📚قصص||روايات||منوعة📚

rwayate

التفت وهو بيبتسم وبيهمس: من زمان ما التيقنا يا صاحبي
قعد باسل بقربو وهو بقلو: مشاغلي كتيرة
ضحك باستهزاء وهو بقلو: واضح ما صرت مدير
باسل: ليش عم تتمسخر شو من ولا شي صرت … انا تعبت لصرت هيك فوق ما تباركلي
مراد: باركتلك قبل الكل
باسل: قلتلك كمل دراستك ورح تصير أنت شريكي بدل جمال بس ماوافقت بقيت مع رفقاتك الزعران رجال البرنس
مراد: بتعرفني ما تبع دراسة وبعدين رفقاتي هدول يلي ساعدوني لما ماكان في حدا بقربي

باسل: بكفي مشان الله لكن تبع شقى وتعتير من طول عمرنا من شغلة لشغلة ما ضل شي ما اشتغلناه بس خلص هلق صار وقت الراحة … بتتذكر لما كنا ننام من كتر التعب بمغسل السيارات ولا توزيع اكل ديلفري ولا شطف الدراج بس انا خلص تعبت بدي ارتاح

مراد: أي ارتاح وأنا هيك مرتاح بيكفيني يلي عندي … بيت وسيارة وشغل عند ناس منيحة

باسل: أنت بتعرف مين عبود وشو بيشتغل
مراد: مابهم بس هو منيح معي
باسل: ايمات بدك تترك البنت
مراد: لحتى يقول الريس
باسل: ياريت بأقرب فرصة
التفت ليراقبو بحيرة وهو بيسألو: ليش؟
وقف باسل وهو بيهمس: لانها ملعّبة
مشي وبعد عنو بس مراد لحقو وهو بيسألو: شو عرفك
باسل: واضح هالشي من شكلا وطريقة كلاما
اتنهد براحة وهو بقول: أي اصلاً انا مافي شي بيني وبينها
باسل: وبعّد عن رفقاتك الزعران
مراد: رفقاتي مانن زعران
باسل: بيشتغلوا مع البرنس شو بدن يكونو !!
مراد: أصلاً من زمان تركتن لما صرت اشتغل معك وبعدين رجعنا التقينا قبل ما نشتغل عند البرنس والريس
باسل: ايه بعرف انا بعدتك عنن وهلق بدي ارجع احميك من الكل
مراد: شوفي خوفتني @rwayate
قرب وحط ايدو على ظهرو وهو بيهمس: دير بالك على حالك
مراد: هلق بدك تصير وصي عليي لانك أكبر مني
باسل: انت من طرفي وكنت بعرف اهلك منيح مابقدر اتركك هيك للزعران
مراد: بدك تخاف عليي شوف عضلاتي
ضربو على راسو وهو بقلو: لك ياغبي فكر بعقلك مابعضلاتك
مشيو سوا وهني بكملوا حديثهن وكل واحد طلع بسيارتو ورجعو لبيوتن

*****

📚قصص||روايات||منوعة📚

rwayate

بمكان بعيد عن البلد كانو عبود وناجي داخلين لمكتب البرنس الخاص ببيته السري
قرب منهن غسان وهو بشيل قطع القماش عن وجههن

غسان: اسفين بس متطريين ناخذ حذرنا

ناجي: تمام اتعودنا

قعدو قدام المكتب وورا المكتب كان صوت البرنس طالع من جهاز اسود صغير بس بغير صوتو الحقيقي كان حاطط برنامج ليغيرلو صوتو حتى ماحدا يعرفو

البرنس: أهلاً بالرجال

الريس عبود: اهلين فيك برنس أخر شحنة صارت بمكانها وهلق في شحنة جديدة وهالمرة أكبر من كل مرة

البرنس: وانا هاد يلي بجهزلو من زمان لازم نضرب ضربة كبيرة الضربات الصغيرة ماعادت تفيد الناس الكبيرة ماعاد تسكت عن يلي كان بصير قبل

ناجي: لاتاكل هم ونحنا عنا رجال متل الحديد

البرنس بتحذير: بس بدي تديرو بالكن سمعت انك يا ريس بلشت تخبص

اتنهد الريس وهو بقول: كيف عرفت

البرنس: أنا مابيخفى عليي شي

الريس عبود: غلطت وصلحت غلطي

البرنس: في شي يعني حتى بطلت تتزوجها !؟

الريس عبود: لا بس اجت المدام وماعرفت كيف اتصرف

ماقدر يحكيلو الحقيقة لان بيعرف انو كلن همهم المال والجاه ويمكن يلي قتل ممدوح هو البرنس لهيك لازم يحافظ على حياته وبيبقى ساكت

البرنس: بس بدي تديرو بالكن لنخلص من اجراءات هالشحنة برا عم يجهزوها مابدنا نفشل قدامهم وفي رزقة محرزة من وراها

الريس عبود: حاضر متل مابتريد

البرنس: هلق بيجي غسان وبيعطيكن تفاصيل الشحنة

بقيو قاعدين مع غسان لساعة وهني بيتفقوا … هيك بيشتغلوا من سنين مع شخص اسموا البرنس اجا غسان لعندن وعرض عليهن يشتغلوا سوا بالاستيراد وشوي شوي الاستيراد صار سلاح … وكل هالسنين ماكانو بيعرفو شكل البرنس الحقيقي أو حتى صوتو

وبراس كل يلي بيسمعوا عنوا بدور (ياترى مين البرنس !!!!)

