والمفاجأة إنو لونا صار فيا متل ما صار ب تيم
فاتت بالقصة بغرض تنتقم منو وتربيه .. بس اللي صار إنو بعد اللقاءات بينا وبين تيم وتغيُّرو وكلشي عملو مشانا خلى شي جواتا يكبر تجاهو
هيي بلشت تحبو عنجد لإنو فعلاً هو كان بينحب واللي كان مضيعو بالأول هو أنانيتو وتكبرو وطيشو اللي نسيهن تماماً بعد ما عرف لونا
لونا صارت تحس بالسعادة معو وقدر ياخد قلبا عنجد
واللي ريحلا ضميرا إنو تالا نسيتو يعني هيي ما عم تخونا هلأ
( طبعاً هيي ما كانت بتعرف إنو تالا لساتا بتحب تيم وعرفانة حقيقة علاقتن )
تالا من كتر كرها للونا انتقلت تاني فصل ع غير مدرسة حتى تترك المجال للونا تغرق أكتر وأكتر بعلاقتا مع تيم وتقدر تنفز خططا بدون ما حدا يشك فيا وطبعاً ضلت مراقبة تحركات وأخبار تيم ولونا يوم بيوم
ومن هون بلشت قصة الإنتقام بس مين يا ترى رح يساعدا ؟!

#يُتبع ...

#لعبة_الحب_والإنتقام (ج 11)
@rwayate
-----------------------

اللي قرر يساعدا بقصة إنتقاما هو شب بيقربا قرابة بعيدة اسمو #جاد

جاد كان رفيقو لتيم من بعيد لبعيد وبنفس عمرو بس ما بيعرف إنو بيقرب تالا ولما حكتلو تالا القصة كتير حقد ع تيم كيف هيك تسلى فيا وقرر يساعدا بقصة الإنتقام

- جاد : ما تخافي يا تالا حقك رح يرجعلك من هدول التنين وحياتك ما رح خلين يتهنوا ببعض ويكملوا بهالعلاقة
بدي منك إنتي تشتغلي من طرف لونا وتعملي اللي عليكي أما تيم تركيه عليي
- تالا : ماشي جادو اتفقنا
جاد عرف كل تفاصيل حياة لونا من تالا وعرف عنوان بيتا وجابتلو رقم أبوها وأخوها وحساباتن ع الفيس
طبعاً هو كان رفيق تيم بس مو لهالدرجة رفقة يعني كان بيناتن سلام وحكوا كم مرة بس ..
بس كلنا منعرف رفقة الشباب كيف بتقوى بيوم وليلة وفعلاً جاد ما وفر فرصة ليتقرب من تيم
مرة من المرات كانوا تيم وجاد سهرانين مع رفقاتن الشباب وخطر لجاد خاطر ..
- جاد : تيم معلش تعيرني موبايلك شوي كنت عم احكي عالفيس مع أخي بلبنان وكنت بدي ابعتلو اسم دوا إمي ليجيبو معو بكرا وهو جاي بس ما لحقت
ببعتلو الإسم من الفيس تبعك
- تيم : إي ولو تفضل .. بس ماني ضايفو عندي دور عليه إنت وضيفو وحكيه
- جاد : مو مشكلة تسلم يا غالي
وهي وصل موبايل تيم لايدين جاد وطبعاً تيم أخد الموضوع بنية طيبة وثقة وما خطرلو يكون جاد عم يلعب لعبة وسخة
فتح جاد مسنجر الفيس ودور للاقى اسم لونا
فتح محادثتا ولقى كل اللي بدو ياه
وهون كان #الغلط الكبير عند تيم !!

تيم كان محتفظ بكل محادثاتو مع لونا من أول ما تعرف عليها وفيها كتير صور للونا و
جاد روق ع الآخر بعد ما وصل للي بدو ياه
راح صور شوي من المحادثات بيناتن وخصوصي اللي فين حب وغزل وصور للونا وبعتن لحسابو ع الفيس وبعدا محى المحادثة والصور من الاستديو وكأن شيئاً لم يكن ورجع الموبايل لتيم بعد ما ضاف أخوه اللي بلبنان كرمال ما تبان الكزبة

مرق شهر ..

#يتبع..
#لعبة_الحب_والإنتقام (ج 12)
@rwayate
-----------------------
مرق شهر .. وجاد نام ع القصة لتنتسى
بهي الفترة كانت الامتحانات قربت ولونا صارت تنشغل عن تيم كتير وما عادوا يتواصلوا متل قبل
وهالشي كان يدايق تيم لإن تعود يحكي لونا بالساعات ويقضوا أغلب وقتن مع بعض
كان يطلب يشوفا بس هيي ما تقبل وتقلو لبعد الفحص منصير نطلع
وكان كل يوم مع حلة المدرسة يكون ناطرا ليسلم عليها ولو من بعيد
بس بعدين مرق كم يوم لاحظت لونا إنو تيم ماعاد إجا ليشوفا وتدايقت كتير
وتيم كان متقصد ما يجي مشان يخليا تشتقلو وتقبل يطلعوا مشوار
بعد يومين بيكونوا تيم وجاد قاعدين بكافيتريا قريبة من المدرسة ..
- جاد : تيم قوم معي
- تيم : لوين بدنا نروح
- جاد : في بنت بالمدرسة هي اللي هون وعاجبتني كتير
صرلي اسبوعين متعرف عليها وبدي آخد رأيك فيا وعرفك عليها
- تيم : لا ما بدي خليا غير مرة مو جاي عبالي
( طبعاً هو كتير حابب يروح ليصدف لونا بس ضل مصمم إنو يخليا تشتقلو وتحس بغيابو )
- جاد : لك قوم يا زلمة كلا عشر دقايق بتشوفا ونحكي كلمتين بعدين منقحطلك
- تيم : طيب ماشي بس منوقف بعيد عن المدرسة مو قداما
- جاد : وين ما بدك بس امشي
ومن هون بلش تنفيز الخطة .
وصلوا لناح المدرسة بس وقفوا بعيد بشكل ما حدا يشوفن
- جاد : عطيني موبايلك شوي بدي ابعتلا مسج قلا إنك معي وناطرينا ما معي رصيد
- تيم : يا زلمة شو إنك كحتة عطول ما معك خود تفضل
أخد جاد الموبايل وراح بعت مسج كتب فيه : " تالا أنا شتقتلك بجنون تعالي أنا ناطرك بنفس المكان أوعك ما تجي متل مبارح قلبي ناطف عليكي "
ولمين بعتا يا حزركن ؟!
بعتا للونا ..
وصل المسج للونا وكانت الحصة الأخيرة عندن
بس قرت المسج عقلا طار واصفر وشا وحست رح تغمى من الصدمة
تالا !! وبدي شوفك !
شو عم يصير ؟!
رن الجرس وخلص الدوام .. طلعت لونا متل المجنونة وركدت لبرا لتشوف إزا تيم ناطرا ولا لا
ومين بتشوف قداما !! تالا
- لونا : تالا هي إنتي ! شو عم تعملي هون - تالا : ( تلبكت بالحكي ) أنا !
إنو جاية شوفك اشتقلك ولا ما بيصير ؟! لونا ساكتة ومصدومة وما عم تفهم شي

