الجزء الاول
#معادلة_شائكةللكاتبة روز سعد الدين
الى متى ستستمر هذه الحياة بالتلاعب في مصيري هكذا ……
قد طعنتني عشرات بل مئات المرات ، في كل مرة تستنزفني حتى تخور قواي………
ثم تتركينني اضمد جراحي وحيدةً و ما أن أقف على قدماي حتى تنسفينني من جديد ………
أرجوكِ، اسمحي لي بأن أعيش ولو لمرة واحدة ، لم أعد اقدر على تحمل المزيد……
خلصت كتابة مذكراتي متل دايما ،حطيت دفتري تحت مخدتي
و حاولت نام بس ما قدرت، كان الوجع عم يزيد ، عم حس بدوخة و وجع براسي و غباش بعيوني
و خبرتي الطبية اللي لا بأس بها كانت عم تقلي انو في شي غلط عم يصير و لازم شوف دكتور
خفت على البيبي يصيرلو شي
لبست تيابي و طلعت شوف ازا في شي صيدلية فاتحة لانو كان مستحيل لاقي دكتور بهالوقت
كل ما امشي شوي حس انو عم دوخ و اتعب اكتر ، و انو كان لازم رحت شوف دكتور من لمن حسيت بالوجع ، بس فكرتو عرضي و رح يروح ، شفت صيدلية فاتحة على الطرف اللي قبالي شحطت حالي لوصلت ، كنت عم الهت من التعب و كان مبين عليي انو رح اوقع من طولي
سيلين : مسا الخير
الصيدلي: مسا النور ، ارتاحي ارتاحي
سيلين : ساعدني دخيلك تعبانة كتير ، انا حامل ما بدي يصير شي للولد
الصيدلي: ما تخافي رح ساعدك ، ارفعي رجليكي على الكرسي
ايوا تمام
خليني قيس ضغطك يا مدام
سيلين : شو طلع معك
الصيدلي : ضغطك نازل كتير ، ما عم تاكلي منيح
ما بصير انتي حامل و لازم تهتمي بحالك مشان الولد
سلين : صدقني ما عم اقدر حط شي بتمي ، كلو بستفرغو ، حتى بتعب ازا بس بشم ريحة الاكل
الصيدلي : لكن اسمحيلي اعملك كاسة شاي حتى تستعيدي تركيزك
ولازم بكرا تروحي على دكتور يكشف عليكي اضمن مشان سلامة البيبي
و رح اكتبلك على مغذيات و مقويات
سيلين : اي بكون ممنونتك
الصيدلي : اشربي هالشاي لشوف
سيلين : عنجد شكراً الك عزبتك معي
الصيدلي : انتي ساكنة هون ، هاي اول مرة بشوفك
سيلين : اي نقلت من جديد على حارتكن
الصيدلي : اهلا و سهلا فيكي ، تفضلي هاي المقويات اللي قلتلك عنهن
سيلين : انا محرجة منك طلعت من البيت و نسيت جزداني من العجلة ما كنت مركزة
الصيدلي : ولا يهمك ، الناس لبعضا
سيلين : بكرا بمر عليك و بجبلك المصاري ، عن ازنك
الصيدلي: ازا بتحبي بوصلك للبيت
سيلين : لا ما بدي عزبك معي ، كتر خيرك
طلعت من الصيدلية و مشيت باتجاه بيتي ، كانت عتم كتير مافي غير صوات القطط و الكلاب بالشارع
فجأة سمعت صوت شخص عم يصرخ و بعدها طلع صوت متل المفرقعات و اللي عم يصرخ سكت
ما فكرت ابداً بهديك اللحظةو رحت ركض باتجاه الصوت
شفت شخص متمدد على الأرض و كان جنبو حدا لمن شافني جاية باتجاهن، تطلع فيني و هرب
ما كنت شايفة منيح من العتم بس وصلت لعندو لقيتو متصاوب بصدرو و عم ينزف
حاولت فيقو ما كان عم يرد
سيلين : عم تسمعني ، يا اخ ، ما كان عم يستجيب ،
تحسست نبضو كان عايش ، و صدرو عم يطلع و ينزل دليل انو لساتو عم يتنفس
شلحت جاكيتي اللي كنت لابستو و ضغطت في على مكان الجرح حتى وقف النزيف بكل قوتي
بس ما كان يوقف ، كان عم يخسر دم كتير ، صرت نادي حتى ازا مرق شخص يسمعني و يساعدني
كل شوي اتحسس نبضو ، كان عم يضعف شوي شوي
صرت اضغط على الجرح اكتر ، تعبت الجاكيت دم و لسا ما وقف النزيف
سيلين : في حداا هووون ، عم تسمعوني ، سااااعدوني بترجاكن
…… : شو في يا اختي
سيلين : بترجاك ساعدني دق للاسعاف رح يموت الزلمة
…… : اي فوراً
سيلين : فقد النبض لازمو انعاش للقلب
بترجاك تعال اضغط على مكان الجرح ،
بلشت اعطي ضربات للقلب بسرعة و ورا بعض ، و قيس نبضو كل شوي
…… : شو عم يصيرلو
سيلين : قلبو وقف ، ليش تأخر الاسعاف
…… : انتي دكتورة
سيلين : اي
هاد اللي كان الناقص كمان نفسو وقف
سكرت انفو للمتصاوب و اعطيتو تنفس صناعي بتمو
…… : استغفر الله
صرت شوي اعطيه نبضات و شوي اعطيه نفس صناعي و هداك عم يستغفر كأنو عم اعمل هيك لانو جاي عبالي اتباوس مع واحد عم يموت
سيلين : رجع النبض ، رجع الحمدلله
…… : الاسعاف صوتو عم يقرب بكون وصل
سيلين : اي ، روح اشرلن على مكانا و هات اضغط عنك
وصل الاسعاف لعنا
المسعف : شو صاير معو ، اسعد جيب النقالة
سيلين : متصاوب على الاغلب باطلاق ناري على الفقرة السابعة، نزف كتير و فقد نبضو و تنفسو لمدة تلت دقائق و رجعو
اسعد : مازن ساعدني حتى نحطو على النقالة
سيلين : على مهلكن شوي شوي
اسعد : واحد ، تنين
مازن: تلات
رفعو المتصاوب على النقالة و دخلو سيارة الاسعاف
اسعد : رح تجي معنا
سيلين : اي
طلعت سيارة الاسعاف على المشفى بأقصى سرعة
قدرنا نوقف النزيف بالاسعاف و كنا عم نراقب المؤشرات الحيوية طول الطريق
لمن وصلنا المشفى
استلمو المصاب الدكاترة اللي هنيك و فوتو للطوارئ
اسعد : يعطيكي العافية ، شو بتقربيلو للمتصاوب
سيلين : ما بقربو ، شفتو بالصدفة
شرطي: يعطيكن العافية
اسعد و سيلين : الله يعافيك
شرطي: حضرتك يلي كنتي مع المتصاوب يلي فات من شوي
سيلين : اي انا اللي اسعفتو
شرطي: فيني اخد من وقتك شوي
تطلعت بأسعد باستفهام
اسعد : ما تخافي ، اجراء روتي