نادا البرنس لغسان
التفت غسان لجهة البرنس وهو بقلو: اوامرك؟

البرنس: جبلي رقم البنت

*****

لما وصلت نرجس لمكتب جمال دخلت معصبة وهي بتقلو: شو بدك

جمال: بدك تهدي شوي

نرجس: رح اعمل يلي بدك اياه بس بدي اخلللص انا داقت خلاقي

جمال: لازم تحاولي تعلقي عبود فيكي من جديد لتوصلي لفرشتو وبالسر وتقتليه

نرجس: كيف وانا متزوجة هاد المعقد لك بحاسبني ع الخطوة … وبعدين الريس كتير عم يعاملني بسطيحة ما متل قبل تشوفو كيف عاملني اخر مرة والله خوفني

سألها بشك: شو قصد شاكك فيكي؟

نرجس برعب: والله لو شاكك فيي ماكان خلاني عايشة

جمال بترقب: انا رح شوف الوضع وانت حاولي اتقربي منو فهمانة هالموضوع بدي ينتهي عن قريب

طلعت نرجس من مكتب جمال وهي معصبة وكرهاني حالا والحياة يلي عايشتها حاولت تكتم غضبها وحزنها لوصلت للسيارة
شغلت سيارتها وهي بتصرخ: يالله كيف بدي اعمل هيييييك هاد جمال مجرم كبير ايمات بدي اخلص منو تعبت انا تعبت

ضربت السيارة قدامها وهي بتصرخ باعلى صوتها: تعبببببببت

وصلت لشط البحر نزلت قعدت وهي بتشرب كاسة شاي لتدفي حالها فجأة اجتها مكالمة
رفعت الجوال وهي بتشوف (رقم خاص) بلعت ريقها وهي بتفكر اذا بتفتح الخط او لا
بس قررت تفتح لتعرف مين
فتحت الخط وهي بتهمس: الو

اجاها صوت رجولي بقول: أنا من طرف البرنس وين أنت جاي أخدك تشوفيه
اتوترت وهي بتقول بقلق: بس كيف بدي روح لعند حدا مابعرفو
غسان: قلتلك من طرف البرنس ولا تعملي حالك مابتعرفيه
نرجس: بس أنا ما………
قطعلها جملتها وهو بقول: قوليلي وين لاجي احكي معك
عطتو العنوان وقلبها بدق وأول ماسكرت اتصلت بجمال
نرجس: جمال دقلي البرنس بدو يشوفني
بفرحة قال: عنجد معناها قطعنا شوط كبير
نرجس: انا خايفة شو بدو مني
جمال: روحي وشوفي
نرجس: يمكن يقتلني
جمال: مستحيل أنا متاكد انو بدو منك شي
نرجس: مابدي روح
جمال: خرسسسي بعد ما اجت الفرصة على اجريها بدك ترفسيها واخيرا بدك تدخلي على وكرو
نرجس: بس انااا
جمال: مابدك تاخدي حريتك
نرجس: أكيد
جمال: معناها بسرعة وصليني لكرسي البرنس

قبل ماترجع تحكي شي سكر الخط بقيت قاعدة عم ترجف لحتى اجا غسان كان خافي شوي من ملامحو وحاطط نظارات على عيونو
غسان: أتفضلي معي
نرجس: شو بدكن مني
غسان: شغل

مشيت برعب وطلعت معو بالسيارة قرب قماشة سودة وقلها: بدي اربطلك عيونك
برعب قالت: ليش !؟
غسان: هاي اصول الشغل

ربطلها القماشة ومشي بالسيارة وبعدين نزلها ومسكها من ايدها
سحبتها نرجس وهي بتقلو: انت شو عم تعمل ليش لتلمسني
غسان: بدي وصلك لعند البرنس
نرجس: شيل هاي عن عيوني
شد على ايدها بقوة وسحبها وهو بيهمس: ناقصني دلع نسوان

سمعت صوت باب انفتح وبعدها قرب شال القماشة عن عيونها وهو بقول: اقعدي

رمشت عدة رمشات لتوضح الرؤية شافت مكتب وكراسي وكمرة عم تصورها واضائة الغرفة كانت بلون احمر خافت بوجع الراس

قعدت وهي ميتة رعبة اجاها صوت مختلف بيهمس: اهلين معك البرنس شخصي

بلعت ريقها وهي بتقول بتوتر: اهلين ياباشا
كان طالع صوتو الغريب متل مابتسمع عنو من قبل من مكرفون على المكتب

البرنس: هالمرة الشغل رح يكون معي شخصي من دون مراسيل

📚قصص||روايات||منوعة📚

rwayate

رجفو ملامح وجهها و هي بتفكر بمصيرها النهائي رح تكون شغلا مهمات قتل !!
همست بقلة حيلة: إلي الشرف يابيك

البرنس: سمعت عن شغلك خصوصاً طريقة قتلك لممدوح

فتحت عيونها مصدومة: يعني أنت يلي طلبت نقتلو ما ج……

البرنس: جمال بياخد اوامرو من شخص عن طريقي بس طبعاً هالشي سر مابدي تخبريه أحسن ماتخسري حياتك

قلبها بلش يدق بقوة من رعبتها يعني شغلتها ما جمال وبس لا الشغلة اكبر من هيك الكل عم يستغلها لمصلحتو !!

البرنس: هالمرة الشغل نفس طريقة ممدوح في شخص ماعم يمشي معنا بدو فركة ادن

همست بقلة حيلة: بس بس انا ما بقتل

البرنس: بس يلي بعرفو انك متدربة على السلاح

نرجس بتحدي: أي بس مابقتل

البرنس: طيب انا رح تكون خطتي غير بدي تدخلي لمكتب شخص تخليه يدوب فيكي وبعدين تاخدي من خزنتو شي مهم

نرجس بنفس التحدي: وانا كمان مابعمل علاقات

البرنس: كيييف لكن شو بتشتغلي

نرجس: بس بجهزهن للقتل

نفخ وهو بقول: هاد شغلك نفذيه بدي تروحي لبيتو هو شب مانو متزوج … يمكن يكون فيه ويمكن لا اذا كان فيه حاولي تلهيه لتوصلي لخزنتو وتجيبي الاوراق المهمة واذا ماكان موجود لازم تدخلي وبعتقد بتعرفي كيف تفتحي القفل
@rwayate
نرجس: بعرف بس هالمرة الشغلة صعبة عليي كيف رح يوافق يدخلني

البرنس: بدك تفكري هاي خطتك

نرجس: انا خايفة هالمرة

البرنس بصوت عالي: بدك تسمعي الكلمة والاااا رح تشوفي شي ماشفتيه قبل … ولا تخافي رح يكون برصيدك مبلغ كبير بنهاية الشغل

اتنهدت وهي بتفكر بالمبلغ شقد رح يفيدها لما تترك جمال … وهي مهمة لا فيها قتل ولا حتى شي تاني مجرد عدة اوراق ويمكن تقدر تجيبهن بسهولة