#يُتبع ...

#لعبة_الحب_والإنتقام ( ج13)
@rwayate
-----------------------

لونا ساكتة ومصدومة وما عم تفهم شي
- تالا : كيفك ولي ليش ماعاد شفتك
بعدين شبك كإنك مو مبسوطة بشوفتي
- لونا : كيف مو مبسوطة بالعكس شتقتلك كتير بس راسي واجعني شوي وماني مرتاحة
- تالا : ياعمري سلامتك خلص روحي ع البيت وببقى بجي لعندك المسا وأنا هلأ رح استنى رفيقتي قالتلي انطرا هون
- لونا : رفيقتك ! ( هون زادت الشكوك عند لونا )
طيب أنا رايحة حبيبتي نتبهي لحالك بايو
- تالا : باي يا عمري
طبعاً كل هالموقف ما كان صدفة .. هاد جزء من الخطة المرسومة بين تالا وجاد
لونا مشيت وعملت حالا رايحة عالبيت بس ضلت واقفة بعيد بشكل ما تشوفا تالا .. وبس شافتا مشيت راحت وراها
بهالأثناء جاد بيكمل الحقارة تبعو ..
بيفتح الفيس وبيبعت صور لونا ومحادثاتا مع تيم (بعد ما غبش ع اسم تيم بطلب من تالا ) لحساب أبوها وأخوها
طبعاً ما بعتن من حسابو الخاص
كان قبل بيوم عامل صفحة بإسم مزيف وبعد ما وصلوا الصور حظرهن تنيناتن ولغى الحساب ..
- جاد : تيم خليك واقف هون ليكن طلعوا الطلاب رايح جيب رفيقتي لهون لعرفك عليها
- تيم : ماشي بس لا تتأخر
راح جاد وترك تيم واقف لحالو وهون صار دور تالا بالخطة ..
تالا بس شافت جاد جاي من بعيد كملت بطريقا باتجاه تيم .. ولونا كانت عم تلاحقا من بعيد لبعيد
يعني الخطة القذرة تبعن عم تمشي تمام
وصلت تالا لعند تيم اللي تفاجئ بشوفتا
- تيم : تالا !! شو جابك لهون ؟
تالا ما حكت ولا حرف .. ركدت وضمتو بقوة وبعدا قالت ع ملا صوتا : تيمو اشتقتلك حياتي
تيم انصدم من الموقف وبعدا عنو بس بعد شو !!
لونا شافت كلشي وتحققت غاية تالا وخطتا الخبيثة ويا ريت خلصت هون !!
بيرن موبايل لونا .. أبوها عم يتصل
من دموعا والغصة اللي كانت فيا ما قدرت ترد
ما ردت عليه
اتصل مرتين وتلاتة ولونا ما ترد .. ضلت قاعدة ع الحفة عند المدرسة وصافنة
بهالأثناء بيجي أخوها سايق السيارة متل المجنون
بس شافا قاعدة نزل وبعيونو الشر وراح لعند لونا
لونا المسكينة ارتعبت وما عرفت شو صاير
-أخوها ( ع ملا صوتو ) : لونا شو عم تعملي لهلأ
ناطرتيه يا كلبة والله لإحسب الله ما خلقك
وبيمسكا من شعرا وبياخدا ع السيارة وبيروحوا
وطول الطريق وهو يضرب فيا ويشد شعرا وهي تبكي وتحاول تبعدو عنها
وصلوا ع البيت وشحطا من شعرا والمسكينة تصرخ وتستنجد بأبوها
مو عرفانة إنو أبوها ناطرا جوا ليكمل عليها
فوتا لجوا وبلشو تنيناتن يضربوا فيها بلا رحمة والإم تحاول تخلصا من بين إيديهن وما تقدر

- لونا (وهي عم تبكي وتشهق )
#يُتبع ...
#لعبة_الحب_والإنتقام ( ج14)
@rwayate
-----------------------

