#بقلم_فيلوفوبيا
#الجزء_الاول
اذا حبيت احكي قصتي
مابعرف كيف بلش....ولابعرف كيف انهي
مابعرف الحق مع مين ولا على مين و لا بعرف الصح من الغلط
بعرف اني حبيت و انحبيت
بأكبر قدر من المشاعر ممكن انسان يعيشه
دائما....و انت بنص الحدث مابتكون واعي لحالك
بس هلأ....من بعد ما انطفت النار
اكتشفت ان هاد الحب....هو الدافع و المحرك لكل شي
حلو و مر بحياتي سوا
سكر حبك يا حبيبي مر!!!!
_قبل فترة_
وائل:جايبلك قطعة بتاخد العقل.....رح تاكل منك شقفة بس تلبسيلي ياها انا متأكد
شغف:(ابتسامة دافية)يسلمو ايديك حبيبي
وائل:لك انا كم شغف عندي(قرص خدودي ب حب)
هي وحدة....وححححدة!!
شغف:يخليلي ياك
وائل:و شو عملتي هاتي خبريني
شغف:متل العادة...مافي جديد
وائل:قصدك كل النهار بالمرسم
شغف:ما انا ماعندي شي تاني اعملو
وائل:طيب...انا طلبتلنا غدا....رح فوت دوش و بدل بينما يوصل
شغف:تمام
_من بعد الغدا و القهوة قرب يجي الليل....وانا بحب الليل...بحب السكون....و بحب الوحدة المفروضة عليي
كنت عم اشرب نسكافيه و عم احضر تلفزيون...اجا وائل قعد جنبي و حط راسو على حضني_
وائل:لعبيلي بشعري
شغف:(ابتسمت)ما بتبطل!!
وائل:وليش لبطل؟!...ماحدا صاححلو الي صاححلي و بدك ياني اتكبر؟
شغف:مزبوط والله
وائل:بحبك كتير على فكرة
شغف:بعرف على فكرة
_رفع ايدو و مسح على خدي....عيونو بحسهن عم يشعشعو حب...بعرف انو بيحبني كتير...اكتر ما انا بحبو بكتير حتى...بس الحب وحدو بعمرو ماكان يكفي_
وائل:شردتي كأنك
شغف:لا معك
وائل:قومي بدلي تيابك و البسي الي جبتلك ياها
شغف:هلأ بقوم معلش!
وائل:معلش....بتعرفي شو
شغف:شو؟
وائل:وقت بجي لهون و بقعد معك....بتمنى الدنيا توقف
والزمن....بتمنى ينسوني كل الناس...و ابقى معك لاخر الدهر
شغف:معقول اديشك رومنسي وائل!
وائل:انا بشك انو في رجل بيحب زوجتو متل ما انا بحبك
شغف:و انا كمان...كتير بحبك
وائل:مو قدي ابدا!!
_بلش يقربني منو....صرلي 4 سنين متزوجتو....كل مرة بيقرب مني بتخيل نفس المشهد...بتخيل نفس الموقف
بتمنى عنجد اني عيش رجفة القلب....بتمنى لو اني اشتقلو....بتمنى حس بهديك الكهربا!!!_
_صباح اليوم التالي_
وائل:حبيبتي انا ماشي بتوصيني شي
شغف:لا سلامة قلبك
وائل:رح اشتقلك كتير(باسني من خدي)
شغف:اي كلو يوم الي رح تغيبو
وائل:لو كان......بهاليوم مابتعرفي اديش بشتقلك
شغف(ابتسمت)يخليلي ياك
وائل:يلا بخاطرك....تركتلك مصاري جوا جيبي الي بدك ياه....سلام
شغف:مع السلامة
_رجعت لغرفتي و تمددت بالسرير....يلي بياخد نظرة خارجية لحياتي بيشوف اديش انا سعيدة(ظاهريا)
بس فعليا انا عم ادعي السعادة....عم ادعي اني عايشة
انا مدفونة بالحياة مو اكتر
هو ك زوج....مفكر انه عاطيني الحياة المثالية
ومابيعرف انه اخد مني كتير شغلات.....بس خلص
انو وصلت لمرحلة التخدير....مرحلة اني مابقا حس بالوجع
صارت الساعة 9...ومع تكة الساعة كان عم يندق الباب_
ريتا:صباحو
شغف:صباحك....فوتي
ريتا:راح الافندي
شغف:راح
ريتا:الله لا يردو
شغف:لاتحكي هيك ريتا حرام
ريتا:هلأ رح تعملي حالك بتحبيه يعني؟
شغف:لو كان....بيضل زوجي
ريتا:اي قلتيلي.....ملا زوج والله
شغف:فوتي حاج تحكي....رح اعمل نسكافيه
ريتا:رح فوت عالرسم شوي
_ريتا....صديقتي الوحيدة...جارتي من اول ماتزوجت
يعني من 4 سنين هي الوحيدة الي بتخفف عني و بتسليني وبشاركها همومي...وبالمقابل بتشاركني همومها_
شغف:ريتا!!!تعالي نطلع عالبلكون
ريتا:والله احسن منتنفس هوا نضيف
شغف:تفضلي
ريتا:شكرا.....كأنو خلصو البورتريهات الي طلبتهن منك
شغف:اي كلهن خالصين..فيكي تاخديهن تسلميهن للزباين
ريتا:و بجبلك المصاري كمان....مابتعرفي اديش الزباين عم يحبو شغلك
شغف:هههه و انا بحب شغلي....يمكن هو الشغلة الوحيدة الي بحبا بحياتي
ريتا:الله يسامحك....وانا وين رحت!
شغف:بعدك يعني
ريتا:رح حطلك المصاري بالبنك ماشي...رح ضيفهن على حسابك
شغف:تمام
ريتا:مبارح تففدت الحساب....صار معك مبلغ محترم بيفتحلك احسن مشروع و من ورا شو....من ورا الرسم
شفتي رفيقتك شو عقلها كبير...لو ما خليتك تعملي الرسم بزنس و تجيبي منو مصاري ماكنتي وصلتي لهون
شغف:طبعا انا مابسوا شي لولاكي
ريتا:صار فيكي ايمتا ماحبيتي تطلقي منو للافندي
شغف:بتعرفي انو ماعم يقبل
ريتا:بسيطة....بشفلك من معارفي محامي شاطر و محترم...بترفعي عليه دعوة مخالعة....انتي عالحالتين مابقا بحاجة مهرك منو...بدي ياكي تعيشي...حاج مدفونة بقا
شغف:نشالله نشالله....طولي بالك شوي...لاقدر اخلق مشكلة اتطلق مشانها
ريتا:لك كل وضعت و عيشتك وبتقولي بدك تخلقي مشكلة!!!!
شغف:ريتا....انا قبلت بالامر الواقع من زمان...
ريتا:ماكنتي مضطرة تقبلي
شغف:بتعرفي تحت اي ضغط انحطيت!!!!
ريتا:بعرف بس كمان هاد كان ع حساب عمرك و حياتك
شغف:المهم اني عملت الي بيملي عليي ضميري وقلبي
ريتا:ايه.....ليكي كأن عم ينتقل جيران جداد