نرجس: وايمات التنفيذ؟

البرنس: غسان بيحكي معك وبخبرك

نرجس: طيب ومراد ؟

قال غسان: انا بلهيه بس يطلع بكرا برا البيت طلعي أنت كمان

نرجس: ليش أنت بتعرفو

البرنس: هون الكل بيشتغل تحت أمري حتى عبود وناجي فهمانة

التفت لمكان الصوت وهي بتقول: أنت مين بالظبط

همس بصوت بيشبه الفحيح: انا البرنس

اتنهد وهي بتفكر بمصلحتها بتردد جاوبته: موافقة

📚قصص||روايات||منوعة📚

rwayate

📚قصص||روايات||منوعة📚

rwayate

#الجزء_الثامن (8):

#اللـيـلة_الحمـراء_بقلم_مروةآغا

بعدما اتفقوا على الخطة رجعت طلعت بنفس الطريقة لوصلها غسان لسيارتها نزلت وهي بترجع بترمش لتوضح الروية بعد القماشة السودة ولما ركبت بسيارتها فتحت الخط لتحكيلو لجمال كل القصة

جمال: كتيير منيح معناها وثق فيكي ماطلب منك شي تاني خاص فيه
نرجس: خاص شووو نسيت انو انا متزوجة
جمال: خرسي قال متزوجة اوعك تصدقي حالك … هلق ايمات المهمة؟
نرجس بلؤم: قال بعد بكرا بالليل
جمال: ماشي رح كون معك اي شي بدك حاكيني لساعدك

مشيت بالسيارة لترجع للبيت وهي بتفكر بمخطط البرنس يلي لازم يتنفذ قريباً
وصلت للبيت ومشيت باتجاه الدرج بس سمعت صوت نباح عدة كلاب متجمعة على حاوية الزبالة ويلي وترها اكتر لما سمعت صوت صريخ ولد قربت اكتر لتشوف الكلاب عم تقرب شوي شوي على الولد يلي حامل بايدو سندويشة واضح انو شافا مرمية بالزبالة

حاولت تبعدهن بجزدانها بس كانت كلاب شوارع شرسة
صرخت بالولد: ارمي السندويشة

رماها لبعيد صارو الكلاب يتقاتلو عليها وبعدين رجعو قربو من الولد فكرو عندو سندويشة تانية
مالقت حل الا انها تطلع ع البيت لتنادي مراد يساعدها

بكام خطوة كانت عند الباب بلشت تخبطو لان ما معا مفتاح
فتحلا مراد الباب وهو بقول بقلق: شبك شو صاير؟

نرجس: في كلاب تحت رح ياكلو الولد

اتخطاها ونزل بس هي شافت المسدس لسا موجود على الطاولة من دون شعور سحبتو ونزلت وراه
لقتو ماسك خشبة وبحاول يبعد الكلاب عن الولد وفي شوي من الجيران بتراقب الوضع وبتحاول تساعد

قدر بجهد جهيد يضرب اول كلبين بس كانو بقيانين 3 كلاب وواحد منن كان في فرو على كتافو واضح انو كبير العشيرة وقلبها بلش يخبط وهي بتشوفو بقرب من الولد بدو يعض ايديه لان ريحة الأكل لسا معلقة فيها

من دون شعور مسكت المسدس وصوبتو على الكلب الكبير وبقيت تتذكر كل شي اتعلمتوا عن التصويب لحتى ثبتت جسمها واستجمعت كل قوتها وضربتو رصاصة خلتو يوقع بالأرض ميت والكلاب الباقية هربت مرعوبة من الصوت

التفت وهو بشوفها لسا مصوبة المسدس قرب منها بكل عصبية وسحب المسدس منها وهو بيهمس: مجنوووونة كيف هيك بتعملي كنتي قتلتي الولد

نرجس: أنا متدربة منيح مستحيل اغلط
ركضت باتجاه الولد الخيفان وهي بتحاول تهديه ضمتو لصدرا وهي بتبكي معو وبتذكر مشاهد كتيرة وهي صغيرة خوفها ورعبها وجوعها … هالولد شو بيشبهها
حطت وجهها مقابل وجهو وهي بتهمس: وين أهلك

الولد: بالحارة ورا

نرجس: جوعان؟

هز راسو وهي مسكتو من ايدو واخدتو على أول محل شافتو … كان ببيع شاورما عملتلو عدة سندويشات وحطتلو بايدو مصاري وهي بتقلو روح كول انت واهلك واذا بدك مصاري ليك وين بيتي بهاي البناية تعال لعندي لاعطيك

هز راسو وقرب منها باسها من خدها وهرب لبيتو
رجعت على بيت مراد والضحكة مملية وجهها وعيونها غرقانة بالدموع لانها قدرت تساعد هالطفل وتزرع البسمة على وجهو بس كان واقف مراد بيتطلع عليها بنظرة بتقدح نار
نرجس: شبك معصب يعني اترك الولد يموت
مراد: بربي انك بلوة
نرجس: يلا روح افسد يا فسفوس
شد على كتفها وهو بيتطلع عليها بشراسة: أوعك تعيدي هالكلمة
هلق قرب شب وهو بقول للشرطي: هاي يلي قوست
حط مراد ايدو على راسو وهو بقول: ها اجت المصايب اخ يا راسي
قرب الشرطي وهو بقلو: وين المسدس
مراد: المسدس الي وهو مرخص
الشرطي: وين ترخيصو
مراد: فوق بالبيت هلق بجيبو
الشرطي بس بدنا نستضيف الانسة لان قوست بفرد ما الها
مسكها من ايدها وهو بقول: هاي مرتي مانها انسة

التفت لعندو وهالمرة ماعلقت ابدا انو اتحكم فيها وحكى عنها مابتعرف ليش فرحت لان في شخص بدافع عنها قدام الشرطة وبيعترف للناس كلها انها بتخصو
ركبت بسيارة الشرطة وعيونها عليه واخدوها للقسم وهو بسرعة جاب ترخيص المسدس ولحقها
بعد ساعة وهني عند الشرطة بين سين وجيم والاخد والرد بتلفون واحد من الريس عبود انتهت القصة وطلعوا بسلام

وقفو عند سيارتو وهو بيصرخ فيها وبنبهها بعد يلي عملتو بس هي تركتو وسكرت ادنيها وبلشت تركض لتبعد عنو … هاليوم كان مليئ بالتعب بالبداية مكتب عبود وبعدين شغلها والمسا مباراة الملاكمة وكلام جمال والبرنس يلي خلاها تطلع عن عقلها وتستخدم مسدس مانو الها … واخر الشي مارح تتحمل تنبيهات هاد يلي عامل حالو جوزها !!