- لونا (وهي عم تبكي وتشهق ) : لك مشان الله بيكفي قلولي شو في أنا شو عملت
- أخوها : وعم تسألي يا فلتانة !
مين هاد الكلب اللي باعتيللو صورك ع الفيس وإنتي لابسة دلع وبتياب البيت
- أبوها : تفي على تربايتك يا حيوانة وطيتي راسي آخر هالعمر
والله لو بتموتي ماعاد خليكي تطلعي برا البيت ومدرسة ماعاد في
وفعلاً بعد ما شبعوها ضرب أخدو منها الموبايل وحبسوها بالغرفة
وطبعاً تيم ما كان إلو خبر بشي ..
بعد ما قلع تالا وبهدلا ع الموقف اللي عملتو رجع ع البيت وضل ناطر لونا تبعتلو مسج ليتصل فيا
لإن هيك كان التواصل بيناتن .. طالما هيي بالبيت ما بيتصل لتبعتلو أو تعلملو حتى ما يكمشوها أهلا خصوصي إنو أبوها وأخوها صعبين بهالقصص ..
مرق أول يوم وتاني يوم ولونا لا حس ولا خبر
لا اتصلت ولا بعتت مسج ولا حتى عم تفتح فيس
تيم انشغل بالو كتير وقرر ينطرا قدام المدرسة
بس كان كلو عالفاضي .. لونا ما عم تبين
والخوف صار ياكل قلبو لتيم
- كيف بدي وصل للونا لك وينا ليش هيك عم تعمل فيي وتخوفني عليها !!
أما المسكينة لونا كانت بعالم تاني .. محبوسة بغرفتا ومقهورة ومصدومة من كلشي
مؤ عرفانة ع شو تزعل ع وضعا واللي عملوه أهلا ولا ع اللي عملو فيا تيم !!
طبعاً هيي اقتنعت إنو تيم تضحك عليها وإنو هو اللي بعت الصور لأهلا ليخلص منا ويرجع لتالا
كانت حالتا بتقطع القلب .. ليل نهار عم تبكي وبلا نوم ولا ما ترضى تاكل
ومرق الفحص وكل الطلاب يروحوا للمدرسة إلا لونا !!
ولسى عقاب هالمعترة ما خلص ..
فوق كل اللي عملوه بلونا .. بعد كم يوم بيطلع أخوها بقصة جديدة
حضرتو زبط شغل بلبنان لسنة وقال لأبوه أنا رح آخد لونا معي
هيك هيك ماعاد في دراسة وانتو هون ما رح تقدروا تراقبوها متلي
هنيك أنا رح كون مسؤول عنا
أبوها ما كان موافق بالأول بس إبنو عرف كيف يقنعو وعلى أي وتر يلعب ليأثر عليه
والإم المسكينة ضلت تبكي وتترجاهن وتقلن كرمال الله اتركولي لونا هي بنتي الوحيدة ما فيني بلاها
خلص أنا بحبسا وبحرما من كلشي بس لا تبعدوها عني
بس عبث .. ما كانوا يردوا عليها
كم يوم وجهزوا غراض لونا وأخدوها غصب عنا
لونا ما كانت معن بنوب .. من تقل الصدمة اللي كانت فيا ما كان فارق معا شي وماعاد حست بشي
بعد كل الحب اللي حبتو لتيم واللي كان أول حب بحياتا وبعد كل ثقتا فيه ما نالت شي إلا إنو دمرلا حياتا ومستقبلا وراح !
( طبعاً هي كانت قناعتا )
وصلوا لونا وأخوها ع لبنان .. وهنيك استأجر بيت رفيقو واللي كان هو عبارة عن جحيم بانتظار لونا
كان كل يوم أخوها يطلع..

#يُتبع ....

#لعبة_الحب_والإنتقام ( ج15)
@rwayate
-----------------------

كان كل يوم أخوها يطلع ع شغلو ويقفل الباب ع لونا
ويتركا لحالا بين أربع حيطان وما عندا شي إلا تخدمو
ونفسيتا كانت لأسوء ..
بهالأثناء تيم جن جنونو وأعصابو تلفت وهو يحاول يوصل لخبر عن لونا
والمشكلة ما بيعرف من رفقاتا غير تالا !
طبعاً تالا لسى ما شبعت انتقام وما كفاها اللي صار
كان لسى بدا تحرق قلب تيم .. وكملت خطتا الخبيثة
بعد ما شافت تيم كل يوم عم يجي ينتظر لونا خطر ببالا خاطر
اتفقت مع وحدة من رفقات لونا بالصف من اللي كانوا يكرهوا لونا .. وفهمتا شو تحكي لتيم وفعلاً هديك راحت لعند تيم وصار بيناتن هالحديث :
- سارة : مرحبا أنا سارة رفيقة لونا بالصف ، مو حضرتك تيم ؟
- تيم : إي أنا تيم .. لونا وينا إنتي بتعرفي عنها شي ؟
- سارة : إي أنا مشان هيك إجيت إحكي معك لإن بصراحة شفقت عليك لما شفتك كل يوم عم تجي وتنطر ع الفاضي
- تيم : ع الفاضي !! كيف يعني ع الفاضي ؟!
- سارة : أنا آسفة يمكن اللي رح قولو يزعجك .. بس لونا انخطبت وهيي هلأ بلبنان مع أخوها عم تحضر لعرسا اللي رح يكون بعد إسبوع
- يم : إنتي شو عم تخبصي !! لونا انخطبت
إنتي وحدة كزابة أنا ليش لحتى صدقك !!
- سارة : أنا شو إلي مصلحة كزب عليك
روح اسأل عنها بحارتا ورح تتأكد إنو هيي بلبنان مو هون
إجاها عريس لبناني غني كتير وطلب إيدا من أهلا وراحت مع أخوها لتكمل الوراق والتجهيزات المطلوبة للعرس .. والسمان براس حارتن هو ساعدن بنقل الشناتي وفيك تسألو ..
يلا أنا اللي عليي عملتو عن إزنك
تيم ما حاول يصدقا لإنو كان يوثق بلونا وإنو مستحيل تحب غيرو أو تعمل فيه هيك شي
بس لحتى يقطع الشك باليقين راح لحارة لونا وتحديداً لعند السمان اللي براس حارتن
- تيم : مرحبا عمو
- السمان : أهلا عمو تفضل
- تيم : عمو أنا آسف ع الازعاج بس بدي اسألك عن بيت #عمار اليازجي ( هاد اسم أخوها للونا ) هو هون ساكن بالحارة ودلني مرة ع بيتو بس ضيعت فيك تدلني انت ؟
- إي تكرم عينك .. هي هيي البناية اللي مقابيلنا تالت طابق بس يا عمو إنت بدك ياه إلو بالزات ولا رايح لعند أهلو
- تيم : لأ أنا بدي شوفو هو
- السمان : لكن لا تعزب حالك يا ابني لإنو عمار من يومين راح ع لبنان وما رجع لسى
- تيم ( وهو متلبك ومصفر وشو ) : هو ليش سافر ومع مين راح ؟!
سأل هالسؤال وعم يدعي ما يسمع اسم لونا بالحديث
- السمان : والله يا ابني ما بعرف ليش راح بس بعرف إنو إختو لونا راحت معو وأخدوا كتير شناتي وأنا ساعدتن
- تيم : طيب شكراً عمو
حكا هالكلمات التلاتة بصوت يا دوب مسموع .. صوتو ماعاد طلع..
#يُتبع..

