#الحظ_الاسود_بقلم_هلاغرابلي#واقعيةالجزء الاول :
ام ريتاج : تمام ...بس خففيلا بنتي لون الحمرة طالع لونا فاقع كتير , خليا اهدى شوي
ريتاج: لا امي حلوة هيك خليا هيك
ام ريتاج : بنتي ما لابقة مع لون بشرتك ,و عاملتلك تمك متل المغارة و متل الضبعة يلي اكلا اولادا لك حمرا كتير
ريتاج : انا عاجبتني و هيك الموضة هلا
ام ريتاج : تصطفلي متل ما بدك , حبيبتي ايمت بتخلصيلا كرمال نحكي العريس يجي ياخدنا على الصالة
الكوافيرة : شي ربع ساعة بس لعلقلا الطرحة خالتي و حطلا اللمسات الاخيرة
ام ريتاج : يعطيكي العافية
الكوافيرة : الله يعافيكي
كنت عم اطلع على حالي بالمراية و مبسوطة كتير و عم خبي ضحكتي حتى ما حدا ما يقول عني عروس خفيفة مع انو كنت حافظة تعليمات امي حرف حرف كيف لازم اقعد على البرزة و ما اضحك او ما ارقص كتير مع انو كنت مقررة انو ما نفذ شي منن , الليلة عرسي و هي مرة بالعمر رح ضل ارقص و انبسط و ما رح اسال ابدا و يحكو الناس يلي بدن اياه عني
الكوافيرة : خلصت , تتهني حبيبتي الله يسعدك و يهنيكي
ريتاج : الله يسلمك
قربت على المراية اكتر لشوف حالي , ما كنت بشبه حالي ابدا بالمكياج و موديل الشعر , كنت متوترة و عم اتخيل ملامح وجهو لسامر كيف رح تكون بس يشوفني بالبدلة البيضا و اخيرا اجا اليوم المنتظر بعد خطبة سنتين
ام ريتاج :بنتي اتصلي بسامر يلا رح نتاخر على الصالة و المعازيم
ريتاج : يلا أمي
مسكت الموبايل و اتصلت فيه , رن و ما حدا رد
ريتاج : ما رد شكلو على الطريق او بعدو عم يزين السيارة
ام ريتاج : ارجعي اتصلي فيه مرة تانية , بدل ما يكون ناطرك برا نحن عم نركض و نتصل فيه
ريتاج : امي ما تبلشي هلا , هاي عم اتصل
ام ريتاج : هالجازة من اولتا ما عجبتني
ريتاج : امي انت ما بعجبك العجب , ما عم يرد
ام ريتاج : بس ما يكون رد على اهلو و غير رايو و هرب
ريتاج : اووووف بقا ,سامر بحبني و انا بحبو
ام ريتاج : أي هلا بحبك بس بكرا من حكي اهلو و الناس رح يصير يشوفك سودة اكتر ما انت سودة
ريتاج : انا ما سودا , انا سمرا مجذبة, رح اتصل باختو سحر , امي انت روحي قعدي و ارتاحي
ام ريتاج : ولله امك بحياتا ما رح ترتاح
ريتاج : الو كيفك سحر
سحر : اهلين ريتاج
ريتاج : عم اتصل بسامر وينو ؟
سحر: حطنا من شوي على باب الصالة و راح ليجيبك , لازم يكون وصل عندك
ريتاج : امم عم اتصل فيه ما عم يرد , ماشي معناها ما قادر يرد , هلا ما تقولي الا وصل يلا سلام بشوفكن
سحر : الله معك
قعدت على الكرسي انا و عم اضرب الموبايل بايدي و احكي مع حالي , معقول سامر غير رايو معقول ما عاد بدو اياني , مستحيل ينطر لهل اللحظة المحرجة و يقلي انت ما بتناسبيني و انا باخد احلى منك ,ا طلعت على الساعة كانت الساعة 8 و نص , بلشت هز برجلي و بلشت فرحتي تختفي شوي و يحل محلا توتر الانتظار و زودتا امي علي بكلماتا الجارحة و انا حابسة دمعتي , كنت رح انفجر لو ما رن موبايلي و كان المتصل سامر , كنت خايفة افتح الخط و يقلي انا ما جاي
ام ريتاج : ردي خلصينا , خلينا نعرف بدو يجي الا لا ؟
ريتاج : سامر وينك لهلا ؟
مجهول : الو حضرتك مرتو للشاب
ريتاج : مين معي !
مجهول : صاحب هيدا الموبايل عامل حادث سيارة و هلا هو بالمشفى
ريتاج : شووووو ......سامر...اي مشفى !!!
طلعت من عند الكوفيرة ببدلتي انا و امي و وقفنا تكسي و اطلعنا على المشفى , اتصلت باهلو و خبرتن ما فهمو علي لانو كنت عم ابكي, اخدت الموبايل مني امي و حكتن و فهمتن يلحقونا على المشفى , فتت على المشفى انا و عم ابكي و امي عم تسال عن سامر , كانت الناس بالمشفى عم تطلع فيني و مصدومة من شكلي عروس ببدلة بيضا بالمشفى بدل ما تكون بالصالة , خبرتنا الممرضة انو سامر بالطابق التاني بغرفة العمليات , اطلعنا لفوق و نطرنا برا بالممر بدون ما نعرف أي خبر عن سامر
ام ريتاج : فوتي غسلي وجهك , شوفي كيف صار منظرك بخوف , نزلت كحلتك
ريتاج : ييلعن منظري , يلعن كل شي , يلعن حظي ,اتركيني بحالي بقا
اجو بيت حمايي حماتي و بناتا الاتنين و اول ما شافتني حماتي بلشت بالصوت العالي
ام سامر: وجهك اسود علينا يا سودا , روحتيه للصبي يا منحوسة
ام ريتاج : شو دخلا بنتي , هيدا قضاء و قدر , ما انت على اساس حجة و بتخافي الله
ام سامر: نحن ما بدنا اياها لبنتك ام قدم اسود
ام ريتاج : ولا نحن بدنا ناسبكن بعد كل شي عملتوه بس ابنك طبع ببنتي و ما كان يتركا , مشي بنتي
ريتاج : خلص امي دخيل الله , ما وقت هالمشاكل
ام ريتاج : ريتاج عم قلك مشي على البيت , رح اتصل باخوكي يجي ياخدنا من هون
ريتاج : ما رح اتحرك من هون , هيدا يلي جوا بكون زوجي ...
طلع الدكتور من غرفة العمليات و ركضنا لعندو
ام سامر: دكتور طمنا
الدكتور: حضرتك امو ؟
ام سامر: أي انا امو
الدكتور: البقية بحياتك
الجزء التاني:
كان اسوا شي بحياتي بسمعو بس ما كان الاسوا على الاطلاق ,حطيت ايدي ع