كانت بتركض لتبعد عنو وهو ركب سيارتو وبلش يلحقها لحتى اختفت عن عيونو … بقي قريب الساعة بيدور عليها وهو بسب الساعة يلي عرفها والساعة يلي بعت فيها رسالة لمرتو لعبود ع اساس ليساعد هاي المجنونة بس هي صارت بلوة على كتافو ويارب يخلص منها قريبا

اتصل فيها قريب العشر مرات لحتى ردت وكان صوتها غريب وهي بتضحك
مراد بعصبية: وينك يابنت الكلب
ضحكت نرجس وهي بتهمس: اي والله أبي متل ما قلت انت
مراد: حاج تضحكي قوليلي وينك انت
سكتت شوي وهي بتهمس: مابعرف بس في مي كتيييرة
سكت مراد وهو بيسمع صوت الموج وعرف انها عند البحر

📚قصص||روايات||منوعة📚

rwayate

سكر الخط وهو بغير طريقو باتجاه البحر بس وين موجودة الله يعلم خط الكورنيش كتير طويل
وقف السيارة وبلش يدور على طول الخط … الساعة صارت قريب ال11 ومافي كتير ناس خصوصا مع بداية المدارس الناس ما بتطلع من بيتها وهلق مافي غير الشباب والسكرجية
اكتر من نص ساعة وهو بدور عليها واكتر من مرة قرر يرجع وتنباع بالعزا بس ما قدر كان براسو عم يزن كلام عبود (خلي عينك عليها) لحتى واخيرا لقاها قاعدة على كرسي خشب وحواليها شبين عم يضحكو سوا وواضح انهن سكرانين

الشياطين صارت تنطوط قدام عيونو وهو بشوفها بهالمنظر لما قرب اكتر شاف بايدها قنينة ازاز واضح انها مشروب
ضرب على راسو وهو بيلعنها … قرب من الشباب وبعدهن عنها وهو بيسحبها من ايدها
وقفو الشبين واعترضوه وهني بقولولو: هاي النا روح شوف وحدة غيرها

(لك شو الكن لك هاي مرتي مكتوبة على اسميييي) هيك كان بدو يصرخ بس ماحكا ولا حرف ضرب اول واحد كف والتاني بوكس رجعو وقف واحد وضمها من خصرها وشدها لعندو … هو شاف هالمنظر جحظت عيونو وهو بيهجم عليه وبيضربو بوكسين طالعلو الدم من تمو … سحبها من بين ايدهن غضب وهي شبه سكرانة ولما قاومت شالها من خصرها وحطها على ظهروا غصب عنها وهي بتضربو بايديها على ظهرو متل الولاد الصغار
ركض فيها لركبو بالسيارة وحطلا الحزام حتى ما تقدر تتحرك
نرجس: حل عني شو بدك مني

مسكلا وجها بعصبية وهو بيصرخ: نررررجس خرسسسي ولا حرررررف والا رح فرجيكي جنوني

ارتعبت من صوتو ركت راسها على كرسيها وهي بتتنفس بصعوبة وسعلتها ماعم توقف

ضرب كيدون السيارة وهو بقوب: هلق منين بدي جبلك بخاخ الربو ااااخ منك شو انك ولد

وطار بالسيارو لبيتو ليلحقها قبل ما تختنق … كمان عاندتو كتير لحتى كمان شالها ليطلعوا للبيت
لما سكر الباب اتنهد وهو بحطها على الارض واثنيناتن قعدو وهني بيلهتو تعبانين وهي لساها بتسعل
ركض ع غرفة النوم شاف البخاخ بقرب السرير
قرب منها وهو ببخلها حتى ترتاح بس هي صارت تلعي نفسها حاولت توقف وتبعد عنو بس ماقدرت وهي بتسعل

بلش ياخد نفس ويطالعو لحتى يرتاح وهو بيهمس: والله لو لعبان ساعتين حديد ما بتعب هالقد الله لا يوفقك هلكتيني شو الله جابرني اتحملك … لعمى على هالبلا بكرا اكيييد بدي اخلص منك يا افة الهم

هلق سعلتها زادت وهي بتحاول توقف وحسها بدها تستفرغ
صرخ فيها: لاااا حبابة والله بستفرغ وراكي

سحبها وحطلا راسها تحت حنفية المي وهي بتستفرغ وبتغسل وجها لحتى بلشت تصحصح تركها وطلع قعدت جوا البانيو بتيابها وهي بتحاول تتذكر شو صار قبل ما تدخل تحت الحنفية وبلشت تتذكر عدة مقتطفات بعدما ركضت وصلت لشط البحر من تعبها واحد قعد بقربها قلعتو … والتاني حاول يشربها عجبتها الفكرة بقولو انو المشروب بنسي خليها تنسى هاليوم المشؤوم … شربت معو شوي وياريتها ما شربت لانها ما متعودة فورا اخد المشروب مفعولو وسكرت

واخيرا صحصحت وخلص منها غسل بالمطبخ وبدل تيابو ورتب البيت وهو بحاول يعمل اكل الو
حس عليها فتحت باب الحمام ونادتو
قرب من باب المطبخ وهو بقول: شو بدك

نرجس: في جاكيت حمام بشنتي فوق التياب

اتنهد ودخل للغرفة فتحلا شنتايتها وهو خيفان متوتر … ولقى البرنص فوق الشي سحبو وسكر الشنتى وناولها اياه وهو بحاول ما يتطلع عليها
رجع للمطبخ وقرر يعملها معو اكل وحضر سندويشتين جبنة حلوم مع كاستين شاي وجابهن على الصالون

طلعت هي من الحمام واتوجهت للغرفة وسكرت الباب وقفلتو وراها لبست بجامتها واتمددت بالسرير وهي بتبكي بقوة (معقول لوين وصلتي يابنت تسكري ومع شباب وكأنك بنت ليل)
سمع صوت بكاها لعندو قرب من الباب وهو بقلها: عملتلك اكل تعالي كلي