#لعبة_الحب_والإنتقام ( ج16)
@rwayate
-----------------------

حكا هالكلمات التلاتة بصوت يا دوب مسموع .. صوتو ماعاد طلع غص وحس بدو يختنق ع هالخبر

#لعبة_الحب_والإنتقام ( ج19)ماقبل الأخير
@rwayate
-----------------------

- الإم : قال بدن يخطبوكي لإبنن !
هلأ بغض النظر إزا رح نوافق ولا لا بس لازم تقومي تسلمي مو حلوة يلا أنا ناطرتك لا تطولي
قام بيخطر عبالا تبعت مسج لتيم وتعمل فيه متل ما عمل فيا وكتبتلو :

" ليك هالصدفة .. وأنا كمان اليوم رح انخطب وهلأ الخطابة عنا وفايتة اقعد معن .. حبيت خبرك أول حدا "
وقامت تلبس وفوراً بيوصلا مسج :
" إي لبسي وكوني حلوة متل العادة لإن خبرت إمي إنو العروس بتجنن "
تفاجئت لونا بهالمسج ما فهمت شي
مسكت موبايلا واتصلت فيه
- لونا : إنت شو قصدك بهالمسج
- تيم : هلأ مو وقت هالحكي قومي لبسي لإنك تأخرتي ع إمي اللي ناطرتك بالصالون وبعد ما تروح منحكي
لونا طار عقلا من الفرح وما صدقت شو عم تسمع وحست الدنيي مو واسعتا
معقول تيم عم يخطبا ! تيم بعدو بيحبا
صارت تنط متل الولاد وضحكتا ملا وشا ولبست بسرعة وكانت متلبكة بحالا حتى إنو كان لبسا مو متناسق كتير وخبصت بالألوان وشعرا منكوش شوي وفاتت دغري ع الصالون
إمها استغربت من الشكل اللي طالعة فيه وهيئتا بس رغم كلشي كانت طالعة مهضومة وبريئة وبتجنن وسلمت ع إم تيم وهيي عم تضحك ومبسوطة وما حدا فهمان سر هالفرحة
خلصت الزيارة ولونا راحت ركد لغرفتا ودقت ل تيم
- لونا : لك فهمني شو عم يصير
- تيم : ليش ما فهمتك إمي !!
طيب يا ستي أنا رح فهمك
أنا بدي ياكي وما بدي غيرك وبدك تقبلي غصب عنك وإلا رح إخطفك من قدام بيتك فهمتي ولي
- لونا : مممم وتالا
- تيم : لا تجيبيلي سيرتا
هلأ روحي اقنعي أهلك يرافقوا وبس شوفك رح نحكي ووضحلك كل المؤامرة اللي انحبكت ضدنا

- لونا : طيب ماشي ولو إنو ما فهمت كتير بس ماعاد يهمني شي هلأ بعد ما تأكدت إنك لساتك بتحبني
- تيم : وإنتي ؟ بتحبيني ؟؟
خجلت لونا وضحكت هالضحكة البريئة وتحججت إنو فاتت إما لتهرب من الجواب ونهوا المكالمة

#يُتبع ...

#لعبة_الحب_والإنتقام ( ج20 والاخير)
@rwayate
-----------------------

وبعد إسبوع تحدد يوم الخطبة بعد ما وافقوا أهل لونا وحبوه لتيم لإنو هو رجع السعادة لبنتن وعرفوا أدي بيحبا

وكان هاليوم يوم السعادة المنتظر عند تيم ولونا اللي حكوا وتفاهموا بكلشي وعرفوا إنن وقعوا بالمؤامرة اللي حبكوها جاد وتالا
واللي ما قدرت تغير القدر المرسوم أو توقف بطريق هالحب الكبير
بالعكس هنن شافوا إنو هالمؤامرة ساعدتن كتير ليكتشفوا أدي حبن لبعض كبير وما بيموت بسهولة وما فكروا إنن ينبشوا بالماضي أو إنو ينتقموا لإن ما كان عندن وقت إلا ليحبو بعض وبس

بيوم خطبتن كانت لونا طالعة بتجنن أحلا من كل البنات اللي مروا بحياة تيم
وتيم كان شخصية وبيجنن
كانوا لابقين لبعض بشكل ما بينوصف
لبسوا المحابس وبعدا وقفوا بالنص ليرقصوا وقبل الرقصة تطلعوا بعيون بعض وكانت هالعيون عم تحكي قصة الحب الكبير لكل اللي حواليهن ..

