#ملاك_الرحمة
#واقعية_بقلم_فيلوفوبيا
#الجزء_الاول
@rwayate
المجتمع حولنا....هو الحاكم الظالم...هو الدائرة السوداء الي بتحيط فينا....هو حفرة من النار...اذا وقعت بألسنتها
..مستحيل تطلع سليم...لازم تطلع مكسور...مشوه من جوا قبل برا...و تعبان كأنك خايض حرب عن سنين
قصتي انا....عن بنت...ظلمها مجتمعها كتير...و داس عليها متل ماداس على كتير قبلها...
انا ميس....عمري 21 سنة...وهي قصتي:
ام ميس:زلغوطة للعروس ياصبايا...تؤبريني مأحلاكي طالعة تؤبريني...مو هيك سلفتي
ميس:شكرا ماما
ام فادي(ام العريس)دخيل الله.لكن لك سلفتي....تسلملي كنتي الغالية و الحلوة
ميس:يخليلي ياكي مرت عمي
ام فادي:تؤبريني ياميس..بدا تجي سعاد تباركلك....
ميس:كرمالك بس يامرت عمي
ام فادي:تؤبريني بتعرفي انو الموضوع مو بايدي و عمك كان رح يعمل مصيبة لو عارضنا جيتها عالعرس
ميس:معلش مرت عمي...كلو بيهون كرمال خاطرك
_اجت سعاد....ضرة حماتي...كانت ست قوية كتير و كلمتها ماشية عالكبير قبل الصغير ببيت حمايي
هيه الزوجة التانية لعمي و حماتي الزوجة الاولى الي رب العالمين مارزقها غير بفادي زوجي و ابن عمي...وكرمال هيك عمي كان يفضل سعاد ام الصبيان على حماتي و كان يمشي كلمتها و ينفذ اوامرها.....قعدت جنبي و لفت رجل على رجل وبقيت قاعدة حتى اجا العريس و رحنا عالبيت سوا....لاني سكنت بغرفة عند بيت عمي_
فادي:مبروك ياعروس
ميس:يبارك فيك حبيبي
فادي:انا ربي رضيان عليي حتى بعتلي ياكي
ميس(ابتسمت بخجل)
فادي:سبحان الي خلقلك هالعيون شو حلوين
ميس:حاج تحكي معي هالحكي والله بخجل
فادي:لاتخجلي...انتي حلالي...وبيحقلي اتغزل فيكي براحتي
_كان عمري بوقتها 16 سنة تزوجنا انا و فادي و عشنا مع اهلو ببيتهن الكبير...هو كان منيح معي...و كان يحبني و يدللني...بس لما يوصل الموضوع لخالتو سعاد مايقدر يحكي شي لانو اذا حكا ابوه رح يوقف بوجهو
و سعاد حبت تلعب دور الخالة مرت الاب و الحمايةمعي انا....و صارت تشغلني اكتر من بناتها...و تبهدلني عالطالعة و النازلة...وفرضت شخصيتها عليي و على زوجي_
ميس:انا ماعاد اقدر يافادي...ماعاد اقدر تعبت
فادي:ياميس بدك تتحملي...مو بايدنا هي خالتي و كلمتها ماشية علينا
ميس:بس والله عم تهلكني بالشغل و بناتها عم ياخدو من تيابي وغراضي بدون اذني
فادي:معلش حبيبتي....طولي بالك الا ما الله يفرجها
ميس:ايه...الا ما الله يفرجها
فادي:طيب ضحكي...هي انا بحبك..و جنبك
ميس:اي انت بتحبني و جنبي بس مابتقدر تدافع عني بكلمة
فادي:بدك ياها تخلي ابي يغضب عليي!
ميس:لا خليها ظالمتنا احسن
فادي:خلصنا ولوو..غيري هالسيرة و.فرديها بقا
ميس:(ابتسمت)
فادي:اي هيك ها....دخيل الحلو شو بحبو
_مع انو فادي كان منيح وكان ينسيني تعبي اخر النهار....بس ماكان يقدر يرفع شي من الظلم عني....و اهلي كل ماشتكيت الهن بيسكتوني و بيقولو كل البنات هيك و تحملي وهاد نصيبك
يعني كنت مجبورة اتحمل غصب عني
بلشت الاوضاع بالبلد تتركركب...و ماعادت امان متل اول
ماعاد حدا سترجا يتأخر على بيتو و المحلات تسكر من بكير...الاوضاع من سيء لاسوأ
و رغم كل هالخوف سعاد ماكفت بلاها عني
لحد ما اجا اليوم الي......
ميس:يامرت عمي فادي لهلأ مارجع
سعاد:نشالله مابيرجع
ام فادي:سعاد ضبي لسانك....وينك يا بنيي وين رحت
ميس:صرلو من الصبح طالع..غلي قلبي عليه كتير
ابوفادي:اتصلو ع جوالو
ميس:اتصلت مسكر من الضهر
ابوفادي:وين بدي يكون هالولد
سعاد:قلنالو لا تطلع مابيرد...قلنالو انضب بهالبيت مابيرد
ام فادي:هلأ بيرجع نشالله
سعاد:اييه...نشااالله يرجع
ميس:انتي ليش هيك عم تحكي!!مابدك ياه يرجع!مابدك ياني افرح فيه....ليش عم تتمني مايرجع فهميني...نشالله ولادك الي بيروحو ومابيرجعو
سعاد:شو عم تقولي وليه!!
_ماشفتها غير قامت و نزلت فيني ضرب....و ماحدا قدر يشيلها عني....هربت من تحت ايديها و ركدت لغرفتي قفلت على حالي الباب و بكيييت كتير...صار نص الليل و طلع الضو و فادي مارجع كان النا 4 شهور متزوجين
ومن يومها انفقد و ماعاد شفتو
وبعد شهرين اجانا خبر انو انقتل...وقتها حماتي انهارت
و ركدنا فيها عالمشفى و اجاها القلب على اثر هالمصيبة
سعاد كفت بلاها عني و عن حماتي فترة صغيرة لما شافتنا اديش مكسورين....
انا كنت طفلة...مالحقت فتح عيوني على فادي الا اخدت الدنيا مني...
عمي خلاني امسك العدة ببيتو....وبعد العدة ماسمحلي اطلع اسكن ببيت اهلي...لانو منطقة اهلي الاوضاع فيها اسوأ من مطقتنا بكتير
و اصوات الرصاص ماعم تهدا هنيك...لهيك اضطريت ابقى ببيت عمي بينما تهدى الاوضاع بمنطقة اهلي و ارجع لعندهن
كان اغلب شغل البيت عليي و ماعدا الحكي الطالع والنازل الي اسمعو و البهدلة على اقل غلطة
بس سعاد ماقدرت تشوفني اعدة بغرفة لحالي.....
سعاد:اي ابن عمي
ابوفادي:خير
سعاد:بدي جوز ابني كامل
ابوفادي:اي جوزي مين ماسكك...شايفتيلو شي بنت؟
سعاد:بنت اخي مروة عين الله عليها