- فتون : هه بالمشفى ! وخطر اكبر قلتيلي ! لك بالمشفى في امن وحراسة وكل شي
- نور ؛ ليكي بلا لعي زايد وبلا ما توجعي راسي وتخليني وجعلك راسك .. اهتمي فيه منيح لان اذا بصرلو شي رح يكون قبرك تحت الشباك هاد
#طلعت نور من الغرفة وقعدت فتون جنب الشب وكان غفيان
- فتون : شو هالمصيبة يلي وقعت فيها هلأ .. حتى جزداني ضل بالسيارة معو
#ضلت قاعدة وكل شوي تعقملو وتطمن ع الجرح لحتى طلع الضو ورجع يمان ع البيت .. دخل ع الغرفة
- يمان : كيف صار
- فتون : مو منيح
- يمان : شبووو
- فتون : لازم يدخل المشفى.
- يمان : مشفى ما بقدر قوليلي اي شي تاني اعملو
- فتون : مافي
- يمان : ادوية اي شي اذا لزم بجبلو دكتور تاني
- فتون : الادوية رح تساعد لكم ساعة مو اكتر .. صدقني الصورة كتير ضرورية
- يمان : ما بقدر .. خليكي جنبو وعطيني اسم الادوية يلي لازمتك
- فتون : *****
- يمان : تمام
- فتون : جزداني ضل بالسيارة ممكن تجبلي ياه
- يمان : لا مو ممكن
- فتون : بس..
#طنشها وطلع بسرعة ليجيب الادوية .. وجابهن وعطتو المسكنات والادوية ورجع غفي .. وحتى فتون غفيت وهي قاعدة ع الكرسي وبعد كم ساعة صحيت فجأة لما الشب وقع كاسة المي وانكسرت
- فتون : انت منيح .. يا اخ يا اخ رد عليي لا لا تغمض عيونك .. خود نفس حاول تاخد نفس حاول حاول .. لكككك وينكنننن
#اول ما صرخت فتون وينكن دخل يمان ونور ع الغرفة
- يمان : شو صاااار
- فتون : خلال تلت ساعة لازم يكون بالمشفى والا ح يموت
- يمان : مستحيل .. وما لازم يموت
- فتون : فهمااام بقى لازمو عملية لازم يدخل المشفى للااازم شيل الرصاصة
- يمان : رح يقتلوه اذا بيعرفو انو بالمشفى
- فتون : تمام تمام اسمعني في باب تاني للمشفى والو طريق من هون مندخل منو ورح سجل العمليات والغرفة وكل شي باسمي او اسم اي شخص بدك ياه وهيك محدا رح يعرف واذا بدك بشدد الحراسة عليه بس لازم يدخل المشفى لازمممم
#سكت يمان ما عرف شو يعمل.. تطلع ب اخوه يلي عم يحاول ياخد نفس وما عم يقدر
- يمان : طيب
- فتون : يللاا
- يمان : بس اذا بصرلو شي انتي المسؤولة
- فتون : تمام
#اجو رجال من برا وحملوه للشب وحطوه بالسيارة وطلع يمان بالسيارة .. اجت نور بدها تقعد قدام مسكت الباب فتون
- فتون : بعتقد انتي ما الك شغل ومافي داعي تروحي
#بعدتا عن الباب وركبت ومشي يمان بالسرعة من الطريق يلي قلتلو عنو .