- تيم : يا الله أدي طالعة بتجنني
أحلا بنت بشوفا بحياتي وأحلا شي صار بحياتي
أنا ما بستاهل كل هالسعادة
ربنا عطاني أكتر ما بستاهل

- لونا : (خجلت وتلبكت ) بتعرف شو جاي ع بالي ؟

- تيم : شو يا عمري

- لونا : جاي عبالي روح خبر أهلي إنو هالحلو اللي قدامي هو نفسو اللي أكلت قتلة مرتبة بسببو بلكي بتدوق نفس القتلة
لسى طعمتا ما راحت يا دب وكلو منك

- تيم : يا عمري إنتي يا ريت كنت بدالك .. خلص بس نتزوج بدي خليكي تضربيني لتشبعي وتاخدي بتارك منيح هيك

- لونا : ههههه إي ماشي

- تيم : تؤبر قلبي هالضحكة

- لونا : تيم أوعدني ما بقى يفرقنا شي وتضل معي لنكبر ونختير سوا

بحكيلكن عن #لونا بطلة القصة
لونا بنوتة عمرا 16سنة بالصف الحادي عشر ..
شخصية لونا كانت شخصية قوية ومحبوبة من الكل وكانت زكية كتير
ومن ناحية الجمال كانت جذابة كتير فيها جاذب مو طبيعي بس يمكن بمقاييس الجمال كان في أكتر من وحدة من رفقاتا أحلا منها بس ماعندن هالجاذب الرهيب الموجود فيا واللي كان هو السبب بشعبيتا ومحبة الكل الها
ولهيك كان عندا أكتر من رفيقة بيغاروا منها وبيكرهوها لإن بيشوفوا حالن أحلا منها وما قدروا يكونوا متلا محبوبين هالقد ..

أما بطل قصتنا كان إسمو #تيم ..
تيم شب عمرو 24 .. كان حلو وكتار من البنات يتمنوا يحكي معن لإن كان من هاد النوع اللي عاطي جو من الغرور والتكبر وإنو ما بيلحق البنات
بس بالحقيقة هو ما كان يوفر أي بنت بتطلع بطريقو
كان يفوت بعلاقة مع بنت شهرين تلاتة وبعدا يمل ويتركا
ما كان عندو احساس بالمسؤولية وطبعاً ما كان حدا كاشف حقيقتو لأن سبق وقلتلكن إنو هو بيعمل حالو تقيل ووازن ومو فاضي لتطبيق البنات ..

وحدة من البنات اللي عرفن تيم اسما #تالا كانت الرفيقة المفضلة لـ لونا ومعا بنفس الصف
كانت ك جمال أحلا من لونا بشوي بس كانت طايشة وما عندا خبرة بالحياة ومغرورة بعض الأحيان
حبتو لتيم كتير وتعلقت فيه
وهي الوحيدة اللي طوَّل بعلاقتو معا لإن كانت تعمل شو ما بدو على قد ما حبتو وهو ما وفر هالفرصة .. بنت حلوة وصغيرة بيتسلى معا بيطلعوا مشاوير أهلا فري ما بيسألوها وين رايحة ووين جاية ..

تالا كانت تحكي كلشي بيصير معا لـ لونا وتاخد رأيا بكلشي
ولونا كانت زكية وعرفت تيم هو من أي نوع من الشباب وكانت عطول ضد علاقة تالا ب تيم وتنصحا تقطع علاقتا فيه لإنو واضح إنو خبيث و عم يتسلى

بس تالا ما كانت تسمع نصيحتا لإن كانت كل سعادتا مع تيم لأ وفوق هاد راحت تحكي هالحكي تبع لونا لتيم لتوصللو فكرة إنو لازم يهتم فيا أكتر ويعمل شي ليثبت للونا إنو صادق وما عم يتسلى بس هيي ما عرفت إنو بهالعملة اللي عملتا فتحت باب يا ريتو ما انفتح !!

#يُتبع ....
#لعبة_الحب_والإنتقام ( ج2 )
-----------------------
@rwayate
النظرة اللي كانت آخدتا لونا عن تيم واللي نقلتلو ياها تالا أثرت فيه وفاجئتو وخلتو يحط لونا براسو
لإنو ما تعود بنت تكشفو قبل ما يفوت معا بعلاقة وما تعود ينرفض من بنت
وقوة لونا خلتو يرسم ببالو خطط ليوصللا ويوقعا متل ما وقع غيرا

وكرمال يوصل لـ لونا اضطر يعلق تالا فيه أكتر وأكتر وصار يستغل ثقتا ومشاعرا تجاهو ليطلب منا شو ما بدو
صار يطلب منا تجيب معا لونا بمشاويرن بحجة إنو حابب يخليا تعرف أدي بيحب تالا وإنو نيتو صافية تجاها
لونا ما كانت تحب تطلع هيك طلعات بس كرمال تالا كانت تعمل هالشي
وهون بلشت تتحقق غايات تيم
وكان عم يلعب لعبتو بشطارة وعطى أحسن صورة عن حالو قدام لونا لدرجة إنها شوي شوي غيرت كل رأيا فيه وحست إنها ظلمتو بالفكرة اللي كانت آخدتا عنو وصارت تدعم تالا بهالعلاقة وتساعدا بكلشي بتقدر عليه ..

مرة بعد مرة صارت لونا رفيقة ل تيم وأخد رقما بعد ما أمن إنها وثقت فيه وصدقت إنو ما عم يتسلى ب تالا
وليكمل الدور صح بيوم عيد ميلاد تالا عمل حركة خبيثة ما بتخطر ع البال

اتصل قبل بيوم بلونا وقلا بكرا عيد ميلاد تالا وحابب حضرلا مفاجأة بتجنن وبدي منك تساعديني
لونا كتير انبسطت وتخيلت ادي رح تنبسط تالا بمفاجأة تيم
لبست لونا تيابا وتأنقت متل عادتا وطلعت لتشوف تيم ويحضروا المفاجأة سوا
طلعت معو بالسيارة وطبعاً كانت خايفة ومو مرتاحة لإنها أول مرة بتطلع مع تيم لحالا وخافت يصدفا أخوها وتصير مشكلة
(#هامش : لونا عندا بس أخ واحد كان أكبر من تيم بسنة وكان كتير متعصب وعقلو صعب وما كانت لونا تسترجي تحكيلو شي بيخصا )