نرجس: مابدي أكل حل عني

مراد: اي بلا عمرينك ما تاكلي

نرجس: اصلا كلكن متل بعض انتو الرجال كلكن غدارين بتشوفونا سلعة رخيصة

مراد: وانتو البنات كلكن هيك بتشوفونا رزمات مصاري بس شو اخدك لعندن لو ما كنتي قليلة ترباية

نرجس: مراااااد خراااااس

مراد: ولي نرجس والله بكسر الباب فوق راسك ولا حرف ماحاج فضحتينا ولا انت طول عمرك متعودة ع الفضيحة

خبطت الباب باجرها وهي بتقلو: أنت واحد مانك متربي

مراد: لك ياريتني ماشفتك بحياتي ولا تاكلي ان شاء الله بتموتي من الجوع

هلق زادت شهقاتا وهي بتقول: انا بنت شريفة بحياتو ماحدا لمسني والله انا منيحة بس مابعرف شو صرلي

حرقتلو قلبو يالله البكي نقطة ضعفو وبعدين هي قالتلو ما بتبكي ليش هيك هلق
بعد ورجع للصالون وهو بحاول يسد اذنيه عن صوتها يالله على طيبة قلبو الغبية فورا بينسى
رجع لعندها وهو بدق الباب وبقول: هلق ليش البكي وبعدين نحنا الرجال شو دخلنا أنت يلي رحتي لعند الشباب وهني فكروكي....

هلق فتحت الباب وواجهتو بوجهها المنفوخ: بكفي انا بحياتي ماعملت هيك شي غبي لك شو صرلي … انا والله ما هيك والله … وحتى ما بشرب وبستحقر البنات يلي هيك … اليوم كتير اتوترت وتعبت

📚قصص||روايات||منوعة📚

rwayate

وكأنها كانت بتبرللو رغم انو ما دخلو بس ما كان بدها ياخد هالصورة عنها
مراد: طيب ارتاحي
رجع للصالون جاب سندويشتها وكاسة الشاي وعطاها اياهن
دخلت للغرفة وحس عليها انو لسا المشروب في الو أثر بجسمها لانها تركت الباب مفتوح وهي كانت بتتمايل شوي لما قعدت على السرير وقعت بقرب التخت
ركض بسرعة وحط الاكل على الطاولة بقرب السرير وساعدها لتوقف وتقعد
رفعت عيونها لعندو وهني غرقانين بالدموع وهمست: انا تعبانة بدي ماما … بدي بابا

غمض عيونو بأسى وهو بقول: وانا كمان احيانا بشتاق لماما

نرجس بأسى: بس انا ما بعرف اهلي انت بتعرف اهلك

هلق رجعت تبكي اتمددت على السرير وهي بتكتم شهقاتا وبتهمس: والله أنا ماهيك ماني رخيصة لا تشوفني هيك والله

ليش عم تبررلو مابتعرف بس يلي بتعرفو انها هلق كانت وحدة تانية غير نرجس القديمة … نرجس ضعيفة بتكرهها وبتحاول دائما تخفيها عن الكل

قعد بقربها وهو بواسيها لتسكت بس هي صارت ترجف ومن دون شعور قربت منو وغرست راسها جوا صدرو

#بقلم_مروةآغا

بلع ريقو وبقي قاعد بثبات من دون ما يتحرك وهو بجرب هالشعود لأول مرة … انثى بكامل رقتها وحلاوتها قاعدة بحضنو وكمان هالانثى باصعب حالاتها عم تبكي ومنهارة وكأنها محتمية فيه
وحست بالسند والامان … بعمرها وحياتها ما حست فيه بكيت وبكيت لحتى تعبت ونامت

نبضات قلبو بين ضلوعو ماعم تهدا وهو براقب ملامح وجهها الرقيقة والناعمة … وجفونها المتعانقة مع بعض بسلام وكأنها بتطير فوق حلم جميل
مابيعرف أي عقاب رح يشوفو بنهاية حياة بدأت معو من جديد ام انه بس عم يحلم
شيطانه عم يوسوسلو وساوس فوق طاقته على التحمل لينغّص عليه سعادة بلش يتلمسها من بعد وقت طويل

كان فيه يتركها ويطلع بس هوي ببساطة ماكان بدو … في شي عم يجذبو وبحسسو برجولتو المسكّر عليها من سنين وخصوصاً بعد كلام عبود هالبنت تعبتر مرتو يعني اي شي بصير لا عيب ولاحرام
قرب ايديه من شعرها وهو بسرحو وبيلعب فيه وكل شوي يقربو من انفو ويشمو لحتى وصلت ايديه لخدها وصار يمسحلا عليه بهدوء ونعومة لوصل لشفايفها المفتوحة شوي من نومها وبقي بتأملها وهو بيمسح بنعومة على صفحة وجهها الصافية
بلع ريقو وهو بقرب شفايفو منها حاول انو يبوسها …بس فجأة شريط ذكرياتو معها رجع انعاد بذاكرتو وكل المواقف مرقت قدامو … بعّد وجهو عنها وكان بدو يسحب حالو ويطلع برا الغرفة بس للمرة الثانية عاند عقلو اتمدد بقربها وهي راسها على ايدو وبقي يمسح على شعرها لحتى غفي وهي بحضنوا ونام براحة على سريرو

*****

فتحت عيونها تاني يوم لتنصدم بشي صلب وقوي لأول مرة بتحس فيه … تحاول تفتح عيونها وتغمضن وهي خيفانة من الحقيقة المرة يلي بدا تتوضح
قدامها ((انها نامت بحضنو وراسها على كتفو …))
كيف !!
ووين !!
وشلون !!
ما عم تعرف ؟؟
حاولت تكتم شهقة خوف طلعت منها غصب عنها
بس الشعور يلي حاسة فيه هلق مابينوصف أبداً … دفا وأمان وسند هي عم تعيش مع هالرجال كل شي محرومة منو … لما هديت شوي راقبت ملامحو المستريخة بنعومة … لقت فرصة لتراقبه من دون خوف من دون ارادة رفعت ايدها وبلشت تتلمس ملامح وجهو الهادية لأول مرة بعكس الاعصار يلي بكون فيه كل مرة