- فتون : وين جوالي
- يمان : ليش
- فتون : لازم احكي مع المشفى ليجهزوا كم شغلة
- يمان : رح تفتحي مكبر الصوت
- فتون : حاضر
#مسكت الجوال من ايدو ودقت ع المشفى
- مشفى الحياة تفضل
- فتون : ادم
- ادم : دكتورة
- فتون : ادم جهز غرفة العمليات بسرعة وجهز غرفة التصوير لازم اخد صورة قبل ما بلش العملية
- ادم : حاضر دكتورة
- فتون : مين موجود من الفريق
- ادم : انا وشيرين بس
- فتون : ومناوبة مين اليوم
- ادم : الدكتور زياد
- فتون : خليكن جاهزين وناطرين عند الباب الخلفي
- ادم : الباب الخلفي ؟؟
- فتون : ادم اعمل اللي عم قلك عليه وبس وحاول قد ما فيك ما تخلي زياد ينتبهلكن تمام واتصل بعلي يمكن احتاجو
- ادم : حاضر دكتورة
#سكرت الخط
- يمان : لا تنسي اي شي بصير انتي يلي بتتحملي المسؤولية
- فتون : ماشي
#بعد شوي وصلو للمشفى ودخلتو فتون من الباب الخلفي واخدوه الفريق منها واجى يمان بدو يفوت
- فتون : لوين
- يمان : ما بوثق فيكن
- فتون : لو بدي اقتلو كنت قتلتو من لما كنتو حواليه اتطمن وانطر برا رح مشي وراقو واعمل العملية
#قعد يمان ع مقعد وراحت فتون مشت الاوراق ودخلت ع العملية ويمان يقوم يمشي ويروح ويجي ويرجع يقعد لحد ما طلعت فتون وركض لعندا
- يمان : وينو
- فتون : هلأ رح ياخدوه ع الغرفة
- يمان : هو منيح
- فتون : منيح ولحقناه ب اخر نفس
- يمان : هلأ بنشوف اذا هو منيح او لا
#راحت فتون وضل يمان ناطر لحتى طالعو اخوه من غرفة العمليات ومشي معن للغرفة .. حطوه وتطمنو عليه وطلعو وهو قعد جنبو .. دخل دكتور تاني
- يمان : شو بدك
- عفوا ؟ انا جاي افحص المريض
- يمان : طيب
#بلش يفحص وبعدين مسك ابرة وبدو يحطها بالسيروم
- يمان : شو عم تعمل
- انا الدكتور هون
- يمان : طلاع لبرا مو انت المسؤول عنو
- عم قلك انا الدكتور لا تتدخل بشغل مو شغلك
#هجم عليه يمان ومسكو من الجاكيت وطالعو لبرا الغرفة
- فتون : شو عم بصير هون !! يمان
- يمان : مين هاد
- فتت لافحص المريض واعطي الابرة يلي قلتيلي عنا وهجم عليي
- فتون : زياد انا ما قلتلك الك.. انا قلت لادم
- زياد : ادم كان مشغول قلت بجي يعطيه الابرة انا
- فتون : تمام فيك تطلع
- يمان : ليش تقولي لحدا تاني

#اجت بدها تطلع
- زياد : لحظة ما بحقلك تتركيني هيك لازم تنقذيني
- فتون : لك انا ابي تركتو بين ايديهن بدك انقذك الك
- زياد : فتون ..
#بهاللحظة ضرب يمان الباب برجلو ودخل .. سكر الباب وقفلو وطالع المسدس
- زياد : يمان بيك خلينا نتفاهم شوف انا مسكتلك فتون ما خليتا تهرب بظن لازم تتركني عايش مقابل هالشي
- فتون : يخرب بيتك من حالككك
- يمان : فتون انطريني بالسيارة
- زياد : لك بتهرب لا تتركها
- فتون : من كل عقلك جاي انقذك انا لك انا جاي افضحك وافضح كذبك يا واطي
#رفعت الجوال وفرجتو المكالمة
- يمان : فتون انزلي انطريني بالسيارة انا رح خلص شغلي واجيي
- فتون : ماشي
#طلعت فتون وسكرت الباب ورجع يمان قفل الباب ..
- زياد : ما فيك تعملي شي المشفى مليان امن
- يمان : عنجد خفت كتير
#حط المسدس ع الطاولة
- يمان : شوف ها تركت المسدس لا تطلب الامن
- زياد : هاا كنت عم تعمل مراجل قدام فتون يعني .. اطلع برا بسرعة مشان ما اطلب الامن
- يمان : مزبوط وليكني رح اطلع بس مو قبل ما العن شرفك يا وسخ
#هجم عليه وبلش يضربو لحتى شوهلو وجهو وكسرلو عضامو .. قام يمان وعم يرتب تيابو
- يمان : شغلتين لازم ما تنساهن الاولى انو لو فكرت تلعب معي مرة تانية رح اقتلك والتانية اذا بتحاول تفكر مجرد تفكير انك تأذي فتون رح تلاقيني بوجهك وكمان وقتا رح اقتلك فاهممم
#هز زياد براسوو وهو عم يمسح الدم من ع وجهو . حمل يمان المسدس وطلع
- زياد : الله يلعنك .. ما بكون زياد اذا ما بقتلك يا حشرة
_
#ركب يمان بالسيارة
- فتون : قتلتو ؟
- يمان : شوفك خايفة عليه
- فتون : بينخاف منك صراحة حتى عدوي ما بسخى سلمك ياه
#رجعو ع البيت وكان الكل مشغول وعم بحضر ويزينو الحديقة
- فتون : افف
- يمان : شكلا ما عاجبتك الزينة
- فتون : لا العريس هو يلي ما عاجبني عنكن تبديل
- يوسف : اذا العريس كان سيء كتير بنبدلو اكيد
#ابتسمت فتون ليوسف وضمتو
- فتون : سيء كتيررر
#سحبها يمان
- يمان : احترمو اني واقف.