وصلوا للمكان .. مطعم كتير حلو والمكان كان رايق والناس قليلة
قلا تيم : هاد هو المطعم اللي بدي أعمللا فيه المفاجأة
ولإني بعرفك مزوقة جبتك هلأ لنقعد ونتفق اي طاولة نحجز وكيف نزينا ووين نحط الفرقة الموسيقية
وطبعاً لونا قدام كل هالحكي ما كان فيا إلا توثق بزيادة وتمشي معو بدون تفكير ..
فاتوا لجوا وتفاجئت بالطاولة اللي قعدا عليها
كلا شموع وورد أحمر وكومة هدايا
سألتو باستغراب وبشي من القلق : شو هاد ؟!
جاوبا : هيك ناوي اعمل بكرا لـ تالا وخبرتن يجهزوا الطاولة اليوم لآخد رأيك فيا
راح القلق عن لونا وقعدت تتأمل بالمكان وكانت باينة الفرحة عليها وكإنو هالشي عم ينعمل إلها مو لـ تالا !!
بعد شوي تيم بيطالع من جيبتو علبة صغيرة فيا خاتم
وبيفتحا قدام لونا
- تيم : هاد بكرا بدي لبسوا لـ تالا واخطبا من أهلا لإن ماعاد فيي بدونا
بس في شغلة بدي تساعديني فيا

- لونا : تكرم عيونك قلي أنا جاهزة

- تيم...

#يتبع

#لعبة_الحب_والإنتقام ( ج3 )
-----------------------
@rwayate
- لونا : تكرم عيونك قلي أنا جاهزة

- تيم : أنا ما جربت الخاتم ع إيد تالا وما بعرف إزا بيزبط
بس بدي جربو ع إصبعك إنتي لإن إنتو التنتين إيديكن نفس الحجم

- لونا : بس هيك .. إي بسيطة فكرت شي طلب صعب

مدت لونا إيدا وراح تيم لبسا ياه

- تيم : واو طلع زابط معناها كل الأمور تمام

- لونا : إي وحلو كتير كمان عنجد إنك مزوق

- تيم : خليه بايدك هلأ وافتحيلي هالهدايا شوفيلي رح يعجبوها ل تالا
فتحتن والضحكة البريئة ملا وشا

- لونا : شو حلوييين
يا سلام دبدوب أحمر عنجد بيجنن

من برائتا ضمتو لا شعورياً وصارت تشمو وشافت بقية الهدايا

- لونا : كلشي حلو وتالا عنجد رح يطير عقلا بالمفاجأة
أنا كتير مبسوطة مشانكن الله يخليكن لبعض يا أحلا رفقات

- تيم : آمين الله يسمع منك .. بس أوعى تزلقي قدام تالا وتخبريا بشي ولا حتى تخبريا إني شفتك والأحسن بس تتصل لا تردي عليها لا اليوم ولا بكرا مشان تفكرك نسيانة

- لونا : إي أكيد .. معقول إنزع المفاجأة

(طبعاً كان من حظن إنو صدف عيد ميلاد تالا بعطلة نهاية الإسبوع )

شربوا عصير وحكوا شوي وبعدا جهزوا حالن ليرجعوا ع بيوتن

- تيم : موعدنا بكرا المسا عالساعة 7 ناح المدرسة لا تنسي

- لونا : إي أكيد .. بايو

#يُتبع ....
#لعبة_الحب_والإنتقام ( ج4)
-----------------------
@rwayate
وضلت لونا كل الوقت مبسوطة وعم تفكر بتاني يوم وشو رح تكون ردة فعل تالا ع المفاجأة

وبهالأثناء تالا اتصلت كتير ولونا ما كانت ترد لإنو هيك كان الاتفاق مع تيم

تيم كمان ما كان عم يرد ع مكالماتا وهالشي خلاها تقلق وتتدايق وفكرتن عنجد نسيانين عيد ميلادا

لونا اختارت تيابا وجهزتن وراحت درست شوي وبعدا غفيت من كتر التعب

تاني يوم الصبح بكير لونا بتفيق ع صوت الموبايل اللي ما كان يهدا ..
أوف هاد تيم شو بدو من الصبح !!

- لونا : ألو

- تيم : يسعدلي هالصباح يا حلوة

- لونا : صباح النور تيمو خير ليش عم تتصل بهالوقت شغلت بالي

- تيم : لأ ما تشغلي بالك إم اللول ما فيني شي بس حبيت فيقك لإن في كتير شغلات تعمليا اليوم بيكفي نوم هالقد

- لونا : شغلات شو ؟! مو مبارح حضرنا كلشي شو لسى في ؟

- تيم : إي مزبوط بس في كم شغلة بدن تعديل وعكل حال بدي منك هلأ تصحصحي وتقومي تغسلي وشك وبعدا تفتحي الفيس لإن بعتللك كم صورة ضروري تشوفين وتعطيني رأيك فين للحق أعمل متلن قبل ما يصير موعد الحفلة

- لونا : طيب ماشي أمري لالله رح قوم مع إني لسى نعسانة

- تيم : ماشي يا حلوة أنا عم استناكي بايو

- لونا : بايوو

قامت لونا وهيي متكاسلة وبعد ما صحصحت وعملت النسكافيه راحت فتحت الفيس ..

وهيي عم تشوف الصور بهالأثناء بيتصل تيم ..

- تيم : هلأ بين عندي إنك شفتين وما بدي منك هلأ تعطيني رأيك لإن ما رح يمشي الحال ع التلفون

ناطرك بعد ساعة قدام المدرسة لا تتأخري

لونا ما فهمت شي وما كان قداما إلا تروح تشوف تيم وتفهم منو

راحت لعند المدرسة ولقتو ناطرا وحامل بايدو باقة ورد حمرا
واول ما وصلت حطا بايدا وقلا هدول خلين معك لتعطين لـ تالا هلأ ..

#يُتبع ....