بس عقلها الباطن وبخها وهي فوراً استجابتلو مستحيل تنسى مراد شو عمل فيها من لما عرفتو
بعدت عنو بسرعة خلتو يفيق اتململ بمكانو وهو بقلها: شو صاير

نرجس: شو صاير مااااا ؟ … لك شو جابك للغرفة

مراد: والله انك اكالة نكارة … بقيتي كل الليل تبكي على كتفي

نرجس: كيييف !؟ … انا بكيت وعلى كتفك انت الله ياخدك يانرجس على هالعمايل قوم طلاع لبرا قوم والله كأنك كذاب

لف مراد للجهة التانة وسحب الغطى لكل جسمو وهو بقول: حرام عليكي من زمان عم نام ع الكنبة خليني ارتاح شوي على تختي حاج كسرتيلي كتفي طول الليل

شفقت عليه صح هي كانت عبئ تركتو ليرتاح وقفت عند الباب وهي بتتأمله وجهو النايم بهدوء … جفونة المسكرة باسترخاء … خلاها تفكر انو مراد هالشب يلي بشوفو من بعيد بقول حياته سهله وكلها هدوء واسترخاء … بس هو كان العكس حياته كلها عبارة عن كتلة نار عم تشتعل من جواتو … وهو كان بحاجة لأي شخص يساعدو ويمنعو عن حرق نفسو بحياة مانها حياته … رجعت تتأمله وهالمرة عن قرب وجهو المحدد بعضلات قاسية … انفو الجميل والقاسي … شفايفه الدقيقة المفتوحة شوي وقت نومو دقنة المغرية المرسومة بعناية كان بيبهرها بجماله الطبيعي العربي والشرقي متل اول مرة شافتو وهي كل مرة بتكذّب هالشي براسها
مستحيل تقدر تنسى حضنوا ودفاه مستحيل تنسى الشعور يلي حستو لأول مرة بحياتها

طلعت لبرا واتجهت هالمرة للمطبخ كانت ميتة جوع
بحياتها كلها ما جاعت هالجوع لقت حالها بتفتح البراد وبتحضر اكل لياكلوه سوا … بس عقلها كان بتخطيط المهمة يلي اليوم لازم تنفذها منيح لتاخد مبلغ المال الكبير
همست بتصميم: خليها تكون المهمة قبل الاخيرة

📚قصص||روايات||منوعة📚

rwayate

لما طلعت رجع فتح عيونو وهو بحس بشعور بيجتاحه لأول مرة خصوصا بعدما حس عليها بتتأمله … دفا عم ينبع من داخلو … يالله شقد اشتاق لهالدفا والحنان … اشتاق كتير لهيك شعور اشتاق لحضن امو … من سنين ما نام بشكل جميل وعميق … مانام بهيك أمان رغم كل سيئات نرجس الا انو حس معها براحة

بعد ساعة مانام ولا غفيت عينو بقي يتقلب بفرشتو وهو بشم ريحتها … طلع برا الغرفة ومشي باتجاه المطبخ ليشم ريحة طيبة وقف عند الباب وهو بمشط شعرو بايدو
مراد: شو عم تعملي

نرجس: اسفة استخدمت مطبخك بس رح طعميك معي
@rwayate
مراد: كتر خيرك
رجع بعد ربع ساعة لابس تيابو ومغسل وممشط شعرو وهي كانت لساها ببجامتها عم تتحرك بالمطبخ رايحة وجاية عم تجهز الطبخة وتجلي وترتب
قعد على طاولة المطبخ وهو براقبها … يالله شو يلي عم يجذبو الها
(بس لأ هالشي غلط يامراد )
غمض عيونو وبعد وجهو عنها وهو بحاول يبعد هالأفكار هالبنت غريبة كتير كل شوي بعقل شكل
هلق حطتلو الأكل على الطاولة وهي بتهمس: اتفضل ان شاء الله يعجبك
@rwayate
مراد: هلق شكلو منيح لنشوف الطعم
حمل المعلقة وهو بيدوق أول لقمة … يالله شقد الو ما داق طبخ بيت ومن تحت ايدين مرأة … غير العدة مرات يلي عزمتو فيهن سعاد
كان يحاول يروح ياكل بمطاعم او هو يجرب يطبخ بس ابدا ما متل طبخ البيت

قعدت مقابيلو وبلشت بالأكل بشراهة
مراد: جوعانة

نرجس: امبارح ما أكلت أبدا

مراد: مع اني جهزتلك أكل

اتلبكت وهي بتقول: بعتذر عن امبارح تعبتك معي

مراد: لاااااا نرجس بتعذر غرريب ين راحت المبارايات والمرأة الحديدية

نرجس: بكفي لما بكون الحق عليي بعتذر ما متلك بتهرب

قرب منها وهو بقول بصدق: وانا بعتذر على أي كلمة صدرت مني اتجاهك … ان شاء الله وقت قصير ورح نفترق ومنبقى اصدقاء

نرجس: فينا نكون من هلق اصدقاء احسن ما نقضيها مشاكل جوا هالبيت لحتى اتركك

مدت ايدها وهي بتقول: موافق؟

مد ايدو ولمس ايدها الناعمة وفكر للحظة يقول (لا أنت مرتي وبتخصيني) شو حلو يكون عندك شخص بخصك وبس
غمض عيونو وهو بقول بتردد: موافق

من زمان سلمو على بعض كذا مرة بس هالمرة كانت غير … شرارة صغيرة شعلت بيناتهن الحاجة يلي هني بيدورو عليها لقوها قبل بليلة ببعض هي كانت الحنان والامان وهو كان الها السند والرجولة

رجعو سحبو ايدين بعض بعدما اتمعنو ملامح بعض اتلبكو اتنيناتن واتظاهروا بالأكل

همست نرجس: فيك شي

بلع ريقو وهو بقول: لا أبدا
سألها مراد: هلق وين أهلك

رفعت كتافها بحيرة وهي بتهمس: مابعرف وعيت على حالي بهالدنيا وانا عايشة بميتم صغير جوا غرفة فيها شي 10 تخوت وبنات من عمري تقريبا كل يوم كان عنا روتين محدد دراسة وأكل ولعب ونوم وكالعادة شوية اهمال مع شوية ضرب يعني عشنا كام سنة صعبة… كنت محاطة بقواعد وقوانين مافيني اتخلى عنن لحد ما اجت مديرة جديدة للميتم وهالمديرة كانت خسرانة بنتها وكل شي معها مصاري… وبنتها كانت بتشبهني او صرت ذكرها ببنتها فصارت تهتم فيي زيادة

