انا : كيفك ؟؟
هيه كانت عم تجاوب وماعم تتطلع فيني...
انا سكتت وتلبكت ماعاد اعرف احكي معها شي .. والأهالي قروا الفاتحه وحددوا الخطبه وكتب الكتاب بعد كم يوم ...
أنا كنت فرحان وارتحت نوعا ما .. ورحت يوم الخطبه وكتبنا كتابنا ... ولبستها الخاتم ..بس كانت طول الحفله وكأنها مانها مبسوطه ...
بعد ماراحوا الضيوف ... قعدنا ع البرنده لحالنا على المرجوحه ... كنا ساكتين اول شي وهيه عم تتجنب تطلع فيني ...
انا : كيفك سهى ؟؟ اشتقتلك ..
هيه ضلت ساكته ..
انا : سهى بيكفي،،، عطيني فرصتي لعوضك...انا جد بعتذر كنت طايش وعديم المسؤوليه ..انا بحبك جد ..وبكرا بتشوفي انك مارح تندمي معي ...
سهى : لاتفكر أني انا للي قبلت فيك ..انا انجبرت عليك ...
خطبتنا ضلت أسبوعين بس ..وانا عملتلا عرس بيجنن ..ودخلت اخر العرس ورقصت معها وواضح انها عم ترقص مجامله بس قدام الناس ..خلص العرس ورحنا ع بيتنا ...
وصرنا بالغرفه لحالنا ...تطلعت عليها لاقيتا قاعده بعيد عالزاويه وشكلا خايفه ..
قربت منها صارت تعيط وتبكي
سهى : بعد عني ...أوعى تقرب مني ها ..خليك بعيد ...
انا كتير زعلت عليها ...مسكينه .تعقدت مني ... انا تركتها ع راحتها ورحت انام بالصالون ... وكان تعاملنا مع بعض كتير رسمي ..ومضى اسبوع ونحنا هيك ..قدام الناس منمثل إننا مبسوطين وبالبيت ماحدا بيحكي مع حدا .....
جيت لعندها .. سهى لايمتا بدنا نضل هيك ..؟؟ مابيصير انا صرت جوزك ...
سهى : جوزي بالورق بس ..بس قلبي مافيو اي ذره حب الك ...
انا تأثرت بكلامها
انا : معليش بستاهل انا ...
فتحت الباب وطلعت .. وخلصت إجازتي ورجعت انزل عالشغل ... وصارت تشوفني كيف انا متغير وشخصيتي متغيره ... كنت روح الصبح عالقصر العدلي والمسا ع مكتب اخوتي...
وارجع عالبيت اتغدا ونام شوي وارجع انزل ... ومره كالعاده نايم بالليل بالصالون ..صرت اصرخ وانا نايم ..كانت الكوابيس راجعتلي...
قامت سهى خايفه عليي جابت مي وقربت مني وصارت تفيقني...
فقت وانا حاسس حالي مخنوق ...
سهى : بِسْم الله عليك ..شو فيك ..شبك .. ودقتني ع ضهري ... تشردقت بالمي للي شربتني ياها.. وكان نفسي سريع .
سهى : شو شايف بنومك !!!
تطلعت فيها وسكتت وماعرفت احكي شي ...
وتاني يوم فهمت سهى من امي أنو دايما عندي هالحاله وانو لازم يشوفني دكتور نفساني ..سهى عرفت انو هالشي بسبب للي عمله اخوها فيني ...
جيت بالليل عالبيت غيرت تيابي ..اخدت مخدتي وحرامي وجيت لأطلع من الغرفه ..
انا : سهى نحنا صرلنا شهرين متزوجين ووضعنا ع حالو ...
اذا مانك مرتاحه معي وبدك تتطلقي خبريني وانا جاهز للي بدك ياه ....اظن انا هلق بكون عملت كل شي عليي
شلت حالي وطلعت عالصالون