البنت يلي عم تنحكى قصتها كانت عايشة مع اهلا و فجأة بتكتشف أنو في عندا عيلة غير هدول و أنو هي عم تنخدع من كل اللي حوليها .. كانت قصة ممتعة وماكنت بعرف ليش عايشة رعب من هالكتاب .. ضليتني عم اقرأ للآخير من كتر ما تحمست و انشديت .. خلصت الرواية بنهاية سعيدة خلتني حس بجرعة تفاؤل لما أليس تزوجت الملك يلي حبتو ..
الصفحة 122 كان مكتوب فيا كلمتين مرعبين وهنن
( يتبع الموت..)
عرفت أنو القصة ما انتهت هون و الها كمالة... كان عندي فضول اعرف كمالتا لهيك نويت اشتري الجزء التاني و بلش فيه ... بس ليش الموت؟ ليش هالكلمة عم تظهر بالرقم 12؟
معقول انا بدي موت بعد 12 يوم؟؟ او بالشهر 12؟
سكرت الكتاب و حطيتو عالطاولة وغمضت عيوني

عم اسمع صوت همس بعيد .. قربت عالشباك وصرت حاول اتطلع بدون ماحدا ينتبه .. شفت خيال بحديقة البيت .. خيال واضح تمامآ انو شي حقيقي مانو وهم
ضليتني أكد فيه لحتى عرفت انو هاد خيال بنت... بنت لابسة عباية وحاطة طاقية العباية ع راسا وعم تحكي مع حدا .. بس ماكنت قادرة اعرف مين هالحدا ..
Telegram @rwayate
معقول هي أنجيلا؟ طيب ليش لتطلع بالليل!! مع مين عم تحكي ياترى ..
وصلني مسج ع الموبايل فتحتو كان مسج من فارس عم يخبرني فيه انه هو وصل ع اوروبا و أول مايئعد بالبيت رح يخبرني و أكدلي انو ماخبر حدا ابداً .

فئت الصبح طلعت من غرفتي ع الصالة كانو امي و أنجيلا آعدين وملبكين
جويل : شوفي؟
أنجيلا : فارس موبايلو مطفي و صرلو من مبارح مارجع ع البيت ماحدا عرفان وين هو
بلعت ريقي وجاوبتن : بركي عند حدا من رفقاتو؟
أنجيلا : لا سألو الكل وماحدا شافو

هزيت براسي .. ومشيت ..

كانت الأفكار براسي عم تروح وتجي مو قدرانة أعرف ليش هيك عم يصير ..
خطرلي أنزل مرة جديدة ع المكان يلي تحت البيت بس هي المرة انا مارح أنزل لحالي أنا لازم خبر حدا يساعدني .. الخيار قدامي كان إما أهلي أو رفيقتي أمل ..
أهلي رح يعتبروني مجنونة ويستهزءو فيني لهيك ماضل عندي الا خبر رفيقتي أمل... هي حدا كتير بحب الاكتشاف و بتقرأ كتب عن الماورائيات شغفها الاكتشاف و المغامرة وبسبب هالشغف هاد تعرفت ع ناس طموحين متلا و عندن اكتشافات غريبة وناس دارسين و فهمانين ومتعمقين بكل شي .. لهيك هي ممكن تساعدني أكتر من أي حدا تاني .