- يوسف : صح العريس سيء بس شكلو بغار
- يمان : هه انا .. مستحيل
- يوسف: وانا بشهد
- يمان : اخيييي
- يوسف : خلص تعا بدي ياك بشغلة
- يمان : اطلعي ع الغرفة
- يوسف : الكل بغرفة نور عم يجهزو حالن روحي لعندن
#تطلعت بيمان يلي رفع حواجبو بمعنى لا بدون ما ينتبه يوسف
- فتون : لا معلش انا بتجهز لحالي
#دخلت فتون ع الغرفة لقت فستان ابيض بسيط وطويل للارض
___
- يوسف : امجد
- يمان : شبو
- يوسف : ما اله اي اثر
- يمان : اريح
- يوسف : كيف اريح يمان كيف اريححح
- يمان : شو بدك اعمل يعني
- يوسف : يمان ركز معي امجد دخل بينا وعرف كتير شغلاااات عن شغلنا وغير هيك انت كسرتو للولد تكسير وبعدين بيوم وليلة بيختفي لكك لدرجة انو حتى اسم بالنفوس ما الو
- يمان : هاد بدل ع انو رح نلعب مع عيلة قوية شكلنا
- يوسف ؛ قوية وكتير .. صرلي اسبوع عم حاول اعرف لاي عيلة ممكن يكون عم يشتغل بس عبث
- يمان : طيب الولد مو المفروض انه يتعالج
- يوسف : بعض المشافي تأكدت انو هو مانو فيها ولكن في مشافي تانية ما قدرنا نشوف سجل العمليات او سجل الدخول او بيناتن بشكل عام
- يمان : جربت تدفعلن
- يوسف : لا لانن من المشافي يلي اسمهن معروف وما بيقبلو رشوة ومستحيل يوافقو ع شي ممكن يخرب سمعة المشفى
- يمان : والحل
- يوسف : في حل براسي بس ما بظن يمشي حالو
- يمان : شو هو
- يوسف : فتون
- يمان : فتون !! فتون شو دخلها بشغلنا
- يوسف : فتون دكتورة ومعروفة كتير وحسب ما فهمت اي دكتور بيقدر يشوف بيانات المشفى بحجة انو بدها تساعد بالعملياات الخطرة .. بس فتون مستحيل توافق
- يمان : اتركها علي
- يوسف : يمان ما رح تهددها وما بدنا اي مشاكل لحد هلأ ما بعرف ليش امجد ما اشتكى عليك بس رغم هيك خبرت المحامين من هلأ ليكونو جاهزين .. خلينا نخلص من هالمشكلة وبعدين ادخل بمشكلة تانية الله يوفقككك
- يمان : تمام خلص ما رح هددها
#دخلت جليلة لعندن
- جليلة : انتو لهلأ لسه ما جهزتوو يلا
- يوسف : لسه بكير
- جليلة : ولاحقين ع الشغل يلا
- يمان : قوم قوم قبل ما تقتلنا
- جليلة : انت وين رايح
- يمان : ع غرفتي
- جليلة : ممنوع
- يمان : غرفتيييي
- جليلة : قلت ممنوع فتون فيها .. انا رح خبرن ياخدو طقمك ع غرفة يوسف .. واذا بعرف انك رحت ع غرفتك مو نيالك
- يوسف : عنديي خلص ما رح اتركوو
_
#كانت واقفة قدام المراية لابسة فستان للارض وكمامه شفافة تصميم بسيط كتير ورافعة شعراتها لفوق بتسريحة بسيطة ونزلت خصلتين ع وجها ومكياج خفيف .. حطت تاج صغير ع راسها
- فتون : انتي اليوم كان المفروض يكون عرسك .. نفدتي اليوم فتون بس بكرى شو .. لما يجي يمان ويقلك العرس اليوم شو .. يا الله ليش هيك ليش عم تمتحني هيك بعمري ما تخيلت حتى مجرد تخيل انو رح ادخل ع هالعالم .. العالم يلي هربت منو سنين طويلة ليكك فتون اليوم انتي عم تتزوجي من واحد مافيااااا .. يا رب اي معجزة