#لعبة_الحب_والإنتقام ( ج5)
----------
@rwayate
طبعاً هون كمان كان رفيق تيم من بعيد عم يصورن وأخد الصورة المطلوبة
وهيي صورة تيم عم يعطي الورد الأحمر لـ لونا
متل ما بعتو لياخد صور بالمطعم وهو ماسك ايدا وعم يلبسا الخاتم
وصورة وهيي عم تفتح الهدايا
وصورة وصورة ..
( طبعاً هدول هنن الصور اللي بعتلا ياهن ع الفيس وباعتلا : " هدول الصور اللي تصورناهن مبارح ياعمري .. عنجد كان يوم بيجنن " )
هي كانت خطة تيم ليوقع لونا
صار بايدو ممسك قوي عليها إنها عم تخون رفيقتا تالا
تيم بينادي لرفيقو ..
- تيم : شو حبيب مشي الحال ؟
رفيقو : إي طبعاً تفضل شوف
وراح رفيقو وتركن لحالن
- تيم ( بيورجي الصورة لـ لونا ) : شوفي ما أحلانا أنا وإنتي سوا وهالوردات
- لونا ( رمت الوردات بالأرض وهيي معصبة ) : تيم فهمني شو قصة هي الصور
- تيم : هدول الصور مفاجأة تالا اليوم
رح إهديا ياهن بعيد ميلادا
- لونا : لك شبك تيم اصحى ركز معي
إنت عم تمزح معي مو هيك ؟
- تيم : لا أبداً ما عم امزح
ما رح طول عليكي بالحديث مشان اتركلك مجال للمسا تفكري وتقرري كيف رح تكون الحفلة
- لونا : ما عم افهم عليك إنت شو بدك !!
- تيم : أنا مليت من تالا وللصراحة كنت من زمان بدي اتركا بس الشي اللي منعني اتركا هو انتي
كنت بدي طريقة لأوصللك وليكني وصلت
( هون لونا اصفر وشا وخافت كتير من تيم وما عاد طلع معا الحكي )
- تيم : لا تخافي طلبي منك مو صعب
كل اللي بدي ياه منك هو #قلبك
انصدمت لونا باللي عم تسمعو وفكرت حالا عم تحلم
- تيم : ليش متفاجأة كل هالقد مو إنتي كنتي متوقعة إني ما بحب تالا !
أنا من أول ما عرفتك وقبل ما أعرف رأيك فيني عجبتيني وحبيت اتقرب منك
ومن يوما وأنا فكر بالطريقة اللي احصل فيها ع قلبك وما كان قدامي إلا هالحل

#يُتبع ....#لعبة_الحب_والانتقام (6)
@rwayate
لونا: لك انت واحد ندل ووسخ
شو هاد الحكي اللي عم تحكيه !!
لك وتالا اللي بتعشقك وشايفة الدنيي بعيونك
كنت كل هالوقت عم تتسلى فيا يا حقير !!!
- تيم : تالا كانت بنت متلا متل كل هالبنات اللي عرفتن
ما كانت مميزة عنن بشي وكانت كتير غبية
وهيي اللي حبتني وتعلقت فيي بالأول مو أنا
- لونا : لك إنت شو عم تخبص !؟
هيي اليوم بتكون عم تحضر حالا ومبسوطة
إنت ما فيك ولا ذرة احساس إنت بلا قلب
- تيم : وشو ساوي إزا قلبي ما نبض إلا إلك
إنتي غير عن كل البنات اللي عرفتن وما عاد عبت عيني ولا بنت غيرك
- لونا : لك شو شايفني غبية هالقد لصدقك بعد كل اللي عرفتو هلأ !!
فعلاً إنك شخص مريض وبينشفق عليك
مفكر فيك تتسلى بكل البنات بهالبساطة !!
- تيم : أنا رح اعزرك هلأ واسمحلك تحكي شو ما بدك لإن بعرف الموقف مو سهل عليكي
وما رح اضغط عليكي رح اعطيكي كل وقتك لتتقبلي الفكرة
لونا : خراس يا حقير أنا هلأ رح افضح قصتك قدام تالا وخليا تعرفك ع حقيقتك
- تيم : بنصحك ما تتسرعي وتتفائلي كتير يا لونا
تالا بتحبني كتير ولما رح يوصلوا هالصور لإيدا لا تتوقعي منها إلا إنو تفضحك بين الكل ولا تستبعدي من جنانا تبعت الصور لأهلك
لهيك روقي واسمعي شو رح قلك ..

- تيم : أنا هلأ ما رح خبرا بشي وبوعدك الصور يبقوا معي وماحدا غيرك يشوفن
وبالنسبة لتالا أنا بعرف كيف إتركا بدون ما إجرحا
بس كل المطلوب منك تروحي وتفكري بالموضوع وتعطي فرصة لعلاقة بيناتنا
وبوعدك رح خليكي أسعد بنت بهالكون

أما إزا ما عملتي هالشي ف رح اترك تالا بطريقتي الخاصة
ورح تكون صورنا هيي المفاجأة اللي عم تستناها
والقرار عندك فكري من هون للمسا وقرري ..
#يُتبع ....

#لعبة_الحب_والإنتقام ( ج7)
-----------------------
@rwayate
طلع تيم بسيارتو وراح وترك لونا لحالا
اسودِّت الدنيي بعيونا وحست حالا بأضعف حالاتا
ما عرفت شو تعمل كانت مفكرة كل هاد حلم وما صدقت إنها وقعت بفخ تيم بهالسهولة

رجعت ع البيت وقعدت بتختا وضلت دموعا عم تنزل بدون ما توقف وصارت تحاكي حالا
يا ربي ساعدني أنا شو أعمل هلأ
تالا المسكينة شو حيصير فيا وهيي بتحبو كل هالحب
جرحا رح يكون كبير

كمان هيي مجنونة ممكن تصدقو وتفكرني عنجد خنتا وتروح تورجي الصور لأخي !!
يا ربي شو هالمصيبة اللي إجتني :-(

بس هو وعدني ازا بطاوعو بيلاقي طريقة يتركا بدون ما يجرحا
أنا لازم طاوعو مبدئياً
هو بكل الأحوال رح يتركا إن وافقت ولا رفضت بس جرحا رح يكون كبير كتير إزا شافت الصور ووقتا رح اخسر ثقتا

- كل هالحكي كان يجي لبال لونا
وبعد شوي بتمسك موبايلا ..