مراد: مين هي؟

نرجس: مديرة الميتم كتير كانت حنونة تعتني فيي وحتى صارت تهتم بكل البنات بعدما خسرت بنتها بس انا بتقلي بشبه بنتها لما كانت صغيرة … وانا اصلا كان جمال كافلني بالميتم وبيدفع كل التكاليف وقسم كبير بالميتم بدللني

مراد: منيح حظك حلو بهالحياة في مين اهتم فيكي … هلق انت ليش مسجلة على اسم جمال وزوجتو بما انك ما بنتن

نرجس: جمال حب يساعدني وكأنه اتبناني عطاني اسمو وساعدني لكملت جامعتي وبلشت شغل

مراد: عنجد انو انسان منيح كتير بس بصراحة بحسوا كتير بيتحكم فيكي

بقلبها همست (كتيير منيح لدرجة مكرهني حياتي)
بس بتردد قالت: هو بشوف حالو مسؤول عني فبيخترلي أفضل الحلول

مراد: وافضل الحلول انك تتزوجي عبود؟؟

خبت توترها عنو وهي بتقلو: جمال الو فضل كبير عليي وانا لازم ساعدو

مراد: بس هو هيك عم يستغلك وانت ما لازم تسمحيلوا ابداً

نرجس: اي صح بس انا عنجد تعبت من الدين يلي فوق كتافي … وكرمال هالدين عم ارتكب أخطاء كبيرة

مراد: بالعكس لازم ترتكبي اخطاء

باستغراب سألتو: نعم !؟

مراد: طبعاً لان بارتكابك للأخطاء رح تكبري وتتعلمي لانو رح يجي يوم وتعرفي انو نحنا البشر يلي منسميه خبرة هو عبارة عن مجموعة الأخطاء يلي عملناها طول حياتنا

نرجس: بيعجبني تفكيرك

مغمزها وهو بقول: اي وهاي من الخبرة

ضحكت نرجس وهي بتهمس: قصدك الاغلاط !!

ابتسملا لا اراديا بسمة طلعت من جوا قلبو بعكس ملامحو الباردة يلي بتكتسي وجهو دايماً

نرجس: طيب أنت هلق احكيلي وين أهلك

حرك اكلو بالمعقلة بشرود ومن بعدها همس: صح انت ربيتي بميتم بس أنا ربيت بالشوارع كل مرة مع شلة شباب جديدة … كنت شب باول عمري همي الطيش والشباب وماكنت عم شوف امي يلي كانت عم تدبل قدام عيوني شوي شوي بسبب وحدة وسخة

نرجس: كيف يعني

مراد: ماما كان الها اخ وحيد ماعندا غيرو وجدو تركلن ورثة منيحة وخالي ما جاب الا بنت وحدة … بعدين خالي مات بعمر صغير بسبب مرض اجت مرة خالي حطت عينها على ابي لان الورثة ما كفتها على مصاريفها

📚قصص||روايات||منوعة📚

rwayate

اتحمست نرجس وهي بتقول: اي وابوك شو عمل

مراد: شو بدو يعمل يعني وقع بشباكها للحية

نرجس: شفت كيف الرجال كلن تفكيرهن هيك

مراد: بالعكس النسوان كلن وسخين

نرجس: أي حاجتك عاد

مراد: هاي الحقيقية

نفخت وهي بتقلو: كمل كمل هلق والله اتشوقت اعرف شو صار بعدين

مراد: بطلت احكي

نرجس: لا ولووووو

مراد: بس ما بتحكي ولا حرف ولا بتتمسخري

نرجس: له الله يسامحك ماحكيت شي
حطت ايدها على تمها وهي بتهمس: وهاي سكرت تمي

وقف والتفت لجهة الشباك وهو بكمل حديثه: ماما وبابا كانو القدوة عندي بسبب الحب يلي بيناتن كنت عايش حياة كاملة بيت كبير وحلو ومحل سوبرماكت كبير بهداك الوقت ماكان في حدا عندو متلو … عندي اخت اصغر مني

ابتسمت وهي بتتذكر اللوحة يلي شافتها فوق خزانتو وفيها عيلتو وبلشت تربط الاحداث بالشخصيات

ضحك وهو بكمل بدموع محبوسة: اختي الحنونة كانت دائما ساكتة وماتحكي ابدا كتير حبابة وهادية … بس لما مات خالي ودخلت مرة خالي لحياتنا كل شي انقلب واتحول لكابوس … المصاري يلي تركهن خالي خلصو وصارت تلفي على ابي لحتى اتزوجها وكتبلها السوبرماركت كلها وحتى اشترالها سيارة … ونحنا بقينا بالبيت وماما ماكانت تحاول تخلينا نعرف حافظت ع البيت متل ما هوي ونحنا كنا لسا صغار وعم ندرس … وما كنت عم شوف امي كيف عم تدبل ليل نهار قدام عيوني … بالبداية كنت شوفها تبكي بغياب بابا وكنت قول هاي كتير بتتدلل متل كل النسوان بيبكو على كل شي بس ماكنت عرفان انها بوقتها عم تبكي على ابي لان نايم عند وحدة تانية

وقفت نرجس وقربت منو وهي بتقول: ياعمرييي اكيد امك كانت بتحب ابوك كتير لحتى زعلت هيك

📚قصص||روايات||منوعة📚

rwayate

مراد: هيك الهيئة وبعدين انا كنت عم اكبر وعم صير بسن المراهقة وكنت بشتغل مع شلة شباب شغل مقطوع

نرجس: شو قصدك شغل مقطوع؟

مراد: شغل مادخلك فيه
كاتت بدها تردلو بس هو كمل: وأبي ماعاد شفناه امي صارت تشتغل وتشقى وتتعب لحتى تعيشنا احسن عيشة لحد ما مرض واجت مرة خالي بسيارتها حطتو عنا انا قلعتا وقلعتو كمان بس امي رفضت وبقيت تعتني فيه لحد ما مات … وانا بهالوقت كنت صايع من مكان لمكان ومن رفيق لرفيق وبيوم رجعت ع البيت بنص الليل لقيت اهل الحارة متجمعين عند باب بيتنا … ركضت بكل سرعتي من خوفي عليهن وشفت هديك الشوفة … امي واختي محروق البيت فيهن

