#آنا_3 #آنا
@rwayate
الحلقة الثالثة
علاقتي بسراج توترت كتير .. صار يرن عليه واسكر الخط بوجهه لحد ما اجا عندي عالفيلا وصار يصرخ ويحكيلي ليه هيك بتعملي فيه وليه تغيرتي معي من لما رحتي عند الشيخ .. ضل وراي ويحكيلي هلأ بدي اعرف شو حكالك الشيخ .. بس أنا ماحكيتله شي وتركته يصرخ .. صار يحكيلي آنّا أنا بحبك مشان الله صدقيني ومابدي حدا يلعب براسك ويوخدك مني أرجوكي بترجاكي افهميني أنا بحبك وعم بضحي عشانك ومستحيل أتخلى عنك وحتى بوفاة اهلك ضليت جنبك ومابدي منك الا تحبيني .. بس أنا مابعرف شو صارلي بعد كلام الشيخ.. وصرت اشك بكل حركة بعملها سراج واسترجعت كل الأحداث اللي مرت خلال الفترة اللي نقتل فيها بابا وماما .. وبكل شي كان يصير كان سراج ييجي متاخر بعد الحدث.. ماحكيت لسراج اللي حكاه الشيخ حتى اطبق الكلام اللي طلبه مني واقتل حيوان ويشرب من دمه حتى يروح العمل اللي عملي ياه ويبعد شيطانه عني .. الشرطة ضلت براقب البيت من بعيد وضلت معي وين مابطلع ووين مابروح بس انا طلبت منهم هالمرة ما يلحقوني.. ورحت عالسوق واشتريت ارنب .. وحطيته بشنته .. وأنا مروحه دخلت عالمول واشتريت أكل لأنه صارلي بهالفترة ماعم اكول منيح .. ونزلت عالكراج حتى اركب سيارتي وركبتها وحاولت اشغلها ما اشتغلت صرت احاول واحاول .. ما حدا بالكراج غير أنا والباب الرئيسي مسكر .. حاولت انزل من السيارة لقيت السيارة تسكرت من برا وكأنه حدا سكر بابها ومنعني اطلع منها .. صرت اصرخ جوا السيارة وابكي واضرب على الشباك .. السيارة ما عم تتحرك وأنا محبوسة جواتها ..حاولت اشغلها .. رفعت راسي لفوق لقيت كلام عحيط الكراج مكتوب اطلعي وراكي .. نرعبت من الشي المكتوب وضليت خايفة اتطلع وراي يطلعلي شي او يكون المجرم ويكون اخر مشهد بحياتي .. قررت اكون شجاعة بهاللحظة واطلع وراي .. اطلعت وراي وشفت ادين عم يدفشو السيارة وصرت اصرخ وأبكي وباب السيارة مسكر عليه والكراج مافيه ولا بني ادم وحتى سيارات الناس وين الناس عنهم .. عم ببكي وما حدا شايفني .. والسيارة ماعم تشتغل .. تذكرت كلام الشيخ بإنه لازم اقتل الحيوان حتى يروح العمل عني بس المهم احتفظ بدمه حتى يشرب سراج منه .. مسكت الأرنب من الكيس وطعنته بمفتاح السيارة وضليت اطعن فيه لحد ما مات ونزل دمه .. أنا عم ببكي ومنظر الدم بالسيارة عكل الفرش والمجرم عم بدفش السيارة لآخر الكراج ناحية الحيط وانا مش متمالكة أعصابي وعم ببكي من خوفي .. كل اديه دم ونزلت راسي لتحت الكرسي حتى لما ينكسر الزجاج ما اتأذى ويصيرلي إشي .. ضل يدفش وانا أبكي واصرخ ومش شايفة وجهه وماعندي الشجاعه لأطلع عليه اصلاً.. رنيت على سراج والمشكلة انه رد عليه وحكالي وينك انتي حكيتله بالمول والمجرم عم يدفش السيارة رح يموتني .. صوتي ماكان طالع والمجرم عم بلعب معي بنص الكراج ومافي حدا غير أنا وهوه بس .. عرفت انه المجرم مش سراج لأنه الصوت كان بمكان عام ولو رد عليه من الكراج كان طلع لصوته صدى صوت .. وبطلت عارفة افكر والخوف عم بزيد بقلبي كل مرة .. اتصلت بعد مارنيت على سراج على الشرطة .. بس حبيت تكون اول مكالمة مع سراج حتى اتأكد انه رح يرد عليه ولا لأ .. وبالفعل رد عليه وسمعت صوته وحواليه ناس وهاد زاد شكي بالشخص اللي عم بلعب بعمري .. المجرم ضل يدفش بالسيارة لحد ما ضربت بالحيط وانكسر قزاز السيارة الأمامي وأنا عم ببكي وبصرخ بالكراج وماحدا سامعني .. اغمى عليه وبعد ربع ساعه كان سراج بالكراج والشرطة شافو الدم اللي بالسيارة والأرنب المقتول وأنا مغمى عليه .. فكروني متت وسراج صار يبكي ويصرخ ووعيت بعد نص ساعه بالمستشفى وصوت سراج جنبي ماسك ايدي ودموعه على طراف ايدي .. صحيت وبوست ايده وحكيتله انا اسفه حبيبي اني شكيت فيك .. بترجاك تسامحني .. حكالي رح يوخدني عند أمه بكرا عشان يعرفني عليها وحتى تصير الخطبة .. بطلت اروح عالجامعه مع اني سنة اولى طب وما عم بداوم ولا بهتم وكل هاد بسبب موت بابا والشغلات اللي عم بتصير معي .. الشرطة ما وصلو للمجرم اللي عم بهدد حياتي .. صرت انام بوقت متأخر كتير والشرطة عم تحرس المكان برا ..وبيوم دخلت اخد شوّر متل أي وقت.. كانت نيرفا بالصالة .. والمية فجأة نقطعت عن الحمام .. صرت انادي عليها حتى تشوف حل لقطعة المية .. ما عم بسمع غير صوت التلفزيون وصوتها اختفى مرة تانية .. خفت واتصلت على الشرطة .. رد عليه الشرطي وبحكيلي رح نغير الدورية وبعد شوية رح تيجي دورية جديدة على البيت .. تشنجت من الخوف وصرت اصرخ عليهم وبحكيلهم الوضع ما بطمن بالبيت وفي شي عم بصير بترجاكم بسرعه تعالوا ..سكرت باب الحمام عليه وضليتني على أعصابي .. وفجأة صار يطرق باب الحمام عليه متل حدا بده ارد عليه .. بالأول فكرتها نيرفا وحكيتلها شو صار بالمية .. بس زاد الطق على الباب وكل شوي يطق بدون جواب .. وفجأة صار يحاول يخلع الباب .. انا ارتعبت وصرت اصرخ وابكي وماعاد فيه اللي بصير معي مش طبيعي ومابتصوره عقل ..