- لونا : ألو تيم

- تيم : أهلا بغاليتي

- لونا : أنا موافقة ع اللي بدك بس بدك تنفز وعدك وما تئزي مشاعر تالا

- تيم : لك تكرم عيونك يا عمري إنتي

- لونا : تيم لا تتمادى بالحكي لساتنا ما فتنا بهالعلاقة وأنا إلي شروط منتفاهم عليها بعد ما تخلص من قصة تالا

- تيم : خلص إنتي بتؤمري وهاد حقك
أنا وصلني كل حقي وقت وافقتي تعطيني فرصة وهي أحلا هدية

طبعاً لونا ما وافقت من قلبا
هيي كان ببالا شي ..
حطت ببالا إنو رح تربي تيم وتعطيه درس عمرو ما ينساه
وتاخد حقا وحق تالا ..

صحي ما حكيتلكن عن نوايا تيم هالمرة .. وليش عمل هيك مع لونا

هلأ هو بالبداية كانت نيتو إنو يعلقا فيه ويتسلى فيا ليورجيا إنو هو أزكى منها وإنو ما في ولا بنت بتقدر عليه
بس لما صارت رفيقتن وتعمق بشخصيتا أكتر هو عنجد صار يحس بشعور تاني عم يدفعو لتصرفو هاد بس ما كان يعرف شو هو !
طبعاً حتى لو كان هالدافع هو ( الحب ) ما كان تيم رح يعرف يفسرو لإنو ببساطة ما حب ولا مرة وبيشوف الحب شي تافه ومالو وجود !

المهم .. بعد ما وافقت لونا قرر عنجد هالمرة يتغير ويكون قد مسؤولية هالعلاقة لإنو شاف بلونا شي ما شافو بباقي البنات وما حب يخسرا هيي بالزات ..
يعني فينا نقول تطبق المثل اللي بيقول ( انقلب السحر ع الساحر ) !!

#يُتبع ..
#لعبة_الحب_والإنتقام ( ج8)
-----------------------
@rwayate
مرقوا اسبوعين ..
المسكينة تالا بعد ما تركا تيم انهارت ع الآخر وضلت مرضانة وما تجي ع المدرسة وأهلا ما كانوا يعرفوا السبب
ولونا كانت تحاول تروح لعندا تواسيا بس المسكينة هيي كمان كانت متدايقة ومهمومة بقصة تيم والإيام اللي بدا تجي وكان خوفا الأكبر يوصل خبر لتالا إنو لساتا ع تواصل مع تيم
ورغم كل زكاها لونا تراجعت بدراستا وماعادت هديك البنت المرحة بين رفقاتا والكل لاحظ عليها أدي متغيرة
بعد كم يوم بيتصل تيم ..
- تيم : ألو
- لونا : أهلين تيم
- تيم : لونا بدون أي مقدمات أنا عنجد شتقتلك من كل قلبي وماعاد إقدر لازم شوفك
هي تركتك هالفترة كلا تاخدي راحتك وتفكري ع مهلك وهلأ صار لازم نحكي

- لونا : وأنا كمان كتير شتقتلك

- تيم ( وهو متفاجئ ومبسوط ) : عنجد لونا !! من قلبك هالحكي *-*
- لونا : إي طبعاً من قلبي .. يلا أنا ساعة وبكون جاهزة وبلاقيك ناح المدرسة عالساعة4

- تيم : أوك أنا بانتظارك لوليتي *-*

لبست لونا أحلا تياب عندا وسرحت شعرا الطويل الناعم وطلعت بتجنن أحلا من أي وقت

وصلت لعند المدرسة ولقت تيم عم ينتظرا وحامل بايدو باقة ورد حلوة كتير
هو شافا من بعيد وضل صافن ومزهول فيا
أول مرة بيشوفا هيك بكل هالجمال والأناقة
من قبل كان متعود يشوفا بتياب المدرسة ورافعة شعرا وباينة طفلة

- لونا : مرحبا تيم
- تيم : لونا إنتي بتجنني بتشلي
أنا مو قادر شيل عيوني عنك لك وين كنتي مخبية كل هالجمال

- لونا : كنت مخبيتو للوقت المناسب .. هلأ خلينا نروح نقعد بشي مكان
- تيم : يلا يلا أنا بأمرك اختاري المكان لنروح
- لونا : خلينا نروح لهداك المطعم اللي اخدتني لعندو مرة
- تيم : تكرم عيونك الحلوة يلا
وصلوا للمكان وفاتوا وقعدوا ..
- لونا : كتير حلوين الوردات تسلم إيديك
- تيم : كنت مفكرن حلوين قبل ما شوفك
هون لونا خجلت وضلت ساكتة
- تيم : لونا أنا عنجد متفاجئ
أنا كنت متوقع لاقي هلأ لونا اللئيمة اللي جاية غصب عنا
فهميني شو اللي غيَّرك تجاهي هيك
- لونا : رح احكيلك كلشي وما رح خبي بقلبي
أنا صح كتير كرهتك وقت عملت معي هداك الفصل تبع الصور
بس أنا بصراحة من أول ما تقربت منك وصرت إطلع معك إنت وتالا وشوفك كيف عم تدللا وتعاملا تمنيت كون مكانا وزاد إعجابي فيك
بس كنت خبي بقلبي لإن مو معقول كبِّر هالاعجاب وإنت حبيب رفيقتي
ولما عملت قصة الصور تدايقت على تالا وفكرتك بدك تئزيها وتئزيني
بس...

#يتبع