نزل راسو ونزلو وهو بيعصر عيونو وبكمل: انا تركتن يحترقو ويموتو

ماقاومت دموعو الحزينة أبداً قربت منو وحضنتو وهي بتهديه: انت مادخلك هاد قضاء وقدر

ركا راسو على راسها وهو بقول: لا كان في شرايط كهربا عند باب البيت بدها تظبيط وانا دائما اجل الشغل وامي مريضة واختي بتعتني فيها وبدراستها وانا ماكنت اعرف شو عم يصير جوا هالبيت لحد ما راحو من بين ايديي

هلق ضمتو اكتر وبلشت تطبطب على ظهرو بحنان وهي بتهديه: انا اسفة خليتك تتذكر هيك ايام عنجد انا اسفة

رفع راسو واتأملو ملامح بعض بهدوء كانو حابسين تنفسهم وهني بحسو بضربات قلبن العالية بس للحظة رجعو للواقع … اتنفض وبعد عنها وهي كمان بعدت عنو
وقفو مقابل بعض وهني بيتطلعو ببعض بحيرة
طلع مراد برا المطبخ وهو بقول: بما انو اليوم عطلة انا بدي روح مشوار تروحي معي

نرجس: اي بروح بس لوين

مراد: لبيت اهلي

ابتسمت وهي بتهزلو راسها رتبت المطبخ وطلعت بدلت تيابها وهو ناطرها بالسيارة
نزلت قعدت بقربو كان قاعد ومشغل اغاني هادية
شغل السيارة وطار فيها وهو بقوي صوت الاغنية
(وبحبك وحشتي … بحبك وانت نور عيني…
دا وانت مطلعه عيني … بحبك موت…
لفيت قد ايه لفيت … مالقيت غير فحضنك بيت…
وبقول لك انا حنيت … بعلو الصوت…
وكأن الوقت فبعدك واقف مابيمشيش…
وكانك كنتي معاي بعدتي ومابعدتيش…
فى دمى حبيبتى وامى وزى ماكون … ببتدى اعيش)

التفتت عليه شافتو بدندن مع الغناية وبحرك راسو بهدوء كان هادي جدا ورايق بعكس الايام الماضية كان جدا عصبي

فاجأها لما التفت لعندها ومسكها بالجرم المشهود بتطلع عليه
مراد: ليش مستغربة كل هالقد … انا انسان وعندي مشاعر

رمشت بعيونها وبعدت وجهها لجهة الشباك وهي بتقول: اي معك حق وانا ما متفاجأة بس عم اكتشف جانب تاني فيك

بقيت كل الطريق تحاول تبعد نظرها عنو احسن ما يرجع يكمشها بتبصبص عليه … وهلق رجعت تفكر بمهمة بكرا يلي لازم تخططلها بكل دقة

سألها: شبك شاردة بشو عم تفكري

من دون ماتفرجيه ترددها همست: مافي شي

وصلو لحارة شعبية قديمة صف سيارتو على جنب ومشي معها شوي شوي رغم انو الناس بلشت تحكي عنو وتهمس عليه بس هو ما اهتم كملو طريقن لوصلو للبيت
وبالفعل كان البيت محروق
مراد: من يوم الحادثة ماقعدت فيه سكرتو وبجي بشوفو كل ما اشتقت لاهلي

دخلو سوا جوا بيت كلو محروق
مراد: يمكن كل شي محروق ومافيه معالم بس لسا في شوية اثار لاهلي … شوية لبس وشوية ذكريات

اتفتلو شوي جوا البيت وهو بيحكيلها على ذكرياته وايامه
وبعد ساعة طلعو وهني بيضحكو على موقف كان بيعملوا وهو صغير
لما قفل الباب وقفو رجال كبير عند باب البيت وهو بقول: اهلين يا ابني كيفك

سلم عليه مراد وهو بيضحك: والله مشتقلك ياعمي

_ ماعرفتنا مين هالصبية

التفت لعندها وقف لثواني وهو بفكر شو يحكي وهي كانت واقفة بنفس الطريقة بتحاول تلاقي جواب
بس هو حكى قبلها وقلو: هاي مرتي

ضحك الرجال وهو بهنيه وبباركلو وقربو عليه اهالي الحي وباركولن وهني واقفين بيناتن متل الصنم بيتطلعو على بعض بملامح جامدة … بس جواهن كان في رضا

بعد نص ساعة طلعو من الحارة وركبو بالسيارة
مراد: انا اسف لان حطيتك بهالموقف

نرجس: ليش ماهاي الحقيقة نحنا نعتبر متزوجين على ورق ولازم الناس تعرف لبين ما ننفصل

مراد: عندك حق على ورق
بلع ريقو ووهو بيسألها: تروحي نتغدا

نرجس: اي بروح

مراد: تاكلي سمك ؟؟

نرجس: اي طيب السمك

طلعو باتجاه شط البحر اتغدو سمك وشربو شاي وبقيو قاعدين مع بعض لحتى عتمت الدنيا وهني بعيشو مع بعض لحظات مارح ينسوها طول عمرهم

*****

قعد باسل بسيارة جمال وهو بقلو: لك هدول نرجس ومراد كل نهارهن مع بعض

جمال: شو عم تقول؟

باسل: اي هلق حكاني رفيقي من الحارة يلي كنت بسكن فيها وخبرني انو مراد جاب مرتو لبيتو القديم وعرفها على اهل الحارة

جمال: لاااا اكيد البنت جنت شو مفكرة حالا بتعمل انا بفرجيها

باسل: لازم نكرههن ببعض

جمال: كيف !!

باسل: انا عندي حل تعال لاحكيلك بشو فكرت
قرب منو وهو بيهمسلو بكلمات مفيدة وجمال بحركلو راسو بتفهم

*****

وصلو للبيت بعد مشوار طويل دخل مراد قبلها وفتحلها الباب وهو بيعطيها مفتاح: هاد مفتاح البيت نسختلك واحد

قربت منو وسحبتو وهي بتهمس: شكراً